1. ¿Chúsiá mi we natéami niraa iné japi Jeobá tamó chiliweli echi Biblia?

 ¡ATI matétarabá iyá Jeobá jiti tamó chiliweli echi Biblia! Jiti echi jitra echi ko tamó iyá we aʼlá busuréliami japi tamó iʼwírima machiyá piri ta nokiboa japalí ti olasa karú ikiwáami. Ayénachó tamó ruyé echi aʼláala namuti japi ikimea pe aminana. Nalí, wabé natéami ko ju japi echi Biblia jitra, Jeobá ko tamó ané japi chúriká ju echi. Ati we simá nili natia japi chu isíami ju Jeobá. Alí jepuná tamó iʼwiri jiti ta aminabi mulíwinalipo Jeobá alí echi amígowala nipo (Sal. 25:14).

2. ¿Piri isili Jeobá jiti ta machiboa echi jitra?

² Jeobá ko nakí japi echi pagótami machimea echi jitra. Jiti la, chabé echi ko isili japi jaré rimuma, inema jaré namuti alí néeli echi ángeles jiti tamó ruyema echi jitra (Núm. 12:6; Hech. 10:3, 4). Nalí, suwaba echi namuti ke oserúami nílaká, jipi ke ti oméripolí binea echi jitra. Jiti la, Jeobá nuleli jaré japi osimea bilé líbrochi japi echi nakili japi ta machiboa (Jer. 30:2). We ti aʼlá bichiwi japi oserúa uchuwi echoná Biblia we aʼlá tamó iʼwiri, jiti Onorúami sinibí we aʼlá isimí (Sal. 18:30).

3. Jiti jipi chéami rojorama echi Biblia, ¿piri isili Jeobá? (Isaías 40:8).

³ (Leeri Isaías 40:8). Echi Biblia ko ma we chabéwami ju alí oserúami nili echoná namuti japi sapú uwí, nalí japi oserúami uchuwi echoná, a bijí iʼwiri japi echi nijewi. ¿Chúsiá a rojorali japi anili echoná? Tákoré ke machiwá acha nirúa echi oselí japi bachá oserúami nili, Jeobá ko isili japi niwárami nima wiká copias. Echi copistas ke sébali aʼlá nokáami nili, nalí we aʼlá osali suwaba echi letras.  Bilé rijoi we machíami anili echi Oserúami Hebreas jitra: “Ati omero ne bichíwika aniyá japi ke nirú bilecho oselí japi we aʼlá oserúami ju japi riká nili bacháwala”. Tákoré ma chabé jonsa oserúami nili echi pagótami jitra japi ke sébali aʼlá nokáami nili, alí echoná namuti japi sapú uwí, we ti aʼlá machí japi oserúa chukú echoná Biblia, a ju japi Onorúami nakili.

4. ¿Piri binepo jena binelíwami?

⁴ Jeoba nijí “ne suwaba echi wabé galabéala máputa ʼyárami ju” (Sant. 1:17). Alí echi Biblia ju bilé chiliwéliami we natéami japi Jeobá tamó iyali. Japalí bilé tamó chiliwesa bilé namuti, tamujé ko machí japi echi we tamó galé alí japi echi machí japi ta newalé. Echi riká cho, Jeobá we aʼlá tamó machí alí machí piri ta newalé, jiti bela tamó chiliweli echi Biblia alí echi leérika ati machí japi chúriká ju echi. Jenaʼí binelíwami ata binepo bikiá namuti japi echi Biblia néwariwéliti japi chúriká ju Jeobá: we machíami ju, wachíniga isíami alí we galéami. Bachá binepo japi echi Biblia aní japi Onorúami we machíami ju.

5. ¿Chúriká néwariwéliti echi busuréliami japi uchuwi echoná Biblia japi Onorúami we machíami ju?

⁵ Jeobá machí japi ta newalé we aʼlá busuréliami. Jiti la tamó iyali echi Biblia japoná tamó ruyé chúriká ti nokiboa. Alí echi busuréliami iʼwiri echi pagótami jiti aʼlá pirélima. Japalí Moisés osali echi bachá libros japi uchuwi echoná Biblia, echi ko aneli echi israelitas japi echi raʼíchali wabé natéami ju alí japi echi jitra sinibí pirélima (Deut. 32:47). Echi a nijéwisaká japi aní echi nulalíwami, aʼlá pirélima riweili alí we kanílika (Sal. 1:2, 3). Tákoré echi Biblia chabé jonsa oserúami nili, echi busuréliami japi uchuwi echoná, a bijí iʼwiri echi pagótami. Japi riká, echoná página internet jw.org, japoná aní “Binesa echi Biblia jipi ko we kaníliami ju”, ami riwimea 50 simírikami biografías japoná ruyé japi echi pagótami iʼwérili nokali riwea japi chati ju alí jipi ko we kanila piré, jiti nijéwili echi busuréliami japi aní echi Biblia (1 Tes. 2:13, TNM).

6. ¿Chúsiá ti aní japi ke nirú bilecho libro japi riká echi Biblia?

⁶ Ke nirú bilecho libro japi riká echi Biblia. ¿Chúsiá? Jiti echi japi tamó iyali we jiwérami ju, ke siné mukú alí we machíami ju. Nirú wiká libros japi echi pagótami a bijí leeri, tákoré echi japi osali ma mukuli. Nalí ma wilí simírisa, echi busuréliami ko ma ke iʼwiri echi pagótami. We be nalí, echi busuréliami japi uchuwi echoná Biblia ke echi riká ikí. Echi ko a iʼwírili echi pagótami chabé piréami alí jipi chéami. Jeobá ko nijí echi espíritu santo jiti aʼlá inámipo japalí ti leeri echi Biblia alí jiti nijéwipo japi aní echoná (Sal. 119:27; Mal. 3:16; Heb. 4:12). Echi jitra ta machí japi Jeobá tamó iʼwírinali. ¿Kechi ko echi mi iʼwérili iyá jiti mi sinibí leérinalima echi Biblia?

7. Japi aní echi Biblia, ¿chúriká iʼwírili chabé echi Onorúami puéblowala jiti napawika nima?

⁷ Bilecho namuti japi riká echi Biblia néwariwéliti japi Onorúami we machíami ju, echi ko ju japi iʼwiri echi puéblowala jiti sinibí napawika nima. Japalí echi israelitas moʼili echoná kawí japi Onorúami iyali, echi ko wikanami simíali pirélisia. Alí sinúrika nóchali olali japi riká,  jaré rochí sirúami nili, namuti jákami niséami alí icháami. Jiti rojá pireili, echi ko a omérima riweili ma ke néwalayá jaréala israelitas. Nalí ke echi riká ikili jiti Jeobá ko isili japi sinéami napawima kipumia echi binoy Raʼicháala alí binemia echi jitra (Deut. 31:10-13; Neh. 8:2, 8, 18). Natá japi chu níliliré bilé israelita nijéwami, japalí séali Jerusalén alí echoná inea wiká millones israelitas japi jaréana ka jonsa sili nijéwisia Jeobá. Echi riká iʼwírili Jeobá jiti sinibí napawika nima. Pe aminana, echalí bachá siglo echoná congregación niruli wiká cristianos jaréana piréami, alí jaré echi sinúrika raʼíchami nili, jaré ko risóati alí jaré ko we winomíwami. Nalí sinéami echi napawika nóchili Jeobá jiti we natéami niraa ineli echi Onorúami Raʼicháala. Ayénachó japi kulí napawísili echoná congregación, a omérili inamia japi aní Onorúami Raʼicháala jiti jarecho cristianos ruyeli alí sinéami ka napawika simárili anakupi niraa (Hech. 2:42; 8:30, 31).

8. ¿Chúriká nee Jeobá echi Biblia jiti echi puéblowala jipi napawika nima?

⁸ Jipi Jeobá ayénachó nee echi Biblia binérimia echi puéblowala alí jiti napawika nima. Echoná asambleas alí napawíliwachi, ata leeri alí ti biné japi aní echi Biblia. Alí suwaba echi namuti japi ta olá binemia Jeobá jitra, echoná Biblia machibúrami  ju. Jiti la, echi riká ti machí japi Jeobá nee echi Biblia jiti echi puéblowala napawika nochama (Sof. 3:9).

9. ¿Jepi bi ju japi aʼlá inami japi aní echi Biblia? (Lucas 10:21).

⁹ Binepo bilecho namuti japi newaré japi Jeobá we machíami ju. Echi ko isili japi wikaná japi oserúami uchuwi echoná Biblia, inámima bi echi pagótami japi ke niráami ju (leeri Lucas 10:21). Alí echi pagótami omáana Wichimóbachi piréami omeri leeria echi Biblia. Bilé rijoi we machíami jéanili: “Ke bi ju japi we leériwa, nalí japi wiká we biné japi aní echoná”. Nalí echi japi ke niráami ju, a omeri inamia alí nijewia japi aní echoná (2 Cor. 3:15, 16, TNM).

10. ¿Chúriká ayénachó ti machí japi echi Biblia néwariwéliti japi Jeobá we machíami ju?

¹⁰ Binepo bilecho namuti japi aní echi Biblia alí japi néwariwéliti japi Jeobá we machíami ju. Echi ko ke bi nee echi Biblia binérimia sinéami pagótami, nalí ibili niraa tamujé bineri alí tamó ku kaníliti. Japalí ta leeri echi Biblia ati iné japi Jeobá ko aʼlá machí japi ta newalé (Is. 30:21). Japalí mi olali karú ikiwáami, ¿achi mi leérili bilé texto japi nili japi mi newaleli? Ayena, wisabé mi echi riká ikíliré. Echi Biblia ko oserúami nili jiti wiká millones pagótami leérima, nalí we aʼlá iʼwiri ibili pagótami jiti Jeobá ju japi niwali alí echi ko we machíami ju (2 Tim. 3:16, 17).

11. Japalí osairu echi Biblia, ¿chúriká néwariwélitili Jeobá japi wachíniga isíami nili?

¹¹ Jeobá ayénachó wachíniga isíami ju (Deut. 32:4). Echi ko aniwáami ju japi Jeobá ko sinéami chopi riká iné alí we galé (Hech. 10:34, 35; Rom. 2:11). Jiti la, japi riká oserúami nili echi Biblia néwariwéliti japi echi riká ju. Japi riká echi bachá 39 libros ne sojí suwaba oserúami nili hebreo niraa, jiti suwaba echi israelitas echi riká raʼíchami nili. Nalí, ma bachá siglo, ne sojí suwaba pagótami machiyé raʼichia griego niraa. Jiti la, echi upáwala 27 libros japi olá echi Biblia oserúami nili griego niraa. Jeobá ko we galéami nili, jiti la isili japi ke bilepi niraa raʼicháliami oserúami nima echi Biblia. Jipi, ne sojí echi 8,000 millones pagótami japi ta piré jenaʼí Wichimóbachi, sinúrika raʼíchami ju. ¿Chúriká ta sinéami omero machiyá Jeobá?

12. ¿Chúriká ikísimi japi aní Daniel 12:4 jipi jubá rawé?

¹² Jeobá ko anili japi ma jubá rawé “aminabi we machísima japi ne bichíwali ju”, jepuná ko aniwáami ju japi wiká pagótami aʼlá inámima japi aní echi Biblia (leeri Daniel 12:4). Jepuná ko echi riká ju jiti ma wiká traducíriwa echi Biblia alí wiká millones buyanáliwa, alí jarecho oselí japi ta olá inámimia japi aní echi Biblia. Ke nirú bilecho libro japi we traducíriwa alí buyanáliwa. Nirú wiká traducciones japi ralinéliwa alí we natijí. Nalí echi Jeobá puéblowala ma traducírili echi Biblia jomarúami o pe uchíi bi niraa simírikami 240 raʼicháliami, alí sinéami omero olayá echi Biblia ke natétika. ¿Chúriká nikuuro jepuná? Jipi ko millones pagótami omáana Wichimóbachi piréami, machísimi echi Onorúami Gobiérnowala kecho séachi Jeobá rawéwala (Mat. 24:14). Jeobá ko wachíniga isíami ju, jiti la nakí japi wiká pagótami machimea echi jitra leérika echi Biblia, ayénachó echi riká isimí jiti echi ko we tamó galé.

13. ¿Chúsiá ti aní japi echi Biblia néwariwéliti japi Onorúami we galéami ju? (Juan 21:25).

¹³ Echi Biblia ayénachó néwariwéliti japi Jeobá we galéami ju (1 Juan 4:8). Natabo chu iyiri namuti nakili Onorúami japi oserúami nima echoná Biblia alí chu iyiri ko ke. Echi ko we aʼlá tamó ruyé piri ta newalé jiti ta echi amígowala nipo alí kanílika pirélipo jipi alí pe aminana. Jiti Jeobá we tamó galé, echi ko ke oserúa riweli echoná Biblia echi namuti japi ta ke newalé (leeri Juan 21:25).

14. ¿Chúriká ayénachó néwariwéliti echi Biblia japi Onorúami we galéami ju?

¹⁴ Japi riká oserúami ju echi Biblia, ayénachó néwariwéliti japi Jeobá we galéami ju, ¿chúsiá? Jiti echi ko ke tamó iyali wiká nulalíwami jiti ibili niraa nijéwipo. Nalí, jiti we aʼlá nátika nokiboa echi ko tamó bineri néeka profecías, busuréliami we natéami alí ejemplos echi pagótami jitra japi chabé pireili. Echi riká echi Biblia tamó iʼwiri jiti we galepo Onorúami alí ne sulachí jonsa nijéwipo.

15. a) ¿Chúriká néwariwéliti echi Biblia japi Jeobá we tamó galé? b) Echi tiwé, echi remalí alí echi hermana japi machina echoná foto, ¿jépuká jitra natia muchuwi? (Gén. 39:1, 10-12; 2 Rey. 5:1-3; Luc. 2:25-38).

¹⁵ Echi Biblia néwariwéliti japi Jeobá we tamó galé. Ati machí jepuná namuti jiti echoná oserúa uchuwi echi pagótami jitra japi nílili japi riká tamujé. Japalí ti leeri echi Biblia, ati iné japi echi “rijói níili achigó yiri mapuyiri tamujé” (Sant. 5:17). Ayénachó japalí ti leeri chu isíami  nili Jeobá echi pagótami yúa japi nili japi riká tamujé, ati machí japi Jeobá “ne wabé natimáami ju, ne wabé galéami ayénachó” (Sant. 5:11).

16. ¿Piri ta biné Jeobá jitra japalí ti leeri echoná Biblia japi echi ko ku wikáwili japi ke aʼlá nokali? (Isaías 55:7).

¹⁶ Echoná Biblia ayénachó ti biné bilecho namuti japi riká Jeobá néwariwéliti japi we tamó galé. Echi Biblia ko tamó ané japi Onorúami ke siné tamó riwema japalí ti ke aʼlá nokisaa. Echi israelitas wisabé niraa ke aʼlá nokayé, nalí Jeobá a ku wikáwili japalí ne bichíwali omona nili alí riweli cha nokayá (leeri Isaías 55:7). Echi cristianos bachá siglo piréami, ayénachó we aʼlá machili japi Jeobá we galé echi. Japi riká, Jeobá ko isili japi echi apóstol Pablo iʼwérili iyama echi hermanos, jiti ku wikáwima alí ku kanílitima bilé rijoi japi we omona nílili alí riweli echi nasawíliami chati japi isili (1 Cor. 5:1-5; 2 Cor. 2:6, 7). Ati we simá nili machiyá japi Jeobá ke siné awénili riweli japi echi nijéwami ju, tákoré echi ko isini kaachi ke aʼlá nokali, nalí echi ko simárika iʼwírili alí raʼámili jiti aʼlá ku nokimea. Jipi echi riká cho isimí echi pagótami yúa japi we omona nili alí riwé echi chati namuti japi noká (Sant. 4:8-10).

17. ¿Chúsiá echi Biblia bilé chiliwéliami we natéami ju?

¹⁷ Jeobá ko tamó iyali bilé chiliwéliami we natéami. ¿Chúsiá we natéami ju? Jiti echoná ta biné japi Onorúami wachíniga isíami ju, we machíami alí we galéami. Ayénachó, echi Biblia néwariwéliti japi Jeobá ko nakí japi ta echi machiboa alí echi amígowala nipo.

18. ¿Chúriká néwariwélitipo japi ta we natéami niraa iné echi Biblia?

¹⁸ Ata we natéami niraa inésaré echi Onorúami Raʼicháala jiti bilé chiliwéliami we natéami ju japi Jeobá tamó iyali (Sant. 1:17). Jiti la néwariwélitipo japi ta waʼlú matétarabá iyá Jeobá echi chiliwéliami jitra. ¿Chúriká nokiboa? Kecho bijí leérimia echi Biblia, bachá raʼichabo Onorúami yúa alí natabo japi ta biné echoná. Echi riká ti nokisaa, Jeobá tamó iʼwírima jiti ta machiboa wiká namuti echi jitra (Prov. 2:5).