1. Wai na yu tenkyu tru long Baibel?

 YUMI tenkyu tru long God Jehova long em i givim Baibel long yumi! Long rot bilong Baibel, em i givim yumi ol tok i kamapim savetingting we inap helpim yumi long karim ol hevi em yumi bungim long nau. Na tu, em i helpim yumi long bilip na wet long gutpela samting bai kamap bihain. Bikpela samting moa, Jehova i yusim Baibel long kamapim klia planti gutpela pasin bilong em. Yumi pilim tru long bel taim yumi tingim tingim ol gutpela pasin bilong em, na dispela i kirapim yumi long i go klostu moa long God bilong yumi na kamap pren bilong em.​—Sng. 25:14.

2. Long wanem ol rot Jehova i kamapim klia em yet long ol man?

² Jehova i laik bai ol manmeri i save long em. Long bipo, em i kamapim klia em yet long rot bilong ol driman, ol visen, na long rot bilong ol ensel. (Nam. 12:6; Apo. 10:3, 4) Tasol olsem wanem ol man inap stadi long ol dispela driman, ol visen, na ol tok bilong ol ensel sapos i no gat wanpela man i bin raitim? Olsem na i gat gutpela risen na Jehova i bin kirapim ol man long “raitim long wanpela buk” ol samting em i laik bai yumi save long en. (Jer. 30:2) “Pasin bilong God tru i stret olgeta,” olsem na yumi ken bilip tru olsem dispela rot em i yusim bilong toktok long yumi em i nambawan gutpela rot na em inap helpim yumi.​—Sng. 18:30.

3. Jehova i mekim wanem na bai Baibel i stap yet long nau? (Aisaia 40:8)

³ Ritim Aisaia 40:8. Tok Bilong God i bin stiaim rot bilong ol bilipman na meri inap planti tausen yia. Olsem wanem dispela samting i kamap? Em gutpela askim, long wanem, long bipo tru ol i bin raitim ol tok bilong Baibel long ol samting we inap bagarap, olsem na i no gat wanpela bilong ol dispela rait bilong bipo i stap yet i kam inap long nau. Tasol Jehova i kirapim ol man long raitim planti kopi bilong dispela Ol Rait Holi. Ol dispela man bilong raitim ol kopi ol i no gutpela olgeta, tasol ol i  was gut tru na raitim gut ol kopi. Wanpela saveman i tok long Ol Skripsa Hibru olsem: “I no gat wanpela buk bilong bipo em ol i bin raitim stret olgeta tok bilong en na ol wankain tok i stap i kam inap long nau.” So maski bikpela haptaim i lus, ol samting ol i yusim i save bagarap hariap, na ol man i no gutpela olgeta i bin raitim ol kopi bilong en, yumi ken bilip tru olsem ol tok yumi ritim long Baibel i kamapim tingting bilong Jehova, em Man i As bilong ol tok bilong en.

4. Yumi bai stori long wanem samting long dispela atikol?

⁴ Jehova em i As bilong “olgeta gutpela presen na olgeta presen i nambawan tru.” (Jems 1:17) Baibel em nambawan gutpela presen tru Jehova i bin givim long yumi. Taim wanpela i givim presen long yumi, dispela i kamapim klia olsem em i save gut long yumi na em i save long ol samting yumi nidim. Dispela em i wankain tu long Man i givim Baibel long yumi. Taim yumi skelim gut dispela presen, yumi save gut moa long Jehova. Yumi lainim olsem em i save gut long yumi na em i save long ol samting yumi nidim. Long dispela atikol, yumi bai stori long hau Baibel i kamapim klia 3-pela pasin bilong Jehova em savetingting, stretpela pasin, na pasin laikim bilong em. Pastaim, yumi ken stori long ol rot em Baibel i kamapim klia savetingting bilong God.

5. Wanem wanpela rot Baibel i kamapim klia savetingting bilong God?

⁵ Jehova i save olsem yumi nidim ol tok bilong em. Na em i givim Baibel olsem presen long yumi we i pulap long savetingting. Ol tok bilong Baibel i helpim tru ol manmeri. Baibel i save senisim i stap bilong ol man. Taim Moses i raitim ol fes buk bilong Baibel, em i tokim lain bilong God, ol Israel olsem: “Ol dispela tok i no tok nating, nogat, ol i as bilong laip bilong yupela.” (Lo 32:47) Ol man husat i bihainim ol tok bilong Baibel, ol inap stap amamas. (Sng. 1:2, 3) Maski ol i bin raitim Tok Bilong God inap longtaim i go pinis, em i gat strong yet long helpim ol man. Olsem, long jw.org, long siris “Tok Bilong Baibel i Senisim Laip,” yu bai lukim ekspiriens bilong planti manmeri we i kamapim klia olsem strong bilong tok bilong Baibel i “wok i stap insait long . . . ol bilipman” long nau.​—1 Tes. 2:13.

6. Wai na yumi ken tok olsem Baibel i no wankain long ol narapela buk?

⁶ I no gat wanpela buk i olsem Tok Bilong God. Bilong wanem? Long wanem, Man i As bilong ol tok bilong dispela buk, em God Jehova, em i gat olgeta strong, em i save stap oltaim oltaim, na savetingting bilong em i winim olgeta man. Planti narapela buk em ol man i bin raitim, ol i stap yet maski ol dispela man i dai pinis, tasol ol edvais i stap long ol dispela buk i no helpim ol man long nau. Tasol ol stiatok bilong Baibel ol i bilong oltaim oltaim; ol i helpim ol man i stap long olgeta kain taim. Taim yumi ritim dispela buk holi na tingim tingim long bel ol samting yumi lainim, orait God i save yusim holi spirit bilong em long helpim yumi long luksave long hau yumi ken bihainim ol tok bilong Baibel long laip bilong yumi. (Sng. 119:27; Mal. 3:16; Hib. 4:12) Yes, Man i As bilong ol tok bilong Baibel em i laik tru long helpim yu. Dispela i mas kirapim yumi long ritim Baibel long olgeta taim!

7. Long bipo, olsem wanem Baibel i helpim lain bilong God long stap wanbel?

⁷ Narapela rot em Baibel i soim olsem em i kamapim savetingting i kam long God em long rot bilong helpim lain bilong God long stap wanbel. Taim lain Israel i go insait long Graun Bilong Promis, ol i go stap long narapela narapela hap. Sampela bilong ol i kamap ol man  bilong kisim pis, ol narapela i lukautim ol animal, na ol narapela i wokim ol gaden samting. Ating ol Israel i stap long wanpela hap, em isi long ol i lusim tingting long ol wanlain Israel em ol i stap long narapela hap bilong kantri. Tasol Jehova i stretim rot long ol Israel i ken bung wantaim long narapela narapela taim long harim ol i ritim na stori long Tok bilong em. (Lo 31:10-13; Neh. 8:2, 8, 18) Tingim samting wanpela Israel inap pilim taim em i kamap long Jerusalem na em i lukim planti milion wanlotu bilong em long olgeta hap bilong kantri! Long dispela rot, Jehova i helpim lain bilong em long stap wanbel. Bihain taim kongrigesen Kristen i kamap, i gat ol manmeri em ol i mekim planti narapela narapela tokples na ol i bilong narapela narapela bekgraun na sindaun bilong ol i no wankain. Tasol ol i laikim Ol Rait Holi, olsem na ol i stap wanbel long lotuim God tru. Ol lain em ol i kamap bilipman ol inap kliagut long Tok Bilong God long rot bilong helpim ol i kisim long ol wanbilip na long taim ol i bung wantaim ol.​—Apo. 2:42; 8:30, 31.

8. Long nau, olsem wanem Baibel i helpim lain bilong Jehova long stap wanbel?

⁸ God bilong yumi i wok yet long skulim lain bilong em na helpim ol long stap wanbel long rot bilong Baibel. Baibel em i as bilong ol samting bilong strongim bilip em yumi kisim long nau. Yumi save bung wantaim long ol miting bilong kongrigesen, ol liklik kibung, na ol bikpela kibung long harim ol i ritim na stori long tok bilong  Baibel long yumi. Long dispela rot, Baibel em i nambawan tul Jehova i yusim long helpim lain bilong em long stap “wanbel wantaim long mekim wok bilong em.”​—Sef. 3:9.

9. Bilong kliagut long tok bilong Baibel, yumi mas i gat wanem kain pasin? (Luk 10:21)

⁹ Skelim narapela evidens i kamapim klia savetingting bilong Jehova. Em i stiaim ol man long raitim planti Skripsa long wei we ol man i gat pasin daun tasol inap kliagut long en. (Ritim Luk 10:21.) Ol man long olgeta hap i save ritim Baibel. Wanpela saveman i tok, Baibel “em wanpela buk planti man i save ritim, na tu, em wanpela buk we ol man i save ritim gut winim ol narapela buk.” Tasol ol man i gat pasin daun, ol tasol i save kliagut na bihainim ol tok bilong en.​—2 Kor. 3:15, 16.

10. Wanem narapela rot Baibel i kamapim klia savetingting bilong Jehova?

¹⁰ Baibel i kamapim klia savetingting bilong Jehova long narapela rot tu. Jehova i save yusim Baibel long skulim yumi olsem wanpela bikpela lain manmeri, na tu, long stiaim na mekim isi bel bilong yumi wan wan. Yumi olgeta i save pilim olsem Jehova i tingim tru yumi taim yumi ritim Tok bilong em. (Ais. 30:21) Taim yu bungim wanpela hevi, olsem wanem? Yu save ritim wanpela Tok bilong Baibel na pilim olsem dispela tok em kam long yu stret? Maski i olsem, planti milion manmeri i pilim tru ol tok bilong Baibel. Olsem wanem Baibel inap kamapim ol tok we i stret long yu long nau? Dispela samting inap kamap bikos Baibel em buk bilong wanpela Man i gat bikpela savetingting tru.​—2 Tim. 3:16, 17.

11. God i save mekim wankain pasin long olgeta man na hau dispela i stap ples klia long taim ol i bin raitim Baibel?

¹¹ Jehova i save mekim stretpela pasin. (Lo 32:4) Man i gat stretpela pasin em i save mekim wankain pasin long olgeta man, na tru tumas Jehova i save mekim dispela pasin. (Apo. 10:34, 35; Rom 2:11) Dispela pasin bilong em i stap ples klia long ol tokples ol i bin yusim long raitim Baibel. Ol i bin raitim fes 39 buk bilong Baibel long tokples Hibru, em tokples we ol manmeri bilong God long dispela taim i kliagut moa long en. Maski i olsem, long taim bilong ol aposel, planti manmeri i save mekim tokples Grik, olsem na laspela 27 buk bilong Baibel ol i raitim long dispela tokples. Jehova i no larim Tok bilong em i stap long wanpela tokples tasol, nogat. Long nau, klostu 8 bilion manmeri long graun i save mekim narapela narapela tokples. Olsem wanem planti manmeri inap kisim save long Jehova?

12. Wanem wanpela rot Daniel 12:4 i kamap tru long dispela taim bilong las de?

¹² Long rot bilong profet Daniel, Jehova i tok promis olsem long taim bilong pinis, “stretpela save” i stap long Baibel “bai kamap bikpela tru.” Planti manmeri bai kliagut long en. (Ritim Daniel 12:4.) Wanpela rot we stretpela save i bin kamap bikpela tru em long rot bilong trensletim, pablisim, na tilim ol Baibel na ol buk na nius bilong Baibel. Baibel em wanpela buk ol i bin tanim long planti tokples na tilim long olgeta hap bilong graun. Sampela taim, ol Baibel em ol kampani na ol bisnis lain i wokim, pe bilong ol i antap moa. Lain bilong Jehova i bin trensletim Tok Bilong God olgeta o hap bilong en long winim 240 tokples, na ol man inap kisim kopi bilong Baibel na i no gat pe bilong en. Olsem na ol man long olgeta hap i wok long kisim save long “gutnius bilong Kingdom” paslain long pinis i kamap. (Mat. 24:14) God bilong mekim stretpela pasin i laik bai planti manmeri moa i ken kisim save long em long rot bilong ritim Tok bilong em. Em i mekim olsem bikos em i laikim tru yumi olgeta.

13. Wai na yumi ken tok olsem Baibel i kamapim klia pasin laikim bilong Jehova? (Jon 21:25)

¹³ Baibel i kamapim klia olsem pasin laikim em i nambawan bikpela pasin bilong God. (1 Jon 4:8) Skelim ol tok Jehova i putim long Baibel na ol tok em i no putim long Baibel. Em i putim ol tok we inap helpim yumi long pas gut wantaim em, long stap amamas long nau, na long kisim laip oltaim long bihain. Tasol Jehova i laikim yumi, olsem na em i no putim planti liklik liklik tok we yumi no nid long save long en.​—Ritim Jon 21:25.

14. Wanem narapela rot Baibel i soim olsem God i laikim yumi?

¹⁴ Narapela rot Jehova i soim olsem em i laikim yumi em long rot bilong toktok long yumi long pasin rispek. Long Baibel, em i no kamapim lista bilong ol lo em yumi mas bihainim na stiaim olgeta samting long laip bilong yumi, nogat. Em i larim yumi yet i wokim tingting na em i helpim yumi long rot bilong ol laip stori, ol tok profet, na ol edvais. Long ol dispela rot, Tok Bilong God i kirapim yumi long laikim em na bihainim tok bilong em.

15. (a) Olsem wanem Jehova i soim olsem em i tingim ol man i ritim Tok bilong em? (b) Olsem piksa i soim, dispela liklik gel, yangpela brata, na lapun sista i tingim tingim wanem ol stori long Baibel? (Stt. 39:1, 10-12; 2 Kin. 5:1-3; Luk 2:25-38)

¹⁵ Baibel i kamapim klia olsem Jehova i tingim tru yumi. Hau yumi save long dispela? Tok bilong em i gat stori bilong planti man em ol i kamapim tru bel na tingting bilong ol. Yumi ken kliagut long bel na tingting bilong ol man em Baibel i stori long ol bikos ol i man “wankain olsem yumi.” (Jem 5:17) Bikpela samting moa, taim yumi ritim stori long pasin em i mekim  long ol man olsem yumi, yumi inap kliagut moa olsem “Jehova i gat pasin bilong sori tru na marimari.”​—Jem 5:11.

16. Yumi kisim wanem save long Jehova taim yumi ritim stori bilong ol man em ol i bin mekim ol popaia? (Aisaia 55:7)

¹⁶ Baibel i kamapim klia pasin laikim bilong Jehova long yumi long narapela rot tu. Tok bilong Baibel i strongim yumi olsem God i no inap givim baksait long yumi taim yumi mekim ol popaia. Lain Israel i mekim sin long Jehova inap planti taim, tasol taim ol i tanim bel tru, God i fogivim ol. (Ritim Aisaia 55:7.) Ol Kristen long taim bilong ol aposel tu i luksave long pasin laikim bilong God. Long pas aposel Pol i raitim, em i kirapim ol wanbilip bilong em long “fogivim . . . na mekim isi bel” bilong man husat i bin wokabaut long rot bilong mekim bikpela sin, tasol em i tanim bel. (2 Kor. 2:6, 7; 1 Kor. 5:1-5) Em i gutpela tru long save olsem Jehova i no bin sakim ol wokman bilong em taim ol i mekim popaia! Long pasin laikim, em i helpim ol, stretim ol, na kirapim ol long kam bek long em. Em i tok promis long mekim wankain pasin long olgeta sinman husat i tanim bel long nau.​—Jems 4:8-10.

17. Wai na Baibel em wanpela naispela presen tru?

¹⁷ Jehova i givim yumi wanpela naispela presen tru. Wai na Tok bilong em i naispela tru? Olsem yumi bin lainim, Baibel i kamapim klia savetingting, stretpela pasin, na pasin laikim bilong God. Dispela buk i kamapim klia olsem Jehova i laik bai yumi save long em. Em i laik bai yumi kamap pren bilong em.

18. Hau yumi ken soim olsem yumi amamas long Baibel em “gutpela presen” Jehova i givim?

¹⁸ Yumi no laik lusim tingting long Tok Bilong God em “gutpela presen.” (Jems 1:17) Olsem na yumi mas wok yet long soim tenkyu bilong yumi long dispela buk. Yumi ken mekim olsem long rot bilong beten na ritim ol tok bilong en na tingim tingim long bel. Taim yumi mekim olsem, yumi ken save tru olsem Man i As bilong ol tok bilong en bai blesim hatwok bilong yumi na yumi bai “save gut” long em.​—Prov. 2:5.