1. Библия дээш чүге өөрүп четтирер-дир силер?

 ИЕГОВАГА Библия дээш дыка-ла өөрүп четтирер-дир бис! Ында хүн бүрүнүң бергелерин чедиишкинниг ажып эртеринге дузалаар мерген угаанныг сүмелер бар. Оон ыңай ол биске келир үеже кайгамчык идегелди берип турар. А эң чугула чүүл, Библияда Иегованың дугайында хөйнү бижээн. Бурганның чараш шынарларының дугайында ханы боданып тургаш, бис Олче чоокшулап, Ооң өңнүү болуксай бээр бис (Ыд. ыр. 24:14).

2. Иегова кижилерге Бодунуң дугайында канчаар чугаалап чораан?

² Кижилер Ооң дугайында билип алзын деп, Иегова күзеп турар. Бурунгу үеде Ол Бодунуң дугайында дүштер, көстүүшкүннер болгаш дээрниң төлээлери таварыштыр чугаалап чораан (Сан. 12:6; Аж.-ч. 10:3, 4). Ынчалза-даа ол дүштер, көстүүшкүннер азы дээрниң төлээлериниң чугаалаан медээлери бижиттинмээн турган болза, ол чүүлдерни канчап билип алыр турган бис? Ынчангаш Иегова Бодунуң дугайында чүнү чугаалаксап турарын номга бижип каар кылдыр, кижилерге дагзып каан (Иер. 30:2). «[Бурганның] оруу болбаазыраңгай» деп билир бис (Ыд. ыр. 17:31). Ынчангаш Ооң бистиң-биле харылзажып турар аргазы эң-не эки деп чигзинмес бис.

3. Иегова Бодунуң Сөзүн бо хүннерге чедир канчаар кадагалаан? (Исайя 40:8).

³ Номчуптуңар: Исайя 40:8. Библияны хөй чылдар бурунгаар, үрелиичел материалдарга бижээн, ынчангаш ооң оригинал бижиктери амгы үеде чок. Ындыг-даа бол, муң-муң чылдар дургузунда Бурганга шынчы улус Ыдыктыг Бижилгеден  мерген угаанныг удуртулганы ап чоруур. Канчап? Иегова ол ыдыктыг сөзүглелдиң хөй-хөй хоолгаларын кылыр кылдыр сагыш човаан. Дүжүрүп бижип турган улус, тергиин эвес-даа бол, дыка кызымаккай чораан. Чижээ, Еврей Бижилгелер дугайында бир эртемден мынча дээн: «Чугаажок, өске бурунгу бижиктерге бодаарга, Еврей Бижилгени кара олчаан кылдыр хоолгалап, эң-не шын кылдыр дамчыткан». Ыдыктыг Бижилгени дүжүрүп бижип турган улус тергиин эвес-даа бол, ону үрелиичел материалга бижээн-даа болза, оон бээр чүс-чүс чылдар эртсе-даа, ол номда Ооң Автору Иегованың бодалдарын номчуп турар бис дээрзинге чигзинмейн барып болур бис.

4. Бо статьяга чүнү сайгарар бис?

⁴ Иегова — «буянныг база болбаазыраңгай белектерниң» үнер Дөзү-дүр (Иак. 1:17). Библия — Бурганның эң кайгамчыктыг белээ-дир. Кижиниң бисти база хереглелдеривисти кайы хире эки билирин ооң суй-белээнден тодарадып ап болур. Ону Бурганның Сөзүнге хамаарыштыр база чугаалап болур. Ол ном-биле таныжып тургаш, Иегованың бисти база хереглелдеривисти кайы хире эки билирин көрүп каар бис. Библия Иегованың мерген угаанын, чөптүг чоруун, ынакшылын канчаар ажыдып турарын бо статьяга сайгарар бис. Баштай Бижилгеде Бурганның мерген угаанының дугайында чүү дээнин көрүптээлиңер.

5. Библияда Бурганның мерген угаанныг сүмелери бар деп кайыын көскү?

⁵ Иегова биске Ооң мерген угаанныг сүмелери херек деп билир. Ооң белээ, Библия, мерген угаан-биле долган. Ооң сүмелери кижилерге эки салдарны чедирип, чуртталганы өскертип турар. Библияның баштайгы номнарын бижээн соонда, Моисей израильчилерге мынча дээн: «Ол хоойлу дээрге силерге хоозун сөстер эвес-тир, ол — силерниң амыдыралыңар-дыр» (Ы. х. к. 32:47). Бижилгеде сөстерни сагып турган улус бүгү талазы-биле чедиишкинниг, аас-кежиктиг чораан (Ыд. ыр. 1:2, 3). Библия эргижиревээн болгаш, улустуң чуртталгазын эки талаже өскертип турар хевээр. JW.ORG деп сайтының «Библия чуртталганы өскертип турар» деп рубриказында Бурганның Сөзү амгы үеде улусче «күчүлүг салдар чедирип турарын» көргүскен 50 ажыг акы-угбаларның намдарын бижээн (1 Фес. 2:13).

6. Библияга деңнежир ном чок деп чүге чугаалап болур?

⁶ Чаңгыс-даа ном Библияга деңнешпес. Чүге ынча деп болур? Чүге дизе ооң Автору Иегова Бурган — бүрүн күчүлүг, мөңге болгаш кызыгаар чок мерген угаанныг. Хөй номнарның авторлары шагда-ла чок апарган, а оларның номнарында сүмелер эргижиреп, ажык чок болу берген. Ынчалза-даа Библияның мерген угаанныг дүрүмнери кажан-даа эргижиревес. Ол кайы-даа үеде чурттап чораан улустуң амыдыралын эки талаже өскертип чоруур. Ол ыдыктыг номну номчуп, ханы боданырывыска, ооң Автору ыдыктыг сүлдези таварыштыр ында сүмелерни чуртталгавыска канчаар ажыглаарын айтып берип турар (Ыд. ыр. 118:27; Мал. 3:16; Евр. 4:12). Ийе, Библияның мөңге Автору биске дузалажырын күзеп турар. Ынчангаш ону үргүлчү номчууру эргежок чугула!

7. Библия Бурганның чонун бурунгу үеде канчаар демнештирип турган?

⁷ Оон ыңай Бурганның мерген угааны Библияның аңгы-аңгы улусту демнештирип турарындан көскү. Израильчилер  Аазаттынган черже чедип келгеш, тарай чурттап чоруй барган. Оларның чамдыызы балыкчылар, өскелери тараачыннар, а бир чамдыызы кадарчылар апарган. Чурттуң бир кыдыында чурттап турган израильчилер ыракта турумчуп алган кады бүзүрээннери дээш сагыш човавайн барып болур турган. Ынчангаш олар тускай хүннерде шупту кады чыглып келгеш, Бурганның Сөзүн канчаар номчуп, тайылбырлап турарын дыңнаар кылдыр, Иегова сагыш човаан (Ы. х. к. 31:10—13; Неем. 8:2, 8, 18). Иерусалимге чедип келген еврей кижи чурттуң аңгы-аңгы булуңнарындан шуужуп келген сая-сая Бурганның бараалгакчыларын көргеш, чүнү миннип турган деп бодаар силер? Шак ынчаар Иегова чонунга чаңгыс аай, демниг чорукту кадагалаарынга дузалажып чораан. Соонда аңгы-аңгы дылдарлыг улустан тургустунган христиан чыыштар тыптып келген. Оларның аразынга бай-даа, ядыы-даа улус чораан. Ынчалза-даа Ыдыктыг Бижилгеге ынакшылының ачызында олар алыс шын Бурганга демниг бараалгап турганнар. А чыышка чаа келген улус чүгле акы-угбаларның болгаш хуралдарның ачызында Бурганның Сөзүн эки билип аар турган (Аж.-ч. 2:42; 8:30, 31).

8. Библия амгы үеде Иегованың чонун канчаар демнештирип турар?

⁸ Мерген угаанныг Бурганывыс Библияның дузазы-биле бараалгакчыларын өөредирин  база демнештирерин уламчылап турар. Ында сагыш-сеткиливисти сергедип кээр Бурганның сөстери бар. Бис Ыдыктыг Бижилгени канчаар номчуп, тайылбырлап турарын дыңнаар дээш, чыыштарже болгаш шуулганнарже доктаамал кээп турар бис. Ынчап кээрге, Библияның ачызында Иеговага «чаңгыс эптиг бараан» бооп чоруур бис (Соф. 3:9).

9. Библияны эки билип алырынга кандыг шынар херек? (Лука 10:21).

⁹ Иегованың мерген угаанының ам бир бадыткалын көрүптээлиңер. Ол Бодунуң Сөзүн чүгле биче сеткилдиг номчукчу утказын билип шыдаар кылдыр бижээн. (Номчуптуңар: Лука 10:21.) Кайда-даа улус ону номчуп турар. Бир эртемден мынча дээн: «Библия — кижилерниң эң номчуп турар база дыка кичээнгейлиг шинчилеп чоруур ному-дур». Ынчалза-даа чүгле биче сеткилдиг улус ында бижээн чүүлдүң утказын билип ап, амыдыралынга ажыглап чоруур (2 Кор. 3:15, 16).

10. Библияда Иегованың мерген угааны оон ыңай кайыын көскү?

¹⁰ Библияны номчуп тургаш, Иегованың мерген угаанын оон ыңай канчаар көрүп болур бис? Бурган Ыдыктыг Бижилгени чүгле чонун өөредир дээш эвес, а бараалгакчы бүрүзүн хууда оожургадып, өөредип сургаар дээш ажыглап турар. Бурганның Сөзүн номчуп тургаш, бистиң кижи бүрүзү Ооң кичээнгейин миннип болур (Иса. 30:21). Кандыг-ла бир берге байдалга таваржы бээриңерге, Библиядан тып алган шүлүүңер хууда силерге бижээн ышкаш болган бе? Ындыг чүүлге чаңгыс эвес удаа таварышкан чадавас силер. Библия сая-сая улуска бижиттинген болганда, ында бижээн чүүл барып-барып силерге, арта эң херек үеде, канчап тааржыр болганы ол? Чүге дизе Ооң Автору, Иегова Бурган, кызыгаар чок мерген угаанныг (2 Тим. 3:16, 17).

11. Бурганның чөптүг чоруу чүүден көскү?

¹¹ Чөптүг чорук — Иегованың база бир шынары (Ы. х. к. 32:4). Чөптүг кижи улусту ылгай көрбес боор. Иегова база шак ындыг (Аж.-ч. 10:34, 35; Рим. 2:11). Ооң ол чараш шынары Библияны кандыг дылдарга бижээнинден көскү. Библияның эгеки 39 ному колдуунда еврей дылга бижиттинген, чүге дизе ол үеде Бурганның бараалгакчылары ол дылды эки билир турган. Ынчалза-даа бистиң эраның бирги векте грек дыл нептереңгей апарган. Ынчангаш Библияның арткан 27 номун ол дылга бижээн. Ол Сөзүн чүгле чаңгыс дылга турзун деп негевээн. Амгы үеде делегейде янзы-бүрү дылдарга чугааланып чоруур 8 миллиард хире кижи бар. Олар Иегованың дугайында канчап билип алырлар?

12. Даниил 12:4-те өттүр билген медеглел амгы үеде канчаар күүсеттинип турарыл?

¹² Иегова Даниил медээчини таварыштыр төнчү үеде «билиг көвүдеп кээр» дээн. Өскээр чугаалаарга, хөй улус библейжи алыс шынның утказын билип каар. (Номчуптуңар: Даниил 12:4.) Ол билиг Библияны болгаш аңаа үндезилээн дептерлерни очулдуруп, парлап, тарадып турарының ачызында болдунуп турар. Библия — делегейде эң-не хөй очулдуртунуп турар, нептереңгей ном-дур. Ынчалза-даа хуу бүдүрүлгелерде кылып турар очулгаларның өртээ чамдыкта дыка аар. А Иегованың Херечилери Библияны долузу-биле азы кезээн 240 ажыг дылга очулдурган, арта ону күзээн кижи бүрүзү халас ап болур. Ынчангаш аңгы-аңгы чоннардан улус, төнчү келбээнде, «Дээрниң Чагыргазының дугайында бо Буянныг  Медээни» дыңнап болур (Мф. 24:14). Хөй-ле кижи Библияны номчааш, Ооң-биле таныжып алырын чөптүг Бурганывыс күзеп турар. Ол бистиң шуптувуска дыка ынак болгаш, ындыг арганы берип турар.

13. Бурганның ынакшылы чүүден көскү? (Иоанн 21:25).

¹³ Библия ооң Авторунуң база бир өндүр улуг шынарын, ынакшылды, ажыдып турар (1 Ин. 4:8). Ыдыктыг Бижилгеде Иегованың чүнү бижээн-биживээнин бодап көрүңер. Бурган биске дыка ынак болгаш, артык информация-биле бисти чүдүрбээн. (Номчуптуңар: Иоанн 21:25.) Ол биске чүгле Ооң өңнүү апаарынга, амгы үеде аас-кежиктиг чурттаарынга, келир үеде мөңге амыдыраарынга херек информацияны берген.

14. Бурган биске ынак деп, Библия канчаар көргүзүп турар?

¹⁴ Кижи Библияны номчуп тургаш, Иегованың хүндүткелин эскербейн барып шыдавас. Базым бүрүзүн айтып берип турар дүрүмнерлиг узун даңзы Библияда чок. Харын-даа Иегова бисти боданып өөрензин деп күзеп турар. Ынчангаш Ооң Сөзүнде чуртталгадан төөгүлер, солун өттүр билген медеглелдер база ажыктыг сүмелер бар. Шак ынчаар Библия бисти Бурганга ынакшылды илередип, Аңаа чүрээвистен дыңнангыр боорунче оттуруп турар.

15. а) Иегова Библияның номчукчулары дээш канчаар сагыш човап турар? б) Чурукту көрүңер. Бичии уруг, аныяк эр кижи, улгады берген угбай кандыг библейжи маадырларның дугайында боданып олурар? (Э. д. 39:1, 10—12; 4 Хаан. 5:1—3; Лк. 2:25—38).

¹⁵ Иегова бис дээш сагыш човап турар деп, Библиядан илдең. Бурганның Сөзүнде  кижилерниң сагыш-сеткилин тода бижээн төөгүлер дыка хөй. Библейжи маадырлар бистиң ышкаш минниишкиннерлиг турган, ынчангаш оларны эки билип болур бис (Иак. 5:17). А эң чугула чүүл, Иегованың олар-биле канчаар чугаалажып турганын номчааш, Ол «аажок өршээлдиг болгаш кээргээчел» деп оон-даа эки билип каар бис (Иак. 5:11).

16. Частырыг кылган улустуң дугайында Библиядан номчааш, Иегованың дугайында чүнү билип ап турар бис? (Исайя 55:7).

¹⁶ Библия Иегованың ынакшылын оон ыңай канчаар ажыдып турар? Частырыг кылыптар болзувусса, Иегова бистен хая көрүнмес деп, Ыдыктыг Бижилге бисти бүзүредип турар. Израильчилер Иеговага удур бачыттарны катап-катап үүлгедип-ле турган. А кажан олар буруузун миннирге, Иегова өршээп турган. (Номчуптуңар: Исайя 55:7.) Бирги векте христианнар база Бурган оларга ынак деп билир чораан. Павел элчин ыдыктыг сүлдеге бүргеткеш, акы-угбаларны бачыт кылгаш, соонда буруузун миннинген кижини «өршээп, деткииринче» кыйгырган (2 Кор. 2:6, 7; 1 Кор. 5:1—5). Иегова чазыпкан бараалгакчыларындан хая көрүнмейн чораан. Харын-даа Ол Боду бирги базымны кылып, оларны сургап, Ооң чылыг куспаанче эглип кээрин кыйгырып турган. Кандыг кончуг аянныг чоор! Амгы үеде бачыт кылгаш, буруузун миннип турар улус-биле Бурган шак ынчаар алдынып чоруур (Иак. 4:8—10).

17. Библия — Бурганның онза тускай белээ деп чүге чугаалап болур?

¹⁷ Иегова биске кайгамчык белекти сөңнээн. Ооң Сөзүн чүү онза тускай кылып турар? Библия Бурганның мерген угаанын, чөптүг чоруун, ынакшылын ажыдып турар деп көрдүвүс. Иегова бисти Ооң-биле таныжып алгаш, өңнүү апаарын күзеп турар деп, ол ном бадыткап турар.

18. Иеговага болбаазыраңгай белээ, Библия, дээш өөрүп четтиргенивисти канчаар илередип болур бис?

¹⁸ Библия — дээрде Адавыстың болбаазыраңгай белээ деп утпаалыңар (Иак. 1:17). Ол белек дээш өөрүп четтиргенивисти канчаар көргүзүп болур? Иегованың ыдыктыг сөстерин номчуп, ооң дугайында ханы боданып тургаш. Ынчан Библияның өндүр улуг Автору күжениишкиннеривисти йөрээр база Ооң дугайында «билигни тып аар» бис (У. ч. 2:5).