1. Momo lie o lekisila olopandu omo Liembimbiliya?

 TU KUETE esanju lialua omo lia Yehova Suku wa tu ĩha Embimbiliya! Pocakati Cembimbiliya, eye o tu ĩha alungulo a pondola oku tu kuatisa oku litunda ciwa kovitangi tua siata oku liyaka lavio koloneke vilo. Eye o tu ĩhavo elavoko limue li komohĩsa liokovaso yoloneke. Ca velapo vali, Yehova wa siata oku talavaya Lembimbiliya oco a situlule ovina vialua via tiamẽla kekalo liaye. Osimbu tu sokolola kovituwa viaye viwa, tu yeva esanju lialua vutima kuenda tu vetiyiwa oku amela ku Suku yetu poku kuata ukamba uwa laye.—Osa. 25:14.

2. Volonjila vipi via li tepa Yehova a li situlula komanu?

² Yehova o yongola okuti omanu vo kũlĩha. Kosimbu, eye wa lisitulula pocakati colonjoi, covinjonde kuenda covangelo. (Ate. 12:6; Ovil. 10:3, 4) Pole, nda tua tẽla ndati oku lilongisa olonjoi viaco, ovinjonde kuenda a sapulo a tu ndaile kovangelo nda ovio ka via sonehiwile? Eli olio esunga lieci okuti Yehova wa tuma omanu, oku “soneha velivulu limue,” momo wa yonguile okuti tu u kũlĩha. (Yer. 30:2) Omo okuti “onjila ya Suku yocili ya lipua,” tu koleli okuti esokiyo a kuama lioku sapela letu liwa kuenda li tu kuatisa.—Osa. 18:30.

3. Ndamupi Yehova a teyuila Embimbiliya oco li kale toke koloneke vilo? (Isaya 40:8)

³ Tanga Isaya 40:8. Ondaka ya Suku ya siata oku eca olonumbi viwa, kalume kuenda kakãi vakuekolelo vokuenda kuanyamo alua. Eci ca siata oku lingiwa ndati? Ocili okuti, Embimbiliya lia sonehiwa tunde osimbu, vamela ana okuti ka a kolelepo, eli olio esunga lieci okuti kakuli okopia layimue yatete yi sangiwa koloneke vilo. Pole, Yehova wa sokiya okuti omanu va linga olokopia viovisonehua vi kola. Ndaño okuti vakuakukopiyala  ka va li puile, ovo va kuata utate poku ci linga. Catiamẽla Kovisonehua vio Heveru, usonehi umue wa popia hati: “Ka kuli elivulu limue liosimbu lia sonehiwa lonjila yimue ya suapo.” Ndaño Embimbiliya lia sonehiwa osimbu vamela ana okuti ka a kolelepo kuenda omanu va linga olokopia viaco ka va li puile, tu pondola oku kolela okuti olondaka tu tanga Vembimbiliya koloneke vilo, vi kuete ovisimĩlo Viusovoli walio Yehova.

4. Nye tu konomuisa vocipama cilo?

⁴ Yehova eye Ono ‘yongavelo yosi yiwa, lombanjaile yosi ya lipua.’ (Tia. 1:17) Embimbiliya, yimue pokati kolombanjaile via velapo Yehova a tu ĩha. Oyo ombanjaile yimue yi situlula ekalo liomunu wa tu ĩha, okuti wa tu kũlĩha ciwa kuenda wa kũlĩhavo ovina tu sukila. Cimuamue haico ci popiwa la Una wa tu ĩha Embimbiliya. Eci tu konomuisa ombanjaile yaco, tu lilongisa ovina vialua viatiamẽla ku Yehova. Tu lilongisavo okuti eye wa tu kũlĩha ciwa kuenda wa kũlĩhavo ovina tu sukila. Vocipama cilo, tu konomuisa ndomo Embimbiliya li situlula ovituwa vitatu via Yehova okuti: olondunge viaye, esunga liaye kuenda ocisola caye. Tete, tu konomuisi eci Embimbiliya li situlula catiamẽla kolondunge via Suku.

5. Lonjila yipi Embimbiliya li situlula olondunge via Suku?

⁵ Yehova wa kũlĩha okuti, etu tu sukila alungulo aye olondunge. Kuenje ombanjaile yaco okuti Embimbiliya, yeyuka olondunge viaye. Alungulo Embimbiliya a siata oku kuatisa calua omanu. Embimbiliya li pongolola omuenyo womanu. Eci Mose a soneha alivulu atete Embimbiliya, wa sapuila afendeli va Suku va Isareli hati: “Olondaka evi haviesandako, pole, vi lomboloka omuenyo wene.” (Esin. 32:47) Vana va pokuile Kovisonehua va ponduile oku kuata onima yiwa kuenda omuenyo wesanju. (Osa. 1:2, 3) Ndaño okuti Embimbiliya lia sonehiwa osimbu, olio handi li kuete unene woku pongolola omuenyo womanu. Ndeci, vo jw.org vovipama viokuti “Embimbiliya li Pongolola Omuenyo Womanu,” o ka sanga eci ci soka 50 kovolandu omanu va situlula ndomo va tẽla oku linga apongoloko anene, loku mioñolola ekalo liomuenyo wavo koloneke vilo, momo ovo va fetika oku kapako alungulo Embimbiliya.—1 Va Tes. 2:13.

6. Momo lie tu popela okuti Embimbiliya ka lisokisiwa lalivulu akuavo?

⁶ Kakuli elivulu lalimue lia lisoka Londaka ya Suku. Momo lie? Momo Usovoli welivulu liaco okuti Yehova Suku, ukuonene, o kasi otembo ka yi pui kuenda wa velapo kolondunge. Ocili okuti, kuli alivulu alua a siata oku tangiwa, pole, asonehi vaco ka va kasiko vali kuenda alungulo a sangiwa valivulu aco vokuenda kuotembo ka a kuata vali esilivilo. Pole, olonumbi vi sangiwa Vembimbiliya vi kasiko otembo yosi; ovio via kuatisa omanu va kala komuenyo kosimbu. Osimbu tu tanga elivulu liaco li kola, loku sokolola kovina tu kasi oku lilongisa, Usovoli walio o talavaya lunene wespiritu sandu liaye oco a tu kuatise oku limbuka ndomo tu kapako alungulo aco komuenyo wetu. (Osa. 119:27; Mal. 3:16; Va Hev. 4:12) Ocili okuti, Usovoli Wembimbiliya o yongola oku ku kuatisa. Eci ci tu vetiya oku tanga Embimbiliya eteke leteke!

7. Kosimbu Embimbiliya lia kuatisa ndati afendeli va Suku oku likuata omunga?

⁷ Onjila yikuavo yi lekisa okuti Embimbiliya li situlula olondunge via Suku, yeyi okuti olio li kuatisa afendeli va Suku oku li kuata omunga. Eci va Isareli va iñila Vofeka Yohuminyo, ovo va tungile kovitumãlo via li tepa. Vamue va kala vakuakupipa, vakuavo vakuakufuka ovinyama kuenda vakuavo va kala  vakuakulima. Va Isareli va kala kocitumãlo cimue okuti, ca ponduile oku leluka ovo oku yapuisiwa lovituwa viofeka yaco. Pole, Yehova wa linga eliangiliyo liokuti va Isareli va liongolola pamosi olonjanja vialua, oco va yevelele oku tangiwa Kuondaka yaye ya sonehiwa lelomboluilo liayo. (Esin. 31:10-13; Neh. 8:2, 8, 18) Sokolola ndomo u Isareli umue ukuekolelo a liyeva, eci a pitila vo Yerusalãi loku mola afendeli valua va tunda kolonepa viñi viñi viofeka! Lonjila eyi, Yehova wa kuatisa afendeli vaye oku amamako oku likuata omunga. Vokuenda kuotembo eci ekongelo Liakristão lia tumbikiwa, mua kala alume lakãi okuti va vangowaile alimi alua kuenda a kalo avo omuenyo a li tepele. Omo okuti vosi va solele Ovisonehua, va likuatele omunga poku fendela Suku yocili. Vana veya oku kala Akristão va ponduile oku kuata elomboloko Liondaka ya Suku, lekuatiso lia fendeli vakuavo poku liongoluila pamosi.—Ovil. 2:42; 8:30, 31.

8. Embimbiliya li kuatisa ndati afendeli va Yehova oku likuata omunga koloneke vilo?

⁸ Suku yetu ukualondonge o kasi oku amamako oku tu longisa loku kongela afendeli vaye pocakati Cembimbiliya. Vembimbiliya mu sangiwa ocili cosi catiamẽla ku Yehova, cina tu sesamẽla oku kũlĩha. Olonjanja viosi tua siata oku liongolola kolohongele viekongelo, kolohongele vimbo kuenda kolohongele viofeka kuna tua siata oku yevelela oku tangiwa Kuovisonehua, kalomboluilo alio kuenda ndomo ovina viaco vi kapiwako. Embimbiliya ocimaleho cimue Yehova a talavaya laco, oco a kuatise afendeli vaye oku u “vumba lutima umuamue.”—Sof. 3:9.

9. Ocituwa cipi ci sukiliwa oco tu kuate elomboloko liesapulo Liembimbiliya? (Luka 10:21)

 ⁹ Konomuisa uvangi ukuavo wolondunge via Yehova. Eye wa sokiya oku soneha Embimbiliya longila yimue okuti, ambombe ovo lika va ponduile oku kuata elomboloko liayo poku li tanga. (Tanga Luka 10:21.) Kovitumãlo viosi omanu va sangiwa va pondola oku tanga Embimbiliya. Ulume umue ukuakulinga akonomuiso wa popia hati: “Pokati kalivulu osi Embimbiliya elivulu limue lia siata oku tangiwa vali lutate.” Pole, omunu embombe eye lika o pondola oku kuata elomboloko loku kapako eci olio li popia.—2 Va Kor. 3:15, 16.

10. Onjila yipi yikuavo yi lekisa okuti Embimbiliya li situlula olondunge via Yehova?

¹⁰ Tu pondola oku lilongisa eci catiamẽla kolondunge via Yehova Vembimbiliya volonepa vikuavo. Yehova ka talavaya lika lovisonehua oco a tu longise ndocimunga, pole, o tu pindisa loku pamisa omunu lomunu pokati ketu. Vosi yetu tu pondola oku limbuka okuti Yehova wa kapako omunu lomunu pokati ketu, eci tu tanga Ondaka yaye. (Isa. 30:21) Eci o lipita lovitangi wa siata hẽ oku limbuka Ocisonehua cimue okuti poku ci tanga osima okuti ca ku sonehiwila ove? Ocili okuti Embimbiliya lia sonehiwa lonjila yimue yi vetiya omanu valua, oku kuata elomboloko lialio. Ndamupi ovolandu Embimbiliya a sonehiwa lonjila yimue okuti a pondola oku kuatisa omunu lomunu pokati ketu kovina eye a sukila? Eci ci tẽliwa lika omo okuti Usovoli Wembimbiliya wa velapo voluali luosi.—2 Tim. 3:16, 17.

11. Suku wa lekisa ndati okuti hokuacameko eci Embimbiliya lia kala oku sonehiwa?

¹¹ Esunga ocituwa cikuavo ca Yehova. (Esin. 32:4) Omunu ukuesunga, ka lekisa ocame kuenda Yehova hokuacameko. (Ovil. 10:34, 35; Va Rom. 2:11) Tu pondola oku limbuka okuti Yehova hokuacameko, poku kũlĩha ndomo Embimbiliya lia sonehiwile kalimi a li tepa ana omanu va enda oku vangula kotembo yaco. Onepa yatete Yembimbiliya okuti yi kuete 39 kalivulu, lia sonehiwa kelimi lio Heveru, elimi limue okuti lia lelukile afendeli va Suku oku kuata elomboloko kotembo yaco. Pole, kocita catete K.K., omo okuti omanu va vangowaile elimi lio Helasi, alivulu a sulako Embimbiliya a soka 27 onepa yalua yalivulu aco, a sonehiwa kelimi lio Helasi. Yehova ka sokiyile okuti Ondaka yaye yi sonehiwa lika kelimi limosi. Koloneke vilo, cipanda olohuluwa ecelãla viomanu voluali vi vangula alimi alua. Olohuluwa viaco viomanu via lilongisa ndati catiamẽla ku Yehova?

12. Lonjila yipi elivulu lia Daniele 12:4 li kasi oku tẽlisiwa koloneke vilo via sulako?

¹² Pocakati cuprofeto Daniele, Yehova wa likuminyile okuti kotembo yesulilo, “ukũlĩhĩso wocili” u sangiwa Vembimbiliya “u kalua.” Omanu valua va ponduile oku kuata elomboloko lialio. (Tanga Daniele 12:4.) Onjila yimue yoku kuatisa omanu valua oku kuata ukũlĩhĩso waco, yeyi okuti Embimbiliya kuenda alivulu akuavo a kunamẽla Kembimbiliya, a siata oku pongoluiwa loku pangiwa kuenda oku a eca komanu valua. Embimbiliya elivulu limue lia siata oku a viwa vali calua voluali. Ambimbiliya a siata oku pongoluiwa la vakualomĩlu, olonjanja vimue ondando yawo ya tĩla calua. Toke cilo, afendeli va Yehova va pongolola ale Ondaka ya Suku, vonepa yimue, ale liosi kueci ci pitãla 240 kalimi okuti omunu lomunu o kuata limue kuenda ka kupingiwa ondando. Onima yaco yeyi okuti, omanu vokolofeka viosi va kasi oku tava ‘kolondaka viwa Viusoma’ osimbu esulilo ka lieyile. (Mat. 24:14) Suku yetu u kuesunga, o yongola oku eca epuluvi komanu valua lioku u kũlĩha poku  tanga Ondaka yaye. Eye o ci linga momo o tu sole calua.

13. Momo lie tu popela okuti Embimbiliya li situlula ocisola ca Yehova? (Yoano 21:25)

¹³ Embimbiliya li tu sapuila okuti Suku o tu sole. (1 Yoa. 4:8) Konomuisa ovina Yehova a kongela Vembimbiliya okuti ovio tua sukilile oku kũlĩha. Eye wa lombolola lika ovina tu sukila oco tu kuate ukamba laye, vina vi tu kuatisa oku kuata esanju komuenyo cilo kuenda oku kuata omuenyo ko pui. Omo liocisola Yehova a tu kuetele, eye ka kongelele Vembimbiliya ovolandu alua oco tu u vumbe.—Tanga Yoano 21:25.

14. Onjila yipi yikuavo yi sangiwa Vembimbiliya yi lekisa okuti Suku o tu sole?

¹⁴ Yehova o lekisavo ocisola poku sapela letu lonjila yimue yi lekisa esumbilo kokuetu. Vembimbiliya eye ka tu ĩhile ulala umue weci tu sukila oku linga, leci ka tu sukila oku linga kolonepa viosi viomuenyo wetu. Pole, eye o talavaya lovolandu omuenyo, lovitumasuku Viembimbiliya kuenda alungulo a tu kuatisa oku nõla onjila yiwa. Lolonjila evi, Ondaka ya Suku yi tu vetiya oku u sola kuenda oku pokola kokuaye lutima wetu wosi.

15. (a) Embimbiliya li situlula ndati okuti Yehova wa kapako vana va tanga Ondaka yaye? (b) Vociluvialuvia, kafeko, la manji ulume kuenda manji ukãi wa kuka, va kasi oku sokolola komanu vapi va tukuiwa Vembimbiliya? (Efet. 39:1, 10-12; 2 Olos. 5:1-3; Luka 2:25-38)

¹⁵ Embimbiliya li situlula okuti Yehova wa tu kapako calua. Ndamupi? Vondaka yaye mueyuka ovolandu omanu, va situlula ovisimĩlo viavo. Tu pondola oku kuata elomboloko liovisimĩlo viomanu va tukuiwa Vembimbiliya momo ovo ‘va kalavo omanu ndetu.’ (Tia.  5:17) Handi vali ocina ca velapo, eci tu tiamisila utima ndomo eye atata omanu kosimbu, tu tẽla oku kuata elomboloko lia suapo liokuti, “Yehova ukuacisola calua haeye ukuahenda.”—Tia. 5:11.

16. Nye tu lilongisa catiamẽla ku Yehova eci tu tanga Vembimbiliya komanu vana va enda oku lueya? (Isaya 55:7)

¹⁶ Embimbiliya li situlula onjila yikuavo yocisola Yehova a tu kuetele. Ovisonehua vi tu sapuila okuti, Suku yetu ka tu yanduluka eci tu lueya. Va Isareli va enda oku lueyela Yehova olonjanja vialua; pole, eci va likekembela lutima wosi Suku wa enda oku va ecela. (Tanga Isaya 55:7.) Akristão vokocita catete, va kũlĩhĩlevo okuti Suku wa va solele calua. Upostolo Paulu wa vetiyiwa oku lungula vamanji oco va ‘ecele loku lembeleka’ ulume umue wa enda oku linga akandu anene, pole, wa likekembela. (2 Va Kor. 2:6, 7; 1 Va Kor. 5:1-5) Eci ci lekisa okuti Yehova ka yanduluka afendeli vaye omo lioku lueya! Pole, eye locisola o va kuatisa, o va lungula kuenda o va laleka oco va kale vali akamba vaye. Eye o likuminya oku linga ocina cimuamue la vosi vana va likekembela kakandu avo koloneke vilo.—Tia. 4:8-10.

17. Momo lie Embimbiliya ombanjaile yimue yi komohĩsila?

¹⁷ Yehova wa siata oku tu ĩha olombanjaile viwa. Momo lie Ondaka yaye yi tu komohĩsila calua? Ndomo tua lilongisa, Embimbiliya li situlula olondunge via Suku, esunga liaye kuenda ocisola caye. Olio li situlula okuti, Yehova o yongola okuti tu u kũlĩha. Eye o yongolavo okuti tu kala akamba vaye.

18. Tu lekisa ndati olopandu ‘kombanjaile yiwa’ Yehova a tu ĩha okuti Embimbiliya?

¹⁸ Etu ka tu yongola oku ivalako okuti Ondaka ya Suku ‘ombanjaile yimue yiwa.’ (Tia. 1:17) Omo liaco, tu amamiko oku lekisa olopandu kokuayo. Tu ci linga, poku likutilila eci tu tanga olondaka vi kola kuenda oku sokolola kovina tua tanga. Nda tua ci linga, tu koleli okuti Usovoli walio, o ka sumũlũisa alikolisilo etu kuenda tu ka “sanga ukũlĩhĩso wa Suku.”—Olosap. 2:5.