1. Nalende nim Baibel kankawei kanen?

 JOHOVA kenem Baibel ngom bar, kapil sangiyo ninamen! Nalenem, Baibel yu meim kenem pakerondo, ombun kanem kanem pi min wonom, kauwo akilgi nimen. Ala mi bulto, wal ka min wonda padom, bar pilgi ne kui esmen. Wal kerma wei paim, Baibel wusngam a Johova olom mambnem aiem paim tane, kenem ngonom. Ala olom mambnem aiem meim mal, kenem buro pisamen erkelde olom bol seno se mand wei pumon.—Sng. 25:14.

2. Nal wusngam jel mal pende, Johova olom ye nalmal tane alamb ngom?

² Johova alamb olom kanpol tonam nepisem. Embe pile, komna kunum, wusngam talende tanim e, wur kubanj, enjol walem, mo wur kubanj mal kanjip bar tanim. (Nam. 12:6; Apo 10:3, 4) Ba tanim yu bol mene nakeramnge ne, kenem nalmal duwom er kanpol tonamnge? Mem ka pange, Johova bunuman ngongo, kenem pisamen ne pim yu “buk a bol mene kenjip.” (Jer. 30:2) Nalenem “Got wei mambnem dulto paim,” kenem pilgi ninamen olom yu nengom kawei paim kenem pakeronda.—Sng. 18:30.

3. Got Yuwom kantawol enjip kes namom bar, kenem Johova bol nawal duwom esmen? (Aisaia 40:8)

³ Aisaia 40:8 gere. Pilgi dongal pam yira ambra komb, Got Yuwom kongar tausen puli bunuman ka ngo, kantawol erim. Nalmal embe erim? Komna Baibel yu bonjip dongal napa, kes mora wal si bonjip pile, pi ende sende nakanmen. Ba Johova erkelnge alamb olom yuwom, si jeljel puli kele bonjip. Yu bonjip alamb sin nganj a pam,  ba kanpol weiro bonjip. Ende embe mal, Baibel Ibru yu bonjip bar, sape pam ye ende embe nim: “Kenem yu weieri ninamen, kombe buk pende bonjip pam mal kun wei nabonjip.” Ba, kunum puli kes wopum, sin nganj a pam ga, Baibel yu dongal napam kes mora wal si bonjip, ba kenem pilgi wei ninamen, Baibel yu yipe moro gere kanmen e, Johova Yuwom.

4. Yu duwom pi enamen bar, nawal omukro kanamen?

⁴ “Wal kawei porpor simen na, pase ngimba punom wal,” e, Johova olom Mem. (Jems 1:17) Baibel e, wal kawei wei ende, Johova kenem ngom. Alamb ende wal kawei kenem ngonom—olom alamb nalmal pilkane esmen, olom kanpolto kenem ambsik paim wal ngonom. E, Baibel Ngom Ye bol ding mal paim, Baibel yu omuk manero kanjin dal, Johova ye nalmal kanpol tonamen. Olom kenem kanpol tonom, ambsik paim wal kanem eri. Johova mambnem kerma, talende omukro kanamen, e bunuman ka, alamb porpor bol mambnem ding mal enem, na kanka mem. Yero, wusngam pende, Johova bunuman ka paim mal, Baibel tadom omukro kanamen.

5. Nal wusngam ende Baibel, Johova bunuman ka tadom?

⁵ Kenem Johova bol bunuman ka sinamen ambsik paim, olom pilkane enem. Baibel wal ka kenem ngom, bunuman ka pikro meim. Yu ka meim, alamb puli pakerongo, nomolpa enjip bar mambnem kolnga sinjip. Baibel buk ngimba 5-poro paim, Moses bom kunum, Got alambem man Israel monjip bar embe nim: “Yu meim e, yu kisi ma, enem kolmem kantawol enda.” (Lo 32:47) Baibel yu karkar enam alamb nomolpa enam bar, kapil moram. (Sng. 1:2, 3) Baibel yu kombe kes bonjip, ba Yuwom dongal kerma pa, alamb puli pakeronom. Ende embe, jw.org a pu, yu pengem ende, in the series “The Bible Changes Lives” pane paim bar, kanjel, alamb 50-poro, pakerom mal yu boljop meim, Baibel yu dongal kerma paim, yipe “[enem] pilgi nim ga bol konganem enem.”—1 Tes 2:13.

6. Nalende Baibel buk jel mal pa, buk pende ngonom?

⁶ Buk pende Baibel bol ding mal napaim. Nalende embe nimen? Nalenem, Baibel Got Johova Yuwom, olom dongal kerma paim, kolnga aimanj meim, ala bunuman kapa tulukro alamb porpor ngonom. Buk puli meim bosim alamb gosum, kongar puli wopunom kunum, bol moksum yu konganem kanapaim, ba Baibel a bunuman ka meim, kombe alamb pakero woipom, pi anjngo pakero paim. Kenem Baibel yu meim gere, germen yu buro yem kel pinjin dal, Bom Ye murmulom dongal wusngam a kenem pakerondo, nomolpa esmen bar nalmal konganem enamen mal kanamen. (Sng. 119:27; Mal. 3:16; Hib. 4:12) Baibel Bom Ye, kenem pakeronda kawei wei pisem. Embe pile, Baibel kunum kunum gernamen!

7. Got alambem man komna, Baibel nalmal pakerongo, kumbol ding monjip?

⁷ Wusngam ende, Baibel bunuman ka meim tane penem kerem e, Got alambem man komna pakerongo kumbol ding monjip. Isreal ga, Got Ngonal Panim Mal tuwal punjip kunum, enjep mal tabem jeljel mol punjip. Pende pis tonjip, pende  sipsip na bulmakau astojip, ala pende mala mokun tajip. Pu dumam ding monjip ga, angjep man pu kantri tuwalto kulu jeljel mol pujip, pilnango aur ne sikeram pam. Ba Johova wusngam er kun ernge, Israel ga porpor wo makero, olom Yuwom Baibel a mom gere, yu mem ne, aunimnge pinjip. (Lo 31:10-13; Neh. 8:2, 8, 18) Johova bol ka mom Israel ende, se Jerusalem pu, angam man millien puli wo makerojip, kanim kunum, nalmal pim mal pile! Johova alambem man pakerongo, kumbol ding monjip. Bulto, kongrikeisen min wongo, alamb yu jeljel ninjip alamb tuwal monjip, pende wal kannojip, pende konbengel monjip. Ba enjep Baibel yu kanka kanjip, erkelnge kumbol ding senge, Got wei lotu erngojip. Pilgi ninjip ga wo makero ende ende pakerojip bar, erkelnge Got Yuwom mom kanpolrojip.—Apo 2:42; 8:30, 31.

8. Johova alambem man yipe meim, Baibel nalmal pakerondo, kumbol ding meim?

⁸ Bunuman kapam Got, Baibel wusngam a alambem man anjngo duwom er ngondo, kumbol ding moram ne enem. Wusngam ele, kenem pilgi mokun ngonom bar, kapil si dongal meimen. Kenem kunum kunum kongrikeisen make paim bar, na kibung paim bar, Baibel yu gere, yu mem ne auninambe pilkane esmen. Baibel kongan kerma ere Johova alambem  man pakerondo, “kumbol ding sende olom konganem esim.”—Sef. 3:9.

9. Baibel yu mem kanpol tonamen nepinjin dal, nal mambnem sinamen? (Luk 10:21)

⁹ Johova erkelde, wal ka ende min wom mal omkro kanpe. Baibel yu puli ne kem meim, molmene mem senda alamb gernam, yu mem kanpol weironam. (Luk 10:21 gere.) Alamb mal yemyem papum Baibel gerim. Sape pam ye ende embe nim, “alamb puli kes Baibel gerim, ba kanpol weiro gere, buk pende ngom.” Ba molmene mem seim alamb mongse, gerim yu kanpolro kongnem esim.—2 Kor. 3:15, 16.

10. Johova bunuman kapaim, Baibel nal wusngam ende tadom?

¹⁰ Johova bunuman ka Baibel a meim wusngam ende duwom erngonom eri. Kenem porpor siding kele mongse duwom ere nangnom, dingding ne duwom ere ngo kumbol amin ngonom eri. E, Baibel a germen bar pilkane esmen, ombun ende min wonom kunum, Baibel gernen bar wes ende, yu e, na bol kun paim ne pilpile erin mo? (Ais. 30:21) Baibel yu meim alamb millien puli pakeronom. Ba, nalende gerin yu na bol kun pam nepisen? Nalenem, Baibel Bom Ye bunuman pa tuluk weirom.—2 Tim. 3:16, 17.

11. Baibel bonjip kunum, Got alamb porpor bol mambnem ding mal erim, nalmal tanim?

¹¹ Johova mambnem dulto paim. (Lo 32:4) Alamb porpor bol mambnem ding mal enem e, olom mambnem aiem. (Apo 10:34, 35; Rom 2:11) Embe pile, alamb yujop a Baibel bonjip bar, olom mambnem ding mal erim e tanim. Baibel buk ngimba 39-poro, Ibru yu a bonjip, yu e Got alambem man pilpol tonjip yu. Ala komna aposol kunum, Baibel buk 27-poro bulto, Grik yu a bonjip nalerim, alamb puli yu e pilkane enjip. Johova kapim yu dingeri mongse Baibel boram ne napim, yu jeljel boram nepim eri. Yipe alamb eit billien mal poro yem yem papum yujop jeljel paim. Embe pile, alamb puli Johova Yuwom nalmal duwom er kanpol tonam?

12. Yipe kunum pordom bar, Daniel 12:4 yu nepakim, nalmal mongom tonom?

¹² Propet Daniel wusngam a, Johova kunum porninal ne enda bar, “sape dulto” Baibel a meim, “wose kerma” pundo, alamb puli yu mem kanpol tonam panim. (Daniel 12:4 gere.) Ala wusngam ende er kerambe, Baibel yu wei wose kerma punom e, alamb yujop jeljel paim bar, Baibel buk na nus puli yu akro bosum, Baibel yu akro si yu jeljel paim bar, kel bosum e, se minro wei pu, buk pende ngonom. Ala bisnis ga pende Baibel akro bosum, ku kerma wei punom. Embe esim ba, Johova alambem man, alamb yujop jeljel 200-poro paim bar, Baibel pel mo pende akro bosum bol ki si ngom, ku nasim. Embe esim bar, alamb mal yem yem papum, “Got Gapman yu ka” e, pisambe, bulto, porninda kunum min wonda. (Mat. 24:14) Kenem Gotjon alamb porpor bol mambnem ding mal enem ye, alamb olom Yuwom gere kanpol tonam ne pisem. Embe enem, nalenem kenem porpor kankawei kanem.

13. Nalende Baibel Johova kanka mem, tadom paninamen? (Jon 21:25)

¹³ Baibel kenem pakerondo, Buk Bom  Ye, mambnem ende pase ngimba punom kanka —mem kanpol tonom. (1 Jon 4:8) Baibel a Johova nal yu kem meim, ala nal yu kem nameim omukro kanamen. Olom kenem pisamen ambsik paim yu kem meim, e pakerondo, olom bol seno, yipe nomolpa esmen bar kapil molo, ala mi bulto, kolnga aimanj mem sinamen. Embe erim ba, olom kanka mem tane, yu puli ninde kenem pisamen pesil panda yu nanim.—Jon 21:25 gere.

14. Baibel nal wusngam ende, Got kenem kanka kanem, e tadom?

¹⁴ Johova kenem kanka kanem pile, Baibel a kenem yu nengom bar, nomolpa enamen bar, wal kerei kerei monkel lo pakle, enamen pananim. Olom alamb kin wal-wei min wom mal yu boljop, yu propet meim na kenem pilsinamen yu nengom bar pakerondo, bunuman ka si wal omuk ka tomon. Embe enem bar, erkelde kenem Got kanka kane, kumbol wei ngo yu dom karkar esmen.   

15. (a) Johova Yuwom Baibel a meim, gerim alamb, olom enjep nalmal weieri pilngonom? (b)  Piksa kanmen bar, ambel kembis, ye gal, na amb tungam e, Baibel gerim kunum, namal yu bolom buro pisim? (Stt. 39:1, 10-12; 2 Kin. 5:1-3; Luk 2:25-38)

¹⁵ Baibel germen bar pilkane esmen, Johova kenem weieri pilngnom. Nalmal pilngonom? Olom Yuwom Baibel a, alamb nalmal kumbol a na bunuman aijep a pinjip mal, yu boljop meim. Kenem “enjep pinjip mal pisamen,” nalenem, kenem alamb, enjep bol ding mal. (Jems 5:17) Wal kerma paim Johova alamb kenem bol ding mal monjip, mambnem  erim bar taninde pilkane esmen, Johova mambnem ende paim e, “kenem bol wandil golo, wandil wei sinem.”—Jems 5:11.

16. Alamb pende sin enjip mal yu boljop, Baibel a meim ger kanemen kunum, Johova bol nawal duwom esmen? (Aisaia 55:7)

¹⁶ Johova kenem kanka kanem, Baibel wusngam pende pra tadom. Baibel taninde pilkane esmen, sin enamen kunum, Johova kenem bulngo sinakera. Israel ga kunum puli sin enjip, ba enjep kumbol weiro akrojip kunum, Got enjep alla wakrom. (Aisaia 55:7 gere.) Komna-aposol kunum Kristen monjip, Got kanka mem tanim kanjip eri. Got murmulom dongal mo oli spirit aposol Pol bu ngongo, pilgi ding ga monjip bar pepe bol kele embe nim, ye ende sin kerma enda, ba, olom kumbol weieri to akrom dal, enem olom “alla wakro yu ne kumbol” amin ngoya nim. (1 Kor. 5:1-5; 2 Kor. 2:6, 7) Johova lotu erngom alamb, enjep sin esim bar, enjep bulngo wakro sinakerem! Kanka mem tane, ala yu ne siyem kele, kumbol amin ngo, erkun enem. Yipe Kristen meim sin enam ba, kumbol to ak weironam ga, mambnem ka ding mal embe enal padom.—Jems 4:8-10.

17. Nalende Baibel e, Buk kawei jel mal ende ngom, paninamen?

¹⁷ Johova kenem wal kawei wei ende ngom. Nalende olom Yuwom Baibel a meim, wal kawei wei paninamen? Kenem duwom er kanmen, Got bunuman ka, alamb porpor bol mambnem ding mal enem, na olom kanka mem, Baibel taneori kerem. Buk e, tadom kenem Johova kanpolto senonamen ne pisem.

18. Baibel “wal kawei” Johova kenem ngom bar, kapil sangiyo nimen mem, nalmal taninamen?

¹⁸ Got Yuwom “wal kawei” ende kenem ngom, kisi mal pilaur ne nasikeramen. (Jems 1:17) Kenem kanka kane, sangiyo nimen mem anjngo taninamen. Embe nalmal enamen? Olom Yuwom gernamen ne pisamen kunum, yane ne, ala gernamen yu kumbol a na bunuman a mane, buro pisamen. Embe enamen bar pakerondo, ye kerma “Got Buk Bom Ye, sape si kanpol tonamen.”—Prov. 2:5.