1. Mang fan ni ga be pining e magar ko Bible ni kan pi’ ngodad?

 RI GAD be pining e magar ngak Jehovah Got ni ke pi’ e Bible ngodad! Bay e fonow riy ni ke pi’ ni bay e gonop riy nrayog ni nge ayuwegdad ni ngad athamgilgad u fithik’ e pi magawon ni gad be mada’nag e ngiyal’ ney. Kub manigil e athap ni ke pi’ ni fan ngodad boch nga m’on. Bin th’abi ga’ fan riy e ke fanay e Bible ni nge tamilangnag ngodad boor ban’en u rarogon. Nap’an ni gad ra fal’eg i lemnag pi fel’ngin nrib manigil, ma ri ma yib e athamgil nga lanin’dad ma ma k’aringdad ni ngad adaged ni ngad manged fager rok nib chugur thildad.​—Ps. 25:14.

2. Mang boch e kanawo’ ni ke ayuweg Jehovah e girdi’ riy ni ngar nanged murung’agen?

² Baadag Jehovah ni nge nang e girdi’ murung’agen. Rogon ni i rin’ e re n’ey kakrom e aram e i gagiyegnag boch e girdi’ rok ni ngar lik’aynaged boch ban’en, ma be pilyeg e changar rok boch i yad, miki l’og e engel rok ni nge yan i pi’ e thin rok ngak boch i yad. (Num. 12:6; Acts 10:3, 4) Machane dabiyog ni ngad filed murung’agen e pi n’ey ni faanra dan yoloy nga but’. Aram fan ni gagiyegnag Jehovah ni nge yoloy boch e pumoon e n’en baadag ni ngad nanged “nga lan e babyor.” (Jer. 30:2, BT) Ere rayog ni nge pagan’dad nrib manigil e biney e kanawo’ ni ke fanay ni nga i non riy ngodad ma ra yib angin ni bochan e ir e bin riyul’ e Got nrib “th’abi fel’ e ngongol rok!”​—Ps. 18:30, BT.

3. Mang e ke rin’ Jehovah ya nge yag ni par e Bible nge mada’ ko ngiyal’ ney? (Isaiah 40:8)

³ Mu beeg e Isaiah 40:8. Ke yan bokum biyu’ e duw ni be pi’ e Thin rok Got e fonow nib manigil ni fan ngak e piin yad ba yul’yul’. Uw rogon ni ke yag ni nge buch e re n’ey? Ba manigil e re deer ney ya ke kireb e yungi babyor nni yoloy e thin nu Bible nga daken nth’abi som’on, ma dakuriy e chiney. Yugu aram rogon  me guy Jehovah rogon ni nge abweg e girdi’ e pi thin ney nga lan yu yang e babyor. Yugu aram rogon nde flont e pi girdi’ ney, machane ri ur kol ayuwgad u rogon ni ur abweged e pi thin ney. Bod ni bay be’ ni boor ban’en u murung’agen e Bible ni manang ni yoloy murung’agen e Pi Babyor ko Bible nni Yoloy Nsom’on ni Thin ni Hebrew ni gaar: “Ba puluw ni nga dogned ndariy ba ken e babyor ni kan yoloy ni ke kakrom nrib puluw e thin riy ni bod rogon e re ke babyor ney.” Yugu aram rogon ni ke kakrom ni kan yoloy e Bible, ma kki kireb e yungi babyor nni yoloy nga daken, maku de flont e piin ur abweged e thin riy, machane rayog ni nge pagan’dad ni n’en gad be beeg u lan e Bible e ngiyal’ ney e be dag ngodad e n’en bay u laniyan’ Jehovah ni ir e En Thin Rok e bay riy.

4. Mang e gad ra weliy ko re article ney?

⁴ Jehovah e Ir e Ma Pi’ “urngin e tin nib fel’ . . . nge urngin e tow’ath nrib manigil” ngodad. (Jas. 1:17) Bible e aram reb e tow’ath nrib manigil ni ke pi’ Jehovah ngodad. Tow’ath ni ma pi’ be’ ngodad e ma dag rogon nri manangdad facha’ nge tin nib t’uf rodad. Ku arrogon e En Ke Pi’ e Bible ngodad. Nap’an ni gad ra yaliy rarogon e re tow’ath ney ma boor ban’en ni gad ra fil riy u murung’agen Jehovah. Gad ra fil riy rogon nri manangdad nge n’en nib t’uf rodad. Ere re article ney e gad ra weliy riy rogon ni be weliy e Bible murung’agen dalip i fel’ngin Jehovah ni aram e: gonop rok, nge rogon feni mat’aw, nge t’ufeg rok. Machane som’on e ngad weliyed boch e kanawo’ ni be micheg e Bible riy nib gonop Got.

5. Mang reb e kanawo’ ni be micheg e Bible riy nib gonop Got?

⁵ Manang Jehovah nib t’uf rodad e fonow rok ni bay e gonop riy. Mab sug e gonop u lan e Bible ni ke pi’ ngodad nib tow’ath. Pi fonow u Bible e ma yib angin ko girdi’, ma ma thilyeg e ngongol rorad. Nap’an ni yoloy Moses e tin som’on e babyor ko Bible me yog ngak piyu Israel ni yad e girdi’ rok Got ni gaar: “Pi machib rok Got ney e gathi thin ndariy fan; ya ir e pogofan romed.” (Deut. 32:47) Piin ur folgad ko n’en be yog e Babyor nib Thothup e rayog ni nge fel’ e par rorad mar pared ni yad ba felfelan’. (Ps. 1:2, 3) Yugu aram rogon ni ke n’uw nap’an ni kan yoloy e Thin rok Got, machane ka bay gelngin ni nge thilyeg e ngongol ko girdi’. Bod ni ga ra yan ko fapi article ni bay ko jw.org ni kenggin e “The Bible Changes Lives,” mab pag 50 e girdi’ ni ga ra beeg murung’agrad riy ni be dag rogon ni ke yag ni nge maruwel e thin nu Bible u ‘fithik’ e piin ni ke mich u wun’rad’ e ngiyal’ ney.​—1 Thess. 2:13.

6. Mang fan nrayog ni nga dogned ndariy ba ken e babyor ni bod e Bible?

⁶ Dariy ba ken e babyor ni bod e Thin rok Got. Mang fan? Ya bochan ni Jehovah Got ni ir e En Thin Rok e bay riy e gubin ma rayog rok, ma dariy e rofen nra mus, ma ir e th’abi ga’ e gonop rok. Boor ken e babyor e ra yim’ e en ni yoloy ma ka bay, machane fonow riy e ra munmun ma dabki yib angin. Machane pi kenggin e motochiyel u Bible ni bay e gonop riy e gubin ngiyal’ ni ma yib angin, ma kab kafram i yib ni be ayuweg e girdi’. Ere nap’an ni gad ra beeg e re ke babyor ney ma gad fal’eg i lemnag e n’en kad filed riy, ma aram e ra fanay e En Thin Rok e bay riy gelngin nib thothup ni nge ayuwegdad ni ngad nanged rogon ni ngad folgad ko pi fonow riy. (Ps. 119:27; Mal. 3:16; Heb. 4:12) Arrogon, baadag e En Thin Rok e bay u Bible ni nge ayuwegem. Re n’ey e susun nra k’aringdad ni ngad adaged ni ngaud beeged e Bible ni gubin e rran!

7. Uw rogon ni ayuweg e Bible e girdi’ rok Got kakrom ni nge taareban’rad?

⁷ Ku bay reb e kanawo’ ni be micheg e Bible riy nib gonop Got. Re n’ey e aram e ma ayuweg e girdi’ rok Got ni ngar pared nib taareban’rad.  Nap’an ni thap piyu Israel nga lan fare Nam ni Kan Micheg, ma ra boch i yad ma gin ni yan i par ngay. Boch i yad e mang tafita’, ma boch e i chuguliy e garbaw, ma boch i yad e i milay’. Bochan nib thilthil e gin ur pared riy ma rayog nib mom ni nge dab kur lemnaged boch i yad ni be par u yugu boch e binaw u lan e re nam nem. Machane i yarmiy Jehovah ni nga i muulung piyu Israel nga taabang ni ngaur rung’aged e Thin rok ni yibe beeg ma yibe weliy fan. (Deut. 31:10-13; Neh. 8:2, 8, 18) Am lemnag rogon laniyan’ be’ nu Israel nra taw nga Jerusalem me guy bokum milyon e piin yad ma liyor u taabang ni kar bad u yugu boch e binaw ko re nam nem! Aram rogon ni i ayuweg Jehovah e girdi’ rok ni ngaur pared nib taareban’rad. Boch nga tomuren u nap’an ni sum e ulung ni Kristiano ma boor e pumoon nge ppin ni immoy riy nib thilthil e thin rorad, nge rarogon e par rorad, maku boch i yad e ba fel’ rogon ma boch i yad e ba gafgow. Machane bochan nib ga’ fan u wan’rad e thin ni bay u lan e Babyor nib Thothup, ma aram fan ni ur liyorgad ngak e bin riyul’ e Got nib taareban’rad. Piin ni mich e tin riyul’ u wan’rad boch nga tomuren e yag ni ngar nanged fan e Thin rok Got ni bochan e i ayuwegrad e piin taareb e michan’ rorad nge ku bochan ni ur uned ngorad ko muulung u taabang.​—Acts 2:42; 8:30, 31.

8. Uw rogon ni be ayuweg e Bible e girdi’ rok Jehovah e ngiyal’ ney ni nge taareban’rad?

⁸ Ka be ulul e Got rodad nib gonop ni nge fanay e Bible ni nge skulnag e girdi’ rok me ayuwegrad ni nge taareban’rad. Aram e gin ni bay  riy e tin riyul’ u murung’agen Jehovah nib t’uf ni ngad nanged. Gubin ngiyal’ ni gad ma un ko pi muulung, nge assembly, nge convention ni gad ma tay ni ngad rung’aged e thin nu Bible ni yibe beeg, ma yibe weliy fan, maku yibe weliy u taabang. Ere Bible e aram ban’en nrib ga’ fan ni ma fanay Jehovah ni nge ayuweg e girdi’ rok ni ngar “pigpiggad ngak u taabang nib taareban’rad.”​—Zef. 3:9, NW.

9. Mang fel’ngin e ba t’uf ni nge yag ngodad ya nge yag nda nanged fan e thin nu Bible? (Luke 10:21)

⁹ Kum lemnag reb e ban’en ni be micheg nib gonop Jehovah. Boor yang u lan e Bible ni gagiyegnag ni ngan yoloy u reb e kanawo’ ni kemus ni yigoo piin nib sobut’an’rad e rayog ni ngar nanged fan. (Mu beeg e Luke 10:21.) Ga’ngin yang e fayleng ni ma beeg e girdi’ e Bible riy. I yog be’ ni boor ban’en u murung’agen e Bible ni manang ni Bible e “kemus e re ke babyor nth’abi yoor e girdi’ ni ma beeg ma ri ku yima fal’eg i beeg e thin riy nib fel’ rogon.” Machane kemus ni yigoo piin nib sobut’an’rad e yad ma nang fan e thin riy mar folgad riy.​—2 Kor. 3:15, 16.

10. Ku mang reb e kanawo’ ni be micheg e Bible riy nib gonop Jehovah?

¹⁰ Ku bay reb e kanawo’ ni gad ma fil murung’agen e gonop rok Jehovah riy u lan e Bible. Gathi kemus ni ma fanay Jehovah e Bible ni nge skulnagdad ni gad gubin, ya ku ma fanay ni nge skulnagdad ma be fal’eg lanin’dad ni be’ nge be’. Nap’an ni gad ra beeg e Thin rok ma rayog ni ngad nanged riy ni ma lemnagdad ni be’ nge be’. (Isa. 30:21) Uw urngin yay ni kam beeg e Bible rom u nap’an ni ga be mada’nag reb e magawon mag pirieg reb e verse riy ni gowa gur e kan yoloy ni fan ngom? Ya bin riyul’ riy e kan yoloy e Bible ni nge nang bokum milyon e girdi’ fan e thin ni bay riy. Ere uw rogon ni ke yag ni ngan tay boch e thin ngay nib puluw ko n’en nib t’uf rom? Ke yag ni ngan rin’ e re n’ey ni bochan e En Thin Rok e bay u Bible e Ir e th’abi gonop u ga’ngin e palpalth’ib.​—2 Tim. 3:16, 17.

11. Uw rogon ni dag Got nder laniyan’ u nap’an ni yibe yoloy e Bible?

¹¹ Ku reb i fel’ngin Jehovah e aram e ir reb e Got nib mat’aw. (Deut. 32:4) Be’ nib mat’aw e ba ga’ ni ku ir be’ nder ma laniyan’, ma Jehovah e ir reb e Got nder ma laniyan’. (Acts 10:34, 35; Rom. 2:11) Rayog ni ngad guyed nib riyul’ e re n’ey ni bochan e ni yoloy e Bible u reb e thin ni boor e girdi’ ni ma yog e ngiyal’ nem. Fa 39 nsom’on ken e babyor ko Bible e yooren riy e ni yoloy ko thin ni Hebrew ni aram e re thin nib mom ni nge nang e girdi’ rok Got fan e ngiyal’ nem. Machane nap’an ni taw ko bin som’on e chibog C.E., ma yooren e girdi’ e yad ma non ni thin ni Greek. Ere fa 27 ken e babyor ko Bible ni tomur e ba ga’ nni yoloy ko re thin ney. De dugliy Jehovah ni nge par ni kemus ni taareb e thin e ngan yoloy e Thin rok riy. Ngiyal’ ney e ke chugur ni nge gaman meruk e bilyon e girdi’ u fayleng, mab thilthil e thin ni yad ma yog. Ere uw rogon nrayog ni nge fil e pi girdi’ ney ni er urngirad murung’agen Jehovah?

12. Mang reb e kanawo’ ni ke lebug e Daniel 12:4 riy e ngiyal’ ney ko tin tomuren e rran?

¹² I micheg Jehovah u daken Daniel ni profet nra taw ko tin tomuren e rran ma ra “ga’” e bin riyul’ e “llowan’” ni bay u lan e Bible. Boor e girdi’ ni yad ra nang fan e pi thin ney. (Mu beeg e Daniel 12:4.) Reb e kanawo’ ni ke ga’ e bin riyul’ e llowan’ riy e u daken e pi Bible nge pi babyor nib puluw e thin riy ko Bible ni yibe pilyeg, ma yibe ngongliy, ma yibe wereg ko girdi’. Bible e aram e re ke babyor nth’abi yoor mit e thin ni kan pilyeg ngay, ma boor e girdi’ ni bay rorad. Pi Bible ni ke ngongliy yu raba’ e siyobay e bay yu ngiyal’ nrib tolang puluwon. Ba pag 240 mit e thin ni ke pilyeg e girdi’ rok  Jehovah e Thin rok Got ngay ni boch e kan fal’eg nib polo’ ma boch e kemus ni bang riy, ma demtrug be’ nrayog ni nge yag ba ken ngak ndariy puluwon. Bochan e re n’ey, ma be yag ni nge fil e girdi’ u gubin e nam fare ‘Thin rok Got Nib Fel’ ni murung’agen e gagiyeg rok’ u m’on ni nge yib e tomur. (Matt. 24:14) Baadag e Got rodad nib mat’aw ni nge bing e kanawo’ ngak urngin e girdi’ nrayog ni ngar beeged e Thin rok ya nge yag nra nanged murung’agen ni bochan e gad gubin nri gad ba t’uf rok.

13. Mang fan nrayog ni nga dogned ni be m’ug e t’ufeg rok Jehovah u lan e Bible? (John 21:25)

¹³ Be ayuwegdad e Bible ni ngad nanged ni bin th’abi lingagil i fel’ngin Jehovah e aram e t’ufeg. (1 John 4:8) Am lemnag e pi n’en ke uneg Jehovah nga lan e Bible nge tin nde uneg. Ke pi’ e n’en nib t’uf rodad ya nge yag ni fel’ e tha’ u thildad, ma gad par ni gad ba felfelan’ e chiney, me yag e yafos ni manemus ngodad. Machane bochan ni gad ba t’uf rok ma de tay boch ban’en nga lan e thin rok nde t’uf ni ngad nanged ya nge yag nda pigpiggad ngak.​—Mu beeg e John 21:25.

14. Ku mang reb e kanawo’ ni be micheg e n’en bay u Bible ni gad ba t’uf rok Got?

¹⁴ Ki dag Jehovah ni gad ba t’uf rok u rogon ni ke non ngodad u reb e kanawo’ ni be m’ug riy ni be tay fadad. Gathi gubin ban’en ni ke tay e motochiyel riy nga lan e Bible ni be yog ngodad e n’en nrayog ni ngad rin’ed nge n’en ndabiyog ni ngad rin’ed ko pi n’en gad ma rin’ u lan e yafos rodad. Ya n’en ma rin’ e ma fanay chepin boch e girdi’, nge boch e yiiy, nge boch e fonow nib manigil ni nge ayuwegdad ni ngad dugliyed e n’en nib fel’ ni ngad rin’ed. Aray rogon ni ma k’aringdad e Thin rok Got ni ngad t’ufeged ma gad fol rok u polo’ i gum’ircha’dad.

15. (a) Uw rogon ni ke dag Jehovah ni ma lemnag e piin yad ma beeg e Thin rok? (b) Mini’ boch e girdi’ ni bay murung’agrad u Bible ni be lemnagrad fachi buliyel, nge fare walag ni kab pagel, nge fare walag nib pin ni ke pilibthir ni bay yaarad ko sasing? (Gen. 39:1, 10-12; 2 Ki. 5:1-3; Luke 2:25-38)

 ¹⁵ Be tamilangnag e Bible nri ma lemnagdad Jehovah. Ni uw rogon? Boor ban’en u lan e Thin rok ni be tamilangnag rogon laniyan’ e girdi’. Rayog ni ngad nanged rogon laniyan’ e piin bay murung’agrad u lan e Bible ni bochan e ku yad “bod gadad e tiney e girdi’.” (Jas. 5:17) Bin nib ga’ fan riy e, faan gad ra fal’eg i yaliy rogon e ngongol rok Jehovah ngak e pi girdi’ nem ni yad bod gadad, ma aram e rayog ni ngari tamilang u wan’dad nri “ma runguy ma ma taganan’ ngak e girdi’.”​—Jas. 5:11.

16. Mang e gad ra fil u murung’agen Jehovah u nap’an ni gad ra beeg murung’agen boch e girdi’ u Bible ni ur olobochgad? (Isaiah 55:7)

¹⁶ Ku bay reb e kanawo’ ni be tamilangnag e Bible riy ni gad ba t’uf rok Jehovah. Be micheg ndabi digeydad e Got rodad u nap’an ni gad ra oloboch. Boor yay ni denen piyu Israel nib togopuluw ngak Jehovah, machane nap’an nra kalgadngan’rad ma aram me n’ag fan rorad. (Mu beeg e Isaiah 55:7.) Ku manang e pi Kristiano ko bin som’on e chibog ni yad ba t’uf rok Got. Nni thagthagnag nga laniyan’ apostal Paul ni nge yog ngak e piin taareb e michan’ rorad ni ‘ngar n’iged fan u wun’rad’ e tin ke rin’ be’ nib pumoon ni ke rin’ reb e denen nib ubchiya’ machane ke kalngan’, ‘mi yad pi’ e athamgil nga laniyan’.’ (2 Kor. 2:6, 7; 1 Kor. 5:1-5) Rib manigil e n’en ke rin’ Jehovah nde digey e pi tapigpig rok ni bochan e kar olobochgad! Ya ayuwegrad u fithik’ e t’ufeg, me yal’uwegrad, miki pi’ e athamgil ngorad ni ngkur sulod ngak bayay. Ku aram e n’en ke micheg nra rin’ ni fan ngak e pi tadenen ni yad ra kalngan’rad e ngiyal’ ney.​—Jas. 4:8-10.

17. Mang fan ni Bible e aram reb e tow’ath nrib manigil?

¹⁷ Rib manigil e tow’ath ni ke pi’ Jehovah ngodad. Mang fan nrib manigil e Thin rok? Ya kad filed ni be micheg e Bible nib gonop Got, mab mat’aw, ma gad ba t’uf rok. Be micheg e re ke babyor ney ni baadag Jehovah ni ngad nanged rarogon. Baadag ni ngad manged fager rok.

18. Uw rogon ni ngad daged nib ga’ fan e Bible u wan’dad ni aram reb e tow’ath ni ke yib rok Jehovah “nrib manigil”?

¹⁸ Dubdad ni ngad paged talin ni Thin rok Got e aram reb e “tow’ath nrib manigil.” (Jas. 1:17) Ere ngad ululgad ni ngaud daged nib ga’ fan u wan’dad ni aram e ngaud beeged e thin riy ma gad be fal’eg i lemnag. Gad ra rin’ e re n’ey, ma aram e rayog ni nge pagan’dad nra tow’athnagdad e En Thin Rok e bay riy me ‘fel’ rogon nda nanged murung’agen Got.’​—Prov. 2:5.