1. Ano an nagpaparisa na mahalaga ki Jesus an Kasuratan?

 IMAHINARA kun ano an pagmati mantang nagdadangog sa pagtutukdo ni Jesus. Parati siyang nagkokotar hali sa Banal na Kasuratan asin memoryado niya an mga iyan! Sa katunayan, sa saiyang inot na mga tataramon na nairekord pakatapos na siya mabawtismuhan asin sa nagkapira sa saiyang huring mga tataramon bago siya magadan, nagkotar si Jesus hali sa Kasuratan. b (Deu. 8:3; Sal. 31:5; Luc. 4:4; 23:46) Asin durante kan tulo may kabangang taon sa pag-ultanan kan duwang pangyayaring iyan, parating nagbabasa si Jesus sa publiko saka nagkokotar hali sa Kasuratan asin ipinapaliwanag iyan sa sainda.—Mat. 5:17, 18, 21, 22, 27, 28; Luc. 4:16-20.

2. Mantang nagdadakula si Jesus, ano an nakatabang sa saiya na magin pamilyar na marhay sa Kasuratan? (Hilingon an ritrato sa cover.)

² Sa mga taon bago an ministeryo ni Jesus, pauruutrong nabasa asin nadangog niya an Tataramon nin Diyos. Sa saindang harong, daing duda na nadangog niya si Maria asin Jose na nagkokotar hali sa Kasuratan pag nag-uurulay sinda bilang pamilya aroaldaw. c (Deu. 6:6, 7) Makakasigurado kita na kada Sabbath nagduduman si Jesus sa sinagoga kaiba kan saiyang pamilya. (Luc. 4:16) Mantang yaon duman, siguradong nagdadangog siyang marhay mantang binabasa an Kasuratan. Pag-abot nin panahon, nanudan mismo ni Jesus na basahon an Sagradong mga Kasuratan na idto. Bilang resulta, dai sana nagin pamilyar na marhay si Jesus sa Kasuratan kundi namutan niya man iyan asin tinugutan iyan na makaimpluwensiya sa saiyang mga ginigibo. Halimbawa, girumduma an nangyari sa templo kan si Jesus 12 anyos pa sana. An mga paratukdo  na eksperto sa Katugunan ni Moises “napapangalas na marhay sa . . . pakasabot [ni Jesus] asin mga simbag.”—Luc. 2:46, 47, 52.

3. Ano an pag-uulayan ta sa artikulong ini?

³ Puwede ta man na maaraman asin mamutan an Tataramon nin Diyos pag regular tang binabasa an Kasuratan. Pero, paano kita lubos na makikinabang sa satuyang binabasa? Makakanuod kita sa sinabi ni Jesus sa mga tawong pamilyar sa Katugunan, kaiba na an mga eskriba, mga Fariseo, asin mga Saduceo. An mga lider nin relihiyon na idto parating binabasa an Kasuratan, pero dai sinda nakikinabang sa nababasa ninda. Itinampok ni Jesus an tulong paagi na ginibo kutana kan mga lalaking ini tanganing urog na makinabang sa Kasuratan. An mga sinabi niya sa sainda makakatabang sa sato na pauswagon an satong kakayahan na (1) masabutan an satuyang binabasa, (2) mahanap an espirituwal na mga kayamanan, asin (3) tugutan an Tataramon nin Diyos na moldehon kita.

4. Ano an itinutukdo sa sato kan Lucas 10:25-29 manungod sa pagbasa kan Tataramon nin Diyos?

⁴ Gusto tang masabutan an kahulugan kan nababasa ta sa Tataramon nin Diyos. Ta kun dai, tibaad dai kita lubos na makinabang sa satong binabasa. Halimbawa, pag-isipan an pakikipag-ulay ni Jesus sa “sarong lalaking eksperto sa Katugunan.” (Basahon an Lucas 10:25-29.) Kan maghapot an lalaki kun ano an kaipuhan niyang gibuhon para magkamit nin buhay na daing katapusan, tinabangan siya ni Jesus na makua an simbag sa Tataramon nin Diyos paagi sa paghapot: “Ano an nakasurat sa Katugunan? Ano an naintindihan mo sa nabasa mo?” Nasimbag iyan nin tama kan lalaki paagi sa pagkotar sa kasuratan manungod sa pagkamuot sa Diyos asin pagkamuot sa kapwa. (Lev. 19:18; Deu. 6:5) Pero risahon kun ano an sunod niyang sinabi: “Siisay man nanggad an sakuyang kapwa?” Ipinahiling kaiyan na dai nasabutan kan lalaki an tunay na kahulugan kan binasa niya. Bilang resulta, dai niya aram kun paano iaaplikar nin tama sa saiyang buhay an kasuratan na idto.

5. Paano an pagpamibi asin bakong marikas na pagbasa makakatabang na mas masabutan ta an satong binabasa?

⁵ Mas masasabutan ta an Tataramon nin Diyos paagi sa pagkaigwa nin marahay na ugali sa pagbasa. Uni an nagkapirang suhestiyon na makakatabang sa saimo. Mamibi bago magbasa. Kaipuhan ta an tabang ni Jehova para masabutan an Kasuratan, kaya puwede tang hagadon sa saiya an saiyang banal na espiritu para makapagpokus. Dangan dai pakarikason an pagbasa. Matatabangan ka kaiyan na masabutan an binabasa mo. Tibaad kapaki-pakinabang kun mabasa ka nin makusog o kun susubaybayan mo an audio recording kan Bibliya. Sa siring, pareho mong magagamit an saimong paghiling asin pandangog, na huli kaiyan mas makakatadom sa saimong isip asin puso an Tataramon nin Diyos. (Jos. 1:8) Pagkatapos mong magbasa, mamibi giraray para pasalamatan si Jehova sa balaog na Tataramon niya asin para hagadon an saiyang tabang na maiaplikar an nabasa mo.

6. Paano an paghapot sa sadiri asin pagsurat nin haralipot na nota makakatabang sa saimo pag nagbabasa ka? (Hilingon man an ritrato.)

⁶ Uni an duwa pang suhestiyon na makakatabang sa saimo na mas masabutan an Bibliya. Haputon an saimong sadiri manungod sa saimong binabasa. Mantang iniisip-isip an sarong partikular na pagkasaysay, simbagon an mga hapot na ini: ‘Siisay an panginot na mga karakter? Siisay an nagtataram? Kiisay siya nakikipag-ulay, asin taano? Sain asin kasuarin ini nangyari?’ An siring na mga hapot makakatabang sa saimo  na mapag-isipan asin masundan an panginot na mga ideya kan binabasa mo. Siring man, magsurat nin haralipot na nota pag nagbabasa ka. Pag isinusurat mo an saimong nabasa, mas pinag-iisipan mo iyan asin makakatabang iyan para mas masabutan mo asin magirumduman an binasa mo. Puwede kang magsurat nin mga hapot. Puwede mong isurat an mga na-research mo, an sumaryo kan panginot na mga punto, kun paano mo magagamit an binasa mo, o kun ano an namati mo sa saimong binasa. An pagsurat nin siring na mga nota makakatabang sa saimo na mansayon an Tataramon nin Diyos bilang saiyang personal na mensahe sa saimo.

7. Anong kuwalidad an kaipuhan ta pag nagbabasa kita, asin taano? (Mateo 24:15)

⁷ Sinambit ni Jesus an sarong mahalagang kuwalidad na kaipuhan ta kun gusto tang masabutan an nababasa ta sa Tataramon nin Diyos—an pakamansay. (Basahon an Mateo 24:15.) Ano an pakamansay? Iyan an kakayahan na masabutan kun paanong an sarong ideya konektado sa saro pa asin kun paano napapalain iyan sa saro pang ideya saka na marisa kun ano an dai malinaw na sinambit. Dugang pa, ipinarisa ni Jesus na kaipuhan ta an pakamansay para maaraman ta an mga pangyayari na nagigin kautuban kan propesiya sa Bibliya. Kaipuhan ta man an kuwalidad na ini tanganing makinabang kita nin lubos sa gabos na nababasa ta sa Bibliya.

8. Paano kita mabasa nin may pakamansay?

⁸ Tinatawan ni Jehova an saiyang mga lingkod nin pakamansay. Kaya mamibi sa saiya, asin hagadon sa saiya na tabangan ka na mapauswag an kuwalidad na iyan. (Tal. 2:6) Paano ka mahiro kauyon kan saimong pamibi? Siyasaton na marhay an binabasa mo, asin aramon kun paano iyan konektado sa iba pang mga bagay na aram mo. Para matabangan ka, gamiton an satong mga pantabang sa pag-adal sa Bibliya, arog kan Giya sa Pag-research Para sa Mga Saksi ni Jehova. An mga pantabang na ini makakatabang sa saimo para masabutan an kahulugan kan sarong teksto sa Bibliya asin mahiling an mga paagi kun paano  mo iyan maiaaplikar sa saimong buhay. (Heb. 5:14) Pag nagbabasa ka nin may pakamansay, mas maurog an saimong pakasabot sa Kasuratan.

9. Anong mahalagang katotoohan sa Kasuratan an binaliwala kan mga Saduceo?

⁹ An mga Saduceo pamilyar na marhay sa inot na limang libro kan Hebreong Kasuratan, pero dai ninda inako an mahalagang mga katotoohan na yaon sa ipinasabong na mga librong iyan. Halimbawa, pag-isipan kun paano nagsimbag si Jesus kan haputon siya kan mga Saduceo manungod sa pagkabuhay liwat. Hinapot niya sinda: “Dai nindo nabasa sa libro ni Moises, sa salaysay manungod sa matunok na palungpong, na sinabi nin Diyos sa saiya: ‘Ako an Diyos ni Abraham asin Diyos ni Isaac saka Diyos ni Jacob’?” (Mar. 12:18, 26) Dawa ngani siguradong dakul na beses nang nabasa kan mga Saduceo an mga tataramon na iyan, ihinayag kan hapot ni Jesus na binaliwala ninda an mahalagang katotoohan sa Kasuratan—an katukduan manungod sa pagkabuhay liwat.—Mar. 12:27; Luc. 20:38. d

10. Sa ano kita dapat na magin alisto pag nagbabasa?

¹⁰ Ano an manunudan ta diyan? Pag nagbabasa kita, gusto ta na magin alisto sa gabos na puwedeng manudan ta sa sarong bersikulo o sa sarong pagkasaysay sa Bibliya. Gusto tang masabutan bako sana an panginot na mga katukduan kundi pati man an mas hararom na mga katotoohan asin mga prinsipyo na nasa likod kaiyan.

11. Kauyon kan sinasabi sa 2 Timoteo 3:16, 17, paano ka makakahanap nin mga kayamanan sa Bibliya?

¹¹ Paano ka makakahanap nin espirituwal na mga kayamanan pag nagbabasa nin Bibliya? Pag-isipan an sinasabi kan 2 Timoteo 3:16, 17. (Basahon.) Mangnuhon na “an bilog na Kasuratan . . . kapaki-pakinabang” sa (1) pagtukdo, (2) pagsaway, (3) pagtanos kan mga bagay-bagay, asin (4) pagdisiplina. Puwede mong kamtan an apat na pakinabang na iyan dawa sa mga libro kan Bibliya na dai mo parating nagagamit. Siyasaton an pagkasaysay para mahiling kun ano an itinutukdo kaiyan sa saimo manungod ki Jehova, manungod sa saiyang katuyuhan, o manungod sa diyosnon na mga prinsipyo. Pag-isipan kun paano iyan nakakatabang sa pagsaway. Gibuhon ini paagi sa pagtao nin atensiyon kun paano an mga bersikulo makakatabang sa saimo para maaraman asin maisikwal an salang mga tendensiya o mga ugali asin para magdanay na maimbod ki Jehova. Siyasaton kun paano magagamit an teksto para itanos, o itama, an sarong salang kaisipan, na tibaad sinabi sa saimo kan saro na nakaulay mo sa ministeryo. Asin hanapon an ano man na pagdisiplina na itinatao kan mga bersikulo na masanay sa saimo para maipahiling an kaisipan ni Jehova. Kun tatandaan mo an apat na pakinabang na iyan, mahahanap mo an espirituwal na mga kayamanan na makakatabang sa saimo para lubos na makinabang sa saimong pagbasa nin Bibliya.

12. Taano ta hinapot ni Jesus an mga Fariseo nin “Dai nindo nabasa?”

¹² Naghapot man si Jesus nin “Dai nindo nabasa?” para ihayag na an mga Fariseo igwa nin salang kaisipan manungod sa Kasuratan. (Mat. 12:1-7) e Kan pagkakataon na idto, sinabi kan mga Fariseo na binalga kan mga disipulo ni Jesus an Sabbath. Bilang simbag, sinambit ni Jesus an duwang halimbawa sa Kasuratan asin nagkotar nin bersikulo hali sa libro ni Oseas para ipahiling na dai nasabutan kan mga Fariseo an manungod sa katugunan nin Sabbath asin na dai sinda nakapahiling nin pagkahirak. Taano ta an mga lalaking ini dai namolde kan saindang pagbasa kan Tataramon nin Diyos? Huling binasa ninda iyan nin may mapagkritikang sabuot asin mapalangkaw na kaisipan. Huli kaiyan, dai ninda nasabutan an saindang binabasa.—Mat. 23:23; Juan 5:39, 40.

13. Ano dapat an sabuot ta pag nagbabasa nin Bibliya, asin taano?

¹³ Manunudan ta sa mga tataramon ni Jesus na kaipuhan na basahon ta an Bibliya nin may tamang sabuot. Kabaliktaran kan mga Fariseo, dapat na kita sinsero asin andam na makanuod. Dapat niyatong “akuon na may kahuyuan an tataramon na itinatadom” sa sato. (Sant. 1:21) Kun mahuyo kita, tutugutan ta an Tataramon nin Diyos na makagamot sa satuyang puso. Mamomolde sana kita kan mga leksiyon sa Bibliya manungod sa pagkahirak, pagmalasakit, asin pagkamuot kun lilikayan ta an mapagkritikang sabuot o mapalangkaw na kaisipan.

14. Paano ta masasabi kun baga tinutugutan ta an Bibliya na moldehon kita? (Hilingon man an mga ritrato.)

¹⁴ An satong paagi nin pagtratar sa iba puwedeng magparisa kun baga tinutugutan ta an Tataramon nin Diyos na moldehon kita. Dai nagibo kan mga Fariseo na tugutan an Tataramon nin Diyos na makaabot sa saindang puso, asin bilang  resulta, “kinondenar [ninda] an mga daing sála.” (Mat. 12:7) Sa kaparehong paagi, an satong pagmansay asin pagtratar sa iba naghahayag kun baga tinutugutan ta an Tataramon nin Diyos na moldehon kita. Halimbawa, parati ta daw nasasabi an mga marahay na nahihiling ta sa iba, o mas parati tang nasasabi an saindang mga kaluyahan? Mahihirakon daw kita asin andam na magpatawad, o mapagkritika kita asin nagtatanom nin raot nin buot? An siring na pagsiyasat sa sadiri puwedeng ihayag kun baga tinutugutan ta an satong binabasa na moldehon an satong mga kaisipan, pagmati, asin paggawi.—1 Tim. 4:12, 15; Heb. 4:12.

15. Ano an namati ni Jesus manungod sa Banal na Kasuratan?

¹⁵ Namumutan ni Jesus an Banal na Kasuratan, asin an saiyang pagmati ihinayag kan propetikong mga tataramon na nasa Salmo 40:8: “An gibuhon an saimong kabutan, O sakuyang Diyos, iyo an dakulang kaugmahan ko, asin an saimong katugunan nasa kalaog-laugi ko.” Bilang resulta, maugma siya asin mapanggana sa paglilingkod ki Jehova. Magigin maugma man kita asin mapanggana kun hihinguwahon ta na makaabot sa satong puso an Tataramon nin Diyos.—Sal. 1:1-3.

16. Anong mga paagi an puwede mong gibuhon para mas makinabang ka sa pagbasa kan Tataramon nin Diyos? (Hilingon an kahon na “ An mga Tataramon ni Jesus Makakatabang sa Saimo na Masabutan an Binabasa Mo.”)

¹⁶ Kauyon kan mga tataramon ni Jesus asin halimbawa, pauswagon niyato an satong mga kakayahan sa pagbasa nin Bibliya. Mapapauswag ta an satong pakasabot sa mga teksto sa Bibliya paagi sa pagpamibi, bakong marikas na pagbasa, paghapot, asin pagsurat nin haralipot na nota. Puwede tang gamiton an pakamansay paagi sa maingat na pagsiyasat kan satong binabasa sa tabang kan satong mga publikasyon na basado sa Bibliya. Puwede tang mapauswag an satong paggamit kan Kasuratan, dawa pa sa mga pagkasaysay na dai kita gayo pamilyar, paagi sa paghanap nin espirituwal na mga kayamanan sa mga pagkasaysay na iyan. Asin puwede tang tugutan an Tataramon nin Diyos na moldehon kita paagi sa pagpadanay kan tamang sabuot pag nagbabasa kita. Kun gigibuhon ta an mga ini, mas makikinabang kita sa satong pagbasa nin Bibliya asin mas mapaparani kita ki Jehova.—Sal. 119:17, 18; Sant. 4:8.