1. Jesuh caah Cathiang cu a biapimi a si ti kha zeinihdah a langhter?

 JESUH cawnpiaknak ngaih cu zeidah a lawh ti khi ruathmanh. Aa cinkenmi Cathiang kong kha a cherhchan tawn! Tipil a in hnuah a chim hmasa bikmi bia le a thih hlanah hmanung bik a chimmi bia cheukhat cu Cathiang in a cherhchanmi a si. b (Deut. 8:3; Salm 31:5; Luka 4:4; 23:46) Tipil a in in a thih tiang kumthum le cheu chungah Jesuh nih mi hmaiah Baibal a rel i Cathiang kha a cherhchan i a fianter.—Matt. 5:17, 18, 21, 22, 27, 28; Luka 4:16-20.

2. Jesuh cu a hun upat tikah Cathiang kong ṭha tein hngalhthiam awkah zeinihdah a bawmh? (A phaw hmanthlak zoh.)

² Phungchimnak rian a thawk hlan kum tampi lioin Jesuh nih Pathian Bia kha a rel i a ngaih lengmang. Inn i nifatin an chungkhar biaruahnak ah Mary le Josef nih Cathiang an cherhchanmi kha a theih lai ti cu a fiang ko. c (Deut. 6:6, 7) Jesuh cu Sabbath ni fatin a chungkhar he pumhnak inn ah an i pum lai ti kha kan zumh khawh. (Luka 4:16) Mah ah Cathiang an relmi kha ṭha tein a ngaih ko lai. Mah hnuah amah tein Cathiang rel awkah a hun cawn. Cucaah Jesuh nih Cathiang kong ṭha tein a hun hngalh lawng si loin mah kha a sunsak i a tuahsernak cungah huham a ngeihter. Tahchunhnak ah, kum 12 a si lioah biakinn chungah zeidah a cang ti kha ruathmanh. Moses Nawlbia ṭha tein a hngalthiammi cawnpiaktu hna cu Jesuh “a fim ning le a bia leh ning ah khan an khuaruah a har ko.”—Luka 2:46, 47, 52.

3. Hi capar ah zei kong dah kan i ruah hna lai?

 ³ Kannih zong Pathian Bia kha hmaan tein kan rel tikah kan hngalhthiam khawh i kan sunsak khawh ve. Asinain kan relmi in zeitindah ṭhathnemhnak tam deuh kan hmuh khawh? Phungbia cawnpiaktu saya, Farasi mi le Sadusi mi hna i telin Nawlbia kong ṭha tein a hngalthiammi hna sinah Jesuh nih a chimmi bia in kan cawn khawh. Mah biaknaklei hruaitu hna nih Cathiang kha atu le atu an rel ko nain an relmi in ṭhathnemhnak an rak hmu lo. Mah pa hna nih Cathiang in ṭhathnemhnak tam deuh an hmuh nakhnga an tuah awk a simi a kong pathum kha Jesuh nih a langhter. Mah nih (1) kan relmi kong hngalhthiam awk, (2) thlaraulei lungvar hna hmuh awk le (3) Pathian Bia i sersiamter awkah a kan bawmh lai.

4. Pathian Bia relnak kong he aa tlaiin Luka 10:25-29 nih zeidah a kan cawnpiak?

⁴ Baibal kan relmi a sullam kha hngalhthiam kan duh. Asinain kan relmi in ṭhathnemhnak tling kan hmu men lai lo. Tahchunhnak ah, Jesuh he bia aa ruahmi “Phungbia cawnpiaktu saya pakhat” kong hi ruathmanh. (Luka 10:25-29 rel.) Mah pa nih zungzal nunnak hmuh awkah zeidah ka tuah a hau tiah a hal tikah Jesuh nih Baibal in a phi hmuh awkah a rak bawmh. Cun hitin a hal: “Cathiang nih zeitindah a chim i a chimmi cu zeitindah a sullam naa lak ning a si?” Mah pa nih Pathian le na innpa na dawt hna lai timi cathiang a cherhchannak thawngin a hmaanmi a phi kha a rak pek khawh. (Lev. 19:18; Deut. 6:5) Asinain a hnuah zeidah a chim ti kha i cinken: “Ahodah ka innpa cu a si?” Mah mipa nih a relmi a sullam taktak a hngalthiam lo ti kha mah nih a langhter. Cucaah mah Cathiang kha a nunnak ah zeitindah ka zulh lai ti kha a hngal lo.

5. Kan relmi kong hngalhthiam deuh awkah thlacamnak le duhsah tein relnak nih zeitindah a kan bawmh khawh?

⁵ Ṭha tein Baibal kan rel peng ahcun Pathian Bia kha ṭha deuh in kan hngalhthiam khawh. Aan bawm khomi ruahnak cheuhnak cheukhat a um. Na rel hlanah thlacam hmasa. Cathiang kong hngalhthiam awkah Jehovah bawmhnak kan herh. Cucaah kan relmi kong ah lungthin kan pek khawh nakhnga thiang thlarau kan hal khawh. Cun duhsah tein rel. Mah nih na relmi kong kha hngalhthiam awkah aan bawmh lai. Baibal aw chuah in rel asiloah awkhumhmi ningin rel venak in ṭhathnemhnak na hmu kho. Awkhumhmi kha na ngaih i a ca kha na zoh ve ahcun mah nih hngalhthiam awk, i cinken awk le tam deuh in cawn awkah aan bawmh khawh. (Josh. 1:8) Na rel dih tikah Jehovah pekmi Baibal laksawng caah naa lawmhnak kong chim awk le na relmi ningin na zulh khawh nakhnga bawmh awkah thlacam ṭhan.

6. Baibal na rel lioah bia i halnak le chingchiahnak i ṭialnak nih zeicah aan bawmh khawh? (Hmanthlak zoh.)

⁶ Baibal ṭha deuh in hngalhthiam awkah a bawm khomi a dang ruahnak cheuhnak pahnih a um. Na relmi kong he aa tlaiin bia i hal. Baibal in a kong pakhat na rel tikah hitin i hal: ‘A bik in aa telmi cu ahodah a si? Bia a chimtu cu ahodah a si? Aho sinah dah a chim, zeicah? Khoika ah le zeitik ah dah a si?’ Mah bantuk biahalnak hna nih na relmi kong kha ruah awk le zulh awkah aan bawmh lai. Cun na rel lioah chingchiahnak i ṭial. Cutin naa ṭial ahcun na relmi kong kha tam deuh in na ruah khawh lai i mah nih hngalhthiam deuh awkah aan  bawmh lai. Cun na relmi kong kha i cinken awk zongah aan bawmh lai. Biahalnak hna, hlathlainak na tuahmi le a biapimi a kong pawl kha a tawinak in i ṭial. Mah lengah na relmi ningin zulh khawh ning asiloah na intuar ning kong zong kha ṭial. Cu bantuk i ṭialnak nih Baibal kha Pathian nih nangmah aan kuatmi ca in na hmuh khawh lai.

7. Baibal kan rel tikah zei sining dah ngeih a hau, zeicah? (Matthai 24:15)

⁷ Baibal kan relmi hngalhthiam awkah kan ngeih a herhmi, a biapimi sining pakhat kha Jesuh nih a langhter. (Matthai 24:15 rel.) Hngalhthiamnak timi cu zeidah a si? A kong pakhat cu a dang a kong pakhat he zeitindah aa pehtlaih i zeitindah aa thleidan timi hngalhthiam le fiang tein langhter lomi a kong hna hngalhthiam khawhnak sining kha a si. Mah lengah Jesuh nih Baibal chimchungbia a tling ti a langhtermi thil sining hngalh awkah hngalhthiamnak kan ngeih a herh ti zong a langhter. Kan relmi Baibal kong hna in ṭhatnak tling kan hmuh khawh nakhnga mah sining zong kan ngeih a hau.

8. Hngalhthiamnak hmangin zeitindah Baibal kan rel khawh?

⁸ Jehovah nih a salle kha hngalhthiamnak a pek hna. Cucaah a sinah thlacam law mah sining na ṭhanchoter khawh nakhnga bawmhnak hal. (Ptb. 2:6) Na thlacammi ningin zeitindah na tuah khawh? Na relmi kong kha ṭha tein hlathlai law na hngalh ciami a dang kong hna he zeitindah aa pehtlaih ti kha i chingchiah. Cutin tuah awkah Jehovah Tehte Hna i Baibal Hlathlainak Ca Lamhruainak ti bantuk Baibal cawnpiaknak caah bawmtu a simi cauk hna kha na hman khawh. Mah hriamnam hna nih na relmi Baibal caang hngalhthiam awk le na nunnak ah hman khawh ning lam kha hmuh awkah aan bawmh lai. (Heb. 5:14) Hngalhthiamnak hmangin Baibal na rel  ahcun Baibal kong na hngalhthiamnak cu a ṭhangcho lai.

9. Sadusi mi nih zei a biapimi Baibal biatak kong dah an cohlan duh lo?

⁹ Sadusi mi nih Hebru Cathiang i a hmasa uk nga kha ṭha tein an hngalh ko nain mah ah aa telmi a biapimi biatak kha cu an cohlang lo. Tahchunhnak ah, Sadusi mi nih thawṭhannak kong he aa tlaiin an hal tikah Jesuh nih a leh hna ning kha ruathmanh. Hitin a hal hna: “Moses cauk chungah khan burbuk a kangmi kong kha nan rel bal lo maw? Khaka ah khan Pathian nih Moses cu a thawh i, ‘Kei cu Abraham Pathian, Isak Pathian, Jakob Pathian ka si,’ a ti, tiah aa ṭial ṭung.” (Marka 12:18, 26) Sadusi mi nih mah Baibal caang kha voi tampi an rel ko nain thawhṭhannak kong cawnpiaknak he aa tlaiin a biapimi Baibal biatak cu an cohlang duh lo ti kha Jesuh biahalnak nih a langhter.—Marka 12:27; Luka 20:38. d

10. Baibal kan rel tikah zei cungah dah lungthin kan pek awk a si?

¹⁰ Mah in zeidah kan cawn khawh? Baibal caang pakhat asiloah Baibal kong pakhat kan rel tikah mah in zeidah kan cawn khawh ti kha lungthin pek kan duh. A hrampi cawnpiaknak kong lawng si loin aa thupmi, a thukmi biatak le phunglam hna zong hngalh kan duh.

11. Kuathnih Timote 3:16, 17 ningin Baibal chung i thlaraulei lungvar kha zeitindah na hmuh khawh?

¹¹ Baibal na rel tikah thlaraulei lungvar hna kha zeitindah na hmuh khawh? 2 Timote 3:16, 17 ah a langhtermi kong kha ruathmanh. (Rel.) Mah Baibal caang ah ‘Cathiang hi a dihlak in (1) cawnpiaknak caah, (2) palhnak cawnpiaknak alnak caah, (3) palhmi remhnak caah le (4) ding tein nunnak ding cawnpiaknak caah a ṭhahnemmi a si’ tiah a ti. Na hman theng lomi Baibal cauk hna hmanhin mah ṭhathnemhnak pali kha na hmu kho. A kong pakhat na rel tikah Jehovah kong, aa tinhnak kong asiloah a phunglam kong he aa tlaiin zeidah aan cawnpiak ti kha hngalh awkah i zuam. Palhnak cawnpiaknak caah mah cu zeitindah bawmtu a si ti kha ruat. Baibal caang hna nih a ṭhalomi ziaza asiloah tuahsernak hna kha hngalh in hrial awk aan bawmh ning asiloah Jehovah cung zumhfek tein um peng awkah aan bawmh ning kha naa cinkennak thawngin cutin tuah. Phungchimnak ah pakhatkhat nih an chim khawhmi, a palhmi hmuhnak kha remh khawh awkah zei Baibal caang dah hman khawh a si ti kha hlathlai. Cun Jehovah hmuh ningin hmuh awkah aan cawnpiak khomi zei bantuk Baibal caang dah a um ti kha hlathlai. Mah aan ṭhathnemh khomi a kong pali kha naa cinken peng ahcun na relmi in ṭhathnemhnak tampi aan hmuhter khomi thlaraulei lungvar hna kha na hmuh lai.

12. Jesuh nih Farasi mi kha “nan rel bal lo maw? tiah zeicah a hal hna?

¹² Farasi mi cu Baibal kong he aa tlaiin a hmaan lomi hmuhnak an ngei ti langhter awkah Jesuh nih “nan rel bal lo maw?” ti zongin a hal hna. (Matt. 12:1-7) e Mah lioah Jesuh zultu pawl nih Sabbath an buar tiah Farasi mi nih sual an puh hna. Mah tikah Farasi mi nih Sabbath nawlbia an hngalhthiam lonak le zaangfahnak an ngeih lonak kha langhter awkah Jesuh nih Baibal tahchunhnak pahnih le Hosea Baibal cauk in Baibal caang pakhat kha a cherhchannak thawngin a leh hna. Mah pa hna nih Baibal an relmi kha zeicah an i sersiamter lo? Sual kawlnak le porhlawtnak lungput he an rel caah a si. Mah an lungput nih an relmi kong kha hngalhthiam awkah a harter.—Matt. 23:23; Johan 5:39, 40.

13. Baibal kha zei lungput he dah kan rel awk a si, zeicah?

¹³ A hmaanmi lungput he Baibal kan rel a hau ti kha Jesuh chimmi bia in kan cawn. Farasi mi hna he i lo loin toidornak le cawn duhnak lungput kan ngeih awk a si. Kan lung chungah a tuhmi kha toidor tein kan “cohlan” a hau. (Jeim 1:21) A nun a nemmi kan si ahcun Pathian Bia cu kan lungthin chungah hram aa sih kho lai. Sual kawlnak asiloah porhlawtnak lungput kha kan hrial lawngah Baibal nih a kan cawnpiakmi zaangfahnak, zawnruahnak le dawtnak kha kan i sersiamter khawh lai.

14. Baibal kan i sersiamter maw ti kha zeitindah kan hngalh khawh? (Hmanthlak zoh.)

¹⁴ Midang kan pehtlaih hna ning nih Pathian Bia kan i sersiamter le sersiamter lo kha a langhter khawh. Farasi mi nih Pathian Bia kha  an i sersiamter lo caah ‘a sual lomi kha sual an phawt’ hna. (Matt. 12:7) Mah bantukin kannih zong midang kan hmuh hna ning le kan pehtlaih hna ning nih Pathian Bia kan i sersiamter maw, sersiamter lo ti kha a langhter. Tahchunhnak ah, midang ṭhatnak kha kan chim maw asiloah an chambaunak dah kan langhter colh? Zaangfahnak langhter awk le ngaihthiam awkah timhcia kan si maw asiloah midang sualnak a kawlmi le mi nih kan thin a kan hunter tikah a thin a hung pengmi dah kan si? Kan bialehnak nih kan relmi cu kan ruahnak, kan intuarnak le kan tuahsernak cungah huham kan i iapter maw ti kha a langhter khawh.—1 Tim. 4:12, 15; Heb. 4:12.

15. Cathiang kong he aa tlaiin Jesuh nih zeitindah a hmuh?

¹⁵ Jesuh nih Cathiang kha a sunsak i Salm 40:8 nih a intuarnak kong kha hitin a chimchung: “Ka Pathian, zeitluk in dah na duhnak tuah cu ka duh! Na cawnpiaknak cu ka lung chungah kaa chiah hna.” Cucaah Jesuh cu aa nuam i Jehovah rianṭuannak ah hlawhtlinnak a hmu. Kannih zong Baibal kha kan rel i sunsak awkah kan cawn ahcun kan i nuam lai i hlawhtlinnak kan hmu ve lai.—Salm 1:1-3.

16. Baibal relnak in ṭhathnemhnak tam deuh hmuh awkah zeidah na tuah lai? (“ Jesuh Chimmi Bia Nih Na Relmi Kong Hngalhthiam Awkah Aan Bawmh Khawh” timi rinli kulh ah zoh.)

¹⁶ Jesuh chimmi bia le tuahsernak ningin Baibal relnak ah ṭhancho dingin i zuam hna u sih. Thlacamnak, duhsah tein Baibal relnak, biahalnak le chingchiahnak i ṭialnak nih Baibal kan hngalhthiamnak kha a ṭhanchoter khawh. Baibal hrambunhmi kan cauk pawl bawmhnak thawngin le kan relmi kong ṭha tein kan hlathlainak thawngin kan hngalhthiamnak kha kan hman khawh. Ṭha tein kan hngalh lomi Baibal caang a si hmanhin thlaraulei lungvar pawl kan hlathlainak thawngin Baibal kha ṭha deuh in kan hman khawh lai. Cun kan relmi Baibal cungah a hmaanmi lungput ngeih peng awkah kan i zuamnak thawngin Pathian Bia kha kan i sersiamter khawh. Cutin tuah awkah kan si khawh chungin kan i zuam ahcun Baibal relnak in ṭhathnemhnak tam deuh kan hmu lai i Jehovah he zong kan i naih deuh lai.—Salm 119:17, 18; Jeim 4:8.