1. Kwa ki montre ki Lekritir ti enportan pour Zezi?

 IMAZINEN ki mannyer bann dimoun ti santi ler zot ti tann Zezi pe ansennyen. I ti souvan sit Lekritir Sen parker. Anfet, dapre Labib Zezi ti sit Lekritir zis apre ki i ti batize e i ti osi sit Lekritir zis avan i mor. b (Det. 8:3; Ps. 31:5; Lik 4:4; 23:46) Trwa z-an edmi ti pase ant ler Zezi ti batize ek ler Zezi ti mor. Pandan sa letan, Zezi ti souvan lir Lekritir, refer avek Lekritir e eksplik Lekritir.​—Mat. 5:17, 18, 21, 22, 27, 28; Lik 4:16-20.

2. Kwa ki ti ed Zezi pour konn byen Lekritir ler i ti pe grandi? (Vwar portre lo kouvertir.)

² Dan bann lannen avan Zezi ti konmans son minister, i ti souvan lir e ekout Parol Bondye kot pe ganny lir. San dout, dan bann konversasyon kot lakour, Zezi ti tann Mari ek Zozef pe refer avek Lekritir. c (Det. 6:6, 7) Nou kapab asire ki Zezi ti al kot sinagog tou le Saba avek son fanmir. (Lik 4:16) Ler Zezi ti laba, i bezwen ki i ti ekout atantivman anmezir ki Lekritir ti ganny lir. Avek letan, Zezi ti aprann pour lir sa bann Lekritir sakre lo li menm. Sa i fer ki Zezi ti konn byen Lekritir, i ti kontan Lekritir e i ti les Lekritir annan en lefe lo sa ki i fer. Par egzanp, rapel sa ki ti arive dan tanp ler Zezi ti annan zis 12 an. Bann ansenyan ki ti konn tre byen Lalwa Moiz ti “vreman etonnen  par larepons [Zezi] ek son lentelizans.”​—Lik 2:46, 47, 52.

3. Ki nou pou vwar dan sa lartik?

³ Nou osi nou kapab konn e kontan Parol Bondye ler nou lir Labib regilyerman. Me ki mannyer nou kapab ganny plis byenfe atraver sa ki nou lir? Nou kapab aprann avek sa ki Zezi ti dir avek bann ki konn Lalwa Moiz, setadir bann profeser lalwa, bann Farizyen ek bann Sadiseen. Sa bann sef relizye ti lir Lekritir souvan me zot pa ti ganny byenfe atraver sa ki zot ti lir. Zezi ti koz lo trwa keksoz ki sa bann zonm ti devret fer pour zot kapab ganny bann byenfe atraver Lekritir. Sa ki Zezi ti dir pou ed nou (1) konpran pli byen sa ki nou lir, (2) pour trouv bann trezor spirityel e (3) pour les Parol Bondye annan en pli gran lefe lo nou.

4. Ki nou aprann dan Lik 10:25-29 konsernan lir Parol Bondye?

⁴ Ler nou lir Parol Bondye, nou anvi konpran sa ki nou lir. Si non, nou pa pou ganny okenn byenfe ler nou lir Labib. Par egzanp, annou vwar sa konversasyon ki Zezi ti fer avek “en zonm ki ti konn byen Lalwa.” (Lir Lik 10:25-29.) Ler sa zonm ti demande ki i bezwen fer pour ganny lavi eternel, Zezi ti ed li pour trouv larepons dan Parol Bondye. Zezi ti demann li: “Kwa ki’n ganny ekrir dan Lalwa? Ki ou konpran?” Sa zonm ti kapab donn sa bon larepons. I ti refer avek bann verse konsernan kontan Bondye e kontan nou prosen. (Lev. 19:18; Det. 6:5) Me remark sa ki sa zonm ti dir apre. I ti demande: “Lekel vreman ki mon prosen?” Sa zonm ti montre ki i pa ti vreman konpran sa ki i ti’n lir. Sa i fer ki i pa ti kapab aplik sa ki sa bann verse i dir.

5. Ler ou fer lapriyer e ou pran ou letan ler ou lir, ki mannyer sa i kapab ed ou pour konpran pli byen sa ki ou pe lir?

⁵ Si nou devlop sa bon labitid pour lir Labib, nou pou kapab konpran Parol Bondye. Annou vwar serten sizesyon ki kapab ed nou. Fer lapriyer avan ou konmans lir Labib. Nou bezwen led Zeova pour nou konpran son Parol alor nou kapab demann li son lespri sen pour ed nou konsantre lo sa ki nou pe lir. Apre sa, pran ou letan ler ou pe lir. Sa pou ed ou konpran sa ki ou pe lir. Petet ou pou ganny bann byenfe si ou lir for oubyen ou swiv anmezir ou pe ekout lanrezistreman odyo Labib. Ler ou ekout lanrezistreman odyo anmezir ki ou pe lir, sa i kapab ed ou pour konpran, rapel e aprann plis avek sa ki ou pe lir dan Parol Bondye. (Zoz. 1:8) Ler ou fini lir, fer lapriyer ankor pour remersye Zeova pour son Parol ki i’n donn ou konman kado e pour demann li pour ed ou pour aplik sa ki ou’n lir.

6. Akoz ler ou demann bann kestyon e pran bann pti not, sa i kapab ed ou anmezir ki ou pe lir Labib? (Vwar portre.)

⁶ Annou vwar de lezot sizesyon ki pou ed ou konpran Labib pli byen. Demann ou lekor kestyon konsernan sa ki ou pe lir. Ler ou lir en resi dan Labib, demann ou lekor sa bann kestyon swivan: ‘Lekel sa bann dimoun ki dan sa resi? Lekel ki pe koze? Avek lekel ki i pe koze e akoz? Kote e kan ki sa levennman pe arive?’ Bann kestyon koumsa pou ed ou medit lo sa resi e vwar bann pwen prensipal. Osi,  pran bann pti not anmezir ki ou lir. Ler ou ekri sa ki ou’n lir, sa pou ed ou gard antet sa ki ou’n lir e ou pou konpran pli byen. Ler ou ekri, sa pou osi ed ou rapel sa ki ou’n lir. Petet ou kapab ekri bann kestyon, ekri bann keksoz ki ou’n trouve dan ou resers, fer en rezimen bann pwen prensipal, ekri en not lo ki mannyer ou kapab servi sa lenformasyon ki ou’n lir ouswa ekri ki mannyer ou santi konsernan sa ki ou’n lir. Ler ou ekri not, sa i kapab ed ou pour vwar Parol Bondye konman en mesaz ki i’n anvoy pour ou.

7. Ki kalite ki nou bezwen anmezir ki nou lir Labib e akoz? (Matye 24:15)

⁷ Zezi ti dir ki pou nou konpran sa ki nou lir dan Parol Bondye, nou bezwen annan disernman. (Lir Matye 24:15.) Kisisa disernman? Disernman i sa abilite pour vwar ki mannyer en nide i relye avek en lot, ki mannyer sa menm nide i diferan avek en lot nide e i sa abilite pour vwar bann nide ki pa sitan evidan. Zezi ti osi dir ki nou bezwen annan disernman pour idantifye bann levennman ki pou akonpli profesi Labib. Nou osi bezwen annan disernman pour nou kapab ganny bann byenfe avek tou sa ki nou lir dan Labib.

8. Ki mannyer nou kapab lir avek disernman?

⁸ Zeova i donn son bann serviter disernman. Alor demann li pour ed ou pour devlop sa kalite. (Prov. 2:6) Ki mannyer ou kapab azir an armoni avek ou lapriyer? Reflesir lo sa ki ou lir e vwar ki mannyer i relye avek lezot keksoz ki ou konnen. Pour ed ou fer sa, servi nou bann piblikasyon ki ed nou pour etidye Labib. Par egzanp, ou kapab servi Liv resers pour Temwen Zeova. Bann piblikasyon koumsa pou ed ou konpran ki en verse Labib  pe esey dir e pour vwar ki mannyer ou kapab aplik li. (Ebr. 5:14) Ler ou lir avek disernman, ou pou konpran Labib pli byen.

9. Ki laverite enportan dan Parol Bondye ki bann Sadiseen pa ti aksepte?

⁹ Bann Sadiseen ti konn byen sa senk premye liv dan Lekritir Ebre. Me zot pa ti aksepte bann laverite enportan ki i annan dan sa bann liv. Par egzanp, remark sa ki Zezi ti dir ler bann Sadiseen ti demann li konsernan rezireksyon. I ti demann zot: “Zot pa’n lir dan liv Moiz, dan sa resi lo sa brousay kot Bondye ti dir li: ‘Mwan mon Bondye Abraam, mon Bondye Izaak ek Bondye Zakob’?” (Mark 12:18, 26) I tre probab ki bann Sadiseen ti’n lir sa resi plizyer fwa me sa kestyon ki Zezi ti demann zot ti montre ki zot pa ti’n aksepte en laverite enportan, setadir sa lansennyman konsernan rezireksyon.​—Mark 12:27; Lik 20:38. d

10. Ki nou devret port latansyon lo la ler nou pe lir?

¹⁰ Ki nou kapab aprann? Ler nou lir Labib, nou anvi port latansyon lo tou sa ki en verse oubyen en resi i kapab ansenny nou. Nou pa anvi vwar zis bann lansennyman ki fasil pour konpran me nou anvi osi vwar lezot laverite ek prensip.

11. Ki mannyer ou kapab servi 2 Timote 3:16, 17 pour trouv bann trezor spirityel ki dan Labib?

¹¹ Ki mannyer ou kapab trouv bann trezor spirityel ler ou pe lir Labib? Annou vwar sa ki 2 Timote 3:16, 17 i dir. (Lir.) Sa verse i dir: “Tou Lekritir i . . . itil” pour (1) ansennyen, (2) reprimande, (3) remet keksoz drwat e (4) pour disiplinen. Ou kapab ganny sa kat byenfe menm ler ou pe lir bann liv Labib ki ou pa lir souvan. Ler ou pe lir Labib, port latansyon pour ou vwar ki sa resi i kapab ansenny ou konsernan Zeova, konsernan son plan oubyen konsernan son bann prensip ki dan Labib. Vwar ki mannyer sa resi i itil pour reprimande. Pour fer sa, ou kapab vwar ki mannyer sa bann verse i ed ou idantifye e rezet bann move dezir ek latitid e osi pour reste fidel avek Zeova. Reflesir lo ki mannyer ou kapab servi sa resi pour remet keksoz drwat oubyen pour koriz en move pwennvi, petet pwennvi en dimoun dan teritwar. Rode ki mannyer sa verse i kapab disiplin ou setadir ed ou pour annan menm fason panse avek Zeova. Ler ou gard antet sa kat fason ki Labib i ed ou, sa pou ed ou trouv bann trezor spirityel ki pou ed ou ganny plis byenfe atraver ou lektir Labib.

12. Akoz Zezi ti demann bann Farizyen: “Eski zot pa’n lir?”

¹² Zezi ti osi demann bann Farizyen sa kestyon: “Eski zot pa’n lir?” I ti fer sa pour montre ki bann Farizyen ti annan en move pwennvi lo Lekritir. (Mat. 12:1-7) e Zis avan sa, bann Farizyen ti’n dir ki bann disip Zezi ti’n kas lalwa Saba. Zezi ti reponn par refer avek de legzanp dan Lekritir e i ti sit en verse dan Osea pour montre ki bann Farizyen pa ti konpran akoz ki lalwa Saba ti’n ganny met an plas e zot pa ti’n demontre konpasyon. Akoz sa bann zonm pa ti les Parol Bondye enfliyans zot? Parski zot ti orgeye e zot ti kontan konplent. Zot latitid ti anpes zot konpran sa ki zot ti lir.​—Mat. 23:23; Zan 5:39, 40.

13. Ki latitid nou devret annan ler nou pe lir Labib e akoz?

¹³ Sa ki Zezi ti dir i ansenny nou ki nou bezwen lir Labib avek sa bon latitid. Nou pa devret parey bann Farizyen. O kontrer, nou bezwen annan limilite e pare pour aprann. ‘Avek limilite, nou aksepte ki parol Bondye i ganny plante dan nou.’ (Zak 1:21) Si nou annan limilite, nou pou les Parol Bondye sanz sa ki nou ete anndan. I selman ler nou pa orgeye e pa kontan konplent ki nou pou les sa ki Labib i ansennyen konsernan pitye, konpasyon ek lanmour enfliyans nou.

14. Ki mannyer nou kapab konnen si nou pe les Labib enfliyans nou? (Vwar portre.)

¹⁴ Lafason ki nou tret lezot i montre si nou pe les Parol Bondye enfliyans nou. Bann Farizyen pa ti les Parol Bondye enfliyans zot e sa ti fer ki zot ti “kondann  bann ki pa koupab.” (Mat. 12:7) Pareyman lafason ki nou vwar e tret lezot i montre si nou’n les Parol Bondye enfliyans nou. Par egzanp, eski nou annan labitid pour koz lo bann bon keksoz ki nou vwar dan lezot ouswa eski nou tant pour koz plis lo zot bann defo? Eski nou pran pitye e pare pour pardonnen ouswa eski nou kritik lezot e gard rankin anver zot? Nou larepons pour sa bann kestyon i kapab montre si nou pe les sa ki nou lir dan Parol Bondye annan en lenfliyans lo sa ki nou mazinen, lo nou santiman e lo nou aksyon.​—1 Tim. 4:12, 15; Ebr. 4:12.

15. Ki mannyer Zezi ti santi konsernan Lekritir?

¹⁵ Zezi ti kontan Lekritir. Psonm 40:8 ti predir ki mannyer Zezi ti pou santi anver Parol Bondye. Sa verse i dir: “O mon Bondye, mon pran plezir pour fer ou lavolonte, ou lalwa i o profon dan mwan.” Vi ki Zezi ti kontan Lekritir, sa ti fer li ere e i ti reste fidel avek Zeova. Si nou lir Parol Bondye e nou fer zefor pour kontan sa ki nou lir, nou osi nou pou kapab zwaye e reste fidel avek Zeova.​—Ps. 1:1-3.

16. Ki ou pou fer pour ou kapab ganny plis byenfe ler ou lir Parol Bondye? (Vwar sa bwat “ Sa ki Zezi ti dir i kapab ed ou konpran sa ki ou lir dan Labib.”)

¹⁶ Parey nou’n aprann avek legzanp Zezi ek sa ki i ti dir, annou amelyor lafason ki nou lir Labib. Pour nou kapab konpran sa ki nou lir dan Labib, nou bezwen priye, pran nou letan pour nou lir, demann kestyon e pran bann pti not. Ler nou pe reflesir lo sa ki nou lir dan Labib, servi disernman. Pour ed nou fer sa, nou kapab servi nou bann piblikasyon ki baze lo Labib. Nou kapab aprann pour servi Labib pli byen par rod bann trezor spirityel dan bann resi ki nou lir. Nou kapab fer sa menm ler nou lir bann liv Labib ki nou pa lir souvan. Nou kapab les Parol Bondye annan en lenfliyans lo nou par annan sa bon latitid ler nou lir. Ler nou fer nou mye pour fer sa bann keksoz, nou pou ganny plis byenfe atraver nou lektir Labib e nou pou vin pli pros avek Zeova.​—Ps. 119:17, 18; Zak 4:8.