1. Was tsaycht tas ti Xrifte wichtich fer Yeesus waare?

 XTEL tich mool foer wiis waar Yeesus heere wii eyer in kelërnt hot. Tee hot eftas wërter fon te Xrifte ausm khop penutst! In woerheet, tëm noo was kexrip is, sayn eyerste wërter noom taaf un etliche fon sayn letste wërter foer sayn toot, waare fon te Xrifte kewees. b (Teut. 8:3; Psal. 31:5; Luk. 4:4; 23:46) Un torich ti 3 un halpe yoore tswixich sayn taaf un toot, hot Yeesus ofts ti wërter fon te Xrifte foer te anere kelees, penutst un aus keleet. (Mat. 5:17, 18, 21, 22, 27, 28; Luk. 4:16-20)

2. Wii Yeesus kroos am wakse waar, was hot tëm keholef ti Xrifte kuut khëne lërne? (Kuk tas pilt am aanfang fom piichelche.)

² In te yoore eep Yeesus aan kefang hot se preetiche, hot eyer Kot sayn Wort noo un noo keheert un kelees. Kewis, wii eyer tehëm waar, hot eyer Maria un Yoosef keheert wërter fon te Xrifte penutse wii se taach noo taach fertseelt hon. c (Teut. 6:6, 7) Meyer khene uns aach sicher sin tas Yeesus is yeete samstaach mit sayn familye tsum sinakook kang. (Luk. 4:16) Wii eyer tat waar, tee wërt wool mit acht keheert hon wii ti Xrifte kelees waare. Mit te tsayt, hot Yeesus kelërnt ti Xrifte aleen leese. Tes weeche, hot Yeesus ti Xrifte net ploos kekhënt, awer se aach keliipt un kelos sayn aktsyoone petrefe. Tsum payxpiil, tenk tich traan was im thempel pasiirt is wii Yeesus ploos 12  yoore alt waar. Ti leerer, woo tas mosayxe Kesets kuut kekhënt hon, “hon sich ferwunert mit [Yeesus] sayn ferxtëntnis un sayn antworte”. (Luk. 2:46, 47, 52)

3. Was tuun mer in tiise artikel siin?

 ³ Meyer khene aach ti Piipel khëne un liipe wën mer se imer leese. Awer wii khene mer ti kreest nutse fon unser leesung kriin? Meyer khene fiil lërne mit Yeesus sayn wërter fer tii woo tas Kesets kuut kekhënt hon — too tepay ti xrayper, ti fariseer un ti satuseer. Tiise relichyeese fiirer hon Kot sayn Wort ofts kelees, awer tii hon net nutse too tefun kriit. Yeesus hot kexproch iwer 3 tinge woo tiise mëner solte kemacht hon fer mee nutse fon te Xrifte kriin. Was Yeesus se kesaat hot, tuut uns helfe unser apiliteet ferpesere fer (1) ferxteen was mer leese, (2) weyertliche lisyoone fine un (3) lose tas Kot sayn Wort uns influentsiirt.

4. Was tuut Lukas 10:25-29 uns in lërne iwer Kot sayn Wort leese?

⁴ Meyer wole ferxteen was mer in Kot sayn Wort leese. Wën net, tuut unser leesung khee nutse fer uns pringe. Mërk mool, tsum payxpiil, Yeesus sayn kexpreech mit “eene man woo fiil khëntnis iwer tas Kesets hat”. (Lees Lukas 10:25-29.) d Wii te man Yeesus kefroot hot was eyer mache must fer tas eewiche leepe kriin, hot Yeesus tëm keholef ti antwort in Kot sayn Wort fine. Yeesus hot tëm kefroot: “Was xteet im Kesets? Was leest tuu too trin?” Te man hot ti richtich antwort kep. Tee hot wërter fon te Xrifte penutst woo tsayche tas mer sole Kot un te neekste liipe. (Lew. 19:18; Teut. 6:5) Awer mërk mool was te man tan kesaat hot: “Weer is wërklich mayn neekste?” Te man hot ketsaycht tas eyer net wërklich ferxtan hot was eyer kelees hat. Tes weeche wust eyer net wii tas in sayn leepe richtich aan wëne.

5. Wii khene tas kepeet un lamsam leese tich helfe peser ferxteen was Kot sayn Wort saat?

⁵ Meyer khene Kot sayn Wort peser ferxteen wën mer kuute leesung kewoonheete ëntwikele. Too hiir sin etliche itee woo tich helfe khene. Peet eeps tuu aan fangst se leese. Meyer mise Kot sayn hilef hon fer tëm sayn Wort ferxteen. Tes weeche ferlang tëm sayn hayliche kayst fer tich helfe sich konsentriire. Tan tuu lamsam leese. Tas tuut tich helfe ferxteen was tuu leest. Fiilaycht finst tuu es kuut in hart xtim leese orer een autyo fon te Piipel horiche un mitsamer leese. Wëns tuu te autyo heerst un ti wërter mit tayn aue leest, tuust tuu peser ferxteen was Kot sayn Wort saat, tich peser too tefun erinere un mee lërne fon was tuu leest. (Yos. 1:8) Wëns tuu fërtich mit te leesung pist, tuu noch mool fer Yeehoowa peete fer se tanke weeche tëm sayn kexenk, ti Piipel; un aach fer tëm sayn hilef ferlange fer aan wëne was tuu kelees host.

6. Wëns tuu leest, frooche fer tich selepst mache un khortse noote uf xraype, khan tich helfe. Warom? (Kuk aach tas pilt.)

⁶ Kuk mool 2 anere itee fer tich helfe ti Piipel peser ferxteen. Mach tich frooche iwer was tuu am leese pist. Wëns tuu etwas in te Piipel leest, suuch ti antwort fer tiise frooche: ‘Weer sin ti haupste layt im kexicht? Weer is am xpreche? Mit weem is eyer am xpreche un warom? Woo un  wën is tas kexicht am pasiire?’ Soo sorte frooche tuun tich helfe ti haupste phunkte fon was tuu leest ferxteen un too triwer tenke. Tuu khanst aach khortse noote uf xraype soo lang wiis tuu leest. Wëns tuu xraypst iwer was tuu am leese pist, es tuut tich helfe mee too triwer noo tenke un aach tas peser ferxteen. Es helft tich aach peser erinere was tuu kelees host. Was khanst tuu uf xraype? Frooche, tinge woos tuu in tayn unersuuchung kefun host, ti haupste phunkte in khortse wërter, wiis tuu penutse khanst was tuu kelees host orer was tuu too triwer xpiirst. Soo sorte noote uf xraype, khan tich helfe Kot sayn Wort siin wii tëm sayn pexeet fer tich.

7. Was fer kwaliteet mise mer hon wën mer leese un warom? (Matheus 24:15)

⁷ Yeesus hot kexproch iwer een wichtich kwaliteet woo mer mise hon fer se ferxteen was mer in Kot sayn Wort leese un ti kreeste nutse too tefun kriin: ti ferninftichkheet. (Lees Matheus 24:15.) e Yemant woo ferninftich is, ferxteet wii een itee sich mit een aner ferpiine khan un wii tas anerste fon een aner itee is. Tee khan aach ferxteen was hinich ti itee is, es wil saan, was net soo taytlich is. Yeesus hot aach ketsaycht tas mer mise ferninftichkheet hon fer ewënte mërke woo piiplixe profetsiie erfiile.

8. Wii khanst tuu mit ferninftichkheet leese?

⁸ Yeehoowa kept ferninftichkheet fer sayn tiiner. Soo peet tsu tëm un ferlang tëm sayn hilef fer tiise kwaliteet ëntwikele. (Xpr. 2:6) Wii khanst tuu tich aan xtele tëm noo tayn kepeet? Tuu mit acht noo kuke was tuu leest un fersuuch se mërke wii tas sich ferpiine tuut mit was tuu xon weest. Penuts unser puplikatsyoone fer tich helfe tas mache — wii, tsum payxpiil, te Guia de Pesquisa para  Testemunhas de Jeová. Soo sorte puplikatsyoone tuun tich helfe ferxteen was tuu in te Piipel leest un aate siin wiis tuu tas aan wëne khanst. (Hep. 5:14) Wëns tuu mit ferninftichkheet leest, tuust tuu ti Piipel noch peser ferxteen.

9. Was fer wichtich woerheet fon Kot sayn Wort hon ti satuseer net aan kenom?

⁹ Ti satuseer hon ti eyerste 5 piicher fon te Hepreeyxe Xrifte kuut kekhënt; awer tii hon etliche wichtiche woerheete, woo in tiise inspiriirte piicher waare, net aan kenom. Tsum payxpiil: kuk mool was Yeesus keantwort hot wii ti satuseer tëm iwer tas ufxtaye fom toot kefroot hon. Tee hot tëne kesaat: “Hot teyer net im puuch fon Mooses kelees, im kexicht iwer te taarne phutx, tas Kot tëm kesaat hot: ‘Ich sin te Kot fon Apraham, te Kot fon Isak un te Kot fon Yaakop’?” (Mar. 12:18, 26) Sicher hate ti satuseer tiise xtik fon te Xrifte fiil mool kelees. Awer Yeesus sayn frooch hot ketsaycht tas se net aan kenom hon een wichtich woerheet fon te Piipel: ti inlërnung iwer tas ufxtaye fon te toote. (Mar. 12:27; Luk. 20:38) f

10. Wën mer leese, aan was sole mer acht kepe?

¹⁰ Was fer lisyoon khene mer too temit lërne? Wën mer leese, mise mer acht kepe aan ales was een wersikel orer een kexicht fon te Piipel uns in lërne khan. Meyer wole net ploos laychte inlërnunge ferxteen, awer aach anere weyertliche woerheete un funtamente. Tii sin soo wii ferxtekeltne xetse, wayl tii sin net soo laycht fer se fine.

11. Wii khanst tuu 2^te Timoteus 3:16, 17 penutse fer weyertliche woerheete in te Piipel fine?

¹¹ Wii khanst tuu weyertliche woerheete fine wëns tuu ti Piipel leest? Kuk mool was in 2^te Timoteus 3:16, 17 g xteet. (Lees.) Ti wersikele saan tas “ti kans Xrift (…) is kuut” (1) fer in lërne, (2) fer aan reete, (3) fer ti tinge richtich xtele un (4) fer tisipliniire. Tuu khanst tiise nutse kriin soo kaar fon piiplixe piicher woos tuu net soo ofts leese tuust. Kuk te xtik woos tuu kelees host noo fer se siin was es tich in lërnt iwer Yeehoowa, Sayn tsiil orer piiplixe funtamente. Tenk aan wii tas nutslich is fer aan reete. Fer tas hin kriin, froo tich: ‘Wii tuun tiise wersikele mich helfe ti xlechte kewoonheete un aanxtelunge mërke un ap xtose un, soo, troy tsu Yeehoowa plaype?’ Uner suuch aach wii tiise xtik fon te Piipel khan tich helfe een ferkheert mënung richtich xtele, orer korikiire. Fiilaycht, khan tas etwas sin woo een pewooner in te preetich aarwayt kesaat hot. Un suuch kwalkee tisipliin woo ti wersikele tich kepe khene woo tich helfe ti sache siin soo wii Yeehoowa se siit. Wëns tuu tiise 4  phunkte in tayn khop halst, tuust tuu weyertliche woerheete fine woo tich helfe noch mee nutse fon tayn Piipel leesung kriin.

12. Warom hot Yeesus fer ti fariseer kefroot ep se ti Xrifte net kelees hate?

¹² Yeesus hot aach fer ti fariseer kefroot: “Hot teyer net kelees?” Soo hot eyer ketsaycht tas se een ferkheert mënung hate iwer etwas woo se in te Xrifte kelees hon. (Mat. 12:1-7) h In tiise situatsyoon, hon ti fariseer kesaat tas Yeesus sayn tisipele tas kesets fom Samstaach iwertreet hate. Fer tëne een antwort kepe, hot Yeesus kexproch iwer 2 payxpiile fon te Piipel un aach een wersikel fon Oseyas. Tas hot ketsaycht tas ti fariseer net ferxtan hon warom tas kesets fom Samstaach kemacht kep is un tas se net parmhërtslich waare. Warom hot ti leesung fon Kot sayn Wort tiise mëner net influentsiirt? Wayl, wii se ti Xrifte kelees hon, tëne sayn opjetiiw waar ti anere kritikiire un tëne sayn feeler foer pringe. Weeche sayn aanxtelung, khonte se net ferxteen was se kelees hon. (Mat. 23:23; Yoo. 5:39, 40)

13. Was fer aanxtelung sole mer hon wën mer ti Piipel leese, un warom?

¹³ Mit Yeesus sayn wërter, lërne mer tas mer mise ti Piipel mit te richtich aanxtelung leese. Anerste wii ti fariseer, mise mer eerlich un wilich fer se lërne sin. Meyer mise aach ‘mit tsaamheet aan nëme tas tas wort, woo uns rete khan, wortsle in uns tsiit’. (Tya. 1:21) Wën mer tsaam sin, lose mer tas Kot sayn Wort ënert weer mer sin. Ti lisyoone in te Piipel iwer parmhërtslichkheet, mitlayt un liip tuun uns ploos influentsiire wën mer se mit te richtich aanxtelung leese — net mit hoochmuut orer fer ti anere kritikiire.

14. Wii khene mer wise ep mer lose ti Piipel uns influentsiire? (Kuk aach ti pilter.)

 ¹⁴ Was noch tuut tsayche ep mer lose Kot sayn Wort uns influentsiire orer net? Ti aat wii mer ti anere pehantele. Ti fariseer hon net kelos Kot sayn Wort tëne sayn aanxtelung influentsiire. Tes weeche hon se “ti unxultiche konteniirt”. (Mat. 12:7) Kraat soo, was mer iwer ti anere tenke un wii mer se pehantele, tuut tsayche ep mer kelos hon Kot sayn Wort uns influentsiire orer net. Tsum payxpiil: tuun mer eftas xpreche iwer ti anere sayn kuute kwaliteete, orer sin mer fiks fer iwer sayn feeler xpreche? Sin mer parmhërtslich un fërtich fer se fertsaye, orer tuun mer ti anere kritikiire un ofts piter xpiirunge pehale? Unser antworte tuun tsayche ep mer lose unser leesung unser ketanke, xpiirunge un aktsyoone petrefe. (1 Tim. 4:12, 15; Hep. 4:12)

15. Was hot Yeesus iwer ti Xrifte kexpiirt?

¹⁵ Ti wërter im Psalm 40:8 hon foer raus kesaat wii Yeesus sich iwer Kot sayn Wort xpiire teet: “Tayn wile se mache, oo mayn Kot, is mayn frooheet, un tayn kesets is tiif in mich.” Yeesus hot ti Xrifte keliipt. Tes weeche waar eyer froo un hot wayter Yeehoowa ketiint. Meyer khene aach froo sin wën mer Kot sayn Wort leese un lërne tëne liipe. (Psal. 1:1-3)

16. Was tuust tuu mache fer noch mee nutse fon tayn Piipel leesung kriin? (Kuk te khaste “ Yeesus sayn wërter khene tich helfe ferxteen was tuu leest”.)

¹⁶ Tëm noo Yeesus sayn wërter un payxpiil, wole mer unser apiliteet fer ti Piipel leese ferpesere. Meyer khene ti Piipel peser ferxteen wën mer peete, lamsam leese, frooche mache un khortse noote uf xraype. Meyer khene ferninftichkheet tsayche wën mer noo kuke was mer leese mit te hilef fon unser puplikatsyoone. Meyer khene lërne ti Piipel peser penutse — soo kaar xtike woo mer net soo kuut khëne — wën mer weyertliche woerheete in tëne suuche. Un meyer khene lose Kot sayn Wort uns influentsiire wën mer tëne mit te richtich aanxtelung leese. Wën mer uns too traan aan xtrenge, tuun mer noch mee nutse fon unser Piipel leesung kriin un uns noch tichter pay Yeehoowa xafe. (Psal. 119:17, 18; Tya. 4:8)