1. Nama utai ke nunjukka Bup Kudus nya penting ba Jesus?

 GAMBARKA asai ati kitai lebuh ninga Jesus ke benung ngajar. Iya suah ngena ayat Bup Kudus, lalu semua ayat nya udah dihafal iya magang! Nambahka nya, ba sekeda utai ti keterubah ke disebut iya pengudah dibaptisa enggau sekeda ari utai ti penudi ke dipadah iya sebedau iya mati, Jesus nyebut utai ti sama enggau ayat Bup Kudus. b (U-dat. 8:3; Mas. 31:5; Luk. 4:4; 23:46) Lalu, ba timpuh pengelama tiga taun setengah entara maya Jesus dibaptisa enggau maya iya nadai, Jesus suah macha ayat Bup Kudus ba mua orang mayuh, nyebut ayat ari Bup Kudus, sereta nerangka ayat Bup Kudus ke disebut iya.—Mat. 5:17, 18, 21, 22, 27, 28; Luk. 4:16-20.

2. Seraya Jesus benung mansang besai, nama utai ke nulung iya nemu pasal Bup Kudus enggau amat manah? (Peda gambar ba mua majalah.)

² Betaun-taun sebedau Jesus berengkah nginjil, iya suah macha sereta ningaka Jaku Petara. Ba rumah, iya tentu bisi ninga Josep enggau Maria bejaku ngena ayat Bup Kudus ba randau sida besehari-sehari. c (U-dat. 6:6, 7) Lalu kitai ulih yakin, Jesus tentu bisi ngagai balai gempuru enggau sida sebilik tiap Hari Sabat. (Luk. 4:16) Ba dia, Jesus tentu ninga enggau manah lebuh ayat Bup Kudus dibacha. Nyau kelama, Jesus belajar macha Ayat ti Kudus nya kediri empu. Ketegal nya, Jesus ukai semina landik pasal ayat Bup Kudus tang iya mega rindu sereta nejuka ayat Bup Kudus nya ngiring utai ke digaga iya. Ambika chunto, kingatka baru utai ke nyadi ba Rumah Sembiang lebuh  Jesus beumur 12 taun. Orang ke landik ba Adat Moses “alit ati ninga saut [Jesus], lalu iya . . . ulih meretika mayuh utai.”—Luk. 2:46, 47, 52.

3. Nama deka dikerandauka kitai dalam artikel tu?

³ Kitai mega deka nemu sereta rinduka Jaku Petara lebuh kitai suah macha Bup Kudus. Tang baka ni kitai tau bulih penguntung ti pemadu mayuh ari utai ti dibacha? Kitai ulih belajar ari utai ti dipadah Jesus ngagai sida ke nemu pasal Adat, nyengkaum sida ke penulis adat, orang Parisi, sereta orang Saduki. Bala tuai pengarap tu suah macha Bup Kudus tang sida nadai bulih penguntung ari utai ke dibacha sida. Jesus madahka tiga iti utai ke patut dikereja sida ngambika tau bulih mayuh agi penguntung ari Bup Kudus. Utai ke dipadah Jesus ngagai sida deka nulung kitai ngemansangka agi pengelandik kena (1) meretika utai ke dibacha kitai, (2) ngiga penemu ti berega, sereta (3) nejuka Jaku Petara ngubah kitai.

4. Nama utai ti ulih dipelajarka kitai ari Luke 10:25-29 pasal macha Jaku Petara?

⁴ Kitai deka meretika utai ti dibacha kitai dalam Jaku Petara. Enti enda, utai ti dibacha kitai nadai meri penguntung ke kitai. Ambika chunto, peratika randau Jesus enggau “siku lelaki ke landik pasal Adat.” (Bacha Luke 10:25-29.) Lebuh lelaki nya nanya pasal utai ti patut dikereja iya ngambika bulih pengidup ti meruan belama iya, Jesus nulung iya tetemuka saut ba Jaku Petara. Jesus nanya iya: “Nama utai ke ditulis ba Adat? Nama utai ke dimeretika nuan ari nya?” Lelaki nya ulih meri saut ti betul lebuh iya nyebut ayat Bup Kudus pasal rinduka Petara sereta orang bukai. (Lew. 19:18; U-dat. 6:5) Tang peratika utai ti disebut lelaki nya pengudah nya: “Sapa kebendar iya orang ke patut dikerinduka aku?” Utai ke dipadah lelaki tu nunjukka iya enda entu faham pasal reti ti bendar utai ti dibacha iya. Ketegal nya, iya enda nemu baka ni ngena ayat Bup Kudus enggau chara ti betul dalam pengidup iya.

5. Baka ni sampi sereta macha enggau lubah deka nulung kitai mereti enggau manah agi utai ti dibacha kitai?

⁵ Kitai ulih meretika Jaku Petara enggau manah agi enti kitai ngemansangka tebiat macha ti manah. Tu sekeda chara ke ulih nulung nuan. Besampi sebedau nuan berengkah macha. Kitai begunaka tulung ari Jehovah kena meretika utai dalam Bup Kudus. Nyadi kitai ulih minta kuasa kudus ari Jehovah kena nulung kitai betumpu ba utai ti benung dibacha. Udah nya, macha enggau lubah. Nya deka nulung nuan meretika agi utai ti dibacha nya. Nuan engka ulih nguji macha enggau nyawa ti inggar tauka nitih ba Bup Kudus nuan seraya nuan ninga audio Bup Kudus ke dirikut benung dimainka. Enti nuan ninga audio ke dirikut lalu meda utai ke benung dibacha, nya ulih nulung nuan mereti, ingat, sereta belajar mayuh agi ari utai ti dibacha nuan ba Bup Kudus. (Jos. 1:8) Lebuh nuan udah abis macha, besampi sekali agi kena meri terima kasih ngagai Jehovah laban udah meri nuan pemeri ti manah tu, lalu minta tulung ari Jehovah kena nulung nuan nitihka utai ti udah dibacha nuan.

6. Nama kebuah ngena tanya sereta ngaga nota lebuh macha Bup Kudus deka nulung nuan? (Peda mega gambar.)

⁶ Bisi dua agi utai ke ulih nulung nuan meretika agi utai ti dibacha ari Bup Kudus. Tanya diri empu pasal utai ti benung dibacha nuan. Lebuh nuan macha sesiti utai dalam Bup Kudus, giga saut ngagai tanya tu: ‘Sapa watak utama dalam cherita tu? Sapa benung bejaku? Iya bejaku ngagai sapa, lalu nama kebuah?  Dini sereta kemaya utai tu nyadi?’ Tanya ke baka tu deka nulung nuan berunding sereta nitihka batang poin utai ti benung dibacha nuan. Pia mega, gaga nota ti pandak seraya nuan macha. Lebuh nuan nulis utai ti dibacha, nya ngasuh nuan berunding mayuh agi pasal utai ti benung dibacha nuan. Tu deka nulung nuan mereti agi. Lebuh nuan nulis, nya deka nulung nuan ingat mega. Nuan ulih nulis tanya, utai ke ditemu ari pansik ke digaga, lansa batang poin, sereta chara nuan deka ngena utai ti dibacha nya, tauka nuan ulih nulis asai ati nuan. Lebuh nuan ngaga nota ke baka tu, nya deka nulung nuan ngambarka Jaku Petara nya baka pesan ke dituju ngagai nuan.

7. Nama utai ke diguna kitai lebuh macha, lalu nama kebuah? (Matthew 24:15)

⁷ Jesus madahka siti utai ke diguna kitai enti kitai deka meretika utai ti dibacha dalam Jaku Petara iya nya, berunding enggau manah. (Bacha Matthew 24:15.) Baka ni kitai ulih ngereja nya? Kitai ulih berunding enggau manah ngambika ulih beratika baka ni siti poin bekaul tauka bebida enggau poin bukai, sereta meretika sekeda utai ti enda dipadah enggau nyemetak. Jesus mega madah kitai patut berunding enggau manah ngambika ulih beratika utai ti nyadi ke ngamatka jaku benabi ari Bup Kudus. Kitai mega patut ngereja tu ngambika bulih penguntung ti pemadu mayuh ari semua utai ke dibacha ba Bup Kudus.

8. Baka ni kitai ulih macha enggau chara ti ngasuh kitai berunding enggau manah ngambika ulih mereti?

⁸ Jehovah meri bala nembiak Iya runding ti manah ngambika ulih meretika utai ti dibacha. Nya alai, besampi meh lalu minta tulung ari Iya kena ngemansangka pengelandik tu. (J-lam. 2:6) Baka ni nuan ulih ngereja utai sejalai enggau sampi nuan? Peratika enggau silik utai ti dibacha nuan, lalu tuliska chara utai nya bekaul enggau utai bukai ke ditemu nuan. Kena meh litaricha kitai ngambika ulih nulung nuan ngereja tu. Ambika chunto, nuan ulih ngena Bup Dikena Saksi-Saksi Jehovah Ngiga  Pansik. Perengka belajar ke baka tu deka nulung nuan beratika reti ayat Bup Kudus ke dibacha sereta chara nuan ulih ngena nya ba pengidup. (Heb. 5:14) Lebuh nuan berunding enggau manah maya macha, nuan deka mereti agi utai ke dibacha ari Bup Kudus.

9. Nama pemendar ti penting ari Jaku Petara ti enggai diterima orang Saduki?

⁹ Orang Saduki amat landik enggau lima iti bup ti keterubah ba Sempekat Lama, tang sida enda nerima pemendar ti penting ke bisi dalam bup nya. Ambika chunto, peratika chara Jesus nyaut lebuh orang Saduki nanya iya pasal pengangkat ari mati. Jesus nanya sida: “Kati kita nadai kala macha dalam bup Moses, pasal babas ti diempa api? Petara bejaku ngagai Moses: ‘Aku tu Petara Abraham, Isak, enggau Jakop.’” (Mrk. 12:18, 26) Taja pan orang Saduki tentu bisi macha ayat nya mayuh kali, tang tanya ari Jesus nunjukka sida enda bedulika siti pemendar Bup Kudus ti penting, iya nya ajar pasal pengangkat ari mati.—Mrk. 12:27; Luk. 20:38. d

10. Nama patut diperatika kitai lebuh macha?

¹⁰ Nama ulih dipelajarka kitai ari utai ti dibacha nya? Lebuh kitai macha, kitai deka beratika semua utai ti ulih dipelajarka kitai ari ayat tauka cherita Bup Kudus. Kitai enggai semina meretika utai ti asas aja tang mega deka meretika pemendar ti dalam agi sereta prinsip iya. Nya ulih disemaka baka reta ti dilalaika laban iya enda senang ditemu.

11. Sejalai enggau 2 Timoti 3:16, 17, baka ni nuan ulih tetemuka reta ti berega dalam Bup Kudus?

¹¹ Baka ni nuan ulih tetemuka reta ti berega lebuh macha Bup Kudus? Peratika utai ti dipadah ba 2 Timoti 3:16, 17. (Bacha.) Ayat nya madah “semua ayat ba Bup Kudus . . . beguna” kena (1) ngajar, (2) ngerara, (3) ngemetulka utai ti salah, sereta (4) ngelatih kitai ngambika ngereja utai ti lurus. Nuan tau bulih empat iti penguntung tu indah ari bup dalam Bup Kudus ke jarang dikena nuan. Peratika cherita Bup Kudus ke dibacha kena nemu utai ti diajar pasal Jehovah, peneka Iya, tauka pasal batang ajar ari Bup Kudus. Nuan mega ulih beratika chara cherita Bup Kudus nya ngerara nuan. Nama chara iya? Lebuh nuan macha sesiti ayat, peratika chara ayat nya nulung nuan nemu sereta nulak sekeda runding tauka ulah ti salah. Lalu peratika mega chara ayat nya nulung nuan mengkang tetap ati ngagai Jehovah. Kelimpah ari nya, peratika chara ayat Bup Kudus nya ulih dikena ngemetulka utai ti salah tauka runding ti salah, baka penemu ti salah ke dipadah orang ngagai nuan maya nginjil. Lalu, peratika chara ayat Bup Kudus nya ngelatih nuan ngambika ngereja utai ti lurus. Tu deka  nulung nuan seruran ngayanka runding Jehovah. Lebuh nuan ingatka empat iti penguntung tu, nuan deka tetemuka reta ti berega ke ulih nulung nuan bulih mayuh agi penguntung ari pengawa macha Bup Kudus nuan.

12. Nama kebuah Jesus nanya orang Parisi “Kati kita nadai kala macha?”

¹² Jesus mega nanya “Kati kita nadai kala macha?” kena nunjukka orang Parisi ngembuan runding ti salah pasal utai ti dibacha sida dalam Bup Kudus. (Mat. 12:1-7) e Maya nya, orang Parisi madahka bala murid Jesus ngelanggar adat Hari Sabat. Kena nyaut sida, Jesus ngena dua chunto ari Bup Kudus sereta nyebut ayat ari bup Hosea kena nunjukka orang Parisi nya enda ngayanka pengasih sereta enda meretika kebuah adat Hari Sabat nya digaga. Nama kebuah runding orang Parisi enda berubah lebuh sida macha Jaku Petara? Laban lebuh sida macha, sida ngembuan ulah ti sumbung sereta rindu mutap pasal sebarang utai. Tu ngasuh sida enda ulih meretika utai ti benung dibacha nya.—Mat. 23:23; Jhn. 5:39, 40.

13. Nama ulah ke patut dikembuan kitai lebuh macha Bup Kudus, lalu nama kebuah?

¹³ Ari jaku Jesus, kitai nemu kitai patut ngembuan ulah ti betul lebuh macha Bup Kudus. Enda baka orang Parisi, kitai patut baruh ati sereta sanggup belajar. Kitai patut ‘enggau nelap nerima jaku ke ditanam ba kitai ke ulih nyelamatka kitai.’ (Jas. 1:21) Enti kitai nelap, kitai deka ngawakka Jaku Petara ngubah pengidup kitai. Enti kitai nyeliahka ulah ti rindu mutap sereta sumbung, nya baru ajar ari Bup Kudus pasal pengasih, penyiru, sereta pengerindu deka ngubah pengidup kitai.

14. Baka ni kitai nemu enti kitai benung ngawakka Bup Kudus ngubah pengidup kitai? (Peda mega gambar.)

 ¹⁴ Chara kitai ngintu orang bukai deka nunjuk sekalika kitai ngawakka Jaku Petara ngubah pengidup kitai tauka enda. Orang Parisi enda ngawakka Jaku Petara negu ati sida. Ketegal nya, sida “nyalahka orang ke nadai penyalah.” (Mat. 12:7) Baka nya mega, chara kitai ngintu sereta berunding pasal orang bukai deka nunjuk sekalika kitai udah ngawakka Jaku Petara ngubah pengidup kitai. Ambika chunto, kati kitai seruran nyebut utai ti manah pasal orang bukai, tauka kati kitai jampat madahka pengelemi sida? Kati kitai ngayanka pengasih sereta sedia deka ngampun, tauka kati kitai jampat mutap pasal orang sereta nyimpan dendam? Saut ngagai tanya tu deka nunjuk sekalika kitai ngawakka utai ti dibacha kitai ngubah runding, asai ati, sereta ulah kitai.—1 Tim. 4:12, 15; Heb. 4:12.

15. Nama asai ati Jesus pasal Bup Kudus?

¹⁵ Jesus rinduka Bup Kudus, lalu jaku benabi ba Masmur 40:8 madahka asai ati Jesus. Ayat nya madah: ‘Naka meh pengerindu ati aku ngereja peneka Nuan, O Petara aku! Aku nyimpan ajar Nuan dalam ati aku.’ Ketegal Jesus rinduka Bup Kudus, iya gaga ati sereta mujur ba pengawa iya ke Jehovah. Kitai mega deka bulih pengaga ati sereta pemujur enti kitai macha Jaku Petara sereta belajar rinduka nya.—Mas. 1:1-3.

16. Nama deka digaga nuan ngambika bulih mayuh agi penguntung ari pengawa macha Bup Kudus nuan? (Peda kutak “ Jaku Jesus Ulih Nulung Nuan Meretika Utai ti Dibacha.”)

¹⁶ Sejalai enggau jaku sereta teladan Jesus, aram meh kitai terus ngemansangka pengelandik macha Bup Kudus kitai. Kitai ulih ngemansangka penemu kitai pasal ayat Bup Kudus enggau chara besampi, macha enggau lubah, ngena tanya, sereta ngaga nota ti pandak. Kitai ulih berunding enggau manah lebuh macha, reti iya beratika utai ti dibacha kitai enggau tulung ari litaricha ke bukai ti bepelasarka Bup Kudus. Kitai ulih belajar chara ngena Bup Kudus enggau manah agi, indah ayat ke enda suah dikena kitai, sereta ngiga reta ti berega ke dilalaika dalam cherita Bup Kudus. Lalu, mengkang ngembuan runding sereta ulah ti betul lebuh macha Bup Kudus. Nya meh chara kitai ngawakka Jaku Petara ngubah pengidup kitai. Lebuh kitai bebendar ngereja semua tu, kitai deka bulih mayuh agi penguntung ari pengawa macha Bup Kudus kitai sereta majak semak ngagai Jehovah.—Mas. 119:17, 18; Jas. 4:8.