1. Sumit erserpa Jiisusip Allak­kat Iller­nar­tut pingaar­tik­kai?

 TAKORLOORIARUK Jiisusi ilin­niar­titsisoq tusar­naarlugu. Allak­kat Iller­nar­tut eqqaamal­luaramigit issuakulasar­pai. Soqutiginar­poq imermut morsutsitaanermi kingorna oqaaserisimasai siul­liit allaatigineqar­tut toqun­ngitsiar­nerminilu oqaasiisa kingul­liit ilaat Allak­kanit Iller­nar­tunit issuaanerum­mata. b (Mos 5. 8:3; Tuss 31:6; Luk 4:4; 23:46) Kif­far­tor­nerminilu ukiut pingasut affarlu Jiisusip tamanut ilin­niar­titsil­luni Allak­kat Iller­nar­tut atuar­tarlugillu issuar­tarlugillu nas­suiar­tar­pai. – Mat 5:17, 18, 21, 22, 27, 28; Luk 4:16-20.

2. Jiisusip peroriar­tor­nermini Allak­kat Iller­nar­tut qanoq ilisimasaqarfigil­lualer­pai? (Saq­qaani assiliaq takuuk).

² Jiisusip peroriar­tor­nermini Guutip oqaasia atuar­neqar­toq tusar­naar­tarsimas­savaa atuar­nis­saalu ilik­karsimal­lugu. Angerlarsimaf­fim­mini ulluin­narni ilaqutariit­tut oqaloqatigiik­kaangamik Mariiap Juuserfillu Allak­kat Iller­nar­tut issuar­tarsimas­savaat. c (Mos 5. 6:6, 7) Aamma qularin­ngis­sin­naavar­put Jiisusi ilaqut­tani ilagalugit ullut qasuersaarfiit tamaasa synagogimiit­tarsimas­sasoq. (Luk 4:16) Tas­sani Allak­kat Iller­nar­tut atuar­neqar­neranni tusar­naaq­qis­saar­tarsimas­saaq. Pif­fis­sallu ingerlanerani nam­mineq atuar­nis­saat ilik­kar­paa. Tamatuma kingunerisaanik Jiisusip Allak­kat Iller­nar­tut ilisimaliin­nar­nagit nuan­naringaaler­pai iliuuseqar­nis­samullu kil­lin­neqaatigalugit.  Assersuutigalugu Jiisusi aqqaneq-marluin­nar­nik ukioqarluni guutisiorfim­miin­nerani qanoq pisoqar­toq eqqarsaatigiuk. Ilin­niar­titsisut Moorsisip inatsisaanik ilisimasaqarluar­tut Jiisusip “paasisimasaqas­susia akis­sutigisar­tagaalu tupigusuutigiuar­paat”. – Luk 2:46, 47, 52.

3. Allaaserisami matumani suut sam­mis­savagut?

³ Uagut­taaq ullut tamaasa Biibilimik atuar­tar­nik­kut Guutip oqaasia ilisimalerlugulu nuan­narilersin­naavar­put. Qanorli atuak­kagut sapin­ngisamik pis­sarsiaqarfigisin­naavagut? Jiisusip Allak­kanik ilisimasunut, farisiiarinut sadukiiarinullu oqaasii ilin­niarfigisin­naavagut. Upperisarsior­nik­kut siut­tut taak­kua Allak­kat Iller­nar­tut atuakulasaraluarlugit atuak­katik iluaqutigin­ngilaat. Angutit taak­kua Allak­kat Iller­nar­tut pis­sarsiaqarfigil­luarumal­lugit iliuuserisas­saralui pingasut Jiisusip erseq­qis­sar­pai. Jiisusip taak­kunun­nga oqaasii iluaqutigalugit (1) atuak­katsin­nik paasin­nin­neq, (2) anersaak­kut erlin­nar­tunik nas­saar­neq aamma (3) Guutip oqaasianit ilusilersor­tin­neq pik­korif­figinerulersin­naavagut.

4. Guutip oqaasianik atuar­nermi suna pingaaruteqarpa? (Luk­karsi 10:25-29)

⁴ Guutip oqaasiani atuak­kagut paasil­luarusut­tar­pagut. Paasin­ngik­kutsigimmi iluaqutiginavian­ngilagut. Assersuutigalugu ‘Moorsisip inatsisaanik ilisimasumik’ Jiisusip oqaloqateqar­nera eqqarsaatigiuk. (Lukkarsi 10:25-29 atuakkit). Angut taanna naas­saan­ngitsumik inuujumal­luni qanoq ilior­tariaqar­nerluni aperim­mat Jiisusip Allak­kani Iller­nar­tuni akis­sutis­sarsinis­saanut ikior­paa ima aperalugu: “Moorsisip inatsisaani qanoq allas­simava? Atuak­katit qanoq paasivigit?” Guutimik inoqatimillu asan­nin­neq pil­lugu allas­simaf­fiit issuarlugit eqqor­tumik akivoq. (Mos 3. 19:18; Mos 5. 6:5) Taavali qanoq oqar­nersoq maluginiaruk: “Kinar­piaq asasariaqar­para?” Taamaalil­luni ersersip­paa atuak­kani paasil­luarsimanagit. Tamatumalu kingunerisaanik Allak­kanik Iller­nar­tunik eqqor­tumik maleruaasin­naan­ngilaq.

5. Qinuneq suk­kaval­laan­ngitsumillu atuar­neq qanoq iluaqutigisin­naavagut?

⁵ Guutip oqaasianik atuar­tar­neq ileq­quliuk­kutsigu paasisaqarluar­nerus­saagut. Siun­nersuutit uku iluaqutigisin­naavatit: Atuan­ngin­ninni qinusarit. Allak­kat Iller­nar­tut paasiumal­lugit Jehovap ikiuinera pisariaqar­tik­katsigu atuak­katta eqqarsaatigeq­qis­saar­nis­saan­nut anersaamik iller­nar­tumik tuneq­qul­luta qin­nuigisin­naavar­put. Taava sukkaval­laanngitsumik atuartarit. Taman­nami atuak­kavit paasinis­saan­nut iluaqutigis­savat. Aamma imaas­sin­naavoq nipituumik atuar­neq imaluun­niit Biibilimik immius­sanik tusar­naajutigalutit atuar­neq iluaqutigisin­naagit. Taamaalil­lutit malugis­sutitit arlal­lit ator­taruk­kit Guutip oqaasiata paasinis­saanut, eqqaamasin­naanis­saanut ilin­niarfiginis­saanullu iluaqutigis­savat. (Jos 1:8) Atuareeraangavit qinoq­qittarit. Biibili pil­lugu Jehova qutsavigisaruk atuak­katillu maleruarsin­naaq­qul­lugit ikioq­qul­lutit.

6. Atuar­til­lutit imminut aperisar­neq naatsun­nguanillu allat­tuisar­neq qanoq iluaqutigisin­naavigit? (Aamma assit takuk­kit).

⁶ Biibilip paasinerunis­saanut siun­nersuutit allat marluk sam­meriar­tigit. Atuak­katit pil­lugit imminut aperisarit. Atuar­til­lutit uku eqqarsaatigisin­naavatit: ‘Kik­kut pineqar­pat? Kina oqaluppa? Kina oqaluup­paa aamma sooq?  Sumi qangalu tamanna piva?’ Apeq­qutit taamaat­tut atuak­kavit eqqarsaatiginis­saan­nut iluaqutigisin­naavatit. Aamma atuar­til­lutit naatsun­nguanik allat­tuisarit. Allat­tuigaangavit eqqarsaatitit oqaasin­ngor­tit­tar­patit, taman­nalu paasin­nin­nis­samut iluaqutigisar­pat. Aamma allat­tuigaangavit atuak­katit eqqaamanerusar­patit. Apeq­qutit, misis­suininni paasisimasatit, oqalut­tuami pingaar­nerit, atuak­katit qanoq atorsin­naaneritit atuak­katillu ilin­nut qanoq misigilersitsinersut allat­tor­tarsin­naavatit. Taama allat­tuisar­nik­kut Guutip oqaasia ilin­nut oqariar­tuutigisaatut isiginerulis­savat.

7. Atuar­til­luta pigin­naas­suseq suna pisariaqar­tip­par­put, aamma sooq? (Hebræerit 5:14, q.a.i.)

⁷ Guutip oqaasiani atuak­kagut paasiumal­lugit pingaarutilim­mik pigin­naas­suseqar­tariaqar­pugut – tassa naliliisin­naas­suseq. (Hebræerit 5:14 atuaruk, aamma qup­pernerup ataani ilan­ngus­saq). Sunaana pigaa? Inuup naliliisin­naas­susil­lip paasis­sutis­sat assigiin­ngitsut immik­koor­tis­sin­naal­lugillu qanoq ataqatigiin­nersut ingerlaan­narlu paasineqarsin­naan­ngitsut paasisin­naasar­pai. Jiisusi oqar­poq pisut suut Biibilimi siulit­tuutinik eqquutitsinersut paasinias­sagutsigu naliliisin­naas­suseq pisariaqar­tik­kip­put. Biibilimilu atuak­kagut tamaasa pis­sarsiaqarfigil­luarumal­lugit pigin­naas­suseq tamanna pisariaqar­tip­par­put.

8. Atuak­kagut qanoq paasil­luarsin­naavagut?

⁸ Jehovap kif­fani naliliisin­naas­suseqar­tit­tar­pai. Taamaat­tumik pigin­naaneq taanna ineriar­tor­teq­qul­lugu ikioq­qul­lutit qin­nuigisaruk. (Uss 2:6) Qanoq qin­nutin­nut naaper­tuut­tumik iliuuseqarsin­naavit? Atuak­katit paasiniaq­qis­saar­tak­kit ilisimariik­kan­nullu qanoq attuumas­suteqar­nersut maluginiar­tarlugu. Biibilimik misis­sueq­qis­saarutit, soorlu Jehovap Nalunaajaasuisa ujarliutaat, iluaqutigisin­naavatit. Biibilimi allas­simaf­fiit qanor­piaq isumaqar­nersut inuunin­nilu qanoq maleruarsin­naaneritit  paasiumal­lugu misis­sueq­qis­saarutit taakku iluaqutigisin­naavatit. (Hebr 5:14) Taamatut atuaq­qis­saar­taruit Allak­kat Iller­nar­tut paasil­luar­nerulis­savatit.

9. Guutip oqaasiani ilumoor­toq pingaarutilik suna sadukiiarit eqqumaf­figin­ngilaat?

⁹ Sadukiiarit Hebræerisut Allak­kani Iller­nar­tuni atuak­kat siul­liit tal­limat ilisimal­luaraluarlugit tas­sani ilumoor­tut pingaarutil­lit eqqumaf­figin­ngilaat. Assersuutigalugu sadukiiarit makititsineq pil­lugu aperim­manni Jiisusi qanoq oqar­toq maluginiaruk. Ima aperai: “Guutip Moorsisimut oqaasii uku atuar­nikuun­nginnas­sigit: ‘Uanga tas­saavunga Aaperaap Guutia, Iisaap Guutia Jaakullu Guutia’?” (Mak 12:18, 26) Sadukiiarit tamanna arlaleriarlutik atuarsimas­savaat, Jiisusilli apeq­qutaanit erser­poq Biibilimi ilumoor­toq pingaarutilik – tassa makititsinermik ilin­niar­titsis­sut – paasisiman­ngik­kaat. – Mak 12:27; Luk 20:38. d

10. Atuaraangatta suut eqqumaf­figisas­savagut?

¹⁰ Tamanna qanoq ilin­niutigisin­naavar­put? Atuaraangatta allas­simaf­fimmi aalajangersimasumi Biibilimil­luun­niit oqalut­tuami ilin­niarfigisin­naasagut tamaasa eqqumaf­figerusut­tar­pagut. Ilin­niar­titsis­sutit ingerlaan­naq paasineqarsin­naasut kisiisa paasiniaan­nar­nagit aam­mali ilumoor­tut najoq­qutas­siallu erlin­nar­tuutitut toq­qorsimasutut ittut paaserusut­tar­pagut.

11. Biibilimi anersaak­kut erlin­nar­tunik qanoq nas­saarsin­naavit? (Timuutiusimut 2. 3:16, 17)

¹¹ Biibilimik atuar­ninni anersaak­kut erlin­nar­tuutit qanoq nas­saarisin­naavigit? Maluginiaruk Timuutiusimut allak­kat aappaat 3:16, 17-milu qanoq allas­simasoqar­toq. (Atuakkit). Allas­simavoq “Allak­kat Iller­nar­tut tamarmik” (1) ilin­niar­titsinermut, (2) oqaaq­qis­saarinermut, (3) naq­qiinermut aamma (4) perorsaatis­siinermut iluaqutaasut. Allaat Biibilimi allak­kanut atuar­piar­tan­ngisan­nut tun­ngatil­lugu taakku sisamat iluaqutigisin­naavatit. Oqalut­tuaq misis­soq­qis­saaruk paasiniarlugu Jehova, siuner­taa Biibilimilu najoq­qutas­siat pil­lugit sunik ilinniar­titsinersoq. Aamma oqaaqqis­saarinermut qanoq iluaqutaatiginersoq eqqarsaatigiuk. Eqqun­ngitsulioq­qajaanerit eqqun­ngitsumillu isigin­nit­taatsit itigar­tis­sin­naanias­sagak­kit Jehovamullu aalajaat­tuarsin­naaq­qul­lutit versit atuak­katit qanoq iluaqutigisin­naanerlugit maluginiar­taruk. Atuak­katit eqqun­ngitsumik isum­mer­nermik, immaqa oqaluus­sitil­lutit arlaata eqqaasaanik, naq­qiinermut qanoq ator­neqarsin­naanersut eqqarsaatigisaruk. Aamma Jehovap isigin­nit­taaseqar­neratut isigin­nit­taaseqaq­qul­lutit versini  atuak­kanni peror­saatis­siinerit maluginiar­tak­kit. Iluaqutis­sat taakku sisamat eqqumaf­figiuaruk­kit anersaak­kut erlin­nar­tunik nas­saarsin­naavutit Biibilimillu atuar­nerit pis­sarsiaqarfigil­luarlugu.

12. Sooq Jiisusip farisiiarit aperai ‘atuar­nikuun­ngin­nersut’?

¹² Farisiiarit Allak­kat Iller­nar­tut eqqun­ngitsumik isigin­nit­taaseqarfigigaat qulaar­niarlugu Jiisusip ima aperai: “Atuarnikuunnginnassiuk?” (Mat 12:1-7) e Farisiiarit pisumi tamatumani Jiisusip ilin­niar­titai ullormi qasuersaarfimmi iner­teq­qutaasumik ilior­nerar­paat. Akil­lugit Jiisusip Allak­kani Iller­nar­tuni assersuutit marluk eqqaal­lugillu allas­simaf­fik Hoseap allagaaneersoq issuar­paa. Taamaalil­luni ersersip­paa farisiiarit ulloq qasuersaarfik pil­lugu inatsisaata siuner­taa paasin­ngitsoorsimagaat nal­lit­tuin­ngitsoorlutillu. Sooq angutit taakku Guutip oqaasiani atuak­kamin­nit ilusilersor­tis­siman­ngil­lat? Isor­nar­torsiuil­lutik makital­lutillu atuar­taramik. Eqqun­ngitsumik isigin­nit­taaseqarlutik atuar­taramik atuak­katik paasin­ngitsoor­tar­paat. – Mat 23:23; Joh 5:39, 40.

13. Qanoq isigin­nit­taaseqarluta Biibilimik atuar­tas­saagut, aamma sooq?

¹³ Jiisusip oqaasiinit paasivar­put Biibilimik atuar­nitsinni eqqor­tumik isigin­nit­taaseqas­sasugut. Farisiiarit assiginagit maniguul­luta ilin­niarusus­suseqar­tariaqar­pugut. ‘Guutip oqaasia uagutsin­nut naasus­satut ikkun­neqar­toq saamalluta akuerissavarput.’ (Jaak 1:21) Saamasuugutta Guutip oqaasia qamuuna allan­nguis­sutigis­savar­put. Aatsaat isor­nar­torsiuinatalu makitan­ngik­kutta Biibilimi nal­lit­tuineq, misigin­neqataaneq asan­nin­nerlu pil­lugit  ilin­niar­titsis­sutigineqar­tunit ilusilersor­neqarsin­naavugut.

14. Biibilimit ilusilersor­tit­tar­nerluta qanoq paasisin­naavar­put? (Aamma assit takuk­kit).

¹⁴ Inun­nik allanik pin­nit­tar­nitta ersersis­sin­naavaa Guutip oqaasianit ilusilersor­tis­simanerluta. Farisiiarit Guutip oqaasia uum­mam­milius­siman­ngin­namikku ‘pisuus­suteqan­ngitsut isor­nar­torsior­tar­paat’. (Mat 12:7) Taamatut­taaq uagut allat qanoq isumaqarfigalugillu pis­susilersorfiginerlugit misis­sorutsigu Guutip oqaasianit ilusilersor­tis­simanerluta paasis­savar­put. Assersuutigalugu inoqatitta ajun­ngitsor­tai eqqaasar­pagut, kuk­kus­sutaaluun­niit eqqaapal­lat­tar­pagut? Nal­lit­tuil­lutalu isumak­keerfigin­neriaan­naavugut, imaluun­niit isor­nar­torsiuil­lutalu put­tarsisaqar­tar­pugut? Taamatut imminut misis­sorluta paasis­savar­put eqqarsaatigut, misigis­sutsigut iliuutsigullu atuak­katsin­nit ilusilersor­tis­simanersut. – Tim 1. 4:12, 15; Hebr 4:12.

15. Jiisusip Allak­kat Iller­nar­tut qanoq isumaqarfigai?

¹⁵ Jiisusip Allak­kat Iller­nar­tut nuan­naringaar­pai, misigis­susiilu Tus­siaat 40:9-mi ima siulit­tuutigineqar­put: “Guuti, piumasat malil­lugu ilior­nis­saq tassa kajungerisara; inatsisitit uanga ilunni ipput.” Nuan­naringaaramigit pil­luarlunilu Jehovamut kif­far­tor­tuar­poq. Uagut­taaq Guutip oqaasianik atuar­tarluta uum­mam­miulius­sigutta pil­luarlutalu kif­far­tor­tuarsin­naavugut. – Tuss 1:1-3.

16. Illit Biibilimik atuar­nerit pis­sarsiaqarfigil­luar­nerujumal­lugu qanoq iliorusup­pit? (Ungalusaq “ Atuak­katit paasiumal­lugit Jiisusip oqaasii iluaqutigisin­naavatit” takuuk).

¹⁶ Jiisusip oqaasii maligas­siaalu ilaarlugit Biibilimik atuar­tar­ner­put pitsan­ngor­tit­tuarisigu. Qinusar­nik­kut, suk­kaval­laan­ngitsumik atuar­tar­nik­kut, aperisar­nik­kut naatsun­nguanillu allat­tuisar­nik­kut Biibilimi oqalut­tuat paasil­luar­nerusin­naavagut. Biibililersaarutigut iluaqutigalugit atuak­kagut naliliil­luta paasiniaq­qis­saarsin­naavagut. Anersaak­kut erlin­nar­tunik nas­saar­niar­nik­kut allas­simaf­fiit, aamma ilisimal­luarsiman­ngisagut, iluaqutiginerusin­naavagut. Eqqor­tumillu isigin­nit­taaseqarluta atuar­tarutta Guutip oqaasianit ilusilersor­tis­saagut. Taamatut sapin­ngisatsin­nik iliuuseqar­tarutta Biibilimik atuar­tar­ner­put pis­sarsiaqarfigil­luar­nerus­savar­put Jehovamullu qanil­linerul­luta. – Tuss 119:17, 18; Jaak 4:8.