1. Wetin sho se di Skripchɔ dɛn bin impɔtant to Jizɔs?

 IMAJIN aw i bin tan lɛk fɔ lisin to Jizɔs we i de tich. Bɔku tɛm, i bin de kot di Oli Skripchɔ dɛn ɔfɛd. Infakt, insay di fɔs wɔd dɛn we Jizɔs bin tɔk afta i baptayz ɛn sɔm pan in las wɔd dɛn bifo i day, i bin kot frɔm di Skripchɔ dɛn. b (Dit. 8:​3; Sam 31:​5; Lyuk 4:​4; 23:​46) Bitwin dɛn tu tɛm dɛn de, Jizɔs bin de rid na pɔblik, ɛn i bin de kot frɔm di Skripchɔ dɛn ɛn ɛksplen dɛn bɔku tɛm.—Mat. 5:​17, 18, 21, 22, 27, 28; Lyuk 4: 16-20.

2. Wetin bin ɛp Jizɔs fɔ sabi di Skripchɔ dɛn gud gud wan we i bin de gro ɔp? (Luk di pikchɔ na di frɔnt pej.)

² Lɔng tɛm bifo Jizɔs bigin in prichin wok, i bin de rid ɛn yɛri Gɔd in Wɔd bɔku tɛm. Wi nɔ gɛt wan dawt se Jizɔs bin de yɛri we Meri ɛn Josɛf bin de kot frɔm di Skripchɔ dɛn we dɛn bin de tɔk ɛvride as famili. c (Dit. 6:​6, 7) Wi shɔ se Jizɔs bin de go na di sinagɔg ɛvri Sabat wit in famili. (Lyuk 4:​16) We dɛn bin de de, Jizɔs go dɔn de tek tɛm lisin we dɛn bin de rid di Skripchɔ dɛn. As tɛm de go, Jizɔs bin lan fɔ rid di Skripchɔ dɛn fɔ insɛf. So Jizɔs nɔ bin jɔs sabi di Skripchɔ dɛn fayn fayn wan, bɔt  i bin lɛk dɛn, ɛn i bin de alaw dɛn fɔ afɛkt di we aw i de du tin. Fɔ ɛgzampul, mɛmba wetin bin apin na di tɛmpul we Jizɔs bin jɔs ol 12 ia. Di ticha dɛn we bin rili sabi di Lɔ we Gɔd Bin Gi Mozis bin “sɔprayz we dɛn si di we aw [Jizɔs] ɔndastand ɛn di we aw i de ansa.”—Lyuk 2:​46, 47, 52.

3. Wetin wi go tɔk bɔt insay dis atikul?

³ Wisɛf go ebul fɔ no ɛn lɛk Gɔd in Wɔd as wi de rid di Skripchɔ dɛn ɔltɛm. Bɔt aw wi go ebul fɔ bɛnifit mɔ frɔm wetin wi de rid? Wi kin lan frɔm wetin Jizɔs bin se to di wan dɛn we bin sabi di Lɔ, lɛk di Lɔ ticha dɛn, di Faresi dɛn, ɛn di Sadyusi dɛn. Dɛn bigman dɛn de pan Gɔd biznɛs bin de rid di Skripchɔ dɛn bɔku tɛm, bɔt dɛn nɔ bin de bɛnifit frɔm wetin dɛn bin de rid. Jizɔs bin sho tri we dɛn, we dɛn man dɛn ya bin fɔ dɔn bɛnifit mɔ frɔm di Skripchɔ dɛn. Di wɔd dɛn we Jizɔs tɛl dɛn go ɛp wi fɔ sabi mɔ ɛn mɔ aw (1) fɔ ɔndastand wetin wi de rid, (2) fɔ fɛn di valyu tin dɛn na Gɔd in Wɔd, ɛn (3) fɔ alaw Gɔd in Wɔd fɔ shep wi.

4. Wetin Lyuk 10:​25-29 tich wi bɔt fɔ rid Gɔd in Wɔd?

⁴ Wi want fɔ ɔndastand wetin wi de rid na Gɔd in Wɔd. If wi nɔ ɔndastand, sɔntɛm wi nɔ go rili bɛnifit frɔm wetin wi de rid. Fɔ ɛgzampul, lɛ wi tɔk bɔt wetin Jizɔs bin tɔk to wan man we bin “sabi di Lɔ gud gud wan.” (Rid Lyuk 10:​25-29.) We di man bin aks Jizɔs wetin i nid fɔ du so dat i go gɛt layf we go de sote go, Jizɔs bin ɛp am fɔ fɛn di ansa insay Gɔd in Wɔd. Jizɔs aks di man se: “Wetin di Lɔ se? Frɔm wetin yu rid, wetin yu ɔndastand?” Di man bin ebul fɔ gi di kɔrɛkt ansa bay we i kot wetin di Skripchɔ dɛn se bɔt fɔ lɛk Gɔd ɛn fɔ lɛk yu neba. (Lɛv. 19:​18; Dit. 6:​5) Bɔt notis wetin i se afta dat: “Udat rili na mi neba?” Di man sho se i nɔ bin rili ɔndastand wetin di tin we i rid rili min. Dis bin mek i nɔ bin no aw fɔ aplay dɛn skripchɔ dɛn de kɔrɛkt wan na in layf.

5. Aw prea ɛn we wi de rid slo wan go ɛp wi fɔ ɔndastand wetin wi de rid?

⁵ Wi go ebul fɔ ɔndastand Gɔd in Wɔd mɔ if wi lan aw fɔ du sɔm fayn tin dɛn we wi de rid. Dis na sɔm tin dɛn we go ɛp yu. Pre bifo yu bigin fɔ rid. Wi nid Jiova in ɛp fɔ ɔndastand di Skripchɔ dɛn, so wi kin aks am fɔ in oli spirit fɔ mek wi ebul pe atɛnshɔn pan wetin wi de rid. Dɔn go de rid slo wan. We yu du dat, i go ɛp yu fɔ ɔndastand wetin yu de rid. Sɔntɛm i go ɛp yu if yu rid lawd wan ɔ yu fala di odio Baybul ridin. We yu de yɛri di wɔd dɛn frɔm di rɛkɔdin ɛn yu de si dɛn na di Baybul, dat de ɛp yu fɔ ɔndastand, mɛmba, ɛn lan mɔ frɔm wetin yu de rid na Gɔd in Wɔd. (Jɔs. 1:​8) We yu dɔn dɔn fɔ rid, pre bak fɔ tɛl Jiova tɛnki fɔ we i gi yu in Wɔd ɛn fɔ aks am fɔ ɛp yu fɔ aplay wetin yu dɔn rid.

6. We yu aks yusɛf kwɛstyɔn dɛn ɛn rayt smɔl tin bɔt wetin yu rid, aw dat go ɛp yu? (Luk bak di pikchɔ.)

⁶ Lɛ wi tɔk bɔt tu ɔda tin dɛn bak we go ɛp yu fɔ ɔndastand wetin yu de rid na di Baybul gud gud wan. Aks yusɛf kwɛstyɔn dɛn bɔt wetin yu de rid. As yu de rid di akawnt, aks yusɛf se: ‘Udat na di men  pipul dɛn we dis vas de tɔk bɔt? Udat de tɔk? Udat i de tɔk to, ɛn wetin mek? Usay ɛn ustɛm dis tin ya apin?’ Dɛn kayn kwɛstyɔn dɛn ya de ɛp wi fɔ tink ɛn ɔndastand di men pɔynt dɛn bɔt wetin wi rid. Dɔn bak, as yu de rid, na fɔ rayt smɔl tin bɔt wetin yu de rid. We yu de rayt bɔt wetin yu dɔn rid, yu go tink bɔt am mɔ, ɛn dat go ɛp yu fɔ ɔndastand am gud gud wan. We yu de rayt bak, i de ɛp yu fɔ mɛmba wetin yu dɔn rid. Yu kin rayt kwɛstyɔn dɛn, rayt bɔt tin dɛn we yu fɛn we yu du risach, yu kin rayt bɔt aw yu go yuz wetin yu dɔn rid, ɔ yu kin jɔs rayt aw yu fil bɔt wetin yu rid. We yu rayt dɛn tin dɛn ya, i go ɛp yu fɔ si Gɔd in Wɔd as in mɛsej we i sɛn to yu.

7. Us kwaliti wi nid we wi de rid? Wetin mek? (Matyu 24:​15)

⁷ Jizɔs bin sho wan impɔtant kwaliti we wi nid if wi want fɔ ɔndastand wetin wi de rid na Gɔd in Wɔd, dat na fɔ tek tɛm tink gud wan fɔ ɔndastand wetin wi rid. (Rid Matyu 24:​15.) Aw wi go ebul du dat? Wi nid fɔ tek tɛm tink fɔ ɔndastand aw wan vas kɔnɛkt to ɔda vas ɛn aw wan vas difrɛn frɔm ɔda vas ɛn fɔ ɔndastand sɔntin we nɔ klia. Jizɔs sho bak se wi nid fɔ tek tɛm tink gud wan fɔ ɔndastand tin dɛn we de apin we go mek Baybul prɔfɛsi kam tru. Wi nid bak fɔ gɛt dis kwaliti so dat wi go bɛnifit gud gud wan frɔm ɔl wetin wi de rid na di Baybul.

8. Aw wi go rid ɛn tek tɛm tink gud wan fɔ ɔndastand?

⁸ Jiova de mek in savant dɛn ebul fɔ tek tɛm tink gud wan fɔ ɔndastand. So na fɔ pre to am ɛn aks am fɔ ɛp yu fɔ gɛt dis kwaliti. (Prɔv. 2:​6) Aw yu go du sɔntin we gri wit yu prea? Tek tɛm tink bɔt wetin yu de rid, ɛn tray fɔ notis aw wetin yu de rid kɔnɛkt to ɔda tin dɛn we yu no. Fɔ ɛp yu, yuz di tin dɛn we de ɛp wi fɔ ɔndastand di Baybul, lɛk di Risach Gayd fɔ  Jiova Witnɛs Dɛn. Dɛn tin dɛn ya go ɛp yu fɔ tek tɛm tink gud wan fɔ ɔndastand wetin wan patikyula skripchɔ min ɛn si we dɛn aw yu go aplay am na yu layf. (Ibru. 5:​14) We yu de rid ɛn tek tɛm tink gud wan fɔ ɔndastand, yu go ɔndastand di Skripchɔ dɛn mɔ ɛn mɔ.

9. Us impɔtant Baybul trut di Sadyusi dɛn nɔ bin de pe atɛnshɔn to?

⁹ Di Sadyusi dɛn bin no gud wan di fɔs fayv buk dɛn na di Ibru Skripchɔ dɛn, bɔt dɛn nɔ bin de pe atɛnshɔn pan sɔm tru tin dɛn we impɔtant we de insay dɛn buk dɛn de. Fɔ ɛgzampul, tink bɔt di ansa we Jizɔs bin gi we di Sadyusi dɛn bin aks am bɔt di op fɔ gɛt layf bak. I bin aks dɛn se: “Una nɔ bin dɔn rid na Mozis in buk, insay di stori bɔt di chukchuk tik, we Gɔd tɛl Mozis se: ‘Mi na Ebraam in Gɔd, Ayzak in Gɔd, ɛn Jekɔp in Gɔd’?” (Mak 12:​18, 26) Pan ɔl we di Sadyusi dɛn bin dɔn rid da say de bɔku tɛm, Jizɔs in kwɛstyɔn bin sho se dɛn nɔ bin pe atɛnshɔn pan wan impɔtant trut we di Baybul de tich, dat na di tichin fɔ se pipul dɛn go gɛt layf bak.—Mak 12:​27; Lyuk 20:​38. d

10. Wetin wi fɔ pe atɛnshɔn to we wi de rid?

¹⁰ Wetin na di lɛsin fɔ wi? We wi de rid, wi want fɔ pe atɛnshɔn to ɔl di tin dɛn we wan vas ɔ wan Baybul stori go tich wi. Wi nɔ jɔs want fɔ ɔndastand simpul tin dɛn, bɔt wi want fɔ ɔndastand bak dip tin dɛn ɛn prinsipul dɛn we valyu. Dɛn tan lɛk valyu tin we ayd bikɔs dɛn nɔ izi fɔ si.

11. Akɔdin to wetin de na 2 Timoti 3:​16, 17, aw yu go fɛn valyu tin dɛn na di Baybul?

¹¹ Aw yu go fɛn valyu tin dɛn we yu de rid di Baybul? Tink bɔt wetin 2 Timoti 3:​16, 17 se. (Rid.) Notis se “ɔl di Skripchɔ dɛn . . . gud” fɔ (1) tich, (2) kɔrɛkt pɔsin, (3) sɛtul tin dɛn di rayt we, ɛn (4) tren pɔsin. Yu go ebul fɔ gɛt dɛn 4 bɛnifit dɛn de ivin frɔm Baybul buk dɛn we yu nɔ de rid ɔltɛm. Tek tɛm rid di stori fɔ si wetin i de tich yu bɔt Jiova, bɔt wetin i want fɔ du, ɔ bɔt prinsipul dɛn we gri wit wetin Gɔd want. Tink bɔt aw i go ɛp fɔ kɔrɛkt pɔsin. Du dis bay we yu de notis aw di vas dɛn go ɛp yu fɔ no ɛn fɔ avɔyd ɛnitin we bad ɔ abit we bad ɛn fɔ kɔntinyu fɔ fetful to Jiova. Tray fɔ si aw yu go yuz di say we yu dɔn rid fɔ sɛtul tin dɛn di rayt we, ɔ fɔ kɔrɛkt di rɔng we aw pɔsin de tink, sɔntɛm sɔntin we pɔsin tɔk bɔt na fil savis. Ɛn luk fɔ ɛnitin na di vas dɛn we go tren yu fɔ tink di we aw Jiova de tink. We yu kɔntinyu fɔ tink bɔt dɛn 4 bɛnifit  dɛn ya, yu go fɛn valyu tin dɛn we go ɛp yu fɔ bɛnifit mɔ frɔm yu Baybul ridin.

12. Wetin mek Jizɔs aks di Faresi dɛn di kwɛstyɔn we se: “Una nɔ rid?”

¹² Jizɔs bin aks bak di kwɛstyɔn we se: “Una nɔ rid?” fɔ sho se di Faresi dɛn bin de tink di rɔng we bɔt di Skripchɔ dɛn. (Mat. 12:​1-7) e Da tɛm de, di Faresi dɛn bin de tɔk se Jizɔs in disaypul dɛn dɔn brok di lɔ bɔt di Sabat. Fɔ ansa dɛn, Jizɔs bin tɔk bɔt tu ɛgzampul dɛn na di Baybul ɛn kot wan vas frɔm Osia fɔ sho se di Faresi dɛn nɔ ɔndastand wetin mek Gɔd mek di Sabat lɔ, ɛn dɛn nɔ bin sho sɔri-at. Wetin mek di rid we dɛn man dɛn ya bin de rid Gɔd in Wɔd nɔ bin shep dɛn? Na bikɔs dɛn bin de rid fɔ fɛn fɔlt pan pipul dɛn ɛn dɛn bin prawd. Dis bin mek dɛn nɔ ebul fɔ ɔndastand wetin dɛn de rid.—Mat. 23:​23; Jɔn 5:​39, 40.

13. Us we wi fɔ tink we wi de rid di Baybul? Wetin mek?

¹³ Wi lan frɔm Jizɔs in wɔd dɛn se wi nid fɔ tink di rayt we we wi de rid di Baybul. Wi nɔ fɔ bi lɛk di Faresi dɛn, wi fɔ put wisɛf dɔŋ ɛn rɛdi fɔ lan. Wi nid fɔ “put [wisɛf] dɔŋ ɛn alaw Gɔd fɔ plant in wɔd insay [wi].” (Jems 1:​21) If wi na pɔsin we de put wisɛf dɔŋ, wi go alaw Gɔd in Wɔd fɔ go dip insay wi at. Di Baybul in lɛsin dɛn bɔt fɔ sho sɔri-at ɛn lɔv go shep wi if wi avɔyd fɔ de fɛn fɔlt pan pipul dɛn ɔ fɔ bi pɔsin we prawd we wi de rid di Baybul.

14. Aw wi go no if wi de alaw di Baybul fɔ shep wi? (Luk bak di pikchɔ dɛn.)

¹⁴ Di we aw wi de trit ɔda pipul dɛn go sho if wi de alaw Gɔd in Wɔd fɔ shep wi.  Bikɔs di Faresi dɛn nɔ bin de alaw Gɔd in Wɔd fɔ chenj di we aw dɛn bin de tink, dɛn bin “kɔndɛm di wan dɛn we nɔ du ɛnitin bad.” (Mat. 12:​7) Semweso, di we aw wi de tink bɔt ɔda pipul dɛn ɛn di we aw wi de trit dɛn de sho if wi de alaw Gɔd in Wɔd fɔ shep wi. Fɔ ɛgzampul, wi kin tɔk bɔt di gud tin dɛn we wi de si ɔda pipul dɛn de du ɔltɛm, ɔ wi kin kwik fɔ tɔk bɔt dɛn mistek dɛn? Wi kin sho sɔri-at ɛn rɛdi fɔ fɔgiv ɔda pipul dɛn ɔ wi kin fɛn fɔlt pan ɔda pipul dɛn ɛn kip grɔj? Wi ansa to dɛn kwɛstyɔn dɛn ya go sho if wi de alaw wetin wi de rid fɔ shep di we aw wi de tink, aw wi de fil, ɛn di tin dɛn we wi de du.—1 Tim. 4:​12, 15; Ibru. 4:​12.

15. Aw Jizɔs bin fil bɔt di Oli Skripchɔ dɛn?

¹⁵ Jizɔs bin lɛk di Oli Skripchɔ dɛn, ɛn na Sam 40:​8, di Baybul tɔk bɔt aw i bin de fil. Da skripchɔ de se: “A de ɛnjɔy fɔ du wetin yu want, a de kip yu lɔ na mi at.” Bikɔs Jizɔs bin lɛk di Skripchɔ dɛn, i bin gɛt gladi-at, ɛn i bin kɔntinyu fɔ sav Jiova. Wisɛf go gɛt gladi-at ɛn kɔntinyu fɔ sav Jiova if wi tray tranga wan fɔ alaw Gɔd in Wɔd fɔ go insay wi at.—Sam 1:​1-3.

16. Wetin yu go du fɔ mek yu go bɛnifit mɔ ɛn mɔ frɔm yu Baybul ridin? (Rid di bɔks we gɛt di taytul “ Di Tin dɛn we Jizɔs Tɔk Go Ɛp Yu fɔ Ɔndastand Wetin Yu De Rid.”)

¹⁶ Fɔ du tin we gri wit wetin Jizɔs se ɛn in ɛgzampul, lɛ wi de tray fɔ du mɔ pan wi Baybul ridin. Wi go ebul du mɔ fɔ ɔndastand wetin wi de rid na di Baybul bay we wi de pre, rid slo wan, aks kwɛstyɔn dɛn, ɛn tek shɔt not dɛn. Wi go ebul fɔ tek tɛm tink fɔ ɔndastand bay we wi yuz wi pɔblikeshɔn dɛn fɔ stɔdi wetin wi rid na di Baybul. Wi go lan fɔ yuz di Baybul gud gud wan, ivin sɔm say dɛn we wi nɔ tu ɔndastand, bay we wi de luk fɔ valyu tin dɛn na dɛn akawnt dɛn de. Ɛn wi go alaw Gɔd in Wɔd fɔ shep wi bay we wi kɔntinyu fɔ tink di rayt we we wi de rid. We wi tray fɔ du dɛn tin dɛn ya, wi go bɛnifit mɔ frɔm wi Baybul ridin ɛn kam nia Jiova mɔ ɛn mɔ.—Sam 119:​17, 18; Jems 4:​8.