1. Liꞈ hpu lehˬ Yeˍsuˆ awˬ pon a yeˇ uiˍ jaˇ ve tehꞈ hkʼaˬ hkʼe hpeuꞈ maw laˇ ve le?

 Yeˍsuˆ maˍ ve htaꞈ ngaˬ hui gʼa mui na ve kʼo, hkʼaˬ hkʼe hpehꞈ tuˬ ve le? Dawˇ nyi sheˍ. Yeˍsuˆ lehˬ Liꞈ hpu hkʼaw hkʼa dehꞈ tawnˇ gʼa leh laiˉ pawˆ kʼoˆ ve yoˬ. Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ yawˇ tawˇ yaw ve awˉ lawˉ teˇ hkawˇ Liꞈ hpu hkʼaw bvuhꞈ taˍ leh yawˇ suh la yoˬ te htaˇ tawˇ awˬ leh meuˇ teˇ hkawˇ yaw ve kaꞈ Liꞈ hpu hkʼaw bvuhꞈ taˍ ve yoˬ. Chi lehˬ yawˇ Liꞈ hpu hkʼaw ve awˬ ceuˬ htaꞈ kʼoˆ ve yoˬ. b (Bon maˍ ve 8:3; Chiˇ mvuh ve 31:5; Luˉkaꞈ 4:4; 23:46) Yeˍsuˆ miˬ guiˬ hkʼoˆ Gʼuiˬ sha ve kanˉ te ve 3 hkʼawꞈ hpaˆ ve awˬ yanˇ htaˇ, yawˇ chaw yaˇ htaꞈ Liꞈ hpu hkʼaw ve awˬ lawn gʼaw leh kʼoˆ maˍ piˇ ve yoˬ.—Maꞈhtehˍ 5:17, 18, 21, 22, 27, 28; Luˉkaꞈ 4:16-20.

2. Yeˍsuˆ uiˍ la htaˇ yawˇ Liꞈ hpu hkʼaw ve awˬ lawn htaꞈ hkʼa dehꞈ na gʼa tuˬ aˬ htoꞈ ma ga piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

² Yeˍsuˆ Gʼuiˬ sha ve kanˉ maˇ te sheˍ laiˉ hkʼawꞈ htaˇ, yawˇ hkʼaˬ htaˆ kaꞈ Liꞈ hpu gʼaw leh dawˇ nyi ve yoˬ. Yawˇ Yoˇsehꞈ leh Maˍriˆ geh chehˇ ve awˬ yanˇ htaˇ, hkʼaˬ htaˆ kaꞈ tawˇ yaw daꞈ leh Liꞈ hpu hkʼaw ve awˬ lawn yaˇ htaꞈ kʼoˆ maˍ piˇ ve yoˬ. c (Bon maˍ ve 6:6, 7) Yeˍsuˆ yawˇ ve awˬ pa awˬ e geh teˇ geh teˇ shinˉ le le shinˉ nyi htaˇ, Yuˇdaꞈ chaw ve hpawnˬ daꞈ kuiˬ lo kʼai ve tehꞈ ngaˬ hui yonˍ gʼa ve yoˬ. (Luˉkaꞈ 4:16) Yawˇ oˇ kaˬ lo chehˇ htaˇ Liꞈ hpu gʼaw ve htaꞈ hkʼa dehꞈ na taˍ ve yoˬ. Peuˬ hkʼawꞈ nawˉ Yeˍsuˆ daꞈ kehˬ ve liꞈ hkʼaw yawˇ hkʼaˇ yawˇ gʼaw ve yoˬ. Hkʼe te leh, yawˇ Liꞈ hpu hkʼaw ceh tiˉ shiˍ ve maˇ heˆ. Liꞈ hpu htaꞈ kaꞈ haꞈ jaˇ ve yoˬ. Leh Liꞈ hpu hkʼaw maˍ ve awˬ ceuˬ yawˇ a shaꞈ teꞈ kuiˬ hkʼaw kaꞈ yuˬ yehˇ ve yoˬ. Tawˇ pa haˉ te kʼo, Yeˍsuˆ 12 hkʼawꞈ htaˇ bon yehˬ lonˉ hkʼaw kʼai ve, bon awˬ hoˉ teˇ hpaˍ Moˉseˍ ve awˬ  liˇ tawˇ hkawˇ htaꞈ hkʼa dehꞈ shiˍ ve kaꞈ “Yeˍsuˆ dawˇ shiˍ puiˉ ve htaꞈ maˇ kʼoˆ, yawˇ yaw hkʼawꞈ ve teˇ hpaˍ htaꞈ maˇ kʼoˆ, anˇ jaˇ ve” tehꞈ ngaˬ hui dawˇ nyi sheˍ.—Luˉkaꞈ 2:46, 47, 52.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Ngaˬ hui Liꞈ hpu hkʼaˬ htaˆ kaꞈ gʼaw htaˇ Liꞈ hpu hkʼaw ve awˬ lawn htaꞈ shiˍ gʼa leh haꞈ gʼa ve yoˬ. Yaꞈ hkʼaˇ, ngaˬ hui Liꞈ hpu gʼaw ve htaꞈ awˬ bon maˇ maˇ gʼa tuˬ hkʼaˬ hkʼe te gʼa ve le? Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, Moˉseˍ ve awˬ liˇ tawˇ hkawˇ hkʼa dehꞈ shiˍ ve chaw geh yawˇ tawˇ yaw daꞈ ve yoˬ. Tawˇ pa haˉ te kʼo, liꞈ bvuhꞈ paˍ hui, Hpaˍriˍsehˇ, leh Saˍduˆkehˇ, Yeˍsuˆ yawˇ hui htaꞈ yaw piˇ ve awˬ ceuˬ ngaˬ hui henˇ yuˬ gʼa ve yoˬ. Bon awˬ hoˉ chi teˇ hpaˍ lehˬ Liꞈ hpu teˇ hkui teˇ hkui gʼaw ve htawˇ yawˇ hui gʼaw taˍ ve awˬ ceuˬ htaꞈ awˬ bon hkʼa dehꞈ maˇ gʼa ve yoˬ. Yawˇ hui Liꞈ hpu gʼaw htaˇ awˬ bon maˇ gʼa ve 3 ceuˬ htaꞈ Yeˍsuˆ kʼoˆ taˍ ve yoˬ. Yeˍsuˆ yawˇ hui htaꞈ kʼoˆ piˇ ve tawˇ ngaˬ hui hkʼa dehꞈ te gʼa tuˬ ga laˇ gʼa ve 3 hkʼaˇ cawˬ ve yoˬ. Chi ve lehˬ (1) ngaˬ hui gʼaw taˍ ve htaꞈ hkʼa dehꞈ na gʼa ve, (2) gʼaw taˍ ve htaꞈ awˬ bon gʼa ve, leh (3) Liꞈ hpu ngaˬ hui ve dawˇ hkʼaˇ htaꞈ pa laˇ tcuh sheˍ.

4. Luˉkaꞈ liꞈ 10:25-29 hkʼaw ngaˬ hui Liꞈ hpu gʼaw ve awˬ lawn htaꞈ hkʼa dehꞈ na gʼa tuˬ hkʼaˬ hkʼe ga laˇ ve le?

⁴ Ngaˬ hui Liꞈ hpu gʼaw htaˇ aˬ htoꞈ ma htaꞈ kʼoˆ gaˇ ve hkʼa dehꞈ na gʼa gaˇ ve yoˬ. Chi hkʼe maˇ heˆ kʼo, ngaˬ hui awˬ bon hkʼa dehꞈ maˇ gʼa. Yeˍsuˆ Moˉseˍ ve “awˬ liˇ tawˇ hkawˇ shiˍ paˍ teˇ gʼaˇ” htaꞈ kʼoˆ piˇ ve dawˇ nyi sheˍ. (Luˉkaꞈ 10:25-29 gʼaw sheˍ.) Hawˉ hkʼaˆ oˇ ve teˇ gʼaˇ yawˇ co co taiˍ taiˍ ve a shaꞈ gʼa tuˬ hkʼaˬ hkʼe gʼa te cawˇ ve tehꞈ Yeˍsuˆ htaꞈ na nyi piˇ ve yoˬ. Yeˍsuˆ lehˬ hawˉ hkʼaˆ oˇ ve teˇ gʼaˇ Liꞈ hpu hkʼaw hkʼa dehꞈ na gʼa tuˬ ga piˇ leh yawˇ htaꞈ kʼoˆ piˇ ve, Moˉseˍ ve “awˬ liˇ tawˇ hkawˇ awˬ hkʼaw lo hkʼaˬ hkʼe bvuhꞈ taˍ ve le? Nawˬ gʼaw ve hkʼaˬ hkʼe shiˍ le?” Hawˉ hkʼaˆ oˇ ve teˇ gʼaˇ Liꞈ hpu hkʼaw Gʼuiˬ sha leh awˬ nu ve chaw htaꞈ gʼa haꞈ ve tehꞈ hkʼawꞈ piˇ ve yoˬ. (Oˉ kʼoˍ pui ve 19:18; Bon maˍ ve 6:5) Leh yawˇ kʼawꞈ kʼoˆ sheˍ ve, ‘ngaˬ gʼa haꞈ cawˇ ve a shu le?’ Yawˇ gʼaw ve awˬ ceuˬ tcuhˉ kuiˬ hkʼa dehꞈ maˇ na gʼa ve tehꞈ gʼa mawˬ ve yoˬ. Leh Liꞈ hpu awˬ tawn chi ve yawˇ ve a shaꞈ teꞈ kuiˬ hkʼaw hkʼaˬ hkʼe yuˬ yehˇ tuˬ kaꞈ maˇ shiˍ ve yoˬ.

5. Bon lawˬ leh Liꞈ hpu gʼaw htaˇ a yehˉ yehˉ gʼaw ve kʼo, ngaˬ hui hkʼa dehꞈ na gʼa tuˬ hkʼaˬ hkʼe ga laˇ gʼa ve le?

⁵ Liꞈ hpu ngaˬ hui hkʼaˬ htaˆ kaꞈ gʼaw ve kʼo, hkʼa dehꞈ na gʼa tuˬ yoˬ. Awˬ hawˉ lo ve awˬ ceuˬ nawˬ htaꞈ beˆ maˍ laˇ gʼa ve yoˬ. Liꞈ hpu maˇ gʼaw sheˍ htaˇ bon awˉ lawˉ lawˬ cawˇ ve yoˬ. Liꞈ hpu hkʼaw hkʼa dehꞈ na gʼa tuˬ Yaˬhoˉvaˬ ga laˇ tcuh cawˇ ve yoˬ. Ngaˬ hui Liꞈ hpu gʼaw htaˇ nyi ma gawˬ lehˍ cawˬ tuˬ Yaˬhoˉvaˬ ve daꞈ kehˬ ve awˬ ha hpu ga laˇ tuˬ lawˬ cawˇ ve yoˬ. Peuˬ hkʼawꞈ nawˉ a yehˉ yehˉ gʼaw ve yoˬ. Chi hkʼe te ve kʼo, nawˬ awˬ lawn awˬ tanˇ htaꞈ hkʼa dehꞈ na gʼa tuˬ ga laˇ ve yoˬ. Awˬ hkawˇ gʼaw tawˆ ve maˇ heˆ leh nawˬ Liꞈ hpu gʼaw htaˇ, Liꞈ hpu gʼaw keu taˍ ve awˬ hkawˇ htaꞈ kaꞈ na ve kʼo, awˬ bon gʼa jaˇ tuˬ yoˬ. Nawˬ liꞈ gʼaw htaˇ liꞈ mehˆ hkʼaˇ suh nyi leh, nawˬ tawnˇ gʼa htaˇ hkʼa gaˬ na taˍ ve kʼo, hkʼa dehꞈ na gʼa leh nawˬ Liꞈ hpu hkʼaw gʼaw ve awˬ ceuˬ teˇ hpaˍ awˬ bon gʼa tuˬ yoˬ. (Yawˇsuˆ 1:8) Nawˬ gʼaw peuˬ˗oˬ htaˇ Yaˬhoˉvaˬ nawˬ htaꞈ peꞈ laˇ ve daꞈ jaˇ ve laꞈ shawnˍ chi htaꞈ awˬ bon uiˍ jaˇ tehꞈ kʼoˆ piˇ tuˬ bon teˇ pawˆ kʼawꞈ lawˬ sheˍ. Leh nawˬ gʼaw taˍ ve awˬ ceuˬ a shaꞈ teꞈ kuiˬ hkʼaw yuˬ yehˇ tuˬ Gʼuiˬ sha ga laˇ tuˬ lawˬ sheˍ.

6. A shu yawˇ awˬ to htaꞈ na nyi leh Liꞈ hpu gʼaw htaˇ chi suhˉ˗ehˍ bvuhꞈ keu taˍ ve lehˬ awˬ bon hkʼaˬ hkʼe gʼa tuˬ le? (Awˬ han htaꞈ nyi sheˍ.)

⁶ Awˬ hkʼoˆ kaꞈ beˆ maˍ laˇ taˍ ve 2 hkʼaˇ cawˬ sheˍ ve lehˬ, nawˬ a shu yawˇ awˬ to htaꞈ na nyi sheˍ. Tawˇ pa haˉ te kʼo, gʼaw chehˇ ve awˬ lawn a shu htaꞈ caˉ daꞈ ve le? A shu yaw chehˇ ve leh a shu htaꞈ yaw piˇ chehˇ ve le? Aˬ htoꞈ ma te yawˇ chi hkʼe kʼoˆ ve le? Awˬ lawn chi ve hkʼaˬ kaˬ lo hpehꞈ ve leh hkʼaˬ htaˆ hpehꞈ ve le? Na hkawˇ chi ve teˇ hpaˍ lehˬ awˬ lawn oˇ ve a yeˇ uiˍ ve aˬ htoꞈ ma ve htaꞈ nawˬ shiˍ  tuˬ ga laˇ ve yoˬ. Nawˬ Liꞈ hpu hkʼaw hkʼa dehꞈ na gʼa tuˬ ga laˇ gʼa ve awˬ nu ve teˇ hkʼaˇ lehˬ nawˬ gʼaw htaˇ chi suhˉ˗ehˍ bvuhꞈ taˍ ve yoˬ. Chi suhˉ˗ehˍ bvuhꞈ taˍ ve, nawˬ dawˇ taˍ ve hkʼe bvuhꞈ tawˆ la ve, chi ve nawˬ gʼaw ve awˬ lawn htaꞈ hkʼa dehꞈ na gʼa tuˬ ga laˇ ve yoˬ. Bvuhꞈ taˍ ve awˬ ceuˬ nawˬ gʼaw ve htaꞈ hkʼa dehꞈ tawnˇ gʼa tuˬ ga laˇ ve yoˬ. Nawˬ chi suhˉ˗ehˍ bvuhꞈ keu taˍ ve lehˬ na hkawˇ leh hkʼawꞈ laˇ hkawˇ htaꞈ hpfuhˆ nyi gʼa tuˬ ga laˇ ve yoˬ. A yeˇ uiˍ ve awˬ ceuˬ htaꞈ kʼawꞈ dawˇ nyi ve, nawˬ yuˬ yehˇ tuˬ ve awˬ ceuˬ maˇ heˆ leh nawˬ gʼaw leh hkʼaˬ hkʼe dawˇ ve chi suhˉ˗ehˍ bvuhꞈ keu kaꞈ gʼa ve yoˬ. Chi suhˉ˗ehˍ bvuhꞈ keu ve chi hkʼe ve lehˬ Liꞈ hpu nawˬ awˬ pon bvuhꞈ taˍ ve tehꞈ shiˍ tuˬ ga laˇ ve yoˬ.

7. Ngaˬ hui Liꞈ hpu gʼaw chehˇ htaˇ gʼa cawˬ cawˇ ve teˇ ceuˬ lehˬ aˬ htoꞈ ma le? Leh aˬ htoꞈ ma pa taw le? (Maꞈhtehˍ 24:15)

⁷ Ngaˬ hui Liꞈ hpu hkʼaw hkʼa dehꞈ na gʼa tuˬ ga laˇ gʼa ve Yeˍsuˆ kʼoˆ ve teˇ ceuˬ lehˬ, hkʼa dehꞈ na gʼa tuˬ htaꞈ a yeˇ yuˬ ve yoˬ. (Maꞈhtehˍ 24:15 gʼaw sheˍ.) Yawˇ gʼaw chehˇ ve awˬ lawn hkʼaˬ hkʼe ve htaꞈ caˉ daꞈ ve leh hkʼaˬ hkʼe peun daꞈ ve yawˇ a yeˇ hkʼa dehꞈ yuˬ ve kʼo, shiˍ tuˬ yoˬ. Leh Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ ve awˬ lawn htaꞈ kaꞈ yawˇ mawˬ tuˬ yoˬ. Chi hkʼoˆ ka, Yeˍsuˆ kʼoˆ taˍ ve hkʼa shuˍ Liꞈ hpu hkʼaw tcuh kaˍ paˍ ve tawˇ hkawˇ teˇ lawn peuˬ teˇ lawn awˬ tehˬ hpehꞈ la ve htaꞈ ngaˬ hui na gʼa tuˬ a yeˇ gʼa yuˬ cawˇ ve yoˬ. Ngaˬ hui chi hkʼe te ve kʼo, Liꞈ hpu hkʼaw ngaˬ hui gʼaw taˍ ve awˬ ceuˬ hkʼa peu˗eˬ htaꞈ awˬ bon hkʼa dehꞈ gʼa tuˬ yoˬ.

8. Liꞈ hpu hkʼaw ngaˬ hui gʼaw taˍ ve awˬ ceuˬ htaꞈ hkʼa dehꞈ na gʼa tuˬ a yeˇ hkʼaˬ hkʼe gʼa te cawˇ ve le?

⁸ Yaˬhoˉvaˬ yawˇ ve kanˉ te ve chaw Liꞈ hpu hkʼaw hkʼa dehꞈ na gʼa tuˬ ga piˇ ve yoˬ. Chi htaꞈ pa taw, nawˬ hkʼa dehꞈ na gʼa tuˬ Yaˬhoˉvaˬ ga laˇ tuˬ bon lawˬ sheˍ. (Tawˇ naˉ ve 2:6) Nawˬ bon lawˬ taˍ ve hkʼe gʼaꞈ te gʼa tuˬ aˬ htoꞈ ma gʼa te cawˇ ve le? Nawˬ gʼaw taˍ ve awˬ ceuˬ htaꞈ hkʼa dehꞈ dawˇ nyi sheˍ. Chi nawˬ gʼaw taˍ ve awˬ ceuˬ htaꞈ hkʼaˬ hkʼe caˉ daꞈ ve dawˇ nyi sheˍ. Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ hkaw hpfuhˆ nyi sheˍ. Tawˇ pa haˉ te kʼo, Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ hkʼaw kaꞈ nyi sheˍ. Laꞈ caˉ chi ve hkʼaw nawˬ gʼaw chehˇ ve awˬ lawn tcuhˉ kuiˬ hkʼaˬ hkʼe kʼoˆ gaˇ ve htaꞈ nawˬ na gʼa tuˬ kaꞈ ga laˇ tuˬ yoˬ. Leh nawˬ  a shaꞈ teꞈ kuiˬ hkʼaw yuˬ yehˇ tuˬ kaꞈ ga laˇ tuˬ yoˬ. (Heˍbrehˇ 5:14) Nawˬ Liꞈ hpu gʼaw htaˇ hkʼa dehꞈ na gʼa tuˬ a yeˇ yuˬ sheˍ. Chi hkʼe te ve kʼo, nawˬ Liꞈ hpu hkʼaw hkʼa dehꞈ na gʼa tuˬ yoˬ.

9. Liꞈ hpu hkʼaw a yeˇ uiˍ ve awˬ tehˬ ve htaꞈ aˬ htoꞈ ma te Saˍduˆkehˇ hui a yeˇ maˇ yuˬ ve le?

⁹ Saˍduˆkehˇ hui lehˬ Heˍbrehˇ ve Liꞈ hpu awˉ lawˉ 5 puꞈ htaꞈ hkʼa dehꞈ shiˍ ve yoˬ. Yaꞈ hkʼaˇ, yawˇ hui lehˬ oˇ ve hkʼaw a yeˇ uiˍ ve laiˉ lawn htaꞈ a yeˇ maˇ yuˬ ve yoˬ. Tawˇ pa haˉ te kʼo, Saˍduˆkehˇ hui Yeˍsuˆ geh kʼawꞈ teꞈ tu la ve awˬ lawn ca na la htaˇ, Yeˍsuˆ hkʼaˬ hkʼe hkʼawꞈ piˇ ve teˇ geh nyi sheˍ. Yeˍsuˆ yawˇ hui htaꞈ kʼoˆ piˇ ve, “Moˉseˍ bvuhꞈ taˍ ve liꞈ awˬ hkʼaw lo nawˬ hui maˇ gʼaw jaw laˇ? Aˉ chuˇ buiˇ awˬ lawn bvuhꞈ taˍ ve teˇ tawn awˬ hkʼaw lo, ngaˬ lehˬ Aˍbraˍhanˍ ve Gʼuiˬ sha, Iˉcaˆ ve Gʼuiˬ sha leh Yaˍkoˆ ve Gʼuiˬ sha hpehꞈ ve yoˬ.” (Maˍkuˆ 12:18, 26) Saˍduˆkehˇ hui lehˬ Liꞈ hpu awˬ tawn chi ve teˇ hpaˍ htaꞈ laiˉ pawˆ gʼaw˗oˬ ve htawˇ, yawˇ hui lehˬ Liꞈ hpu hkʼaw awˬ tehˬ ve awˬ lawn a yeˇ uiˍ ve htaꞈ a yeˇ maˇ te ve tehꞈ Yeˍsuˆ ve tawˇ hkawˇ hpeuꞈ maw laˇ ve yoˬ. Chi ve lehˬ kʼawꞈ teꞈ tu la ve awˬ lawn hpehꞈ ve yoˬ.—Maˍkuˆ 12:27; Luˉkaꞈ 20:38. d

10. Liꞈ hpu gʼaw htaˇ ngaˬ hui aˬ htoꞈ ma htaꞈ a yeˇ te cawˇ ve le?

¹⁰ Ngaˬ hui htaꞈ aˬ htoꞈ ma maˍ laˇ ve le? Ngaˬ hui Liꞈ hpu gʼaw htaˇ Liꞈ hpu awˬ tawn oˇ ve maˇ heˆ leh Liꞈ hpu hkʼaw ve awˬ lawn ngaˬ hui htaꞈ aˬ htoꞈ ma maˍ laˇ ve htaꞈ nyi sheˍ. Ngaˬ hui shiˍ taˍ ve awˬ ceuˬ htaꞈ na gʼa ve ceh maˇ heˆ. Yaꞈ hkʼaˇ, mawˇ faˉ taˍ ve, awˬ tehˬ ve leh awˬ liˇ hkʼaˇ htaꞈ ngaˬ hui gʼa ca hpfuhˆ ve yoˬ.

11. 2 Tiˆmoˉseˍ liꞈ 3:16, 17 hkʼaw Liꞈ hpu hkʼaw awˬ tehˬ ve cuˇ yiˍ awˬ hpfuhˇ hkʼaˆ jaˇ ve htaꞈ nawˬ hkʼaˬ hkʼe te ca gʼa tuˬ le?

¹¹ Nawˬ Liꞈ hpu gʼaw htaˇ Liꞈ hpu hkʼaw awˬ hpfuhˇ hkʼaˆ ve cuˇ yiˍ htaꞈ hkʼaˬ hkʼe te ca gʼa tuˬ le? 2 Tiˆmoˉseˍ liꞈ 3:16, 17 gʼaw sheˍ. Liꞈ hpu awˬ tawn chi ve hkʼaw kʼoˆ ve, Liꞈ hpu hkʼa peu˗eˬ lehˬ (1) maˍ piˇ tuˬ, (2) venˇ baˆ hpeuꞈ maˍ piˇ tuˬ, (3) kʼawꞈ daꞈ la piˇ tuˬ, leh (4) hteˇ ve cawˇ ve htaꞈ te tuˬ maˍ piˇ tuˬ, “awˬ bon cawˬ ve yoˬ.” Liꞈ hpu hkʼaw ve liꞈ daw teˇ daw daw htaꞈ nawˬ hkʼa dehꞈ maˇ gʼaw ve htawˇ, Liꞈ hpu hkʼaw chi ve 4 ceuˬ nawˬ awˬ pon awˬ bon gʼa tuˬ yoˬ. Nawˬ gʼaw ve awˬ lawn Yaˬhoˉvaˬ htaꞈ caˉ daꞈ ve, yawˇ ve a loˍ htaꞈ caˉ daꞈ ve, leh Liꞈ hpu hkʼaw ve awˬ liˇ awˬ hkʼaˇ htaꞈ caˉ daꞈ ve aˬ htoꞈ ma maˍ laˇ ve dawˇ nyi sheˍ. Liꞈ hpu hkʼaw awˬ tawn oˇ ve leh awˬ lawn oˇ ve venˇ baˆ hkʼaˬ hkʼe hpeuꞈ maˍ laˇ ve htaꞈ dawˇ nyi sheˍ. Chi hkʼe te htaˇ nawˬ ve te hkʼaˇ dawˇ hkʼaˇ maˇ daꞈ ve aˬ htoꞈ ma cawˬ ve htaꞈ mawˬ tuˬ ga laˇ ve yoˬ. Leh nawˬ Yaˬhoˉvaˬ geh hkʼaˬ htaˆ kaꞈ ka tiꞈ yeˬ tuˬ kaꞈ ga laˇ ve yoˬ. Chi hkʼoˆ kaꞈ, awˬ lawn oˇ ve nawˬ htaꞈ kʼawꞈ daꞈ la piˇ tuˬ hkʼaˬ hkʼe ga laˇ ve htaꞈ dawˇ nyi sheˍ. Tawˇ pa haˉ te kʼo, nawˬ hto toˇ kuiˬ lo shu maˇ na gaˇ ve, maˇ heˆ leh maˍ yaꞈ ve awˬ ceuˬ htaꞈ nawˬ hkʼawꞈ piˇ gʼa tuˬ kaꞈ ga laˇ ve yoˬ. Awˬ tawn oˇ ve teˇ hpaˍ nawˬ hteˇ ve cawˇ ve htaꞈ te tuˬ hkʼaˬ hkʼe maˍ laˇ ve leh nawˬ Yaˬhoˉvaˬ dawˇ ve hkʼe dawˇ tuˬ hkʼaˬ hkʼe ga laˇ ve htaꞈ kaꞈ nyi sheˍ. Nawˬ awˬ bon gʼa ve chi ve 4 ceuˬ htaꞈ hkʼa dehꞈ tawnˇ taˍ sheˍ. Nawˬ Liꞈ hpu gʼaw htaˇ awˬ hpfuhˇ hkʼaˆ jaˇ ve cuˇ yiˍ htaꞈ nawˬ gʼa tuˬ yoˬ.

12. “Nawˬ hui maˇ gʼa gʼaw jaw leh laˇ,” tehꞈ aˬ htoꞈ ma te Yeˍsuˆ Hpaˍriˍsehˇ hui htaꞈ na piˇ ve le?

¹² “Nawˬ hui maˇ gʼa gʼaw jaw leh laˇ,” tehꞈ Yeˍsuˆ Hpaˍriˍsehˇ hui htaꞈ na piˇ htaˇ, yawˇ hui Liꞈ hpu hkʼaw gʼaw ve awˬ ceuˬ htaꞈ maˇ cawˇ ve dawˇ hkʼaˇ cawˬ ve tehꞈ hpeuꞈ maw laˇ sheˍ ve yoˬ. (Maꞈhtehˍ 12:1-7) e Oˇ ve teˇ yanˇ, Yeˍsuˆ ve awˬ laꞈ gʼawˇ shinˉ nyi ve awˬ liˇ htaꞈ te yaꞈ ve tehꞈ Hpaˍriˍsehˇ hui kʼoˆ ve yoˬ. Yeˍsuˆ Liꞈ hpu hkʼaw ve 2 lawn htaꞈ cuˇ leh yawˇ hui htaꞈ hkʼawꞈ piˇ ve yoˬ. Hpaˍriˍsehˇ hui lehˬ shinˉ nyi ve awˬ lawn leh ha kʼaˉ puiˉ ve awˬ lawn htaꞈ maˇ na gʼa ve tehꞈ hpeuꞈ maw piˇ tuˬ Yeˍsuˆ Hawˇseˍ ve Liꞈ hpu awˬ tawn htaꞈ cuˇ leh kʼoˆ maˍ piˇ ve yoˬ. Aˬ htoꞈ ma te yawˇ hui Liꞈ hpu gʼaw peuˬ hkʼawꞈ nawˉ a shu yawˇ ve te hkʼaˇ dawˇ hkʼaˇ pa tuˬ maˇ yuˬ yehˇ ve le? Yawˇ hui uiˍ muiˬ caˆ muiˬ leh beˆ maˍ laˇ ve chi awˬ nu ve chaw awˬ pon hpehꞈ ve tehꞈ dawˇ ve pa taw, yawˇ hui awˬ pon hpehꞈ ve tehꞈ maˇ dawˇ. Chi ve htaꞈ pa taw, yawˇ hui Liꞈ hpu hkʼaw maˇ na gʼa ve yoˬ.—Maꞈhtehˍ 23:23; Yoˇhanˬ 5:39, 40.

13. Ngaˬ hui Liꞈ hpu gʼaw htaˇ hkʼaˬ hkʼe ve dawˇ hkʼaˇ cawˬ cawˇ ve le? Leh aˬ htoꞈ ma pa taw le?

¹³ Ngaˬ hui Liꞈ hpu gʼaw htaˇ cawˇ ve dawˇ hkʼaˇ gʼa cawˬ cawˇ ve tehꞈ Yeˍsuˆ ve tawˇ hkawˇ maˍ laˇ ve yoˬ. Ngaˬ hui Hpaˍriˍsehˇ hui hkʼe maˇ hpehꞈ gaˇ. Ngaˬ hui nyi ma nuˇ nehˬ leh gʼa henˇ ve yoˬ. Ngaˬ hui ‘Gʼuiˬ sha ve tawˇ hkawˇ htaꞈ nyi ma nuˇ nehˬ ve awˬ hkʼaw lo haꞈ yuˬ˗oꞈ.’ (Yaˍkoˆ 1:21) Ngaˬ hui nyi ma nuˇ nehˬ ve awˬ hkʼaw lo Gʼuiˬ sha ve tawˇ hkawˇ htaꞈ haꞈ yuˬ ve kʼo, Gʼuiˬ sha ve tawˇ hkawˇ chi ngaˬ hui ve te hkʼaˇ dawˇ hkʼaˇ htaꞈ pa laˇ gʼa ve yoˬ. Liꞈ hpu hkʼaw ha kʼaˉ puiˉ ve, haꞈ pehnˇ ve awˬ lawn, leh ngaˬ hui henˇ ve hkʼe a shu yawˇ ve te hkʼaˇ dawˇ hkʼaˇ htaꞈ pa tcuh sheˍ. Ngaˬ hui uiˍ muiˬ caˆ muiˬ ve maˇ cawˬ leh Liꞈ hpu hkʼaw maˍ laˇ ve awˬ ceuˬ awˬ nu ve chaw awˬ pon hpehꞈ ve tehꞈ maˇ dawˇ nyi cawˇ.

14. Liꞈ hpu hkʼaw maˍ laˇ ve tawˇ hkawˇ ngaˬ hui ve te hkʼaˇ dawˇ hkʼaˇ htaꞈ pa tcuh ve tehꞈ hkʼaˬ hkʼe te shiˍ gʼa tuˬ le? (Awˬ han htaꞈ nyi sheˍ.)

 ¹⁴ Ngaˬ hui awˬ nu ve chaw htaꞈ te piˇ ve awˬ hkʼaˇ kaꞈ Liꞈ hpu hkʼaw maˍ laˇ ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ pa tcuh ve tehꞈ hpeuꞈ maw laˇ ve yoˬ. Hpaˍriˍsehˇ hui lehˬ Liꞈ hpu hkʼaw maˍ laˇ ve awˬ ceuˬ yawˇ hui ve te hkʼaˇ dawˇ hkʼaˇ htaꞈ maˇ pa tcuh ve pa taw, ‘venˇ baˆ maˇ cawˬ ve chaw hui htaꞈ venˇ baˆ taˍ ve yoˬ.’ (Maꞈhtehˍ 12:7) Chi ve hkʼa shuˍ shuˍ, ngaˬ hui shu htaꞈ nyi ve awˬ hkʼaˇ leh shu htaꞈ te piˇ ve awˬ hkʼaˇ, Liꞈ hpu hkʼaw maˍ laˇ ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ pa tcuh˗aw laˇ tehꞈ mawˬ tuˬ te laˇ ve yoˬ. Tawˇ pa haˉ te kʼo, ngaˬ hui shu htaꞈ daꞈ ve hpawˇ nyi ve, maˇ heˆ leh shu yaꞈ kuiˬ htaꞈ nyi ve laˇ? Ngaˬ hui ha kʼaˉ puiˉ ve chaw hpehꞈ leh venˇ baˆ hpehˇ piˇ˗aw laˇ? Maˇ heˆ leh shu ve awˬ lawn kʼoˆ leh beuꞈ chehˇ sheˍ ve laˇ? Ngaˬ hui gʼaw ve awˬ ceuˬ ngaˬ hui ve te hkʼaˇ dawˇ hkʼaˇ htaꞈ heuˆ la kuiˬ cawˬ˗aw laˇ tehꞈ a shu yawˇ awˬ to htaꞈ chaˬ nyi sheˍ.—1 Tiˆmoˉseˍ 4:12, 15; Heˍbrehˇ 4:12.

15. Yeˍsuˆ Liꞈ hpu htaꞈ hkʼaˬ hkʼe dawˇ ve le?

¹⁵ Yeˍsuˆ Liꞈ hpu htaꞈ haꞈ jaˇ. Yawˇ ve te hkʼaˇ dawˇ hkʼaˇ Chiˇ mvuh ve liꞈ 40:8 hkʼaw tcuh kaˍ paˍ ve tawˇ hkawˇ htaꞈ shuˍ daꞈ jaˇ ve yoˬ. Oˇ kaˬ lo kʼoˆ ve, “ngaˬ ve Gʼuiˬ sha˗oˬ, nawˬ ve a loˍ htaꞈ ngaˬ te gaˇ ve yoˬ. Nawˬ maˍ laˇ ve awˬ ceuˬ teˇ hpaˍ htaꞈ ngaˬ nyi ma awˬ hkʼaw lo haꞈ shaˉ taˍ ve yoˬ.” Chi ve lehˬ Yeˍsuˆ ha lehˬ tuˬ te piˇ leh yawˇ Yaˬhoˉvaˬ ve kanˉ caˉ leh te gʼa ve yoˬ. Ngaˬ hui Liꞈ hpu gʼaw leh Liꞈ hpu htaꞈ haꞈ ve kʼo, Yeˍsuˆ hkʼa shuˍ ngaˬ hui ha lehˬ ve cawˬ leh Yaˬhoˉvaˬ ve kanˉ caˉ leh te gʼa ve yoˬ.—Chiˇ mvuh ve 1:1-3.

16. Nawˬ Liꞈ hpu gʼaw htaˇ awˬ bon hkʼa dehꞈ gʼa tuˬ coˇ caˇ leh aˬ htoꞈ ma te cawˇ ve le? (Awˇ ceˍ awˇ fa “ Yeˍsuˆ ve tawˇ hkawˇ nawˬ gʼaw ve awˬ lawn htaꞈ na gʼa tuˬ ga laˇ ve” hkʼaw nyi sheˍ.)

¹⁶ Yeˍsuˆ ve tawˇ hkawˇ leh yawˇ ve awˬ lawn ngaˬ hui gʼa henˇ˗oˬ ve hkʼe, Liꞈ hpu gʼaw ve awˬ hkʼaˇ ngaˬ hui caˉ leh cheuˬ la tuˬ te gaˇ ve yoˬ. Ngaˬ hui Liꞈ hpu hkʼaw hkʼa dehꞈ na gʼa tuˬ, bon lawˬ ve, a yehˉ yehˉ gʼaw ve, na hkawˇ teh ve, liꞈ chi suhˉ˗ehˍ bvuhꞈ tawˆ taˍ ve kʼo, ngaˬ hui Liꞈ hpu hkʼaw hkʼa dehꞈ na gʼa tuˬ gʼaw taˍ ve awˬ ceuˬ htaꞈ hkʼa dehꞈ chaˬ nyi leh Gʼuiˬ sha ve kanˉ hkʼaˇ hkʼaw ve liꞈ kʼoˆ htaꞈ kaꞈ hpfuhˆ nyi ve yoˬ. Ngaˬ hui chi hkʼe te ve kʼo, Liꞈ hpu hkʼaw ngaˬ hui hkʼa dehꞈ maˇ gʼaw ve teˇ tawn htaꞈ kaꞈ awˬ bon gʼa tuˬ yoˬ. Liꞈ hpu hkʼaw awˬ hpfuhˇ hkʼaˆ ve awˬ ceuˬ ngaˬ hui gʼaw ve awˬ lawn htaꞈ hpfuhˆ nyi ve kʼo, awˬ bon gʼa tuˬ yoˬ. Liꞈ hpu ngaˬ hui ve te hkʼaˇ dawˇ hkʼaˇ htaꞈ pa tcuh tuˬ ngaˬ hui gʼaw htaˇ cawˇ ve dawˇ hkʼaˇ gʼa cawˬ ve yoˬ. Beˆ maˍ laˇ ve chi hkʼa peu˗eˬ htaꞈ ngaˬ hui gʼaꞈ te ve kʼo, Liꞈ hpu gʼaw htaˇ ngaˬ hui awˬ bon gʼa jaˇ leh Yaˬhoˉvaˬ geh leuˉ leh kʼawꞈ meuˆ daꞈ tuˬ yoˬ.—Chiˇ mvuh ve 119:17, 18; Yaˍkoˆ 4:8.