1. ¿Jesusca imata rurashpataj Bibliata valorashcataca ricuchirca?

 JESÚS yachachishcacunata uyanaca alajami cashcanga. Paica huaquin versocunata de memoriami nij carca. Por ejemplo, pai bautizarishca huashallapish, pai ñalla huañugricushpapish Bibliamanta huaquin versocunatami de memoria nirca b (Deuteronomio 8:3; Salmo 31:5; Lucas 4:4; 23:46). Shinallataj quimsa huatacuna chaupita gentecunaman yachachicushpami Bibliata liyishpa, huaquin versocunata de memoria repitishpa alli intindichij carca (Mateo 5:17, 18, 21, 22, 27, 28; Lucas 4:16-20).

2. ¿Jesusca Yayitu Diospaj Shimita alli intindingapajca imatataj rurarca? (Página unopi tiyaj dibujomanta parlapai).

² Jesusca jovenmantapachami Bibliata liyina costumbreta charirca. Bibliamanta parlajcunatapish, Bibliata liyijcunatapish allimi uyaj carca. De seguromi Jesusca Mariatapish, Josetapish huasipi Bibliamanta parlacujpica alli uyashcanga c (Deuteronomio 6:6, 7). Tucui sabadocuna paipaj familiahuan Diosta adorana huasiman rishpapish Bibliamanta liyishcataca allimi uyaj carca (Lucas 4:16). Tiempohuancarin Jesusca shujtajcuna ima nishcacunallahuanca mana conformarircachu, ashtahuanpish paillatajmi Bibliataca liyirca. Chaimantami Jesusca Diospaj consejocunataca paipaj causaipi pajtachirca, Diospaj Shimitapish tucui shunguhuanmi cꞌuyarca. Por ejemplo, Jesusca 12 huatacunallata  charishpami temploman rirca. Chaipica Moisespaj Leyta yachaj religionta pushajcunami carcacuna. Paicunaca Jesús Bibliamanta allita yachashcata ricushpa, paicunapaj tapushcacunata cutichijta ricushpaca achcatami mancharircacuna (Lucas 2:46, 47, 52).

3. ¿Cai yachaipica imallatataj ricushun?

³ Bibliata punllanta liyishpaca chaipi nishcacunatami alli rijsi tucunchij, cꞌuyai tucunchij. Pero ¿Bibliapaj nishcacunamanta beneficiaringapajca imatataj rurana canchij? Chaipajca Jesús, escribacunata, fariseocunata, saduceocunata, ima nishcata ricushun. Cai religionta pushajcunaca Bibliata liyina costumbretami charircacuna. Shinapish Bibliapaj cosejocunamantaca mana beneficiarircacunachu. Chaimi Jesusca paicuna beneficiarichun imata rurana cashcata yachachirca. Jesuspaj consejocunaca ñucanchijtapishmi ayudai tucun. Chaimantami ñucanchijcunapish 1) Bibliapaj nishcacunata alli intindina canchij, 2) valishca yuyaicunata tarina canchij, 3) Bibliapaj nishcacuna ñucanchij shunguman chayachunpish saquina canchij.

4. Lucas 10:25 al 29-pi nishca shinaca ¿Bibliapi nishcacunata intindinaca imamantataj valishca can?

⁴ Bibliata liyicushpaca chaipi ima nishcatami alli intindina canchij. Chaita mana rurashpaca Bibliapaj nishcacunamantaca mana beneficiarishunchu. Moisespaj Leyta yachachij shuj runa Jesushuan imata parlashcata ricushunchij (Lucas 10:25-29-ta liyipai). Chai runaca huiñai causaita charingapaj imata rurana cashcatami Jesusta tapurca. Chaimi Jesusca: “¿Moisesman cushca leypica imataj quillcashca tiyacun? ¿Chaipica imatataj liyishcangui?” nishpa tapurca. Chai runaca: “Yayitu Diostami cꞌuyana cani, shujtajcunatapishmi cꞌuyana cani” nishpami cutichirca (Levítico 19:18; Deuteronomio 6:5). Pero qꞌuipaca: “¿Pi shujtajcunatataj cꞌuyana cani?” nishpami tapurca. Cai shimicunahuanmi chai runaca Bibliapi imata liyishcata mana intindishcata ricuchirca. Chaimantami paica Bibliapi nishcacunataca mana pajtachi tucurca.

5. ¿Bibliata liyishpa alli intindingapajca imatataj rurana canchij?

⁵ ¿Diospaj Shimita alli intindingapajca imatataj rurana canchij? Puntapica, Bibliata manaraj liyishpami Yayitu Diosta mañana canchij. Chaita rurajpica Yayitu Diosllatajmi paipaj espíritu santota cushpa alli concentrarichun ayudanga. Ishquipica, Bibliataca mana apuradochu liyina canchij. Chaipaj randica tucuita alli intindingapajmi allimanta liyina canchij. Chaipajca Bibliata voz altapi liyina, mana cashpaca Bibliapaj audiocunata uyanami ayudanga. Caicunata rurashpaca Bibliapaj nishcacunataca ñucanchij yuyaipi, ñucanchij shungupimi huaquichishun (Josué 1:8). Shinallataj Bibliata liyishca huashaca Yayitu Diostami paipaj Shimita cushcamanta pagui nina canchij. Chai liyishcacunata ñucanchij causaipi pajtachingapajpish ayudachunmi Yayitu Diosta mañana canchij.

6. ¿Bibliata alli intindingapajca imamantataj tapuicunata rurarina canchij? ¿Imamantataj notitacunatapish rurana canchij? (Fotomantapish parlapai).

⁶ ¿Bibliata alli intindingapajca ima ashtahuantaj rurana canchij? Ñucanchijcunaca ima liyishcacunamantami tapuicunata rurarina canchij. Por ejemplo: “¿Caipica picunamantataj parlacun? ¿Pitaj parlacun? ¿Cai yuyaicunataca picunamantaj nicun? ¿Imamantataj caicunataca nicun? ¿Caicunaca maipi, ima horastaj tucushca?” nishpami tapurina canchij. Caicunata tapurishpa, yuyaipi charishpaca  importante yuyaicunatami alli intindishun. Shinallataj uchilla notitacunatami rurana canchij. Chai notitacunapica ima yachashcatami ordenpi churashun. Chaita rurashpaca tucuitami jahualla intindishun, ñucanchij shungupipish huaquichishun. Pero ¿notitacunapica imallatataj churana canchij? Chaipica ñucanchij tapurishcacunata, ima investigashcata, valishca yuyaicunata, liyishcacunata ima shina ñucanchij causaipi pajtachinata o chai liyishcacunamanta imata sintishcatami churana canchij. Bibliata liyicushpa, caicunata rurashpaca Yayitu Dios ñucanchijhuan parlacuj shinami sintishun.

7. ¿Bibliapaj nishcacunamanta beneficiaringapajca ima shinataj cana canchij? (Mateo 24:15).

⁷ Jesusca “Bibliapaj consejocunamanta, nishcacunamanta beneficiaringapajca alli intindijcunami cana canguichij” nircami (Mateo 24:15-ta liyipai). Alli intindijcunaca ima yuyaicuna igual cashcata, ima yuyaicuna chꞌican cashcatami cuentata cuncuna. Ashtahuancarin sinchi yuyaicunatapishmi intindincuna. Chaimantami Bibliapaj profeciacuna ima shina pajtarishcata cuentata cungapajca alli intindijcuna cana canchij. Chashnami Bibliapaj nishcacunamanta beneficiarishpa catishun.

8. ¿Bibliata alli intindingapajca imatataj rurana canchij?

⁸ Jehová Diosca paita sirvijcunataca Bibliata alli intindichunmi ayudan. Chaimantami paita mañana canchij (Proverbios 2:6). Pero mañashpallaca mana saquirinachu canchij. Ashtahuanpish Bibliata liyicushpaca ima nisha nishcatami alli ricurana canchij. Imata yachashcahuan, imata yachacushcahuan chꞌimbapurashpapishmi alli intindina canchij. Chaita rurangapajca achca publicacioncunami tiyan. Por ejemplo, Testigo de Jehovacuna estudiachun nishcapimi investigana canchij. Chaita investigashpaca Bibliapi tiyaj yuyaicunatami alli intindishun (Hebreos 5:14). Chaicunata ñucanchij causaipi ima shina pajtachinatapishmi yachashun. Bibliata alli intindingapaj esforzarijpica  Yayitu Diosllatajmi chaicunata alli intindichun ayudanga.

9. ¿Saduceocunaca Bibliata liyishpapish imatataj mana intindircacuna?

⁹ Saduceocunaca Bibliapaj callari cinco librocunatami alli rijsijcuna carca. Chashna rijsishpapish chai librocunapaj valishca yachachishcacunapimi mana crircacuna. Por ejemplo, saduceocunaca Jesusta causarinamanta tapushpami pandachisha nircacuna. Chaimi Jesusca paicunataca: “¿Huañushcacuna causarinamantaca Moisés quillcashca libropica manachu liyishcanguichij? Diosca zarza yura chaupimantaca: ‘Ñucami Abrahanpaj, Isaacpaj, Jacobpaj Dios cani’ nircami” nishpa cutichirca (Marcos 12:18, 26). De seguromi saduceocunaca cai shimicunata achca cutincuna liyishca cangacuna. Chashnapish Jesús ricuchishca shinaca saduceocunaca causarinamantami mana intindishcacuna carca (Marcos 12:27; Lucas 20:38). d

10. ¿Bibliata liyicushpaca imata taringapajtaj esforzarina canchij?

¹⁰ ¿Saduceocunamantaca imatataj yachai tucunchij? Bibliata liyicushpaca shuj versomanta o chaipi tiyaj parlocunamanta tucuita intindingapajmi esforzarina canchij. Bibliapica huaquin yachachishcacunaca mana ricunallachu can. Pero chai yachachishcacuna valishca cashcamantami chaicunata taringapaj esforzarina canchij. Chai valishca yachachishcacunata tarishpaca shuj valishca curita tarishca shinami cushilla sintirishun.

11. 2 Timoteo 3:16 y 17-pi nishca shinaca ¿valishca yuyaicunata Bibliapi taringapajca imatataj rurana canchij?

¹¹ ¿Mana ricuipaj laya valishca yuyaicunata Bibliapi taringapajca imatataj rurana canchij? 2 Timoteo 3:16, 17-pi ima nishcata ricushunchij (Liyipai). Chaipica: ‘Dios quillcachishca shimica tucuimi yachachingapaj, sinchita cunangapaj, imatapish allichingapaj, allita rurana cashcata yachachingapajpish alli can’ ninmi. Bibliapaj mana tanto rijsishca librocunapishmi caicunata pajtachichun ayudan. ¿Caicunataca ima shinataj pajtachi tucunchij? Bibliata liyicushpaca Jehová Diosmanta, paipaj munaimantapish imata yachachishcatami alli ricurana canchij. Jehová Dios ñucanchijta cunachun saquingapajpishmi Bibliapi tiyaj valishca consejocunata mashcana canchij. Chai consejocunata ricushpaca imapi fallacushcata, ima mana alli munaicunata, ima mana alli ruraicunata saquina cashcatami yachashun. Shinallataj panda yuyaicunata allichingapajmi huaquin versocunata mashcana canchij. Por ejemplo, predicacionpi ima pandata nijcunaman ayudangapajca alli intindichij versocunatami mashcai tucunchij. Ashtahuancarin Jehová Dios shina yuyangapajmi huaquin versocunata mashcana canchij. Chashnami Jehová Dios allita ruranata  yachachichun saquishun. Caicunata pajtachishpaca curita tarij shinami Bibliapi valishca yuyaicunata tarishun.

12. ¿Jesusca fariseocuna ima shina cashcatataj ricuchirca?

¹² Fariseocunaca mana humildadhuan Bibliata liyijcunachu carca. Ashtahuanpish paicunaca criticashpallami pasajcuna carca (Mateo 12:1-7). e Shuj punllaca fariseocunaca Jesuspaj discipulocuna sábado punllapaj leyta mana caticushcatami nircacuna. Chaimi Jesusca “¿Davidhuan, sacerdotecunahuan ima tucushcata Bibliapi nachu liyishcanguichij?” nishpa tapurca. Oseas libropi tiyaj shuj versomantapishmi parlarca. Chashnami Jesusca fariseocuna Diospaj Leytapish mana intindishcata, shujtajcunatapish cꞌuyaita mana ricuchishcata intindichirca. Cai runacunaca jatun tucushcamantami Biblia ima nishcacunataca mana intindircacuna, paicunapaj causaipipish mana pajtachircacuna (Mateo 23:23; Juan 5:39, 40).

13. ¿Bibliataca imamantataj humildadhuan liyina canchij?

¹³ Fariseocuna shinaca ama cashunchij. Ashtahuanpish Jesús yachachishca shina humildadhuan Bibliata liyishunchij. Chashnami Yayitu Dios ñucanchijta yachachichun saquishun. Santiago 1:21-pi nishca shinaca, Diospaj Shimita ñucanchij shungupi sapiyachichunca humildadhuanmi chasquina canchij. Chaimantami Bibliata liyicushpaca mana jatun tucuna canchij. Shujtajcunapaj pandarishcacunapipish mana yuyanachu canchij. Chashna humildadta ricuchijpica Bibliapaj consejocunaca cꞌuyajcuna,  llaquijcuna, perdonajcuna cachunmi ayudanga.

14. ¿Biblia ñucanchijta ayudacushcata o mana ayudacushcata cuentata cungapajca imatataj ricurana canchij? (Fotomantapish parlapai).

¹⁴ Bibliapaj nishcacuna ñucanchij shunguman chayajpica shujtajcunataca allimi tratashun. Cutin fariseocunaca rumi shungucuna cashcamantami Bibliapaj nishcacunata mana chasquircacuna, shujtajcunatapish yangamantami juchachircacuna (Mateo 12:7). Chaimantami ñucanchijca shujtajcunata ima shina tratacushcata alli ricurana canchij. Chaipajca cashna nishpa tapurishunchij: “¿Shujtajcunapaj alli cualidadcunamanta parlanata yachanichu o paicunapaj pandarishcacunallatachu ricuni? ¿Shujtajcunata perdonangapaj, ama criticangapaj, ama pꞌiñarishpalla saquiringapajchu esforzarini?”. Cai tapuicunapi yuyashpaca Bibliapaj nishcacuna ñucanchij shungupi, yuyaipi huaquichicushcata o mana huaquichicushcatami cuentata cushun (1 Timoteo 4:12, 15; Hebreos 4:12).

15. ¿Salmo 40:8-pica Jesusmantaca imatataj yachachin?

¹⁵ Jesusca Diospaj Shimitaca achcatami cꞌuyarca. Chaimantami Salmo 40:8-pica: “Ñuca Dioslla, ñuca cushicunaca quiquinpaj munaita ruranami. Quiquin mandashcaca ñuca shungu ucupimari” ninmi. Ñucanchijpish Yayitu Diospaj Shimita liyingapaj esforzarishpa, chaipi tiyaj consejocunata cꞌuyangapaj esforzarishpaca Jesús shinallatajmi Yayitu Diostaca cushicuihuan sirvishpa catishun (Salmo 1:1-3).

16. ¿Bibliapaj nishcacunamanta beneficiaringapajca imatataj rurana canchij? (“ Jesuspaj consejocunaca Bibliata alli intindichunmi ayudan” nishca recuadrota ricui).

¹⁶ Jesuspaj nishcacunata yachashpa, paipaj ejemplota ricushpaca Bibliata alli estudiangapajmi esforzarisha ninchij. Bibliapi imata liyicushcata alli intindingapajca, puntapica Jehová Diostami mañana canchij, mana apuradoschu liyina canchij. Tapuicunata rurarishpa, uchilla notitacunata quillcashpapishmi estudiana canchij. Shinallataj ñucanchij publicacioncunapimi investigana canchij. Mana tanto rijsishca versocunata liyicushpapish valishca yachachishcacunata taringapajmi esforzarina canchij. Ashtahuancarin Bibliapaj nishcacunata pajtachingapajca humildadhuanmi liyina canchij. Caicunata rurashpaca Bibliapaj consejocunamantami beneficiarishun, Yayitu Diospajmanpishmi ashtahuan cꞌuchuyashun (Salmo 119:17, 18; Santiago 4:8).