1. Ne a mea e fakaasi mai me ne fakatāua ne Iesu te Tusi Tapu?

 FAKAATAATA aka māfai ko fakalogologo koe ki a Iesu e akoako. Ne siki mai faeloa ne ia a pati i te Tusi Tapu! E tonu, a pati muamua a Iesu kolā ne fakamau ki lalo mai tua o tena papatisoga, mo ana toe pati mai mua o mate, ne siki mai faeloa ne ia mai te Tusi Tapu. b (Teu. 8:3; Sala. 31:5; Luka 4:4; 23:46) Kae i te vasia o mea e lua konā, i loto i te tolu mo te āfa tausaga, ne faitau faeloa a Iesu i mua o tino kae siki mai ne ia a pati i te Tusi Tapu kae fakamatala atu ki a latou.—Mata. 5:17, 18, 21, 22, 27, 28; Luka 4:16-20.

2. I tena tupuakaga, ne a mea ne fesoasoani atu ki a Iesu ke iloa faka‵lei ne ia te Tusi Tapu? (Onoono ki te ata i te ‵kava.)

² I tausaga mai mua o kamata tena galuega talai, ne faitau kae fakalogologo faeloa a Iesu ki te Muna a te Atua. E mautinoa eiloa me ne lagona faeloa ne ia a Malia mo Iosefa e fakaaoga ne lāua a pati mai te Tusi Tapu i lā sau‵talaga i te kāiga i aso takitasi. c (Teu. 6:6, 7) E mautinoa i a tatou me ne ‵kau atu faeloa a Iesu mo tena kāiga ki te sunako i Sapati katoa. (Luka 4:16) I konā, ne fakalogologo faka‵lei eiloa a ia i te taimi ne faitau atu ei te Tusi Tapu. Fakamuli ifo, ne tauloto a Iesu ke faitau ne ia a Tusitusiga Tapu konā i a ia eiloa. Ona ko te mea tenā, ne iloa faka‵lei ne Iesu a te Tusi Tapu, ne fiafia ki ei, kae ne fakafetaui aka ne ia ana faifaiga mo tusitusiga konā. Pelā me se fakaakoakoga,  mafaufau ki te mea ne tupu i te faletapu i te taimi ko 12 fua i ei a tausaga o Iesu. A faiakoga kolā ne ‵poto i te Tulafono faka-Mose ne “ofo eiloa i te lasi o te malamalama o [Iesu] mo ana tali.”—Luka 2:46, 47, 52.

3. Ne a mea ka sau‵tala tatou ki ei i te mataupu tenei?

³ E mafai foki o iloa kae fia‵fia tatou ki te Muna a te Atua māfai e fai‵tau ki ei i aso katoa. Kae e mafai pefea o maua ne tatou a mea aoga mai ‵tou fai‵tauga? Mai te tauloto ki pati a Iesu ki a latou kolā ne masani ‵lei mo te Tulafono, e aofia i ei a failautusi, te kau Falesaio, mo te kau Satukaio. Ne fai‵tau faeloa a takitaki lotu konā ki te Tusi Tapu, kae ne seki maua ne latou a mea aoga mai i ei. Ne faka‵mafa mai ne Iesu a auala e tolu kolā ne seki maua ei ne tāgata konei a toe mea aoga mai te Tusi Tapu. Ka fesoasoani mai ana pati ki a latou ke momea aka ei a te ‵tou atamai (1) ke malamalama i mea e fai‵tau ne tatou, (2) ke ‵sala ki koloa faka-te-agaga, kae ko te (3) ke talia te Muna a te Atua ke fulifuli ei tatou.

4. Se a te mea e akoako mai i te Luka 10:25-29 e uiga ki te faitau ki te Muna a te Atua?

⁴ E ma‵nako tatou ke malamalama i te uiga o ‵tou mea e fai‵tau i te Muna a te Atua. Kafai e se fai penā, ka se maua katoatoa ne tatou a mea aoga. Pelā me se fakaakoakoga, mafaufau ki te sau‵talaga a Iesu mo “se tagata e poto i te Tulafono.” (Faitau te Luka 10:25-29.) I te fesiliatuga a te tagata tenā me ne a mea e ‵tau o fai ne ia ke maua te ola se-gata-mai, ne fesoasoani atu a Iesu ke maua ne tou tagata te tali mai te Muna a te Atua, mai te fesili atu: “Se a te mea e tusi i te Tulafono? Se a te mea ne faitau ne koe?” Ne mafai ne te tagata tenā o tuku atu te tali tonu mai te sikiatuga o pati i te Tusi Tapu e uiga ki te alofa ki te Atua mo tuakoi. (Levi. 19:18; Teu. 6:5) Kae onoono aka ki ana pati ne toe fai atu: “Kae ko oi la toku tuakoi?” Ne fakaasi mai ne te tagata tenā, me ne seki malamalama a ia i te uiga tonu o ana mea ne faitau. Tela la, ne seki iloa ne ia te auala ke fakagalue aka a tusi fai‵tau konā i tena olaga.

5. E mafai pefea o fesoasoani mai a te ‵talo mo te faitau malielie ke momea aka ‵tou malamalama?

⁵ E mafai o momea aka ‵tou malamalama i te Muna a te Atua mai te fakamasani o faitau faka‵lei. Konei a nāi manatu fesoasoani. ‵Talo koi tuai koe o faitau. E manakogina ne tatou te fesoasoani o Ieova ke malama‵lama i te Tusi Tapu, tela la, ke akai atu ki a ia mō tena agaga tapu ko te mea ke mafai o saga ‵tonu atu ki au mea e faitau. Ko faitau ei malielie. Ka fesoasoani atu a te mea tenā ke malamalama koe i au mea e faitau. Kāti ka ‵lei atu ki a koe ke faitau i se leo maluga io me tautali i tau Tusi Tapu i te taimi e fakatagi ei te polokalame fakalogologo ki te faitauga ki te Tusi Tapu. Kafai e lagona ne koe a pati i te polokalame fakalogologo i te taimi e tautali ei koe ki ei, ka fesoasoani atu ei ke malamalama, ke masaua, kae ke uke atu au mea e tauloto mai tau faitauga ki te Muna a te Atua. (Iosua 1:8) Ka oti koe ne faitau, toe ‵talo atu o fakafetai ki a Ieova mō te meaalofa ko tena Muna, kae akai atu mō tena fesoasoani ke fakagalue ne koe au mea ne faitau.

6. I te taimi e faitau ei koe, kaia e aoga ei ke fai a fesili kae fakamau ki lalo ou manatu? (Onoono foki ki te ata.)

⁶ Konei a nisi manatu fesoasoani e lua ke momea aka tou malamalama i te Tusi Tapu. Fai au fesili e uiga ki au mea ne faitau. I te taimi e faitau ei koe ki se tala, fesili ifo: ‘Ko oi a tino e aofia i ei? Ko oi te tino e faipati? Ko oi te tino e  faipati a ia ki ei, kae kaia? Tefea te koga mo te taimi ne tupu ei te mea tenei?’ Ka fesoasoani atu a vaegā fesili penā, ke mafaufau faka‵lei koe ki au mea ne faitau. E se gata i ei, fakamau ou manatu ki lalo i te taimi e faitau ei koe. Kafai e tusi ne koe ki lalo, ko faimālō ne koe a koe eiloa ke ‵fuli ou manatu ki pati, telā ka fesoasoani atu ke malamalama faka‵lei koe i ou manatu. A te tusiga o manatu e fesoasoani atu foki ke malamalama koe i au mea ne faitau. Kāti e mafai o fakamau ne koe ki lalo a fesili, manatu ne maua ne koe mai au sukesukega, fakatoe‵toega o manatu tāua, nisi manatu e mafai o fakaaoga ne koe mai au mea kolā ne faitau, io me ko ou lagonaga e uiga ki au mea ne faitau. E mafai eiloa o fesoasoani atu a te tusi ki lalo o vaegā fakamatalaga penā ke kilo atu koe ki te Muna a te Atua e pelā me se fekau totino a ia ki a koe.

7. Se a te uiga e manakogina ne tatou māfai ko fai‵tau ki te Tusi Tapu, kae kaia? (Mataio 24:15)

⁷ Ne fai mai ne Iesu se uiga tāua telā e manakogina ne tatou ke mafai o maina i ‵tou mea e fai‵tau i te Muna a te Atua—ko te malamalama. (Faitau te Mataio 24:15.) Se a te malamalama? Ko te atamai ke mafai o malamalama i te sokoga o te manatu e tasi ki te suā manatu, te auala e ‵kese ei mo te suā manatu, kae ke lavea ne koe se manatu telā e se fakaasi manino mai. E se gata i ei, e ‵tusa mo pati a Iesu, e manakogina te malamalama ko te mea ke iloa ne tatou a mea ‵tupu kolā e fakataunu ei a valoaga i te Tusi Tapu. E manakogina foki ne tatou te uiga tenei ke mafai o aoga katoatoa ki a tatou a ‵tou mea e fai‵tau i te Tusi Tapu.

8. E mafai pefea o fai‵tau tatou mo te malamalama?

⁸ E tuku atu ne Ieova ki ana tavini a te malamalama. Tela la, ‵talo atu ki a ia kae fakamolemole ke fesoasoani atu ki a koe ke ati aka te uiga tenā. (Faata. 2:6) E mafai pefea o galue koe e ‵tusa mo au ‵talo? Mai te mafaufau faka‵lei ki au mea e faitau mo te lotou sokoga ki mea kolā e iloa ne koe. Ke fesoasoani atu ki a koe,  fakaaoga ‵tou mea faigaluega mō fai a sukesukega ki te Tusi Tapu, e pelā mo te Research Guide for Jehovah’s Witnesses. A mea faigaluega konei ka fesoasoani atu ke malamalama koe i te uiga o se fuaiupu i te Tusi Tapu kae ke lavea a auala kolā e mafai o fakagalue ne koe a te mea tenā i tou olaga. (Epe. 5:14) Kafai e faitau koe mo te malamalama, ka gasolo aka eiloa o lasi a tou mainaga i te Tusi Tapu.

9. Se a te munatonu tāua i te Tusi Tapu telā ne seki talia ne te kau Satukaio?

⁹ Ne masani faka‵lei a te kau Satukaio mo tusi muamua e lima o tusitusiga i te ‵gana Epelu, kae ne seki talia ne latou a muna‵tonu tāua kolā e maua i tusi konā. Pelā me se fakaakoakoga, mafaufau ki te auala ne saga atu ei a Iesu i te taimi ne fakafesili ne te kau Satukaio a ia e uiga ki te toetuga. Ne fesili atu a ia ki a latou: “E a, e seki fai‵tau koutou ki te tusi a Mose, ki te tala e uiga ki te lakau ‵ka, i pati a te Atua ki a ia: ‘Au ko te Atua o Apelaamo, ko te Atua o Isaako, ko te Atua foki o Iakopo’?” (Male. 12:18, 26) E tiga eiloa ko oti ne fai‵tau te kau Satukaio ki te fuaiupu tenā i taimi e uke, ne fakaasi mai i te fesili a Iesu me ne seki talia ne latou a te munatonu tenā mai te Tusi Tapu—te akoakoga ki te toetuga.—Male. 12:27; Luka 20:38. d

10. Ne a mea e ‵tau o ‵saga tonu atu tatou ki ei māfai ko fai‵tau ki te Tusi Tapu?

¹⁰ Se a te akoakoga e mafai o tauloto ne tatou mai ei? Kafai tatou e fai‵tau, e ma‵nako eiloa tatou o ‵saga tonu atu ki akoakoga kolā e mafai o maua ne tatou mai i se fuaiupu io me se tala i te Tusi Tapu. E se ma‵nako tatou ke malamalama fua i akoakoga faigofie, kae penā foki loa mo muna‵tonu ‵loto mo fakatakitakiga i ei kolā e faigata o lavea atu.

11. E ‵tusa mo te 2 Timoteo 3:16, 17, e mafai pefea o maua ne koe a koloa faka-te-agaga i te Tusi Tapu?

¹¹ E mafai pefea o maua ne koe a koloa faka-te-agaga māfai e faitau ki te Tusi Tapu? Mafaufau ki pati i te 2 Timoteo 3:16, 17. (Faitau.) E fai mai me i “Tusitusiga Tapu katoa . . . e aoga” ki te (1) akoako atu, (2) ki te faiga o polopolokiga, (3) ki te fakatonutonuga o mea ‵se, mo te (4) faiga o polopolokiga i te amiotonu. E mafai o maua ne koe a mea aoga konei e fa i nisi tusi aka foki o te Tusi Tapu kolā e se lasi te fakaaoga ne koe. Iloilo aka te tala ke iloa aka me se a te mea e akoako atu ki a koe e uiga ki a Ieova, tena fuafuaga, io me ki fakatakitakiga mai te Atua. Mafaufau ki te auala e aoga ei ki te faiga o polopolokiga. Ke fai penā, onoono ki fuaiupu kolā ka fesoasoani ki a koe ke iloa kae ke ‵teke a manakoga mo faifaiga sē ‵lei kae ke tumau i te fakamaoni ki a Ieova. Iloilo aka te auala e mafai o fakaaoga se fuaiupu ke fakatonutonu aka ei se kilokiloga ‵se, kāti se mea telā ne fakasae aka ne se tino i te galuega talai. Kae ‵sala ki ne pati polopoloki i fuaiupu kolā e mafai o akoako  ei koe ke maua te kilokiloga a Ieova. Kafai e masaua ne koe a mea aoga e fa konei, ka maua ne koe a koloa faka-te-agaga e uke atu mai tau faitauga ki te Tusi Tapu.

12. Kaia ne fai atu ne Iesu a te fesili tenei ki te kau Falesaio “E a, e seki fai‵tau koutou?”

¹² Ne ‵sili atu foki ne Iesu a te fesili “E a, e seki fai‵tau koutou?” ke fakaasi atu ei me ‵se te kilokiloga a te kau Falesaio ki te Tusi Tapu. (Mata. 12:1-7) e I te taimi tenā, ne ‵losi atu te kau Falesaio me ne soli ne soko o Iesu a te Sapati. I tena tali, ne fai atu ne Iesu ne fakaakoakoga e lua mai te Tusi Tapu kae siki atu se fuaiupu mai te Hosea ke fakaasi atu a te sē maina o te kau Falesaio i te tulafono e uiga ki te Sapati mo te lotou fakata‵mala o fakaasi atu te alofa fakamagalo. Kaia ne seki ‵fuli ei a tāgata konei ne olotou mea ne faitau i te Muna a te Atua? Me ne fai‵tau latou mo se kilokiloga fakamasei tino kae fakamata‵mata. Ne fai ne te lotou kilokiloga tenā ke se malama‵lama latou i olotou mea e fai‵tau.—Mata. 23:23; Ioa. 5:39, 40.

13. Se a te kilokiloga e ‵tau o maua ne tatou māfai e fai‵tau ki te Tusi Tapu, kae kaia?

¹³ E tauloto tatou mai pati a Iesu me e ‵tau o fai‵tau tatou ki te Tusi Tapu mo se kilokiloga tonu. E se pelā mo te kau Falesaio, e ‵tau o loto maulalo kae loto fia‵fia tatou o tauloto. E ‵tau o “talia ne tatou mo te agamalu a te ‵tokiga o te muna.” (Iako. 1:21) Kafai e agama‵lu tatou, ka talia ne tatou ke ‵mau a aka o te Muna a te Atua i ‵tou loto. Kafai fua e ‵kalo kea‵tea tatou mai te uiga fakamasei tino mo te fakamatamata, ka mafai ei o fulifuli tatou ne akoakoga i te Tusi Tapu e uiga ki te alofa fakamagalo, alofa atafai mo te alofa.

14. E iloa pefea me talia ne tatou ke fulifuli tatou ne te Tusi Tapu? (Onoono foki ki ata.)

 ¹⁴ A ‵tou faifaiga ki nisi tino e fakaasi mai ei me talia ne tatou ke fulifuli ne te Muna a te Atua tatou io me ikai. Ona ko te fakata‵mala o te kau Falesaio ke ‵fuli olotou kilokiloga ne te Muna a te Atua, tenā ne “fakamasei ne latou a tino e se agasala.” (Mata. 12:7) I se auala tai ‵pau, a ‵tou faifaiga ki nisi tino e fakaasi atu i ei me talia ne tatou ke fulifuli ne te Muna a te Atua a tatou io me ikai. Pelā me se fakaakoakoga, e mata, e ma‵nako tatou o fakaasi atu ki nisi tino a mea ‵lei e lavea ne tatou i a latou, io me fai atu faeloa ne tatou a mea ‵se e fai ne latou? E mata, e loto fakamagalo tatou, io me fakamasei tino kae ita fakamoemoe? E fakaasi mai i ‵tou tali ki fesili konei me e mata, e talia ke fulifuli ne ‵tou mea e faitau a ‵tou mafaufauga, lagonaga, mo faifaiga io me ikai.—1 Timo. 4:12, 15; Epe. 4:12.

15. Ne pefea a lagonaga o Iesu e uiga ki te Tusi Tapu?

¹⁵ Ne fiafia a Iesu ki te Tusi Tapu, kae ne fakaasi mai ne ia ana lagonaga i pati fakavaloaga i te Salamo 40:8: “A te faiga o tou loto, e toku Atua ko toku fiafia, kae ko tau Tulafono e tuku i loto i toku loto.” Ona ko te mea tenā, ne fiafia kae manuia a Iesu i te tavini atu ki a Ieova. E mafai foki o maua ne tatou te fiafia mo te manuia māfai e ga‵lue tatou o faka‵goto te Muna a te Atua ki ‵tou loto.—Sala. 1:1-3.

16. Ne a mea ka fai ne koe ke maua a mea aoga e uke atu mai tau faitauga ki te Muna a te Atua? (Onoono ki te pokisi “ E Mafai o Fesoasoani Atu a Pati a Iesu ke Malamalama Koe i au Mea e Faitau.”)

¹⁶ E ‵tusa mo pati mo te fakaakoakoga a Iesu, ke na momea aka ‵tou ata‵mai i te fai‵tau ki te Tusi Tapu. E mafai o momea aka ‵tou malamalama i fuaiupu i te Tusi Tapu mai te ‵talo, faitau malielie, fai a fesili, kae fakamau a manatu ki lalo. Ke fakaaoga te ‵tou malamalama mai te mafaufau faka‵lei ki ‵tou mea ne fai‵tau fakatasi mo te fesoasoani o ‵tou tusi faka-te-Tusi Tapu. E mafai o momea aka ‵tou iloa i te fakaaogaga o te Tusi Tapu ke oko foki loa ki fuaiupu kolā e se masani tatou ki ei, mai te ‵sala atu ki koloa faka-te-agaga i ei. Kae mafai o talia ne tatou te Muna a te Atua ke fulifuli tatou mai te fakatumauga o se kilokiloga tonu ki ‵tou mea e faitau. Kafai e fakagalue ne tatou a auala konei, ka uke atu a mea aoga e maua ne tatou mai ‵tou fai‵tauga ki te Tusi Tapu kae ka ‵pili malosi atu tatou ki a Ieova.—Sala. 119:17, 18; Iako. 4:8.