ARTÍCULO NI GUISUIDYNO 7
Guientzaayno la Biblia órni golno láani
«¿Xí caa ló Ley? ¿Xí láani roʼolo loni?» (LUC. 10:26).
CANCIÓN 97 Nuestra vida depende de la Palabra de Dios
NI GUISUIDYNO a
1. ¿Xí láani raslooy que la Biblia gosacni par Jesús?
¿MA BUNYNO pensary ximod ñacni pal nacadiagno mod bisuidy Jesús la? Guirá ór goniʼbu né golexabu Xtiitz Dios de memory. Scú raslooy ni goniʼbu órni bilox goyonisbu né tipnés diitz ni goniʼbu órni mápa mer gaitybu (Deut. 8:3; Sal. 31:5; Luc. 4:4; 23:46). b Né ló tzón íz gorol ni bunybu xchiin Dios ló Gudxlio, Jesús guirá ór bíilbu la Biblia, bisetlabu né golexabu láani (Mat. 5:17, 18, 21, 22, 27, 28; Luc. 4:16-20).
Dzú goyoʼ Jesús ló Gudxlio, bislooybu que binladxbu ni ná Escrituras né bidudybu lagary nasanésni láabu (Bibiʼ párrafo 2).
2. ¿Xí láani gocné Jesús par ñantzaybu guirá ni ná Xtiitz Dios laʼga goniʼsbu? (Bibiʼ dibuj ni sieed laidy guiich reʼ).
2 Dada antes de nasaló Jesús ñony xchiin Dios ló Gudxlio, guirá ór bíilbu Xtiitz Dios né bicadiagbu laʼga stipnés bíil né golexa láani. Sigory bicadiagbu María né José órni goniʼ de láani (Deut. 6:6, 7). c Nanno que guirá sábda Jesús né xfamil goyee lainy sinagoga né bicadiagtzaybu órni bíilyibu Xtiitz Dios (Luc. 4:16). Después stipláacabu gosaló bíilbu láani. Ndeʼ gocné láabu par ñanbu xi náni, nasacni par láabu né nasobbu láani. Toib ejemplo ni raslooy láani ngú ni gosaclobu órni noʼbu lainy templo dzú napsabu 12 íz. Guirá mextra ni gontzay Ley xtuny Moisés «nigolú bidziguiaʼyibu mod riembu né mod racapybu» (Luc. 2:46, 47, 52).
3. ¿Xí guibiʼno ló artículo reʼ?
3 Lóono láaca labúu guimbuno né gonladxno ni ná Xtiitz Dios pal rolno láani guirá dzú. ¿Per xí raquiin gonyno par guientzaayno la Biblia órni golno láani? Par ganno láani, guibiʼno xi góoch Jesús buñ ni gontzay ni ná Ley, xomod escribas, fariseos né saduceos. Ná guiráyibu bíilyibu Escrituras per diti noʼ pu gocnéni layibu. Jesús bisetlaa tzón cós ni labúu ñonyibu par ñacni scú. Guirá ni goniʼ Jesús sacnéni lóono par 1) guientzaayno ni rolno, 2) guidzelno cós ni rasac né 3) guidudyno lagary que Xtiitz Dios tzaʼisni lainy xcalnabanyno.
GUIENNO NI CAYOLNO
4. ¿Ximod raslooy lóono Lucas 10:25-29 golno la Biblia?
4 Nainy lóono guienno ni rolno ló la Biblia portín pal diti ronyno láani diti noʼ pu sacnéni lóono. Gonyno pensary ló ni góoch Jesús «toib buñguieeu ni nantzay Ley» (bíil Lucas 10:25-29). Buñguieeucu goniiny ñan xi láani ñonybu par labúu nacaʼbu galnabany tipzó, Jesús buny tipnés galrranabdiitz par ñonybu pensary ló ni ná la Biblia. Gonabdiitzbu buñguieeucu: «¿Xí caa ló Ley? ¿Xí láani roʼolo loni?». Galán mod cuapy buñguieeucu. Goniʼbu de Escrituras ro ritlaa que raquiin gonladxno Dios né saʼno (Lev. 19:18; Deut. 6:5). Después gonabdiitzbu ndeʼ: «Né ¿chú láabu ngú saʼya pue?». Mod goniʼbu bislooybu que diti biembu ni ma bíilbu. Né por ngú diti gonbu ximod nasobdiitzbu láani.
Guirácano labúu guisuidyno guienno más ni cayolno
5. ¿Xigony más rientzaayno la Biblia órni ronyno oración né rolno láani tzagaa?
5 Pal nír ronyno tipnés cós, sientzaayno ni ná Xtiitz Dios. Noʼ xidal cós ni labúu gonyno. Primer, gonyno oración antes de golno. Diti labúu sienno ni ná la Biblia pal diti ranabno xcalrracné Jehová, por ngú ranabno espíritu santo xtunybu par gacnébu lóono tzoʼ xpensaryno toibsi lagary. De ngú golno, per diti golno láani naguel, xalagary ngú golno láani tzagaa par guienno ni cayolno. Láaca labúu golno láani fuers o guicadiagno grabación xtuny la Biblia laʼga cayolno láani. Ngú labúu sacné lóono tzoʼno xalagary buñ ni ritlaa ló historiacu, modreʼ siaʼisni lainy xcalnabanyno né ló xpensaryno (Jos. 1:8). Órni ma bilox bíilno láani, gonyno oración stoib par guidudyno guixquix Jehová por Xtiitzbu né guinabno láabu gacnébu lóono guisobno láani.
¿Xigony pal racaʼno ló guiich chop tzón roʼ ni bienno sacnéni lóono guientzaayno né guisetnaladxno ni bíilno? (Bibiʼ párrafo 6).
6. ¿Xigony laʼga cayolno la Biblia non gonyno galrranabdiitz né guicaʼno ló guiich ni cayenno? (Láaca bibiʼ tipnés retrat).
6 ¿Xí más sacné lóono guientzaayno ni rolno ló la Biblia? Guinabdiitzno lóocano xi bienno ló historia ni cayolno. Por ejemplo, ¿chú rareʼ loguiaʼ ló historiacu?, ¿chú caniʼ?, ¿chú caninébu né xigony?, ¿pu ór né pu lagary cayacni? Guirá galrranabdiitz reʼ sacnéni lóono gonyno pensary né coʼno xpensaryno ló cós ni rareʼ loguiaʼ ló historiacu. Láaca labúu guicaʼno chop tzón roʼ xi láani cayenno. Órni racaʼno láani ló guiich rasabuʼno xpensaryno. Né ngú sacné lóono guientzaayno ni bíilno né guiaʼanni ló xpensaryno. ¿Xí láani labúu nacaʼno? Galrranabdiitz ni bunyno lóocano, información ni biyopyno, cós ni rareʼ loguiaʼ, ximod guisobno láani o ximod gosacno órni bíilno historiacu. Pal ronyno guirá ndeʼ órni golno la Biblia sasacno que Jehová caniné lóono.
7. ¿Xí cualidad raquiinno órni rolno la Biblia, né xigony? (Mateo 24:15).
7 Jesús bisetlaa toib cualidad ni nigolú rasac par guienno la Biblia: gapno discernimiento (bíil Mateo 24:15). ¿Xí láani ngú discernimiento? Láani racnéni lóono guidudyno cuent xi láani radzak né saʼ né xi láani yaca né xi guirá raguiñani. Né xomod goniʼ Jesús sacnéni lóono guidudyno cuent ximod rac cumplir guirá profecías xtuny la Biblia. Láaca nigolú rasacni par gantzayno xi cayolno ló la Biblia.
8. ¿Xí raquiin gonyno par guientzaayno ni rolno?
8 Jehová radudybu discernimiento xpiimbu. Por ngú rasac gonyno oración né guinabno cualidad reʼ (Prov. 2:6). Per diti nosi gonyno oración. Guisuidyno láani tzagaa né guicaano cuidad ximod radzakni né ni ma nanno. Noʼ xidal publicaciones ni rareʼ ló la Biblia ni labúu gacné lóono gonyno láani, xomod Ni gacné a testigos xtuny Jehová guisuidyibu la Biblia. Pal raquiinno láani sadudyno cuent xi radudy diitz historia xtuny la Biblia né sasuidyno ximod guisobdiitzno ni cayolno (Heb. 5:14). Pal racaano cuidad xi láani cayolno sientzaayno láani más.
GUIYOPYNO CÓS NI RASAC
9. ¿Xí cós ni rasac diti bieen saduceos?
9 Ná saduceos gontzay gáay primer libros ni sieed ló Escrituras Hebreas, diti bisobyibu tipnés cós ni más rareʼ loguiaʼ ló librocu. Gonyno pensary ximod cuapy Jesús a guirá saduceos órni gonabdiitzyibu Jesús pal nigolúpa siás gueʼet. Jesús gonabdiitz layibu: «¿Xí diti bíilto ló libro xtuny Moisés ro ritlaa yac gúch, órni Dios góoch láabu: Naʼ naca Dios xtuny Abrahán, Dios xtuny Isaac né Dios xtuny Jacob la?» (Mar. 12:18, 26). Sigory saduceos xidal buelt bíilyibu historiacu, per galrranabdiitz ni buny Jesús layibu bislooyni que diti bienyibu que siás gueʼet (Mar. 12:27; Luc. 20:38). d
10. ¿Xí láani guiyopyno ló la Biblia laʼga cayolno láani?
10 ¿Xí rasuidyno de historiacu? Que órni golno la Biblia raquiin guicaano cuidad xi rasuidy toib versículo o toib historia lóono. Diti loguiaʼsi guisuidyno, xalagary ngú guiyopyno principios ni nac xomod cós ni noʼ nagach ni sieed ló la Biblia.
11. Mod ná 2 Timoteo 3:16, 17, ¿ximod labúu guiyopyno cós ni rasac ni sieed ló la Biblia?
11 ¿Ximod labúu guidzelno cós ni noʼ nagach ni sieed ló la Biblia? Guisuidyno 2 Timoteo 3:16, 17 (bíil láani). Cú náni que Escrituras racnéni ló tap cós: rasuidyni, raibyni buñ pu caché, rony corregirni né ragonésni. Dada libro xtuny la Biblia ni diti tampa ritlaa racnéni lóono. Par ganno xi rasuidyni lóono de Jehová, ni nábu gonybu o principios xtunybu, raquiin guisuidytzayno ni cayolno. Par labúu gaiby toib historia lóono pu cachéno, ¿xí láani guiyopyno loni? Nitisi cós ni labúu gacné lóono ganno o cueʼno tiplad cós ni diti ronyno galán né gacnéni lóono par gacno fiel a Jehová. Gonyno pensary ximod historiacu labúu gony corregirni ro cachéno, pentzi cós ni gochyibu lóono ló predicación. ¿Né xí labúu gonyno par conés toib historia lóono? Guiyopyno guirá ni labúu gacné lóono gonyno pensary xomod Jehová. Pal rasetnaladxno tap cós ni bisuidyno, sadzelno xidal cós ni rasac laʼga cayolno la Biblia.
NI ROLNO LÓ LA BIBLIA GUIAʼISNI LAINY XCALNABANYNO
12. ¿Xigony gonabdiitz Jesús a guirá fariseoscu pal diti ma bíilyibu ni ná Escrituras?
12 Fariseos nac nacsi bíilyibu Xtiitz Dios. Jesús goleʼ loguiaʼ láani órni gonabdiitz pal diti ma bíilyibu ni ná Escrituras (Mat. 12:1-7). e Ló dzúcu fariseos goniʼyibu que xpiin Jesús diti bisob ley ni goyoʼ par dzú sábda. Jesús cuapy layibu né chop ejemplos ni sieed ló Escrituras né bisetlabu ni goniʼ Oseas. Modreʼ bislooybu que fariseos diti bieen xigony bireʼ leycu né que diti bislooyibu galrronladx. Guirá buñreʼ bíilyibu Xtiitz Dios, per diti goyaʼisni lainy xcalnabanyibu. ¿Xigony? Portín gocyibu buñ farmay né nosi bíilyibu láani par nadzelyibu pu raché stipnés. Por mod gocyibu diti bidudyni lagary ñenyibu ni roʼolyibu (Mat. 23:23; Juan 5:39, 40).
13. ¿Xí raquiin gonyno órni rolno la Biblia, né xigony?
13 Mod bisuidy Jesús, rasuidyni lóono que raquiin golno la Biblia par guienno láani. Diti gonyno xomod fariseos. Xalagary ngú gacno buñdxo né guidudyno lagary guisuidy Jehová lóono. Mod ná Santiago 1:21: «Colgac buñ nadaʼa órni guicadiagto xtiitz Dios, colguidudy lagary tzaʼisni lainy xcalnabanyto». Pal nacno buñ nadaʼa sadudyno lagary que Xtiitz Dios tzaʼisni lainy xcalnabanyno. Órni golno la Biblia diti gacno buñ farmay nili guiyopyno pu raché stipnés. Nosi modreʼ sasuidyni lóono cobiono stipnés, guislooyno galrronladx né galnadxiʼ.
¿Ximod labúu ganno pal Xtiitz Dios cayaʼisni lainy xcalnabanyno? (Bibiʼ párrafo 14). f
14. ¿Ximod labúu ganno pal la Biblia cayaʼisni lainy xcalnabanyno? (Láaca bibiʼ retrat).
14 Mod ragobiono stipnés raslooyni pal radudyno lagary guisanés la Biblia lóono. Guirá fariseoscu diti bidudyibu lagary ñaʼis Xtiitz Dios lainy xcalnabanyibu, bigotzyibu dool ni diti gop dool (Mat. 12:7). Por ngú, guicaano cuidad ximod rabiʼno né ragobiono stipnés. Por ejemplo, ¿ranino cós tzaay ni nap stipnés o nosi ranino pu rachéyibu la? ¿Noʼno puext par guitudyno láani scásiʼ la, o ranino mal de stipnés né rinéno xian la? Mod guicapyno galrranabdiitz reʼ saslooyni pal radudyno lagary conés la Biblia lóono tanli mod ronyno pensary, mod rasacno né mod ronyno (1 Tim. 4:12, 15; Heb. 4:12).
ÓRNI ROLNO LA BIBLIA RIOʼNO NAKIT
15. ¿Xí gosac Jesús por la Biblia?
15 Xtiitz Dios nigolú gosacni par Jesús. Dada Salmo 40:8 goniʼ balaati gosac la Biblia par láabu: «Nigolú rioladxi goni ni nálo, Dios xtuni, né ley xtunylo noʼni lainy xcalnabani». Gosacni par láabu por ngú goyoʼbu nakit né bunybu xchiin Jehová. Lóono láaca sasacno scúca pal ronyno xtem por golno la Biblia né guisacni par lóono (Sal. 1:1-3).
16. ¿Xí raquiin gonylo par guientzaaylo ni roʼolo ló la Biblia? (Bibiʼ cuadriyen ni laa, « Guirá ni goniʼ Jesús racnéni lóono guienno ni rolno»).
16 Ejemplo né mod goniʼ Jesús rachiinni lóono golno né guisuidytzayno la Biblia. Par guienno xi cayolno gonyno oración, diti golno láani naguel, gonyno galrranabdiitz lóocano né guicaʼno tipnés cós ni rareʼ loguiaʼ. Par guientzaayno ni cayolno, raquiin guisuidyno láani tzagaa né guiyopyno información ló publicación ni napno. Par gantzayno xi ná Escrituras, guiyopyno cós ni rasac ni sieed loni, dada ló historias ni diti tampa rimbuno. Né par guidxin Xtiitz Dios lainy xcalnabanyno goʼoltzayno láani. Pal ronyno guirá ndeʼ sientzaayno guirá ni golno ló la Biblia né sabigaxno más Jehová (Sal. 119:17, 18; Sant. 4:8).
CANCIÓN 95 La luz brilla más cada día
a Lóono ni nacno xpiin Jehová ronyno xtem golno la Biblia guirá dzú. Xidal buñ láaca roʼol láani per diti rienyibu ni náni. Scúca góc ló xtzú Jesús. Guibiʼno xi láani góoch Jesús buñ ni bíil Xtiitz Dios né guisuidyno ximod guientzaayno la Biblia órni golno láani.
b Órni Jesús goyonis né golú Dios láabu né espíritu santo, rolooyni bisetnaladxbu guirá ni bunybu antes de ñeedbu ló Gudxlio (Mat. 3:16).
c María gontzaybu ni ná Xtiitz Dios né bisetlabu láani xidal buelt (Luc. 1:46-55). Pentzi láabu né José diti gopyibu bidxiich par ñapyibu toib copia xtuny Escrituras. Sigory bicadiagtzaybu órni bíilyibu Xtiitz Dios lainy sinagoga né modreʼ labúu bisetnaladxyibu ni náni.
d Bíil artículo ni laa, «Bibigax ronoʼ Dios: Láabu nacbu Dios [...] de buñ ni nabany», ni sieed ló Guiich ni caniʼ 1 de febrero íz 2013.
e Ló Mateo 19:4-6 sadzelo stoib historia ro ritlaa órni Jesús gonabdiitz fariseos pal diti bíilyibu ni ná Escrituras. Ná gonyibu ximod bisaʼ Dios guirá ni noʼ, diti goloʼyibu cuent ni buny pensary Dios de galtzeʼel.
f MOD RAREXA DIBUJ NÉ RETRAT: Lainy Salón del Reino, toib herman ni ratudy video raché xidal buelt. Órni ma bilox reunión herman rony felicitar láabu por xtem ni ronybu, xalagary guiniʼyibu pu biché hermanocu.
