Eni a hnyima sai angeic, ke tha qëmekene atr ka hmi kö angeic. Matre öning: “A nemene fe kö la hnei eö hna atre göi Tusi Hmitrötr?” Tha hnei angeice kö hna canga sa koi ni. Ngo e thupen, hnei angeic pë hë hna qaja koi ni ka hape, ka Temoë Iehova la thine i angeic, nge hnei eahlo fe hna hane qeje Tusi Hmitrötr koi angeic. Matre e cili hi la eni a nyiqane hnying koi angeic.

Ase petre hi nyio porotrik ngöne la jidri cili. Öni angeic, thenge la hnei Tusi Hmitrötr hna qaja, Satana la ka musinëne la fen. (Ioane 14:30) Ma ketre ewekë lai hnei epuni hna atre hë qaane ekö, ngo ame ni, ke eni petre hi lai a hane dreng. Qaane lo eni a co, hnenge palahi hna dreng ka hape, Akötresie ka ihnim la ka musinëne la fen, ngo tha celë kö hnenge hna öhn e enehila. Ngacama 26 petre hi lao macatreng, ngo kola ketri ni hnene la itre ewekë ka ngazo ka traqa.

Ka xomi avio kaka ngöne la trongene isi angetre Amerika. Celë hi matre, ame lo eni a nekönatr atre hi ni laka, ijije hi troa keciqa la ketre boob ka tru. Nge, ame lo eni ngöne université e Californie, ke kola catrehnine la isi e Vietnam. Matre hnenge fe hna hane sine la itre manifestations memine la itre sinee ining. Hnene la itre polis hna weje huzu hun. Thatreine hë hun mano, nge tha öhne hë hun koilo hnene la itre gaz lacrymogènes. Ketre ijine lai ka jole catr. Hna humuth la itre ka kuci politik, nge kola gomegome la nöj. Itre atr a isa catre fë mekun matre thatre hë hun la ka loi.

Ame lo 1970, hnenge hna fek a tro Alaska troa huliwa, matre tru catr la manieng. Thupene lai, hnenge hna tro Londres. E cili, hnenge hna itö moto me nyape kowe la götrane kolojë. Nge thupene la itre treu, eni a traqa e Afrique. Hnenge hna iöhny memine la itre xaa ka tui eni, ka thele mel. Angatre fe a kötrene la itre jole ka othe la mel i angatr.

 Eni ha jelenyipicine e cili lo hna qaja hnei Tusi Hmitrötr ka hape, atre ka ngazo la ka musinën la fen. Matre nemene pë hë la hna kuca hnei Akötresie? Celë hi hnenge hna pi atre.

Itre treu thupen, kolo ha sa la hnyingeng. Nge, ame ngöne la itre macatre, hnenge hna nyisineene la itre trahmany me föe ka isa aqane mele kö, ngo itre ka mele nyipici asë hi koi Akötresie.

Ame la eni a bëek a tro Londres, hnenge hna hëne la thinene lo sineeng, nge hnei eahlo hna hamë Tusi Hmitrötreng. E thupen, hnenge hna fek a tro Amsterdam (Pays-Bas). Nge e cili, hnene la ketre Temoë Iehova hna öhnyi ni e Tusi Hmitrötr, matre hnei angeic hna xatua ni troa trotrohnine la hnenge hna e. Ase jë hi lai, hnenge hna tro Dublin (Irlande), me thel la filial ne la itre Temoë Iehova. Iöhnyi ju hi ni me Arthur Matthews, ketre trejin ka macaj. Hnenge hna sipo nyidrë troa ini Tus me eni, nge hnei nyidrëti hna kapa.

Tru catr la madrineng troa inine la Tusi Hmitrötr, me e la itre itus me zonal hna kuca hnene la itre Temoë Iehova. Nge the qaja palaha la eni a e la Tusi Hmitrötr! Ame ngöne la itre ijine icasikeu, eni a öhne laka, goi atre fe la itre nekönatr la itre mekun ka sa lo itre hnying hna thel qane ekö hnene la itre ka inamacan, tune la: ‘Ka xulu qa kaa la ngazo? Drei lae Akötresie? Nemene la pengö së la easa mec?’ Eni hi a nyisineene la itre Temoë Iehova. Tha ka jole kö, ke pëkö hnenge hna atre ngöne la nöj. Hnei angatr hna xatua ni troa hnimi Iehova me kuca la aja i Nyidrë.

Hna bapataiso ni lo 1972. Ca macatre thupen, hnenge hna xome la huliwa ne pionie, me tro kowe la nekö i ekalesia ne Newry, götrane kolopi ne Irlande. Hnenge hna louer la ketre nekö i uma etë ezine la wetr. Ame ezin hetre hna axö kau, nge e cili hi la hnenge hna lapa hnëkë cainöj. Kösë itre kau a nango drei ni a e la cainöjeng. Eje hi, tha ijiji nyudreni kö troa hamë eamo koi ni, ngo celë hi ka xatua ni troa cile fë cainöj ngöne la gaa tru atr. Ame lo 1974, eni ha pionie hut. Nge hnei Nigel Pitt hna traqa troa ce huliwa me eni, matre lue sinee hë nyio.

Ame ngöne la ijine cili, tru catr la imethinë ngöne la götrane kolopi ne Irlande. Hna hëne la götrane cili “nöj ne boob me hane kuqa.”  Nge trenge nyipici hi lai, ke kolo palahi a ikuqany e kuhu gojeny, me ami boob e hnine la itre loto. Politik me hmi la qaane la itre jole cili. Ngo, öhne hnyawa hi la itre Protestants me itre Catholiques laka, tha ka hane kö kuci politik la itre Temoë Iehova. Celë hi matre, pëkö ka acilë hun troa cainöj. Ame la itre atr a atre la hnë me ijine kola icilekeu, ke angatr a canga ithuemacanyi hun matre tha tro kö huni a tro e cili.

Traqa pi kö la ijine laka, hetre jol. Ame lo ketre drai, hnenge hna ce cainöj memine la ketre pionie Denis Carrigan, ngöne la ketre traon laka, pëkö Temoë Iehova. Aca qa i nyio hë ekö e cili. Hnene la ketre föe hna upezö nyio ka hape, lue sooc i angetre Agele nyio ka traqa juetrë. Ma eahlo jë a mekuhni, ke thatreine kö nyio qaja hnyawan la qene irlandais. Tru catr la xou i nyio. Ame la troa nyisineene la ketre sooc i angetre Agele, ke ijije hi troa kuqane la watingöneca maine humuthe pena. Ame la nyio a nango treqe kar, öhne ju hi nyio la ketre loto a cile qëmekene la hnë huliwa ne lo föe ka upezö nyio. Eahlo a köja nyio me ithanata kowe la lue trahmany e hnine la loto. Thupene lai, hnene la lue trahmany hna traqa koi nyio, me hnyingë pengöne la kar. Ame hë la kola traqa la kar, hnei nyidroti a nyiulil kowe la ka xomi kar. Pine laka, nyio casi hi e hnine la kar, matre nyio a mekun ka hape, troa traqa la ketre ewekë ka ngazo koi nyio. Ngo, pë ju kö ka traqa. Ame hë la eni a ut, öninge kowe la ka xomi kar: “Hnene kö lo lue trahmany ekula hna hnyingë pengöi nyio?” Matre öni nyidrë: “Atrei epone hi hneng, nge ase hë ni qejepengöi epon koi nyidro. The xou kö, ka loi hi.”

Ame lo 1976 ngöne la ijine asabele ne distrik a e Dublin, hnenge hna iöhny me Pauline Lomax, ketre pionie hut qa Agele. Ketre trejin föe ka ipië, ka hnimi Iehova nge ka mingöming. Hna hetru angeic me Ray xa i angeic ngöne la nyipici. Ca macatre thupen, hnei eni me Pauline hna faipoipo, nge hna upi nyio troa pionie hut e Ballymena, götrane kolopi ne Irlande.

Hnei nyio fe hna kuca la huliwa ne sirkoskripsio, me wange la itre ekalesia ne Belfast, me Londonderry, me itre xaa götrane ju kö ka jole catr. Hna ketri nyio hnene la lapaun ne la itre trejin, ka nuetrij la itre ini ka thoi, me wangatrehmekunyi atr me imethinë matre catre nyihlue Iehova. Hnei Iehova hna amanathithi angatr me thupë angatr!

Traqa koi 10 lao macatre ne lapa ni e Irlande. Nge, ame hë lo 1981 hna hë ni me föeng troa hane sine la 72e classe ne ini Gileada. Thupene la ini, hna upi nyio a tro Sierra Leone, götrane kuë ne Afrik.

Nyio a ce lapa memine la 11 lao trejin ngöne la ketre uma thatraqane la itre mesinare. Ame ngöne la uma, casi hi la kecen, köni kabine, lue uma ne si, ca telefon, me ca machine à laver me sèche-linge. Ame itre xaa ijin, ke kola pë kura, nge tiqa catr la itre aji me un.

Ngacama tha ka hmaloi kö la mele nyio, ngo nyio a madrin ngöne la huliwa ne cainöj. Ka tru kowe la itre atr la Tusi Hmitrötr, nge angatr a pi drei nyio. Alanyimu la itre ka  ini Tus me xomi bapataiso. Itre atr a hë ni ka hape, “Mösiö Robert,” me hë Pauline ka hape, “Madam Robert.” Ngo pine laka, tru catr hë la huliwang ngöne la Bethela, matre tha cainöj lapa hë ni. Matre itre atr pena a hë Pauline ka hape, “Madam Pauline,” nge ame ni ke, “Mösiö Pauline.” Madrine catre Pauline!

Alanyimu la itre trejin ka pë ewekë, ngo hnei Iehova palahi hna thupë angatr. Nge nyine haine la aqane huliwa i Nyidrë. (Mat. 6:33) Eni a mekun la ketre trejin föe. Ijije hi la manie i eahlo troa ithuan la itre nekö i eahlo. Ngo, hnei eahlo hna hamëne la manie cili kowe la ketre trejin matre itöne la itre drösinöe göi paludisme. Ame ju kö lai drai cili, hnene la ketre föe hna sipo eahlo troa el la penehe i angeic, nge troa nyithupei eahlo. Tha hna aca traqa kö la itre ewekë cili.

Thupene la 9 lao macatre e Sierra Leone, hna upi nyio kowe la Bethela e Nigeria. Ka tru lai Bethela. Eni palahi a kuca la huliwa hnenge hna kuca e Sierra Leone, ngo tha ka hmaloi kö koi Pauline, ke ka hnyipixe koi angeic. Ame ekö, angeic a cainöj koi 130 lao hawa, me hamë ini kowe la itre atr ka pi atre Iehova. Ngo ame enehila, angeic pë hë a caimaano ngöne la Bethela. Nango jole pi hë koi angeic lo xötrei, ngo tru catr la ka olene kowe la huliwa hnei angeic hna kuca. Celë hi ka upi angeic troa ithuecatr kowe la itre trejine ngöne la Bethela.

Ka hnyipixe koi nyio la aqane mel ne la angetre Nigeria. Ame lo ketre drai, hnene la ketre trejin hna traqa troa wai ni memine la ketre trejin föe ka hnyipi lö kowe la Bethela. Hnenge hna liime matre ibozu memine la trejine föe, ngo hnei angeic hna saiwatingöneca. Matre sesëkötre ju hi ni, nge canga mekune jë hi ni la lue xötr: Itre Huliwa 10:25, 26 me Hna Amaman 19:10. Hnenge hna pane hnying ka hape, ‘Tro jë kö ni a qaja koi angeic ka hape, tha aqane ujë kö lai?’ Ngo pine laka, hna kepe angeic e celë ne Bethela, atre hi angeic la itre ini qa hnine la Tusi Hmitrötr.

Thupene lai, tha lapa hnyawa kö ni, matre hnenge hna ithel ngöne la itre itusi së. Trotrohnine hë ni ka hape, aqane ibozu i angatre hi lai. Itre trahmanyi fe a hane tune lai. Tha angatr kö a thil koi së, ngo angatre hi a  amamane la metrötre i angatr. Hetre ka hane fe ujë tun e hnine la Tusi Hmitrötr. (1 Sam. 24:8) Tru la madrineng ke, pëkö hnenge hna qaja ka troa ahmahmane lai trejin föe.

Hnei nyio hna iatre memine la itre xaa trejin ne Nigeria, nge ka lapaune catre angatr koi Iehova. Isaiah Adagbona b la ketre. Hnei nyidrë hna atre Iehova lo nekötrahmanyi palakö nyidrë. Ngo e thupen, hna tithi nyidrë hnei lepera, matre hna upi nyidrë kowe la ketre götrane hnë umë itre lepera. Nge nyidrë casi hi la Temoë Iehova e cili. Ngacama tru la icilekeu, ngo hnei nyidrë hna ini Tus memine la 30 lao atr ka lepera, itre ka xomi bapataiso e thupen. Celë hi matre, hna acil la ketre ekalesia ngöne la götrane cili.

Ame lo 1996, hna upi nyio kowe la Bethela e Kenya. Eni hmaca petre hi a traqa e cili. Nyio a lapa ngöne la Bethela, gaa tiqa catr hnei cako. Ngazo catr la thiina i nyudren kowe la itre trejin föe ka kapa trongëne la itre wene sinöe. Ame la ketre drai, hnene la ketre trejin föe hna fe la mamala i angeic. Ame hë la angeic a bëek, itre cako ha xen la itre ai angeic hnei angeic hna amë ngöne la hnahag. Hnei angeic hna sue me kötr, matre hnene fe la itre cako hna isa kötr qa ngön la mamala.

Hnenge me Pauline hna tro kowe la ketre ekalesia ka qene Swahili. Tha qea ju kö, nge hna upi ni troa iujine la ini Tusi Hmitrötr ne la ekalesia. Ngo, eni a ithanata tune la itre nekönatr. Pine laka, hnenge hna hnëkë hnyawa matre atreine hi ni e la itre hnying. Ngo e tro ketre a sa, nge tha thenge kö la hna makën, ke pëkö hnenge hna trotrohnin. Hmahma pi hë ni, nge eni fe a mekun la itre trejin. Ngo, angatr a kapa hnyawane la hna amekötin. Eni a haine la aqane xomihni angatr me ipië.

Tha ca macatre ju kö ne lapa nyio e Kenya, nge hna hë nyio kowe la Bethela e Brooklyn (New York), lo 1997. Nyio hë ngöne la ketre nöj ka trenamo, ngo hetre jole fe e cili. (Ite edomë 30:8, 9) Tru la lapaun ne la itre trejin. Angatr a hamëne la traem me itre mo i angatr matre xatuan la itre huliwa ne la organizasio i Iehova.

Ame ngöne la itre macatre, hnei nyio hna ce mel memine la itre trejin ka catre lapaun, ngacama isa aqane mele i angatre kö. Tune la itre ka mel e Irlande gaa hetre isi, maine ka mele pena ngöne la pë e Afrik, maine ka trenamo tune la itre trejin e Etazini. Tru la madrine i Iehova la Nyidrëti a öhne la ihnimi ne la itre trejin koi Nyidrë, ngacama isa jole i angatr!

Nyimenyime catr la itre macatre. (Iobu 7:6) Ame enehila, nyio ha huliwa ngöne la Bethela e Warwick (New York). Madrine catre nyio troa ce huliwa memine la itre trejin ka ihnimikeu. Nyio a madrin troa kuca asë la hnei nyio hna atrein troa ce huliwa memine la Joxu së Iesu Keriso, atre nyithupen kowe la itre ka mele nyipici.—Mat. 25:34.