Ӕз ибӕл бахудтӕн, уомӕн ӕма динбӕл хуӕст адӕймаги хузӕн н’ адтӕй. Ӕз ӕй бафарстон: «Ду ба Библийӕн ци зонис?» Уайтагъд неци ’сдзуапп кодта, фал фӕстӕдӕр ба загъта, ӕ мадӕ Йегови Ӕвдесӕн ке ӕй ӕма ин е цидӕртӕ ке радзурдта. Ӕз ин балигъстӕ кодтон, цӕмӕй мин фулдӕр еститӕ радзора.

Гъе уӕд ӕгас ӕхсӕвӕ фӕдздзубандитӕ кодтан. Ме ’мбал мин балӕдӕрун кодта, Библимӕ гӕсгӕ дуйне Сайтани къохти ке ӕй (Иоан. 14:30). Сумах, ӕвӕдзи, уой цӕргӕ-цӕрӕнбонти дӕр зудтайдӕ, фал ӕз ба уой фиццаг хатт фегъустон. Мӕ десӕн кӕрон дӕр н’ адтӕй. Мӕнӕн алкӕддӕр уотӕ дзурдтонцӕ, ӕма дуйней хецау Хуцау ӕй, ӕма, дан, ӕй фӕлмӕнзӕрдӕ, удта имӕ хӕран гъуддагӕй неци ес. Фал мӕхе цӕститӕй ци уидтон, е ба еци дзубандити хӕццӕ некуд бадтӕй. Кӕд мӕбӕл ӕдеугурӕй 26 анзи цудӕй, уӕддӕр, зӕрдӕ кӕмӕй бамӕгур уидӕ, уӕхӕн хабӕрттӕ берӕ фӕууидтон.

Mӕ фидӕ лӕггадӕ кодта Америки Еугонд Штатти ӕфсади ӕма ’й уомӕ гӕсгӕ сувӕллонӕй дӕр хуарз зудтон, ядерон тугъдӕй тӕссаг ке ӕй. Ӕфсӕддонтӕ цийфӕнди рӕстӕг дӕр кънопкӕ нилхъевунмӕ цӕттӕ адтӕнцӕ. Калифорний колледжи ку ахур кодтон, уӕд Вьетнами тугъд цудӕй ӕма ӕз дӕр иннӕ студентти хӕццӕ митингтӕмӕ рацӕуинӕ. Мах соргӕй полиций косгутӕ пайда кодтонцӕ дубинкитӕй ӕма газӕй. Еци гази туххӕй нӕ бон уолӕфун ӕма дзӕбӕх уинун нӕбал уидӕ. Хъӕбӕр змӕнст рӕстӕгутӕ адтӕнцӕ. Политиктӕй уӕд еуей, уӕд инней рамариуонцӕ ӕма алли рауӕнти хӕлхъойтӕ цудӕй. Куд архайун гъӕуй, уой фӕдбӕл алкӕмӕдӕр ӕхе гъуди адтӕй ӕма си кӕмӕ игъосгӕй, е бӕрӕг дӕр н’ адтӕй.

1970 анзи мин Аляски цӕгат билгӕрон фӕззиндтӕй куст ӕма си дзӕбӕх берӕ ӕхца бакустон. Уой фӕсте Лондонмӕ ниттахтӕн, мӕхецӕн мотоцикл балхӕдтон ӕма хонсарӕрдӕмӕ нирраст дӕн, над куд амудта, уотӕ. Цалдӕр мӕйей фӕсте бахъӕрдтӕн Африкӕмӕ. Надбӕл мӕбӕл исӕмбӕлиуонцӕ, мӕн хузӕн ескумӕ фӕлледзун ке фӕндадтӕй, уӕхӕн адӕн. Фӕндадтӕй сӕ сӕ зиндзийнӕдтӕй фӕййервӕзун ӕма зӕрдидзӕбӕхӕн цӕрун.

Берӕ зиндзийнӕдтӕ фӕууидтон ӕма мин ку загътонцӕ, зӕнхӕбӕл цитӕ цӕуй, етӕ лӕгъуз ӕнӕуингӕ уодгоймаги фудтӕ ке ’нцӕ, уӕд мӕмӕ  е раст фӕккастӕй. Фал уӕддӕр сагъӕс кодтон, Хуцау ци косуй ӕма цӕмӕннӕ архайуй. Уой мӕ фӕндадтӕй базонун.

Уобӕл ци рацудӕй, ӕма мӕ фарстатӕбӕл дзуӕппитӕ иссирдтон. Удта ма Хуцаубӕл аллихузи уавӕрти еузӕрдон ка ӕй, еци адӕни хӕццӕ дӕр базонгӕ дӕн ӕма сӕ бауарзтон.

Лондонмӕ ку ӕрӕздахтӕн, уӕд ме ’мбали мади хӕццӕ фембалдан, ӕма мин е Библи равардта. Амстердами ку адтӕн, удта еу ӕнсувӕр фӕууидта, Библи гъӕунги фонари рохсмӕ куд кастӕн ӕма мин банхус кодта, Библий туххӕй фулдӕр базонун. Уой фӕсте ба Дублинмӕ рандӕ дӕн ӕма си Йегови Ӕвдесӕнти филиал иссирдтон. Уоми базонгӕ дӕн еу фӕлтӕрдгун ӕнсувӕр Артур Маттьюзи хӕццӕ. Е исарази ӕй мӕ хӕццӕ Библи ахур кӕнун.

Библи хъӕбӕр зӕрдиагӕй ахур кодтон ӕма Йегови Ӕвдесӕнти киунугутӕ ӕма журналтӕ кӕсунбӕл фӕдтӕн. Библи кӕсун дӕр мӕ зӕрдӕмӕ хъӕбӕр цудӕй. Ӕмбурдти ’й уидтон, минкъий сувӕллӕнттӕ дӕр ке зудтонцӕ, зундгин адӕн сӕдӕгай ӕнзти дӕргъи кӕбӕл сагъӕс кодтонцӕ, еци фарстатӕбӕл дзуӕппитӕ: «Зӕнхӕбӕл лӕгъуздзийнадӕ кӕцӕй фӕззиндтӕй? Хуцау ка ӕй? Мӕрдти ести ес?» Мӕ рӕстӕг айдагъдӕр Йегови Ӕвдесӕнти хӕццӕ ӕрвистон, уомӕн ӕма ӕгас бӕсти уонӕй ӕндӕр неке зудтон. Етӕ мин банхус кодтонцӕ Йегови бауарзун ӕма мин мӕ зӕрди зинг иссугътонцӕ, цӕмӕй мӕ бафӕндадтайдӕ ӕ фӕндон ӕнхӕст кӕнун.

1972 анзи донаргъуд райстон. Анзи фӕсте ба ӕнхӕстрӕстӕг пионерӕй лӕггадӕ кӕнун райдӕдтон ӕма рахизтӕн еу минкъий ӕмбурдмӕ Ньюри (Цӕгат Ирланди). Хонхи къолӕбӕл еу дорӕйконд хӕдзарӕ байхуӕрстон. Мӕ фарсмӕ будуртӕ адтӕй ӕма си фонс фӕххезиуонцӕ. Ести радзубанди мин ку баихӕс кӕниуонцӕ, уӕд бал ӕй фиццаг уонӕн радзоринӕ. Уотӕ мӕмӕ кастӕй, ӕма мӕмӕ синӕр цӕгъдгӕй хъӕбӕр лӕмбунӕг игъустонцӕ. Сӕ бон мин унаффӕ раттун н’ адтӕй, фал уони фӕрци исахур дӕн дзоргӕ-дзоргӕй мӕ игъосгутӕмӕ кӕсун. 1974 анзи мӕ иснисан кодтонцӕ сӕрмагонд пионерӕй. Лӕггадӕ кодтон Найджел Питти хӕццӕ. Уой хӕццӕ цӕрӕнбонтӕмӕ хуарз ӕмбӕлттӕ иссан.

Уӕди рӕстӕги Цӕгат Ирланди хъӕбӕр змӕнст адтӕй. Кадӕр ма ’й уотӕ дӕр исхудта, бомбитӕ ӕма фӕтти зӕнхӕ, зӕгъгӕ. Дессаг некӕмӕбал кастӕй, адӕн гъӕунги ку фӕккӕрӕдземӕ уиуонцӕ, кӕрӕдзей куд ӕхстонцӕ, машинттӕ куд фехалиуонцӕ ӕма снайпертӕ кедӕрти куд рамариуонцӕ. Политики ӕма дини хӕццӕ баст гъуддӕгтӕ исхӕлӕмулӕ ’нцӕ. Фал ӕй протестанттӕ дӕр ӕма католиктӕ дӕр зудтонцӕ, Йегови Ӕвдесӕнтӕ политики хӕццӕ баст гъуддӕгти ке нӕ архайунцӕ. Уомӕ гӕсгӕ нӕ тарстан, еске нӕбӕл ӕхе ке ниццӕвдзӕй, ӕма нӕ бон адтӕй сӕребарӕй игъосун кӕнун. Адӕн ӕй фӕззониуонцӕ, змӕнститӕ  бабӕй кӕд ӕма кӕми уодзӕй, уой, ӕма хӕдзарӕй-хӕдзарӕмӕ ку игъосун кӕнианӕ, уӕд нин фӕззӕгъиуонцӕ, цӕмӕй еци ’рдӕмӕ ма рандӕ уӕн.

Фал тӕссаг уавӕртӕ уӕддӕр фӕууидӕ. Еухатт, ӕз ӕма Денис Кирриган, е дӕр пионер, игъосун кодтан нӕ рази ци минкъий горӕт адтӕй, уоми. Йегови Ӕвдесӕнтӕ си н’ адтӕй. Уой размӕ си еу хаттӕй ӕндӕр н’ адтан. Уоми нӕ еу силгоймаг фӕффудгин кодта, сумах, дан, бритайнаг ӕфсӕддонтӕ айтӕ, зӕгъгӕ. Уотӕ имӕ уомӕн фӕккастӕй, ӕма нӕ еу дӕр ирландаг ӕвзаги ’здӕхтбӕл нӕ дзурдта. Мах фӕттарстан, уомӕн ӕма ӕфсӕддонтӕмӕ уотид хуарз цӕстӕй ку кастайсӕ, уӕд дӕ, гӕнӕн ес, ӕма рамардтайуонцӕ кенӕ ба дин дӕ уӕрагисӕр фехстайуонцӕ. Цалинмӕ гъӕунги еци уазали автобусмӕ ӕнгъӕлмӕ кастан, уӕдмӕ еци силгоймаг ци кафей адтӕй, уой размӕ еу машинӕ фӕллӕудтӕй. Е сӕмӕ рацудӕй ӕма машини ка бадтӕй, еци дууӕ нӕлгоймагей хӕццӕ дзорун фӕййагайдта, махмӕ къохӕй райамонидӕ, уотемӕй. Уой фӕсте нӕмӕ машинӕбӕл сабургай ӕрбахӕстӕг ӕнцӕ ӕма нӕ рафарстонцӕ, автобус ци афони фӕццӕуй, уобӕл. Автобус ку ’рбацудӕй, уӕдта шофири хӕццӕ радзурдтонцӕ. Цӕбӕл дзурдтонцӕ, уой нӕ фегъустан. Автобуси ба махӕй ӕндӕр неке адтӕй ӕма нӕмӕ уотӕ фӕккастӕй, ӕма горӕтӕй ку рахезӕн, уӕд нӕ уоми рамардзӕнцӕ, фал неци. Автобусӕй ку хизтан, уӕд шофири бафарстон: «Еци нӕлгоймӕгтӕ дӕ мах туххӕй фарстонцӕ?» Е нин загъта: «Ка айтӕ, уой зонун ӕма син ӕй загътон. Ма тухсетӕ, неци уин ракӕндзӕнцӕ».

1976 анзи Дублини областон конгресси a базонгӕ дӕн Английӕй еу сӕрмагонд пионер Полинӕ Ломакси хӕццӕ. Е адтӕй еузӕрдон, сӕрниллӕг ӕма рӕсугъд хуӕрӕ. Е ’нсувӕри хӕццӕ рӕстдзийнадӕ сӕ минкъийӕй фӕстӕмӕ зудтонцӕ. Анзи фӕсте Полини хӕццӕ нӕ цард байеу кодтан ӕма идарддӕр дӕр Цӕгат Ирландий, Баллимини сӕрмагонд пионертӕй лӕггадӕ кодтан.

Цӕйбӕрцӕдӕр рӕстӕг лӕггадӕ кодтон районон цӕстӕдарӕгӕй Белфасти, Лондондерри ӕма ма змӕнститӕ кӕми цудӕй, ӕндӕр уӕхӕн рауӕнти. Хуӕртӕ ӕма нӕ ӕнсувӕрти ӕууӕндундзийнадӕ деси ӕфтудта. Раздӕр цӕхуӕндӕр дини ӕгъдӕуттӕбӕл федар хуӕстӕнцӕ, кӕмӕдӕрти сӕрӕй бунмӕ кастӕнцӕ ӕма ма си се ’сӕфт дӕр уидтонцӕ. Фал нур хъӕбӕр раййивтонцӕ, уомӕн ӕма сӕ фӕндадтӕй Йеговӕн лӕггадӕ кӕнун. Ӕма син Йеговӕ ке арфӕ кӕнуй ӕма сӕ ке гъӕуай кӕнуй, е бӕрӕг адтӕй.

Ирландий 10 анзи фӕццардтӕн. 1981 анзи ба нӕ фӕххудтонцӕ Галаади скъолай 72 къласмӕ. Ахури фӕсте ба нӕ иснисан кодтонцӕ Сьерра-Леонемӕ (Нигулӕн Африкӕ).

Мах цардан миссионерти хӕдзари. Адтӕй си 11 заманай хуӕрӕ ӕма ӕнсувӕри. Еу къухнийӕй пайда кодтан, удта нин си адтӕй ӕртӕ иуазӕгдони, дууӕ души, еу телефон, еу хъӕппӕлтӕ ӕхснӕн машинӕ ӕма еу соргӕнӕн машинӕ. Рохс нин арӕх ӕвваст ниххуссун кӕниуонцӕ. Тугури адтӕй урутӕ, пъадвали ба – кобритӕ.

Кӕд нӕ уавӕртӕ хуӕрзтӕй н’ адтӕнцӕ, уӕддӕр нин игъосун кӕнуни гъуддаг цийнӕ хаста. Адӕн Библи нимадтонцӕ ӕма нӕмӕ лӕмбунӕг игъустонцӕ. Беретӕ Библи ахур кодтонцӕ ӕма си донаргъуд ка райста, етӕ дӕр минкъий н’ адтӕнцӕ. Бунӕттон адӕн мӕ худтонцӕ «мистер Роберт», Полини ба «миссис Роберт». Фал фӕстӕдӕр, филиали мин фулдӕр ихӕслӕвӕрдтӕ ке фӕззиндтӕй, уой туххӕй уотӕ арӕх нӕбал лӕггадӕ кодтон ӕма Полини райдӕдтонцӕ хонун «миссис Полинӕ», мӕн ба – «мистер Полинӕ». Полини зӕрдӕмӕ е хъӕбӕр цудӕй!

Хуӕртӕ ӕма ӕнсувӕртӕй беретӕ мӕгур цард кодтонцӕ, фал сӕ Йеговӕ некӕд ниууадзидӕ  ӕма сӕбӕл куд батухсидӕ, е арӕх дессаг фӕууидӕ (Матф. 6:33). Гъуди ма ’й кӕнун, еухатт еу хуӕрӕмӕ ӕхца байзадӕй ӕрмӕстдӕр ӕхецӕн ӕма ӕ сувӕллӕнттӕн хуӕруйнаг балхӕнунмӕ, фал сӕ ӕгасейдӕр равардта, малярийӕй хуасӕ балхӕнунмӕ ӕхца кӕмӕн нӕ хъӕрттӕй, уӕхӕн ӕнсувӕрӕн. Фал расагъӕс кӕнайтӕ, еци бон имӕ еу силгоймаг ӕрбацудӕй ӕма ин загъта, цӕмӕй ин ӕ дзиккотӕ фӕкъкъуӕрдтайдӕ. Уой фӕрци хуӕрӕ ӕхца бакуста. Уӕхӕн цаутӕ еу ӕма дууӕ хатти н’ адтӕй.

Сьерра-Леоней фараст анзи фӕллӕггадӕ кодтан, удта нӕ Нигерий Вефилмӕ иснисан кодтонцӕ. Уотемӕй равзурдан устур филиали. Ӕз идарддӕр дӕр офиси кустон, Сьерра-Леоней куд кустон, уотӕ. Фал Полинӕн ба ӕнцон н’ адтӕй. Исахур ӕй алли мӕйӕ дӕр 130 сахатти лӕггадӕ кӕнун, удта ин адтӕй хуарз Библий ахуртӕ дӕр. Нур ба ’й ци хайадӕмӕ иснисан кодтонцӕ, уоми ’й гъудӕй сӕумӕй изӕрмӕ хуӕртӕ ӕма ӕнсувӕрти хъӕппӕлтӕ рӕвдзӕ кӕнун. Исахур унмӕ ’й рӕстӕг багъудӕй. Фал ӕй лӕдӕрун райдӕдта, ӕ кустӕн ин ке аргъ кӕнунцӕ ӕма нисан исӕвардта, цӕмӕй иннӕ вефилӕгти нифс федар кодтайдӕ.

Нигерий бунӕттон ӕгъдӕуттӕн неци зудтан ӕма нӕ берӕ цӕбӕлдӕрти исахур ун гъудӕй. Еухатт мӕмӕ офисмӕ ӕрбацудӕй еу ӕнсувӕр, цӕмӕй мӕ базонгӕ кодтайдӕ, Вефилмӕ ке фӕххудтонцӕ, уӕхӕн хуӕри хӕццӕ. Ку исистадтӕн, цӕмӕй ин расалам кӕнон, уӕд дин еци хуӕрӕ ӕвваст мӕ къӕхти рази ӕ уӕргутӕбӕл ӕрхаудтӕй. Мӕ фур десӕй ма ци ракодтайнӕ, уой нӕ зудтон! Уайтагъд мӕ зӕрдӕбӕл ӕрбафтудӕнцӕ Библийӕй цалдӕр стихи: Гъуддӕгтӕ 10:25, 26 ӕма Раргомадӕ 19:10. Мӕхе нимӕр расагъӕс кодтон: «Зӕгъун ин гъӕуй, цӕмӕй уотӕ ма кӕна». Фал ӕй иннердиги ба лӕдӕрдтӕн, кӕд ӕй Вефилмӕ фӕххудтонцӕ, уӕд ӕй ӕхуӕдӕг дӕр зонуй, Библи цӕбӕл ахур кӕнуй.

Цалинмӕ дзубанди кодтан, уӕдмӕ мӕхецӕн бунат нӕ ирдтон, ӕма ку рандӕ ’нцӕ, уӕд еци ӕгъдауи туххӕй фулдӕр бакастӕн. Ба ’й зудтон, уӕди рӕстӕг ма бӕсти кӕцидӕр хӕйтти уотӕ ке кодтонцӕ ӕма и хуӕрӕ бунӕттон ӕгъдаумӕ гӕсгӕ ке архайдта. Нӕлгоймӕгтӕ дӕр гъе уотӕ сӕ сӕрӕй ниллӕг баковиуонцӕ. Е уобӕл дзорӕг н’ адтӕй, ӕма мин ковгӕ кӕнуй, фал мӕ ке нимайуй, уой бӕрӕггӕнӕн. Уӕхӕн ӕгъдауи туххӕй Библий дӕр финст ӕй (1 Сам. 24:8). Хуарз, ӕма уӕд мӕ хъазар хуӕрӕн неци загътон ӕма ’й нӕ фефсӕрми кодтон.

Нигерий базонгӕ ан, Йеговӕбӕл уӕлдай зин уавӕрти еузӕрдон ка адтӕй, уӕхӕн хуӕртӕ ӕма  ӕнсувӕрти хӕццӕ. Сӕ еу адтӕй Айзайӕ Адагбонӕ b. Рӕстдзийнадӕ е ’ригонӕй базудта, фал фӕстӕдӕр хъотурӕй фӕссӕйгӕ ’й ӕма ’й рарвистонцӕ, хъотургинтӕ кӕми фӕууиуонцӕ, уӕхӕн сӕйгӕдонӕмӕ. Уомӕй уӕлдай си Йегови Ӕвдесӕн неке адтӕй. Кӕд ӕ нихмӕ цудӕнцӕ, уӕддӕр 30 адӕймагемӕн рӕстдзийнадӕ базонунмӕ банхус кодта ӕма еци сӕйгӕдони ӕмбурд фӕззиндтӕй.

1996 нӕ иснисан кодтонцӕ Кений филиалмӕ. Еци бӕсти фӕстаг хатт адтӕн, ме ’мбали хӕццӕ арти размӕ ку дзубандитӕ кодтан, уӕд. Мах цардан Вефили ӕма нӕмӕ иуазӕгуати арӕх ӕрбауайиуонцӕ минкъий цъӕх маймулитӕ, верветкитӕ, зӕгъгӕ. Хуӕртӕй еске рӕзӕ ку фӕххӕссидӕ, уӕд ин сӕ радавиуонцӕ. Еухатт еу хуӕрӕ Вефили ӕ къомнӕти къӕразгӕ рахгӕнун райронх ӕй. Фӕстӕмӕ ку ӕрбаздагъдӕй, уӕдта еци маймулити ӕ хуӕруйнӕгтӕ хуӕргӕй ӕрбаййафта. Хуӕрӕ фур тӕссӕй нигъгъӕр кодта ӕма ледзӕги фӕцӕй, и маймулитӕ ба цъӕхахстгӕнгӕ фендӕбилӕ ’нцӕ.

Полини хӕццӕ цӕун райдӕдтан, суахили ӕвзагбӕл кӕми дзорунцӕ, уӕхӕн ӕмбурдмӕ. Цӕйбӕрцӕдӕр рӕстӕги фӕсте мин баихӕс кодтонцӕ киунуги ахур уадзун (нур хуннуй Библий ахур ӕмбурди хӕццӕ). Еци ӕвзагбӕл сувӕллӕнттӕ дӕр ма мӕнӕй хуӕздӕр дзурдтонцӕ. Ӕрмӕг рагацау бацӕттӕ кӕнинӕ ӕма уой фӕрци фарста бакӕсун исфӕразинӕ. Фал дзуӕппитӕ, публикаций ци финст адтӕй, уомӕй еу минкъий дӕр ку хецӕн кӕниуонцӕ, уӕд си неци балӕдӕринӕ. Хуӕртӕ ӕма ӕнсувӕртӕн хъӕбӕр тӕрегъӕд кодтон, фал алкӕддӕр хъӕбӕр фӕразон ӕма сӕрниллӕг адтӕнцӕ, ӕма еци фембӕлд ӕз ке уадзун, уобӕл некӕд хъур-хъур кодтонцӕ.

Кений нӕбӕл анз дӕр нӕ рацудӕй, уотемӕй нӕ 1997 анзи фӕххудтонцӕ Бруклини Вефилмӕ (Нью-Йорк). Нур адтан, алцидӕр фагӕй фулдӕр кӕми адтӕй, уӕхӕн бӕсти, фал е дӕр еу ӕрдиги хуарз н’ адтӕй (Ӕмб. 30:8, 9). Ами дӕр хуӕртӕ ӕма ӕнсувӕртӕ Йеговӕбӕл хъӕбӕр еузӕрдон адтӕнцӕ. Сӕ рӕстӕг ӕма сӕ фӕрӕзтӕй пайда кодтонцӕ исгъӕздуг унмӕ нӕ, фал Хуцауи Паддзахади гъуддагӕн банхус кӕнунмӕ.

Нӕ царди медӕг ӕй уидтан, хуӕртӕ ӕма ӕнсувӕртӕ аллихузи уавӕрти Йеговӕбӕл куд еузӕрдон адтӕнцӕ, уой. Ирландий адтӕнцӕ еузӕрдон, кӕд си берӕ фудгъуддӕгтӕ цудӕй, уӕд дӕр. Африки ба еузӕрдон адтӕнцӕ, кӕд мӕгур цард кодтонцӕ ӕма си гъӕуӕй-гъӕумӕ еугай Йегови Ӕвдесӕнтӕ адтӕй, уӕд дӕр. Еугонд Штатти ба еузӕрдон адтӕнцӕ, кӕд гъӕздуг цард кодтонцӕ, уӕд дӕр. Аллихузи уавӕрти ибӕл еузӕрдон ка фӕууй, уӕхӕн адӕнмӕ кӕсгӕй Йеговӕ хъӕбӕр фӕццийнӕ кӕнуй!

Ӕнзтӕ, «тунуафӕн куд тагъд фӕккосуй, уомӕй тагъддӕр тӕхунцӕ» (Иов 7:6). Абони мах дӕр, иннӕ еузӕрдон хуӕртӕ ӕма ӕнсувӕрти хӕццӕ лӕггадӕ кӕнӕн сӕйраг хайади Уорвикки. Хъӕбӕр ӕхцӕуӕн нин ӕй, идарддӕр нӕ бон ке ӕй ӕмгуст кӕнун, кӕрӕдзей ӕцӕг уарзтӕй ка уарзуй, уони хӕццӕ. Мах хъӕбӕр амондгун ан, уомӕн ӕма нӕ бон ци ӕй, уой кӕнӕн, цӕмӕй нӕ Паддзах Йесо Киристей гъуддаг размӕ цӕуа. Е ба тагъд рӕстӕги, е ’гас еузӕрдон лӕггадгӕнгутӕн дӕр райарфӕ кӕндзӕй (Матф. 25:34).