1. Eeghe kụ idị aZizọs aḅenhị butelhedom mọ odị ilọ “eekuna aḅirini phọ,” ḅilhẹ eeghe iphụr arurụ kụ edị odị angọ bidị?

 IPHURUKPU asiḍughul otu kụ egbi bọ oteẹny aḍuugh phọ aZizọs, inya abutelhedom odị upuru ni nyodị mọ: “Eeghe kụ kemite oḍeenaan mọ meteẹny . . . eekuna aḅirini phọ?” (Mat. 24:3) Eeni abutelhedom mọ abuphẹ phọ uutughiạn ghan ipẹ bidị kolegheri bọ mọ meteẹny mem mọ kopiemhi bọ Jeruselem r’otu iiḅereghị phọ. AZizọs rapagharanhaạn bọ, o/ghaạph ilọ eekunha aJeruselem r’otu iiḅereghị phọ bịn, kuolọ odị aghaaphọm ilọ “eekuna aḅirini phọ” yira odi bọ nyiidiphọ. Idị egbolhomaam mem eekunha phọ aZizọs aḅẹm mọ: “Kụ ilọ aḍio phọ aḍiphẹ r’amem mọ amuphẹ, onọn oye o/legheri omuton Odẹ phọ bịn. Aruukpaạny phọ odi bọ k’akẹ, r’Oọny phọ, u/legheri.” Kụ odị aphụr rurụ oomo abutelhedom mọ odị mọ “ke/bulama loor” ḅilhẹ kẹn mọ “igon ghan.”—Mạk 13:32-37.

2. Uḍighi ika kụ emhạn bọ maạr dị aKristẹn oḅẹl okuron asiạ phọ kogon ghan?

² Orue omhoọgh aani apelieẹny, iwạ mọ aKristẹn abuọ aJu oḅẹl okuron asiạ phọ ogon ghan. AZizọs aḅenhị budaphạm mọ odị raraạr dị bidị komiịn kụ olegheri mọ amuphe aJeruselem r’otu iiḅereghị phọ mateẹny. Odị aḅẹm mọ: “Mem dị nyina emiịn mọ awe eghạm momereghạ rokoom Jeruselem, ilegheri mọ amem amuphe phọ odị mekpulạn.” Bidị romhiịn ipẹ phọ, pọ odạph iphụr arurụ phọ aZizọs, “oghiil ogheel epẹ araaḅarạph phọ.” (Luk 21:20, 21) Buphẹ odạph bọ iphụr arurụ phọ iphẹn phọ ukpetenhaan ni mem mọ aRom ophiemhi bọ Jeruselem.

3. Yira kooḅeghiọn eeghe siẹn emhuoghaạph phọ ephẹn phọ?

 ³ Rodon yira odi mem dị okarạph aḅirinhi phọ ophọn phọ rasi eekunha. Esi iduọn phọ ewạ ni mọ oomhanham kụ ogon ghan. Siẹn emhuoghaạph phọ ephẹn phọ, yira kooḅeghiọn ilọ omhoọgh ephoghom dị eeleeny iduọn yira okiririom bọ ropogh ipẹ araraạr rekị bọ siẹn aḅirinhi phọ, ilọ ogona asiloor ayira, ḅilhẹ r’ilọ omhaạr oḍighinhom amem mọ esugha bọ.

4. Uḍighi ika kụ yira omoọgh bọ ḍiḅeraạn omhiịn idị iphẹn remite bọ siẹn aḅirinhi phọ remunenhi imiịn aBaibul?

⁴ Yira omoọgh ni igey ariphigh otuạn ogon ghan omhiịn idị araraạr dị remite siẹn aḅirinhi phọ remunenhi imiịn aBaibul phọ. Esi omaạm, aZizọs aghaạph ni okạr araraạr dị kemite dị kilhoghonhaạn iyira ḍighaạgh olhegheri amem dị aḅirinhi phọ aSetan rasi eekunha. (Mat. 24:3-14) Otelhedom mọ Pita uromha iyira mọ ekpeanhaạn ni olher arurụ onhaghanhạn ghan omhunhughan imiịn obọ ekparamhị omheeraam mọ ayira. (2 Pit. 1:19-21) Aḍinyạ aBaibul phọ esughanam bọ omhạn emiighom ikpo-onhụ dị eḅẹm mọ: “Iphẹn ilọ araraạr phọ Enaạn eḍeenaan bọ Jizọs Kraist mọ kenuụn ni emiteghu.” (Ogan. 1:1) Esi iduọn phọ yira omoọgh ni ḍiḅeraạn araraạr phọ remiteghu bọ aḅirinhi phọ nyiidiphọ, ḅilhẹ r’omhiịn idị iphẹn phọ kemunenhi imiịn aBaibul. Kụ eeni yira kowạ ni oghaạph ilọ iphẹn phọ siẹn igbo phọ ayira.

5. Ewạ m’oghel eeghe kụ oḍighi ghan eeghe? (Poghom sifoto phọ.)

⁵ Mem lọ yira rokaạph ilọ imiịn aBaibul, ku/kaaphọgh idị yira bịn kụ ootughiạn mọ kemite. Eeghe kụ iḍighi? Loor esi dị yira ko/wạ oghaạph iyaạr dị kegbaragbaramhị ookpomhoghan phọ. Esi omaạm, yira otue ni onaghạn dị abutooghiạ aḅirinhi phọ rokaạph idị bidị kopamhaghạn iniin iiḅaghamhị dị emite, kụ oseere eephọ. Ku/kureri mọ oghaạph phọ abidị ramunenhi imiịn phọ edi bọ 1 Tesalonikạ 5:3, kparipẹ ghụn obeḍenhọm ipẹ purukụ oghaạph bọ ilọ esi aBaibul phọ epẹ phọ. Yira okpasị ghan raghaạph phọ ayira esi ipẹ oḍighom mọ aZihova ogẹ bọ omiteom, keloghonhaạn ḍighaạgh ookpomhoghan phọ oḅọph “ologhi r’eḍighinom-iyaạr.”—1 Kọr. 1:10; 4:6.

6. Yira otuughạ eeghe siphẹ 2 Pita 3:11-13?

⁶ Bạl 2 Pita 3:11-13. Otelhedom mọ Pita ulhoghonhaạn iyira ḍighaạgh ophamhanhạm ghan ephoghom dị eeleeny mem dị yira rooḅeghiọn imiịn aBaibul. Odị uromha iyira mọ “oseerean olhoghi eeruenheen aḍio phọ aZihova (NW ).” Eeghe kụ iḍighi? U/ḅẹm mọ yira rowạ ghan olhegheri “aḍio phọ aḍiphẹ r’amem mọ” aZihova kasighẹ bọ atu Amagedọn, kuolọ loor esi dị yira rowạ ghan osighẹ amem mọ ayira esugha bọ orolhọm adọl ‘aruukuan r’oḅọgh aghuḍum mọ ayira olhọgh aḍighaạgh Enhaạn.’ (Mat. 24:36; Luk 12:40) Iduọn phọ pọ, yira rowạ ghan ophamhanhạm igey aroozọ, ḅilhẹ r’okuphom owol mọ ephomhoghiạn phọ ayira esi aZihova kụ iḍighi bọ iyaạr phọ yira olhọgh bọ ikuph okumu odị. Orue ophamhanhạm ephoghom mọ epẹ phọ, pọ ewạ mọ ogona siloor.

7. Ika kụ idị yira koḍeenhaan mọ yira rogona ni siloor? (Luk 21:34)

⁷ AZizọs o/ḅenhị butelhedom mọ odị mọ ogon omhiịn ipẹ remite bọ siẹn aḅirinhi phọ bịn, kuolọ mọ bidị ogona aani ni siloor abidị. Pọ kụ iphụr arurụ phọ edi bọ siphẹ Luk 21:34. (Bạl.) Siphẹ phọ aZizọs aḅẹm mọ: “Igona loor anyina.” Oye dị ragona loor raseere  ghan olhoghi ilọ ooto r’osoorominheen dị katue ni apuẹ siya phọ odị r’aZihova, kụ akparaghạ oghel. Iduọn phọ pọ odị rakparaghạ ghan orọl r’ephomhoghiạn phọ Enhaạn.—Prov. 22:3; Jud 20, 21.

8. Eeghe oromha kụ edị otelhedom mọ Poḷ angọ Kristẹn?

⁸ Otelhedom mọ Pọl aromha Kristẹn mọ ogona siloor abidị. Esi omaạm, odị aḅenhị Kristẹn phọ orọl bọ Efesọs mọ: “Imiigha Ioor dọI phọ anyina. Ke/tọI dọI aroIologhi, itọl dọI awe ologhi.” (Efẹ. 5:15, 16) ASetan rakparaghạ ghan ophuẹ asiya phọ ayira r’aZihova, pọ kụ iyaạr phọ aBaibul phọ uromha bọ iyira mọ “ikparamị ghan ghụn ewạ elegheri ipẹ [aZihova] rawạ bọ mọ iḍighi ghan,” obọ yira orue oghoph siloor ayira osighẹ esi izuoghom mọ aSetan.—Efẹ. 5:17.

9. Ika kụ idị yira kotue onaghanhạn ipẹ aZihova rawạ bọ esi ayira?

⁹ ABaibul phọ o/ghaạph oghol oomo araraạr dị ketue epuẹ siya phọ ayira r’aZihova. Ewạ mọ yira kụ osopha ghan ilọ ibadị araraạr dị u/kaạph onyen siphẹ aBaibul phọ. Orue osopha ghan r’osụ olhoghi, ewạ mọ orọph ghan onhaghanhạn “ipẹ [aZihova] rawạ bọ.” Yira kotue ni oḍighi iduọn phọ esi ogbor ghan aạl Ekpo-onhụ phọ Enhaạn kụ ogbirima ghan. Idiphọ yira rokiọm bọ ghisigh konhaghanhạn ogbi phọ aZihova r’oḅilhẹ “oḅọph iitughiạn r’aKraist,” kụ edị yira kotue otọl dọl “awe ologhi,” ghalhamọ iyira u/ngọ ni iilhogh ilọ atorobọ iyaạr. (1 Kọr. 2:14-16) Iniin ooto r’osoorominheen edugh ni olhọgh elhegh; iniin i/dugh.

10. Ighẹn kụ iniin araagharạ ooto r’osoorominheen dị ewạ m’oghel?

¹⁰ Iniin ooto r’osoorominheen dị ewạ m’oghel pọ: iḍọ dị i/kpeanhaạn, ookọ amiim, amale uruur, iitunyan, ophogh asifim iigamaniạn r’ilọ aradaḅạ, ḅilhẹ r’idọ araraạr dị erọl iduọn phọ. (Ps. 101:3) Torobọ amem amulọgh ḍien phọ ayira, Eru phọ, ragbon ghan ni omhiịn eepoogh ophuẹ asiya phọ ayira r’aZihova. (1 Pit. 5:8) Eḍighi maạr lọ yira u/gona loor, aSetan katue ni azụph ekpom ayira eegharạ eḍịm, okpẹ, iigbegheḍiom, mulọgh ḍien, iḅo igbogh ḅilhẹ r’owunhughian ikalhạ. (Gal. 5:19-21) Eeni, emhiighom mọ nạ ka/nuụn amiịn ooto r’osoorominheen phọ odi bọ esi araagharạ phọ iphẹn phọ. Kụ eḍighi maạr dị yira u/nuụn utuphuron utoph, pọ keḍum ni idiphọ atukarạph arooghọ bịn ekọm iiḅaghamhị.—Jems 1:14, 15.

11. Eeghe ooto r’osoorominheen dị ko/nuụn olọgh elhegh kụ edị ewạ m’oghel, kụ eeghe kụ iḍighi?

¹¹ Oniin ooto r’osoorominheen dị ro/nuụn ghan kolhọgh elhegh pọ ikarạph arighirị. Ooḅeghiọn eḍeenhaan. Oḅẹm mọ nạ rakumuan ghan r’oye dị u/ḍighi onyọ Ogbaanhaạn AZihova. Kụ nạ raloghonhaạn ghan ni nyodị ḍighaạgh loor esi dị nạ rawạ mọ odị alhegheri mọ Abugbaanhaạn AZihova abugey awe ni. Kụ eeni amem odị r’anạ kụ rekị ghan olhe eḍien ootaany. Esighẹ rekị bịn nyinha emhiigh ogbor ghan oḍighi iduọn phọ. Eeni amem oye phọ rakaạph ghan raghaạph ipesi, kụ eḅẹl amem mọ nạ ughel ghan ni. Esighẹ rekị bịn araghaạph phọ eluạn nyinhạ. Kụ ḍiniin aḍio bịn odị amhạgh nyinhạ mọ imite aani mem dị momhạn oḍighi aḍio phọ, kụ nạ amheera. Enụm enụm bịn iyạl phọ anyinha emhiigh omhiịn araraạr eniin phọ eten phọ. Siẹn mesi bọ, keḅilhẹ ni ebia kụ nạ amiigh ozọ aani ghan idiphọ oyaghirị phọ anạ ḍughụm? Okạr agey, yira rolọgh ghan ni we eghuan koḅilhẹ olhoghonhaạn bidị ḍighaạgh, kuolọ olhegheri mọ araagharạ abuphẹ yira rogbor ghan bọ kotuman kimhoogh ni iyira. (1 Kọr. 15:33) Eḍighi maạr dị yira ogona loor idiphọ aZizọs uḅenhị bọ iyira, yira kokel li ooḍikuan dị  u/kpeanhaạn r’awe dị ro/dạph ghan siigbu phọ aZihova. (2 Kọr. 6:15) Yira kolọgh ni elhegh ooto r’osoorominheen phọ bịn okel.

12. Iwạ mọ abutelhedom mọ aZizọs oḍighi ghan eeghe kụ okoriom eekunha phọ?

¹² AZizọs o/wạ mọ abutelhedom mọ odị oghura raghaạgh bịn kụ okoriom ghan eekunha aḅirinhi phọ. Odị angọ ni bidị oḍighi. Odị atọ aḅenhị mọ bidị ogbeelhom iiḅi iinhaghạn phọ “emiigh JeruseIem r’oomo phọ aJudia r’aSameria, kụ esiemi eekuna aḅirini phọ.” (Iiḍighi 1:6-8) Opọ phọ k/oọny oḍighi! Bidị u/peghom ephegh mem mọ abidị, ukuọm loor oḍighi phọ.

13. Uḍighi ika kụ i/wạ bọ opheghom ephegh moọny eepoogh lọ yira omhoọgh? (Kolosị 4:5)

¹³ Bạl Kolosị 4:5. Orue ogona asiloor phọ ayira pọ ewạ m’ooḅeghiọn ipẹ yira roḍighinhom ghan bọ mem mọ ayira. “Araraạr dị olhoghi u/seere” ketue ni emitenhaan torobọ onyọ ayira. (Eccl. 9:11) Yira otue ni omugh ekperenhom.

14-15. Ika kụ idị yira komaạr oḍighinhom mem mọ ayira? (Hibru 6:11, 12) (Poghom afoto phọ.)

¹⁴ Yira komaạr oḍighinhom mem mọ ayira esi oḍighi ghan ogbi phọ aZihova ḅilhẹ r’okparamhị asiya phọ ayira r’odị. (Jọn 14:21)  Ewạ mọ ‘oghim bịn ku/pighironu, kụ osighẹ oomo inyaạm mọ ayira oḍighinhom ongọ Omoọgh-we phọ.’ (1 Kọr. 15:58) Yira oḍighi iduọn phọ kụ eteẹny eekunha phọ—mughumọ eekunha aghuḍum mọ ayira obobọ eekunha okarạph aḅirinhi phọ ophọn phọ—yira ko/loghoma saị.—Mat. 24:13; Rom 14:8.

¹⁵ Rodon, aZizọs akiọm ni ghisigh raaḅakị bumatuạn phọ odị iduọn bidị rogbeelhom bọ ilọ Omhạr phọ k’Enhaạn oomo isiẹn ade phọ. Odị maḍighi pakirị phọ opọ odị. Dị eego esi oḍighom mọ aZihova, aZizọs mutughemhị iyira ilọ oghaạph iiḅi iinhaghạn phọ, kụ odị ungọ ni iyira raraạr arukumuan phọ ewạ bọ ogbeelhom iiḅi iinhaghạn phọ. (Mat. 28:18-20) Yira koḍighi aani pakirị phọ ophọn ayira esi okuọm aloor ogbeelhom r’otughemhị igey phọ, ḅilhẹ r’omhaạr ogon ghan kụ okoriom dị aZihova kasiemhi eekunha aḅirinhi phọ ophọn phọ. Torobọ oye dị adạph oromha phọ odi bọ Hibru 6:11, 12, kapamhanhạm ni oḍuomolhoghi phọ odị “ateenyẹ eekuna phọ.”—Bạl.

16. Yira osopha oḍighi eeghe?

¹⁶ AZihova magu ni ḍio phọ r’amem mọ odị kasiemhi bọ eekunha aḅirinhi phọ aSetan. Eteẹny ḍio phọ aḍiphẹ phọ aZihova ka/bilhẹ omhunhenhi oomo imiịn phọ edi bọ siphẹ Ekpo-onhụ phọ odị. Eeni amem, ketue ni ekịgh mudị eekunha aḅirinhi phọ reebinya ni. Kuolọ, aḍio phọ aZihova “kee/binya!” (Hab. 2:3) Esi iduọn phọ osopha ‘oghiọm aghisigh ophogh ghan aZihova,’ kụ oḍeenhaan ‘eegharạ okori ghan Enhaạn apelieẹny phọ ayira.’—Mic. 7:7.