1. Иисус бойыныҥ ӱренчиктерине ӧйдиҥ учы керегинде нени айткан ла олорды неге кӱӱнзеткен?

 ИИСУСТЫҤ божоорынаҥ канча да кӱн озо, тӧрт ӱренчиги базып келеле, мынайып сураган: «Чак тӱгенердиҥ темдеги кандый болор?» (Матф. 24:3). Бу ӱренчиктер Иерусалим ле ондогы Кудайдыҥ ӧргӧӧзи качан јоголтыларын билерге кӱӱнзеген болор. Иисус олорго јаҥыс иудейлердиҥ системазы јоголтылары керегинде эмес, је бистиҥ јадып турган телекейдиҥ учы келери керегинде айткан. Учы качан болор? Бу керегинде Иисус мынайып айткан: «Ол кӱнди эмезе саатты кем де билбес, теҥеридеги ангелдер де, Уулы да билбес, јаҥыс Ада билер». Оноҥ Иисус ӱренчиктерин «сергек» болзын деп кӱӱнзеткен (Марк 13:32—37).

2. Баштапкы чакта христиандарга нениҥ учун сергек болор керек болгон?

² Баштапкы чакта Иудей јериндеги христиандар сергек болбогон болзо, јӱрӱмин јылыйтып салардаҥ айабас болгон. Нениҥ учун дезе Иисус олорго иудейлердиҥ системазы јоголтыларын канайып билип алатанын айдып берген. Оныҥ сӧстӧри: «Иерусалимди черӱ курчап алганын кӧрӱп ийзегер, оныҥ ээн туруп калар ӧйи јууктап келди деп билигер» (ЈТ). Айдарда, Иисустыҥ айтканыла болзо, ӱренчиктерге, Иерусалимди курчап алганын кӧрӱп ийзе, кырлардӧӧн качар керек болгон (Лука 21:20, 21). Оныҥ учун Иерусалимди Римниҥ черӱзи јемирип саларда, Иисустыҥ сӧзин уккан улус тирӱ арткан.

3. Бу јӧрмӧлдӧ бис нени кӧрӧрис?

³ Бис бу калју ӧйдиҥ чек ле учында јадып турганыс, оныҥ учун биске де сергек болор керек. Бу јӧрмӧлдӧ телекейдиҥ айалгазын кӧрӱп, канайда керсӱ болуп артарын кӧрӧрис. Анайда ок бойын канайып  шиҥдеп кӧрӧрин ле артып калган ӧйди канайып чын тузаланарын кӧрӧрис.

4. Биске нениҥ учун судурлардыҥ бӱдӱп турганыла јилбиркеп турар керек?

⁴ Биске телекейдиҥ ӱстинде не болуп турганын кӧрӧргӧ јилбилӱ болот. Нениҥ учун дезе анайып, Агару Бичиктиҥ судурлары бӱткенин кӧрӧдис. Темдектезе, Иисус Сатананыҥ телекейи учына једип келзе, јердиҥ ӱстинде не болорын айдып салган (Матф. 24:3—14). Апостол Пётр дезе бӱдӱмјигис бек болзын деп, бистерди бӱгӱнги кӱнде судурлардыҥ канайып бӱдӱп турганына ајару этсин деп кӱӱнзеткен (2 Пётр 1:19—21). Агару Бичиктиҥ калганчы бичигинде мындый сӧстӧр бар: «Иисус Христостоҥ болгон ачылта. Бу ачылтаны Ого удабастаҥ не болотонын Бойыныҥ кулдарына кӧргӱзейин деп, Кудай берген» (Ачыл. 1:1). Оныҥ да учун бис судурлардыҥ бӱдӱп турганын кӧрӱп ийзеес, бой-бойыбыска оны тӱрген ле куучындаар кӱӱнис келет.

5. Биске нени эдер керек, нени этпес керек? (Јурукты база кӧрӱгер.)

⁵ Је ака-эјелерле библиялык судурларды куучындажып турала, бодоп ло неме сананып таппас керек. Оноҥ ӧскӧ јуунныҥ бирлиги бузулардаҥ айабас. Темдектезе, бис телекейдеги башкараачылар кандый бир блааш-тартышту сурактыҥ аайына чыгарга јуулыжып, амыр ла јеткил јӱрӱм тургузарга турган деп угуп ийдис. Мынаҥ улам кем-кем тӱрген ле 1 Фессалоникадагыларга 5:3-теги судур бӱдӱп јат деп сананар болор. Оныҥ учун ака-эјелерле судурларды куучындажып јаткан тушта, бойыстыҥ сананып тапкан немегисти эмес, карын Иегованыҥ организациязыныҥ бу јуукта айдылган јетирӱлерин шӱӱжип турар керек. Ол тушта санааларыс ла кӧрӱмис јаҥыс болор (1 Кор. 1:10; 4:6).

6. 2 Пётр 3:11—13-теҥ бис кандый ӱредӱ аладыс?

⁶ 2 Пётр 3:11—13 кычырыгар, ЈТ. Апостол Пётр библиялык судурларды нениҥ учун шиҥдеер керек деп оҥдоорго болужат. Ол бисти «Иегованыҥ кӱнин» сакызын деп кӱӱнзеткен. Нениҥ учун? Армагеддон болотон «кӱнди, саатты» чоттоп аларга эмес (Матф. 24:36; Лука 12:40). Карын бу арткан ӧй слердиҥ јӱрӱмигер агару ла эткен керектереер Кудайга чындык болгоноорды кӧргӱзер учурлу. Ӧскӧртӧ айтса, Иеговага акту јӱректеҥ иштеп турганыстаҥ оны тыҥ сӱӱп турганыс кӧрӱнип турар учурлу. Је мынайып эдерге, бойысты шиҥдеп кӧрӱп турар керек.

7. Бойоорды шиҥдеп кӧрӧри дегени ол не? (Лука 21:34).

⁷ Иисус бисти јӱк ле бу телекейде болуп турган айалганы кӧрӱп турзын деген эмес, је «бойыгарды шиҥдеп кӧрӱгер» деп айткан. (Лука 21:34 кычырыгар, ЈТ.) Бу не дегени? Бу дезе Иеговала бистиҥ колбуларыска каршу јетиргедий не-немени ајарып ийеле, оноҥ кыйыжарга нени-нени эдери. Ол тушта бис Иегованыҥ сӱӱжинде артарыс (Укаа 22:3; Иуда 20, 21).

8. Апостол Павел христиандарды неге кӱӱнзеткен?

⁸ Апостол Павел де христиандарды бойын шиҥдеп кӧрӱп турзын деп айткан. Ол Эфестеги христиандарга мынайып бичиген: «Эдип јӱргенигерди ајарыгар!  Санаа-укаазы јок улус чылап эмес, ойгор улус чылап јӱригер» (ЈТ) (Эф. 5:15, 16). Сатана Иеговала колбуларысты бузарга јаантайын албаданат. Оныҥ учун Агару Бичиктеги бу сӧстӧрди ундыбай јӱрӱгер: «Иегованыҥ кӱӱни неде болгонын оҥдоп аларга албаданыгар» (ЈТ). Анайып, бис Сатананыҥ кандый да тузагына тӱшпезис (Эф. 5:17).

9. Иегованыҥ кӱӱн-табын оҥдоорго нени эдер керек?

⁹ Агару Бичикте Иеговала колбуларыска каршу јетиргедий керектердиҥ јӱк кезиги бичилип калган. Је биске кезикте Агару Бичимелде чокум айдылбаган сурактар аайынча јӧптӧр чыгарарга келижет. Мындый айалгада биске ойгор јӧптӧр чыгарарга не болужар? Биске «Иегованыҥ кӱӱни неде болгонын» (ЈТ) оҥдоп турар керек. А оҥдоорго дезе Агару Бичикти јаантайын кычырары ла шӱӱп сананары болужар. Иегованыҥ кӱӱн-табын јакшы оҥдоп, «Иисус чылап санан[арга]» албаданып турзаас, Агару Бичикте кандый бир сурагыс аайынча нени эдери чокум айдылбаган да болзо, чын эдип јӱрерис (1 Кор. 2:14—16). Јӱрӱмде каршу јетиргедий керектердиҥ кезиги јеҥил кӧрӱне берет, је кезиги кӧскӧ илинбей јат.

10. Каршу экелер керектердиҥ кезигин тоолоп беригер.

¹⁰ Кыйып јӱретен каршулу керектердиҥ кезиги: сертежери, аракызак болоры, ӧткӱре кӧп ажанары, ачу сӧстӧр айдары, порнография ла базынышла толо немелер кӧрӧри, оноҥ до ӧскӧлӧри (Сар. 101:3). Бистиҥ ӧштӱ, Дьявол, Иеговала колбуларысты ӱрейтен аргалар бедирейт (1 Пётр 5:8). Оныҥ учун сергелеҥ болбозоос, Сатана бистиҥ санаабыска ла јӱрегиске кӱйӱништи, тӧгӱнденишти, ачыркак болорын, јаман кӧрӧрин, тыҥзынарын, ачынчак болорын ӱрендеп салардаҥ айабас (Гал. 5:19—21). Баштап тарый мындый сезимдер ӧзӱп келетсе, јаман ла неме јок деп билдирер болор. Је коронду ӱреннеҥ ӧзӱп келген сезимдер јаанап келзе, оны кодорып таштабазаас, тӱбекке экелер (Иак. 1:14, 15).

11. Кӧскӧ илинбес кандый каршулу керектеҥ кыйыжарыс ла нениҥ учун?

¹¹ Је эмди кӧскӧ илинбейтен каршулу керектерди кӧрӱп ийектер. Олордыҥ бирӱзи — Иеговага иштебей турган улусла јуук куучындажары. Темдектезе, слер Иегованыҥ Керечизи эмес кижиле иштеп турганаар. Слер ого Иегованыҥ Керечилери јакшы улус деп кӧргӱзерге, јалакай баштанып ла болужып турган болороор. Ол кижи кезикте слерди кожо ажанак деп кычырат. Слер јӧпсинип јадаар. Оноҥ јаантайын кожо ажанып баштайдаар. Кезикте куучын јаман јанындӧӧн јайылып турза, слер баштап тарый андый куучынды јӧмӧбӧй јадаар, је бир канча ӧйдӧҥ ӱрене бередеер. База бир эмеш ӧйдӧҥ ол кижи слерди иштиҥ кийнинеҥ кайда-кайда барып ажанак деп кычырарда, слер бого јӧпсинип ийдеер. Је оноҥ слердиҥ санаагар ол кижиниҥ санаазындый боло берет. Јаан удабай слердиҥ эдип турган керектереер де оныҥ керектерине тӱҥей болуп калар. Бис ончобыс улуска јаантайын јалакай баштанып, олорды тооп турарга кӱӱнзеп турган эмейис. Је ундыбай турактар, кемле јуук куучындажып турганыс, ол ло кижидий болуп каларыс (1 Кор. 15:33). Карын Иисустыҥ: «Бойыгарды шиҥдеп кӧрӱгер» —  деп айтканыла јӱрзеес, Иегова Кудайдыҥ нормаларыла јӱрбей турган улусла јуук куучындашпаска албаданарыс (2 Кор. 6:15). Анайып, озолондыра јеткерди кӧрӱп ийеле, туура кача берерис.

12. Иисустыҥ ӱренчиктери иудейлердиҥ системазыныҥ јоголтыларын сакып тура, нени эдер учурлу болгон?

¹² Иисустыҥ ӱренчиктери иудейлердиҥ системазыныҥ јоголтыларын сакып тура, јайымжыбас учурлу болгон. Иисус олорго «Иерусалимде, Иудей ле Самар ичинде, јердиҥ јаказына да јетире» сӱӱнчилӱ јарды јарлазын деген. Олорды сӱреен јаан иш сакыган! (Ап. ижи 1:6—8). Иисустыҥ ӱренчиктери ончо улуска јарлаарга, бастыра ийде-кӱчин берип, ӧйди чын тузалангандар.

13. Биске нениҥ учун ӧйди чын тузаланар керек? (Колоссыдагыларга 4:5).

¹³ Колоссыдагыларга 4:5 кычырыгар, ЈТ. Бис бойысты шиҥдеп кӧрӱп турзаас, ӧйди канайып тузаланып турганыска јаан ајару эдерис. Нениҥ учун дезе бис ончобыс «ӧйдӧҥ лӧ сакыбаган јанынаҥ болгон айалганаҥ камаанду» (Эккл. 9:11). Бистиҥ јӱрӱмис кенетийин ӱзӱле берердеҥ айабас.

14, 15. Бис канайып ӧйди чын тузаланарыс? (Еврейлерге 6:11, 12). (Јурукты база кӧрӱгер.)

 ¹⁴ Бис Иегованыҥ табын бӱдӱрип, оныла колбуларысты оноҥ тыҥ этсеес, ӧйди чын тузаланарыс (Иоанн 14:21). Оныҥ учун апостол Павелдиҥ айткан сӧстӧрин биске ундыбас керек: «Турумкай болыгар, јана баспагар, Кайраканга иштеерине бастыра бойыгарды беригер [«Кайраканныҥ ижине јаантайын кӧп иштенигер», ЈТ]» (1 Кор. 15:58). Анайып, бис божоп то јатсаас, бу телекейдиҥ учы да келзе, ӧйди калас ӧткӱрдис деп сананбазыс (Матф. 24:13; Рим. 14:8).

¹⁵ Иисус бӱгӱнги кӱнде ӱренчиктерине бастыра јердиҥ ӱстинде Каандык керегинде јарды јарлаарга анайып ла болужып јат. Ол бойыныҥ сӧзин бӱдӱрет: Иегованыҥ организациязы ажыра јарлаарга ӱредип јат ла ого керектӱ ончо јепселдерди берип јат (Матф. 28:18—20). Је бис бойыстыҥ јаныстаҥ јарлаарга ла ӱренчиктер белетеерге албаданып јадыс. Анайда ок бис Иегованыҥ бу калју телекейин јоголторын сакып тура, сергелеҥ болодыс. Еврейлерге 6:11, 12-деги (кычырыгар, ЈТ) јӧпти тузаланып турзаас, «ижемјибис учына јетире бек болор».

16. Биске кандый сӧстӧрди ундыбас керек?

¹⁶ Иегова Сатананыҥ телекейин јоголтор кӱнди ле саатты тургузып салган. Ол тушта оныҥ Сӧзинде јаҥы телекей керегинде айдылган ончо судурлар кыйалта јогынаҥ бӱдӱп калар. Кезикте биске бу ӧй удап турган деп билдирер болор. Је Иегованыҥ кӱни «оройтыбай» једип келер! (Авв. 2:3). Оныҥ учун «Иегованы сакыырга арыбазым, аргадаачы Кудайымды чыдажып сакыырым» деген сӧстӧрди ундыбай јӱректер (Мих. 7:7).