1. Finshi Yesu a-aswike abasambi bakwe ilyo bamwipwishe pa nshita impela yali no kwisa, kabili cinshi abebele ukulacita?

 ILYO kwashele inshiku ishinono ukuti Yesu afwe, abasambi bakwe 4 bamwipwishe ukuti: “Cinshi tukeshibilako . . . ukuti icalo cili ku mpela?” (Mat. 24:3) Aba basambi nalimo balefwaya ukwishiba ilyo umusumba wa Yerusalemu e lyo ne tempele fyali no konaulwa. Pa kubaasuka, Yesu talandile fye pa fyo umusumba wa Yerusalemu e lyo ne tempele fyali no konaulwa, lelo alilandile na pa konaulwa kwa calo mu nshita ya ku mpela, icalo ico tuleikalamo pali ino nshita. Ilyo Yesu alelanda pa konaulwa kwa calo, atile: “Takuli uwaishiba ubushiku bulya nelyo inshita, nangu fye ni bamalaika mu muulu nangu fye Mwana, kano Tata e waishiba.” Lyena aebele abasambi bakwe ukuti, “mulelola.”—Marko 13:32-37.

2. Mulandu nshi Abena Kristu abaleikala mu Yerusalemu balingile ukubela abalola?

² Pa kuti Abena Kristu ba kubalilapo abaYuda bapusuke impela iyali no kwisa, balingile ukuba abalola. Yesu alyebele abasambi bakwe ifyo bali no kwishibilako ukuti umusumba wa Yerusalemu wali no konaulwa. Atile: “Ilyo mukamona abashilika bashinguluka umusumba wa Yerusalemu, mukeshibe ukuti uli mupepi no konaulwa.” Ifi nga fyacitika, balingile ‘ukutendeka ukufulumukila ku mpili,’ nga filya fine Yesu abebele. (Luka 21:20, 21) Abaumfwile ifyo Yesu abebele balipuswike ilyo abena Roma baonawile umusumba wa Yerusalemu.

3. Finshi twalasambilila muli cino cipande?

 ³ Tuleikala mu nshiku sha kulekelesha isha cino calo cabipa. Kanshi na ifwe tufwile ukuba abalola kabili abacenjela. Muli cino cipande twalasambilila ifyo twingaba abalola ilyo tulemona ifilecitika mu calo, ifyo twingaba abacenjela, e lyo ne fyo twingalabomfya bwino inshita iisheleko.

4. Mulandu nshi tufwaisha ukumona ifyo ifilecitika mu calo filefikilisha amasesemo ya mu Baibolo?

⁴ Kwaliba ifintu ifyacindama ifilenga twalafwaisha ukwishiba ifyo ifilecitika mu calo, filefikilisha amasesemo ya mu Baibolo. Ku ca kumwenako, Yesu alilandile pa fintu ifingalenga twaishiba ilyo icalo ca kwa Satana cikapwa. (Mat. 24:3-14) Umutumwa Petro atukoseleshe ukulabika amano ku fyo aya masesemo yalefikilishiwa pa kuti icitetekelo cesu ciletwalilila ukuba icakosa. (2 Pet. 1:19-21) Ibuuku lya kulekeleshako ilya mu Baibolo lyatendeka na mashiwi ya kuti: “Ifyasokololwa muli lino ibuuku fintu ifyo Lesa asokolwelele Yesu Kristu pa kutila Yesu alange abasha bakwe ifili no kucitika bwangu bwangu.” (Ukus. 1:1) Kanshi e cilenga tulebika amano ku filecitika mu calo pa kuti tulemona ifyo filefikilisha amasesemo ya mu Baibolo. Kabili nalimo kuti twalafwaisha ukwebako abanensu pali ifi fintu.

5. Finshi ifyo tatufwile ukucita, lelo finshi ifyo tufwile ukucita? (Moneni ifikope)

⁵ Nomba ilyo tulelanshanya amasesemo ya mu Baibolo tatufwile ukulatunganya fye ifili no kucitika. Mulandu nshi twalandila ifi? Pantu tatufwaya ukulanda ifili fyonse ifingalenga mu cilonganino mwaba amalekano. Ku ca kumwenako, nalimo kuti twaumfwa uko intungulushi shilelanshanya pa fyo shingapwisha ifimfulunganya no kuleta umutende. Mu cifulo ca kulatunganya fye ukuti ifyo intungulushi shilandile filefikilisha ubusesemo bwaba pali 1 Abena Tesalonika 5:3, tufwile ukwishiba ifyebo ifipya. Nga ca kuti ifyo tulelanshanya filefuma mu mpapulo isho icilonganino ca kwa Yehova citupeela, tukalenga aba mu cilonganino baba abaikatana “mu kutontonkanya kumo kwine.”—1 Kor. 1:10; 4:6.

6. Finshi tusambilila ku mashiwi yaba pali 2 Petro 3:11-13?

⁶ Belengeni 2 Petro 3:11-13. Umutumwa Petro alilandile umulandu tulingile ukulasambilila pa masesemo ya mu Baibolo. Atukoseleshe ‘ukulalolela kabili ukulafulukisha ukubapo kwa bushiku bwa kwa Yehova.’ Mulandu nshi atwebele ifi? Te pa mulandu wa kufwaya ukwishiba “ubushiku bulya ne nshita” ilyo Yehova akaleta Armagedone, lelo ni co tufwaya ukubomfya inshita isheleko ukuba ne “mibele ya mushilo ne milimo ya bukapepa.” (Mat. 24:36; Luka 12:40) Mu nshila imbi kuti twatila tufwaya ukuba ne mibele iisuma e lyo no kulabombela Yehova pa mulandu wa kuti twalimutemwa. Pa kuti tulecita ifi, tufwile ukuba abacenjela.

7. Tulanga shani ukuti twaliba abacenjela? (Luka 21:34)

⁷ Yesu taebele fye abasambi bakwe ukuba abacenjela ku fyalecitika mu calo, lelo abebele no kuti balingile ukuba abacenjela ku fyo balecita. Baibolo yalilandapo pali ici cishinka pali Luka 21:34. (Belengeni.) Umfweni amashiwi Yesu alandile aya kuti: “Mucenjele.” Umuntu uwacenjela alabika sana amano ku cili conse icingonaula bucibusa bwakwe na Yehova kabili alesha  apo engapesha ukukanacita ifingonaula bucibusa bwakwe na Yehova. Nga acita ifi, alatwalilila ukuba mu kutemwa kwa kwa Lesa.—Amapi. 22:3; Yuda 20, 21.

8. Finshi umutumwa Paulo aebele Abena Kristu?

⁸ Umutumwa Paulo aebele Abena Kristu ukuba abacenjela. Ku ca kumwenako, aebele Abena Kristu mu Efese ukuti: “Cenjeleni, mwilaenda kwati bawelewele lelo mule-enda nga ba mano.” (Efes. 5:15, 16) Lyonse Satana afwaya ukonaula bucibusa bwesu na Yehova, e mulandu wine Baibolo itwebela ukuti, “muleiluka icaba ukufwaya kwa kwa Yehova” pa kuti muleicingilila kuli Satana.—Efes. 5:17.

9. Kuti twaishiba shani ukufwaya kwa kwa Yehova?

⁹ Baibolo tayalanda pali fyonse ifingonaula bucibusa bwesu na Yehova. Lyonse tufwile ukulasalapo ifya kucita pa fintu ifyo Amalembo yashalandapo mu kulungatika. Pa kuti tulesala bwino ifya kucita, tulingile ukwishiba “ukufwaya kwa kwa Yehova.” Kuti twaishiba ukufwaya kwa kwa Yehova nga tulebelenga Icebo ca kwa Lesa lyonse no kutontonkanya pa fyo tulebelenga. Nga twaishiba ifyo Yehova afwaya e lyo no kulatontonkanya “nge fyo Kristu atontonkanya,” tukalaenda “nga ba mano,” na lintu pashili amafunde ya mu kulungatika aya kututungulula. (1 Kor. 2:14-16) Inshita shimo cilanguka ukwishiba ifyo tatulingile ukucita, lelo inshita shimo tacanguka.

10. Mibele nshi imo iyabipa iyo tufwile ukucenjelako?

¹⁰ Pa fyabipa ifyo tulingile ukucenjelako paba ukusengasenga, ukunwesha ubwalwa, ubuliili, ukulanda amashiwi ayabipa, ukutamba amafilimu umwaba ubunkalwe, ukutamba ifye shiku, e lyo ne fyapala ifi. (Amalu. 101:3) Satana umulwani wesu afwaya ukuti twaleka ukuba ifibusa na Yehova. (1 Pet. 5:8) Nga tatucenjele, Satana kuti alenga twaba no mufimbila, no bufi, akaso, ulupato, amatutumuko, e lyo no bukali. (Gal. 5:19-21) Pa kubalilapo, kuti twalamona kwati tatwakwata iyi mibele. Nomba nga tatucitilepo cimo pa kuti tuleke iyi mibele yabipa, ikalaya ilebipilako fye ica kuti ku ntanshi kuti yalenga twacita ifyabipa.—Yako. 1:14, 15.

11. Ni nshila nshi imo iyo tushingeluka bwangu iyo tulingile ukucenjelako, kabili mulandu nshi?

¹¹ Inshila imo iyo tushingeluka bwangu, kwangala na baba ne mibele yabipa. Tontonkanyeni pali ici ica kumwenako. Tutile mulabomba incito nomba uo mubomba nankwe te Nte ya kwa Yehova. Apo mulefwaya uo mubomba nankwe eshibe ukuti Inte sha kwa Yehova bantu abasuma, mulemwafwilisha kabili mulemulanga icikuuku. Inshita shimo muleliila na pamo ifya kulya fya kasuba. Nomba umuye nshiku mwatendeka ukuliila pamo ifya kulya fya kasuba lyonse. Kabili atendeka ukulanda pa malyashi ya bulalelale, lelo imwe tamulelandapo. Mu kupita kwa nshita, amalyashi ya musango uyu yabelela ica kuti yaleka no kumukalifya. Lyena bushiku bumo, uo mubomba nankwe amweba ukuti mwangalile pamo pa numa ya kwinuka ku ncito. Na imwe mwasumina. Mu kuya kwa nshita, mwatendeka ukutontonkanya nge fyo atontonkanya. Nga cabe fi te kuti pakokole, na imwe kuti mwatendeka ukulacita ifintu nge fyo uo mubomba nankwe acita. Nangu ca kuti twaliba ne cikuuku kabili tuli ba mucinshi ku bantu bonse, tulingile ukulaibukisha ukuti ilingi tulacita ifintu ifyo abo tulesangwa nabo bacita. (1 Kor. 15:33) Nga tuli abacenjela  nga filya Yesu atwebele, tatwakaleba ifibusa na bantu abashikonka amafunde ya kwa Yehova. (2 Kor. 6:15) Tukalamona ifingatuletelela kabili tatwakaleficita.

12. Cinshi abasambi ba kwa Yesu baalingile ukulacita ilyo balelolela impela ya calo?

¹² Yesu talefwaya abasambi bakwe baleikala fye ilyo baalelolela impela ya calo. Alibapeele umulimo uo balingile ukubomba. Abebele ukulabila imbila nsuma “mu Yerusalemu na mu Yudea monse na mu Samaria, na ku mpela ya pano isonde.” (Imil. 1:6-8) Uyu wali mulimo uukalamba uo Yesu apeele abasambi bakwe. Ilyo balebombesha ukubila imbila nsuma ku bantu, balebomfya bwino inshita iyo bakwete.

13. Mulandu nshi tulingile ukulabomfesha bwino inshita? (Abena Kolose 4:5)

¹³ Belengeni Abena Kolose 4:5. Pa kuti tube abacenjela, tufwile ukulabika sana amano ku fyo tubomfya inshita. “Ifintu fyabula ukwenekela” ficitikila fye umuntu uuli onse. (Luk. Mil. 9:11) Kuti twafwa ukwabula ukwenekela.

14-15. Kuti twabomfya shani bwino inshita? (AbaHebere 6:11, 12) (Moneni ne icikope.)

¹⁴ Kuti twabomfya bwino inshita nga tulecita ifyo Yehova afwaya, kabili tulekosha  bucibusa bwesu nankwe. (Yoh. 14:21) Tufwile ukuba “abashangila, abashitelententa, abacincila pe mu mulimo wa kwa Shikulu.” (1 Kor. 15:58) Kanshi ilyo impela ikesa, e kutila impela ya cino calo nelyo impela ya bumi bwesu, tatwakalanguluke ukuti kanshi nga twalebombesha mu mulimo wa kwa Yehova.—Mat. 24:13; Rom. 14:8.

¹⁵ Muno nshiku, Yesu alitwalilila ukutungulula abasambi bakwe ilyo balebila imbila nsuma ya Bufumu mwi sonde lyonse. Alifikilisha ifyo alaile. Ukubomfya icilonganino ca kwa Yehova, Yesu alatusambilisha ifya kubomba umulimo wa kubila imbila nsuma kabili alatupeela ne fya kubomfya pa kubomba uyu mulimo. (Mat. 28:18-20) Tulacita ifyo Yesu atwebele, e kutila ukubombesha ukulabila imbila nsuma, e lyo no kusambilisha. Kabili tulatwalilila ukuba abacenjela ilyo tulelolela impela ya cino calo. Nga tulekonka ukufunda ukwaba pa AbaHebere 6:11, 12, tukatwalilila ukuba ne subilo “ukufika na ku mpela.”—Belengeni.

16. Cinshi tulefwaisha ukulacita?

¹⁶ Yehova alibika ubushiku ne nshita ilyo akonaula cino calo ca kwa Satana. Ilyo ubu bushiku bukafika, Yehova akafikilisha amasesemo yonse ayo alanda mu Cebo cakwe. Limo kuti twalamona kwati impela ilekokola ukwisa. Na lyo line ubushiku bwa kwa Yehova ‘tabwakacelwe.’ (Haba. 2:3) Kanshi natutwalilile ‘ukulalolela Yehova no kulalindilila Lesa we pusukilo lyesu.’—Mika 7:7.