1. ?Jisas i tokbaot wanem long ol disaepol blong hem long saed blong en? ?Hem i givim wanem woning long olgeta?

 SAM dei bifo we Jisas i ded, fo disaepol blong hem oli askem long hem se: “?Wanem saen bambae i soemaot . . . se hem i lashaf blong sistem blong wol ya?” (Mat. 24:3) Ol disaepol ya oli wantem save se wetaem bambae oli spolem Jerusalem mo tempol. Ansa we Jisas i givim, i soemaot se hem i no tokbaot nomo taem ya we bambae oli spolem Jerusalem mo tempol, be i stap tokbaot tu “lashaf blong sistem blong wol ya,” we yumi stap laef long hem naoia. Jisas i tokbaot taem ya blong en se: “Be dei mo aoa blong samting ya, i no gat man i save. Ol enjel long heven mo Pikinini blong God, be olgeta tu oli no save. Papa nomo i save.” Biaen hem i wonem ol disaepol blong hem blong oli “mas stap wekap” mo oli “mas gohed blong lukaot gud.”—Mak 13:32-37.

2. ?From wanem i impoten we ol faswan Kristin oli gohed blong lukaot gud?

² Long faswan handred yia, ol Kristin we oli man Jiu oli mas gohed blong lukaot gud blong oli save sevem laef blong olgeta. Jisas i talem long ol man blong hem blong oli mas luksave samting we i soemaot se i no longtaem Jerusalem bambae i lus. Hem i talem se: “Taem yufala i luk ol soldia oli raonemgud Jerusalem, yufala i mas save se klosap nao bambae taon ya i lus.” Long taem ya, oli mas obei long woning blong Jisas mo “ronwe i go long ol bigfala hil.” (Luk 21:20, 21) Olgeta we oli obei long woning ya oli stap laef taem ol man Rom oli spolem Jerusalem.

3. ?Bambae yumi tokbaot wanem long stadi ya?

³ Tede, yumi stap laef long en blong sistem blong rabis wol ya. Taswe yumi tu yumi mas gohed blong gat klia tingting  mo gohed blong lukaot gud. Long stadi ya, bambae yumi tokbaot olsem wanem yumi save gohed blong gat klia tingting long ol samting we oli stap hapen raon long wol, olsem wanem yumi save lukaot gud, mo olsem wanem yumi save yusum gud smol taem ya we i stap yet.

4. ?From wanem yumi intres long ol samting we oli stap hapen long wol, we oli mekem ol profet tok oli kamtru?

⁴ I stret nomo we yumi intres blong luk olsem wanem ol samting we oli stap hapen long wol, oli mekem ol profet tok blong Baebol oli kamtru. Eksampol, Jisas i talem ol samting we bambae oli hapen, blong halpem yumi blong save wetaem en blong sistem blong wol blong Setan i klosap. (Mat. 24:3-14) Aposol Pita i enkarejem yumi blong luk olsem wanem ol profet tok oli stap kamtru, blong yumi save gohed blong gat strong bilif. (2 Pita 1:19-21) Laswan buk blong Baebol i stat wetem ol tok ya we i se: “Hemia ol samting we God i givim long Jisas Kraes blong hem i soemaot, mo hem i soemaot long ol slef blong hem. Ol samting ya bambae oli hapen i no longtaem.” (Rev. 1:1) Taswe, yumi intres tumas long ol samting we oli stap hapen long wol naoia, mo blong save olsem wanem oli stap mekem ol profet tok oli kamtru. Mo maet yumi wantem tumas blong tokbaot ol samting ya long ol narafala.

5. ?Yumi mas lukaot gud blong no mekem wanem, be yumi mas mekem wanem? (Yu luk pija.)

⁵ Taem yumi stap tokbaot ol profet tok blong Baebol, yumi mas lukaot blong no talem prapa tingting blong yumi long samting we bambae i hapen. ?From wanem? From yumi no wantem talem eni samting we i save mekem se kongregesen i seraot. Eksampol, maet yumi harem ol lida blong wol oli talem se oli save stretem wan kaen problem mo mekem se i gat pis mo seftaem. Bitim we yumi talem se ol tok ya oli stap mekem ol profet tok long 1 Tesalonaeka 5:3 i kamtru, i moa gud yumi traem save ol niufala samting we oli kamaot long ol buk blong yumi. Taem storian blong yumi i stanap long ol samting we i kamaot long ol buk blong yumi, yumi stap halpem kongregesen blong i gohed blong joen gud, we yumi gat sem tingting nomo.—1 Kor. 1:10; 4:6.

6. ?Yumi lanem wanem long 2 Pita 3:11-13?

⁶ Ridim 2 Pita 3:11-13. Aposol Pita i halpem yumi blong yumi gohed blong gat klia tingting taem yumi stadi long ol profet tok blong Baebol. Hem i talem se yumi mas ‘tingbaot dei blong Jehova oltaem.’ ?From wanem? I no from we yumi wantem save “dei mo aoa” we Jehova bambae i mekem Amagedon i kam, be from we yumi wantem yusum gud smol taem ya we i stap yet blong mekem ‘fasin blong laef blong yumi i tabu, mo soemaot long ol wok blong yumi se yumi stap fasgud long God.’ (Mat. 24:36; Luk 12:40) Hemia i min se yumi wantem gohed blong mekem ol gudfala fasin mo meksua se evri samting we yumi mekem long wok blong Jehova, yumi mekem from we yumi lavem hem. Be blong mekem olsem, yumi mas lukaot gud.

7. ?Olsem wanem yumi soemaot se yumi stap lukaot gud? (Luk 21:34)

⁷ Jisas i talem long ol disaepol blong hem blong oli lukaot gud long ol samting we oli stap hapen long wol, be hem i talem tu se oli mas lukaot gud long olgeta wan. Long Luk 21:34 (Ridim.) Jisas i rimaenem yumi se yumi mas lukaot gud long ol fasin mo aksen blong yumi. Taswe yumi mas luksave ol denja we i save spolem  frensip blong yumi wetem Jehova, mo traehad blong no foldaon long ol denja ya. Long rod ya, yumi save gohed blong mekem se God i lavem yumi.—Prov. 22:3; Jud 20, 21.

8. ?Aposol Pol i talem wanem long ol Kristin?

⁸ Aposol Pol i talem long ol Kristin se oli mas lukaot gud. Eksampol, hem i talem long ol Kristin long Efesas se: “Yufala i mas lukaot gud olsem wanem yufala i wokbaot, yufala i no mas wokbaot olsem ol man we oli no waes, be olsem ol man we oli waes.” (Efes. 5:15, 16) Oltaem Setan i traehad blong spolem frensip blong yumi wetem Jehova, taswe Baebol i talem se “yufala i mas gohed blong kasem save se samting we Jehova i wantem, hem i wanem,” olsem nao bambae yumi no save foldaon long ol trik blong Setan.—Efes. 5:17.

9. ?Olsem wanem blong luksave samting we Jehova i wantem yumi blong mekem?

⁹ Baebol i no tokbaot evri samting we i save spolem frensip blong yumi wetem Jehova. Plante taem yumi mas mekem ol desisen long saed blong ol samting we Baebol i no talem stret samting we yumi mas mekem. Blong mekem ol waes desisen, yumi mas luksave o faenemaot “samting we Jehova i wantem.” Yumi save mekem olsem, taem yumi stadi oltaem mo tingting dip long Tok blong God. Sipos oltaem yumi traehad blong kasemsave samting we Jehova i wantem mo gat “tingting blong Kraes,” bambae yumi naf blong wokbaot “olsem ol man we oli waes,” nating se Baebol i no talem stret samting we yumi mas mekem. (1 Kor. 2:14-16) Samtaem i isi blong luksave ol denja, be samtaem i had.

10. ?Wanem sam denja we yumi mas lukaot long olgeta?

¹⁰ Sam long ol denja we yumi mas lukaot long olgeta, hemia fasin blong pleplei wetem filing blong narafala, dring bitim mak, kakae bitim mak, ol tok we i spolem narafala, ol samting blong spel mo pleplei we oli raf, ponografi, mo sam moa narafala samting olsem. (Sam 101:3) Oltaem enemi ya blong yumi, Devel Setan, i traem faenem eni janis blong spolem frensip blong yumi wetem Jehova. (1 Pita 5:8) Sipos yumi no lukaot gud, Setan i save planem long tingting mo hat blong yumi, sid blong ol nogud fasin olsem, wantem kasem mak blong narafala, giaman, griri, no laekem nating narafala, praod, mo holemtaet kros. (Gal. 5:19-21) Long stat, maet yumi no ting se ol fasin ya oli denja. Be sipos yumi no tekem aksen kwiktaem blong rutumaot olgeta, bambae oli gohed blong gru olsem wan plant we i posen mo i save mekem yu kasem trabol.—Jem. 1:14, 15.

11. ?Wanem wan denja we maet yumi no luksave be yumi mas lukaot long hem, mo from wanem?

¹¹ Wan denja we maet yumi no luksave, hemia ol rabis fren. Traem tingbaot eksampol ya. Yu yu wok wetem wan man we i no wan Witnes blong Jehova. Yu wantem se fren blong yu long wok i gat gudfala tingting long ol Witnes, ale yu stat blong kaen long hem mo halpem hem. Mo wanwan taem yu agri blong lanj wetem hem. Be sloslo yu stat blong mekem olsem evri dei. Samtaem hem i tokbaot ol samting we oli no stret, mo long stat maet yu traehad blong no joenem storian blong hem. Be biaen, yu stat blong lan long ol storian olsem, mo yu no moa harem se oli narakaen. Nao wan dei, fren ya blong yu i invaetem yu blong yutufala i go dring afta long wok, mo yu agri. Sloslo, yu luksave se yu stat blong gat sem tingting olsem hem. ?Yu ting se bambae i tekem hamas taem blong yu stat blong tekem fasin blong hem? I tru, yumi kaen mo yumi respektem evri man, be yumi mas tingbaot tu se fasin blong ol man we yumi spenem taem wetem olgeta i save gat bigfala paoa long yumi. (1 Kor. 15:33) Sipos  yumi gohed blong lukaot gud olsem we Jisas i talem, bambae yumi naf blong stap longwe long ol man we oli no laef folem ol rul blong Jehova. (2 Kor. 6:15) Bambae yumi luksave denja mo yumi ronwe long hem.

12. ?Ol disaepol blong Jisas oli mas mekem wanem taem oli stap wet blong en i kam?

¹² Jisas i wantem se ol disaepol blong hem oli stap bisi taem oli stap wet blong en i kam. Hem i givim oda long olgeta blong oli talemaot gud nius ‘long Jerusalem, mo long olgeta ples long Judia mo Sameria, gogo oli kasem olgeta ples long wol.’ (Wok 1:6-8) !Hemia i wan bigfala wok we Jisas i givim long olgeta! Taem oli mekem bes blong olgeta long wok ya, oli soemaot se oli stap yusum gud taem blong olgeta.

13. ?From wanem yumi mas yusum gud taem blong yumi? (Kolosi 4:5)

¹³ Ridim Kolosi 4:5. Blong lukaot gud, yumi mas tingbaot olsem wanem yumi stap yusum taem blong yumi, from “samting we i hapen we man i no tingbaot” i save kasem yumi enitaem. (Pri. 9:11) Yumi save ded enitaem nomo.

14-15. ?Olsem wanem yumi save yusum gud taem blong yumi? (Hibru 6:11, 12) (Yu luk pija.)

¹⁴ Yumi yusum gud taem blong yumi, taem yumi mekem samting we Jehova i wantem mo  mekem frensip blong yumi wetem hem i kam strong moa. (Jon 14:21) Yumi ‘mas stanap strong we i no gat wan samting i muvum yumi. Oltaem yumi mas gat plante wok blong mekem long wok blong Masta.’ (1 Kor. 15:58) Biaen taem en i kam, maet en blong laef blong yumi o en blong sistem blong wol ya, be bambae yumi no rigret nating.—Mat. 24:13; Rom 14:8.

¹⁵ Tede, Jisas i gohed blong lidim ol disaepol blong hem, taem oli stap talemaot Kingdom blong God long olgeta ples long wol. Hem i holemtaet promes ya blong hem. Tru long oganaesesen blong Jehova, Jisas i trenem yumi blong prij, mo i givim ol tul we yumi nidim blong talemaot gud nius. (Mat. 28:18-20) Yumi mekem samting we Jisas i askem yumi blong mekem, taem yumi wok had blong prij mo tijim ol narafala, mo taem yumi gohed long lukaot gud mo yumi wet long taem ya we Jehova bambae i finisim rabis wol ya blong Setan. Taem yumi folem advaes ya long Hibru 6:11, 12, bambae yumi holemstrong hop ya blong yumi “gogo kasem en.”—Ridim.

16. ?Yumi gat strong tingting blong mekem wanem?

¹⁶ Jehova i makemaot finis stret dei mo aoa, blong hem i finisim rabis wol ya blong Setan. Taem dei ya i kam, Jehova bambae i mekem olgeta profet tok we i stap long Baebol oli kamtru we i no mestem wan nating. Samtaem maet yumi gat tingting ya se en i slo tumas blong kam. Be dei blong Jehova ‘!bambae i no let!’ (Hab. 2:3) Taswe, i gud yumi gat strong tingting blong “gohed blong wet blong luk Jehova,” mo soemaot “fasin ya blong wet long God we i sevia blong [yumi].”—Maeka 7:7.