1. Cosa ya habla si Jesus con el de suyu maga dicipulo acerca na llegada del fin y cosa aviso le ya dale kanila?

 CUANTO dia antes el muerte de Jesus, el cuatro del de suyu maga dicipulo ya pregunta con ele: “Cosa ba el señal . . . del fin del mundo”? (Mat. 24:3) Posible, este maga dicipulo quierre sabe si cuando destroza con el Jerusalem y con el templo de este. Cuando ya contesta si Jesus, nuay lang le man cuento acerca na destrozo del Jerusalem y del templo sino acerca tambien del “fin del mundo” que ta vivi kita ahora. Acerca na llegada del fin, si Jesus ya habla: “Concierne el dia y el hora, noay quien sabe, ni el maga angel na cielo, ni el Anak, sino el Tata lang.” Despues, ya dale le aviso con el todo de suyu maga dicipulo que “esta alerto” y “bicia embuenamente.”—Mar. 13:32-37.

2. Porque importante para con el maga Cristiano del primer siglo que esta alerto?

² El maga Judio Cristiano del primer siglo necesita esta alerto para puede salva el diila vida. Ya habla si Jesus con el de suyu maga siguidores si cosa sila vicia para puede sila sabe si cuando destroza con el Jerusalem y con el templo. Ele ya habla: “Si ay mira ustedes con Jerusalem encirculao de maga soldao, entonces ay sabe ustedes cay cerca ya el disuyo destrozo.” Na ese tiempo, debe sila sigui con el aviso de Jesus y “escapa para na monte.” (Luc. 21:20, 21) Aquellos quien ya sigui con este ya salva cuando ya destroza el maga Romano con el Jerusalem.

3. Cosa kita discuti na este articulo?

³ Ta vivi kita ahora na tiempo cuando cerca ya destroza con este mal mundo. Poreso, debe tambien kita vicia  enbuenamente y esta alerto. Na este articulo, hay discuti kita si paquemodo kita puede queda balance mientras ta observa con el maga suceso na mundo, si paquemodo kita pone atencion con el diaton mismo cuerpo y si paquemodo kita puede usa enbuenamente con el tiempo que ya queda.

4. Porque kita interesao si paquemodo el maga suceso na mundo ta cumpli con el maga profecia na Biblia?

⁴ Tiene maga razon si porque interesao kita si paquemodo el maga suceso na mundo ta cumpli con el maga profecia na Biblia. Por ejemplo, ya menciona si Jesus maga especifico suceso que puede ayuda kanaton para sabe que cerca ya termina con el mundo de Satanas. (Mat. 24:3-14) Si apostol Pedro ya anima kanaton que observa si paquemodo ta cumpli el maga profecia para esta fuerte el diaton fe. (2 Ped. 1:19-21) Y na principio del ultimo libro del Biblia, puede kita le con este maga palabra: “Este amo el Revelacion que el Dios ya dale con Jesucristo para puede Le manda sabe con el disuyo maga muchacho el maga cosa-cosa que gendeh tarda ay sucede ya.” (Rev. 1:1) Poreso, bien interesao kita na maga suceso na mundo y si paquemodo este posible ta cumpli con el maga profecia na Biblia. Y posible quierre kita discuti con otro acerca con este.

5. Cosa kita debe evita pero cosa kita debe hace? (Mira tambien con el maga letrato.)

⁵ Pero si ta discuti acerca na maga profecia na Biblia, debe kita evita hace maga especulacion. Porque? Cay no quierre kita habla maskin cosa que posible hace perde el unidad na congregacion. Por ejemplo, baka puede kita oi con el maga lider del nacion que ta discuti acerca si paquemodo solva con el un particular conflicto y lleva paz y seguridad. En vez de pensa que el cosa sila ya habla ta cumpli con el profecia na 1 Tesalonica 5:3, debe kita sabe el maga reciente informacion que yan publish el organizacion de Jehova. Si base alli el diaton maga discusion, ta ayuda kita con el congregacion que esta “unido . . . na pensamiento.”—1 Cor. 1:10; 4:6.

6. Cosa maga leccion kita puede aprende na 2 Pedro 3:11-13?

⁶ Le con el 2 Pedro 3:11-13. Si apostol Pedro ta ayuda kanaton para queda balance si ta considera con el maga profecia na Biblia. Ta anima le kanaton que “espera . . . con ansias el llegada del Dia de Dios.” Porque? Gendeh para pricura kita sabe el “dia pati hora” si cuando llega el Armagedon sino para puede kita usa con el tiempo que ya queda para tene sagrao conducta y hace maga trabajo de devocion con Dios. (Mat. 24:36; Luc. 12:40) Quierre decir, quierre kita que pirmi bueno el diaton conducta y asigura que el todo cosa kita ta hace para con Jehova amo por causa na diaton grande amor para con ele. Para puede se hace, debe kita pone atencion con el diaton mismo cuerpo.

7. Paquemodo kita puede dale mira que ta pone kita atencion con el diaton mismo cuerpo? (Lucas 21:34)

⁷ Ya habla si Jesus con el de suyu maga dicipulo que pone atencion gendeh lang na cosa ta sucede na mundo sino na diila mismo cuerpo tambien. Claro se na aviso que ya dale le na Lucas 21:34. (Le.) Nota con el maga palabra de Jesus: “Pone atencion con el de ustedes mismo cuerpo.” (NWT) El un persona quien ta pone atencion con el de suyu mismo cuerpo ta queda alerto na maskin cosa peligro que puede destroza con el de suyu relacion  con Jehova y ta hace le manera para evita con ese. Como resulta, ta esta le na amor del Dios.—Prov. 22:3; Jud. 20, 21.

8. Cosa el consejo de apostol Pablo con el maga Cristiano?

⁸ Ya anima si apostol Pablo con el maga Cristiano que pone atencion con el diila mismo cuerpo. Por ejemplo, ya habla le con el maga Cristiano na Efeso: “Bicia si cosa clase de vida ta vivi ustedes. Vivi gendeh como maga gente noay juicio, sino como maga gente con buen juicio.” (Ef. 5:15, 16) Si Satanas pirmi ta pricura destroza con el diaton relacion con Jehova poreso el Biblia ta conseja kanaton que continua “precura discubri si cosa ba el querer del Dios” para puede kita enfrenta con el maskin cosa ataque de Satanas.—Ef. 5:17.

9. Paquemodo kita puede discubri si cosa el querrer de Jehova para kanaton?

⁹ El Biblia gendeh ta habla kanaton el todo cosas que puede destroza con el diaton relacion con Jehova. Mas mucho, necesita kita hace maga decision na maga cosas que nuay especifico discuti na Biblia. Para puede kita hace maga justo decision, necesita kita pricura discubri con el “querer del Dios.” Puede kita hace con ese si regular kita estudia con el Palabra del Dios y medita con ese. Si ta entende kita con el voluntad de Jehova y ta cultiva con el “pensamiento de Cristo,” mas puede kita hace maga justo decision maskin pa nuay maga especifico ley acerca na diaton situacion. (1 Cor. 2:14-16) Tiene vez, facil lang identifica con el maga peligro. Pero tiene maga tiempo, dificil con ese hace.

10. Cosa el cuanto peligro que debe kita evita?

¹⁰ El cuanto del maga peligro que debe kita evita amo man flirt, por demas toma, por demas come, habla maga cosas que puede hace sinti duele con otro y mira maga entretenimiento que tiene violencia, pornografia y semejante maga cosas. (Sal. 101:3) El diaton contrario, el Diablo, pirmi ta busca maga oportunidad para destroza con el diaton relacion con Jehova. (1 Ped. 5:8) Si gendeh kita queda alerto, si Satanas puede siembra envidia, pagka-deshonesto, hambrientadas, rabia, orgullo y sentimiento na diaton pensamiento y corazon. (Gal. 5:19-21) Na primero, posible gendeh kita pensa que bien peligroso ese maga sentido. Pero si nuay kita cosa hace para quita dayun con ese, hay queda este mas fuerte y causa problema.—Sant. 1:14, 15.

11. Cosa el un peligro que debe kita evita y porque?

¹¹ El uno pa peligro amo el mal asosacion. Considera con este situacion. Ta trabaja tu junto con el un persona que gendeh un Testigo de Jehova. Quierre tu que tene le buen impresion kanaton poreso bueno y ta ayuda tu con ele. Tiene maga tiempo, tan junto tu come con ele. Despues de cuanto tiempo, pirmi ya tu con ele junto ta come. Tiene vez, tan cuento le acerca na maga imoral cosas que del primero, ta pricura tu ignora. Pero nuay dura, bien anad ya tu na cosa le ta habla poreso gendeh mas tu destorbao con ese. Despues, un dia, ya invita le contigo que toma despues del de ustedes trabajo y ya conforma tu. Despues de cuanto tiempo, dol igual ya tu con el de tuyu uban si ta pensa. Asigurao, gendeh tarda, hay principia ya tu hace si cosa le ta hace. Siempre, bueno kita y ta dale mira respeto con todo. Pero debe kita acorda que puede gayot influencia kanaton el maga gente con quien kita ta iscuji pirmi man junto. (1 Cor. 15:33) Si pone kita atencion con el diaton mismo cuerpo, igual con el cosa ya habla si Jesus, hay evita kita pirmi man junto con aquellos quien gendeh ta sigui con el maga  principio de Jehova. (2 Cor. 6:15) Hay puede kita mira con el peligro y evita con ese.

12. Cosa necesita hace el maga dicipulo de Jesus mientras ta espera con el fin?

¹² Quierre si Jesus que ocupao el de suyu maga dicipulo mientras ta espera con el fin. Gane, ya dale le kanila trabajo. Ya manda le kanila que predica con el buen noticia “na Jerusalem, . . . na entero Judea y Samaria, y hasta na fin del Mundo.” (Act. 1:6-8) Un grande trabajo gayot se para na maga siguidores de Jesus! Ya puede sila usa enbuenamente con el diila tiempo cay ya hace sila el todo na ese assignment.

13. Porque kita necesita usa enbuenamente con el diaton tiempo? (Colosa 4:5)

¹³ Le con el Colosa 4:5. Para puede pone atencion con el diaton mismo cuerpo, necesita kita considera si paquemodo kita ta usa con el diaton tiempo. Maskin quien kanaton puede experiencia “maga suceso que gendeh [kita] ta expecta.” (Ecl. 9:11) Posible, bigla lang kita muri.

14-15. Paquemodo kita puede usa enbuenamente con el diaton tiempo? (Maga Hebreo 6:11, 12) (Mira tambien con el letrato.)

¹⁴ Puede kita usa enbuenamente con el diaton  tiempo si hace kita con el voluntad de Jehova y hace fuerte el diaton relacion con ele. (Juan 14:21) Necesita kita “para duro y no man atras. Progresa firmi na [diaton] trabajo por causa del Señor.” (1 Cor. 15:58) Despues, si llega ya el fin—fin del diaton vida o fin de este mal sistema—gendeh kita man mahay.—Mat. 24:13; Roma 14:8.

¹⁵ Ahora, ta continua guia si Jesus con el de suyu maga dicipulo mientras ta predica sila acerca na Reino del Dios na entero tierra. Ya cumpli si Jesus con el de suyu promesa. Por medio na organizacion de Jehova, si Jesus tan train kanaton si paquemodo predica y ta dale le el maga tool que necesita kita para hace con ese. (Mat. 28:18-20) Puede kita hace si cosa ta expecta kanaton si Jesus si hace kita esfuerzo para predica y enseña y esta alerto mientras ta espera con Jehova que termina con este mal sistema. Si aplica kita con el consejo na Maga Hebreo 6:11, 12, puede kita asigura que tiene kita esperanza “hasta el fin.”—Le.

16. Cosa kita determinao hace?

¹⁶ Ya determina ya si Jehova si cosa hora y dia le destroza con el sistema de Satanas. Si llega ya ese tiempo, asigurao hay cumpli si Jehova con el maga profecia que ya manda le escribi na de suyu Palabra. Pero tiene vez, baka ta pensa kita que tarda llega el fin. Pero el deverasan, el dia de Jehova “gendeh . . . hay atrasa!” (Hab. 2:3) Poreso, ojala “continua [kita] espera con Jehova,” y “espera . . . con paciencia con el Dios del [diaton] salvacion.”—Miq. 7:7.