1. ¿Kʼãrẽta jarasi Jesubara iyi kʼaidupanʉrãra naʉ̃ ewari jõi ʉ̃rʉra?

 JESU ewari beadai kʼaita babʉrʉde iyi kʼaidupanʉraba widisida: «¿Kʼãrẽta ũdudaipe bʉ ewaridera, adewara naʉ̃ ewarinʉmʉ jõi ewaridera?» (Mat. 24:3). Jesu kʼaidupanʉrabara kʼawuakĩrãpanasi Jerusalénʼra sõbede ãrĩnaibasita akʉza templora sõbede ãrĩnaibasita. Jesubara ãyara bari jara ẽ basi Jerusalén akʉza templo sõbede ãrĩta, awuarabʉrʉ bedʼeasi naʉ̃ ewari jõi ʉ̃rʉ. Jesuba naʉ̃ ewari jõi ʉ̃rʉ bedʼeakʉaside jarasi naʉ̃ta: «Kʼãrẽ ewade kʼãrẽ ʉ̃madaudʼe mawũã berabʼarira miõba kʼawua ẽã, miã ángelerã ʉ̃tre bʼebidʼa kʼawuadʼa ẽã, miã mʉãbidʼa kʼawua ẽã, awuarabʉrʉ kʼawua bʼʉa mʉ Zezebʉrʉ». Maʉ̃ tẽã iyi kʼaidupanʉra jarasi: «Dauba bʼeaudua» (Mar. 13:32-37).

2. ¿Kʼãrẽa bigabasi kristianora siglo nabemaraitara dau kʼawuapanaita?

² Kristianora siglo nabemanebemarãra dau kʼawuapanaibarabasi ãyi bei ẽ bamarẽã. Jesuba iyi kʼaidupanʉra jarasi ʉrʉma panamarẽã, mawũãtrʉ kʼawuadaita sõbede gorogorora zeibasita Jerusalén ãrĩta akʉza templota. Jesuba jarasi: «Jerusalén pʉwʉrʉta soldaorãba pʉrrabʉdata ũdubʉdadʼera, kʼawuaudua ãrĩnaĩta arabata». Gorogororaba Jerusalén purradaita zebʉdadera ãyara ũrĩnaibarabasi naʉ̃ bedʼeata «merũ wãẽbaudua kʼatumaẽna» (Luc. 21:20, 21). Yi naʉ̃ bedʼea ũrĩnara beida ẽ basi Romanebemaraba Jerusalén ãrĩnaita zesidade.

3. ¿Kʼãrẽta kʼawuadai naʉ̃ artikulodera?

³ Idi ewaridera dayirãra naʉ̃ ewari jõbodoarepanʉ,  maʉ̃ kʼarea dayirãra bia krĩchapanaibara akʉza ʉrʉmapanaibara. Naʉ̃ artikulode kʼawuadayi dayirãra jʉra kʼawuapanaibarata, mamina maʉ̃ daucha aukʼara krĩchabi ẽ baibara mebẽrã naʉ̃ ewari jõi ʉ̃rʉ, adewara kʼawuadayi dayikʉza sãwũã akʉibarata akʉza ewari sãwũã bia zokʼaibarata.

4. ¿Kʼãrẽa kʼawuakĩrãpanʉ dayirãbara Daizeze Bedʼeade propesia jarabʉra idi ewade aripe berabarinʉmʉra?

⁴ Dayirãitara biode yibia kʼawuaita Daizeze Bedʼeaba propesiade jaradata aripe berabarinʉmʉta. Jesuba jarasi nekʼãrẽ berabarinʉmaita mawũã ũdubita Diaruba naʉ̃ drʉa zokʼabʉ jõira arakʼaitabata (Mat. 24:3-14). Apostol Pedrobara jarasi dayirãbara bia akʉdaibarata propesia berabarinʉmʉra mawũã audre ĩjãnaita (2 Ped. 1:19-21). Apocalipsis librora naʉ̃ bedʼeaba jʉ̃drʉbʉ: «Daizezebara jarasi Jesuʼa aranʉbai kʼãrẽta berabarita, Jesuba iyi nezokʼara ũdubimarẽã» (Apoc. 1:1). Dayirãbara kʼawuakĩrãbʉ naʉ̃ drʉade berabarinʉmʉra naʉ̃ba kʼawuabibʉ baera Daizeze Bedʼeade propesiabʉra aripe berabarinʉmʉta akʉza dayirãinʉ bedʼeakĩrãpanaibara maʉ̃ ʉ̃rʉ.

5. ¿Kʼãrẽta obeda ẽ baibara akʉza kʼãrẽta odaibara? (Akʉra potorata).

⁵ Dayirã propesia Daizeze Bedʼeade aripe berabaribʉ ʉ̃rʉ bedʼeabʉrʉdera, jʉra kʼawuapanaibara jara ẽ baita daya krĩchabʉta, ¿kʼãrẽa? Kongregasionʼa aña krĩchabiamapanʉ baera. Bari jaraita, nokʼoraba jarapanʉne yõ jõbita, zʉbʉria taʉbita, mawũã jõmaʉ̃ta neneẽã baita, dayirãra jʉra kʼawuapanaibara krĩcha ẽ baita kʼaira nokʼoba 1 Tesalonicenses 5:3de jarabʉra aripe berabaribita. Biʼia akʉibara organizasionba audre ẽza ũrĩbibʉta dayirãba nãã ũrĩ ẽ badata, naʉ̃ba kʼarebai baera kongregasione ãbapanamarẽã iyabaʉ krĩchade (1 Cor. 1:10; 4:6).

6. ¿Kʼãrẽta kʼawuaseapanʉ 2 Pedro 3:11-13 bayeda jarabʉdebara?

⁶ (Akʉra 2 Pedro 3:11-13). Apostol Pedrobara jarabʉ kʼãrẽ kʼarea propesiara ʉ̃rʉ akʉdaibarata, iya jarasi: «Ʉrʉma jʉ̃ãpanʉena Jeowa ewari zeyeda». ¿Iya kʼãrẽa mawũã jarasi? Nããra jara ẽ basi dayirãba kʼawuamarẽã Jeowa ewarira sõbede zeita, awuarabʉrʉ jarasi dayirãba dayi ewarita jʉra kʼawua zokʼamarẽã akʉza opanamarẽã Jeowaba jarabʉta akʉza iyiʉ̃me kʼẽrẽpa bamarẽã (Mat. 24:36; Luc. 12:40). Naʉ̃ba jarakĩrãbʉ dayirãra Jeowaʉ̃me kʼẽrẽpabaibarata akʉza dayirã iyita trajapanʉra opanʉta soiduba akʉza kãgapanʉ baera iyita. Dayirã mawũã panaira akʉbaibara dayi sãwũãbʉta.

7. ¿Sãwũã ũdubipanʉ dayirãkʉza akʉbʉta sãwũãbʉta? (Lucas 21:34).

⁷ Jesuba bari jara ẽ basi iyi kʼaidubemaraʼa naʉ̃ drʉade nekʼãrẽ berabarinʉmʉ awa akʉda ẽ bamarẽã, awuarabʉrʉ jarasi akʉza akʉdaibarata ãyi sãwũãbʉta, naʉ̃ bedʼeara jarasi Lucas 21:34de (akʉra). Jesuba jarasi: «Mayikʉza kĩrãkita panaidua». Ẽbẽra iyikʉza akʉbʉra iyi sãwũãbʉta jʉra kʼawuabʉ nekʼãrẽ baduba ãrĩbi ẽ baita iyi Jeowaʉ̃me neũdukʼawuadepanʉta. Iyita mawũãbʉbʉrʉ  Jeowa kãgata erbayi (Prov. 22:3; Jud. 20, 21).

8. ¿Kʼãrẽ ũrãgʼata diasi Pablobara kristianorãra?

⁸ Apostol Pabloba jarasi kristianora krĩchadamarẽã ãyi sãwũãbʉ ʉ̃rʉ. Bari jaraita, Pabloba kristianora Éfesodebema jarasi: «Jʉra kʼawua baidua mara sãwũãbʉdeba, baraidua kʼawua ẽ bʉ kĩrãkʼa awuarabʉrʉ bʼaidua ẽbẽra buru biaba obʉ kĩrãkʼa» (Efes. 5:15, 16). Diarubara ewari jõmaʉ̃nẽ jʉrʉbʉ dayirãta Jeowaʉ̃me neũdukʼawua ba ẽ bamarẽã, maʉ̃ kʼarea Daizeze Bedʼeaba ũrãgʼabʉ «kʼawuaidua kʼãrẽta kãgabʉta Jeowaba». Mawũã Jeowaʉ̃me neũdukʼawua biata adua ẽ baita (Efes. 5:17).

9. ¿Kʼãrẽta odaibara kʼawuaita Jeowaba kãgabʉta?

⁹ Daizeze Bedʼeabara jõma jara ẽ dayirãba sãwũã ãrĩseabʉta Daizezeʉ̃me neũdukʼawuara. Daizeze Bedʼeaba jõma jara ẽ baera dayirãba kʼãrẽ oibarata, maʉ̃ kʼarea dayirã aba abakaʉba kʼawua krĩcha kʼãrãpe jidaibara. Mawũã oira dayirãbara kʼawuaibara «kʼãrẽta kãgabʉta Jeowaba». Maʉ̃ oira dayirãbara Daizeze Bedʼeata badua lebaibara akʉza maʉ̃ ʉ̃rʉ bia krĩchaibara. Naʉ̃ba kʼarebayi kʼawuaita kʼãrẽta kãgabʉta Jeowaba akʉza Jesude kĩrãkʼa krĩchadayi, mawũã odara buru biabayi akʉza krĩcha biata jida kʼawuadayi, Daizeze Bedʼeaba jõma jara ẽ mina kʼãrẽta oibara ʉ̃rʉ (1 Cor. 2:14-16). Edaʉde dayirãbara kʼawuaseabʉ kʼãrẽba ãrĩseabʉta dayirã Jeowaʉ̃me neũdukʼawuara, mamina edaʉde zare maʉ̃ kʼawuaita.

10. ¿Kʼãrẽta oda ẽ baibara dayirãbara?

¹⁰ Dayirãbara idubʉdaibara audua bedʼeabʉta, itua dobʉta, imitia bedʼeabʉta, neũdukʼawua kayirua erbʉta, ẽbẽra ãkada akʉbʉta akʉza pelikula yõbʉ akʉbʉta (Sal. 101:3). Diarubara jʉrʉbʉ sãwũã ãrĩta dayirã Jeowaʉ̃me neũdukʼawuara (1 Ped. 5:8). Dayirãta jʉra kʼawuapanʉ ẽ bʉrʉ Diarubara dayi krĩchade akʉza sode zebiseabʉ kãgaita wuabemaba erbʉta, sewa nebʉrʉmia bʼaita, yãrãta jʉraita akʉza wuabemaba nemitia obʉrʉde, maʉ̃ta kĩrãdua ẽ marẽã obiseabʉ (Gál. 5:19-21). Dayirãba mawũã krĩchabʉta waña ãĩ bʉeda ẽ bʉrʉ, dayi sode wariseabʉ chirua kayirua kĩrãkʼa akʉza maʉ̃ba bedʼea zromata ũdubiseabʉ (Sant. 1:14, 15).

11. ¿Kʼãrẽneba jʉra kʼawuapanaibara akʉza kʼãrẽa?

¹¹ Jʉra kʼawuapanaibara ẽbẽra kayiruabawara ãba ba ẽ baita. Krĩchara bʉ trajabʉmae, bʉme trajabʉra Jeowa ode bʉ ẽãta, mõbe bʉa iyira bia edabʉ akʉza ibiade bedʼeabʉ, Jeowa ʉ̃rʉ Kʼawuabipanʉrã ʉ̃rʉ bia krĩchamarẽã akʉza edaʉde ãba nekopanʉ maʉ̃ ẽbẽraʉ̃me, maʉ̃ tẽã audre nekopanʉ iyiʉ̃me. Wika, wikade iyiʉ̃me bedʼeapanʉ mia erkʼãĩ ʉ̃rʉ, bʉa maʉ̃ ʉ̃rʉ bedʼeamabʉmina tẽãne nekʼãrẽ kĩrãkʼa akʉbʉ. Ewari aba bʉme trajabʉba jarayi trajodeba ẽdrʉda tẽã, nekʼãrẽ do wãnaita, ewari berabari wãne bʉra bʉme trajabʉ kĩrãkʼa krĩcha wãñi. Mawũã obʉbʉrʉ audre ẽãne iyide kĩrãkʼa owãñi. Dayirãba ẽbẽrarãra ibiade edapanʉ akʉza ibiade bedʼeapanʉ, mamina kĩrãbedaibara ãyibawara badua ãbabʉbʉrʉ ãyide kĩrãkʼa owãseabʉta (1 Cor. 15:33). Dayirãkʉza akʉbʉbʉrʉ dayi sãwũãbʉta Jesuba jarada kĩrãkʼa, mawũãra ãba bada ẽ bayi ẽbẽrarã Jeowaba jarabʉ oẽ bawarãra (2 Cor. 6:15).  Mawũãra jãpe panañi nekayirua oidebara.

12. ¿Jesu kʼaidupanʉrabara kʼãrẽta odaibarabasi ãyi ewari jõi jʉ̃ãpanʉenara?

¹² Jesubara jarasi iyi kʼaidupanʉrãra naʉ̃ ewari jõbodoarera nekʼãrẽ mejãcha opanamarẽã. Jesuba trajota omarẽã amaesi ãyita. Jarasi bedʼea bia jaraka wãnamarẽã «Jerusalénʼne, Judeaza jõmaʉ̃nẽ adewara Samariade akʉza wawara naʉ̃ drʉa jõmaʉ̃nẽ» (Hech. 1:6-8). Jesubara trajo biata diasi iyi kʼaidupanʉrãra, ãyara osida Jesuba zokʼadapeadara mõbe ãyi ewarira bia zokʼasida.

13. ¿Kʼãrẽa biʼia zokʼadaibara dayirã ewarira? (Colosenses 4:5).

¹³ (Akʉra Colosenses 4:5). Dayikʉza sãwũãbʉ akʉira akʉibara sãwũã zokʼabʉta dayirã ewarita. Daya krĩcha ẽ bada berabaribʉba zʉbʉriabiseabʉ dayirãra (Ecl. 9:11). Atiaʉde beiseapanʉ.

14, 15. ¿Sãwũã bia zokʼaseapanʉ dayirã ewarira? (Hebreos 6:11, 12) (akʉra potota).

¹⁴ Dayirã ewarira bia zokʼaseapanʉ Jeowaba jarabʉta opanʉne akʉza audre iyi neũdukʼawua bapanʉne (Juan 14:21). Maʉ̃ kʼarea zarea opanadrʉ iduaribida  ẽ badadrʉ nekʼãrẽ baduba awuara babita, ewari jõmaʉ̃nẽ trajadadrʉ Daizezeba zokʼabʉ oita (1 Cor. 15:58). Dayirãta beira mawũã ẽ bʉrʉ naʉ̃ ewarinʉmʉta jõra, krĩchada ẽ bayi dayi ewarira bia zokʼa ẽ basita (Mat. 24:13; Rom. 14:8).

¹⁵ Jesubara iyi kʼaidubemarãra zokʼabʉ naʉ̃ drʉa jõmaʉ̃nẽ Daizeze Bedʼea majaradiayeda. Jesubara dayirã Jeowa organizasioneba jaradiabʉ sãwũã Daizeze Bedʼea jaradiaibarata, adewara dayirãba Daizeze Bedʼea jaradiaita nesidabʉra jõma diabʉ (Mat. 28:18-20). Dayirã trajora bia opanʉ Daizeze Bedʼea zokea jaradiapanʉne akʉza ʉrʉma jʉ̃ãpanʉne Daizeze ewari zeyeda. Dayirãbara ũrĩnaibara Daizeze Bedʼeade Hebreos 6:11, 12de jarabʉta «maraba nebia mejãcha jʉ̃ãpanʉta jidadamarẽã» (akʉra).

16. ¿Bʉara kʼãrẽta oita krĩchabʉ?

¹⁶ Jeowabara kʼawuabʉ kʼãrẽ ewaride akʉza kʼãrẽ ũmadaʉde zebita iyi ewarira. Mawũã berabaribʉrʉde aripe oyi propesia Daizeze Bedʼeade jarabadata. Dayirãbara krĩchaseabʉ maʉ̃ ewarira mesera ze ẽãta, mamina aranʉ aripe berabariyi (Hab. 2:3). Maʉ̃ ewari zeyeda dayirãbara ĩjãnaibara Jeowa ʉ̃rʉ akʉza jʉ̃ãnaibara Jeowata (Miq. 7:7).