1. Yezu ye mun lo fɔ a ka kalandenw ye laban wagati koo la? A y’u lasɔmi mun lo la?

 TILE damanin ka kɔn Yezu saya ɲɛ, a ka kalanden naani y’a ɲininga ko: “Taamasiɲɛ jumɛn bena . . . diɲɛ laban koo yira?” (Mat. 24:3). N’a sɔrɔ o kalandenw tun b’a fɛ k’a lɔn tuma min na Zeruzalɛmu n’a ka Alabatosoba tun bena halaki. U jaabitɔ, Yezu kumana Zeruzalɛmu n’a ka Alabatosoba halakili koo la. Nka a ma dan o ma, a kumana fana “diɲɛ laban” wagati koo la, an b’o min na sisan. Yezu y’a fɔ o wagati koo la ko: “Mɔgɔ si t’o loon n’a waati lɔn. Hali mɛlɛkɛw ni Ala Dencɛ t’a lɔn, fɔɔ Faa Ala kelenpe.” O kɔ, Yezu y’a ka kalandenw lasɔmi ko: “Aw k’aw yɛrɛ kɔlɔsi . . . aw labɛnnin ka to [wala aw ka to ɲɛɛ na, NW].”—Mariki 13:32-37.

2. Mun na a tun kɔrɔtanin lo saan kɛmɛkulu fɔlɔ kerecɛnw ka to ɲɛɛ na?

² Saan kɛmɛkulu fɔlɔ la, Yahutu minw tun ye kerecɛnw ye, a tun kɔrɔtanin lo u ka to ɲɛɛ na walisa k’u niin kisi. Koo minw tun bena a yira ko Zeruzalɛmu n’a ka Alabatosoba halakituma sera, Yezu y’o fɔ a ka kalandenw ye. A ko: “N’aw y’a ye ko Zeruzalɛmukaw juguw ka kɛlɛbolo ye dugu lamini tuma min na, aw k’a lɔn ko a halakituma sera.” O wagati la, Yezu ye min fɔ u tun ka ɲi k’u janto o la ani “ka boli ka taga kuluyɔrɔw la.” (Luka 21:20, 21). Minw y’u janto o lasɔmini kuma na, olu kisira tuma min na Ɔrɔmukaw ye Zeruzalɛmu halaki.

3. An bena mun lo lajɛ barokun nin na?

 ³ Bi, an be duniɲa juguman nin laban wagati lo la. O la, an fana ka ɲi k’an hakili sigi ani ka to ɲɛɛ na. Barokun nin na, an bena a filɛ cogo min na an be se ka koow kɛ ka dama kɛɲɛ n’an be duniɲa ka koow kɔrɔsira koɲuman. An bena a filɛ fana an be se ka to k’an yɛrɛ kɔrɔsi cogo min na ani wagati min tora, an be se ka baara ɲuman kɛ n’o ye cogo min na.

4. Koo minw be kɛra duniɲa kɔnɔ bi, mun na an ka ɲi ka to k’a filɛ u be Bibulu ka kiraya kumaw dafara cogo min na?

⁴ Koo minw be kɛra duniɲa kɔnɔ bi, kuun b’a la an ka to k’a filɛ u be Bibulu ka kiraya kumaw dafara cogo min na. Misali la, koo minw tun bena a yira ko Sutana ka duniɲa nin halaki tuma sera, Yezu y’o fɔ an ye (Mat. 24:3-14). Ciden Piyɛri y’an jija ko an k’an janto kiraya kumaw dafali koo la walisa an ka limaniya sabatinin ka to (2 Piyɛri 1:19-21). Bibulu ka kitabu laban be daminɛ ni kuma nunu ye ko: “Koo minw ka kan ka kɛ yanni dɔɔni, Ala ye sira di Yezu Krista ma, a k’olu yira a ka baarakɛlaw la.” (Yir. 1:1). O kama, koo minw be kɛra duniɲa kɔnɔ bi, an b’an janto u la kosɔbɛ ani k’a filɛ u be Bibulu ka kiraya kumaw dafara cogo min na. Ani n’a sɔrɔ a ka di an ye kosɔbɛ ka baro kɛ u koo la an ni ɲɔgɔn cɛ.

5. An ka ɲi k’an yɛrɛ tanga mun lo ma? Nka, an ka ɲi ka mun lo kɛ? (Jaaw lajɛ fana.)

⁵ Nka n’an be baro kɛra Bibulu ka kiraya kumaw koo la, an man ɲi k’a ɲini k’a fɔ koow bena kɛ cogo min na. Mun na do? Sabu an t’a fɛ ka koo si fɔ min be se ka na ni farali ye kafo kɔnɔ. Misali la, n’a sɔrɔ an y’a mɛn duniɲa kuntigiw y’a ɲɛfɔ olu be se ka kɛlɛko dɔ ban cogo min na ani k’a to mɔgɔw ka kɛ hɛɛrɛ la ani u latanganin ka to. O ɲɔgɔn na, an man ɲi k’a fɔ k’o kumaw be 1 Tesalonikaw 5:3 ka kiraya kuma dafa. Nka, an ka ɲi k’a ɲini k’a lɔn Jehova ka ɔriganisasiyɔn ye min fɔ kɔsa la o koo la. N’an be an ka barow basigi o lo kan, o be kɛ sababu ye kafo kaan bɛnnin be to ani kafodenw “ka miiri ka kɛ kelen ye.”—1 Kor. 1:10; 4:6.

6. An be kalan juman lo sɔrɔ 2 Piyɛri 3:11-13 kɔnɔ?

⁶ Vɛrise nunu kalan: 2 Piyɛri 3:11-13. Ciden Piyɛri b’an dɛmɛ ka koow kɛ ka dama kɛɲɛ n’an be Bibulu ka kiraya kumaw sɛgɛsɛgɛra. A b’an jija ko an ka “Ala ka loon makɔnɔ.” Mun na do? Yala o kɔrɔ ko Arimagedɔn bena daminɛ tuma min na, an ka ɲi k’a ɲini k’o “loon n’o waati” lɔn wa? Ayi, o tɛ. An b’o loon makɔnɔna sabu wagati min tora an b’a fɛ k’a yira ko ‘an be siran Ala ɲa’ ani k’an jija an “taamacogo ka ɲa.” (Mat. 24:36; Luka 12:40). O kɔrɔ, an b’a fɛ ka to ka tagama cogo bɛnnin na ani ka banba ka to ka baara kɛ Jehova ye sabu an b’a kanu kosɔbɛ. Walisa an jijanin ka to o la, an ka ɲi ka to k’an yɛrɛ kɔrɔsi.

7. An b’a yira cogo di ko an b’an yɛrɛ kɔrɔsira? (Luka 21:34).

⁷ Yezu y’a fɔ a kalandenw ye ko koo minw be kɛra duniɲa kɔnɔ u k’u janto o la. Nka, a ko u ka u yɛrɛ kɔrɔsi fana. A y’o fɔ ka gwɛ a ka lasɔmini kuma kɔnɔ min be sɔrɔ Luka 21:34 kɔnɔ (a kalan). A kɔrɔsi ko Yezu ko: “Aw k’aw yɛrɛw kɔlɔsi.” Mɔgɔ  min b’a yɛrɛ kɔrɔsi, koo o koo be se k’o tigi ni Jehova ka jɛnɲɔgɔnya nagasi, a b’a janto o la. A b’a seko bɛɛ kɛ fana k’a mabɔ o la. O cogo la, a be to Ala ka kanuya la.—Talenw 22:3; Zude 20, 21.

8. Ciden Pol ye kerecɛnw lasɔmi mun lo la?

⁸ Ciden Pol ye kerecɛnw lasɔmi ko u ka u yɛrɛ kɔrɔsi. Misali la, a y’a fɔ Efɛzi kerecɛnw ye ko: “Aw k’aw yɛrɛ kɔlɔsi kosɔbɛ, aw kana kɛ nalomanw ye, nga hakilitigiw.” (Efɛz. 5:15, 16). An ka Alako be farati la tuma bɛɛ. O lo kama Bibulu b’an ladi ko ‘an ka Matigi [Jehova] sago ɲini k’o lɔn.’ O la, an bena se k’an yɛrɛ tanga farati sugu bɛɛ ma.—Efɛz. 5:17.

9. Jehova sago ye min ye an koo la, an be se k’o faamu cogo di?

⁹ Koo minw be se k’an ka jɛnɲɔgɔnya nagasi ni Jehova ye, Bibulu t’o bɛɛ fɔ an ye. Tuma caaman na, an ka ɲi ka desizɔnw ta koo dɔw la Bibulu tɛ kuma tigitigi minw koo la. Walisa ka desizɔn ɲumanw ta, an ka ɲi k’a faamu “Matigi [Jehova] sago” ye min ye. An be se k’o faamu an kɛtɔ ka Ala ka Kuma sɛgɛsɛgɛ tuma o tuma ani ka miiri a kan. N’an ye Jehova sago faamu bɛrɛbɛrɛ ani ka kɛ ni “Krista ka miiriya” ye, an bena se ka koow kɛ bɛrɛbɛrɛ i ko “hakilitigiw.” An bena se k’o kɛ hali ni sariya tigitigi dɔ tɛ yen min b’a fɔ an ye an ka ɲi ka min kɛ (1 Kor. 2:14-16). Tiɲɛn lo ko a ka nɔgɔ ka farati dɔw lɔn, nka a man nɔgɔ ka dɔw lɔn.

10. An ka ɲi k’an yɛrɛ tanga farati minw ma u dɔw ye jumanw ye?

¹⁰ An ka ɲi k’an yɛrɛ tanga farati minw ma u dɔw ye nunu ye: sungurutigɛ wala kanbeletigɛ, dɔrɔtɔya, nugubatɔya, kuma juguw, ɲɛnagwɛko farimanw ani porno n’a ɲɔgɔnnaw (Zab. 101:3). An jugu Sutana be sababuw ɲinina tuma bɛɛ k’an ni Jehova ka teriya nagasi (1 Piyɛri 5:8). N’an m’an yɛrɛ kɔrɔsi, Sutana be se k’an lasun dɔɔni dɔɔni ka ɲɛbɔ tɔɔw fɛ, ka nanbarakow kɛ, ka kɛ wasabaliw ye, ka tɔɔw kɔniya, ka kuncɛbaya kɛ ani ka dimi mara an kɔnɔ (Gal. 5:19-21). A daminɛ na, an be se k’a miiri ko farati tɛ o koow la. Nka, n’an ma sin ka dɔ kɛ dɔ ye k’u bɔ an kɔnɔ, u bena to ka bonya i n’a fɔ binjugu ani ka bɔnɛ lase an ma.—Zaki 1:14, 15.

11. An ka ɲi k’an yɛrɛ tanga farati dogonin juman lo ma ani mun na do?

¹¹ An ka ɲi k’an yɛrɛ tanga farati dogonin minw ma, u dɔ ye jɛnɲɔgɔn juguw lo ye. Miiri nin na: I baarakɛɲɔgɔn tɛ Jehova batobaga ye. Komi i b’a fɛ a ka kɛ ni miiriya ɲuman ye Jehova Seerew koo la, i b’a minɛ ni ɲumanya ye ani i b’a dɛmɛ. I be sɔn fana ka tilera dumuni kɛ n’a ye tuma kelen kelen. Nka dɔɔni o kɔ, i be to k’o kɛ tuma o tuma. Tuma dɔw la, o tigi be malobaliya kumaw fɔ. A daminɛ na, o man di i ye. Nka kɔfɛ, i delila o kumaw na fɔɔ u t’i kɔnɔ gwan tugun. Loon dɔ baara jiginin kɔ, i baarakɛɲɔgɔn ko aw ka taga fɛɛn dɔ min ɲɔgɔn fɛ ani i sɔnna. A laban, i y’a daminɛ ka miiri i ko i baarakɛɲɔgɔn. A tɛna mɛɛn i bena a daminɛ ka koow kɛ i ko ale. Tiɲɛn lo ko an be bɛɛ bonya ani k’u minɛ ni ɲumanya ye. Nka, an k’a to an hakili la ko an be wagati kɛ ni minw ye, u be nɔɔba to an kan (1 Kor. 15:33). N’an b’an yɛrɛ kɔrɔsi i ko Yezu y’a ɲini an fɛ cogo min na, an tɛna jɛnɲɔgɔnya kɛ ni mɔgɔw ye minw tɛ  Jehova ka sariyaw labato. An tɛna o kɛ fɔɔ ni waajibiko lo (2 Kor. 6:15). An bena a ye farati min b’an seen kɔrɔ ani k’an yɛrɛ tanga o ma.

12. K’u to u be laban loon kɔnɔna, Yezu ka kalandenw tun ka ɲi ka mun lo kɛ?

¹² Yezu ka kalandenw tun man ɲi k’u bolo kuru ka sigi ka to ka laban loon kɔnɔ. Yezu ye baara kalifa u ma. A ko u ka kibaro diiman fɔ “Zeruzalɛmu, ni Zude mara bɛɛ la, ani Samari mara la, fɔɔ ka taga se diɲɛ faan bɛɛ la.” (Kɛw. 1:6-8). O tun ye baaraba yɛrɛ lo ye! Yezu ka kalandenw ye baara ɲuman kɛ n’u ka wagati ye, u kɛtɔ k’u seko bɛɛ kɛ o baara la.

13. Mun na an ka ɲi ka baara ɲuman kɛ n’an ka wagati ye? (Kɔlɔsikaw 4:5).

¹³ Kɔlɔsikaw 4:5 kalan. Walisa k’an yɛrɛ kɔrɔsi, an ka ɲi ka miiri k’a filɛ an be baara min kɛ n’an ka wagati ye. “Barinako” be se k’an bɛɛ sɔrɔ (Waaj. 9:11). Misali la, an be se ka bari ka sa.

14-15. An be se ka baara ɲuman kɛ n’an ka wagati ye cogo di? (Eburuw 6:11, 12). (Jaa lajɛ fana.)

¹⁴ N’an be Jehova sago kɛ ani k’an ka jɛnɲɔgɔnya sabati n’a ye, an be baara ɲuman lo kɛra n’an ka wagati ye (Zan 14:21). An ka ɲi k’an ‘jija kosɔbɛ,  an kana siran, an ka taga ɲa Matigi ka baara la tuma bɛɛ.’ (1 Kor. 15:58). O la hali ni laban sera, a mana kɛ an saya wala duniɲa juguman nin laban ye, an tɛna nimisa.—Mat. 24:13; Ɔrɔm. 14:8.

¹⁵ Bi fana Yezu b’a ka kalandenw ɲɛminɛna, olu minw be waajuli kɛra duniɲa kuru bɛɛ kɔnɔ Ala ka Masaya koo la. Yezu b’a ninyɔrɔ kɛra. A be tɛmɛ Jehova ka ɔriganisasiyɔn fɛ k’an kalan waajuli kɛcogo la. An mako be minan minw na walisa ka kibaro diiman jɛnsɛn, a b’o di an ma fana (Mat. 28:18-20). An fana b’an ninyɔrɔ kɛ, n’an b’an jija ka waajuli kɛ ani ka mɔgɔw kalan. Ani an be to ɲɛɛ na ka Jehova makɔnɔ a ka daan sigi duniɲa juguman nin na. N’an be Eburuw 6:11, 12 ka ladili sira tagama, an nɔrɔnin bena to an ka jigiya la “fɔɔ ka taga se a laban ma.”—A kalan.

16. An cɛsirinin lo ka mun lo kɛ?

¹⁶ Jehova y’a latigɛ a bena Sutana ka duniɲa nin halaki loon min na ani lɛri min na. N’o loon sera, siga t’a la kiraya kuma minw be sɔrɔ a ka Kuma kɔnɔ, a bena u bɛɛ dafa. Tuma dɔw la, a be se ka kɛ an ɲɛɛ na ko duniɲa nin laban be mɛɛnna. Nka, Jehova ka loon bena se “waati latigɛlen na.” (Abak. 2:3, Bible senuma). O la, an k’an jija k’an “ɲɛsin Matigi ma,” an kɛtɔ k’a yira ko an be an “Kisibaa Ala makɔnɔ.”—Mise 7:7, Bible senuma.