1. Za dzam Yésu a nga dzô beyeghe bèñ da daghe « amangha, », ye naa, za mbame a nga ve be ?

 AYÔM melu kaa naa Yésu a wu, beyeghe bèñ benii b’ézing be nga sili ñe naa : « Za ndem da ye lere naa [. . .] amangha ye émo di é ntoo ? » (Mat. 24:3) Éyong ézing be nga sili ñe de, amu be nga kômô yem éyong Jérusalem ya templo ba ye tobe ntsaman. Éyalane Yésu a nga ve be, déé mbe ki fave akal amangha y’émo be Judíos, ve ya fe akal « amangha ye émo » bia ning éndagha ñi. Nfa metam me y’amangha, Yésu a nga dzô naa : « Édi da daghe môs ye awala, môt ézing aa yem ki de, abo b’angele a dzôp été, nge Moan, ve fave Ésaa. » Éde a nga bame beyeghe bèñ besese naa, « be tobe évévéñ » ye « tsini naa ba bo nkee »—Marc 13:32-37.

2. Amu dzé é mbe édedèè éban naa, be Judíos be mbe bekristen be ye ntet mimbu ôsua, be tsini naa ba bo nkee ?

² Be Judíos be mbe bekristen be ye ntet mimbu ôsua, be nga yiène tsini naa ba tobe nkee, amu naa, dzam té é mbe name bining bieba. Yésu a nga dzô beyeghe bèñ naa, ba yiène dzeng naa be yem éyong amangha y’émo be Judíos da ye kuiñ. A nga dzô naa : « Éyong mii yen bizima bi manang kuarane Jérusalem, yemghane naa, amangha dèñ é ntoo bebéñ. » Tam té, be nga yiène bèè mbame Yésu ye « sum naa ba tup minkôô été » (Luc 21:20, 21). É bôt be nga bèè mbame té, be nga kôre bining bieba éyong be Romanos be nga zu tsam Jérusalem.

3. Za mam bia ye yen ayeghle di té ?

³ Ému, bia ning metam me y’amangha me ye mbia émo di. Éde, bia fe, bia yiène baghle é ken dzèè ya tsini naa bia  bo nkee. Ayeghle di té, bia ye fas aval bi ne baghle n’yenane mam wa yiène éyong bia yen é mam ma bobane émo, y’aval bi ne bo nkee ya bia bebién, ya fe, aval bi ne yem belane é tam é ligheya bia.

4. Amu dzé bia yiène kômô yen aval é mam ma bobane émo di éndagha, ma dzale nkulan adzô ya Biblia ?

⁴ Ya mbemba akalgha, bia kômô yen aval é mam ma bobane émo éndagha, ma dzale nkulan adzô ya Biblia. Éfônan, Yésu a nga kobe bia mam m’ézing naa a vole bia a yem éyong amangha y’émo Satan di da ye yit bebéñ (Mat. 24:3-14). Ntôl Pedro a nga sakh bia naa, bi bo nkee ya nkulan adzô wa dzalban nfa ye naa, mebun mèè be bo ngu’u (2 Pierre 1:19-21). Abakh da sughlan a Biblia été, da sum ya bifiè bi : « N’lerane Yésu, éwi Nzame a nga ve ñe, nfa ye naa, a kulane aloo dèñ é mam ma yiène zu boban ébe avitsang tam » (Mel. 1:1). Éde bia bira bis é mam ma bobane éndagha ye kômô yem aval mam meté me ne dzale nkulan adzô ya Biblia. Éde bia fep a n’nem naa bi kobe aval mam meté ya é bôt bevoo.

5. Za dzam bia yiène saalé naa bia bo, ve za dzam ki bia yiène bo ? (A daghe fe bivaghle).

⁵ Ve, éyong bia kobe adzô nkulan adzô ya Biblia, bia yiène saalé naa bi bo ane bia yem é dzam da ye bobane kaa naa é bobaneyang. Amu dzé ? Amu naa, biaa kômo ki dzô é dzam ézing é ne kane ékôan. Éfônan, bi ne wokh ane bedjié be ye é si ñi ba kobe aval be ne kôm mintsiè mi ye é si ñi, ye soo mvoa ye kaa ébiran. Ndaane naa, bia sum ke bia dzô naa bifiè bité bia dzale nkulan adzô ô ne nten 1 Bethessalonicien 5:3, bia yiène ke dzeng minféféñ mefuèñ mi ndaghe kuiñ nfa té. Éyong bia lèè minlang bii bembe ébe é dzam Ékôan Jehôva é kuleyang, bia vole ékôan a baghle élat « ôsiman ôvoo été »—1 Becor. 1:10 ; 4:6.

6. Za melepgha bia ñong ébe nten 2 Pierre 3:11-13 ?

⁶ A lang 2 Pierre 3:11-13. Ntôl Pedro a vole bia a baghle n’yenane mam wa yiène éyong bia fas nkulan adzô ya Biblia. A sakh bia naa, « bi baghle ôsiman, é môs Jehôva. » Amu dzé ? Se ki amu bia dzeng naa bia yem « é môs ye awala » Jehôva a ye soo Armaguédon, ve amu naa, bia kômô yem belane é tam é ligheya bia, nfa ye naa bi bo mam ye « abo dulu é ne nfuban ye mimboan mia lere élat ya Nzame » (Mat. 24:36 ; Luc 12:40). Nge bi ne de dzô aval éfe, bia kômô baghle abo dulu é ne tetele, ye yen nge mengu’u bia ve ésèñ Jehôva ma lere naa, bia bira ñe dzing. Bia yiène bo nkee ya bia bebién nge bia kômô de baghle ôtemgha wèè été.

7. Aval avé bia lere naa bia tobe nkee ya bia bebién ? (Luc 21:34)

⁷ Yésu a nga dzô beyeghe bèñ naa, be tobe nkee, se fave ya é mam ma bobane éning, ve ya fe bebién. Dzam té, da tugha lerebane ya mbamane ô ne nten Luc 21:34 (A lang). Baghle bifiè Yésu bi : « Tobghane nkee ya mina bebién. » É môt a tobe nkee y’émièn, a bo nkee ya é mam mesese me ne wiñ élat dèñ ba Jehôva ntukh, a bo fe é dzam da yiène naa, a saalé mam meté. Aval té, éde a baghle  émièn édzing Nzame été—Mink. 22:3 ; Jude 20, 21.

8. Nsonghane ôvé ntôl Pablo a nga ve bekristen ?

⁸ Ntôl Pablo a nga songhane bekristen nfa ye naa, be tobe nkee ya bebién. Éfônan, a nga dzô bekristen be ya Efesios naa : « Tughane bo nkee naa, aval mia wulu é taa bo ane é bôt be ne akukut, ve ane é bôt be ne akeng » (Beéph. 5:15, 16). Bia tubane meboblan nfa ya nsisim tam ése, éde Biblia a lep bia naa, « bi ke ôsu ye yem dzé é ne nkômane Jehôva » nfa ya lumane meboblan mesese bi ne tubane me—Beéph. 5:17.

9. Aval avé bia yem nkômane Jehôva a bele akal dèè ?

⁹ Biblia aa mane ki tu é mam mesese me ne ve naa élat bia be Jehôva é wu ntukh. Abuiñ biyong, bia yiène ñong minkighane mia daghe é mam méé bele ki ngura atsing a Biblia été. Éde, nfa ye naa bi ñong mbemba minkighane, bia yiène yem, dzé é ne « nkômane Jehôva. » Bi ne bo dzam té, éyong bi ne mban a yeghe ya binane Nkobe Nzame. Nté sese n’woghane mam wèè nfa nkômane Jehôva wa ye ke wa vem, ye sum naa bia bele « ôsimane Christ », da ye ve naa, bi wulu ane « é bôt be ne akeng », amben bii bele ki ngura atsing ô ne bia lere abo dulu bia yiène bele (1 Becor. 2:14-16). Biyong bizing bi wula dzigha yen é dzam bia yiène saalé ; ve biyong bivoo kaa.

10. Za mbia be-man m’ézing bia yiène saalé ?

¹⁰ Mbia be-mam m’ézing bia yiène saalé me ne ane coquetear nge ki flirt, a bira ñu meyok, a bira dzi, a kulu bifiè bia dzughu, mbimbia memvuiñ, a yen bingengeng bia ngône nget, pornografía ye é mam mefe ma fônane mam meté (Bya 101:3). Debele, nzizing wèè, a dzeng éyong asese aval a ne tsam élat bia be Jehôva (1 Pierre 5:8). Satan a ne béñ ôsiman wèè ye min’nem miè été, mbia mefulu ane a kômô é mam é bôt bevoo be bele, ékoakoat abo dulu, ôzang akum, évîn, éngung ya zing (Begal. 5:19-21). Mesumgha, mam meté méé se ki édedèè ngu’u. Ve, nge bi boo kaa bo é dzam da yiène naa bi vèè mam meté étéñ té ébién, ma ye tsini naa ma vem ane éloa é bele nsu, ye so bia mintsiè—Jacq. 1:14, 15.

11. Za mbia dzam a ne kaa tugha yene bia yiène saalé, amu dzé ki ?

¹¹ Mbia dzam ézing bi ne kaa tugha yen, a ne mbimbia memvuiñ. Fasghe é dzam di. Wa sèñ ya é môt éé se ki moan Bengaa Jehôva. Wa kômô naa môt té a simane mbemba be-man nfa Bengaa Jehôva, éde wa lere ñe mbemba fulu ye bo añep ya ñe. Biyong bizing wa yebe naa wa dzi ya môt té. Éde, niène ôyôm tam wa lôt, ô nga bo-hang de biyong bisese. Wa temtem, môt té a nga sum wô tsiè mam nkehane binong. Ôsusua wa dzeng naa ô saalé minlang mité. Ya tam, ô mane vebane minlang mité aval da ve naa, waa wokh ki fe abé éyong ba lèè mie. Éde môs ézing, môt té a bane wa naa, mi ke ñu dzôm ézing niène ésèñ da ye mam, ane wa yebe. A temtem, ô nga sum fe tem ane é môt mia ñe mia bo ésèñ. Éyong ô tele aval étéñ té, daa ye ki fe ñong abuiñ tam, naa wa fe, ô sum bo mam ane môt té a bo me. Bebela a ne naa, bia lere mbemba fulu ye kang bôt besese. Ve bia yiène simane naa bia ye bo mam ane é bôt bia top naa bia lôt tam ya be (1 Becor. 15:33). Nge  bia tobe nkee ya bia bebién, ane Yésu a nga sakh bia de, biaa ye ki vaghle bo élat ya é bôt be ne kaa kang menvena Jehôva (2 Becor. 6:15). Bia ye yen mbia dzam a zu, ye ke de ôyap.

12. Za dzam beyeghe Yésu be nga yiène bo nté be nga yane amangha y’émo deba ?

¹² Beyeghe Yésu béé nga yiène ki tobe mo me kuarane be, nté be nga yane amangha y’émo deba. Yésu a nga ve be ésèñ be nga yiène bo. A nga lôm be naa be ke kanghle mbemba fuèñ « a Jérusalem, a Judée ya Samaria ése ngura, ye mevôm ma dang ôyap si ése ngura » (Bisè mintôl 1:6-8). Za môra ésèñ Yésu a nga kee be vèè alé ! Éyong be nga bo ésèñ té ya n’nem ôse, be nga yem belane é tam deba.

13. Amu dzé bia yiène yem belane é tam dèè ? (Becolossien 4:5)

¹³ A lang Becolossien 4:5. Naa bi bo nkee ya bia bebién, bia yiène fas aval bia belane é tam dzèè. « É mam biaa yane ki » me ne name kada môt y’ébe bia (Eccl. 9:11). Bi ne sia dzimle éning dèè.

14-15. Aval avé bi ne yem belane é tam dzèè ? (Behébreu 6:11, 12) (A daghe fe évaghle).

¹⁴ Bi ne yem belane é tam dzèè éyong  bia bo nkômane Jehôva ye wône élat dèè ya ñe (Jean 14:21). Bia yiène « yem ngu’u, kaa fonghan, bii bele abuiñ mam me ya bo mban, ébe ésèñ Nti » (1 Becor. 15:58). Éde, éyong amangha déé kuiñ, a bo amangha y’éning dèè, nge ki amangha ye mbia émo di, biaa ye ki dzôban—Mat. 24:13 ; Bero. 14:8.

¹⁵ Ému, Yésu a tsini naa a wulu ya beyeghe bèñ, nté ba kanghle fuèñ y’Édjié Nzame si ése ngura. A bo-hang é ngap dzèñ. Ngalane Ékôan Jehôva, Yésu a yeghle bia aval bia yiène kanghle, a ve fe bia bivole bia yi naa bi kanghle mbemba fuèñ (Mat. 28:18-20). Bia bo é ngap dzèè éyong bi ne akeng ésèñ minkanghle ye ayeghle dèè, bii tobe nkee ya bia bebién, nté bia yane naa Jehôva a mane tsam mbia émo di. Éyong bia dzale melepgha bia kuane me nten Behébreu 6:11, 12, bia ye tugha biñ ôyane wèè « yakekuiñ amangha »—A lang.

16. Za dzam bia ñong nkighane naa bia bo ?

¹⁶ Jehôva a bele é môs ye awala a ye zu mane tsam mbia émo Satan. Éyong môs té wa ye kuiñ, nkômane Jehôva nfa minkulane medzô wa ye dzalban. Nté té, biyong bizing, é ne fônane naa amangha ye mbia émo di daa dzigha ki so. Ve, é môs Jehôva wa ye siène « é tam a va takh de ! » (Habac. 2:3) Édeeng, n’ñonghane nkighane naa, bia momo Jehôva, « bii lere fulu ye a yane é Nzame a kôre [bia] »—Michée 7:7.