1. Na cava e tukuna o Jisu vei ira na nona tisaipeli me baleta na gauna ena vakarusai kina na ivakarau vakaJiu? Cava na nona ivakasala vei ira?

 NI VO e vica na siga me mate o Jisu, eratou tarogi koya e va na nona tisaipeli: “Na cava . . . na ivakatakilakila ni . . . ivakataotioti ni veika vakavuravura?” (Maciu 24:3) Kena irairai ni ratou veinanuyaka na tisaipeli qori se ratou na kila vakacava na gauna ena vakarusai kina na ivakarau vakaJiu ena gauna ya. Nona sauma o Jisu, a sega ni tukuna ga ni na vakarusai na ivakarau vakaJiu, e tukuna tale ga “na ivakataotioti ni veika vakavuravura” eda bula donuya. Me baleta na gauna ena vakarusai kina, e kaya o Jisu: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” Oti e vakasalataki ira kece na nona tisaipeli mera “yadra tiko.”—Mari. 13:32-37.

2. Na cava e bibi kina mera yadra tiko o ira na bula donuya na ivakarau vakaJiu?

² E bibi mera yadra tiko na lotu vaKarisito Jiu ena imatai ni senitiuri, ni vakatau kina na nodra bula. E tukuna o Jisu vei ira na nona imuri na ka mera raica mera kila kina ni sa voleka ni vakarusai na ivakarau vakaJiu. E kaya: “Ni dou raica ni sa wavokiti Jerusalemi na mataivalu, dou kila ni sa vakarau vakalalai.” E bibi mera muria ena gauna qori na ivakaro i Jisu, mera “dro sara ina veiulunivanua.” (Luke 21:20, 21) O ira na rogoca na ivakaro qori era bula ni vakarusai Jerusalemi o ira na kai Roma.

3. Na cava eda na veivosakitaka ena ulutaga qo?

³ Nikua eda bula donuya na gauna ni icavacava, se na gauna ena vakarau vakarusai kina na ituvaki ca ni vuravura qo. E bibi tale ga meda yalomatua meda yadra tiko.  Eda na veivosakitaka ena ulutaga qo na sala meda lewai keda vinaka nida raica na veika e yaco tiko e vuravura, na sala meda qarauni keda kina, kei na sala meda vakayagataka vinaka kina na gauna sa vo.

4. Na cava meda kauaitaka kina na vakayacori ni parofisai vakaivolatabu nida raica na veika e yaco tiko e vuravura?

⁴ E tiko na vuna vinaka eda kauaitaka kina na kena vakayacori na parofisai nida raica na veika e yaco tiko e vuravura nikua. Kena ivakaraitaki, e vakamatatataka o Jisu eso na ka ena yaco meda kila kina ni sa voleka ni cava na veika vakavuravura i Setani. (Maciu 24:3-14) E uqeti keda na yapositolo o Paula meda kauaitaka na kena vakayacori na parofisai me rawa ni dei tiko ga na noda vakabauta. (2 Pita 1:19-21) Qo na itekitekivu ni ka e tukuni ena iotioti ni ivola ena iVolatabu: “Na ivakatakila e solia na Kalou vei Jisu Karisito, me vakaraitaka vei ira na nona dauveiqaravi na ka ena vakarau yaco.” (Vkta. 1:1) Koya gona eda kauaitaka vakalevu na veika e yaco tiko e vuravura kei na noda kila na sala e vakayacori kina na parofisai vakaivolatabu. Eda na via veivosakitaka sara ga qori.

5. Na cava meda qarauna? Cava meda cakava? (Raica tale ga na iyaloyalo.)

⁵ Nida veivosakitaka na parofisai vakaivolatabu, meda qarauna sara meda kua ni via vakilakila na ka ena yaco. Na vuna? Eda sega ni via tukuna e dua na ka ena rawa ni vakavuna na duiyaloyalo ena ivavakoso. Kena ivakaraitaki, eda na rairai rogoci ira na iliuliu kei vuravura nira veivosakitaka na iwali ni dua na ka e veiletitaki, mera kauta tale ga mai na vakacegu kei na sautu. Meda kua ni tinimaka sara ni sa vakayacori tiko na parofisai ena 1 Cesalonaika 5:3, ia e vinakati meda kila tiko na ka se qai tabaki oti ga. Nida yavutaka na ka eda veivosakitaka ena itukutuku e tabaka na isoqosoqo i Jiova, eda sa vukei ira tiko na lewe ni ivavakoso ‘mera duavata tiko ga ena nodra inaki.’—1 Kor. 1:10; 4:6.

6. Na cava eda vulica ena 2 Pita 3:11-13?

⁶ Wilika 2 Pita 3:11-13. E vukei keda na yapositolo o Pita me donu na noda rai nida dikeva na parofisai vakaivolatabu. E uqeti keda meda “namaka tiko me yaco mai na siga i Jiova.” Na vuna? Eda sega ni via kila na “siga kei na aua” ena kauta mai kina o Jiova na Amaketoni, ia eda vinakata meda vakayagataka na vo ni gauna meda muria kina na ‘ivalavala savasava, meda qarava tale ga na Kalou.’ (Maciu 24:36; Luke 12:40) Eda via cakava na ka dodonu qai vakadeitaka ni ka kece eda cakava vei Jiova e ivakaraitaki ni noda lomani koya vakalevu. Me rawati qori e vinakati meda qarauni keda.

7. Eda na vakaraitaka vakacava nida qarauni keda? (Luke 21:34)

⁷ E tukuna o Jisu vei ratou nona tisaipeli me ratou kua wale ga ni kila na veika e yaco tiko e vuravura, me ratou qarauni ratou tale ga. E matata na tikina qori ena ivakasala ena Luke 21:34. (Wilika.) Rogoca na ka e tukuna o Jisu: “Dou qarauni kemudou.” Nida qarauni keda, eda yadrava na ka e rawa ni vakaleqa na noda veiwekani kei Jiova, eda na sega sara ni muria. Nida cakava qori, eda na  tiko ga ena loloma ni Kalou.—Vkai. 22:3; Juta 20, 21.

8. Na cava e tukuna na yapositolo o Paula vei ira na lotu vaKarisito?

⁸ E tukuna na yapositolo o Paula vei ira na lotu vaKarisito mera qarauni ira. Me kena ivakaraitaki, e tukuna vei ira na lotu vaKarisito e Efeso: “Ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku.” (Efeso 5:15, 16) E saga tiko ga o Setani me vakaleqa na noda veiwekani kei Jiova, e vakasalataki keda gona na iVolatabu meda ‘saga meda kila tiko ga se cava na loma i Jiova’ meda rawa ni qarauni keda mai na sasaga i Setani.—Efeso 5:17.

9. Eda na kila vakacava na loma i Jiova?

⁹ E sega ni tukuna vakamatata na iVolatabu na ka kece e rawa ni vakaleqa na noda veiwekani kei Jiova. Levu na gauna eda dau vakatulewataka na ka e sega ni vakamacalataki vakadodonu ena iVolatabu. Meda vakatulewa vinaka, e bibi meda kila se kauaitaka na “loma i Jiova.” Eda na cakava vakacava? Oya nida vulica wasoma na Vosa ni Kalou qai vakasamataka vakatitobu. Na levu ga ni noda kila na loma i Jiova qai tiko vei keda na “rai i Karisito,” eda na ‘vakataki ira sara ga na vuku’ ke sega mada ga ni matata na lawa me dusimaka na noda itovo. (1 Kor. 2:14-16) Eso na gauna ena rawarawa meda kila na ka meda qarauna, eso tale na gauna ena dredre.

10. Na cava eso na ka meda qarauna?

¹⁰ E vinakati meda qarauna eso na ka e dau veivakaleqai me vaka na wede, gunu se kana vakasivia, vosa mosimosi, sarava na ka ni veivakamarautaki voravora, iyaloyalo vakasisila, kei na ka ca va ya. (Same 101:3) Na keda meca na Tevoro, e qara tiko ga na sala me vakaleqa na noda veiwekani kei Jiova. (1 Pita 5:8) Ke da sega ni yadra tiko, o Setani ena bucina ena noda vakasama kei na lomada na vuvu, lasu, kocokoco, veicati, dokadoka, kei na leva. (Kala. 5:19-21) De dua ena sega ni kaukaua sara ni se qai tekivu, ia ke da sega ni cavuraka totolo ena rawa ni tubu tiko ga me vaka na kau gaga qai veivakaleqai.—Jeme. 1:14, 15.

11. Na cava e dua na leqa meda qarauna? Na vuna?

¹¹ E dua na leqa e biu mai vaqaseqase, ya na ilala ca. Dikeva mada na ituvaki qo. O cakacaka vata kei na dua o sega ni vakabauta vata. O vinakata me taleitaki ira na iVakadinadina i Jiova na nomu itokani qori, ya na vuna o yalovinaka kina, o dau veivuke tale ga. O na rairai vakadonuya mo lai vakasigalevu vata kei koya ena so na gauna. Sega ni dede drau sa lai vakasigalevu wasoma. Eso na gauna sa veitalanoataki na italanoa ca, o a sega sara ga ni vinakata mo rogoca ena imatai ni gauna. Lakolako sa matau vei iko mo rogoca na italanoa va qori, sa sega ni ca vei iko. Dua na siga e sureti iko na nomu itokani qori mo drau lai gunu vata ni suka na cakacaka, o mani vakadonuya. Lakolako sa duavata nomu rai kei na nona rai. Sega ni dede o sa vakatotomuria na ka e dau cakava. E macala nida vinakata meda yalovinaka vei ira kece, meda dokai ira tale ga. Ia meda nanuma tiko nida na vakatotomuri ira eda digia meda veimaliwai vata. (1 Kor. 15:33) Ke da qaqarauni me vaka e uqeti keda kina o Jisu eda na sega ni via veimaliwai kei ira na sega ni muria na ivakatagedegede i Jiova. (2 Kor. 6:15) Eda na raica na leqa da qai lako tani mai kina.

12. Na cava mera cakava na tisaipeli i Jisu nira waraka tiko na gauna me cava kina na ivakataotioti ni veika vakavuravura?

¹² Mera kua ni vucesa na tisaipeli i Jisu nira waraka tiko na gauna me cava kina na ivakataotioti ni veika vakavuravura. E tiko na cakacaka e lesia vei ira o Jisu. E vakaroti ira mera vunautaka na itukutuku vinaka e “Jerusalemi, e Jutia taucoko, e Samaria, kei na veivanua yawa sara kei vuravura.” (Caka. 1:6-8) E dua na itavi levu e lesia o Jisu vei ira na nona imuri! Nira gumatua ena itavi qori, era vakayagataka vinaka na nodra gauna.

13. Na cava meda vakayagataka vinaka kina na noda gauna? (Kolosa 4:5)

¹³ Wilika Kolosa 4:5. Me rawa nida qarauni keda, e bibi meda vakasamataka noda vakayagataki gauna. Na vuna? E rawa ni yacovi keda kece na “ka e sega ni namaki.” (Dauv. 9:11) E rawa nida mate vakasauri.

14-15. Sala cava eda na vakayagataka vinaka kina na noda gauna? (Iper. 6:11, 12) (Raica tale ga na iyaloyalo.)

¹⁴ Eda na vakayagataka vinaka na noda gauna nida cakava na loma i Jiova, meda vaqaqacotaka tale ga noda veitokani kei koya. (Joni 14:21) E vinakati meda ‘tudei, meda kua ni yavala, meda dau vakaitavi  vakalevu ena cakacaka ni Turaga.’ (1 Kor. 15:58) Se mani cava na noda bula se na ituvaki ca ni vuravura qo, eda na sega ni veivutuni.—Maciu 24:13; Roma 14:8.

¹⁵ Nikua e dusimaki ira tiko na nona tisaipeli o Jisu mera vunautaka na Matanitu ni Kalou e vuravura taucoko. Sa qarava vinaka o Jisu na nona itavi. E vakayagataka na isoqosoqo i Jiova me vakavulici keda ena sala meda vunau kina, e vakarautaka tale ga na ivukevuke meda vunautaka na itukutuku vinaka. (Maciu 28:18-20) Eda na qarava vinaka na noda itavi nida gumatua ena vunau, veivakavulici, eda na yadra tale tiko ga nida waraki Jiova me vakarusa na ituvaki ca qo. Nida muria na ivakasala ena Iperiu 6:11, 12, eda na dei tiko ga ena noda inuinui “me yacova sara na icavacava.”—Wilika.

16. Na cava meda vakadeitaka?

¹⁶ Sa lokuca oti tu o Jiova na siga kei na aua ena vakarusa kina na vuravura i Setani. Ni yaco mai na siga qori ena vakayacora kece o Jiova na parofisai e tu ena nona Vosa. Eso na gauna eda na rairai nanuma ni sa rui bera na siga qori. Ia “ena sega ni bera” na siga i Jiova! (Apak. 2:3) Meda vakadeitaka gona meda “rai tiko ga vei Jiova” nida ‘waraka tiko na Kalou na noda ivakabula.’—Maika 7:7.