1. Ovikwaye Jesus mbya raera ovahongewa ve ohunga ‘nomaandero wouye mbwi’ nu we ve pa erakiza riṋe?

 KOMURUNGU wa indu Jesus e hi ya ṱa, ovahongewa ve vane ve mu pura kutja, ‘otjiraisiro tjomaandero wouye mbwi matji rire tjiṋe?’ (Mat. 24:3) Ovahongewa mbo mape ya aave vanga okutjiwa kutja Jerusalem nondjuwo ondjapuke ya Muhona mavi yandekwa ruṋe. Okuza komambo Jesus nga hungira, eye aa hungirire komayandekero wondjuwo ondjapuke nu wina aa hungirire ‘komaandero wouye’ mu tu hupira. Jesus wa tja ohunga nomaandero wouye: “Nungwari kape nomundu ngu ma tjiwa eyuva ndo na indji oiri, nangarire ovaengeli meyuru, nangarire ingwi Omuna posi yaTate Eye porwe.” Neye wa rakiza ovahongewa ve avehe “okukara katumba.”—Mar. 13:32-37.

2. Ongwaye tji ya ri otjiṋa otjinanḓengu kOvakriste veserewondo etenga okukara katumba?

² Ovakriste Ovajuda veserewondo etenga aave sokukara katumba kutja omiinyo vyawo vi yamwe. Jesus wa raera ovemukongorere ohunga noviraisiro mbi mavi raisa kutja omayandekero ye ri popezu. Eye wa tja: “Tji mamu munu Jerusalem atja koverwa i ovimbumba vyovita, indino otji mamu tjiwa kutja omanyoneno watjo ya tumbuka.” Otjiṋa ho tji tja tjitwa, owo aave sokupuratena kerakiza ra Jesus ‘nokutaurira kozondundu.’ (Luk. 21:20, 21) Imba mba puratena kerakiza ra Jesus ndo, owo va yamwa indu Ovaroma tji va nyona Jerusalem.

3. Morupa ndwi matu kahungirira ku ye?

 ³ Ndino tu hupa ku ṱa komaandero wouye ourunde mbwi. Ku nao eṱe wina matu sokukara nomuungutima nokukara katumba. Morupa ndwi matu kahungirira kutja omomuano uṋe mu matu yenene okukara nomeripura omawa otja tji matu tara koviṋa mbi mavi tjitwa mouye, nomuano mu matu yenene okuyandja ombango ku eṱe oveni nokutja matu yenene vi okuungurisa oruveze ndu tu na ro nai momuano omusemba.

4. Ongwaye tji twa sokukara nonḓero okumuna omuano ovitjitwa mouye tji vi yenenisa omaprofetero wOmbeibela?

⁴ Tu kara nonḓero otja tji matu munu oviṋa mouye tji mavi yenenisiwa otja komaprofetero yOmbeibela. Otjotjihorera, Jesus we tu raera oviṋa mbi mavi yenene okutuvatera okutjiwa kutja omaandero wouye wa Satan mbwi ye ri popezu. (Mat. 24:3-14) Omuapostele Petrus we tu tunduuza okuyandja ombango komayenenisiro womaprofetero wOmbeibela, kokutja tu yenene okukurisa ongamburiro yetu. (2 Petr. 1:19-21) Membo esenina rOmbeibela mwa tjangwa omambo nga: “Membo ndi mwa tjangwa ovitjitwa Jesus Kristus mbya vandurura. Ndjambi we Mu pa omavandururiro nga kutja a raise kovakarere ve imbi mbi mavi sokutjitwa tjimanga.” (Omavan. 1:1) Eṱe tu nonḓero tjinene moviṋa mbi tjitwa mouye ndino, nu tu vanga okutjiwa omuano mu mavi yenene okuyenenisa omaprofetero wOmbeibela. Nu tu vanga okuraera ovitjitwa mbi tu muna mbi ku varwe.

5. Ovikeṋa mbi matu sokuyepa nu ovikeṋa mbi matu sokutjita? (Wina tara koviperendero.)

⁵ Indu tji matu hungirire komaprofetero wOmbeibela, katu sokuhaka kutja mape tjitwa tjike. Omena raye? Mena rokutja katu nokuvanga okuhungira otjiṋa ngamwa tji mape ya atji eta ohaṋi mombongo. Otjotjihorera, eṱe mape ya atu zuu ovanane vouye amave hungire ohunga nomuano mu mave yenene okuzengurura omauzeu kaaṋi, kutja ve yenene okuyeta ohange nondjeverero. Pendje nokuhaka kutja omambo ngo maye yenenisa omaprofetero nge ri 1 mOvatesalonika 5:3, eṱe matu hepa okutjiwa ondjivisiro ombe ndja pitisiwa. Indu tji matu hungirire komambo wetu nga zikamena kOmbeibela, eṱe tu vatera ombongo kutja i wane “nouripura umwe.”—1 Kor. 1:10; 4:6.

6. Matu yenene okurihonga tjike okuza ku 2 Petrus 3:11-13?

⁶ Lesa 2 Petrus 3:11-13. Omuapostele Petrus u tu vatera okukara noumune ouwa indu tji matu konḓonona omaprofetero wOmbeibela. Eye u tu tunduuza kutja tu kare “pokuundja indi Eyuva raNdjambi.” Omena raye? Kamena rokuvanga okutjiwa “eyuva ndo na indji oiri” indu Jehova tji ma kaeta ovita vya Armagedon, posi yokutja omena rokutja matu vanga okuungurisa oruveze ndu tu na ro okutjita kutja ‘ongaro yetu i rire ondjapuke nu i tjate ku Ndjambi.’ (Mat. 24:36; Luk. 12:40) Ku nao, eṱe tu vanga okuritjinda momuano omusemba nokutjita kutja ozongondjero azehe nḓu tu tjita motjiungura tja Jehova, omena rokutja twe mu suvera tjinene. Kutja tu yenene okutjita nao matu sokuritjevera nawa.

7. Eṱe tu raisa vi kutja tu ritjevera nawa? (Lukas 21:34)

⁷ Jesus wa raera ovahongewa ve okuyandja ombango koviṋa mouye nu wina ku wo oveni. Otjiṋa hi tja raisiwa oukahu me rakiza ndi ri mu Lukas 21:34. (Lesa.) Tara komambo wa Jesus nga: “Ritjevereye nawa.” Omundu ngu ritjevera nawa u muna oumba mbu mape ya  au teya oupanga we ku na Jehova, nu u kondja okuyepa oumba mbo. Momuano mbwi, eye u riṱizira morusuvero rwa Mukuru.—Omiano 22:3; Judas 20, 21.

8. Omuapostele Paulus wa yandja erakiza riṋe kOvakriste?

⁸ Omuapostele Paulus wa raera Ovakriste okuritjevera nawa. Otjotjihorera, eye wa raera Ovakriste moEfese na tja: “Ṱakamiseye kutja mamu kara nongarero ndja sana pi. Amu kara otja ovandu mbe hi nozondunge, nungwari kareye otja ovanazondunge.” (Ef. 5:15, 16) Satan aruhe u kondja okuteya oupanga wetu ku na Jehova, ku nao Ombeibela i tu rakiza kutja “kondjeye okutjiwa imbi Muhona mbi ma vanga kutja mu tjite” kokutja tu yenene okuritjevera oveni koviṋa Satan mbye ungurisa okutupukisa.—Ef. 5:17.

9. Eṱe tu tjiwa vi ombango ya Jehova ku eṱe?

⁹ Ombeibela kai tu raere oviṋa avihe mbi mavi yenene okuteya oupanga wetu ku na Jehova. Potuingi, tu toora omikambo ohunga noviṋa mbi ha tamunwa mOmatjangwa. Kokutja tu toore omikambo omisemba, eṱe matu hepa okutjiwa “imbi Muhona mbi ma vanga kutja [tu] tjite.” Eṱe matu yenene okutjita nao indu tji twa konḓonona Embo ra Mukuru nokuripurira ko oukoto aruhe. Otja tji matu zuu nawa ondando ya Jehova nokukondjisa okukara nomeripura ‘wa Kristus,’ otji matu yenene okukayenda otjovandu “ovanazondunge,” nandarire kutja katu nomazeva ngu maye tu raere kutja ngatu tjite vi. (1 Kor. 2:14-16) Povikando tjiva irira oupupu ku eṱe okumuna oviṋa mbi matu sokuyepa, posi yokutja povikando vyarwe kaupupu.

10. Omaumba yeṋe tjiva ngu matu sokuyepa?

¹⁰ Omaumba tjiva ngu matu hepa okuyepa ye kamburira mo okunyanda orombe, okuṱa omeva wamururu, eraru, okuhungira oviṋa mbi mavi hihamisa varwe, nu wina okutarera omanyando nge raisa outwe, oviperendero vyakamuzu (pornography) noviṋa otjingevyo. (Eps. 101:3) Omunavita na eṱe Satan, u paha oruveze okuteya oupanga wetu ku na Jehova aruhe. (1 Petr. 5:8) Indu tji tu hi nokukengeza, Satan ma yenene okukuna ozondwi zeruru, okuhinouatjiri, zomunenetima, zonyengo, zokuritongamisa nomapindi mouripura na momitima vyetu. (Gal. 5:19-21) Poutenga mape ya atu ripura kutja omeripura ngo kamanaumba. Posi yokutja indu tji tu hi nokuhakahana okutoora omikambo okuisa omeripura ngo, oyo maye kayenda komurungu okukura tjimuna omuti omunawanga nu aye tu etere oumba.—Jak. 1:14, 15.

11. Oumba uṋe mbu matu sokuyepa nu mbu mape ya atu ha undjire ko, nu omena raye?

¹¹ Oumba mbu mape atu ha undjire ko, omapanga omavi. Tara kotjihorera hi. Ngatu tje ove u ungura pu nomundu ngu he ri umwe wOvahongonone va Jehova. Ove u vanga kutja omundu ngu mu ungura pamwe ma kare noumune ouwa ohunga nOvahongonone va Jehova, ku nao u raisa ouwa nokuvatera. Povikando tjiva ove mape ya u karya omariro wometaha ku nomundu ngo. Nu kombunda yoruveze amu utu okutjita nao aruhe. Povikando tjiva omundu ngwo u hungira ohunga noviṋa ovivi, pomautiro mbi hi nokukutjatera. Posi yokutja, korusenina ove o iririre okupuratena koviṋa mbyo. Nu eyuva rimwe omundu ngu mu ungura pamwe e ku ṋanga okukanwa pamwe kombunda yoviungura nove o yakura omaningiriro we. Korusenina ove o utu okuripura tjimuna ye. Kai nokukukambura orure okuuta okutjita oviṋa tjimuna omundu ngu mu kara pamwe mbye tjita. Otjingaperi kutja eṱe tu raisa ouwa nondengero kovandu avehe, nungwari eṱe tu sokuzemburuka kutja tu uta okuhorera kotjikaro tjovandu mbu tu kara pamwe tjinene. (1 Kor. 15:33)  Indu tji twe ritjevere oveni nawa otja Jesus tje tu tunduuza, eṱe katu nokukara tjinene pu novandu mbe ha hupu otja komirari vya Jehova. (2 Kor. 6:15) Eṱe matu munu oumba nu atu u yepe.

12. Ovahongewa va Jesus aave sokuungura tjike ngunda amave undju omaandero wouye mbwi?

¹² Jesus aa vanga kutja ovahongewa ve ve kare noviungura okuungura ngunda amave undju omaandero wouye mbwi. Ku nao, Jesus we ve pa oviungura. Eye we ve rakiza okuzuvarisa ombuze ombwa “moJerusalem na mehi arihe raJudea noraSamaria nga komaandero wehi.” (Oviung. 1:6-8) Imbyo vya ri oviungura ovingi. Mokuungura otja paave yenene mokuzuvarisa ku varwe, owo va ungurisa oruveze ndu vari na ro momuano omusemba.

13. Omena raye tji matu hepa okuungurisa oruveze rwetu momuano omusemba? (Ovakolose 4:5)

¹³ Lesa Ovakolose 4:5. Kutja tu ritjevere nawa, matu hepa okuripura nomuano mbu tu ungurisa oruveze rwetu. “Oruveze rwokumuna ouhumandu” ru ya ku eṱe atuhe. (Omuzuv. 9:11) Eṱe mape ya atu ṱu onḓiro yatjimanga.

14-15. Eṱe matu yenene vi okuungurisa oruveze ndi tu na ro momuano omusemba? (Ovaheberi 6:11, 12) (Wina tara kotjiperendero.)

¹⁴ Eṱe matu yenene okuungurisa oruveze ndu tu na ro momuano omusemba, mokuungura  ombango ya Jehova nokupamisa oupanga wetu ku na ye. (Joh. 14:21) Eṱe matu hepa ‘okuzikama nokuhinokuteratera, nu aruhe amatu ungurire Muhona nokuhaurwa.’ (1 Kor. 15:58) Indu tji twa ṱu poo omaandero wouye mbwi tji ye ya, eṱe kamaatu zeri kutja andakuzu twa ungurira Jehova tjinene.—Mat. 24:13; Rom. 14:8.

¹⁵ Ndino, Jesus u kayenda komurungu okuhongorera ovahongewa ve otja tji mave zuvarisa ohunga nOuhona wa Mukuru mouye auhe. Eye wa yenenisa omakwizikiro we. Okupitira motjira tja Jehova, Jesus u tu honga omuano mu matu sokuzuvarisa nu u tu pa oviṋa avihe mbi matu hepa okuhandjaura ombuze ombwa. (Mat. 28:18-20) Eṱe tu tjita imbi Jesus mbye undjira ko ku eṱe, mokuungura oukukutu, okuzuvarisa ku varwe nokuvehonga nokukara katumba otja tji matu undju Jehova okuyeta omaandero kouye mbwi. Okuṱakamisa eronga ndi ri mOvaheberi 6:11, 12, eṱe matu panḓere pomaundjiro wetu “nga komaandero.”—Lesa.

16. Eṱe twe rimanene okutjita tjike?

¹⁶ Jehova wa twa po eyuva noiri mu ma kaeta ondjandero kouye wa Satan. Eyuva ndo tji re ya, Jehova ma yenenisa omaprofetero aihe nga tjanga mEmbo re. Posi yokutja, povikando tjiva mape ya atu ripura kutja omaandero maye kambura orure okuya. Nungwari eyuva ra Jehova kari “nokuwombisiwa.” (Hab. 2:3) Ku nao, ngatu rimanene ‘okutara ku Muhona nokuundja ku Ndjambi ngu ri ombatero yetu.’—Mika 7:7.