1. Jahtum nhtoi hte seng nna sape ni hpe Yesu hpa tsun ai kun? Shanhte hpe hpa sadi jaw ai kun?

 YESU garai n si shi ai nhtoi loi mi hta, sape marai 4 gaw shi hpe ndai hku san ai: “Mungkan ga a htum wa na kumla gaw, hpa kumla rai na ra ta?” (Mat 24:3) Dai sape ni gaw, Yuda ni a hpang jahtum nhtoi htum mat na aten hpe san mayu ai rai na re. Yesu gaw, Yuda ni a hpang jahtum nhtoi htum mat na aten hpe sha n-ga, anhte asak hkrung nga ai “mungkan ga a htum wa na kumla” hte seng nna mung tsun dan ai. Yesu ndai hku tsun ai: “Dai shani hte ahkying hpe dai Wa hta kaga, kadai mung n chye lu ai: lamu na kasa ni hte dai Kasha pyi dai hpe n chye lu ma ai.” Sape ni hpe mung “sadi, maja nga” na matu sadi jaw ai.​—Mrk 13:32-37.

2. Yuda ni a hpang jahtum nhtoi hta asak hkrung ai ni gaw, matut maja nga na matu hpa majaw ahkyak ai kun?

² Tsa ban 1 na Yuda Hkristan ni gaw matut maja ra ai. Shanhte a asak gaw dai hta madung ai. Yuda ni a hpang jahtum nhtoi htum mat na aten hpe chye lu hkra, hpa hpe sadi ra na ngu ai lam sape ni hpe Yesu tsun ai. Shi ndai hku tsun ai: “Yerusalem mare hpe hpyen luksuk ni hte wang kawan da ai hpe, nanhte mu myit yang chyawm gaw, dai mare hten bya na, ni wa ra ai gaw, dum chye mu.” Dai aten hta, shanhte gaw Yesu a sadi jaw ga hpe madat ra nna, “bum lang de hprawng pru” ra ai. (Luk 21:20, 21) Dai sadi jaw ga hpe madat ai ni gaw, Yerusalem hpe Roma ni sa jahten ai shaloi asak lawt lu na re.

3. Ndai sumhpa hta hpa lam bawngban na kun?

 ³ Dai ni aten, anhte mung ndai nhkru ai mungkan htum hkyen ai aten hta asak hkrung nga ai. Dai majaw, matut htauli htaula rai ra ai, sadi maja ra ai. Ndai sumhpa hta, mungkan mabyin ni hpe sadi yu nga ai laman rap ra lam gara hku nga lu ai, tinang hkum tinang gara hku myit maju jung lu ai, ngam nga ai aten hpe kaja htum gara hku akyu jashawn lu ai lam ni hpe bawngban mat na re.

4. Myihtoi ga hpring tsup nga ai mungkan a mabyin ni hpe hpa majaw myit lawm ging ai kun?

⁴ Mungkan hta byin nga ai lam ni gaw, myihtoi ga hpring tsup nga ai hpe mu lu ai majaw, dai lam ni hpe myit lawm ai gaw kaja ai. Ga shadawn, Satan a nhkru ai mungkan htum na aten hpe chye lu na matu, tup hkrak mabyin ni hpe Yesu azin ayang tsun dan ai. (Mat 24:3-14) Anhte a makam masham matut ngang kang lu hkra, hpring tsup nga ai myihtoi ga hpe myit maju jung na matu kasa Petru n-gun jaw da ai. (2 Pe 1:19-21) Chyum Laika a hpang jahtum laika hta, ndai ga si ni hte nnan hpang da ai: “Ahkying ladaw gade n na yang, byin wa na ra ai lam ni hpe, Hkristu a shangun ma ni e madun dan na matu, Karai Kasang gaw dai Madu hpe jaw dat ai, Yesu Hkristu a shingran ga rai nga ai.” (Shr 1:1) Dai majaw, mungkan a mabyin ni gaw Chyum myihtoi ga hpe gara hku jahpring shatsup ya nga ai ngu ai lam ni hpe anhte grai myit lawm ai. Dai lam ni hpe shada da bawngban na matu mung grai myit lawm na re.

5. Anhte hpa hpe koi ra ai kun? Hpa hpe galaw ging ai kun? (Sumla ni hpe mung yu u.)

⁵ Myihtoi ga ni hpe bawngban ai shaloi, tak tsun ai hpe koi ra ai. Hpa majaw kun? Nawku hpung hpe nru nra byin shangun ai lam ni hpe n tsun mayu ai majaw re. Ga shadawn, mungkan ningbaw ni gaw, manghkang langai hpe gara hku hparan lu sai lam, simsa lam hte shimlum lam gara hku lu wa sai lam ni hte seng nna tsun ai hpe anhte na chye ai. 1 Htesaloni 5:3 hta lawm ai myihtoi ga hpring tsup nga sai ngu nna tak tsun na malai, hpang jahtum chye na ai lam nnan hte maren rai ra ai. Yehowa a uhpung kaw na lajang ya ai laili laika ni hta madung tawn nna bawngban ai gaw, nawku hpung ting “myit mang langai sha” hte kahkyin gumdin na matu karum ya ai.​—1 Ko 1:10; 4:6.

6. 2 Petru 3:11-13 kaw na anhte hpa sharin la lu ai kun?

⁶ 2 Petru 3:11-13 hpe hti u. Myihtoi ga ni hpe myit sawn sumru ai shaloi, rap ra ai ningmu nga hkra kasa Petru karum ya ai. “Karai Kasang a nhtoi hpe, nanhte ala nga nna myit marit nga” na matu n-gun jaw da ai. Hpa majaw kun? Yehowa a nhtoi Hara Magedon du na “shani hte ahkying” hpe chye hkra shakut mayu ai majaw n re ai sha, “chyoi pra ai arawn alai hte tara hkungga ai myit rawng” na matu, ngam nga ai aten hpe akyu jashawn mayu ai majaw re. (Mat 24:36; Luk 12:40) Lam mi hku nna, jaw ai hku galaw hkawm sa mayu ai, Yehowa hpe tsawra ai majaw, shi myit ra ai lam hpe galaw mayu ai hpe tsun ai re. Matut galaw lu hkra, tinang hkum ting myit maju jung ra ai.

7. Tinang hkum tinang myit maju jung ai hpe gara hku madun na kun? (Luka 21:34)

⁷ Mungkan a mabyin ni hpe sha n-ga, tinang hkum tinang myit maju jung na matu sape ni hpe Yesu tsun ai. Dai gaw, Luka 21:34 hta lawm ai sadi jaw ga hpe chye na shangun ai. (Hti u.) “Nanhte . . . sadi nga mu” ngu ai Yesu a ga hpe sadi yu u. Tinang hkum tinang myit maju jung ai wa gaw, Yehowa hte hku hkau lam htenza shangun na lam yawng hpe grai  sadi maja nna koi ai. Dai hku nna, Karai a tsawra myit hta matut nga lu hkra shakut ai.​—Gsh 22:3; Yud 20, 21.

8. Hkristan ni hpe kasa Pawlu hpa tsun wa ai kun?

⁸ Kasa Pawlu mung, tinang hkum tinang myit maju jung na matu Hkristan ni hpe tsun ai. Ga shadawn, Ehpesu na Hkristan ni hpe ndai hku tsun ai: “Nanhte kaning rai hkawm nga myit dai gaw, azin ayang yu nga mu: hpaji n rawng ai ni zawn n rai, hpaji rawng ai ni zawn hkawm nga mu.” (Ehp 5:15, 16) Yehowa hte hku hkau lam htenza hkra Satan shakut nga ai majaw, tinang hkum tinang makawp maga lu na matu, Yehowa ‘a myit ra ai lam, hpa rai nga ai hpe, chye ginhka nga mu’ ngu nna Chyum Laika hta tsun da ai.​—Ehp 5:17.

9. Yehowa a myit ra ai lam hpe anhte gara hku ginhka lu na kun?

⁹ Yehowa hte hku hkau lam htenza shangun ai shoihpa yawng hpe Chyum Laika hta n tsun da ai. Chyum Laika hta dingtawk n tsun da ai lam ni hte seng nna dawdan lam ni ayan jahkrat ra ai. Hpaji rawng ai dawdan lam ni jahkrat lu na matu, Yehowa “a myit ra ai lam” hpe atsawm ginhka chye ra ai. Dai hku byin na matu, Chyum Laika hpe ayan hti nna myit sawn sumru ra ai. Yehowa a myit ra ai lam hpe grau chye hkra galaw na, “Hkristu a amyit” nga hkra shalat na nga yang, anhte hpa galaw ra na hte seng ai tup hkrak re ai tara n nga yang pyi, “hpaji rawng ai ni zawn” grau hkawm sa lu na re. (1 Ko 2:14-16) Shoihpa nga ai lam nkau hpe aloi sha chye lu tim, nkau hpe gaw n chye lu ai.

10. Anhte koi ra na shoihpa nkau gaw hpa rai kun?

¹⁰ Sawse lawklek ai, lu lai ai, lai lai jan jan bai htang ai, masai marai ga ni tsun ai, grai dawsa ai shangwi shapyaw lam, nse nsa sumla yu ai lam ni zawn shoihpa nga ai lam ni hpe koi ra ai. (Shk 101:3) Satan gaw, Yehowa hte anhte a hku hkau lam htenza mat na matu ayan na ahkaw ahkang tam nga ai. (1 Pe 5:8) Anhte n maja ai nga yang, Satan gaw anhte a myit masin hta, manawn masham ai, n hkungga ai, lawhpa ai, n ju ndawng ai, gumrawng ai, masin n si hkraw ai myit ni nga wa hkra nli gat lu ai. (Gal 5:19-21) Nnan hta, dai lam ni gaw shoihpa nau n nga ai ngu myit na re. Raitim, dai lam ni ru n jung wa hkra kalang ta n baw kau yang, tuk rawng ai hpun zawn tu kaba wa nna, manghkang byin chye ai.​—Yak 1:14, 15.

11. Anhte koi ra na nau n dan dawng ai shoihpa langai gaw hpa rai kun? Hpa majaw kun?

¹¹ Nau n dan dawng ai shoihpa langai gaw n kaja ai kanawn manang ni re. Ndai masa hpe myit yu ga. Yehowa Sakse n re ai wa hte nang kanbau bungli rau galaw ai ngu saga. Yehowa Sakse ni hpe kaja ai hku mu shangun mayu ai majaw, bungli manang hpe tsawra myit hte karum ya mayu ai. Kalang lang, dai wa hte rau shani shat rau sha na. Hpang de, dai wa hte ayan na sha byin wa na. Kalang lang, tsun jahta ai lam ni hta awu asin re ai lam ni lawm wa na. Nnan hta gaw nang ra na n re. Raitim, hpang de, dai zawn ga ni gaw na a matu yu maya sha byin wa na. Lani mi hta, bungli ngut ai hpang rau lu na matu saw shaga ai shaloi nang hkap la ai. Angwi ngwi hte shi myit ai zawn myit wa na. Ndai masa hku nga yang, shi zawn hkan galaw na matu aten kade ra ai kun? Masha yawng hpe anhte tsawra nna hkungga ai. Raitim, anhte aten jaw kanawn mazum ai ni gaw, anhte hpe grai shingkang ka-up lu ai hpe dum ra ai. (1 Ko 15:33) Tinang hkum tinang myit maju jung na nga yang, Yesu n-gun jaw da ai hte maren, Yehowa a tsang madang ni hpe n hkan sa ai ni hte n ahkyak ai sha kanawn mazum ai hpe koi na re. (2 Ko 6:15)  Shoihpa hpe chye nna koi na re.

12. Yesu a sape ni gaw jahtum nhtoi la nga ai laman, hpa galaw nga ai kun?

¹² Yesu gaw sape ni hpe jahtum nhtoi la nga ai laman, bungli law nga shangun mayu ai. Yesu gaw shanhte hpe galaw na bungli jaw ai. “Yerusalem mare hte Yuda mung ting, Samari mung hte lamu ga htum hkra” kabu gara shiga hkaw tsun na matu htet da ai. (Kas 1:6-8) Galaw ra ai grai law na re. Shanhte dang lu ai daram hkaw tsun ai hku nna, aten hpe kaja htum akyu jashawn ai.

13. Anhte a aten hpe hpa majaw kaja htum akyu jashawn ra ai kun? (Kolose 4:5)

¹³ Kolose 4:5 hpe hti u. Tinang hkum tinang myit maju jung na matu, anhte a aten hpe gara hku akyu jashawn nga ai hpe atsawm myit yu ra ai. “N myit mada da ai mabyin ni” anhte langai hpra hta byin wa chye ai. (Hpj 9:11, NWT) N myit mada ai sha anhte si mat chye ai.

14-15. Anhte a aten hpe gara hku kaja htum akyu jashawn mai ai kun? (Hebre 6:11, 12) (Sumla hpe mung yu u.)

¹⁴ Yehowa a myit ra ai lam hpe galaw ai, shi hte hku hkau lam ngang kang hkra galaw ai hku nna, anhte a aten hpe kaja htum akyu jashawn mai ai. (Yhn 14:21) Anhte gaw, “ngang ngang kang kang, dakring dalang nga  nga nna, dai Madu a bungli hta tut nawng e tsam mari shakut sharang” nga ra ai. (1 Ko 15:58) Anhte si mat ai (sh) ndai nhkru ai mungkan htum mat ai rai yang pyi, myit malai lu na n re.​—Mat 24:13; Rom 14:8.

¹⁵ Dai ni aten hta mung, mungkan ting hta Karai a Mungdan hte seng nna hkaw tsun na matu sape ni hpe Yesu matut nna lam matsun nga ai. Shi galaw ra ai daw hpe galaw ngut sai. Yehowa a uhpung gaw, anhte gara hku hkaw tsun ra na hpe shaman shakyang ya ai, kabu gara shiga chyam bra na matu ra ai hkingrai ni hpe lajang ya ai. (Mat 28:18-20) Anhte gaw kaga ni hpe shakut nna hkaw tsun nna sharin achyin ya let ndai nhkru ai mungkan hpe Yehowa jahtum kau ya na aten hpe la nga ai. Dai laman, matut maja nga ai hku nna anhte a daw hpe galaw ai. Hebre 6:11, 12 (Hti u) hta lawm ai hpaji jaw ga hpe hkan sa ai hku nna, “prat htum hkra” anhte a myit mada lam hpe ngang ngang jum da na re.

16. Hpa galaw na matu dawdan da ai kun?

¹⁶ Satan a nhkru ai mungkan htum mat na aten hpe Yehowa masat da ngut sai. Dai nhtoi du wa ai shaloi, Chyum Laika hta Shi tsun da ai myihtoi ga ni hpe jahpring shatsup ya na re. Ndai nhkru ai mungkan htum na aten gaw grai na ai ngu kalang lang myit chye ai. Raitim, Yehowa a nhtoi gaw ‘hpang hkrat na, n re.’ (Hab 2:3) Dai majaw, “Yehowa hpe a mada nga” na matu, ‘[anhte a] hkye hkrang la ai Karai Kasang hpe, ala nga’ ai lam madun na matu dawdan da ga.​—Mik 7:7.