8-زەرتتەۋ ماقالاسى
«قىراعىلىق ساقتاڭدار، سەرگەك بولىڭدار!»
«قىراعىلىق ساقتاڭدار، سەرگەك بولىڭدار!» (پەت. 1-ح. 5:8).
144-ٵن زور سيعا نازار تىگەيىك
اڭداتپا a
1. يسا شاكىرتتەرىنە زاماننىڭ اياعى قاشان بولاتىنىنا قاتىستى نە دەدى جانە نە دەپ ەسكەرتتى؟
يسانىڭ ولەرىنەن بىرنەشە كۇن بۇرىن ٴتورت شاكىرتى وعان كەلىپ: «وسى زاماننىڭ اياقتالىپ قالعانىن قانداي بەلگى بىلدىرمەك؟»— دەپ سۇرايدى (مات. 24:3). وسىلاي ولار يەرۋساليم مەن ونداعى عيباداتحانانىڭ قاشان جويىلاتىنىن بىلگىسى كەلسە كەرەك. ٴبىراق يسا ولارعا يەرۋساليم مەن عيباداتحانانىڭ جويىلۋىن عانا ەمەس، بۇگىندە ٴبىز ٶمىر ٴسۇرىپ جاتقان «زاماننىڭ اياعى» تۋرالى دا ايتىپ بەردى. ال بۇنىڭ قاشان بولاتىنىنا قاتىستى يسا: «سول كۇندى نە ساعاتتى ەشكىم — كوكتەگى پەرىشتەلەر دە، ۇل دا — بىلمەيدى، اكەم عانا بىلەدى»،— دەدى. سوندىقتان بارلىق شاكىرتتەرىن: «سەرگەك بولىڭدار»،— دەپ ەسكەرتىپ كەتتى (مار. 13:32—37).
2. ٴبىرىنشى عاسىرداعى ماسىحشىلەرگە سەرگەكتىك ساقتاۋ قانشالىقتى ماڭىزدى بولدى؟
2 ٴبىرىنشى عاسىرداعى ەۆرەي ماسىحشىلەرگە سەرگەكتىك ساقتاۋ كەرەك ەدى، ويتكەنى امان قالۋلارى سوعان بايلانىستى بولدى. يسا ولارعا يەرۋساليم مەن عيباداتحانانىڭ جويىلاتىن ۋاقىتى جاقىنداپ قالعانىن قالاي بىلۋگە بولاتىنىن ايتىپ كەتتى. ول: «يەرۋساليمدى اسكەرلەر قورشاپ العانىن كورگەندە، ونىڭ قاڭىراپ بوس قالاتىن كەزى جاقىن قالعانىن بىلەسىڭدەر»،— دەدى. وسىنى كورگەندە ولارعا «تاۋعا قاشۋ» كەرەك بولاتىن (لۇقا 21:20، 21). كەيىن ريمدىكتەر كەلىپ، يەرۋساليمدى كۇيرەتكەندە، ماسىحشىلەر يسانىڭ ەسكەرتۋىنە قۇلاق اسىپ، امان قالعاندارىنا قاتتى قۋاندى.
3. بۇل ماقالادا نە قاراستىرامىز؟
3 بۇگىندە ٴبىز مىنا زۇلىم زاماننىڭ اقىرىندا ٶمىر ٴسۇرىپ جاتىرمىز. سوندىقتان بىزگە دە قىراعى بولىپ، سەرگەكتىك ساقتاۋ قاجەت. بۇل ماقالادا ٴبىز الەمدىك جاعدايلاردى باقىلاعاندا قالاي بايسالدى بولا الاتىنىمىزدى، وزىمىزگە ساق بولۋ نەنى بىلدىرەتىنىن جانە قالعان ۋاقىتىمىزدى قالاي بارىنشا ٴتيىمدى پايدالانا الاتىنىمىزدى قاراستىرامىز.
الەمدەگى جاعدايلاردى باقىلاعاندا بايسالدى بولىڭىز
4. الەمدەگى جاعدايلار نەگە ٴبىزدى قىزىقتىرۋى كەرەك؟
4 الەمدە بولىپ جاتقان جاعدايلار ٴبىزدى قاتتى قىزىقتىراتىنى تۇسىنىكتى-اق، ويتكەنى كيەلى كىتاپتاعى پايعامبارلىقتاردىڭ قالاي ورىندالىپ جاتقانىن بىلگىمىز كەلەدى. مىسالى، يسا شايتاننىڭ دۇنيەسىنىڭ سوڭى جاقىنداپ قالعانىن كورسەتەتىن ناقتى وقيعالاردى اتاپ كەتكەن (مات. 24:3—14). ەلشى پەتىر دە سەنىمدى بەرىك ساقتاۋ ٷشىن، پايعامبارلىقتاردىڭ قالاي ورىندالىپ جاتقانىنا دەن قويۋىمىز كەرەكتىگىن ايتقان (پەت. 2-ح. 1:19—21). سوڭعى ايان كىتابى دا: «بۇل — قۇدايدىڭ ٶز قۇلدارىنا جۋىردا بولاتىن جايتتاردى كورسەتۋ ٷشىن يسا ماسىحكە بەرگەن ايانى»،— دەگەن سوزدەرمەن باستالادى (ايان 1:1). سوندىقتان ٴبىز الەمدىك جاعدايلارعا مۇقيات دەن قويىپ، كيەلى كىتاپتاعى پايعامبارلىقتاردىڭ ورىندالۋىن باقىلاپ جۇرەمىز. كەيدە ٴتىپتى بۇل ىشىمىزگە سيماي، باسقالارمەن تالقىلاعىمىز كەلىپ تۇرادى.
كيەلى كىتاپ پايعامبارلىقتارىن تالقىلاعاندا نەدەن قاشىق، ال نەگە اسىق بولۋىمىز قاجەت؟ (5-ابزاستى قاراڭىز) b
5. ٴبىز نە نارسەدەن ساق، ال نە نارسەگە ىنتالى بولۋىمىز كەرەك؟ (سۋرەتتەردى دە قاراڭىز.)
5 الايدا كيەلى كىتاپ پايعامبارلىقتارىن تالقىلاعاندا، وزىمىزشە بولجاپ، تۇجىرىمداۋدان ساق بولۋىمىز قاجەت. ويتكەنى وسىلايشا قاۋىم بىرلىگىنىڭ بۇزىلۋىنا تۇرتكى بوپ قالۋىمىز مۇمكىن. مىسالى، جاڭالىقتاردان الەمدىك كوشباسشىلاردىڭ قانداي دا ٴبىر قاقتىعىستى توقتاتىپ، بەيبىتشىلىك پەن قاۋىپسىزدىك ورناتامىز دەپ جاتقانىن ەستىدىك دەلىك. سول كەزدە سالونيكالىقتارعا 1-حات 5:3 تەگى پايعامبارلىق ورىندالىپ جاتىر دەپ جورامالداعانشا، ەحوبانىڭ ۇيىمى شىعارىپ جاتقان سوڭعى مالىمەتتەرگە دەن قويايىق. اڭگىمەمىزدى سول مالىمەتتەرگە عانا نەگىزدەسەك، قاۋىمداعىلاردىڭ جىككە بولىنبەي، «پىكىرلەرى بىردەي بولۋىنا» سەپتىگىمىزدى تيگىزەمىز (قور. 1-ح. 1:10؛ 4:6).
6. پەتىردىڭ 2-حاتى 3:11—13-تارماقتاردان قانداي ماڭىزدى وي تۇيەمىز؟
6 پەتىردىڭ 2-حاتى 3:11—13 وقىڭىز. ەلشى پەتىردىڭ سوزدەرى كيەلى كىتاپ پايعامبارلىقتارىن قاراستىرعاندا بايسالدى بولۋعا كومەكتەسەدى. ول «ەحوبانىڭ كۇنىنىڭ كەلگەنىن كۇتىپ، ونى ەسىمىزدە مىقتاپ ۇستاۋعا» شاقىرعان. ەستە ۇستاعانداعى ماقساتىمىز — ارماگەددوننىڭ كەلەتىن «كۇنى مەن ساعاتىن» انىقتاۋ ەمەس، قايتا، سول ۋاقىتتى پايدالانىپ، «ٴجۇرىس-تۇرىسىمىزدى قاسيەتتى، ال ٸس-ارەكەتىمىزدى قۇدايعا شىن بەرىلگەن ادامدارعا ٴتان» ەتۋ (مات. 24:36؛ لۇقا 12:40). دەمەك، ٴبىز ادال ٴجۇرىپ-تۇرۋعا جانە ەحوبا ٷشىن قىزمەتتە نە ىستەسەك تە، ونى جاقسى كورگەندىكتەن ىستەۋگە تالپىنامىز. ال بۇل ٷشىن وزىمىزگە ساق بولۋىمىز كەرەك.
وزىمىزگە ساق بولۋ دەگەن نە؟
7. وزىمىزگە ساق بولۋ دەگەن نەنى بىلدىرەدى؟ (لۇقا 21:34)
7 الەمدىك وقيعالارعا دەن قويۋىمىزبەن قاتار، يسا ٴبىزدى: «وزدەرىڭە ساق بولىڭدار!»— دەپ ەسكەرتكەن (لۇقا 21:34 وقىڭىز). وزىنە ساق بولاتىن ادام ەحوبامەن قارىم-قاتىناسىن قىزعىشتاي قورعاپ، ونى بۇزاتىن كەز كەلگەن نارسەدەن اۋلاق جۇرەدى. وسىلايشا ەحوبانىڭ سۇيىسپەنشىلىگىنەن ايىرىلمايدى (ناق. س. 22:3؛ ياھد. 20، 21).
8. ەلشى پاۋىل ماسىحشىلەرگە قانداي كەڭەس بەرگەن؟
8 وزىمىزگە ساق بولۋ كەرەكتىگىن ەلشى پاۋىل دا ايتقان. مىسالى، ول ەفەستەگى باۋىرلاستارعا: «قالاي ارەكەت ەتەتىندەرىڭە مۇقيات دەن قويىڭدار، اقىلسىز ەمەس، دانا بولىڭدار»،— دەگەن (ەفەس. 5:15، 16). شايتان ٴبىزدىڭ ەحوبامەن دوستىعىمىزعا تىنباي شابۋىلداي بەرەدى، سوندىقتان وعان قارسى تۇرۋ ٷشىن، «ەحوبانىڭ ەركىن تانىپ-بىلە بەرۋ» كەرەك (ەفەس. 5:17).
9. بەلگىلى ٴبىر جاعدايعا قاتىستى ەحوبانىڭ ەركىن قالاي بىلەمىز؟
9 كيەلى كىتاپتا ەحوبامەن دوستىعىمىزدى بۇزاتىن جايتتاردىڭ بارلىعى جازىلا بەرمەگەن. كوپ جاعدايدا بىزگە وندا تىكەلەي ايتىلماعان ماسەلەلەرگە قاتىستى شەشىم قابىلداۋ كەرەك بولىپ جاتادى. وسىندايدا دۇرىس شەشىم قابىلداۋ ٷشىن، «ەحوبانىڭ ەركىن» سەزە ٴبىلۋىمىز قاجەت. ال بۇل جۇيەلى تۇردە قۇداي ٴسوزىن زەرتتەپ، وي جۇگىرتكەننەن كەلەدى. ەحوبانىڭ ەركىن تاني بەرىپ، «ٴماسىحتىڭ وي-ساناسىن» جەتىلدىرە تۇسسەك، ناقتى باسشىلىق بولماعان كەزدە دە دۇرىس شەشىم قابىلداپ، «دانا بولا» الامىز (قور. 1-ح. 2:14—16). كەيبىر نارسەلەردىڭ رۋحاني كۇيىمىزگە قاۋىپتى ەكەنى بىردەن كورىنىپ تۇرادى، ال كەي جاعدايلاردا ول مۇلدەم بايقالماۋى مۇمكىن. قازىر سول تۋرالى كوبىرەك بىلەيىك.
10. قانداي قاۋىپتى ارەكەتتەردەن اۋلاق بولۋىمىز كەرەك؟
10 اۋلاق بولاتىن قاۋىپتى ارەكەتتەرگە قىرىنداۋ، شەكتەن تىس ٸشۋ، مەشكەيلىك، اۋىر سوزدەر ايتۋ، قاتىگەز ويىن-ساۋىق تۇرلەرىن قاراۋ، پورنوگرافيا، تاعى سول سياقتىلار جاتادى (ٴزاب. 101:3). جاۋىمىز ٸبىلىس ەحوبامەن قارىم-قاتىناسىمىزعا سىزات ٴتۇسىرۋدىڭ بىردە-ٴبىر مۇمكىندىگىن قالت جىبەرمەيدى (پەت. 1-ح. 5:8). اباي بولماساق، شايتان سانامىز بەن جۇرەگىمىزگە قىزعانىش، ارامدىق، اشكوزدىك، جەككورۋشىلىك، تاكاپپارلىق پەن وكپە-رەنىشتىڭ تۇقىمىن سەۋىپ كەتۋى مۇمكىن (عال. 5:19—21). باسىندا بۇل سەزىمدەر اسا ٴبىر ٴمان بەرەتىندەي پروبلەما بولىپ كورىنبەيتىن شىعار. ٴبىراق ودان ارىلۋ ٷشىن بىردەن ارەكەت ەتپەسەك، ول ۋلى وسىمدىكتەي قاۋلاپ ٶسىپ، پالەگە ۇشىراتادى (جاق. 1:14، 15).
11. قانداي جاسىرىن قاۋىپ بار جانە نەگە ودان اۋلاق ٴجۇرۋىمىز كەرەك؟
11 جاسىرىن قاۋىپتەردىڭ ٴبىرى — جامان ورتا. مىناداي جاعدايدى ەلەستەتەيىكشى: ٴسىز ٴماسىحشى ەمەس اداممەن جۇمىس ىستەيسىز دەلىك. ەحوبا كۋاگەرلەرى جاقسى ادامدار ەكەنىن ٴبىلسىن دەپ ٴسىز وعان جاقسى قاراپ، كومەكتەسىپ تۇرۋعا تىرىساسىز. اراسىندا ەكەۋىڭىز تۇسكى استى بىرگە ٸشىپ تۇراسىزدار. ٴبىر قاراساڭىز، ونىمەن كۇندە تۇستەنەتىن بولىپسىز. اراسىندا ول ونەگەسىز اڭگىمەلەر ايتىپ قالعاندا، ٴبىرتۇرلى بولىپ قالاسىز دا، ال ۋاقىت وتە وعان ەتىڭىز ۇيرەنە باستايدى. ٴبىر كۇنى جۇمىستان كەيىن ول «شارشاعانىمىزدى باسايىق» دەپ ٸشىپ قايتۋدى ۇسىنادى، ٴسىز كەلىسەسىز. كەلە-كەلە ونىڭ ايتقاندارىن ماقۇلداپ، ويلارىڭىز ٴبىر جەردەن شىعاتىن بولادى. ەندى قالاي ويلايسىز، ٴسىزدىڭ ٸس-ارەكەتىڭىز دە سول ادامدىكىندەي بولىپ كەتۋى مۇمكىن بە؟ كوپ ۇزاماي سونداي كۇيگە جەتەرىڭىز انىق. ارينە، ٴبىز بارلىق ادامعا سي-قۇرمەتپەن قارايمىز، ٴبىراق ۇمىتپايىق، بىرگە جۇرەتىن ادامدارىمىز بىزگە قاتتى اسەر ەتەدى (قور. 1-ح. 15:33). سوندىقتان يسا ايتقانداي، وزىمىزگە ساق بولىپ، قۇدايدىڭ پرينسيپتەرىن ۇستانبايتىن ادامدارمەن ٴجونسىز ارالاسپايىق (قور. 2-ح. 6:15). قايتا، كورەگەن بولىپ، جاسىرىن قاۋىپتەن اۋلاق جۇرەيىك.
ۋاقىتىمىزدى بارىنشا ٴتيىمدى پايدالانايىق
12. يسانىڭ شاكىرتتەرى زاماننىڭ سوڭى كەلگەنشە نەمەن اينالىسۋلارى كەرەك ەدى؟
12 يسانىڭ شاكىرتتەرى زاماننىڭ سوڭىن قول قۋسىرىپ كۇتىپ وتىرمادى. يسا ولارعا ارنايى ٴبىر ٸس تاپسىرىپ، «يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شەتىنە دەيىن ىزگى حاباردى جاريالاۋدى» بۇيىردى (ەل. ٸس. 1:6—8). بۇل ٴبىر عالامات جوبا ەدى! شاكىرتتەرى وسى ٸستى جان-تاندەرىمەن اتقارۋ ارقىلى ۋاقىتتارىن بارىنشا ٴتيىمدى پايدالاندى.
13. ۋاقىتتى نەگە بارىنشا ٴتيىمدى پايدالانعان ٴجون؟ (قولوستىقتارعا 4:5)
13 قولوستىقتارعا 4:5 وقىڭىز. وزىمىزگە ساق بولۋ ٷشىن، ۋاقىتتى قايدا جۇمساپ جۇرگەنىمىزگە ىقتيات بولعانىمىز وتە ماڭىزدى. سەبەبى كەز كەلگەنىمىز «كەزدەيسوق جاعدايلارعا تاپ بولىپ»، ٶمىرىمىز شورت ٷزىلىپ كەتۋى مۇمكىن (ۋاع. 9:11).
ۋاقىتىمىزدى بارىنشا ٴتيىمدى پايدالانۋعا نە جاتادى؟ (14، 15-ابزاستاردى قاراڭىز)
14، 15. ۋاقىتىمىزدى بارىنشا ٴتيىمدى پايدالانۋعا نە جاتادى؟ (ەۆرەيلەرگە 6:11، 12) (سۋرەتتى دە قاراڭىز.)
14 ۋاقىتىمىزدى بارىنشا ٴتيىمدى پايدالانۋ دەگەن ەحوبانىڭ ەركىن ورىنداۋدى جانە ونىمەن دوستىعىمىزدى بەكەمدەي بەرۋدى بىلدىرەدى (جوح. 14:21). ٴبىز «بەرىك بولۋىمىز، مىزعىماي تۇرۋىمىز جانە يەمىزدىڭ ىسىندە ارقاشان كوپ ەڭبەكتەنۋىمىز» كەرەك (قور. 1-ح. 15:58). سوندا وسى دۇنيەنىڭ سوڭى يا ٶمىرىمىزدىڭ سوڭى كەلگەندە، بىزدە ەشقانداي وكىنىش بولمايدى (مات. 24:13؛ ريم. 14:8).
15 يسا ٵلى دە شاكىرتتەرىنە باعىت-باعدار بەرىپ، جەتەلەپ كەلەدى. شاكىرتتەرى جەر-جەردە قۇداي پاتشالىعىن جاريالاۋ ٷشىن، يسا ٶز تاراپىنان بارلىعىن ىستەپ جاتىر. ەحوبانىڭ ۇيىمى ارقىلى ول بىزگە ۋاعىزداۋدى ۇيرەتىپ، ۋاعىزعا قاجەتتى قۇرالدارمەن جابدىقتاۋدا (مات. 28:18—20). ال ٴبىز ٶز تاراپىمىزدان نە ىستەيمىز؟ ۋاعىزداۋ مەن ٴتالىم بەرۋ ىسىنە بارىمىزدى سالامىز جانە ەحوبا وسى زۇلىم زاماندى جويمايىنشا، سەرگەكتىك ساقتايمىز. ەۆرەيلەرگە 6:11، 12 دەگى (وقىڭىز) كەڭەسكە قۇلاق اسساق، ٷمىت وتىن «سوڭىنا دەيىن» سوندىرمەيمىز.
16. ٴبىز نە نارسەگە بەكىنگەنبىز؟
16 ەحوبا شايتاننىڭ دۇنيەسىن جوياتىن كۇن مەن ساعاتتى بەلگىلەپ قويعان. سول كۇن كەلگەندە، ول ٶزىنىڭ سوزىندە جازىلعان پايعامبارلىقتاردى ٴبىرىن قالدىرماي ىسكە اسىرادى. ٴبىراق كەيدە بىزگە زاماننىڭ سوڭى جۋىق ارادا كەلمەيتىندەي كورىنۋى مۇمكىن. الايدا ەحوبانىڭ كۇنى «ەش كەشىكپەيدى!» (ابق. 2:3). سوندىقتان «قۇتقارۋشى قۇدايىمىزدى شىداممەن كۇتىپ»، «بار نازارىمىزدى ەحوباعا تىگەيىك!» (ميحا 7:7).
139-ٵن جۇماقتا جۇرگەنىڭدى ەلەستەت
a بۇل ماقالادا ٴبىز الەمدىك جاعدايلاردى كورگەندە، بايسالدى بولۋدىڭ جانە قىراعىلىق ساقتاۋدىڭ ماڭىزدىلىعىن بىلەمىز. سونداي-اق وزىمىزگە ساق بولۋ ٷشىن نە ىستەۋىمىز كەرەكتىگىن جانە قالاي ۋاقىتىمىزدى بارىنشا ٴتيىمدى پايدالانا الاتىنىمىزدى كورەمىز.
b سۋرەت سيپاتتاماسى: جوعارىدا: ٴبىر ەرلى-زايىپتى جاڭالىق قاراپ وتىر. كەيىن قاۋىمعا بارعاندا، كورگەن جاڭالىققا بايلانىستى ٶز پىكىرلەرىن قاۋىمداعى باۋىرلاستارعا ىنتى-شىنتىسىمەن ايتىپ جاتىر. تومەندە: ٴبىر ەرلى-زايىپتى كيەلى كىتاپ پايعامبارلىقتارىنا قاتىستى سوڭعى تۇسىنىكتى ٴبىلىپ وتىرۋ ٷشىن، باسقارۋشى كەڭەستىڭ ۇندەۋىن كورىپ وتىر. ولار ادامدارعا ادال دا اقىلدى قۇل دايىنداعان ادەبيەتتەردى ۇسىنىپ تۇر.
