တၢ်မၤလိ ၈
“အိၣ်ဆၢပံၢ်ကလာ် ဒီးအိၣ်ပလီၢ်သး”
“အိၣ်ဆၢပံၢ်ကလာ် ဒီးအိၣ်ပလီၢ်သး.”—၁ ပ့းတရူး ၅:၈.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
တၢ်မၤလိအံၤ အတၢ်တိာ်ပာ် a
၁. ဘၣ်ဃးဒီး တၢ်အကတၢၢ် အဆၢကတီၢ်န့ၣ် ယ့ၣ်ၡူးတဲဘၣ် အပျဲၢ်အဘီၣ်ဒ်လဲၣ် ဒီးအဟ့ၣ်ပလီၢ် အဝဲသ့ၣ်ဒ်လဲၣ်.
တချုးလၢ ယ့ၣ်ၡူးသံဒံးဘၣ် စှၤကိာ်သီန့ၣ် အပျဲၢ်အဘီၣ်လွံၢ်ဂၤ ကၠးအီၤလၢ “တၢ်အစိၤလၢ အလီၢ်ခံကတၢၢ်န့ၣ် အတၢ်ပနီၣ် ကမ့ၢ်မနုၤလဲၣ်.” (မးသဲ ၂၄:၃) ဘၣ်သ့ၣ်သ့ၣ် ယ့ၣ်ၡူးအပျဲၢ်အဘီၣ် လွံၢ်ဂၤအံၤ ဘၣ်သးသ့ၣ်ညါဝဲလၢ ပှၤကမၤဟးဂီၤ ဝ့ၢ်ယရူၤၡလ့ၣ် ဒီးတၢ်လုၢ်ဟံၣ် လၢအဆၢကတီၢ်ဖဲလဲၣ်. အဃိ ယ့ၣ်ၡူး တဲဘၣ်အဝဲသ့ၣ်လၢ ပှၤကမၤဟးဂီၤ ဝ့ၢ်ယရူၤၡလ့ၣ် ဒီးတၢ်လုၢ်ဟံၣ်အဂ့ၢ်. တကးဒံးဘၣ် “တၢ်အစိၤလၢ အလီၢ်ခံကတၢၢ်” လၢယ့ၣ်ၡူးတဲဘၣ် အဝဲသ့ၣ်န့ၣ် အဘၣ်ဃးဒီး ပစိၤခဲအံၤကၠ့ၤ. မ့မ့ၢ်လၢ တၢ်ဆၢကတီၢ်ဟီန့ၣ် ယ့ၣ်ၡူး တဲအဝဲသ့ၣ်လၢ “ဘၣ်ဃးဒီး မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ် ပှၤတသ့ၣ်ညါနီတဂၤဘၣ်. မူခိၣ်ကလူးတဖၣ်လၢ အအိၣ်လၢ မူခိၣ်မ့ၢ်ဂ့ၤ ဖိခွါမ့ၢ်ဂ့ၤ တသ့ၣ်ညါဝဲဘၣ်. သ့ၣ်ညါထဲဒၣ်ပၢ်တဂၤလီၤ.” အဃိ ယ့ၣ်ၡူး ဟ့ၣ်ပလီၢ် အပျဲၢ်အဘီၣ်တဖၣ်လၢ အဝဲသ့ၣ်ကဘၣ် “ဆိးသီ” ဒီး “အိၣ်ပလီၢ်သး” ထီဘိ.—မၢ်ကူး ၁၃:၃၂-၃၇.
၂. ဘၣ်မနုၤအဃိ ခရံာ်ဖိတဖၣ် လၢတၢ်မၢဖိအစိၤန့ၣ် ဘၣ်အိၣ်ပလီၢ်သး ထီဘိလဲၣ်.
၂ ခရံာ်ဖိတဖၣ် လၢတၢ်မၢဖိအစိၤန့ၣ် ဒ်သိးအဝဲသ့ၣ် သးသမူကပူၤဖျဲးအဂီၢ် အဝဲသ့ၣ် ဘၣ်အိၣ်ပလီၢ်သးထီဘိ. အဃိ ဒ်သိး ယ့ၣ်ၡူး အပျဲၢ်အဘီၣ်တဖၣ် ကသ့ၣ်ညါဝဲလၢ ပှၤကမၤဟးဂီၤ ဝ့ၢ်ယရူၤၡလ့ၣ် လၢအဆၢကတီၢ်ဖဲလဲၣ်န့ၣ် ယ့ၣ်ၡူး တဲအဝဲသ့ၣ်လၢ “ဖဲသုထံၣ် သုးမုၢ်သံၣ်ဘိတဖၣ် ဆီလီၤအသး ဒီးကဝီၤဃာ် ဝ့ၢ်ယရူၤၡလ့ၣ်အခါ သ့ၣ်ညါလၢ တၢ်မၤဟးဂီၤအီၤ အဆၢကတီၢ် ဘူးထီၣ်လံ.” ဖဲခရံာ်ဖိတဖၣ် ထံၣ်ဘၣ် တၢ်မၤအသး ဒ်န့ၣ်အခါ အဝဲသ့ၣ် ကဘၣ်မၤထွဲ ယ့ၣ်ၡူး အတၢ်ဟ့ၣ်ပလီၢ်လၢ “လဲၤဃ့ၢ်ထီၣ်လၢ ကစၢၢ်ကလိတဖၣ်.” (လူၤကၣ် ၂၁:၂၀, ၂၁) အဃိ ဖဲပှၤရိမ့ၤဖိ ဟဲမၤဟးဂီၤ ဝ့ၢ်ယရူၤၡလ့ၣ်အခါ ပှၤလၢအမၤထွဲ တၢ်ဟ့ၣ်ပလီၢ်တဖၣ်န့ၣ် အဝဲသ့ၣ် ပူၤဖျဲးဝဲ.
၃. လၢတၢ်မၤလိတခါအံၤ ပကတဲသကီး တၢ်ဂ့ၢ်မနုၤလဲၣ်.
၃ ဆၢကတီၢ်ခဲအံၤ ပအိၣ်မူဘၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ဘူးကကတၢၢ်လံ. အဃိ ပကဘၣ် ဆိမိၣ်ထံတၢ် ဒီးအိၣ်ပလီၢ်သးထီဘိ. လၢတၢ်မၤလိအံၤ ပကတဲသကီး ဘၣ်ဃးဒီး ဖဲပထံၣ် တၢ်ကဲထီၣ်သးလၢဟီၣ်ခိၣ်အခါ ပအိၣ်ဒီး တၢ်ထံၣ်အကြၢးအဘၣ် ကသ့ဒ်လဲၣ်, ပအိၣ်ပလီၢ်သးထီဘိ ကသ့ဒ်လဲၣ် ဒီးဖဲတၢ်ဆၢကတီၢ်အိၣ်ဒံးန့ၣ် ပသူအီၤလၢ အဂ့ၤကတၢၢ် ကသ့ဒ်လဲၣ်.
ဖဲပထံၣ် တၢ်ကဲထီၣ်သးလၢဟီၣ်ခိၣ်အခါ ပကဘၣ်အိၣ်ဒီး တၢ်ထံၣ်အကြၢးအဘၣ်
၄. ဘၣ်မနုၤအဃိ ပဘၣ်သးသ့ၣ်ညါ တၢ်ကဲထီၣ်သး လၢအမၤလၢပှဲၤထီၣ် ဝံအတၢ်စံးပာ်လဲၣ်.
၄ တၢ်ကဲထီၣ်သး လၢဟီၣ်ခိၣ်အံၤ မၤလၢပှဲၤထီၣ် ဝံအတၢ်စံးပာ်အဃိ ပဘၣ်သးသ့ၣ်ညါ တၢ်ကဲထီၣ်သးန့ၣ် တကမၣ်ဘၣ်. အဒိ ယ့ၣ်ၡူးတဲဘၣ်ပှၤ ဘၣ်ဃးဒီး တၢ်လၢကကဲထီၣ်သး ဖဲဟီၣ်ခိၣ်လၢ မုၣ်ကီၤလံၢ်ပၢဝဲ ဘူးကကတၢၢ်အခါ. (မးသဲ ၂၄:၃-၁၄) တကးဒံးဘၣ် ဒ်သိးဒီး ပတၢ်နာ် ကဂၢၢ်ကျၢၤထီဘိအဂီၢ် တၢ်မၢဖိပ့းတရူး ဟ့ၣ်ကူၣ်ပှၤလၢ ပကဘၣ် သးစၢၢ်ဆၢ ဝံအတၢ်စံးပာ် လၢအဟဲလၢပှဲၤထီၣ်တဖၣ်. (၂ ပ့းတရူး ၁:၁၉-၂၁) ဒီးလံာ်လီၣ်ဖျါ အဆိကတၢၢ်တဆၢ တဲဝဲလၢ “အဝဲအံၤမ့ၢ် ယ့ၣ်ၡူးခရံာ် အတၢ်လီၣ်ဖျါလၢ ကစၢ်ယွၤဟ့ၣ်လီၤအီၤ ဒ်သိး ကဒုးနဲၣ်အကုၢ်တဖၣ်လၢ တယံာ်တမီၢ် တၢ်လၢ အကဘၣ်မၤအသး.” (လီၣ်ဖျါ ၁:၁) အဃိ တၢ်ကဲထီၣ်သးလၢဟီၣ်ခိၣ် လၢဆၢကတီၢ်ခဲအံၤ အမၤလၢပှဲၤထီၣ် ဝံအတၢ်စံးပာ်ဒ်လဲၣ်န့ၣ် ပဘၣ်သးသ့ၣ်ညါ ဖးဒိၣ်ညါ. ဒီးဘၣ်သ့ၣ်သ့ၣ် ပကသးဆူၣ်လၢ ပကတဲသကီး တၢ်ကဲထီၣ်သးတဖၣ်အံၤ ဒီးပှၤဂၤ.
ဖဲပတဲသကီး ဝံအတၢ်စံးပာ် လၢလံာ်စီဆှံပူၤခါ ပတဘၣ်မၤ တၢ်မနုၤလဲၣ် ဒီးပဘၣ်မၤမနုၤလဲၣ် (ကွၢ်လံာ်အဆၢ ၅) b
၅. ပတဘၣ်မၤ တၢ်မနုၤလဲၣ် ဒီးပဘၣ်မၤမနုၤလဲၣ်. (ကွၢ်စ့ၢ်ကီးတၢ်ဂီၤ.)
၅ ဖဲပတဲသကီး ဝံအတၢ်စံးပာ်အခါ ပတဘၣ် ဟးတယာ်ကြီတၢ်ဘၣ်. ဘၣ်မနုၤအဃိလဲၣ်န့ၣ် ခီဖျိလၢ ပတဘၣ်သး တဲတၢ်တမံၤမံၤလၢ ကမၤဟးဂီၤ တၢ်အိၣ်ဖှိၣ် အတၢ်ဃူတၢ်ဖိးဘၣ်. အဒိ ပနၢ်ဟူ ထံကီၢ်ခိၣ်နၢ် တဲသကီးဘၣ်ဃးဒီး အဝဲသ့ၣ် မၤဘၣ်ဂီၢ်က့ၤ တၢ်ဂ့ၢ်ကီတခါခါန့ၢ်လံ. ဖဲပနၢ်ဟူကၠဲန့ၣ်အခါ ဘၣ်သ့ၣ်သ့ၣ် ပကဆိမိၣ်လၢ ဝံအတၢ်စံးပာ်ဖဲ ၁ သ့းစၤလနံ ၅:၃ န့ၣ်လၢပှဲၤထီၣ်လံ. နာ်က့ ပတဘၣ်ဆိမိၣ် ဒီးဆၢတဲာ်ဆိ ကၠဲန့ၣ်ဘၣ်. ပကဘၣ် ဃုသ့ၣ်ညါ တၢ်နၢ်ပၢၢ်အသီ. အဃိ ပမ့ၢ်တဲသကီးတၢ်ဂ့ၢ် ဒ်အအိၣ်လၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲန့ၣ် ကမၤစၢၤ ပဒီပုၢ်ဝဲၢ်မုၣ်ခွါ လၢကအိၣ်ဃူအိၣ်ဖိး “လၢတၢ်ဆိကမိၣ် တမံၤဃီ.”—၁ ကရံၣ်သူး ၁:၁၀; ၄:၆.
၆. ဖဲ ၂ ပ့းတရူး ၃:၁၁-၁၃ န့ၣ်ပမၤလိန့ၢ် တၢ်မနုၤလဲၣ်.
၆ ဖး ၂ ပ့းတရူး ၃:၁၁-၁၃. ဖဲပဆိမိၣ်ထံ ဝံအတၢ်စံးပာ် လၢလံာ်စီဆှံပူၤခါန့ၣ် တၢ်မၢဖိပ့းတရူး ဟ့ၣ်ကူၣ်ပှၤလၢ ပကအိၣ်ဒီး တၢ်ထံၣ်အကြၢးအဘၣ်. အဟ့ၣ်ကူၣ်ပှၤလၢ ပက “ကွၢ်လၢ် ယဟိဝၤယွၤ အမုၢ်နံၤ.” ဘၣ်ဆၣ် အတဟ့ၣ်ကူၣ်ပှၤလၢ ပကကျဲးစၢး ဃုသ့ၣ်ညါ “မုၢ်နံၤ” ဒီး “နၣ်ရံၣ်” လၢအၢ်မက့းဒိၣ် ကဟဲအခါဖဲလဲၣ်န့ၣ်ဘၣ်. တကးဒံးဘၣ် အဟ့ၣ်ကူၣ်ပှၤလၢ ဖဲပတၢ်ဆၢကတီၢ် အိၣ်ဒံးအခါ ပကပာ်ဖျါထီၣ် ‘လုၢ်လၢ်သကဲာ်ပဝးလၢ အစီဆှံ ဒီးမၤတၢ်လၢ အပာ်ဖျါထီၣ်လၢပ သးတီဒီးကစၢ်ယွၤ.’ (မးသဲ ၂၄:၃၆; လူၤကၣ် ၁၂:၄၀) ပမ့ၢ်တဲလၢ အဂၤတမံၤန့ၣ် ခီဖျိလၢ ပအဲၣ်ယဟိဝၤယွၤ ဒိၣ်မးအဃိ ပဘၣ်သးအိၣ်မူ ဂ့ၤဂ့ၤဘၣ်ဘၣ် ဒီးမၤအတၢ်မၤဆူၣ်ဆူၣ်. ဘၣ်ဆၣ် ပကဆဲးအိၣ်မူဒ်န့ၣ်အဂီၢ် ပကဘၣ် အိၣ်ပလီၢ်သးထီဘိ.
ပကဘၣ် အိၣ်ပလီၢ်သးထီဘိ
၇. ပအိၣ်ပလီၢ်သးထီဘိ ကသ့ဒ်လဲၣ်. (လူၤကၣ် ၂၁:၃၄)
၇ ယ့ၣ်ၡူး တဲဘၣ်အပျဲၢ်အဘီၣ်လၢ အဝဲသ့ၣ်ကဘၣ် ကွၢ်ဆိမိၣ်ထံ ဘၣ်ဃးဒီး တၢ်ကဲထီၣ်သး လၢဟီၣ်ခိၣ် တကးဒံးဘၣ် အဝဲသ့ၣ်ကဘၣ် အိၣ်ပလီၢ်သးထီဘိ. ယ့ၣ်ၡူး အတၢ်ဟ့ၣ်ပလီၢ်အံၤ ပထံၣ်ဘၣ်ဖဲ လူၤကၣ် ၂၁:၃၄. (ဖး.) ဖဲန့ၣ် ယ့ၣ်ၡူးတဲဝဲလၢ “ပလီၢ်သုသး.” ပှၤလၢအအိၣ်ပလီၢ်သးန့ၣ် အတမၤတၢ် ဒီးအတပျဲလၢ တၢ်အဂၤ ကမၤဟးဂီၤ အတၢ်ရ့လိာ်သးဒီး ယဟိဝၤယွၤ နီတမံၤဘၣ်. ခီဖျိလၢ အအိၣ်ပလီၢ်သးအဃိ အဆဲးအိၣ်လၢ ကစၢ်ယွၤ အတၢ်အဲၣ်အပူၤ.—ကတိၤဒိ ၂၂:၃; ယူဒၤ ၂၀, ၂၁.
၈. တၢ်မၢဖိပီလူး ဟ့ၣ်ကူၣ်ခရံာ်ဖိတဖၣ်ဒ်လဲၣ်.
၈ တၢ်မၢဖိပီလူး ဟ့ၣ်ကူၣ်ခရံာ်ဖိတဖၣ်လၢ ကအိၣ်ပလီၢ်သးထီဘိ. အဒိ အတဲဘၣ် ခရံာ်ဖိလၢ ဝ့ၢ်အ့းဖ့းစူးလၢ “ပလီၢ်သုသးဂ့ၤဂ့ၤ ဒ်သိးသုကအိၣ်မူ ဒ်ပှၤကူၣ်တၢ်သ့အသိး ဒီးတမ့ၢ်ဒ်သိးဒီး ပှၤလၢ အတအိၣ်ဒီး တၢ်ကူၣ်သ့ဘၣ်န့ၣ်တက့ၢ်.” (အ့းဖ့းစူး ၅:၁၅, ၁၆) မုၣ်ကီၤလံၢ်န့ၣ် အကျဲးစၢး မၤဟးဂီၤ ပတၢ်ရ့လိာ်သးဒီး ယဟိဝၤယွၤ မၢ်မၢ်လီၤ. အဃိ ဒ်သိး မုၣ်ကီၤလံၢ် မၤဝဲဒ်န့ၣ် တန့ၢ်အဂီၢ် လံာ်စီဆှံ ဟ့ၣ်ကူၣ်ပှၤလၢ “တၢ်ဘၣ်ယဟိဝၤယွၤ အသး အိၣ်ဒ်လဲၣ်ဒ်လဲၣ်န့ၣ် ဆဲးဃုသ့ၣ်ညါနၢ်ပၢၢ်အီၤ.”—အ့းဖ့းစူး ၅:၁၇.
၉. ပသ့ၣ်ညါ ယဟိဝၤယွၤ အတၢ်ဘၣ်သး ကသ့ဒ်လဲၣ်.
၉ တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် လံာ်စီဆှံ တပာ်ဖျါန့ၢ်ပှၤ ကိးမံၤဒဲးဘၣ်. အဃိ တဘျီတခီၣ် ပကဘၣ်ဆၢတဲာ်တၢ် လၢပနီၢ်ကစၢ်. ဘၣ်ဆၣ် ဒ်သိးဒီး ပဆၢတဲာ်တၢ်ကဘၣ်အဂီၢ် ပကဘၣ် ဆိမိၣ်ထံ “တၢ်ဘၣ်ယဟိဝၤယွၤ အသး.” ပမၤဒ်န့ၣ် သ့ခီဖျိ ပမၤလိ ကစၢ်ယွၤကလုၢ်ကထါ ဒီးဆိမိၣ်ထံအီၤထီဘိ. လံာ်စီဆှံ အတၢ်ဟ့ၣ်ကူၣ် မ့ၢ်တအိၣ် လီၤတံၢ်လီၤဆဲးဘၣ်နာ်က့ ပမ့ၢ်သ့ၣ်ညါ ယဟိဝၤယွၤ အတၢ်ဘၣ်သး ဒီးပမ့ၢ်အိၣ်ဒီး “ခရံာ်အသး” န့ၣ်ပကအိၣ်မူဒ် “ပှၤကူၣ်တၢ်သ့.” (၁ ကရံၣ်သူး ၂:၁၄-၁၆) ပကဘၣ်မၤ တၢ်မနုၤလဲၣ် ဒီးပတဘၣ်မၤ တၢ်မနုၤလဲၣ်န့ၣ် တဘျီတခီၣ် ပသ့ၣ်ညါနာ်က့ တဘျီတခီၣ်ဒု ပတသ့ၣ်ညါ လီၤတံၢ်ဘၣ်.
၁၀. တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤ တနီၤန့ၣ်မ့ၢ်မနုၤလဲၣ် ဒီးဘၣ်မနုၤအဃိ ပတဘၣ်မၤ တၢ်သ့ၣ်တဖၣ်အံၤဘၣ်လဲၣ်.
၁၀ တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် ပၣ်ဃုာ်ဒီး တၢ်လိၣ်ကွဲတၢ်အဲၣ်, တၢ်အီသံးအါတလၢ, တၢ်အီၣ်တၢ်အါတလၢ, တၢ်တဲဆါပှၤဂၤ, တၢ်မၤမုာ်မၤဖှံသး လၢအပၣ်ဃုာ်ဒီး တၢ်မၤဆူၣ်မၤစိး, တၢ်ကွၢ်တၢ်ဂီၤဘ့ၣ်ဆ့ ဒီးတၢ်အဂၤတဖၣ်. (စံးထီၣ်ပတြၢၤ ၁၀၁:၃) ပဒုၣ်ပဒါ မုၣ်ကီၤလံၢ်န့ၣ် အဃုတၢ်ခွဲးတၢ်ယာ်လၢ အကမၤဟးဂီၤ ပတၢ်ရ့လိာ်သးဒီး ယဟိဝၤယွၤ မၢ်မၢ်လီၤ. (၁ ပ့းတရူး ၅:၈) အဃိ ပမ့ၢ်တအိၣ်ပလီၢ်သး ထီဘိဘၣ်န့ၣ် မုၣ်ကီၤလံၢ် ကဒုးအိၣ်ထီၣ် တၢ်ပာ်သူၣ်ပာ်သး ဒ်သိးဒီး တၢ်သးက့ၣ်, တၢ်တတီတလိၤ, တၢ်သူၣ်လီသးကွံ, တၢ်ပာ်ထီၣ်ထီသး ဒီးတၢ်ဟံဃာ်ပှၤဂၤတၢ်ကမၣ် လၢပသးပူၤ. (ကလၤတံ ၅:၁၉-၂၁) ခီၣ်ထံးခါဒု ပကဆိမိၣ်လၢ တၢ်ပာ်သူၣ်ပာ်သးတဖၣ်အံၤ တလီၤဘၣ်ယိၣ်ဘၣ်. ဘၣ်ဆၣ် ပမ့ၢ်တမၤလီၤမၢ်ကွံာ် တၢ်ပာ်သူၣ်ပာ်သးတဖၣ်အံၤ တဘျီဃီဘၣ်န့ၣ် အကဆဲးဒိၣ်ထီၣ် လၢပသးပူၤ ဒီးကဒုးအိၣ်ထီၣ် တၢ်ကီတၢ်ခဲ.—ယၤကိာ် ၁:၁၄, ၁၅.
၁၁. တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤ လၢပတဆိမိၣ်ဘၣ် နီတဘျီဘၣ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ ပကဘၣ် ပလီၢ်သးထီဘိလဲၣ်.
၁၁ တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤ လၢပတဆိမိၣ်ဘၣ် နီတဘျီဘၣ်န့ၣ် အကဲဝဲ တၢ်ရ့လိာ်လၢ အတဂ့ၤဘၣ်. ဆိမိၣ်ကွၢ် တၢ်အိၣ်သးတခါအံၤ. အဒိ နမၤသကိးတၢ်ဒီး ပှၤတဂၤလၢ အတကဲ ယဟိဝၤပှၤအုၣ်အသးဘၣ်. နဘၣ်သးလၢ ပှၤတဂၤအံၤကထံၣ် ယဟိဝၤပှၤအုၣ်အသး လၢအဂ့ၤတခီ အဃိ နရ့ဒီးအီၤဂ့ၤဂ့ၤ ဒီးနမၤစၢၤအီၤ. ဒီးတဘျီတခီၣ်န့ၣ် နအီၣ်သကီး မုၢ်ဆါခီတၢ်အီၣ် ဒီးအီၤကၠ့ၤ. လၢခံယံာ်ထီၣ်ဘျီ နရ့ဒီးအီၤ ဒီးအီၣ်သကီး မုၢ်ဆါခီတၢ်အီၣ်မၢ်မၢ်. တဘျီတခီၣ် ပှၤတဂၤန့ၣ် တဲတၢ်လၢအတဂ့ၤဘၣ် ဒီးခီၣ်ထံးခါဒု နကနၣ်တမုာ်ဘၣ်. နာ်က့ယံာ်ထီၣ်ဘျီ တၢ်လၢအတဲဝဲန့ၣ် နမၣ်တဆိမိၣ် နီမံၤလၢၤဘၣ်. လၢခံ ဘၣ်တနံၤန့ၣ် ပှၤတဂၤအံၤ ကီးနၤလၢ နကလဲၤအီသံးဒီးအီၤ ဒီးနလဲၤပိာ်အခံ. တယံာ်လၢၤဘၣ်ဘျီ တၢ်လၢအတဲဝဲဒီးမၤဝဲန့ၣ် နတူၢ်လိာ်ခဲလၢာ်. အဃိ နစးထီၣ် တဲတၢ်ဒီးမၤတၢ် ဒ်သိးဒီးအီၤ. ပကဘၣ် ရ့ဒီးပှၤဂၤဂ့ၤဂ့ၤ ဒီးပာ်ကဲ ပှၤကိးဂၤဒဲး ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပမ့ၢ်ရ့ဒီးပှၤတဂၤအါအါန့ၣ် ပကလီၤဂာ်ဒီးအီၤ. (၁ ကရံၣ်သူး ၁၅:၃၃) အဃိ ပမ့ၢ်အိၣ်ပလီၢ်သးထီဘိ ဒ်သိးဒီး ယ့ၣ်ၡူးဟ့ၣ်ကူၣ်ပှၤန့ၣ် ကမၤစၢၤပှၤလၢ ပတရ့ဒီးပှၤလၢ အတအိၣ်မူမၤထွဲ ယဟိဝၤယွၤ အတၢ်ဘျၢတဖၣ်န့ၣ် အါအါဘၣ်. (၂ ကရံၣ်သူး ၆:၁၅) တကးဒံးဘၣ် အကမၤစၢၤပှၤ ဒ်သိးပတမၤတၢ်လၢ ကမၤဟးဂီၤ ပတၢ်ရ့လိာ်သးဒီး ယဟိဝၤယွၤဘၣ်.
ဖဲတၢ်ဆၢကတီၢ်အိၣ်ဒံးန့ၣ် ပကဘၣ်သူအီၤ လၢအဂ့ၤကတၢၢ်
၁၂. ဖဲယ့ၣ်ၡူး အပျဲၢ်အဘီၣ်တဖၣ် အိၣ်ခီးဝဲလၢ တၢ်အကတၢၢ်ကဟဲ အဆၢကတီၢ် အဝဲသ့ၣ် ဘၣ်မၤမနုၤလဲၣ်.
၁၂ ဖဲယ့ၣ်ၡူး အပျဲၢ်အဘီၣ်တဖၣ် အိၣ်ခီးဝဲလၢ တၢ်အကတၢၢ်ကဟဲ အဆၢကတီၢ်န့ၣ် ယ့ၣ်ၡူးဘၣ်သးလၢ အဝဲသ့ၣ် ကမၤတၢ်ဆူၣ်ဆူၣ်. အဃိ ယ့ၣ်ၡူး ဟ့ၣ်အဝဲသ့ၣ် တၢ်မၤ ဒီးမၢအဝဲသ့ၣ် စံၣ်တဲၤတဲလီၤ တၢ်သးခုကစီၣ် “လၢဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်.” (မၤတၢ် ၁:၆-၈) မူဒါလၢ ယ့ၣ်ၡူး ဟ့ၣ်အဝဲသ့ၣ်တခါအံၤ အကဲဝဲ မူဒါဖးဒိၣ်ညါ. ခီဖျိလၢ အဝဲသ့ၣ် ဟ့ၣ်လီၤအသး ဒီးစံၣ်တဲၤတဲလီၤတၢ်အဃိ အဝဲသ့ၣ် သူအတၢ်ဆၢကတီၢ် လၢအဂ့ၤကတၢၢ်.
၁၃. ဘၣ်မနုၤအဃိ ပကဘၣ်သူ ပတၢ်ဆၢကတီၢ် လၢအဂ့ၤကတၢၢ်လဲၣ်. (ကလီးစဲ ၄:၅)
၁၃ ဖး ကလီးစဲ ၄:၅. ပကအိၣ်ပလီၢ်သးထီဘိအဂီၢ် ပကဘၣ် ဆိမိၣ်ထံဘၣ်ဃးဒီး ပသူပတၢ်ဆၢကတီၢ်ဒ်လဲၣ်. လံာ်စီဆှံ ပာ်ဖျါထီၣ်လၢ “တၢ်ဘၣ်န့ၢ်အတီၤ” ဟဲဘၣ်ပှၤ သ့ကီးဂၤဒဲး. (စံၣ်တဲၤတဲလီၤတၢ် ၉:၁၁) ဒီးလၢတၢ်တဆိမိၣ်အပူၤ သတူၢ်ကလာ်န့ၣ် ပသံသ့.
ပသူပတၢ်ဆၢကတီၢ် လၢအဂ့ၤကတၢၢ် ကသ့ဒ်လဲၣ် (ကွၢ်လံာ်အဆၢ ၁၄-၁၅)
၁၄-၁၅. ပသူပတၢ်ဆၢကတီၢ် လၢအဂ့ၤကတၢၢ် ကသ့ဒ်လဲၣ်. (ဧ့ၤဘြံၤ ၆:၁၁, ၁၂) (ကွၢ်စ့ၢ်ကီးတၢ်ဂီၤ.)
၁၄ ပသူပတၢ်ဆၢကတီၢ် လၢအဂ့ၤကတၢၢ် သ့ခီဖျိ ပမၤယဟိဝၤယွၤ အတၢ်မၤ ဒီးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ. (ယိၤဟၣ် ၁၄:၂၁) ပကဘၣ် “အိၣ်ဂၢၢ်ဆိးကျၢၤ ဒီးတဘၣ် ဒံဝ့ၤဒံဝီၤတဂ့ၤ. ဒီးမၤတၢ်ဆူၣ်ဆူၣ်လၢ ကစၢ်အတၢ်မၤအပူၤ ထီဘိ.” (၁ ကရံၣ်သူး ၁၅:၅၈) အဃိ ပမ့ၢ်သံဆိမ့ၢ်ဂ့ၤ တၢ်အကတၢၢ် မ့ၢ်ဟဲတုၤဆိမ့ၢ်ဂ့ၤ ပသ့ၣ်ညါလၢ ပသူပတၢ်ဆၢကတီၢ် လၢအဂ့ၤကတၢၢ်အဃိ ပသးတဟးဂီၤဘၣ်.—မးသဲ ၂၄:၁၃; ရိမ့ၤ ၁၄:၈.
၁၅ ယ့ၣ်ၡူး အၢၣ်လီၤပှၤလၢ အကဟံးစုနဲၣ်ကျဲ ပတၢ်စံၣ်တဲၤတဲလီၤ တၢ်မၤ. ဆၢကတီၢ်ခဲအံၤ အဟံးစုနဲၣ်ကျဲပှၤခီဖျိ တၢ်အိၣ်ဖှိၣ်အတၢ်ရဲၣ်တၢ်ကျဲၤ ဒီးလံာ်လဲၢ်လၢ ပတၢ်ကရၢကရိထုးထီၣ်ဝဲ. တကးဒံးဘၣ် တၢ်လၢပလိၣ်ဘၣ် လၢပတၢ်စံၣ်တဲၤတဲလီၤ တၢ်မၤအဂီၢ်န့ၣ် ယ့ၣ်ၡူး ရဲၣ်ကျဲၤန့ၢ်ပှၤခဲလၢာ်. (မးသဲ ၂၈:၁၈-၂၀) အဃိ ပကဘၣ် စံၣ်တဲၤတဲလီၤတၢ်ဆူၣ်ဆူၣ် ဒီးသိၣ်လိပှၤဂၤ. တကးဒံးဘၣ် ဖဲပအိၣ်ခီးလၢ ယဟိဝၤယွၤ ကမၤကတၢၢ်ကွံာ် ဟီၣ်ခိၣ်လၢ မုၣ်ကီၤလံၢ်ပၢဝဲအံၤအခါ ပကဘၣ် အိၣ်ပလီၢ်သးထီဘိ. ဒီးပမ့ၢ်မၤထွဲ တၢ်ဟ့ၣ်ကူၣ်ဖဲ ဧ့ၤဘြံၤ ၆:၁၁, ၁၂ န့ၣ်ကမၤစၢၤပှၤလၢ ပကဆဲးမုၢ်လၢ်တၢ် “တုၤလၢအကတၢၢ်.”—ဖး.
၁၆. ပကဘၣ် ပာ်လီၤသးလၢ ပကမၤမနုၤလဲၣ်.
၁၆ ယဟိဝၤယွၤ ပာ်ပနီၣ် တၢ်ဆၢကတီၢ်လၢ အကမၤကတၢၢ်ကွံာ် ဟီၣ်ခိၣ်လၢ မုၣ်ကီၤလံၢ်ပၢဝဲအံၤလံ. အခါမ့ၢ်ဘၣ်န့ၣ် ယဟိဝၤယွၤ ကမၤလၢပှဲၤထီၣ် အတၢ်အၢၣ်လီၤခဲလၢာ် လၢလံာ်စီဆှံပူၤ. နာ်က့ တဘျီတခီၣ်န့ၣ် ပကဆိမိၣ်ဘၣ်လၢ တၢ်အကတၢၢ်တခါအံၤ တဟဲတုၤ နီတဘျီလၢၤဘၣ်. ဘၣ်ဆၣ် ယဟိဝၤယွၤ အမုၢ်နံၤကဟဲဝဲ သပှၢ်တၢၢ် ဒီးအ “တစဲၤခံဘၣ်.” (ဃဘးကူာ် ၂:၃) အဃိ ပကဘၣ် ပာ်လီၤသးလၢ ပက “ခိးကွၢ်လၢ် ယဟိဝၤယွၤ အကျဲ” ဒီးအိၣ်ခီး “[ပ] တၢ်အုၣ်က့ၤခီၣ်က့ၤ ကစၢ်ယွၤလၢ တၢ်သးစူၤ.”—မံကၤ ၇:၇.
တၢ်သးဝံၣ် ၁၃၉ ထံၣ်တမှံကွၢ် ဖဲတၢ်ခဲလၢာ်မ့ၢ်တၢ်အသီ
a ဆၢကတီၢ်ခဲအံၤ တၢ်ကဲထီၣ်သးအါမးအဃိ ပဆိမိၣ်ထံတၢ် ဒီးပအိၣ်ပလီၢ်သးထီဘိ ကသ့ဒ်လဲၣ်. တကးဒံး ပသူပတၢ်ဆၢကတီၢ် လၢအဂ့ၤကတၢၢ် ကသ့ဒ်လဲၣ်. ပကတဲသကီး တၢ်ဂ့ၢ်တဖၣ်အံၤ လၢတၢ်မၤလိတခါအံၤ.
b တၢ်ဂီၤ အခီပညီ– (အဖီခိၣ်တဘ့ၣ်) ပှၤဒီမိၢ်ဝၤခံဂၤ ကွၢ်ဝဲတၢ်ကစီၣ်. ဖဲတၢ်အိၣ်ဖှိၣ်ဝံၤဘျီ အဝဲသ့ၣ် တဲတၢ်ဒီးပှၤဂၤ ဒ်သိး ပှၤကတူၢ်လိာ် အတၢ်ထံၣ် ဘၣ်ဃးဒီး တၢ်ကစီၣ် လၢအဝဲသ့ၣ် ကွၢ်ဘၣ်ဝဲ. (အဖီလာ်တဘ့ၣ်) ပှၤဒီမိၢ်ဝၤခံဂၤ ကွၢ်ဝဲ ပှၤပၢဆှၢတၢ်ကမံးတံာ် ပာ်ဖျါထီၣ်တၢ်ကစီၣ်အသီ ဘၣ်ဃးဒီး ဝံအတၢ်စံးပာ် လၢအကဲဝဲ တၢ်နၢ်ပၢၢ်အသီ. ဒီးပှၤဒီမိၢ်ဝၤခံဂၤအံၤ ဟ့ၣ်ပှၤဂၤ လံာ်လဲၢ်လၢ ကုၢ်လၢအတီ ဒီးအကူၣ်တၢ်သ့ ထုးထီၣ်ဝဲ.
