1. ¿Ndáaña ni̱ka̱ʼa̱n ta̱ Jesús xíʼin na̱ discípulora, ta ndáa consejo ta̱xira ndaʼa̱na?

 TÁ SI̱LÓʼO kúma̱ní ña̱ kuvi ta̱ Jesús, ku̱mí na̱ discípulora ni̱nda̱ka̱tu̱ʼunnara xa̱ʼa̱ señal ña̱ na̱ʼa̱ nu̱úna ama kúú ña̱ kixaa̱ ña̱ “ndiʼi-xa̱ʼa̱ ñuyǐví yóʼo” (Mat. 24:3). Na̱ discípulo yóʼo xi̱kuni̱na kunda̱a̱-inina ama kúú ña̱ ndiʼi-xa̱ʼa̱ ñuu Jerusalén xíʼin templo. Soo va̱ása níka̱ʼa̱n kuití ta̱ Jesús xíʼinna ama kúú ña̱ kixaa̱ ki̱vi̱ ña̱ ndiʼi-xa̱ʼa̱ ñuu Jerusalén, chi saátu ni̱ka̱ʼa̱nra xíʼinna ña̱ xa̱a̱ ku̱yatinní ndiʼi-xa̱ʼa̱ ndiʼi ña̱ va̱ása va̱ʼa íyo nu̱ú ñuʼú yóʼo. Ña̱yóʼo ni̱ka̱ʼa̱nra xíʼinna: “Ni iinna va̱ása xíni̱ hora xíʼin ki̱vi̱ kán, ni na̱ ángel na̱ íyo chí ndiví ni yi̱ʼi̱; mitúʼun yivái̱ xíni̱”. Xa̱ʼa̱ ña̱kán ta̱xira consejo yóʼo ndaʼa̱na: “Xíniñúʼu koo tu̱ʼvandó ta kundito va̱ʼa nu̱úndó” (Mar. 13:32-37).

2. ¿Nda̱chun xi̱niñúʼu koo tu̱ʼvaní na̱ cristiano na̱ ni̱xi̱yo chí ñuu Jerusalén?

² Na̱ cristiano na̱ ni̱xi̱yo tá siglo nu̱ú xi̱niñúʼu koo tu̱ʼvanína. Saáchi ña̱yóʼo chindeétáʼan xíʼinna ña̱ va̱ʼa ka̱kuna. Ta̱ Jesús ni̱ka̱ʼa̱nra xíʼin na̱ xi̱ndiku̱n sa̱tára ndáa ña̱ʼa kúú ña̱ xi̱niñúʼu kiʼinna kuenta xíʼin ña̱ va̱ʼa kunda̱a̱-inina ña̱ xa̱a̱ ku̱yatin kixaa̱ ña̱ ndiʼi-xa̱ʼa̱ ñuu Jerusalén. Ta̱ Jesús ni̱ka̱ʼa̱nra xíʼinna: “Tá ná kunindó ñuu Jerusalén ña̱ kasi na̱ soldado iníí sa̱táña, kunda̱a̱-inindó ña̱ xa̱a̱ ku̱yatin ndiʼi-xa̱ʼa̱ña”. Tá ná kunina kuu ña̱yóʼo xi̱niñúʼu kununa ku̱ʼu̱nna chí yuku̱ nda̱a̱ táki̱ʼva ni̱ka̱ʼa̱nra xíʼinna (Luc. 21:20, 21). Ta na̱ xi̱niso̱ʼo ña̱ ni̱ka̱ʼa̱n ta̱ Jesús ta xi̱nuna ku̱a̱ʼa̱nna chí yuku̱, ni̱ka̱kuvana tá ni̱ki̱ʼvi na̱ ñuu Roma sa̱ndíʼi-xa̱ʼa̱na ñuu Jerusalén.

3. ¿Ndáaña sakúaʼayó nu̱ú artículo yóʼo?

³ Miíyó ndóoyó tiempo ña̱ xa̱a̱ ku̱yatin kixaa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa. Xa̱ʼa̱ ña̱kán ná kundiku̱nyó yichi̱ na̱ cristiano na̱ ni̱xi̱yo tá siglo nu̱ú, ña̱ ndíchi kooyó ta kiʼinníyó kuenta. Nu̱ú ña̱ artículo yóʼo sakúaʼayó ndáaña xíniñúʼu keʼéyó ña̱ ki̱ʼvaní koo ña̱ ndakanixi̱níyó xa̱ʼa̱ ña̱ kúu tiempo vitin. Saátu  sakúaʼayó ndáaña xíniñúʼu keʼéyó ña̱ kiʼinníyó kuenta xíʼin miíyó xíʼin ña̱ viíní kuniñúʼuyó tiempoyó, saáchi xa̱a̱ ku̱yatinní kixaa̱ ki̱vi̱ ña̱ ndiʼi-xa̱ʼa̱ ndiʼi ña̱ va̱ása va̱ʼa íyo nu̱ú ñuʼú yóʼo.

4. ¿Nda̱chun xíniñúʼu kunda̱a̱-iniyó xa̱ʼa̱ ndiʼi ña̱ kúu iníísaá ñuyǐví?

⁴ Ndiʼi ña̱ kúu iníísaá ñuyǐví tiempo vitin chíndeétáʼanña xíʼinyó kunda̱a̱-iniyó ña̱ ki̱xáʼa xínu ndiʼi profecía ña̱ va̱xi nu̱ú Biblia. Tá kúú, ta̱ Jesús ni̱ka̱ʼa̱nra xa̱ʼa̱ sava señal ña̱ chindeétáʼan xíʼinyó kunda̱a̱-iniyó ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa (Mat. 24:3-14). Ta̱ apóstol Pablo ni̱ka̱ʼa̱nra xíʼinyó ña̱ ná kiʼinníyó kuenta ndáa ki̱ʼva xínu ndiʼi profecía ña̱ va̱xi nu̱ú Biblia, saáchi ña̱yóʼo kúú ña̱ chindeétáʼan xíʼinyó ña̱ kandíxakayó Ndióxi̱ (2 Ped. 1:19-21). Ta libro ña̱ Apocalipsis káʼa̱nña ña̱yóʼo: “Ña̱yóʼo kúú ña̱ ni̱ka̱ʼa̱n ta̱ Jesucristo xa̱ʼa̱. Ndióxi̱ ni̱na̱ʼa̱ra nu̱ú ta̱ Jesús ña̱ xa̱a̱ ku̱nu̱mí kuu, ta ta̱yóʼo na̱ʼa̱raña nu̱ú na̱ káchíñu nu̱ú Ndióxi̱” (Apoc. 1:1). Xíʼin ña̱yóʼo kúnda̱a̱-iniyó ña̱ kuni̱nívayó kunda̱a̱-iniyó xa̱ʼa̱ ndiʼi ña̱ kúu iníísaá ñuyǐví, saáchi ña̱yóʼo chindeétáʼanña xíʼinyó kunda̱a̱-iniyó ndáa ki̱ʼva xínu ndiʼi profecía ña̱ va̱xi nu̱ú Biblia. Ta nda̱a̱ sava yichi̱ kútóonívayó natúʼunyó xa̱ʼa̱ ña̱yóʼo xíʼin na̱ hermanoyó.

5. ¿Ndáaña xíniñúʼu kiʼinyó kuenta xíʼin tá káʼa̱nyó xa̱ʼa̱ profecía ña̱ va̱xi nu̱ú Biblia, ta ndáaña xíniñúʼu keʼéyó? (Koto na̱ʼná).

⁵ Xíniñúʼu kiʼinníyó kuenta tá káʼa̱nyó ndáa ki̱ʼva xínu profecía ña̱ kúu tiempo vitin. ¿Nda̱chun? Saáchi va̱ása kúni̱yó ka̱ʼa̱nyó xa̱ʼa̱ ña̱ ndákanixi̱ní miíyó xíʼin na̱ hermanoyó, chi tá kéʼéyó ña̱yóʼo kivi ndataʼvíyó na̱ congregación. Tá kúú, sana kivi kuniso̱ʼoyó ña̱ ka̱ʼa̱n na̱ ku̱i̱ká, na̱ chíñu á na̱ níʼi yichi̱ ti̱xin veʼe-ñu̱ʼu ña̱ kivi sandíʼi-xa̱ʼa̱na ndiʼi tu̱ndóʼo ña̱ íyo nu̱ú ñuʼú yóʼo tasaá kúú ña̱ kundoo va̱ʼayó. Ña̱kán, tá xítoyó kúu ndiʼi ña̱yóʼo ná kǒo ndakanixi̱níyó ña̱ ki̱xáʼa xínu profecía ña̱ va̱xi nu̱ú 1 Tesalonicenses 5:3, va̱ʼaka ná kiʼinyó kuenta xíʼin ndiʼi ña̱ xa̱á ña̱ tává na̱ ñuu Ndióxi̱. Tá ndiʼi ña̱ káʼa̱nyó ná taváyóña nu̱ú ña̱ sánáʼa̱ na̱ ñuu Ndióxi̱ miíyó, ña̱yóʼo chindeétáʼanña xíʼinyó ña̱ inkáchi koo ña̱ ndakanixi̱níyó xíʼin na̱ hermanoyó (1 Cor. 1:10; 4:6).

6. ¿Ndáaña sákuaʼayó xíʼin ña̱ va̱xi nu̱ú 2 Pedro 3:11-13?

⁶ (Kaʼvi 2 Pedro 3:11-13). Ta̱ apóstol Pedro chíndeétáʼanra xíʼinyó ña̱ ki̱ʼvaní koo ña̱ ndakanixi̱níyó tá káʼviyó xa̱ʼa̱ profecía ña̱ va̱xi nu̱ú Biblia. Káʼa̱nra xíʼinyó ña̱ xíniñúʼu koo tu̱ʼvaníyó tá ná kixaa̱ ki̱vi̱ káʼnu Jehová. ¿Nda̱chun? Su̱ví xa̱ʼa̱ ña̱ kúni̱yó kúnda̱a̱-iniyó ndáa ki̱vi̱ xíʼin hora kúúña, chi xa̱ʼa̱ ña̱ kúni̱yó viíní kuniñúʼuyó tiempoyó ña̱ kooyó na̱ yiví na̱ yi̱i̱ kúúña ta na̱ʼa̱yó xíʼin ña̱ kéʼéyó ña̱ nda̱kú íyo iniyó xíʼin Ndióxi̱ (Mat. 24:36; Luc. 12:40). Ña̱yóʼo kúni̱ kachiña ña̱ viíní koo ña̱ keʼéyó nu̱ú Jehová, ta xa̱ʼa̱ ña̱ kúʼvi̱-iniyó xíniyóra kúú ña̱ keʼéyóña. Xa̱ʼa̱ ña̱kán xíniñúʼu kiʼinníyó kuenta xíʼin ña̱ kéʼé miíyó.

7. ¿Ndáaña xíniñúʼu keʼéyó ña̱ va̱ʼa kiʼinníyó kuenta xíʼin miíyó? (Lucas 21:34).

⁷ Ta̱ Jesús ni̱ka̱ʼa̱nra xíʼin na̱ discípulora ña̱ xíniñúʼu kiʼinna kuenta xíʼin ña̱ kúu iníísaá ñuyǐví, ta saátu ni̱ka̱ʼa̱nra xíʼinna ña̱ xíniñúʼu kiʼinna kuenta xíʼin miína. Ta ña̱ ni̱ka̱ʼa̱nra yóʼo kivi ndani̱ʼíyóña nu̱ú Lucas 21:34 (kaʼviña). Ná kotoyó ña̱ ni̱ka̱ʼa̱n ta̱ Jesús tá ka̱chira: “Kiʼinníndó kuenta xíʼin miíndó”. ¿Ndáaña kúni̱ kachi ña̱ kiʼinníyó kuenta xíʼin miíyó? Ña̱yóʼo kúni̱ kachiña, ña̱ ná kiʼinníyó kuenta ndáa ña̱ʼa kúú ña̱ kivi sakúxíka miíyó nu̱ú Jehová ta ná kǒo keʼéyóña. Ta ña̱yóʼo chindeétáʼanña xíʼinyó ña̱ kǒo sandákoo Ndióxi̱ ña̱  kuʼvi̱-inira kunira miíyó (Prov. 22:3; Jud. 20, 21).

8. ¿Ndáa consejo ta̱xi ta̱ Pablo ndaʼa̱ na̱ cristiano?

⁸ Ta̱ apóstol Pablo ni̱ka̱ʼa̱nra xíʼin na̱ cristiano ña̱ xi̱niñúʼu kiʼinnína kuenta xíʼin miína. Tá kúú, ña̱yóʼo ni̱ka̱ʼa̱nra xíʼin na̱ cristiano na̱ ni̱xi̱yo chí ñuu Éfeso: “Kiʼinníndó kuenta ña̱ kǒo keʼéndó nda̱a̱ táki̱ʼva kéʼé na̱ kíʼvi, ta va̱ʼaka keʼéndó nda̱a̱ táki̱ʼva kéʼé na̱ yiví ndíchi” (Efes. 5:15, 16). Ta̱ Ndi̱va̱ʼa ku̱a̱ʼání ña̱ʼa xíniñúʼura ña̱ sandákooyó ndasakáʼnuyó Ndióxi̱. Xa̱ʼa̱ ña̱kán, Biblia va̱ʼaní consejo táxiña ndaʼa̱yó ña̱ va̱ʼa kunda̱a̱-iniyó ndáaña kúni̱ Jehová ná keʼéyó, chi ña̱yóʼo chindeétáʼanña xíʼinyó kundeé-iniyó ya̱ʼayó nu̱ú ndiʼi ña̱ chíndaʼá ta̱ Ndi̱va̱ʼa va̱xi nu̱úyó (Efes. 5:17).

9. ¿Ndáa ki̱ʼva xáa̱yó kúnda̱a̱-iniyó ndáaña kúni̱ Jehová ná keʼéyó?

⁹ Va̱ása va̱xi iin lista káʼnu nu̱ú Biblia ña̱ káʼa̱n xa̱ʼa̱ iin tá iin ña̱ʼa ña̱ kivi sakúxíka miíyó nu̱ú Jehová. Ña̱kán sava yichi̱ kivi ndaka̱xinyó keʼéyó iin ña̱ʼa soo kǒo iin texto ña̱ káʼa̱n káxi xa̱ʼa̱ ña̱yóʼo á va̱ʼa keʼéyóña á va̱ása. Ta ña̱ viíní koo ña̱ ndaka̱xinyó keʼéyó xíniñúʼu kunda̱a̱ káxi iniyó ndáaña kúni̱ Jehová ná keʼéyó. Ña̱ va̱ʼa keʼéyó ña̱yóʼo xíniñúʼu kaʼvi ni̱ʼiyó tu̱ʼunra ta ndakanixi̱níyó xa̱ʼa̱ ña̱ káʼa̱nña. Tá xáa̱yó kúnda̱a̱ káxi iniyó ndáaña kúú ña̱ kúni̱ Jehová ná keʼéyó ta chíka̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní ta̱ Cristo, saá kúú ña̱ va̱ása ixayo̱ʼvi̱ña xíʼinyó ña̱ ndíchi kooyó ni tá kǒo iin texto ña̱ káʼa̱n káxi xíʼinyó xa̱ʼa̱ ña̱ kúni̱yó ndaka̱xinyó keʼéyó (1 Cor. 2:14-16). Sava yichi̱ kivi kiʼinyó kuenta xíʼin prueba ña̱ chíndaʼá ta̱ Ndi̱va̱ʼa nu̱úyó ta sava yichi̱ va̱ása kivi kiʼinyó kuenta xíʼinña.

10. ¿Ndáaña kúú sava ña̱ kǒo xíniñúʼu keʼéyó?

¹⁰ Ña̱yóʼo kúú sava ña̱ va̱ása xíniñúʼu keʼéyó: ná kǒo na̱ʼa̱yó ña̱ kútóoyó xíniyó inkana, ná kǒo koʼoyó ku̱a̱ʼání ndixi nda̱a̱ xi̱niyó, ná kǒo kuxu náʼnáyó, ná va̱ása kuniñúʼuyó tu̱ʼun ña̱ sáxo̱ʼvi̱-ini inkana ta ná kǒo kotonde̱ʼéyó película nu̱ú kée na̱ kánitáʼan, nu̱ú kée na̱ chálá á na̱ kísi̱ xíʼin táʼan (Sal. 101:3). Ta̱ Ndi̱va̱ʼa ndiʼi tiempo ndúkúra ki̱ʼva ña̱ sakúxíkara miíyó nu̱ú Jehová (1 Ped. 5:8). Tá va̱ása kíʼinyó kuenta xíʼin ña̱yóʼo, kivi kixáʼayó kukúíni̱yó xíʼin inkana á kuu i̱ni̱-iniyó xíʼinna, kixáʼayó ixakuíʼnayó, kuni̱yó kuumiíyó ña̱ kúúmií inkana, sa̱a̱-iniyó kuniyó inkana, ni̱nu kuniyó á saátu kivi ixayo̱ʼvi̱ña xíʼinyó ña̱ nandósóyó ña̱ ke̱ʼéna xíʼinyó (Gál. 5:19-21). Sana va̱ása kiʼinvíyó kuenta ta kixáʼayó keʼéyó loʼo ña̱yóʼo, soo tá ná kǒo taváyóña níma̱yó kivi xa̱a̱ña kuaʼnuña nda̱a̱ táki̱ʼva íyo iin planta tú kúúmií veneno á tú xa̱tu̱ní (Sant. 1:14, 15).

11. ¿Ndáa inka ña̱ʼa xíniñúʼu ta̱ Ndi̱va̱ʼa, ta nda̱chun xíniñúʼu kiʼinníyó kuenta xíʼin ña̱yóʼo?

¹¹ Ná ka̱ʼa̱nyó xa̱ʼa̱ inka ña̱ xíniñúʼu ta̱ Ndi̱va̱ʼa ña̱ sakúxíkara miíyó nu̱ú Jehová. Tá kúú, ná ndakanixi̱níyó xa̱ʼa̱ ña̱yóʼo: iin na̱ káchíñu xíʼinyó va̱ása kúúna testigo Jehová. Soo xa̱ʼa̱ ña̱ kúni̱yó ña̱ va̱ʼaní ná koo ña̱ ka̱ʼa̱nna xa̱ʼa̱ na̱ testigo, va̱ʼaní na̱ yiví kúúyó xíʼinna ta chíndeétáʼanyó xíʼinna. Sana kixáʼayó kuxuyó xíʼinna sava ki̱vi̱, soo tá ná ya̱ʼa tiempo kixáʼayó kuxuyó xíʼinna ndiʼi ki̱vi̱. Sana kixáʼana ka̱ʼa̱nna xa̱ʼa̱ ña̱ʼa ña̱ kini ña̱ va̱ása kútóo Jehová, ta tá ná kuniso̱ʼoyó ña̱ ka̱ʼa̱nna ña̱yóʼo va̱ása va̱ʼa kuniyó. Soo xa̱ʼa̱ ña̱ ndiʼi ki̱vi̱ xíniso̱ʼoyó ña̱ nátúʼunna xa̱ʼa̱ ña̱yóʼo, sana tá ná ya̱ʼa tiempo su̱ví ña̱ kinikaví koo ña̱yóʼo nu̱úyó. Ta sana iin ki̱vi̱ ka̱ʼa̱nna xíʼinyó ña̱ ná ku̱ʼu̱n si̱íyó xíʼinna tá ná ndiʼi kachíñuyó ta kandíxavayó ku̱ʼu̱nyó xíʼinna. Ta tá ná ya̱ʼa tiempo kixáʼayó ndakanixi̱níyó nda̱a̱ táki̱ʼva ndákanixi̱nína. Va̱ása ku̱a̱ʼáví tiempo xíniñúʼu kutáʼanyó xíʼinna tasaá kixáʼayó keʼéyó nda̱a̱ táki̱ʼva kéʼéna. Miíyó na̱ ndásakáʼnu Jehová va̱ʼaní na̱ yiví kúúyó ta íxato̱ʼóyó ndiʼi na̱ yiví. Soo ná kǒo nandósóyó chi ndiʼi ña̱ kéʼé na̱ yiví na̱ kítáʼanyó xíʼin xa̱a̱yó keʼéyó  ña̱ kéʼéna (1 Cor. 15:33). Tá ná kuniso̱ʼoyó ndiʼi ña̱ ni̱ka̱ʼa̱n ta̱ Jesús xíʼinyó ña̱ kiʼinníyó kuenta xíʼin miíyó, saá kúú ña̱ va̱ása ku̱a̱ʼání tiempo kutáʼanyó xíʼin na̱ kǒo ndásakáʼnu Jehová (2 Cor. 6:15). Tasaá kotoyó ndáa tu̱ndóʼo kúú ña̱ kivi kixi nu̱úyó.

12. ¿Ndáa chiñu kúú ña̱ xi̱niñúʼu keʼé na̱ discípulo ta̱ Jesús nda̱a̱ ná kixaa̱ ña̱ ndiʼi-xa̱ʼa̱ ña̱ ñuyǐví?

¹² Tá ni̱ka̱ʼa̱n ta̱ Jesús xíʼin na̱ discípulora ña̱ xa̱a̱ ku̱yatin kixaa̱ ña̱ ndiʼi-xa̱ʼa̱ ñuyǐví yóʼo. ¿Á ni̱xi̱yo miína ta kǒo chiñu níkeʼéna? Va̱ásaví, saáchi ta̱ Jesús ta̱xira iin chiñu ña̱ ndáyáʼviní ndaʼa̱na tá ni̱ka̱ʼa̱nra xíʼinna: “Natúʼunndó xa̱ʼíi̱ chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú” (Hech. 1:6-8). Iin chiñu káʼnuní kúú ña̱ ta̱xi ta̱ Jesús ndaʼa̱na. Soo tá ña̱yóʼo kúú ña̱ ná kundi̱ʼi̱-inina xa̱ʼa̱, saá kúú ña̱ viíní kuniñúʼuna tiempona.

13. ¿Nda̱chun xíniñúʼu viíní kuniñúʼuyó tiempoyó? (Colosenses 4:5).

¹³ (Kaʼvi Colosenses 4:5). Ña̱ va̱ʼa kiʼinyó kuenta xíʼin miíyó, xíniñúʼu kiʼinníyó kuenta ndáa ki̱ʼva xíniñúʼuyó tiempoyó. Nda̱a̱ táki̱ʼva káchi Eclesiastés 9:11, ndiʼiyó iin sana kivi ndakava tu̱ndóʼo nu̱úyó ta nda̱a̱ kivi xa̱a̱yó kuviyó.

14, 15. ¿Ndáaña kivi keʼéyó tasaá viíní kuniñúʼuyó tiempoyó? (Hebreos 6:11, 12; koto na̱ʼná).

¹⁴ Iin ki̱ʼva ña̱ viíní kuniñúʼuyó tiempoyó kúú ña̱ keʼéyó chiñu Jehová ta chika̱a̱yó ndee̱  ña̱ viíka kutáʼanyó xíʼinra (Juan 14:21). Xíniñúʼu chika̱a̱yó ndee̱ ña̱ kuniso̱ʼoyó consejo yóʼo: “Kǒo sandákoondó ña̱ kandíxaníndó Ndióxi̱ ta ndiʼi tiempo keʼéndó chiñu tátayó” (1 Cor. 15:58). Ña̱kán tá ná kixaa̱ ki̱vi̱ ña̱ ndiʼi-xa̱ʼa̱ ndiʼi ña̱ʼa ña̱ íyo nu̱ú ñuʼú yóʼo á tá ná kixaa̱ ki̱vi̱ ña̱ kuviyó, va̱ása ndakanixi̱níyó ña̱ loʼoní chiñu ke̱ʼéyó nu̱ú Jehová (Mat. 24:13; Rom. 14:8).

¹⁵ Nda̱a̱ táki̱ʼva íyo ña̱ ni̱ka̱ʼa̱n ta̱ Jesús, nda̱a̱ tiempo vitin kíʼinra kuenta xíʼin na̱ discípulora ña̱ va̱ʼa natúʼunna xa̱ʼa̱ Reino Ndióxi̱ iníísaá ñuyǐví. Ti̱xin ñuu Jehová ta̱ Jesús sánáʼa̱ra miíyó ndáa ki̱ʼva natúʼunyó xa̱ʼa̱ Reino Ndióxi̱. Ta táxira ndiʼi ña̱ xíniñúʼuyó ña̱ va̱ʼaní keʼéyó ndiʼi chiñu yóʼo (Mat. 28:18-20). Ta chiñu ña̱ xíniñúʼu kundi̱ʼi̱ní-iniyó xa̱ʼa̱ tiempo vitin kúú ña̱ natúʼunyó xa̱ʼa̱ Ndióxi̱ ta sanáʼa̱yó na̱ yiví. Ta ná kiʼinníyó kuenta xíʼin ndiʼi ña̱ kéʼéyó nani ndátuyó ná kixaa̱ ki̱vi̱ káʼnu Jehová. Iin ña̱ chindeétáʼan xíʼinyó ña̱ ndakiʼinyó ña̱ káʼa̱n Jehová taxira ndaʼa̱yó chí nu̱únínu kúú ña̱ kuniso̱ʼoyó consejo ña̱ va̱xi nu̱ú Hebreos 6:11, 12 (kaʼviña).

16. ¿Ndáaña chíka̱a̱-iniyó keʼéyó?

¹⁶ Jehová xa̱a̱ nda̱kaxinra ama sandíʼi-xa̱ʼa̱ra ta̱ Ndi̱va̱ʼa. Ta tá ná kixaa̱ ki̱vi̱ kán saá kúú ña̱ saxínura profecía ña̱ va̱xi nu̱ú Biblia. Ni sava yichi̱ túviyó ña̱ kúáchi̱ní kixaa̱ ña̱yóʼo (Hab. 2:3). Soo ki̱vi̱ káʼnu Jehová va̱ása kuachi̱kaña, ña̱kán kúni̱yó keʼéyó ña̱ káʼa̱n Miqueas 7:7 ña̱ káchi: “Ndiʼi tiempo kundatui̱ Jehová. Kúee koo inii̱ ta kundatui̱ Ndióxi̱ ta̱ sakǎku yi̱ʼi̱”.