1. ¿Tlake tlamantli Jesús kiniljuik itokilijkauaj tlen itlamia tonali, uan tlake kintlajtolmakak?

 KEMA nechka kimiktiskiaj Jesús, nauij itokilijkauaj kitlajtlanijkej tlake tlamantli panoskia kema “nechkatitos para tlamis ni tonali” (Mat. 24:3). Uelis itokilijkauaj kinekiyayaj kimatisej tlake tlamantli panoskia kema judíos ayokmo tlanauatiskiaj. Jesús amo san kiniljuik tlake panoskia kema ayokmo tlanauatiskiaj judíos, nojkia kiniljuik tlake panoskia kema “tlamis ni tonali”. Jesús kiniljuik ni tlamantli: “Axaka kimati tlachke tonal uan tlachke hora sampa niualas ipan ni tlaltipaktli. Axkimatij nopa iluikaeuanij ipan iluikak, niyon na ni ikone axnijmati. San yajaya Totata, kena kimati”. Uan nojkia kiniljuik ni tlamantli: “Xitlachixtokaj” uan “¡Xitlachixtokaj kuali para kema niualas!” (Mar. 13:32-37).

2. ¿Kenke Cristo itokilijkauaj katli itstoyaj Jerusalén monekiyaya momokuitlauisej?

² Cristo itokilijkauaj katli itstoyaj ipan achtoui siglo monekiyaya nochipa momokuitlauisej, nopa kinpaleuiskia ma momanauikaj. Jesús kiniljuik tlake tlamantli monekiyaya kiitasej uan kiampa kimatiskiaj nechka kintsontlamiltiskiaj judíos. Ya kiniljuik: “Kema inkinitasej soldados tlen miak tlaltinij kiyaualojtosej ni altepetl Jerusalén, uajka ximomakakaj cuenta ya asiko hora para ya kixoleuasej. Uajka ipan nopa hora, inijuantij tlen itstokej ipan estado Judea ma cholokaj ipan tepetinij” (Luc. 21:20, 21). Katli kineltokakej tlen Jesús  kiijtok, momanauijkej kema romanos kixolejkej Jerusalén.

3. ¿Tlake tikitasej ipan ni tlamachtili?

³ Tojuantij nojkia tiitstokej ipan tonali kema nechka kitsontlamiltisej tlen amo kuali. Yeka nojkia moneki kuali titlaneltokasej uan timomokuitlauisej sanse kej kichijkej Cristo itokilijkauaj tlen achtoui siglo. Ipan ni tlamachtili tijyekosej kenijkatsa moneki timomokuitlauisej uan tikitasej kej kinamiki nochi tlen pano. Nojkia tikitasej tlake techpaleuis kuali ma titlachixtokaj uan kiampa kuali tijtekiuisej tonali maske nechka kitsontlamiltisej nochi tlen amo kuali.

4. ¿Kenke moneki tijmatisej tlen pano ipan ni tonali?

⁴ Tlauel techpaleuia kema tikitaj tlen pano pampa kiampa tikitaj nelnelia moaxitia tlen Biblia kiijtoua. Se neskayotl, Jesús kiijtok tlake panoskia kema nechka kitsontlamiltisej nochi tlen Satanás kinauatia (Mat. 24:3-14). Apóstol Pedro kiijtok moneki tikitasej tlake tlajtolpanextili moaxitia, pampa nopa techpaleuis nojua kuali ma titlaneltokatokaj (2 Ped. 1:19-21). Uan ipan Apocalipsis 1:1 kiijtoua: “Ni amatl techiljuia ni tlamantli tlen Toteko kipannextilik Jesucristo, para ma technextili tojuantij tiitlatekipanojkauaj uan ni tlamantli panos ipan tlen ueli tlalochtli kema axtijchiaj ma pano”. Uajka, amo kenijki tlaj tijnekij tijmatisej nochi tlen pano uan kenijkatsa moaxitia tlen kiijtoua Biblia. Uan uelis techpaktia tikiniljuisej toikniuaj tlake panotok.

5. ¿Kenke moneki timomokuitlauisej kema tikamanaltij tlen se tlajtolpanextili, uan tlake moneki tijchiuasej? (Nojkia xikita tlaixkopinkayomej).

⁵ Kema tikijtouaj kenijkatsa moaxitia se tlajtolpanextili, moneki timomokuitlauisej. ¿Kenke? Pampa amo tijnekij tikijtosej san tlen tojuantij timoiljuiaj tlen uelis kichiuas ma moxelokaj toikniuaj ipan tlanechikoli. Se neskayotl, uelis kemantika tikinkakisej tekichiuanij kiijtouaj tlake kichiuasej uan kiampa uelis kuali tiitstosej uan ika tlaseuilistli. Kema kiampa panos, amo kinamiki timoiljuisej moaxitia tlen kiijtoua 1 Tesalonicenses 5:3. Moneki tikitasej tlamachtili tlen kistia. Tlaj nochi tlen tikijtouaj mokixtijtok ipan amatlajkuiloli tlen techmakatok Jehová itlanechikol, titlapaleuisej amo ma moxelokaj toikniuaj ipan tlanechikoli uan ma tijpiakaj sanse totlalnamikilis (1 Cor 1:10; 4:6).

6. ¿Tlake techmachtia 2 Pedro 3:11-13?

⁶ (Xijpoua 2 Pedro 3:11-13). Apóstol Pedro kiijtok moneki tikitasej tlajtolpanextili kej kinamiki. Ya kiijtok moneki tijchiasej nopa tonali kema toTeotsij kitsontlamiltis tlen amo kuali. ¿Kenke moneki kiampa tijchiuasej? Amo pampa tijnekij tijmatisej “tlachke tonal ni yon tlachke hora” Jehová kichiuas Armagedón. Tijchiaj nopa tonali pampa tijnekij kuali timonejnemiltisej uan tijyolpakiltisej toTeotsij (Mat. 24:36; Luc. 12:40). Tijnekij kuali timonejnemiltisej uan tijchiuasej tlen Jehová kiyolpakiltia pampa tlauel tikikneliaj. Tlaj kiampa tijnekij tijchiuasej, moneki timomokuitlauisej.

7. ¿Kenijkatsa uelis timomokuitlauisej? (Lucas 21:34).

⁷ Jesús amo san kiniljuik itokilijkauaj monekiyaya kiitasej tlen panoyaya ipan nopa tonali, nojkia kiniljuik monekiyaya momokuitlauisej. Uan nelia kiampa kiniljuik ipan Lucas 21:34 (xijpoua). Jesús kiniljuik: “Ximomokuitlauikaj”. ¿Tlake kiijtosneki ni tlamantli? Moneki tikitasej tlake tlamantli uelis kichiuas ayokmo kuali ma timouikakaj iuaya  Jehová uan nojkia kenijkatsa timouejkatlalisej tlen nopa tlamantli. Tlaj kiampa tijchiuasej, toTeotsij Jehová nojua tlauel techiknelijtos (Prov. 22:3; Jud. 20, 21).

8. ¿Tlake kintlajtolmakak Pablo Cristo itokilijkauaj?

⁸ Apóstol Pablo kiniljuik Cristo itokilijkauaj monekiyaya momokuitlauisej. Se neskayotl, ya kintlajkuiljuilik toikniuaj tlen Éfeso ni tlamantli: “Ximomokuitlauikaj keja inmonejnemiltiaj. Amo xinemikaj keja inijuantij tlen uiuitikej” (Efes. 5:15, 16). Satanás kitekiuia miak tlamantli pampa kineki ayokmo kuali ma titlaneltokakaj. Yeka, Biblia techiljuia moneki tikitasej tlake kineki Jehová ma tijchiuakaj uan kiampa amo tijchiuasej tlen Satanás kineki (Efes. 5:17).

9. ¿Tlake techpaleuis tijmatisej tlen kineki Jehová ma tijchiuakaj?

⁹ Biblia amo kiijtoua nochi tlamantli tlen uelis kichiuas ayokmo kuali ma timouikakaj iuaya Jehová. Yeka moneki tikitasej tlake tlamantli uelis techtlanauis maske amo ijkuilijtok ipan Biblia. Tlaj tijnekij kuali tijtlapejpenisej tlen tijchiuasej, moneki tijmatisej “tlen Toteko kineki”. ¿Tlake techpaleuis kiampa tijchiuasej? Tlaj tijpouasej toTeotsij iTlajtol uan timoyoliljuisej ipan tlen tijpouaj. Kema kuali tijkuamachiliaj tlake kineki Jehová, techpaleuis ma tijchiuakaj kampeka tijpiasej “itlalnamikilis Cristo”. Uan nopa techpaleuis kuali ma timonejnemiltikaj maske Biblia amo kiijtoua xitlauak kenijkatsa moneki tijchiuasej se tlamantli (1 Cor. 2:14-16). Kemantika nima tikitaj se keski tlamantli amo kiyolpakiltis Jehová, uan sekij amo nesi tlaj eli amo kuali.

10. ¿Tlake tlamantli moneki amo tijchiuasej?

¹⁰ Moneki timomokuitlauisej uan amo tijnextisej tikixtokaj se akajya tlaj ya tijpiaj tonamik o amo tijnekij timosenkauasej, amo tlauel titlaisej yon tlauel titlakuasej. Nojkia amo kinamiki titeyolkokosej ika tlen tikijtouaj, yon timoyolpakiltisej ika tlamantli kampa nesij mosisiniaj o ika pornografía (Sal. 101:3). Satanás nochipa kitemolia kenijkatsa kichiuas ayokmo kuali ma timouikakaj iuaya Jehová (1 Ped. 5:8). Tlaj amo timomokuitlauiaj, uelis kichiuas ma titekualankaitakaj, ma tiistlakatikaj, ma tijnekikaj tlen amo toaxka, tlauel ma timosisinikaj, ma timoueyimatikaj uan ma titekokolikaj (Gál. 5:19-21). Tlaj amo tijkixtiaj ipan toyolo ni tlamantli, uelis teipa moskaltis uan tlauel techtlanauis (Sant. 1:14, 15).

11. ¿Tlake tlamantli nojkia uelis techtlanauis uan kenke moneki timouejkatlalisej?

¹¹ Ma tikitakaj se tlamantli tlen nojkia uelis techtlanauis. Kema timouikaj ininuaya katli amo kuali monejnemiltiaj. Ma timoiljuikaj titekitij iuaya se akajya katli amo kitekipanoua Jehová. Uan tijnekij kuali ma kinita Jehová itlajtoltemakauaj, yeka tijpaleuiaj uan tijnextiaj tijpiaj kuali toyolo. Nojkia peua san kemantika titlakuaj iuaya, uan teipa timomatij kiampa tijchiuaj, uan ya peua kiijtoua tlamantli tlen sokiyo. Uelis achtoui amo kuali tijyolmatij kema kiampa tijkakij uan ayokmo tikamanaltij iuaya. Teipa timomatij kiampa tijkakij uan ayokmo kenijki tikitaj. Uan asi se tonali kema techtlaneui ma titlakuatij iuaya uan kena tiauij. Yeka nojkia peua timoiljuiaj kej ya, uelis amo pano miak tonali uan nojkia peua tijchiuaj kej ya. Katli tijtekipanouaj Jehová, tikinikneliaj maseualmej uan tikintlepanitaj. Maske kiampa tijchiuaj, nojkia tikilnamikij uelis timonejnemiltisej kej katli ininuaya timouikaj (1 Cor. 15:33). Tlaj tijchiuaj tlen Jesús kiijtok uan timomokuitlauiaj, amo tlauel timouikasej ininuaya katli amo kitlepanitaj  toTeotsij itlanauatiljuaj (2 Cor. 6:15). Nima tikitasej tlen amo kuali uan timouejkatlalisej.

12. ¿Tlake tekitl kipixkej Jesús itokilijkauaj?

¹² Jesús itokilijkauaj amo san kichixkej ma asi tonali kema toTeotsij kitsontlamiltis tlen amo kuali, pampa Jesús kinnauatijtoya ma kichiuakaj se tekitl. Ya kinnauatik ma yakaj tlajtolmoyauatij ipan “Jerusalén uan ipan estados Judea uan Samaria” uan ipan sekinok altepemej (Hech. 1:6-8). Inijuantij kipixkej se ueyi tekitl. Uan mosentlalijkej kichiuasej nopa tlamantli, yeka kuali kitekiuijkej tonali.

13. ¿Kenke moneki kuali tijtekiuisej tonali? (Colosenses 4:5).

¹³ (Xijpoua Colosenses 4:5). Tlaj tijnekij timomokuitlauisej moneki tikitasej kenijkatsa tijtekiuiaj tonali. Eclesiastés 9:11 kiijtoua: “Tlen ueli tlamantli axkuali ueli kipantis aki ueli tlakatl kema axkichia”. O uelis techpanos se tlamantli uan timikisej.

14, 15. ¿Kenijkatsa uelis kuali tijtekiuisej tonali? (Hebreos 6:11, 12). (Nojkia xikita tlaixkopinkayotl).

¹⁴ Kuali tijtekiuisej tonali tlaj tijchiuaj tlen Jehová kineki uan tijchiuaj kampeka kuali timouikasej iuaya (Juan 14:21). Moneki tijchiuasej tlen Biblia techtlajtolmaka: “Xiitstokaj intemachmej ipan Toteko. Amo xijkauakaj  niyon se tlamantli ma inmechiyokatlalis tlen ya. Nochipa xijchiuakaj nochi nopa tekitl tlen Toueyiteko inmechmaka” (1 Cor. 15:58). Tlaj kiampa tijchiuasej, kema timikisej o toTeotsij kitsontlamiltis tlen amo kuali, amo timoyolkokosej pampa amo timoiljuisej ueltoskia nojua tlauel tijtekipanosej (Mat. 24:13; Rom. 14:8).

¹⁵ Jesús nelia kichiua tlen kiijtojtok, ya kiyakana tlajtolmoyaualistli ipan nochi Tlaltipaktli. Jesús kitekiuia Jehová itlanechikol uan kiampa techmachtia kenijkatsa titlajtolmoyauasej, tijtekiuisej amatlajkuiloli uan videos (Mat. 28:18-20; TNM). Yeka moneki titlajtolmoyauasej uan titlamachtisej ika nochi toyolo, uan nojkia kuali ma titlachixtokaj uan ma tijchiakaj nopa tonali kema toTeotsij Jehová kitsontlamiltis nochi tlen amo kuali. Uelis nochipa timotemachisej ipan tlen tijselisej teipa tlaj tijchiuaj tlen kiijtoua Hebreos 6:11, 12 (xijpoua).

16. ¿Tlake timosentlalijtokej tijchiuasej?

¹⁶ Jehová ya kiixtlalijtok kema kitsontlamiltis nochi tlen Satanás kiyakana. Kema asis nopa tonali, ya kichiuas ma moaxiti nopa tlajtolpanextili tlen eltok ipan Biblia. Uan maske timoiljuiaj tlauel uejkaua, ya nelia kichiuas ma moaxiti tlen kiijtojtok (Hab. 2:3). Yeka timosentlalijtokej tijchiuasej tlen kiijtoua Miqueas 7:7; TNM: “Nelnelia nijchias Jehová ma nechmanaui. NoTeotsij nechtlakakilis”.