1. UJesu wabatshelani abafundi bakhe mayelana lesikhathi sokuphela njalo wabaxwayisa wathini?

 KWATHI sekusele insuku ezilutshwane ukuthi uJesu abulawe, abafundi bakhe abane bambuza bathi: ‘Sizakuba yini isibonakaliso sesiphetho somumo lo wezinto?’ (Mat. 24:3) Kumele ukuthi abafundi labo babezibuza ukuthi babezabona ngani ukuthi umumo wezinto wamaJuda wawusuzaphela. UJesu wathi ebaphendula wabatshela ngokuphela komumo lowo waphinda wabatshela ‘ngesiphetho somumo lo wezinto’ esiphila kuwo lamuhla. Wathi ekhuluma ngesikhathi sokuphela wathi: “Kakho olaziyo lelolanga kumbe lelohora, kwala zona izingilosi ezulwini ngitsho leNdodana, kodwa nguBaba olaziyo.” Ngemva kwalokho waxwayisa bonke abafundi bakhe ukuthi ‘bahlale bephapheme’ lokuthi ‘bahlale belindile.’—Mak. 13:32-37.

2. Kungani kwakuqakathekile ukuthi amaKhristu okuqala ahlale ephapheme?

² AmaKhristu akuqala ayengamaJuda kwakumele ahlale ephapheme ukuze asinde. UJesu wawatshela izinto ezazizawanceda abone ukuthi umumo wezinto wamaJuda ususiya ekupheleni. Wathi: “Lingabona iJerusalema isigonjolozelwe ngamabutho, yazini ukuthi ukutshabalaliswa kwayo sekusondele.” Ngalesosikhathi kwakumele balalele amazwi kaJesu ‘besebeqalisa ukubalekela ezintabeni.’ (Luk. 21:20, 21) Abalalelayo basinda ngesikhathi amaRoma etshabalalisa iJerusalema.

3. Sizaxoxa ngani esihlokweni lesi?

 ³ Siphila esikhathini sokuphela komumo lo wezinto omubi. Yikho lathi kumele sisebenzise kuhle izingqondo zethu futhi siqaphele. Esihlokweni lesi sizaxoxa ngokuthi kumele senzeni nxa sibona okwenzakala emhlabeni. Sizaxoxa langokuthi singananzelela njani esikwenzayo lokuthi singasisebenzisa njani isikhathi esiseleyo.

4. Kungani sifuna sibili ukwazi ukuthi izinto ezenzakalayo zisigcwalisa njani isiphrofetho esiseBhayibhilini?

⁴ Siyafuna sibili ukwazi ukuthi izinto ezenzakala emhlabeni zisigcwalisa njani isiphrofetho esiseBhayibhilini. Ngokwesibonelo, uJesu wasitshela izinto ezazizakwenzakala ezazizasinceda sikwazi ukuthi ukuphela komumo wezinto kaSathane sekusondele. (Mat. 24:3-14) Umphostoli uPhetro wasikhuthaza ukuthi sinanzelele indlela isiphrofetho esigwaliseka ngayo ukuze sihlale silokholo oluqinileyo. (2 Phet. 1:19-21) Ibhuku lokucina leBhayibhili liqalisa ngamazwi la athi: “Isambulo esethulwa nguJesu Khristu, asiphiwa nguNkulunkulu ukuze atshengise izinceku zakhe izinto okufanele zenzakale masinyane.” (Isam. 1:1) Yikho sifuna kakhulu ukwazi ukuthi izinto ezenzakala emhlabeni namuhla zisigcwalisa njani isiphrofetho esiseBhayibhilini. Kanti njalo singabe sikutshisekela ukuxoxela abanye izinto lezi.

5. Kuyini okungamelanga sikwenze futhi kuyini okumele sikwenze? (Khangela lemifanekiso.)

⁵ Nxa sixoxa ngeziphrofetho eziseBhayibhilini akumelanga sikhulume izinto esingelaqiniso lazo. Phela asifuni ukukhuluma izinto ezingenza ukuthi kube lokwehlukana ebandleni. Ngokwesibonelo, singezwa abakhokheli bekhuluma ngokuthi bangazilungisa njani izingxabano besebeletha ukuthula lokuvikeleka. Kulokuthi sihle sizitshele ukuthi lokho kugcwalisa isiphrofetho esiku-1 Thesalonika 5:3, kumele sikhangele lokho okuyabe kusanda kukhitshwa yinhlanganiso kaJehova. Nxa esikukhulumayo kuvela kulokho okukhitshwa yinhlanganiso, siyabe sinceda ukuthi ibandla lihlale limanyene futhi ‘licabanga ngendlela efananayo.’—1 Khor. 1:10; 4:6.

6. Sifundani ku-2 Phetro 3:11-13?

⁶ Bala u-2 Phetro 3:11-13. Umphostoli uPhetro uyasinceda sibone lokho okumele sikwenze nxa sihlola iziphrofetho eziseBhayibhilini. Uthi kumele ‘siqhubeke sikukhumbula ukuba khona kosuku lukaJehova.’ Ngenxa yani? Ngenxa yokuthi sifuna ukusebenzisa leso sikhathi esiseleyo ukuthi senze ‘ukuziphatha kwethu kube ngcwele njalo senze imisebenzi yokuzinikela kuNkulunkulu’ hatshi ukuthi sidinge ukuthi linini “lelolanga lalelohora” uJehova azaletha ngalo i-Amagedoni. (Mat. 24:36; Luk. 12:40) Ngamanye amazwi sifuna ukuhlala siziphatha kuhle futhi sisiba leqiniso lokuthi konke esikwenzela uJehova sikwenza ngenxa yokuthi siyamthanda. Yikho kuqakathekile ukuthi sinanzelele esikwenzayo.

7. Sitshengisa njani ukuthi siyananzelela indlela esenza ngayo? (ULukha 21:34)

⁷ UJesu watshela abalandeli bakhe ukuthi bananzelele izinto ezenzakala emhlabeni baphinde bananzelele indlela abenza ngayo. Lokhu kuyacaciswa emazwini akuLukha 21:34. (Bala.) UJesu wathi: “Nanzelelani.” Umuntu onanzelela indlela enza ngayo uyaqaphela  loba yiphi ingozi engaphambanisa ubungane bakhe loJehova abesezama ngamandla ukuyibalekela. Nxa esenza njalo uyabe ezigcina esethandweni lukaNkulunkulu.—Zaga. 22:3; Jud. 20, 21.

8. Umphostoli uPhawuli wawaxwayisa esithini amaKhristu?

⁸ Umphostoli uPhawuli watshela amaKhristu ukuthi aqaphele. Ngokwesibonelo, watshela amaKhristu ase-Efesu wathi: “Nanzelelani lingenzi njengabantu abangahlakaniphanga kodwa yenzani njengabahlakaniphileyo.” (Efe. 5:15, 16) USathane uhlala ethiyile efuna ukuphambanisa ubungane bethu loJehova. Yikho iBhayibhili lisitshela ukuthi ‘siqhubeke siqedisisa lokho okuyintando kaJehova’ ukuze senelise ukulwisana lemijibila kaSathane.—Efe. 5:17.

9. Kuyini okuzasinceda ukuthi siyazi intando kaJehova?

⁹ IBhayibhili alisitsheli zonke izinto ezingaphambanisa ubungane bethu loJehova. Izikhathi ezinengi kuyabe kumele senze izinqumo ezimayelana lezinto ezingekho eMibhalweni. Yikho kumele siqedisise kumbe sikwazi “lokho okuyintando kaJehova” ukuze sikhethe kuhle. Lokho singakwenza ngokubala iBhayibhili nsuku zonke langokucabangisisa ngalo. Nxa singaqhubeka sizwisisa intando kaJehova futhi sizama lokuba ‘lengqondo kaKhristu’ kuzakuba lula ukuthi senze “njengabahlakaniphileyo” lanxa kungelamthetho ocacileyo ngendaba ethile. (1 Khor. 2:14-16) Ezinye izingozi zisegcekeni kodwa ezinye zicatshile.

10. Yiziphi ezinye izingozi okumele sizibalekele?

¹⁰ Ezinye izingozi okumele sizibalekele yikudlala ngothando, ukunatha sedlulise, ukudla kakhulu, ukukhuluma izinto ezizwisa abanye ubuhlungu kanye lokubukela izinto ezilodlakela lephonografi lokunye okuhambelana lalokho. (Hubo. 101:3) Isitha sethu uDeveli sihlala sithiyile sidinga amathuba okuphambanisa ubungane bethu loJehova. (1 Phet. 5:8) Nxa singayekela ukunanzelela, uSathane angafaka engqondweni zethu lasezinhliziyweni zethu inhlanyelo yomona, ukungathembeki, ubuhwaba ukuzonda abanye, ukuzikhukhumeza kanye lokubamba izikhwili. (Gal. 5:19-21) Singaqalisa sibona angathi imicabango le ayisiyo ngozi. Kodwa nxa singayekela ukuyisiphuna masinyane izaqhubeka ikhula njengesihlahlakazana esibulalayo besekubangela ukuthi thina siphambuke.—Jak. 1:14, 15.

11. Yiphi ingozi ecatshileyo okumele siyibalekele futhi kungani?

¹¹ Eyinye ingozi ecatshileyo okumele siyibalekele yikuba labangane abangayisibo. Ake sithi usebenza lomunye umuntu ongayisuyeFakazi. Uba lomusa emuntwini lo umncedise ngalokhu lalokhuyana ngoba ufuna abone ukuthi oFakazi bakaJehova ngabantu abalungileyo. Ngezinye izikhathi uze udle laye. Kungakayi ngaphi seliqalisa ukudla lonke phose nsuku zonke. Umuntu lo uyahlalahlala aphosele indaba zemacansini futhi ekuqaliseni awumphenduli. Kodwa ngokuhamba kwesikhathi wena uyakujayela lokho ucine ungaselandaba lakho. Ngelinye ilanga umuntu lo osebenza laye uyakucela ukuthi keliyenatha lingatshayisa emsebenzini, ubusuvuma. Ucina usucabanga njengaye futhi ususenza njengaye. Lanxa silomusa futhi sibahlonipha abantu bonke kumele sikhumbule ukuthi sicina silingisela abantu esitshona labo. (1 Khor. 15:33) Nxa singalalela amazwi kaJesu sinanzelele lendlela esenza ngayo asisoze sijayelane  labantu abangalandeli izimiso zikaJehova. (2 Khor. 6:15) Sizabona ingozi besesiyibalekela.     

12. Abafundi bakaJesu kwakumele benzeni besalindele isiphetho somumo wezinto?

¹² Abafundi bakaJesu kwakungamelanga bagoqe izandla besamelele isiphetho somumo wezinto. UJesu wabanika umsebenzi wathi batshumayele izindaba ezinhle “eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:6-8) Lo wawungumsebenzi omkhulu sibili! Abalandeli bakaJesu basebenzisa kuhle isikhathi sabo ngokukhuthala emsebenzini lo.

13. Kungani kumele sisisebenzise kuhle isikhathi sethu? (UKholose 4:5)

¹³ Bala uKholose 4:5. Okuzasinceda sinanzelele indlela esenza ngayo yikucabangisisa ngokuthi sisisebenzisa njani isikhathi sethu. Sonke singafikelwa ‘yizehlakalo ezisijuma silibele.’ (Umtshu. 9:11) Elokufa kalitsheli.

14-15. Singasisebenzisa njani isikhathi sethu? (UHebheru 6:11, 12) (Khangela lomfanekiso.)

¹⁴ Singasebenzisa kuhle isikhathi sethu ngokwenza intando kaJehova langokuqinisa ubungane bethu laye. (Joh. 14:21) Kumele ‘sime siqine singanyikinyeki, sihlale sisenza  okunengi emsebenzini weNkosi.’ (1 Khor. 15:58) Nxa singakwenza lokhu asisoze sizisole nxa ukuphela sekufika, kungabe kuyikuphela kwempilo yethu kumbe okomumo lo wezinto omubi.—Mat. 24:13; Rom. 14:8.

¹⁵ UJesu ulokhu ekhokhela abafundi bakhe emsebenzini wokutshumayela ngoMbuso kaNkulunkulu owenziwa emhlabeni wonke. Usigcinile isithembiso sakhe. Usebenzisa inhlanganiso kaJehova ukuze asifundise ukutshumayela njalo uyasinika konke esikudingayo ukuze sitshele abanye izindaba ezinhle. (Mat. 28:18-20) Osekusele yikuthi thina sikhuthale emsebenzini wokutshumayela lokufundisa futhi sihlale siphapheme sisalindele ukuthi uJehova aqede umumo lo wezinto. Nxa singalalela amazwi akuHebheru 6:11, 12 sizagagadlela ithemba lethu “kuze kube sekucineni.”—Bala.

16. Uzimisele ukwenzani?

¹⁶ UJehova uselibekile ilanga lehora lapho azasusa khona umhlaba kaSathane. Ngalesosikhathi uzazigcwalisa zonke iziphrofetho eziseLizwini lakhe. Kodwa kwezinye izikhathi singacabanga ukuthi ukuphela komumo lo wezinto sekuphuzile. Lanxa kunjalo usuku lukaJehova “alusoze luphuze!” (Hab. 2:3) Yikho asizimiseleni ‘ukuqhubeka simelele uJehova’ sitshengisa ukuthi ‘simlindele ngesineke uNkulunkulu uMsindisi wethu.’—Mik. 7:7.