1. (a) Yesu abere akakania oko nduli y’ekihugho, mwabwira abigha biwe boki? (b) Kandi mwababwira ati litolere ibakolaki?

 EBIRO bike embere Yesu ahole, abigha biwe bani mubamubulya bati: ‘Ekiminyikalo ky’erihwererera ly’emigulu eyi ni kyahi?’ (Mat. 24:3) Alinga abigha abo babya banzire eriminya omuyi we Yerusalema n’ehekalu nga byasyatsandibwa mughulu wahi. Omwibasubirya, Yesu mwababwira ngoko eYerusama n’ehekalu byasyatsandibwa. Kandi, mwakania ‘n’okwihwererera ly’emighulu eyi,’ nibughambu ebiro ebyo tulimo munabwire. Yesu akakania oko biro by’enduli, mwabugha ati: “Nikwa sihali mundu oyo wasi erihika ly’ekiro ekyo kutse endambi eyo​—nomo bangabya bamalaika omo lubula kutse Omugala, nina Tata yunasi iyowene.” Neryo mwabwira abigha biwe bosi ati ‘bateghaye’ kandi ati ‘balebaye.’​—Mar. 13:32-37.

2. Busanaki Abakristo b’erimbere babya batolere eriteya?

² Abakristo Abayahudi ab’omo karne k’erimbere babya batolere ibateya batoke erilama. Yesu mwabwira abigha biwe ebyangabawatikirye eriminya omughulu omuyi we Yerusalema n’ehakalu byangatsandibwe. Mwabwirabo ati: “Omugulu mukalangira eYerusalema iyinatimbirweko n’emilondo y’amalwa, neryo imwaminya erihera lyago ko lyamabihika hakuhi.” Oko mughulu oyo, babya batolere ibakwama erihano lya Yesu ‘n’erisaghira oko bitwa.’ (Luka 21:20, 21) Abakwama erihano lya Yesu mubalama omughulu Abaroma batsandaya omuyi we Yerusalema.

3. Tukendighaki omo mwatsi ono?

 ³ Munabwire, tuli oko nduli y’ekihugho kibi kino. Netu litolere itwateya n’erilebya. Omo mwatsi ono, tukendigha ngoko twangabya n’amalengekania awatolere omughulu tukakwama ebinemulaba omo kihugho. Kandi, tukendigha ngoko twangayiteya itwibene-bene n’erikolesya ndeke endambi eyikisiyaho.

4. Busanaki tukanza eriminya ebinemulaba omo kihugho nga bikabereraya biti amaminyereri w’eBiblia?

⁴ Tukanza eriminya ebinemulaba omo kihugho nga binemuberererya biti amaminyereri w’eBiblia. Busanaki? Kundi Yesu mwakania oko myatsi eyangatuwatikya eriminya ngoko ekihugho kya Sitani kikisiya ikyahwaho. (Mat. 24:3-14) Omukwenda Petero mwatubwira ati litolere itwabya tukalebya ngoko amaminyereri w’eBiblia anemubererera kundi ekyo kyanganaleka obwikirirya bwetu ibwabya ibunasikire. (2 Pet. 1:19-21) Ekitabu ky’Eribisulirwa kikatsuka kitya: “Eribisula eri [oMungu ahalyo Yesu Kristo] erikumbulira abagombe buwe emyatsi eyikendisyabya luba.” (Erib. 1:1) Eyo ye myatsi eyikaleka itwanza kutsibu eriminya ebinemulaba omo kihugho nga binemuberererya biti amaminyereri w’eBiblia. Kandi, tukanza erikania kubyo n’abandi.

5. Siritolere itwakolaki, aliwe litolere itwakolaki? (Ulebaye n’esyopitsa.)

⁵ Aliwe, omughulu tukakanaya oko maminyereri w’eBiblia, siritolere itwabya tukayipikira-pikira emyatsi. Busanaki? Kundi ekyo kyanganaleka endeko iyaghabana. Ng’eky’erileberyako, twanganowa abakulu b’ekihugho bakakania ngoko bakendisogha olubanza lulebe n’erileta obuholo n’embolere. Omo mwanya w’eriyipikira-pikira emyatsi n’eribugha tuti ebyo balyabugha bikaberereraya ebiri omo 1 Abanya Tesalonika 5:3, litolere itwasonda eriminya endondeka ya Yehova nga yabirikania yiti oko mwatsi oyo. Ebyo tukabugha byamabya ibihambene n’ebyo endondeka ya Yehova yabiribugha, ekyo ikikendileka endeko iyabya ‘ikabugha kighuma.’​—1 Kor. 1:10; 4:6.

6. Ebiri omo 2 Petero 3:11-13 bikatwighisayaki?

⁶ Soma 2 Petero 3:11-13. Omo risako eryo, omukwenda Petero akatuwatikaya eribya n’amalengekania awatolere omughulu tukigha amaminyereri w’eBiblia. Akatubwira ati ‘tubye tukahatania erihika ly’ekiro ky’oMungu.’ Busanaki? Sibughambu kundi twanzire eriminya “ekiro n’endambi” eyo Yehova akendisyaleta eArmagedoni. Aliwe kundi twanzire eribya bandu “b’emigendere ibuyirire n’erikenga [oMungu]” omo ndambi eyikisiyaho. (Mat. 24:36; Luka 12:40) Nibughambu, twanzire eribya n’emighendere eyuwene n’erilebya eryanza Yehova nga lyo linemutukuna omo byosi ebyo tukakolera Yehova. Ekikendituwatikya erikola tutya, ry’eribya tukayilebya.

7. Eriyiteya ry’erikolaki? (Luka 21:34)

⁷ Yesu mwabwira abigha biwe ati babye bakalebya ebinemulaba omo kihugho, n’eriyiteya. Tukalangira ekyo omo rihano riwe eriri omo Luka 21:34. (Soma.) Omo risako eryo, Yesu mwabugha ati: “Muyitegaye.” Eriyiteya ry’eriminya luba omwatsi owangatsandya obwira bwetu na Yehova n’eriyikasa eritendikolagho. Erikola tutya likendituwatikya eriyibika omo lwanzo lwa Yehova.​—Emi. 22:3; Yuda 20, 21.

8. Omukwenda Paulo mwabwira Abakristo boki?

 ⁸ Omukwenda Paulo mwabwira Abakristo ati bayiteghaye. Eky’elireberyako, mwabwira Abakristo b’eEfeso ati: “Muyitegaye ndeke, simusibe nga bandu bakiru, nikwa nga bandu b’amenge.” (Efe. 5:15, 16) Oko buli ndambi, Sitani akabya inyanemusondya eritsandya obwira bwetu na Yehova. Kyo kikaleka eBiblia iyatuhana yiti: “Musondaye [eriminya] ekyo Mukama anzire imwakola.” Erikola tutya lyanganatuwatikya eritendihambwa omo bitegho bya Sitani.—Efe. 5:17.

9. Ekyangatuwatikya eriminya ekyo Yehova anzire itwakola niki?

⁹ EBiblia siyiritubwira obuli kindu ekyangatsandya obwira bwetu na Yehova. Kangyi-kangyi tukayisogha oko myatsi eyitakanibweko burora-rora omo Biblia. Ekikendituwatikya eriyisogha ndeke ly’eriyikasa eriminya ekyo Yehova anzire itwakola. Ekyangatuwatikya erikola tutya ry’erigha eKinywa ky’oMungu n’erilengekania kukyo ko buli. Twamayikasa eriminya ekyo Yehova anzire itwakola n’eriyikasa eribya ‘n’obulengekania bwa Kristo,’ itukendibya “bandu b’amenge,” nibya n’omughulu sihali omughambo owangatuwatikya eriminya eky’erikola. (1 Kor. 2:14-16) Hakanabya omughulu itwalw’itwaminya ekyo twangakola. N’oko yindi ndambi, ikyakala.

10. Ni myatsi yahi eyangatsandya obwira bwetu na Yehova?

¹⁰ Hane emyatsi eyangatsandya obwira bwetu na Yehova. Emyatsi eyo yeno: Erikola obwira n’omundu, iwabya nga ukenditahania naye, kwesi iko bite bitya; eritamira, erirya binene, eribugha ebikahutalaya abandi, erilebya emyatsi y’amalwa, eponografia, n’emyatsi eyiring’eyo. (Esy. 101:3) Enzighu yetu, Sitani, yikabya iyinemusondekania ehyanya hy’eritsandya obwira bwetu na Yehova. (1 Pet. 5:8) Twamatendiyiteya, Sitani inianganatuhiramo eritsuro, amabehi, omururu, eripona abandi, eriyiheka, n’eribika ekinigha. (Gal. 5:19-21) Emibere eyi ikalasa omo mitima yetu mo lyolo-lyolo. Aliwe, twamatendikula yomo luba, iyikendikulira omw’itwe n’eritutsandya ng’oko olutswamba lukalasa omw’irima n’eritsandya ebyalya ebirimo.​—Yak. 1:14, 15.

11. Ni mwatsi wahi owangatsandya lyolo-lyolo obwira bwetu na Yehova, kandi busanaki?

¹¹ Eribya n’abira babi lyanganatsandya lyolo-lyolo obwira bwetu na Yehova. Lengekanaya okw’eki. Wanganabya ighukakola n’omundu oyute Mwimiri wa Yehova. Wanzire inyabya n’amalengekania awuwene oko Bimiri ba Yehova. Neryo iwabya ukamuwatikya n’erimukolera ndeke. Wanganabya ukalya naye akalyo k’eritungyi kiro kighuma-kighuma. Ebiro bikalaba, imwabya mukalya naye biro byosi. Mukalya, neryo inyakania oko myatsi y’obusingiri n’oburaghane. Oko nzuko, wanganabya nga sighutsomene. Aliwe ebiro bikalaba, iwabeghera emikania eyiri ng’eyo n’eritsemerayo. Neryo kiro kighuma, inyayakughulira akatsupa. Iwaligha. Lyolo-lyolo, iwatsuka eribya ukalengekania ng’aye. Ukalengekanaya ghuti hakendilaba mughulu muli imuwatsuka eribya ukakola ng’aye? Ni kwenene, tukasikaya obuli mundu n’erimukolera ndeke. Aliwe, litolere itwabya itunibukire ngoko omundu akasosa oyo akasiba naye. (1 Kor. 15:33) Twamayiteya ngoko Yesu atuhana, itukendiyihighula oko bira babi abatesikaya emighambo ya Yehova. (2 Kor. 6:15) Kandi, itukendiminya emyatsi eyangatsandya obwira bwetu na Yehova, n’eriyihighula kuyo.

12. Abigha ba Yesu babya batolere ibakolaki bakalindirira enduli y’ekihugho yihike?

¹² Yesu anzire abigha biwe ibalindirira enduli y’ekihugho kino ibane n’emyatsi mingyi y’erikola. Kyo kyaleka inyabaha omubírí w’erikola. Mwabwirabo ati batulaghanaye engulu mbuya “eYerusalema n’omo Yudea yosi, n’eSamaria, n’erihika oko nduli-nduli sy’ekihugo.” (Emib. 1:6-8) Oyo ni mubírí munene! Abigha ba Yesu bangakolesirye endambi yabo yo ndeke omwiyitsinga erikola omubírí oyo.

13. Busanaki ni ky’omughaso erikolesya endambi yetu yo ndeke? (Abanya Kolosai 4:5)

¹³ Soma Abanya Kolosai 4:5. Hane oghundi mwatsi owangakangania nga tunemuyiteya: Litolere itwalebya kutsibu nga tukakolesaya endambi yetu yo tuti. Emyatsi eyo tutayilindirireko yanganatuhikira itwe bosi. (Omug. 9:11) Ndambi ni ndambi, twanganahola.

14-15. Twangakolesya tuti endambi yetu yo ndeke? (Abaebrania 6:11, 12) (Ulebaye n’epitsa.)

¹⁴ Tukakolesaya endambi yetu yo ndeke omughulu tukakola ebyo Yehova anzire itwakola n’eriwatya obwira bwetu naye. (Yoa. 14:21) Litolere “itwasika, isitwasega-segana, [kandi itwakola bingyi] omo mubírí w’Omukama.” (1 Kor. 15:58) Twamahola kutse enduli y’ekihugho yamahika itukineho, isitwendisyayikubya  bomo n’ahake.​—Mat. 24:13; Rom. 14:8.

¹⁵ Munabwire, Yesu anemusondola abigha biwe bakatulaghania engulu y’Obwami omo kihugho kyosi. Anemuberererya ebyo alagha. Erilabira emihindano yetu n’ebitsapo byetu, Yesu akatukangiriraya ngoko twangakola omubírí w’eritulira. Kandi, akatuha ebyo tulaghireko tutoke eritulira. (Mat. 28:18-20) Netu litolere itwabya n’omuhwa tukatulira n’erikangirirya. Kandi, litolere itwateya tukalindirira omughulu Yehova akendileta enduli y’ekihugho kibi kino. Twamakwama erihano eriri omo Abaebrania 6:11, 12, itukendimakirira amaha wetu “erihika oko nduli.”​—Soma.

16. Wamayisogha kundu erikolaki?

¹⁶ Yehova abiritekaho ekiro n’endambi eyo akendisyabughaho ekihugho kya Sitani. Ekiro ekyo kyasyabya kyahika, Yehova asyaberererya amaminyereri wosi awali omo Kinywa kiwe. Hanganabya omughulu itwalengekania enduli nga yikine hali. Aliwe, ekiro kya Yehova ‘sikyendisyamala.’ (Hab. 2:3) Neryo tuyisoghe kundu “erilindirira [Yehova] n’omuhwa, n’erilindirira [oMungu] w’erilama lyetu.”​—Mika 7:7.