1. Yesu akagambira ki abeegi be aha obu emperu eraabeho, kandi akabarabura kukora ki?

 HARIKUBURAYO ebiro bikye Yesu akafa, bana aha beegi be bakamubuuza ‘akamanyiso k’okwija kwe n’ak’obunaku obu ensi egi yaabaire neija kuhwaho.’ (Mat. 24:3) Abeegi abo nibabaasa kuba baabaire nibeebuuza oku barikubaasa kumanya obu Yerusaalemu na hekalu byabaire nibiza kucwekyerezibwa. Yesu akabagarukamu arikworeka obu ekyo kyabaire nikiija kubaho n’emperu y’obunaku obu. Yesu akagamba aha bikwatiraine n’obwire bw’emperu arikugira ati: “Kwonka eby’ekiro ekyo n’obunaku obwo tihaine orikubimanya, n’obu baakuba baamaraika ab’omu iguru, n’obu yaakuba Omwana, kureka Ishe wenka.” Kandi akarabura abeegi be boona ‘kuguma nibareeba.’—Mak. 13:32-37.

2. Ahabw’enki kyabaire kiri kikuru kugira ngu abaabaire nibatuura Buyudaaya bagume nibareeba?

² Abakristaayo Abayudaaya b’omu kyasha ky’okubanza bakaba baine kukuguma nibareeba, kubaasa kuhonokaho. Yesu akagambira abakuratsi be kuteeraho kureeba akamanyiso kumanya obu Yerusaalemu yaabaire neeza kucwekyerezibwa. Akagira ati: ‘Ku murireeba Yerusaalemu eyehinguririziibwe engabo, obwo nimwija kumanya ngu okuhwerekyerera kwayo kuri haihi. Obwo abari Buyudaaya bahungire omu nshozi, n’abariba bari omu rurembo bashohore, n’abariba bari omu byaro batarirutaahamu.’ (Luk. 21:20, 21) Abaataire  omutima aha kurabura okwo bakahonokaho obu Abarooma baacwekyereza Yerusaalemu.

3. Nituza kugamba ahari ki omu kicweka eki?

³ Turi omu bwire bw’emperu obw’entebeekanisa y’ensi egi. Eki nikimanyisa ngu naitwe tushemereire kwerinda kandi tukaguma nitureeba. Omu kicweka eki, nituza kureeba oku turikubaasa kugira emiteekateekyere eringaniire aha birikubaho omu nsi, oku turikubaasa kwerinda omu bi turikukora, n’okukoresa gye obwire obutsigaireyo.

4. Ahabw’enki twine ekihika ky’okumanya oku ebirikubaho omu nsi birikuhikiiriza obunabi bwa Baibuli?

⁴ Twine enshonga ehikire ahabw’enki nitufayo kumanya oku ebirikubaho omu nsi birikuhikiiriza obunabi bwa Baibuli. Nk’eky’okureeberaho, Yesu akagamba aha byabaire nibiza kubaho kutuhwera kumanya ngu emperu y’ensi embi ya Sitaane eri haihi. (Mat. 24:3-14) Entumwa Petero akatuhiga kuta omutima aha kuhikiirira kw’obunabi kugira ngu tugume twine okwikiriza kuhami. (2 Pet. 1:19-21) Ekitabo kya Baibuli ekirikuhererukayo nikitandika n’ebigambo ebi: “Ebyashuurwirwe Yesu Kristo, ebi Ruhanga yaamuhaire kworeka abahuuku be ebyabaire nibyenda kubaho juba.” (Kush. 1:1) N’ahabw’ekyo nitufayo kumanya ebirikubaho omu nsi n’okureeba oku birikuhikiiriza obunabi bwa Baibuli. Kandi nituba twine ekihika eky’okubigaaniiraho na bagyenzi baitu.

5. Twine kwetantara ki, kwonka twine kukora ki? (Reeba n’ebishushani.)

⁵ Kwonka twaba nitugaaniira aha bunabi bwa Baibuli, twine kwetantara kuteebereza aha kiraabeho. Ahabw’enki? Ahakuba titurikwenda kugamba ekintu kyona ekirikubaasa kuteganisa obumwe bw’ekibiina. Nk’eky’okureeberaho, nitubaasa kuhurira abeebembezi b’amahanga barikugamba oku baraahezeho emihondano, reero bakareetaho obusingye n’oburinzi. Omu mwanya gw’okuteebereza ngu ebigambo ebyo biriyo nibihikiiriza obunabi oburi omu 1 Abatesalonika 5:3, twine kuguma tutaire omutima aha butumwa busya obu turikuheebwa. Ebi turikugaaniiraho twabyegamiza aha biri omu bitabo byaitu, nituhwera ekibiina kuguma kiine obumwe ‘omu bi kirikuhamya.’—1 Kor. 1:10; 4:6.

6. Ni mashomo ki agu turikwega omuri 2 Petero 3:11-13?

⁶ Shoma 2 Petero 3:11-13. Entumwa Petero naatuhwera kugira emiteekateekyere mirungi twaba nitushwijuma obunabi bwa Baibuli. Naatuhiga kuguma ‘tutegyereize ekiro’ kya Yehova. Ahabw’enki? Tihabw’okugira ngu nitwenda kumanya eizooba n’eshaaha obu Yehova araareete Haramagedoni, kureka nitwenda kukoresa gye obwire obutsigaireyo ‘kuba abarikwera kandi abarikutiina Ruhanga omu mitwarize yaitu.’ (Mat. 24:36; Luk. 12:40) Ekirikumanyisa ngu, twine kuguma twine emitwarize mirungi kandi tukahamya ngu byona ebi turikukora omu buheereza bwaitu nibyoreka ngu nitukunda Yehova. Kubaasa kuguma nitureeba, twine kwerinda omu bi turikukora.

7. Nitworeka tuta ngu nitwerinda omu bi turikukora? (Luka. 21:34)

⁷ Yesu akagambira abeegi be kwerinda omu bi barikukora n’ebirikubaho omu nsi. Ekyo nikyorekwa gye omu kurabura okuri  omuri Luka 21:34. (Kishome.) Yesu akagira ati: “Mwerinde.” Omuntu omwerinzi naateeraho kumanya akabi akarikubaasa kushiisha omukago gwe na Yehova, kandi ateeraho kuketantara. Omu muringo ogwo, naaguma ayerindiire omuri rukundo ya Ruhanga.—Enf. 22:3; Yud. 20, 21.

8. Entumwa Paulo akahiga Abakristaayo kukora ki?

⁸ Entumwa Paulo akeehanangiriza Abakristaayo kwerinda. Nk’eky’okureeberaho, akagambira Abakristaayo ba Efeso ati: “Mwerinde, mumanye oku murikugyenda, mutagyenda nk’abataine bwengye, kureka nk’abanyabwengye.” (Efe. 5:15, 16) Butoosha Sitaane naateeraho kushiisha omukago gwaitu na Yehova, niyo nshonga ahabw’enki Baibuli neeturabura ‘kumanya buzima ebi [Yehova] arikwenda’ kubaasa kwerinda emitego ya Sitaane.—Efe. 5:17.

9. Nitubaasa kumanya tuta ebi Yehova arikukunda?

⁹ Baibuli terikugamba buri kimwe ekirikubaasa kushiisha omukago gwaitu na Yehova. Haine enshonga ezi twine kwecweramu ezitarikugambwaho butunu omu Byahandiikirwe. Kubaasa kucwamu gye, twine kumanya gye ebi Yehova “arikwenda.” Eki nitubaasa kukikora turikweyegyesa Ekigambo kya Ruhanga butoosha kandi tukakiteekateekaho. Oku turikwongyera kumanya gye ebi Yehova arikukunda ‘n’emiteekateekyere ya Kristo,’ nikwo turikwongyera kugyenda “nk’abanyabwengye,” na haaba hatariho musingye ogu twine kugyenderaho. (1 Kor. 2:14-16) Kyorobi kumanya ebintu ebimwe, kwonka ebirikukira obwingi bigumire kumanya.

10. Ni bintu ki ebi twine kwetantara?

¹⁰ Ebintu ebimwe ebi twine kwetantara nibitwariramu, okweshunga, okurya munonga, okugamba ebirikusaasa abandi, okureeba eby’okushemeza eby’obushaarizi, ebirikwitsa enshoni n’ebindi nk’ebyo. (Zab. 101:3) Omuzigu waitu Omuregi, naaguma naasherura oburyo bw’okushiisha omukago gwaitu na Yehova. (1 Pet. 5:8) Twaremwa kuguma nitureeba, Sitaane naabaasa kubyara omu biteekateeko n’omu mitima yaitu eihari, obugobya, omururu, rwango, amaryo, n’okubiika enziika. (Gal. 5:19-21) Omu kubanza, noobaasa kutamanya ngu emiteekateekyere egi n’ey’akabi. Kwonka twaba tutarahukire kugyeihamu, neegumizamu neekura nk’ekimera ky’obutwa neetureetera oburemeezi.—Yak. 1:14, 15.

11. Ni kintu ki ekitarikureebwa butunu eki twine kwetantara, kandi ahabw’enki?

¹¹ Ekintu kimwe eky’akabi ekitarikureebwa butunu n’emikago mibi. Teekateeka aha mbeera egi. Aha murimo nookora n’omuntu otarikuheereza Yehova. Nooyenda ngu agire emiteekateekyere mirungi aha Bajurizi ba Yehova, n’ahabw’ekyo omugirira embabazi kandi omuhwera. Noobaasa n’okwikiriza kuguma noorya nawe kyamushana. Omu bwire bukye, otandika kurya nawe kyamushana butoosha. Kandi, atandika kugaaniira ebitashemeire, kwonka oteeraho kubyehuzya. Bwanyima y’obwire, ebi arikugaaniira naiwe bireka kukuteeza entsibo. Reero eizooba rimwe, omuntu ogwo akweta kunywa nawe bwanyima y’okukora, kandi oikiriza. Empereruka, otandika kugira emiteekateekyere nk’eye. Mbwenu shi nikiija kutwara obwire burikwingana ki kutandika kutwaza nkawe? Nitugirira abandi embabazi kandi tubaha ekitiinisa, kwonka twine kwijuka ngu abu turikumara nabo obwire nibabaasa kutureetera kutwaza nkabo. (1 Kor. 15:33) Twayerinda nk’oku Yesu yaatuhigire, nitwija kwetantara kumara  obwire n’abatarikugyendera aha mitindo ya Yehova. (2 Kor. 6:15) Nitwija kumanya ekintu kandi tubaase kukyetantara.

12. Abeegi ba Yesu bakaba baine kukora ki obwo bategyereize emperu kuhika?

¹² Abeegi ba Yesu bakaba baine kugira bingi by’okukora obwo bategyereize emperu kuhika. Yesu akabaha omurimo gw’okukora. Akabagambira kubuurira amakuru marungi ‘omuri Yerusaalemu, Buyudaaya yoona, Samaria, n’okuhitsya aha muheru gw’ensi.’ (Byak. 1:6-8) Abakuratsi ba Yesu bakatunga obujunaanizibwa buhango. Nibakora kyona eki barikubaasa kubuurira abandi, barikukoresa gye obwire bwabo.

13. Ahabw’enki twine kukoresa gye obwire bwaitu? (Abakolosai 4:5)

¹³ Shoma Abakolosai 4:5. Kubaasa kwerinda, twine kushwijuma oku turikukoresa obwire bwaitu. “Obunaku n’ebihikiirizi” nibibaasa kutuhikaho twena. (Mub. 9:11) Nitubaasa kufa kitaraariire.

14-15. Nitubaasa kukoresa gye tuta obwire bwaitu? (Abaheburaayo 6:11, 12) (Reeba n’ekishushani.)

¹⁴ Nitubaasa kukoresa gye obwire bwaitu turikukora ebi Yehova arikukunda, kandi turikuhamya omukago gwaitu nawe. (Yoh. 14:21) Twine ‘kuhama, turekye kunyiganyigibwa,  tweyongyere obutoosha kukora omurimo gwa Mukama.’ (1 Kor. 15:58) Obwo, emperu yaahika, yaaba ey’amagara gaitu nari ey’ensi egi gahwaho, titurikwija kwefuuza.—Mat. 24:13; Rom. 14:8.

¹⁵ Yesu naagumizamu kuha obuhabuzi abeegi be baaba nibabuurira aha Bukama bwa Ruhanga omu nsi yoona. Ahikiirize eki yaaragaaniise. Kurabira omu kibiina kya Yehova, Yesu naatutendeka oku turikubaasa kubuurira kandi naatuha ebikoreso ebirikwetengyesa kujanjaaza amakuru marungi. (Mat. 28:18-20) Nitukora eki tushemereire kukora turikuba abeeziriki omu kubuurira n’okwegyesa, kandi turikuguma nitureeba omu by’omwoyo obwo tutegyereize Yehova kureeta emperu. Twagyendera aha buhabuzi oburi omu Abaheburaayo 6:11, 12, nitwija kuhamira aha amatsiko gaitu “kuhitsya aha muheru.”—Kishome.

16. Tumaririire kukora ki?

¹⁶ Yehova ataireho ekiro n’eshaaha obu araacwekyereze entebeekanisa y’ensi ya Sitaane. Ekiro ekyo kukirahikye, Yehova naija kuhikiiriza obunabi obu yaahandiikiise omu Kigambo kye. Ekyo kitakabaireho, nitubaasa kuteekateeka ngu emperu y’ensi egi ekyerereirwe. Kwonka, ekiro kya Yehova ‘tikirikwija kukyerererwa!’ (Hab. 2:3) N’ahabw’ekyo ka tumariirire kuguma tutaire ‘amaisho gaitu’ ahari Yehova, ‘tutegyereize Ruhanga w’okujunwa [kwaitu].’—Mik. 7:7.