1. Ngera ngdilu Jesus el mora redisaiplo er ngii el kirel a taem er a ulebongel, e ngera ngmilengelechel er tir el mo meruul er ngii?

 SESEI el klebesei er a uchei er a lemad a Jesus e a reteua el disaiplo er ngii a dilu er ngii el kmo: “Ka msbedemam el kmo . . . ngera mo olechotel . . . ulebongel er a beluulchad.” (Mt. 24:3) Tirka el disaiplo a locha millatk el kmo te mekera mo medengei el kmo ngmochu nguemed a Jerusalem me a templo. Me a Jesus er a longer er tir e ngdimlak di louchais el kirel okngemedel a Jerusalem me a templo ngdirrek uluuchais er a mo “ulebongel er a beluulchad” er kid er chelecha el taem. A Jesus a millekoi el kirel a taem er a ulebongel el kmo: “Ng diak a medengelii sel sils ma lechub e ng sel sikang a le mei, ng ka le anghel er a eanged, ma lechub e ng Ngalek; ngdi tal Chedam a medengelii.” E milengelechel er a redisaiplo er ngii el kmo bo le ‘klekar.’​—Mk. 13:32-37.

2. Ngera uchul me ngkmal mle klou a ultutelel el rekot el Kristiano a di klekar?

² A Rechijudea el Kristiano a mle kirir el di klekar, e le klengar er tir a mle ultuil er ngii. A Jesus uluuchais er a rultirakl er ngii aike el mo ochotii el kmo ngkmeda okngemedel a Jerusalem me a templo. Ngdilu el kmo: “Sel mesa Jerusalem el bla liueklii a re soldau, e bo modengei el kmo ng di kmedul metemall.” Seikid e ngmle kirir loltirakl a tekingel a Jesus e “chemiis el mor a rois.” (Lk. 21:20, 21) Tirke el mle kerekikl el omtab a silobel er a letemellii a Jerusalem a rechad er a Rom.

3. Ngera kede mo mesaod er tia el suobel?

³ Kid er chelecha el taem a kiei er a ulebengelel tia el mekngit el blekeradel. Ngkired el mo ultebechel e di klekar. Ngar tia el suobel e kede mo mesaod er a rolel e ngsebeched el melemolem el tabesul sel domes a blekeradel er a beluulechad, rolel e ngsebeched el kokerengid, me a rolel e ngsebeched el mo ungil lousbech er a taem el medechel.

4. Ngera uchul me ngkired el mo semeriar er a rolel a blekeradel er a beluulechad oltaut a ulaoch er a Biblia?

⁴ Ngar ngii a ungil luchul me ngsoad lomtab a rolel e a blekeradel el duubech er a beluulechad oltaut a ulaoch er a Biblia. El ua tiang, a Jesus a uluuchais a ileakl el tekoi el mo duubech, el ngii a ngosukid el mo medengei el kmo a okngemedel a beluulechad er a Satan a kmedang. (Mt. 24:3-14) A apostol Petrus a millisiich er kid el mo kerekikl el omtab a otutel a ulaoch me lolemolem el mesisiich a klaumerang er kid. (2 Pe. 1:19-21) A ulebongel el babier er a Biblia omuchel el melekoi el kmo: “Tial babier a ochotel a tekoi el Dios a milsa Jesus Kristus el kirel el bo lolecholt er a re mesiungel el kmo ng ngera mochu duubech.” (Och. 1:1) Me kede kmal semeriar el kirel a tekoi el duubech er chelechang me a rolel e ngoltaut a ulaoch er a Biblia. E locha kmal soad el mesaod lobengterir a rebebil.

5. Ngera diak el soad el mo meruul er ngii, e ngera kired el meruul er ngii? (Mdirrek lomes a siasing.)

⁵ Engdi sel dosaod a ulaoch er a Biblia e ngdiak el soad el melechedech el kmo ngera mo duubech. E ngerang? Ngdiak el soad el mo dmu tekoi el ngii a mo uchul a klekakeakl er a chelsel ongdibel. El ua tiang, kede locha rongesterir a remerreder er a beluu el mesaod er a rolel e te mo mesmechokl er a mondai el ngar ngii, el ngii a mo uchul a budech me a rokui el tekoi a mo ungilbesul. Ngdiak bo dolechedech el kmo aika el tekingir ngotutii a ulaoch er a 1 Thesalonika 5:3, e ngbai soad el mo medengei aike el kot el beches el tekoi el mla motobed. A lsekum a tekoi el dolekoi a mengai a uchetemel er aike el loltobed a cheldebechelel a Jehovah, e kede ngosuir a ongdibel el mo melemolem el ngar er a kltarreng, el ‘ta . . . uldesued.’​—1 Ko. 1:10; 4:6.

6. Ngera sebeched el suub er a 2 Petrus 3:11-13 (NW)?

⁶ Monguiu er a 2 Petrus 3:11-13 (NW). b A apostol Petrus a ngosukid el moba tabesul el uldasu sel dorriter a ulaoch er a Biblia. Ngmelisiich er kid el kmo “mblechoel el melatk er a sils er a Jehovah.” E ngerang? Ngdiak el belkul a kmo ngsoad el mo medengelii sel “sils me a lechub e ng sel sikang” er a Armakedon, e ngbai soad lousbech er a taem el medechel el kirel a “chedaol el omeruul me a ureor el kirel omeluu er a Dios.” (Mt. 24:36; Lk. 12:40) Ngbelkul a kmo, ngkirel melemolem el delodau omerelled me a rokui el tekoi el doruul el kirel a Jehovah ochotii a dmolech el bltkil a rengud el mo er ngii. A bo doruul er tiang, e ngkired el kokerengid.

7. Mekera dochotii el kmo kede di kid el mengkar er kid? (Lukas 21:34, BT)

⁷ A Jesus a dimlak di ledu er a redisaiplo er ngii me lomtab a tekoi el duubech er a beluulechad, ngdirrek el dilu er tir me di le tir el mengkar er tir. Tia debleketakl el mesang er a Lukas 21:34 (BT). c (Monguiu.) Momtab a tekingel a Jesus: “Mkekerengemiu.” A chad el di ngii el mengkar er ngii a kerekikl er aike el mo uchul a telemellel a deleuill er ngii me a Jehovah, e mengeroid er ngii er ngii. Ngoeak tiakid el rolel e ngmelemolem el  ngar er a bltikerreng er a Dios.​—Osi. 22:3; Jude 20, 21, NW.

8. A apostol Paulus ngmilsterir a Rekristiano a ngera el omengelechel?

⁸ A apostol Paulus a milengelechel er a Rekristiano me di letir el mengkar er tir. El ua tiang, ngdilu er a Rekristiano el ngar er a Efesus el kmo: “Me bo mkerekikl a omerellem. Lak bo mua re mekebelung el chad, e bai bo mua re mellomes a rengrir el chad.” (Efe. 5:15, 16) A Satan a kmal blak a rengul el melasem el melemall er a deleuill er kid me a Jehovah. Sei a uchul me a Biblia dmu er kid el kmo, “molasem el osiik el kmo ng ngera soal a Rubak cho bo moruul” me lsebeched el mekerreuid er a ulekbat er a Satan.​—Efe. 5:17.

9. Ngmekera bo dodengelii a soal a Jehovah doruul er ngii?

⁹ A Biblia diak louchais a rokui el tekoi el sebechel tomellii a deleuill er kid me a Jehovah. Kid a blechoel el meruul a omelilt el kirel a tekoi el Biblia diak a bleketakl lomesodel er ngii. Me a lsoad el meruul a mellomes el omelilt e ngkired el osiik el kmo “ng ngera soal a Rubak.” Ngsebeched el meruul er tiang loeak sel deblechoel el mesuub e melebedebek er a Tekingel a Dios. Sel bo deblechoel el melasem el mo medengelii a soal a Jehovah e dolasem el moba “chomelebedebekel a Kristus” e kede mo ua “re mellomes a rengrir el chad,” mo lmuut er a chelsel aike el blekeradel el diak a bleketakl el llach el kirel a kmo ngngera kired el meruul er ngii. (1 Ko. 2:14-16, BT) A lebebil e ngbeot er kid a mes aike el kired el mengeroid er kid er ngii. Engdi a kuk lebebil e ngmeringel er kid a mes.

10. Ngera bebil er a kengaol el tekoi el kmal kired el mengeroid er kid er ngii?

¹⁰ A bebil kengaol el tekoi el kmal kired el mengeroid er kid er ngii a klaiungamech, melim a rrom el mo imis, omengur el mo imis, melekoi a tekoi el ngii a tomelleterir a rebebil, me a osengel a koadelchad, siasing er a remeau, me aike el uai ngii. (Psa. 101:3) A cherroued er a Diabelong a blechoel el osiik a rolel e ngsebechel tomellii a deleuill er kid me a Jehovah. (1 Pe. 5:8) A lsekum e ngdiak deklekar, e a Satan a sebechel dualem er a uldesued me a rengud a chelechei, rechorecherreng, kltui, kldidairreng, me a omengemekl a kngtil a rengud. (Gal. 5:19-21) A uchelel e aika el blekeradel a diak el mesisiich me ngdiak domdasu el kmo ngkengaol. Engdi a lak demereched lotobed er a rengud me a uldesued e ngmelemolem el mukeroul el mo klou e sebechel mo uchul a tellemall.​—Jak. 1:14, 15.

11. Ngera el kengaol e diak lebleketakl el tekoi a soad el mengeroid er kid er ngii, e ngera uchul?

¹¹ A ta er a diak el bleketakl e kengaol el tekoi el kired el mengeroid er kid a mekngit el klausechelei. Molatk er tia el blekeradel. Kau oureor lobengkel a chad el diak el Sioning er a Jehovah. Ngsoam ngii el chad a bo lungil a uldesuel el kirir a Resioning me kungil er ngii e olengeseu er ngii. A lebebil e ke locha kongei el ousueleb lobengkel. Omerollel a taem e ke mla mo blechoel lousueleb lobengkel. A lebebil e ngmo mesaod a kikiongel el tekoi, engdi kochotii el kmo tia diak el soam. Engdi a uriul e ke mla mo smau lorrenges me ngmla mo diak le bother er kau. E a ta er a klebesei e ng invite er kau el mo melim lobengkel er a uriul er a ureor, me ke kongei. Cherengel a taem e ke mla mo mtebengii el kmo ke blechoel el kongei a tekingel. Me chelechang, omomdasu e ngoingerang e ke mocha uai ngii? Nguaisei, kid a meruul a ungil e olecholt omengull el mora rokui el chad. Engdi ngdiak el kired el lobes el kmo, kid a mo chelutel er tirke el deblechoel lobengterir. (1 Ko. 15:33) A lsekum e kede kerekikl el mengkar er  kid el ua lolisiich er kid a Jesus el mo meruul er ngii, e ngdiak bo dobengterir a rechad el tir a diak lekiei el oltirakl er a llechul a Jehovah, a lak a ungil luchul. (2 Ko. 6:15) Kede mesa kngtil e mengeroid er kid er ngii.

12. A redisaiplo er a longiil er a telemellel a Jerusalem me a templo, e ngera te mirruul er ngii?

¹² A redisaiplo er a Jesus a dimlak el kora di milil e longiil er a telemellel a Jerusalem me a templo. A Jesus a milsterir a urerir. Ngdilu er tir me lomerk er a ungil chais er a “Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:6-8) Tia kmal mle klou el ngerachel el lengiluu! Te mle ungil lousbech a temir el blak a rengrir el meruul er tia el ngerechelir.

13. Ngera uchul me ngkired el mo ungil lousbech a temed? (Kolose 4:5)

¹³ Monguiu er a Kolose 4:5. A di lekid el mengkar er kid e ngkired el merriter er a rolel a dousbech a temed. A “bkaischemrungel” a sebechel duubech el mora ngii di el techa er kid. (Oli. 9:11, NW) Ngkmal sebeched el di kiul mad.

14-15. Ngmekera sebeched el mo ungil lousbech a temed? (Hebru 6:11, 12) (Mdirrek lomes er a siasing.)

¹⁴ Ngsebeched el mo ungil lousbech a temed sel doruul a soal a Jehovah e dolisiich er a deleuill er kid me ngii. (Jn. 14:21) Ngkired el mo ‘misisiich el dechor, e diak dongitengtik, e oitel  a klisiched el rokui el mo blak a rengud ra urerel a Rubak.’ (1 Ko. 15:58, BT) Me sel lemei a ulebongel, el ulebengelel a klengar er kid me a lechub e ngulebengelel tia el mekngit el blekeradel, e ngdiak a ngera el bo douuchel a rengud er ngii.​—Mt. 24:13; Rom 14:8.

¹⁵ A Jesus a melemolem el omekrael er a redisaiplo er ngii er chelechang el omerk er a Rengedel a Dios el mora rokui el beluu er a beluulechad. Ngmla otutii a telbilel. Ngoeak a cheldebechelel a Jehovah, e ng train er kid lomerk er a klumech e meskid a dongu el dousbech el mo merkii a ungil chais. (Mt. 28:18-20) Kede meruul er a ngerecheled sel doureor el meringel el meruul er a ureor el omerk e olisechakl, e melemolem el klekar e mengiil er sel taem el Jehovah mo okngemedii tia el mekngit el blekeradel. Sel bo doltaut er a ulekrael el lebeskid a Hebru 6:11, 12, e kede mo melemolem loba omeltked el “mo lmuut er a ulebongel.”​—Monguiu.

16. Ngera kede mla rullii er a rengud el mo meruul er ngii?

¹⁶ A Jehovah mla oterekeklii a sils me a sikang el bo lolekngemed er a beluulechad er a Satan. Sel lemei tia el sils, e a Jehovah mo otaut a rokui el ulaoch el llechukl er a Tekingel. Me nguaisei, a lebebil e kede locha mo omdasu el kmo ngmla duob a sils er ngii. Engdi a sils er a Jehovah “diak bo le meoud.” (Hab. 2:3) Mada derellii er a rengud el “mo omes er a RUBAK,” e “uumerang e mengiil er a Dios el mo olsobel er [kid].”​—Mik. 7:7.