1. ‘Ushanan tiempukunapaq’ discïpulunkuna tapuyaptin, ¿ima nirqantan Jesus y imatataq consejarqan?

 JESUS wanunampaq juk ishkë junaqkuna pishikaptinmi, chuskoq discïpulunkuna Jesusta tapuyarqan ‘ushanan tiempukuna’ imë kanampaq kaqta musyëta munar (Mat. 24:3). Capazchi Jesuspa discïpulunkunaqa musyëta munayarqan judïukuna kawayanqan tiempu imë ushanampaq kaqta. Peru Jesusqa manam judïukuna kawayanqan tiempu imë ushanampaq kaqllatatsu contestarqan, sinöqa kanan kawëkanqantsik tiempu imë ushanampaq kaqtawanmi contestarqan. Kënömi nirqan: “Tsëkuna imë junaq o imë höra pasanampaq kaqtaqa manam ni pï musyantsu, ni ciëluchö këkaq angelkuna ni Tsuripis, sinöqa kikin Teytallam”. Tsëpitanam kënö consejarqan: “Alkäbu alkäbu këkäyë” (Mar. 13:32-37).

2. ¿Imanirtan punta cristiänukunaqa alkäbu alkäbu këkäyänan karqan?

² Punta cristiänukunaqa alkäbu alkäbum këkäyänan karqan, tsënöpa salvakuyänampaq. Jesusmi qateqninkunata willarqan judïukuna kawayanqan tiempu ushakänampaqqa imakuna pasanampaq kaqta. Kënömi nirqan: “Jerusalenpa entëru lädunchö mëtsika soldädukuna këkaqta rikarqa, musyayë ichikllachöna ushakänampaq kaqta”. Tsë hörachömi Jesus ninqannö jirkakunata qeshpir ëwakuyänan karqan (Lüc. 21:20, 21). Jesus ninqanta cäsukoqkunaqa romänukuna Jerusalenta manaraq ushakätsiyaptinmi qeshpir ëwakuyarqan, tsënöpam salvakuyarqan.

3. ¿Imatataq yachakushun?

 ³ Noqantsikpis kë mana alli tiempupa ushëninchönam kawëkantsik. Tsëmi punta cristiänukunanöpis alli juiciuyoq kanantsik y alkäbu alkäbu këkänantsik. Këchömi yachakushun, imëkapis pasakunqankunata rikar tsëllaman mana yarparänapaq. Tsënöllam yachakushun imanö këkanqantsikta rikäkunapaq y tiempuntsikta alli provechanapaq.

4. ¿Imanirtan musyëta munantsik imëkapis imanir pasakunqanta?

⁴ Imëkapis pasakunqankunata rikarqa, Biblia willakunqannölla pasakuykanqanta o mana pasakuykanqantam musyëta munantsik. Këllaman pensarishun: Jesusmi nirqan Satanas gobernanqan tiempu ushëkanqantana musyanapaqqa imakuna pasanampaq kaqta (Mat. 24:3-14). Apostol Pëdrupis nirqanmi Biblia willakunqankuna cumplikanqanta rikanqantsikqa Diosnintsikman mas markäkunapaq o yärakunapaq yanapamanqantsikta (2 Pëd. 1:19-21). Y Bibliapa ushanan kaq librunam kënö nir qallan: “Tsëtaqa ichikllachöna pasanampaq kaqkunata sirweqninkunata rikätsinampaqmi Teyta Dios musyatsirqan” (Apoc. 1:1). Tsëmi imëkapis pasakunqankunata rikar, Biblia willakunqankuna cumplikëkanqanta o mana cumplikëkanqanta musyëta munanqantsikqa allilla. Capaz wawqi panintsikkunawampis tsëkunapita parlëqa gustamashwan.

5. Biblia willakunqankuna cumplikëkanqampaq piwampis parlarninqa, ¿imanirtan cuidakunantsik y imatataq ruranantsik? (Rikäri fötuta).

⁵ ¿Imanirtan cuidakunantsik Biblia willakunqankuna cumplikëkanqampaq piwampis parlarqa? Wawqi panintsikkunata juknöpa mana pensaratsinapaqmi. Tsëmi pasakunman kikintsik pensanqantsikkunallata parlashqaqa. Këllaman pensarishun: capaz gobiernukunata wiyashwan, “yamëna y següruna kawakunapaq” nir problëmankunata altsëta procurëkäyanqanta. Tsëta wiyarqa capazchi 1 Tesalonicensis 5:3 ninqan cumplikëkanqanta pensarishwan. Tsënö pensanapa rantinqa, publicacionkuna nimunqantam mas alkäbu kanantsik. Jehoväpa sirweqninkunata dirigeqkuna niyämunqannölla parlarqa, ‘juk pensëyoqllana’ kayänampaqmi llapan wawqi panintsikkunata yanapashun (1 Cor. 1:10; 4:6).

6. ¿Imatataq yachakuntsik 2 Pëdru 3:11 a 13 ninqampita?

⁶ (Leyi 2 Pëdru 3:11-13). Apostol Pëdruqa nimantsik Biblia willakunqankuna imanö cumplikänampaq kaqman alläpa mana yarparänapaqmi. Tsëpa rantinqa kënömi nimantsik: “Teyta Jehovä nunakunata juzganan mantsakëpaq tiempu chämunanta alkäbu alkäbu shuyarar”. ¿Imanirtan alkäbu alkäbu këkänantsik? Ushakë manaraq chämuptin tiempuntsikta alli utilizar alli portakunapaq y llapan shonquntsikwan Jehovä Diosnintsikta sirwir këkänapaqmi y manam ushakë “imë junaq y imë höra” chämunampaq kaqta musyëta munartsu (Mat. 24:36; Lüc. 12:40). Masqa munantsik alli portakuyta y Jehovä Diosnintsikta kuyarnin sirwikanqantsikta segurakuytam. Peru tsëpaqqa, kikintsik imanö këkanqantsiktam rikäkunantsik.

7. ¿Imakunapitataq cuidakunantsik? (Lücas 21:34).

⁷ Jesusqa qateqninkunata nirqan kikinkunapis imanö këkäyanqanta alkäbu kayänampaqmi y manam pasakuykanqankunata alkäbu kayänanllapaqtsu. Tsëtam Lücas 21:34 (leyiri) textuchö nirqan, kënömi nirqan:  “Cuidakuyë”. ¿Imapitataq cuidakunantsik? Jehovä Diosnintsikwan amïgu kënintsikta ushakätseq cösaskunapitam, y tsëkunataqa manam ni imanöpapis permitinantsiktsu. Tsëta rurarllam Jehovä Diosnintsikta imëpis kuyëkäshun (Prov. 22:3; Jüd. 20, 21).

8. ¿Imapita cuidakuyänampaqtan apostol Pablu cristiänukunata consejarqan?

⁸ Apostol Pablum cristiänukunata nirqan kikinkuna imanö këkäyanqanta rikäkuyänampaq. Këllaman pensarishun: Ëfesuchö cristiänukunatam kënö nirqan: “Alläpa cuidakuyë upakunanö mana portakuyänëkipaq, sinöqa yachaqkunanö” (Efes. 5:15, 16). Satanasqa imëkatam ruran Jehoväta sirwita dejanata munar. Tsëmi Bibliaqa kënö consejamantsik: “Jehovä imata munanqanta alli entiendiyë”. Tsëta cäsukurqa manam Satanaspa munënintaqa rurashuntsu (Efes. 5:17).

9. ¿Imatan yanapamäshun Jehovä imata munanqanta alli entiendinapaq?

⁹ Jehovä Diosnintsikwan amïgu kënintsikta imapis ushakätsinqanta musyanapaqqa, manam Bibliachö juk lista kantsu. Imatapis kikintsikmi decidinantsik. Alli decidinapaqqa, ‘Jehovä imata munanqantam’ alli entiendinantsik. Y alli entiendinapaqqa, ¿imatataq rurashwan? Diosnintsikpa Palabrantam estudianantsik y yachakunqantsikmanmi alli pensanantsik. Jehovä Diosnintsik imata munanqanta alli entiendirqa, ‘Cristu pensanqannö’ pensanapaqmi kallpachakushun. Tsëmi ima peligrupitapis cuidakunapaq juk lista mana kaptimpis, “yachaqkunanö” portakunapaq yanapamäshun (1 Cor. 2:14-16). Wakin peligrukunataqa rasllam cuentata qokurishwan, peru wakintaqa manam.

10. ¿Ima peligrukunapitataq cuidakunantsik?

¹⁰ ¿Imapitataq cuidakushwan? Pitapis enamorëpa parlapëpita, alläpa upyëpita, alläpa mikuypita, pitapis llakitsipa parlapëpita, y maqanakoqta o pornografïata rikëpitam (Sal. 101:3). Chikimaqnintsik Diabluqa, imëkanöpapis Jehovä Diosnintsikpitam rakimënintsikta munëkan (1 Pëd. 5:8). Mana cuidakushqaqa, Satanasqa imëka plantata plantaqnömi mana allikunata shonquntsikchö yuriratsinqa. Tsëmi envidiösu, rasumpa kaqta mana parlakoq, imatapis alläpa munaq, chikikoq, orgullösu y mana perdonakoq tikrakurishwan (Gäl. 5:19-21). Qallananllachöqa, capazchi tsënö kanqantsik alläpaqa rikakunqatsu. Peru tsëkunapita mana cuidakushqaqa, imëka mana alli planta winaqnömi mana allikunaqa shonquntsikchö mirar qallëkunqa (Sant. 1:14, 15).

11. ¿Ima peligrukunapitataq cuentata qokushwantsu y imanirtan cuidakunantsik?

¹¹ Parlarishun cuentata mana qokunqantsik peligrupaq. Tsëqa mana alli amïgukunam kanman. Capazchi juk trabajaq mayikiwan qallananllachöqa juk ishkë kutikunalla mikuyänëkipaq juntakankiman y melanëpaqkunata parlanqankunapis gustashunkimantsu. Peru mas reqinakurninqa, masnam juntakanki y melanëpaqkunata parlanqampis gustarnam qallëkushunki. Y mikoq ëwayänëkipaq invitashuptikipis kushishqanam ëwanki. Tsë nunawan mas seguïdu juntakarqa, tsë nunanönam pensar qallëkunki. Jehoväpa sirweqninkunaqa yachanëpaq y respetakoq karpis, manam qonqanantsiktsu Jehoväta mana sirweqkunawan juntakarqa pëkunanö pensar qallëkunapaq kaqta (1 Cor. 15:33). Jesus ninqanta cäsukur y alli cuidakurqa, Jehoväta mana sirweq nunakunawan manam mana conviëniptinqa juntakäshuntsu (2 Cor. 6:15). Tsë nunakunawan juntakëqa peligrösu kanqanta musyarmi pëkunawan juntakushuntsu. 

12. ¿Imatataq Jesuspa discïpulunkunaqa rurayänan karqan ushakë chämunanta shuyararnin?

¹² ¿Jesuspa discïpulunkunaqa imatapis mana rurartsuraq ushakë chämunan tiemputa shuyaräyanman karqan? Manam. Jesusmi mandarqan alli noticiakunata yachatsikuyänampaq. Kënömi nirqan: “Jerusalenchö, entëru Judëa provinciachö, Samariachö, y patsapa mas karu kuchunyaqmi testïgukuna kayanki” (Hëch. 1:6-8). Pëkunapaqa mëtsikam trabäjunkuna karqan. Tsë trabäjuta rurarmi, tiempunkunataqa alli provechayänan karqan.

13. ¿Imanirtan tiempuntsikta alli provechanantsik? (Colosensis 4:5).

¹³ (Leyi Colosensis 4:5). Eclesiastes 9:11 ninqannömi, mana pensanqantsik hörakuna “imëka mana allikunapa” pasarishwan o hasta wanurishwampis. Tsëmi imanö këkanqantsikta musyanapaqqa, tiempuntsikta imanö utilicëkanqantsikta alli rikänantsik.

14, 15. ¿Imanötan tiempuntsiktaqa mas alli provechashwan? (Hebrëus 6:11, 12; rikäri fötuta).

¹⁴ Tiempuntsiktaqa alli provechantsik Jehovä munanqanta rurarnin y pëwan amïgu kanantsikpaq kallpachakurninmi (Juan 14:21). Diosnintsikpa Palabran kënö consejamanqantsiktam cäsukunantsik: “Imëpis  alli aguantar firmi kayë y Señorpa kaqchö rurayanqëki mana envänu kanqanta yarpar, Señorpa kaqchö imëpis ocupädu këkäyë” (1 Cor. 15:58). Tsëta rurarqa, wanukurnin o ushakë chämuptimpis manam, “Jehoväpaq masta ruralläman karqan” nir pësakushuntsu (Mat. 24:13; Rom. 14:8).

¹⁵ Discïpulunkunata äninqannöllam, kanampis Jesusqa entëru Patsachö Diospa Gobiernumpita yachatsikushqa yanapëkämantsik. Jehoväpa sirweqninkunata dirigeqkunawanmi Jesusqa, imanö yachatsikunapaq y imakunawan yachatsikunapaq yachëkätsimantsik (Mat. 28:18-20). Y noqantsikqa kë mana alli munduta Jehovä ushakätsimunan tiempu chämunqanyaqqa, gänas gänaslla y kushishqam yachatsikur këkänantsik. Hebrëus 6:11 y 12 (leyi) ninqan consëjuta cäsukurqa, ‘ushananyaqmi’ alli tsarakushun.

16. ¿Imata ruranapaqtan listu këkänantsik?

¹⁶ Jehovä Diosqa patsätsishqanam Satanaspa mundunta imë ushakätsinampaq kaqta. Tsë junaqmi Palabran Bibliachö llapan änikunqanta cumplinqa. Tsë junaq mana chämunampaq kaqta pensashqapis, “¡tiempunchömi cumplikanqa!” (Hab. 2:3). Tsënö këkaptinqa, Miquëas 7:7 ninqanta ruranapaqmi listu këkänantsik. Kënömi nin: “Teyta Jehovä ruramunampaq kaqtam alkäbulla shuyëkäshaq. Salvamaq Teyta Diosnïtam pacienciawan shuyëkäshaq”.