1. Yesuusi rosaanosira goofimarchu yanna daafira maa kulinonsa? Mayyee qorowisiisinonsa?

 YESUUSI reyara shiimu barri gate heeꞌreenna rosaanosi giddonni shoolu iso “Diru goofimarchira malaatu maati?” yite xaꞌmitino. (Mat. 24:3) Rosaanosi tenne xaꞌmo xaꞌmitinohu Yerusaalamenna qullaawu mini diigame baꞌꞌannohu mamooteetiro afa hasidhe ikkara dandaanno. Yesuusi tenne xaꞌmora dawaro qoli woyite Yerusaalametenna qullaawu mini diigame baꞌꞌa daafira calla ikkikkinni xa heeꞌnoommo ‘diri goofimarchi’ daafirano kulino. Goofimarchu yanna daafira Yesuusi togo yiino: “Hakkonne barranna hattenne saate Maganu Annu kaꞌa, gordu sokkaasineno ikkito, Beettono ikko, ayino afinohu dino.” Hakko daafira isi baalanta rosaanosi “feeffattine agadhe” hattono “jaattine agadhe” yee qorowisiisinonsa.—Maq. 13:32-37.

2. Umi xibbi diro heeꞌrino Kiristaani feeffate agadha hasiissinonsahu mayiraati?

² Umi xibbi diro heeꞌrinohu Kiristaana ikkinohu Yihudu manni gate saꞌꞌate feeffate agadha hasiissinonsa. Yesuusi harunsaanosira Yerusaalamenna qullaawu mini baꞌꞌanno yanna gambissinota leellishanno malaate kulinonsa. Isi, “Yerusaalame diinu gaaddo doyissite amadde noota affinanni woyite, baꞌꞌate mule noota huwatte” yiinonsa. Insa hatte yannara Yesuusi kulinonsa qorowishshira hajajante ilaallate widira higge xooqa hasiissannonsa. (Luq. 21:20, 21) Konni qorowishshira hajajamino manni Roomu olante Yerusaalame huntu woyite gate saino.

3. Konni birxichira maa ronseemmo?

 ³ Xaa yannara heeꞌnoommohu tenne busha alame goofimarchi gambisino yanna giddooti. Hakko daafira ninkeno deammummokki feeffante agadha hasiissannonke. Konni birxichira alamete aana ikkannore laꞌneemmo woyite quwa saꞌneemmokkire ikka, qorophanna gattino yanna garunni horoonsiꞌra dandiineemmohu hiittoonniitiro ronseemmo.

4. Xaa yannara alamete aana ikkanni noori Qullaawu Maxaafi masaalo woꞌmitanno gede assanni noohu hiittoonniitiro harunsa hasiissannonkehu mayiraati?

⁴ Alamete aana ikkanni noori Qullaawu Maxaafi masaalo woꞌmitanno gede assanni noohu hiittoonniitiro afa hasiꞌneemmo gede assannohu ikkadu korkaati noonke. Lawishshaho Yesuusi Sheexaanu alame bao gambissanno woyite ikkannore kulinonke. (Mat. 24:3-14) Qoleno soqqamaasinchu Pheexiroosi ammananke kaajjite heedhanno gede, himanunni kulloonniri woꞌmannota qorophine harunsineemmo gede jawaachishinonke. (2 Phe. 1:19-21) Qullaawu Maxaafihu jeefote maxaafi togo yee hanafanno: “Tini Yesuusi Kiristoosi ajuujaati. Muli yanna giddo ikkanno coye soqqamaanosira leellishanno gede Maganu uyinosite.” (Aju. 1:1) Hakko daafira xaa yannara alamete aana ikkanni noo coyenna kuni coyi Qullaawu Maxaafi masaalo woꞌmitanno gede assanni noohu hiittoonniitiro afa hasiꞌneemmo. Hattono kuri coyibba wolootu ledo hasaawa banxeemmoha ikkara dandaanno.

5. Maa qoropha hasiissannonke? Assa hasiissannonkeri maati? (Misillano lai.)

⁵ Ikkirono Qullaawu Maxaafi masaalo daafira hasaambeemmo woyite, ninkera lawinonkere coyiꞌneemmokki gede qoropha hasiissannonke. Mayira? Korkaatuno songote mittimma hunannore coyiꞌra dihasiꞌneemmo. Lawishshaho poletiku massagaano mitowa kalaqantino gaance hoolte keerunna gaꞌlabbo heedhanno gede assa dandiitanno gara hasaabbanna macciishshineemmoha ikkara dandaanno. Togoo woyite ‘kuni hasaawi 1 Teselonqe 5:3 noo masaalo woꞌmitanno gede assannoho’ yine hasaawantenni, tenne daafira muli yanna giddo borronkera mayinoonniro laꞌꞌa hasiissannonke. Hasaawinke Yihowa dirijjite qixxeessitino borro aana xintaminoha ikkiro songote mittimma baꞌannokki gede kaaꞌlineemmo hattono “mitte hedore” ikkineemmo.—1 Qor. 1:10; 4:6.

6. Layinki Pheexiroosi 3:11-13 geeshsha noo amaalenni maa ronseemmo?

⁶ Layinki Pheexiroosi 3:11-13 nabbawi. Soqqamaasinchu Pheexiroosi amaalino amaale Qullaawu Maxaafi masaalo xiinxallineemmo woyite quwa saꞌneemmokkire ikkineemmo gede kaaꞌlitannonke. Isi Yihowa barri “rahe daanno gede loossinannire ikke [surreꞌnenni gambisinohu gede assitine hedde, NW]” yee jawaachishinonke. Mayira? Korkaatuno hatto assineemmohu Yihowa Armagedooni abbanno yannanna saate afate ikkikkinni, gattino yanna “qullaawa heeshshonninna Magano lawatenni heeꞌra” hasiꞌneemmo daafiraati. (Mat. 24:36; Luq. 12:40) Wole yaattonni danchu amanyooti heeꞌrannonke gede assiꞌranna Yihowara soqqammeemmohu iso lowo geeshsha banxeemmo daafira ikkinota buuxiꞌra hasiꞌneemmo. Woꞌmanka woyite tenne assate qorophineemmore ikka hasiissannonke.

7. Qorophineemmore ikkinoommota leellisha dandiineemmohu hiittoonniiti? (Luqaasi 21:34)

⁷ Yesuusi, rosaanosi alamete aana ikkannore illachishshanno gede calla ikkikkinni qorophitanno gedeno kulinonsa. Luqaasi 21:34 noo qorowishshi tenne hedo luphi assanno.  (Qummeeshsha nabbawi.) Yesuusi konni qummeeshshira “qorophe” yiinota wodanchi. Qorophanno manchi Yihowa ledo noosi jaalooma hunara dandaanno coye baala baqqi yee agadhanno; hattono togoo coye hooꞌlate sharramanno. Konni garinni “Maganu baxilli giddo” heeꞌranno.—Law. 22:3; Yih. 20, 21.

8. Soqqamaasinchu Phaawuloosi Kiristaana mayyee amaalino?

⁸ Soqqamaasinchu Phaawuloosi Kiristaanu qorophanno gede kulino. Lawishshaho isi Efesooni heeꞌranno Kiristaana togo yee amaalino: “Hiitto ikkitine heeꞌra hasiissannoꞌnero seekkitine affe. Egennaammu gede ikkinnina gowwootu gede ikkitine heedhinoonte.” (Efe. 5:15, 16) Sheexaanu Yihowa ledo noonke jaalooma hunate woꞌmanka woyite sharramanno; hakko daafira Qullaawu Maxaafi “Mootichu hedo maatiro wodanche” yee amaalannonke; tini Sheexaanu sia baala gargadhate kaaꞌlitannonke.—Efe. 5:17.

9. Yihowa hedo wodancha dandiineemmohu hiittoonniiti?

⁹ Qullaawu Maxaafi Yihowa ledo noonke jaalooma hunara dandaannoha mitto mittonka coye bade dikulanno. Duucha woyite Qullaawa Borro giddo bande kulloonnikki coye lainohunni uminke doorsha doodha hasiissannonke. Dancha doorsha doodhate ‘Yihowa hedo’ maatiro wodancha hasiissannonke. Maganu Qaale ganyine xiinxallinenna hiincine tenne assa dandiineemmo. Albinni roore Yihowa fajjo maatiro anfummoronna “Kiristoosi wodani” heeꞌrannonke gede assiꞌnummoro, konne asse konne assitinoonte yine kulloonni biddishshi heeꞌrannokki woyite nafa “egennaamu gede” ikkine heeꞌra dandiineemmo. (1 Qor. 2:14-16) Gawajjankera dandaannohu mitu coyi baxxe leellannoho mitu kayi dileellannoho.

10. Qoropha hasiissannonkehu mitu gawajjanno coyi maati?

¹⁰ Qoropha hasiissannonkehu gawajjanno coyi giddo mitu, galtenke ikkinokki manchira gara ikkinokki baxille leellishate, quwa saꞌne itatenna agate, gawajjannore coyiꞌrate, finqille noo boohaarshanna teeda baꞌino misilla laꞌꞌate hattono wolere kuri lawinoreeti. (Far. 101:3) Baarigaarinke Daawuloosi woꞌmanka woyite Yihowa ledo noonke jaalooma hunanno faro hasiꞌranno. (1 Phe. 5:8) Qoropha hoongummoro Sheexaanu dhiibbe, ammanama hooga, hafuurre, gibbo, booꞌnanna koma amaxxa surrenkenna wodaninke giddo rumuxxitanno gede assanno. (Gal. 5:19-21) Umi qara kuri coyibba hakkeeshsha gawajjitannota lawa hooggankera dandiitanno. Kayinni kuri akatta bayichonkonni buqqinse hooꞌla hoongummoro, hadho afidhino haqqicho gede lophite qarra abbansa digattanno.—Yai. 1:14, 15.

11. Qoropha hasiissannonkehu baxxe leellannokkihu gawajjannonke coyi giddo mittu maati? Kuni coyi gawajjannoho yineemmohu mayiraati?

¹¹ Gawajjankera dandaannohu baxxe leellannokki coyi giddo mittu busha hoshshooti. Hanni tenne hedi. Ledokki loosanno manchi Yihowa Farciꞌraasincho diꞌꞌikkinoho. Konni manchira Yihowa Farciꞌraasine daafira dancha lao heedhasira hasiꞌrootto daafira shaqqille leellishittosi. Saꞌe saꞌe konni manchi ledo sagaleno ita hanafitto. Mulenni isi ledo ganyite sagale ita hanafitto. Mito woyite kuni manchi amanyoote bainore kayise hasaawanno; umi qara konne coye lashshi assite saꞌꞌate woꞌnaalitto. Gedensoonni kayinni togoo hasaawa rossanni haꞌrootto daafira koffi yaa aguritto. Mitto barra kuni manchi ‘loosu gedensaanni haꞌne ago ango’ yiiheta maahoyye yiitto. Gedensoonni kuni ledokki loosanno manchi hedanno garinni heda hanafitto. Konni kaꞌa xa isi assannore assate mayi gatinoha lawannohe?  Hige manna ayirrisanna baalunkura danchare assa hasiꞌneemmo; kayinni ledonsa yanna sayinseemmo manni hunankera woy seekkankera dandaannota dea dihasiissannonke. (1 Qor. 15:33) Yesuusi kulinonte gede qorophineemmoha ikkiro Yihowa biddishshi garinni heeꞌrannokki manni ledo jaalooma dikalaqiꞌneemmo. (2 Qor. 6:15) Hattono gawajjannonkere balanxe anfe qorophineemmo.

12. Yesuusi rosaano alamete goofimarcho agadhitinohu hiikkonne looso loossanniiti?

¹² Yesuusi rosaano alamete goofimarchi daanno yanna agadhitannohu sammi yite ofolte diꞌꞌikkino. Yesuusi insara loossanno looso uyinonsa. Yesuusi insa dancha duduwo “Yerusaalamete, Yihuda baalaho, Samaariyahonna gobbate qacce geeshsha” dudubbanno gede hajajinonsa. (Soq. 1:6-8) Yesuusi harunsaanora uyinoonninsa loosi dishaaꞌꞌaho! Insa konne looso diinaggaabbe loosse yannansa danchu garinni horoonsidhino.

13. Yannanke danchu garinni horoonsiꞌra hasiissannonkehu mayiraati? (Qolasiyaasi Sokka 4:5)

¹³ Qolasiyaasi Sokka 4:5 nabbawi. Qorophineemmore ikkate yannanke horoonsiꞌneemmo gara heda hasiissannonke. Ninke baalunkura hendoonnikkiri ‘xaadankera’ dandaanno. (Ros. 9:11) Qoleno hedeweelcho reyinammora dandiineemmo.

14-15. Yannanke danchu garinni horoonsiꞌra dandiineemmohu hiittoonniiti? (Ibiraawoota 6:11, 12) (Misileno lai.)

 ¹⁴ Yihowa fajjo assinenna isi ledo noonke jaaloomi kaajjanno gede assiꞌne yannanke danchu garinni horoonsiꞌra dandiineemmo. (Yoh. 14:21) ‘Mootichu looso woꞌmanka woyite agurrummokkinni kaajjine loosate hixamanya hasiissannonke!’ (1 Qor. 15:58) Hatto ikkiro ninkeno reyino woy tenne alame goofimarchino dayo gaabbineemmo gede assanno coyi diheeꞌranno.—Mat. 24:13; Rom. 14:8.

¹⁵ Yesuusi xaa yannara uulla woꞌmate Maganu Gashshoote sabbakkanni noo rosaanosi massaganni noonsa. Isi coyiꞌrinore wonshino. Isi Yihowa dirijjite widoonni sabbankeemmo gara qajeelsannonke hattono dancha duduwo halashshate horoonsiꞌneemmo uduunnicho qixxeessanni noonke. (Mat. 28:18-20) Sabbakatenna manna rosiisate looso diinaggaambe loonse hattono Yihowa tenne busha alame hunanno yanna baqqi yine agadhine ninkeno ninke widiidita assa dandiineemmo. Ibiraawoota 6:11, 12 kulloonni amaale harunsine “goofimarchu geeshsha” hexxonke seekkine cuꞌmiꞌneemmo.—Qummeeshsha nabbawi.

16. Maa assate murciꞌra hasiissannonke?

¹⁶ Yihowa Sheexaanu alame hunanno barranna yanna murino. Hakku barri daanno woyite Yihowa Qaalisi giddo kulino masaalo baala woꞌmitanno gede assanno. Mito woyite tini busha alame baꞌanno yanna keeshshitinoha lawankera dandaanno. Ikkirono Yihowa barri “dayikkinni digatanno.” (Imb. 2:3) Hakko daafira Yihowa ‘agadhatenna gatisaanchonke Magano hexxate’ murciꞌno.—Mik. 7:7.