1. Kakɔna kakatɛ Yeso ambeki ande lo kɛnɛ kendana la ekomelo ndo ɔhɛmwɛlɔ akɔna wakandawasha?

 NSHI ngana tsho la ntondo ka nyɔi ka Yeso, ambeki ande anɛi wakawombola vate: “Djembetelo yakɔna yayɛnya . . . etena k’ekomelo ka dikongɛ di’akambo?” (Mat. 24:3) Ondo ambeki asɔ wakambolaka dia vɔ mbeya etena kakahombe Jɛrusalɛma ndo tɛmpɛlɔ ndanyema. L’okadimwelo ande, Yeso kɔtɛkɛta tsho di’elanyelo ka Jɛrusalɛma ndo ka tɛmpɛlɔ koko nde akatɛkɛta dia “etena k’ekomelo ka dikongɛ di’akambo” diasɛnaso ɛlɔ kɛnɛ. Lo kɛnɛ kendana l’etena k’ekomelo, Yeso akate ate: “Lo kɛnɛ kendana la lushi kana wonya akɔ, ndooko onto leya, kaanga andjelo wa l’olongo, kaanga Ɔna, paka Papa.” Oma laasɔ, nde akahɛmɔla ambeki ande tshɛ dia vɔ ‘ntetemala nsɛna’ ndo ‘ntetemala nsungukala.’​—Makɔ 13:32-37.

2. Lande na kakidiɔ ohomba le Akristo wa lo ntambe ka ntondo dia vɔ ntetemala nsungukala?

² Akristo w’ase Juda wa lo ntambe ka ntondo wakahombe ntetemala nsungukala nɛ dia lɔsɛnɔ lawɔ lakalemanɛka la dui sɔ. Yeso akatɛ ambeki ande kɛnɛ kakawahombe nsɛdingola dia vɔ mbeya etena kakahombe ndja ekomelo ka dikongɛ di’akambo di’ase Juda. Nde akate ate: “Lam’ayonyɛna Jɛrusalɛma yambodingama l’asɔlayi, kanyeye dia elanyelo kayɔ kaya suke.” L’etena kɛsɔ vɔ wakahombe nkitanyiya ɔhɛmwɛlɔ wa Yeso ndo ‘ntatɛ ndawɔ otsha l’akona.’ (Luka 21:20, 21) Wanɛ wakadje yimba l’ɔhɛmwɛlɔ ɔsɔ wakakokɛ nsɛnɔ yawɔ etena kakalanyema Jɛrusalɛma oma le ase Rɔmɔ.

3. Kakɔna kayotɔsɛdingola lo sawo nɛ?

³ Ɛlɔ kɛnɛ, tekɔ lo nsɛna l’ekomelo ka dikongɛ di’akambo dia kɔlɔ nɛ. Diakɔ diele, sho lawɔ pomboka mambalɛka  ndo sungukalaka. Lo sawo nɛ, tayɔsɛdingola woho wakokaso monga la wɛdimo etena kendaso akambo weta l’andja ɔnɛ, woho wakokaso ndjalama ndo woho wakokaso nkamba l’etena kambototshikalɛ lo yoho yoleki dimɛna.

4. Lande na kahombaso mbidja yimba lo woho wakotsha akambo wa l’andja ɔnɛ prɔfɛsiya ya lo Bible?

⁴ Tekɔ l’ɛkɔkɔ w’eshika wɛnya lande na kangɛnangɛnaso woho wɛnaso akambo wa l’andja ɔnɛ wakotsha prɔfɛsiya ya lo Bible. Ɛnyɛlɔ, Yeso akasha listɛ l’akambo amɔtshi shikaa watokimanyiya dia mbeya di’ekomelo ka dikongɛ di’akambo dia Satana kaya suke. (Mat. 24:3-14) Ɔpɔstɔlɔ Petero akatokeketsha dia sho monga la mbidja yimba l’okotshamelo wa prɔfɛsiya dia mbetawɔ kaso ntetemala monga nge. (2 Pe. 1:19-21) Dibuku di’ekomelo dia lo Bible tatɛka l’ɛtɛkɛta w’ɔnɛ: “Woshwelo wa Yeso Kristo wakawosha Nzambi dia mɛnya ekambi ande akambo wahomba salema keema edja.” (Ɛny. 1:1) Diakɔ diadjaso yimba efula l’awui weta l’andja ɔnɛ ndo dialangaso mbeya woho wakokawɔ nkotsha prɔfɛsiya ya lo Bible. Ndo sho koka nomɔlomɔ nsawola akambo akɔ lam’asaso.

5. Kakɔna kahombaso mbewɔ ndo kakɔna kahombaso nsala? (Enda esato.)

⁵ Koko etena katɛkɛtaso dia prɔfɛsiya ya lo Bible, sho pombaka mbewɔ dia mfɔnya kɛnɛ kayotomba. Lande na? Nɛ dia hatotolanga mbuta dui dimɔtshi diakoka mbidja diatɔnelo l’atei w’etshumanelo. Ɛnyɛlɔ, sho koka mboka ɛnɔmbɔdi wa l’andja ɔnɛ watɛkɛta woho wakokawɔ ntondoya dui dimɔtshi dia laande, mbela wɔladi ndo lotui tshitshi. Lo dihole dia mfɔnya dia dui sɔ diambokotsha prɔfɛsiya ka lo 1 Tɛsalɔnika 5:3, sho pombaka monga la eokelo k’ekomelo kambotondja ɔhɔmbɔ. Naka awui watɛkɛtaso wayotombaka oma lo kɛnɛ kakatondja okongamelo wa Jehowa, kete tayokimanyiya etshumanelo dia tɔ monga kaamɛ “lo tokanyi taamɛ.”​—1 Kɔr. 1:10; 4:6.

6. Wetshelo akɔna wakokaso nkondja oma lo 2 Petero 3:11-13?

⁶ Adia 2 Petero 3:11-13. Ɔpɔstɔlɔ Petero tokimanyiyaka dia sho monga la wɛdimo etena kasɛdingolaso prɔfɛsiya ya lo Bible. Nde tokeketshaka dia ‘nama lo yimba woongelo wa lushi la Jehowa.’ Lande na? Aha nɛ dia tekɔ lo nanga mbeya “lushi kana wonya” wayela Jehowa Aramangɛdɔna, koko nɛ dia tekɔ lo nanga nkamba l’etena kambototshikalɛ dia monga la “etsha wa lɔkɛwɔ l’ekila ndo [la] ditshelo diɛnya omamemelo le Nzambi.” (Mat. 24:36; Luka 12:40) L’ɛtɛkɛta ekina, sho nangaka nama lɔkɛwɔ l’ɔlɔlɔ ndo ndjashikikɛ dia welo wadjaso l’olimu wa Jehowa mɛnyaka ngandji k’efula kawokaso. Dia ndeka mbika washo lo dui sɔ, sho pombaka ndjalama.

7. Ngande wɛnyaso dia tekɔ lo ndjalama? (Luka 21:34)

⁷ Yeso akatɛ ambeki ande dia vɔ mbidja yimba aha tsho l’awui weta l’andja ɔnɛ koko ndo otsha le wɔ vɔamɛ. Dui sɔ mɛnamaka hwe l’ɔhɛmwɛlɔ watanema lo Luka 21:34. (Adia.) Tolembete ɛtɛkɛta wa Yeso wata ɔnɛ: “Nyoyalame.” Onto layalama mbidjaka yimba lo dikambo tshɛ diakoka mbidja diɔtɔnganelo diasande la Jehowa lo waale ndo nde salaka kɛnɛ tshɛ kahombama dia diewɔ. Lo nsala ngasɔ, nde tshikalaka lo ngandji ka Nzambi.​—Tok. 22:3; Judɛ 20, 21.

8. Dako diakɔna diakasha ɔpɔstɔlɔ Pɔɔlɔ Akristo?

⁸ Ɔpɔstɔlɔ Pɔɔlɔ akatɛ Akristo dia vɔ ndjalama. Ɛnyɛlɔ, nde akatɛ Akristo wa l’Ɛfɛsɔ ɔnɛ: “Nyendake dimɛna woho wakɛndakɛndanyu,  aha oko akanga wa dinginya, koko oko akanga wa tomba.” (Ɛf. 5:15, 16) Satana ekɔ lo ntetemala nsala la wolo dia ndanya lɔngɛnyi lasaso la Jehowa. Diakɔ diatolaka Bible dia sho ‘ntetemala nshihodia kɛnɛ kele lolango la Jehowa’ l’oyango wa ndjalama oma lo toho tshɛ tatɔlɔsha Satana.​—Ɛf. 5:17.

9. Ngande weyaso lolango la Jehowa lo dikambo diaso?

⁹ Bible hashile akambo tshɛ wakoka mbidja diɔtɔnganelo diasaso la Jehowa lo waale. Mbala efula sho pombaka mbɔsa tɛdikɔ l’awui wahatami hwe hwe l’Afundelo. Dia nsala ɛsɔnwɛlɔ wa lomba, sho pombaka nshihodia, “lolango la Jehowa.” Sho koka nsala dui sɔ lo mbekaka Ɔtɛkɛta wa Nzambi mbala la mbala ndo lo kanaka la wɔ yimba. Lo yɛdikɔ yayototalekaka nshihodia lolango la Jehowa ndo nsala la wolo dia monga la “yimba ya Kristo,” mbayototalekaka nkɛndakɛnda “oko akanga wa tomba,” oyadi etena kele sho bu l’ɛlɛmbɛ watotɛ kɛnɛ kahombaso nsala shikaa. (1 Kɔr. 2:14-16) Lo ntena dimɔtshi ekɔ wɔdu le so dia nshihodia kɛnɛ kakokaso nsala; koko lo tena dikina dui sɔ bu wɔdu.

10. Naa waale ɛmɔtshi wahombaso mbewɔ?

¹⁰ Waale ɛmɔtshi wahombaso mbewɔ vɔ ɛnɛ: Nkɛnya la nsaki y’onto lele bu olonganyi aso, wodjwelo wa wanu, deshi dia tshambandeko, todja ɛtɛkɛta wanyangiya anto akina, wendelo w’awui wa ngala, esato wɛnyawɔ anto etakataka, ndo awui akina wa woho ɔsɔ. (Os. 101:3) Otunyi aso Diabolo, ekɔ lo ntetemala nyanga waaso wa ndanya diɔtɔnganelo diasaso la Jehowa. (1 Pe. 5:8) Naka hatendji ɔlɔlɔ, kete Satana koka monɛ lo timba ndo l’etema aso ɔkɔmiya, awui waha bu la losembwe, lokaki, lohetsho, lotamanya, ndo tokumbɛkumbɛ. (Ngal. 5:19-21) Ntondotondo, wɛ mbeyaka mfɔnya dia tokanyi tɔsɔ bu waale. Koko naka hatɔshi tɛdikɔ dia tinya aha la ntshimbatshimba, kete tɔ tayotetemala mpama oko osongo wa lɔlɛngɔ ko ndjotosalɛ kɔlɔ.​—Jak. 1:14, 15.

11. Naa waale ɔmɔtshi wa wolo wahombaso mbewɔ ndo lande na?

¹¹ Waale ɔmɔtshi wa woshɛshɛ ko lɔngɛnyi la kɔlɔ. Tɔsɛdingole dui nɛ. Wɛ ekɔ lo nkamba olimu l’onto ɔmɔtshi lele bu Ɔmɛnyi wa Jehowa. Wɛ nangaka di’osekayɛ la l’olimu monga la kanyi y’ɔlɔlɔ lo dikambo di’Ɛmɛnyi wa Jehowa, diakɔ diele wɛ ekɔ ɔlɔlɔ otsha le ndo ndo mbookimanyiyaka. Ndo wɛ koka mbetawɔ nto dia ndɛ yangɔ ya la pindju l’onto akɔ. Yema tshitshɛ l’ɔkɔngɔ, wɛ ɔlɛka yangɔ ya ndɛ mbala la mbala l’onto ɔsɔ. Tena dimɔtshi, sawo diotshimbaka l’awui wa mindo wele wɛ akanya yimba oma lɔkɔ l’etatelo. L’edjedja ka wonya, wɛ amboyokoma dia ntatɛ nsawola asawo asɔ ndo wɛ hayowaoka dia wekɔ kɔlɔ. Oma laasɔ lushi lɔmɔtshi, l’ɔkɔngɔ w’olimu, osekayɛ akɔ ambokelɛ dia nyu tɔnɔ dikɔhɔ di’eloko ndo wɛ ambetawɔ. Ndo ɛnama oko wɛ etawɔ kɛnɛ kasala osekayɛ la l’olimu. L’etena kɛsɔ, onde ayeta edja efula dia wɛ ndjotatɛ nsala akambo oko nde? Lo mɛtɛ, sho salɛka anto ɔlɔlɔ ndo sho nɛnyaka onto tshɛ, koko sho pombaka mbohɔka dia tayɔsɛngiyama lo yɛdikɔ y’efula oma le anto wasɔnaso dia ndeka mbetsha la wɔ wenya. (1 Kɔr. 15:33) Naka sho ndjalama, oko wakatokeketsha Yeso dia nsala, kete tayewɔ lɔngɛnyi la kɔlɔ la wanɛ wahasɛnɛ lo ndjela atɔndɔ wa Jehowa. (2 Kɔr. 6:15) Tayɛna waale ndo woho wakokaso mbeewɔ.

12. Kakɔna kakahombe ambeki waki Yeso nsala l’etena kakawakongaka ekomelo ka dikongɛ di’akambo?

¹² Ambeki waki Yeso takawahombe mpomba olimu etena kakawakongɛka ekomelo  ka dikongɛ di’akambo. Yeso akawasha olimu wa nsala. Nde akawadjangɛ dia nsambisha lokumu l’ɔlɔlɔ “la Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:6-8) Ande ɔkɛndɛ wa woke wakalongola ambeki waki Yeso lee! Lo ndjasha l’ɔkɛndɛ ɔsɔ, vɔ wakakambe la wenya awɔ lo yoho yoleki dimɛna.

13. Lande na kahombaso nkamba la wenya aso lo yoho yoleki dimɛna? (Kɔlɔsayi 4:5)

¹³ Adia Kɔlɔsayi 4:5. Dia ndjalama, sho pombaka nkana yimba dimɛna lo woho wakambaso la wenya aso. “Awui wa shashimoya” koka komɛ onto tshɛ la l’atei aso. (Ond. 9:11) Sho koka nshisha lɔsɛnɔ la shashimoya.

14-15. Ngande wakokaso nkamba la wenya aso lo yoho yoleki dimɛna? (Hɛbɛru 6:11, 12) (Enda ndo osato.)

¹⁴ Sho koka nkamba la wenya aso lo yoho yoleki dimɛna lo nsala lolango la Jehowa ndo lo nkeketsha diɔtɔnganelo diele lam’asaso la nde. (Jni. 14:21) Sho pombaka ‘ntshikala nge, nshikimala, ndo ndjalaka nshi tshɛ l’akambo efula wa nsala l’olimu wa Nkumadiɔndjɔ.’ (1 Kɔr. 15:58) Laasɔ, oyadi ekomelo ka lɔsɛnɔ laso kana ka dikongɛ dia kɔlɔ diakambo nɛ, sho hatotokiyana.​—Mat. 24:13; Rɔmɔ 14:8.

¹⁵ Ɛlɔ kɛnɛ, Yeso ekɔ lo ntetemala nɔmbɔla ambeki ande etena kasambishawɔ awui wendana la Diolelo diaki Nzambi lo nkɛtɛ k’otondo.  Nde akakotsha daka diande. Lo tshimbo y’okongamelo wa Jehowa, Yeso ekɔ lo tolowanya woho wa nsambisha ndo ekɔ lo tosha dihomɔ diele laso ohomba dia dianganya lokumu l’ɔlɔlɔ. (Mat. 28:18-20) Sho salaka kɛnɛ kalongamɛ Yeso le so dia nsala, lo nsala la wolo dia nsambisha ndo mbetsha anto akina, ndo lo ntetemala nsungukala etena kakongɛso dia Jehowa mbela ekomelo ka dikongɛ nɛ di’akambo. Lo nkamba la dako diele lo Hɛbɛru 6:11, 12, tayokukutɛ elongamelo kaso “polo l’ekomelo.”​—Adia.

16. Kakɔna kambotoyashikikɛ dia nsala?

¹⁶ Jehowa akashikikɛ lushi ndo wonya wayondolanya dikongɛ di’akambo dia Satana. Etena kayokoka lushi lakɔ, Jehowa hotshimbatshimba dia nkotsha prɔfɛsiya yakandafunde l’Ɔtɛkɛta ande. Lo ntena dimɔtshi, koka mɛnama oko ekomelo kekɔ lo ntshimbatshimba. Koko, lushi la Jehowa “hatotshimbatshimba!” (Hab. 2:3) Ɔnkɔnɛ, toyashikikɛ dia ‘ntetemala mendɛ le Jehowa,’ ndo mɛnya dia ‘tekɔ lo nkonga Nzambi ka panda kaso.’​—Mika 7:7.