1. ¿Tuku kawanilh Jesús xtamakgalhtawakgen xlakata tuku kilhtamaku xʼama min lisputni, chu tuku tastakyaw kamaxkilh?

 AKXNI nialh lhuwa kilhtamaku xtsankga namakgnikan Jesús, kgalhtati xtamakgalhtawakgen kgalhskinkgolh tuku xʼama litasiya pi xtalakatsuwinita «xlisputni kakilhtamaku» (Mat. 24:3). Max xtamakgalhtawakgen xlilakpuwankgo la xʼamakgo katsikgo pi xtalakatsuwinita xlisputni xkilhtamakujkan judíos. Tuku kakgalhtilh Jesús ni kajwatiya kamasiyanilh pi xtalakatsuwinita xlisputni xkilhtamakujkan judíos, wata na kinkamasiyaniyan tuku xʼamaw likatsiyaw akxni «xlisputni kakilhtamaku» niku lamaw talakatsuwinita xwa. Akxni lichuwinalh tuku kilhtamaku xʼama min lisputni, wa: «Xlakata ama kilhtamaku chu tukuya hora niti katsi, nipara ángeles xalak akgapun, nipara xaKgawasa, kajwatiya xaTlat». Alistalh kamaxkilh umakgolh tastakyaw: «Kuentajkatlawatit» chu «Skgalalh katawilatit» (Mar. 13:32-37).

2. ¿Tuku xlakata skgalalh xlitawilatkan xwanit kstalaninanin Cristo tiku xlamakgolh kxkilhtamakujkan judíos?

² Judíos tiku kstalaninanin Cristo xlitaxtukgo kxapulana siglo skgalalh xlitawilatkan xwanit xlakata wa tuku xlakgmaxtulh xlatamatkan. Jesús kawanilh xtamakgalhtawakgen tuku kuenta xlitlawatkan xwanit xlakata xkatsikgolh pi xlisputni xkilhtamakujkan judíos xtalakatsuwinita. Xla kawanilh: «Akxni naʼakxilhatit pi lhuwa soldados stiliwilikgonit Jerusalén, kakatsitit pi talakatsuwinit xlisputni». Chu uma kilhtamaku, xlitsalatkan xwanit kkasipijni, chuna la Jesús xkawaninit (Luc. 21:20, 21). Tiku kgalhakgaxmatkgolh tuku wa Jesús tsalakgolh akxni romanos nina xmasputukgo Jerusalén, chu lakgtaxtukgolh.

3. ¿Tuku naʼakxilhaw kʼuma artículo?

³ Akinin na lamaw kxlisputni uma nixatlan kakilhtamaku. Wa xlakata, xtachuna la xapulana kstalaninanin Cristo, skgalalh kilitawilatkan chu kuenta kilitlawatkan. Kʼuma artículo  naʼakxilhaw tuku tlan natlawayaw xlakata ni namalakatsaliyaw tuku lakpuwanaw xlakata tuku lama kkakilhtamaku. Nachuna naʼakxilhaw la kuenta natlawayaw kintayatkan chu la liwana nalimaklakaskinaw kinkilhtamakujkan xlakata nina min xlisputni uma kakilhtamaku.

4. ¿Tuku xlakata lu xlakaskinka nakatsiputunaw tuku lama kxlikalanka katiyatni?

⁴ Pulaklhuwa tuku xlakata lu kuenta tlawayaw tuku lama kxlikalanka katiyatni xlakata uma makgantaxtima tuku xwanit Biblia pi xʼama la. Akgtum liʼakxilhtit, Jesús lichuwinalh tipalhuwa tuku xʼama kinkamakgtayayan nakatsiyaw pi xlisputni xkakilhtamaku Satanás talakatsuwinita xwa (Mat. 24:3-14). Apóstol Pedro na kinkamakgpuwantinin kuenta natlawayaw la xkgantaxtulh tuku xlichuwinanit Biblia pi nala xlakata kintakanajlakan chuntiya tliwakga natawila (2 Ped. 1:19-21). Chu xaʼawatiya libro xalak Biblia litsuku umakgolh tachuwin: «Umakgolh tachuwin wa tuku Jesucristo makatsininanit uku. Dios maxkilh Jesucristo putum uma xlakata nakamasiyani xlakskujnin Dios tuku ama la nialh makgas kilhtamaku» (Apoc. 1:1). Wa xlakata lu katsiputunaw tuku lama kkakilhtamaku chu la makgantaxtima uma tuku xlichuwinanit Biblia pi xʼama la. Chu asta max lu lakgatiyaw kalitachuwinanaw uma kinatalankan.

5. ¿Tuku kuenta kilitlawatkan akxni lichuwinanaw la kgantaxtuma tuku xlichuwinanit Biblia? (Na kaʼakxilhti dibujos).

⁵ Lu kuenta kilitlawatkan akxni lichuwinanaw la kgantaxtuma tuku xlichuwinanit Biblia. ¿Tuku xlakata? Xlakata ni lichuwinamputunaw tuku akinin lakpuwanaw nema natlawa pi naʼanan tapapitsit kcongregación. Akgtum liʼakxilhtit, max nakgaxmataw pi mapakgsinanin lichuwinamakgo nawan la nalakkaxtlawakgo tuku nitlan anan chu pi nawilikgo takaksni. Ni nalakpuwanaw pi uma makgantaxtima nawan tuku xlichuwinanit 1 Tesalonicenses 5:3, wata wa kuenta natlawayaw tuku xaʼawatiya kinkawanikanitan. Komo putum tuku nawanaw nakilhtiyayaw tuku wan xkachikin Jehová, namakgtayananaw pi congregación makxtum natawila chu «akgtum tapuwan» nakgalhi (1 Cor. 1:10; 4:6).

6. ¿Tuku kinkamasiyaniyan 2 Pedro 3:11-13?

⁶ (Kalikgalhtawakga 2 Pedro 3:11-13). Tuku lichuwinalh apóstol Pedro kinkamakgtayayan ni namalakatsaliyaw la akxilhaw tuku Biblia xlichuwinanit pi xʼama la. Kinkamakgpuwantiniyan ankgalhin nalakapastakaw «xkilhtamaku Jehová». ¿Tuku xlakata? Ni wa kaj xlakata katsiputunaw «kilhtamaku chu tukuya hora» nalimin Jehová Armagedón, wata katsiputunaw la namaklakaskinaw kinkilhtamakujkan xlakata “xaskulunku nawanaw chu natlawayaw tuku limasiya pi tamakamastaninitaw Dios” (Mat. 24:36; Luc. 12:40). Uma wamputun pi nalinaw kilatamatkan chuna la xlilat chu putum tuku natlawayaw nalimasiya pi paxkiyaw Jehová. Xlakata chuna natlawayaw, kuenta kilitlawatkan kintayatkan.

7. ¿Tuku kilitlawatkan xlakata kuenta natlawayaw kintayatkan? (Lucas 21:34).

⁷ Jesús ni kajwatiya kawanilh xtamakgalhtawakgen pi kuenta xtlawakgolh tuku xʼama la kxlikalanka katiyatni, wata na kuenta xtlawakgolh la xlimakgo xlatamatkan. Uma liwana limasiya tuku kawanilh kLucas 21:34 (kalikgalhtawakga). Jesús kinkamalakapastakan pi xlakaskinka kuenta natlawayaw kintayatkan o tuku tlawayaw. ¿Tuku kilhchanima pi kuenta natlawayaw kintayatkan? Kuenta natlawayaw xlakata nitu nalaktlawa la talalinaw Jehová. Uma nakinkamakgtayayan natamakgxtakgaw kxtapaxkit Dios (Prov. 22:3; Jud. 20, 21).

8. ¿Tuku tastakyaw kamaxkilh apóstol Pablo kstalaninanin Cristo?

 ⁸ Apóstol Pablo kawanilh kstalaninanin Cristo pi kuenta xlitlawatkan xwanit xtayatkan. Akgtum liʼakxilhtit, katsokgnanilh kstalaninanin Cristo xalak Éfeso: «Kuenta katlawatit pi chuna la lipimpatit milatamatkan nichuna kawa la tiku ni liwana lakapastaknankgo, wata chuna la tiku xalakgskgalalan» (Efes. 5:15, 16). Satanás tlawa putum tuku matlani xlakata nalaktlawa kintakanajlakan. Wa xlakata Biblia kinkawaniyan pi kaʼakgatekgswi «tuku xtalakaskin Jehová», chu chuna tlan natayaniyaw tuku Satanás nakinkalilakputsananiyan (Efes. 5:17).

9. ¿La naʼakgatekgsaw tuku xtalakaskin Jehová?

⁹ Biblia ni limin akgtum lista niku kinkawaniyan putum tuku laktlawaputun la talalinaw Jehová. Min kilhtamaku kiʼakstukan kililaksakatkan tuku natlawayaw akxni Biblia ni liwana wan tuku kilitlawatkan. Xlakata tlan tuku nalaksakaw, kiliʼakgatekgsatkan «tuku xtalakaskin Jehová». ¿La natlawayaw? Nalikgalhtawakgayaw xTachuwin Dios chu ankgalhin nalilakpuwanaw. Akxni tlakg liwana naʼakgatekgsaw tuku xtalakaskin Jehová chu tlakg naliskujaw xlakata nakgalhiyaw «xtalakapastakni Cristo», tlakg ni tuwa katimakgkatsiw nalikatsiyaw «chuna la tiku xalakgskgalalan», asta maski ni anan akgtum limapakgsin kBiblia nema liwana nakinkawaniyan tuku kilitlawatkan (1 Cor. 2:14-16). Makgapitsi tuku laktlawaputun la talalinaw Jehová lakapala tasiya, pero anan amakgapitsi nema tuwa naʼakxilhaw.

10. ¿Tuku kililakgmakganatkan?

¹⁰ Makgapitsi tuku tlan xlaktlawalh la talalinaw Jehová chu kililakgmakganatkan, wa akxni wi tuku tlawayaw xlakata wi tiku nalimasiyaniyaw pi lakgatiyaw, akxni malakatsaliyaw la wayaw kuchu chu la wayanaw, akxni maklakaskinaw tachuwin nema nitlan mamakgkatsininan chu akxni lilakgastananaw niku latlawanikan tuku nitlan o niku tasiya pornografía (Sal. 101:3). Kintalatlawanakan, Akgskgawini, ankgalhin lakputsama la nalaktlawa la talalinaw Jehová (1 Ped. 5:8). Komo ni kuenta natlawayaw, max tsinu tsinu natsuku staka kkintalakapastaknikan chu kkinakujkan umakgolh ni xalaktlan tayat: lalakgsitsilakankan, akgskgawinankan, lhuwa tuku kgalhiputunkan, tasitsi, tatlankit chu takiklhkatsa (Gál. 5:19-21). Xapulana max kaj tsinu chuna natsukuyaw makgkatsiyaw. Pero komo ni tunkun nalakgmakganaw, chuntiya nastaktilha chu nitlan tuku nakinkatlawaniyan (Sant. 1:14, 15).

11. ¿Tuku xlaktlawalh chuna la talalinaw Jehová, chu tuku xlakata kililakgmakganatkan?

¹¹ Kalilakpuwaw pulaktum tuku nalaktlawa la talalinaw Jehová nema ni tasiya: katalalinkan tiku nitlan likatsikgo. Kalilakpuwaw pi taskujaw chatum tiku ni xtatayana Jehová. Xlakata lakaskinaw pi tlan kakalichuwinalh xtatayananin Jehová, tlan likatsiniyaw chu makgtayayaw. Max namin kilhtamaku akxtum natsukuyaw tawayanaw, pero alistalh nalismaniyaw ankgalhin akxtum natawayanaw. Max namin kilhtamaku natsuku lichuwinan talakgxtumit nema ni xlitatlawat. Akinin nitlan katilimakgkatsiw chu ni katikgalhtiw. Pero alistalh nalismaniyaw chu nialhtu katimakgkatsiw. Alistalh, max nakinkawaniyan pi kaʼaw tapaxialhnanaw akxni nataxtuyaw ktaskujut, chu nawaniyaw pi nataʼanaw. Akxni tikatsiyaw, kinkamapasinitan nawan xtalakapastakni. Ni lhuwa kilhtamaku katititaxtulh nachuna nalikatsiyaw la xla. Xlikana pi akinin kstalaninanin Cristo tlan kalikatsiniyaw putum latamanin. Pero kalakapastakwi pi tiku katalalinaw nakinkamapasikgoyan la likatsikgo (1 Cor. 15:33). Komo natlawayaw tuku Jesús wa chu kuenta natlawayaw la linaw kilatamatkan, ni lhuwa kilhtamaku katikalimaxtuniw tiku ni xtatayananin Jehová  (2 Cor. 6:15). Naʼakxilhaw tuku nitlan nakitaxtu chu natamakgatliniyaw.

12. ¿Tuku xlitlawatkan xwanit xtamakgalhtawakgen Jesús asta akxni xchilh xlisputni kakilhtamaku?

¹² ¿Kajwatiya xʼamakgo kgalhkgalhitawilakgo xlisputni kakilhtamaku xtamakgalhtawakgen Jesús chu nitu xtlawakgolh? Ni, Jesús kalakgayawalh akgtum taskujut. Kalimapakgsilh pi xlichuwinankgolh xatlan tamakatsinin «kJerusalén, kputum Judea chu kSamaria, chu kxlikalanka katiyatni» (Hech. 1:6-8). Taskujut nema kalakgayawaka lu lanka xwanit. Pero komo lu xliskujkgolh, liwana xʼamakgo limaklakaskinkgo xkilhtamakujkan.

13. ¿Tuku xlakata lu xlakaskinka liwana namaklakaskinaw kinkilhtamakujkan? (Colosenses 4:5).

¹³ (Kalikgalhtawakga Colosenses 4:5). Xlakata kuenta natlawayaw kintayatkan, kuenta kilitlawatkan la maklakaskimaw kinkilhtamakujkan. Eclesiastés 9:11 wan pi putum kinkalakgchinan «tuku kaj xalan lay». Wa xlakata max wi tuku lakapala xkinkaʼakgspulan chu asta max xmakgatsankgaw kilatamatkan.

14, 15. ¿La tlan liwana nalimaklakaskinaw kinkilhtamakujkan? (Hebreos 6:11, 12; na kaʼakxilhti dibujo).

¹⁴ Pulaktum la tlan nalimaklakaskinaw kinkilhtamakujkan wa pi natlawayaw tuku lakaskin Jehová chu namatliwakglhaw la talalinaw (Juan 14:21). Kilistalanitkan uma xtastakyaw Biblia: «Tliwakglh katayatit chu ni kalimakgxtakgtit  mintakanajlakan, putum kilhtamaku kamalhuwitit tuku militlawatkan kxtaskujut Malana» (1 Cor. 15:58). Komo chuna natlawayaw, akxni nachin xlisputni uma kakilhtamaku, o akxni sputmaja nawan kilatamatkan, ni katililipuwaw chu ni katilakpuwaw pi tlan wi tuku tlakg xtitlawaw xpalakata Jehová (Mat. 24:13; Rom. 14:8).

¹⁵ Chuna la Jesús malaknulh, chuntiya kapulalima kstalaninanin xlakata nalichuwinankgo tamakatsinin xla Tamapakgsin kxlikalanka Katiyatni. Jesús limaklakaskima xkachikin Jehová xlakata nakinkamasiyaniyan la nalichuwinanaw xalaktlan tamakatsinin chu kinkamaxkiyan tuku maklakaskinaw xlakata tlan natlawayaw uma taskujut (Mat. 28:18-20). Tuku kinkalakgchanan natlawayaw akinin wa pi lu naliskujaw nalichuwinanaw Dios chu namasiyayaw. Na lu xlakaskinka skgalalh natawilayaw asta akxni Jehová namasputu uma kakilhtamaku. Komo nastalaniyaw xtastakyaw Hebreos 6:11, 12 (kalikgalhtawakga) ni katimakgatsankgaw kintakgalhkgalhinkan «asta kxlisputni» kakilhtamaku.

16. ¿Tuku lakpuwanitaw natlawayaw?

¹⁶ Jehová laklhkawilinita tukuya kilhtamaku namasputu xkakilhtamaku Satanás. Akxni nachin uma kilhtamaku, xla namakgantaxti tuku lichuwinanit Biblia pi nala. Chu maski min kilhtamaku lakpuwanaw pi lisputni ni lakapala chin, xkilhtamaku Jehová «¡ni katitamakgapalilh!» (Hab. 2:3). Wa xlakata, liwana lakpuwanitaw pi natlawayaw tuku wan Miqueas 7:7: «Skgalalh naktawila. Xlikana nakkgalhkgalhinan xlakata kiDios kilakgmaxtuna».