1. Ne a pati ne fai atu ne Iesu ki ana soko e uiga ki te taimi o te gataga, kae se a te mea ne fakailoa atu ne ia ki a latou?

 I NAI aso mai mua o mate a Iesu, ne fesili atu ana soko e tokofa ki a ia: “Se a foki te fakailoga . . . o te gataga o te olaga tenei?” (Mata. 24:3) Kāti ne mafau‵fau a soko konā me ka iloa pefea ne latou a te gataga o te olaga o tino Iutaia. I tena tali, ne fai atu ne Iesu a mea e uiga ki te gataga o te olaga o tino Iutaia kae penā foki loa mo “te gataga o te olaga tenei” ko ola i ei tatou. Ne fai mai a Iesu e uiga ki te taimi o te gataga: “E seai se tino e iloa ne ia te aso tenā io me ko te itula tenā, ke oko eiloa ki agelu i te lagi io me ko te Tama, e se iloa katoa ne latou, kae na ko te Tamana fua e iloa ne ia.” Oti aka, fakailoa atu ei ne ia ki ana soko katoa “ke mataala faeloa” kae “ke tumau i te matapula‵pula.”—Male. 13:32-37.

2. Kaia ne tāua ei ki Kelisiano i te senitenali muamua ke tumau i te matapula‵pula?

² Ne ‵tau mo Kelisiano Iutaia i te senitenali muamua o tumau i te matapula‵pula ko te mea ke se ‵mate latou. Ne fai atu ne Iesu ki ana soko a mea e ‵tau o lavea ne latou ke iloa ei me ko pili mai a te gataga o te olaga o tino Iutaia. Ana muna: “Kafai e lavea ne koutou a Ielusalema ko nikoi ne kautau, ka iloa ei ne koutou me ko pili mai tena fakamaseiga.” Ne ‵tau mo latou o faka‵logo ki te fakailoaga a Iesu i te taimi eiloa tenā, kae “ke na kamata o ‵tele ki luga i mauga.” (Luka 21:20, 21) A tino kolā ne faka‵logo ne ‵sao i te okomaiga a tino Loma o fakamasei a Ielusalema.

3. Ne a mea ka sau‵tala tatou ki ei i te mataupu tenei?

 ³ I aso nei, ko ola tatou i te taimi o te gataga o te olaga masei tenei. Tela la, e ‵tau foki mo tatou o ‵poto kae tumau i te matapula‵pula. I te mataupu tenei ka sau‵tala tatou ki auala ke paleni tatou i te taimi e ‵kilo atu ki mea ‵tupu i te lalolagi tenei, te auala ke ‵saga tonu ki a tatou eiloa, kae ke fakaaoga faka‵lei a taimi koi ‵toe.

4. Kaia e ‵tau ei o fia lavea ne tatou te fakataunuga o valoaga i te Tusi Tapu e auala i mea ‵tupu i te lalolagi nei?

⁴ E isi ne pogai ‵lei e ‵tau ei o fia lavea ne tatou te fakataunuga o valoaga i te Tusi Tapu e auala i mea ‵tupu i te lalolagi nei. E pelā me se fakaakoakoga, ne fai mai ne Iesu se fakasologa o mea kolā ka ‵tupu ke fesoasoani mai ke iloa ne tatou a te pili mai o te gataga o te olaga tenei a Satani. (Mata. 24:3-14) Ne fakamalosi mai te apositolo ko Petelu ke ‵saga tonu tatou ki te fakataunuga o valoaga ko te mea ke fakatumau i ei a te malosi o te ‵tou fakatuanaki. (2 Pe. 1:19-21) A te ‵toe tusi o te Tusi Tapu e kamata ki pati konei: “Se fakaasiga mai i a Iesu Keliso, telā ne tuku atu ne te Atua ki a ia, ke fakaasi atu ki ana tavini a mea kolā ko pili o ‵tupu.” (Faka. 1:1) Tela la, e fia iloa eiloa ne tatou a mea ‵tupu i te lalolagi i aso nei mo te auala e fakataunu ei a valoaga i te Tusi Tapu. Kae e fia sau‵tala foki tatou mo nisi tino e uiga ki mea konā.

5. Se a te mea e ‵tau o ‵kalo kea‵tea tatou mai ei, kae ne a ‵tou mea e ‵tau o fai? (Onoono foki ki ata.)

⁵ Kafai ko sau‵tala ki valoaga i te Tusi Tapu, ke mo a eiloa e tuku taumate ne tatou a mea kolā ka mafai o ‵tupu. Kaia? Me e se ma‵nako tatou o fai atu ne pati kolā ka fai ei ke mavae‵vae te fakapotopotoga. E pelā mo takitaki o te lalolagi, e fai‵pati latou ki auala e mafai o faka‵lei ne latou a kinauga kae ke maua te filemu mo te tokagamalie. I lō te fakaiku aka me ko fakataunu ne pati konā a te valoaga i te 1 Tesalonia 5:3, e ‵tau o iloa ne tatou a te ‵toe fakamatalaga fou ki ei. Kafai e fakavae ‵tou sautalaga ki tusi ne ‵lomi ne te fakapotopotoga a Ieova, ko fesoasoani eiloa tatou ki te fakapotopotoga ke tumau i te ‵kau fakatasi kae ke tasi i o‵tou “manatu.”—1 Koli. 1:10; 4:6.

6. Ne a mea aoga e tauloto ne tatou mai te 2 Petelu 3:11-13?

⁶ Faitau te 2 Petelu 3:11-13. E fesoasoani mai te apositolo ko Petelu ke maua ne tatou se kilokiloga paleni māfai ko mafau‵fau ki valoaga i te Tusi Tapu. E fakamalosi mai a ia ke “olioli faeloa [tatou] ki te oko mai o te aso o Ieova.” Kaia? E se ona ko te mea e ma‵nako tatou ke iloa aka a “te aso mo te itula” ka fakaoko mai ne Ieova a Amaketo, kae ona ko te mea e fia fakaaoga ne tatou te taimi koi ‵toe ke fai tatou mo tino kolā “e ‵malu olotou amioga kae tapuaki fakamaoni ki te Atua.” (Mata. 24:36; Luka 12:40) I nisi tugapati, e ma‵nako tatou o fakatumau ‵tou amioga ‵ma kae ke fakamautinoa me e fakaasi atu i ‵tou galuega e fai i te taviniga ki a Ieova a te ‵poko o te ‵tou a‵lofa mō ia. Ke maua te kilokiloga tenā, e ‵tau mo tatou o ‵saga tonu ki a tatou eiloa.

7. E fakaasi atu pefea me ‵saga tonu tatou ki a tatou eiloa? (Luka 21:34)

⁷ Ne fai atu a Iesu ki ana soko ke ‵saga tonu ki mea ‵tupu i te lalolagi kae penā foki ki a latou eiloa. E fakaasi manino mai a te manatu tenā i te fakailoaga ne fakamau i te Luka 21:34. (Faitau.) Mafaufau ki pati a Iesu: “‵Saga tonu ki a koutou eiloa.” A te tino telā e saga tonu ki a ia eiloa e lavea ne ia so se mea  fakamataku telā e mafai o fakamasei i ei tena fesokotakiga mo Ieova, kae taumafai o ‵kalo kea‵tea mai i ei. Mai te fai penā, ka tumau eiloa a ia i te alofa o te Atua.—Faata. 22:3; Iuta 20, 21.

8. Se a te fakamalosiga ne fai atu ne Paulo ki Kelisiano?

⁸ Ne fakamalosi atu te apositolo ko Paulo ki Kelisiano ke ‵saga tonu ki a latou eiloa. Ne fai atu a ia ki Kelisiano i Efeso: “Fakaeteete faeloa koutou i te auala e sa‵sale ei koutou, e se pelā me ne tino va‵lea kae e pelā mo tino ‵poto.” (Efe. 5:15, 16) Ko tu ‵tou tulaga faka-te-agaga i se tulaga fakamataku, tela la, e polopoloki mai te Tusi Tapu ke “fai ke iloa faeloa ne [tatou] me se a te loto o Ieova” ko te mea ke iloa ne tatou o fakafesagai atu ki so se tulaga fakamataku.—Efe. 5:17.

9. E iloa pefea ne tatou a te loto o Ieova mō tatou?

⁹ E se taku mai i te Tusi Tapu a mea fakama‵taku takitasi kolā e mafai o fakamasei i ei ‵tou va fakataugasoa mo Ieova. E masani o fai ne tatou a fakaikuga e uiga ki mea kolā e se taku ‵tonu mai i te Tusi Tapu. Ko te mea ke fai se fakaikuga tonu, e ‵tau o iloa ne tatou a “te loto o Ieova.” E mafai o fai ne tatou te mea tenā mai te sukesuke faeloa ki te Muna a te Atua kae mafaufau ‵loto ki ei. Ko te lasi o te ‵tou malamalama i te loto o Ieova kae ati aka “te mafaufau o Keliso,” ko te momea aka foki o te fai o tatou “e pelā mo tino ‵poto,” faitalia foki loa me seai ne tulafono mautinoa ke takitaki ki ei ‵tou amioga. (1 Koli. 2:14-16) Nisi mea fakama‵taku e laveagofie fua; kae ko nisi mea e faigata o lavea atu.

10. Ne a nisi mea fakama‵taku e ‵tau o ‵kalo kea‵tea tatou mai i ei?

¹⁰ A nisi mea fakama‵taku kolā e ‵tau o ‵kalo kea‵tea mai i ei ko te fakatāgata io me ko te fakafāfine, te inu malosi, te gafula, pati fakalogo‵mae e pelā foki mo te onoono ki fakafiafiaga kolā e fakamalosi ei a amioga fakasaua, ata ma‵sei, mo nisi mea penā. (Sala. 101:3) A te ‵tou fili ko te Tiapolo, e onoono mai faeloa ki avanoaga ke fakamasei ei ‵tou va fakataugasoa mo Ieova. (1 Pe. 5:8) Kafai e se fakaeteete tatou, e mafai o ‵toki ne Satani i ‵tou mafaufau mo loto a fuaga o te kaisano, se fakamaoni, kaimanako, uiga takalialia, fakamatamata, mo te ita fakamoemoe. (Kala. 5:19-21) E mafai o se ma‵losi ‵ki a manakoga konei i te taimi muamua. Kae kafai e se ga‵sue fakavave tatou o unu kea‵tea, ka ola aka latou e pelā me se lakau poisini telā ka faka‵tupu ne ia a fakalavelave.—Iako. 1:14, 15.

11. Se a te mea fakamataku telā e faigata o lavea atu e ‵tau o ‵kalo kea‵tea tatou mai i ei, kae kaia?

¹¹ Tasi o mea fakamataku telā e faigata o lavea ne tatou ko taugasoa ma‵sei. Mafaufau ki te tulaga tenei. E ga‵lue tasi koe i se galuega ‵togi mo se tino telā e se ‵pau lua talitonuga faka-Kelisiano. E manako koe ke maua ne tou soa galue se kilokiloga ‵lei ki Molimau a Ieova, tela la, e fakaasi atu ne koe te uiga atafai mo te loto fesoasoani. Kāti ka talia foki ne koe ke olo fakatasi koulua o ‵kai i tutonu e uke. E seki leva, kae ko fai eiloa e pelā me se mea masani. Nisi taimi ko ma‵fuli lua tala ki tala sē ‵lei, kae ne seki fiafia koe ki ei i te taimi muamua. Fakamuli ifo, ko masani koe ki vaegā sautalaga penā kae ko se ita foki ki ei. Kae i te aso e tasi, ko ‵kami koe ne tou taugasoa ke olo koulua o inu māfai ko malō‵lō, kae talia ne koe. Fakamuli loa, ko kamata koe o mafaufau pelā mo tou taugasoa. Mai konā, e mata, e pefea te leva kae ka kamata o fai ne koe a mea e fai ne tou taugasoa? E tonu, e atafai kae āva tatou ki tino katoa, kae ke mo a ma puli me ka fai eiloa tatou e pelā mo tino kolā e uke ‵tou taimi e fakamāumāu mo latou. (1 Koli. 15:33) Kafai e ‵saga tonu tatou ki a tatou eiloa, e pelā  mo pati fakamalosi a Iesu ki a tatou, ka ‵kalo kea‵tea tatou mai te sōna ‵kau fakatasi mo tino kolā e se ola e ‵tusa mo tulaga o Ieova. (2 Koli. 6:15) Ka lavea ne tatou te mea fakamataku kae ‵tele kea‵tea mai i ei.

12. Se a te mea e ‵tau o fai ne soko o Iesu i te taimi e faka‵tali ei ki te gataga o te olaga tenei?

¹² A soko o Iesu e se ‵tau o saga‵saga fua kae faka‵tali ki te gataga o te olaga tenei. E isi se galuega ne tuku atu ne Iesu ke fai ne latou. Ne fakatonu atu a ia ki a latou ke talai atu te tala ‵lei “i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.” (Galu. 1:6-8) Ko oko loa i te lasi o te galuega e ‵tau o fai ne soko o Iesu! Ko fakaaoga faka‵lei eiloa ne latou olotou taimi, mai te faiga o te ‵toe mea e mafai o fai ke talai atu ki tino.

13. Kaia e ‵tau ei o fakaaoga faka‵lei ne tatou a ‵tou taimi? (Kolose 4:5)

¹³ Faitau te Kolose 4:5. Ko te mea ke ‵saga tonu ki a tatou eiloa, e ‵tau o mafaufau faka‵lei tatou ki te auala ke fakaaoga ei ‵tou taimi. E mafai o pokotia a tatou taki tokotasi i “mea ‵tupu fakafuasei.” (Fai. 9:11) E mafai fua o ‵mate fakapoi tatou.

14-15. E fakaaoga faka‵lei pefea ne tatou a ‵tou taimi? (Epelu 6:11, 12) (Onoono foki ki te ata.)

¹⁴ E mafai o fakaaoga faka‵lei ne tatou a ‵tou  taimi mai te faiga o te loto o Ieova kae fakamalosi aka ‵tou va fakataugasoa mo ia. (Ioa. 14:21) E ‵tau mo tatou o tu ‘‵mautakitaki sa gasue‵sue, kae fai faeloa ke uke o‵tou galuega e fai i te galuega a te Aliki.’ (1 Koli. 15:58) Kafai ko oko mai te gataga—faitalia me ko te gataga o ‵tou ola io me ko te gataga o te olaga masei tenei—ka se sala‵mo eiloa tatou.—Mata. 24:13; Loma 14:8.

¹⁵ I aso nei, koi tumau eiloa i te takitaki ne Iesu ana soko i te taimi e talai atu ei ne latou a mea e uiga ki te Malo o te Atua i te lalolagi kātoa. Ko fakataunu eiloa ne ia tena tautoga. E auala i te fakapotopotoga a Ieova, e akoako ne Iesu tatou ke iloa o talai kae tuku mai ne ia a mea faigaluega e manakogina ne tatou ke fakasalalau atu i ei te tala ‵lei. (Mata. 28:18-20) A ‵tou tusaga ko te ga‵lue malosi i te talai mo te akoako atu kae tumau i te matapula‵pula i te taimi e faka‵tali tatou ke fakaoko mai ne Ieova te gataga ki te olaga tenei. Mai te fakagalue aka a pati fakatonutonu i te Epelu 6:11, 12, ka puke ‵mautakitaki tatou ki te ‵tou fakamoemoega “ke oko eiloa ki te fakaotiga.”—Faitau.

16. Se a te mea ka fakaiku aka ne tatou ke fai?

¹⁶ Ko oti ne fakatoka ne Ieova a te aso mo te itula telā ka fakaseai atu ei ne ia a te lalolagi tenei a Satani. Kafai ko oko mai te aso tenā, e mautinoa eiloa me ka fakataunu ne Ieova a valoaga kolā ne fakamau ne ia i tena Muna. I nisi taimi, kāti e mafai o foliga tuai a te gataga o te olaga tenei. Kae ko te aso o Ieova “ka se tuai eiloa!” (Sapa. 2:3) Tela la, ke na fakaiku aka ne tatou ke “tumau . . . i te kilokilo atu ki a Ieova,” kae fakaasi atu te “nofo fakatalitali . . . ki te Atua o [te ‵tou] fakaolataga.”—Mika 7:7.