1. Eaha ta Iesu i parau i ta ˈna mau pǐpǐ no nia i te “hopea” e eaha te faaararaa ta ˈna i horoa ˈtu?

 TAU mahana hou Iesu a haapohehia ˈi, ua ani e maha o ta ˈna mau pǐpǐ ia ˈna: “Eaha te tapao . . . [o] te anotau hopea o te ao nei?” (Mat. 24:3) Peneiaˈe, ua ani teie mau pǐpǐ e nafea ratou e ite ai afea Ierusalema e te hiero e haamouhia ˈi. Papu, ua pahono Iesu i ta ratou uiraa. Ua faahiti atoa râ o ˈna i “te anotau hopea o te ao nei,” oia hoi, te anotau ta tatou e ora nei. Ua parau atoa Iesu: “No nia i te reira mahana aore ra te hora, aita te hoê i ite, aita atoa te mau melahi i te raˈi e aita atoa te Tamaiti, o te Metua anaˈe râ.” Faaara ˈtura Iesu i te mau pǐpǐ ia “ara” e ia “ara noa.”—Mar. 13:32-37.

2. No te aha mea faufaa no te mau Kerisetiano ati Iuda matamua ia vai ara?

² Ua titauhia i te mau Kerisetiano ati Iuda matamua ia vai ara ia nehenehe ratou e faaorahia. Ua horoa Iesu i ta ˈna mau pǐpǐ i te hoê tapao no te tauturu ia ratou ia ite afea Ierusalema e haamouhia ˈi. Ua parau o ˈna: “Ia ite outou ia Ierusalema ia haaatihia e te nuu, ua fatata ïa oia i te mou.” I taua taime ra, ua titauhia ia ratou ia pee i to Iesu faaueraa e “ia horo . . . i te mau mouˈa.” (Luka 21:20, 21) O te feia anaˈe tei faaroo i te faaararaa a Iesu tei ora mai i to Roma haamouraa ia Ierusalema.

3. Eaha ta tatou e hiˈopoa i roto i teie tumu parau haapiiraa?

³ I teie mahana, te ora nei tatou i te anotau hopea o teie nei ao ino. No reira, no tatou atoa teie faaararaa ia haapao maitai e ia ara noa. I roto i teie tumu parau haapiiraa, e hiˈopoa tatou e nafea ia vai ara a mataitai ai i te mau tupuraa na te ao nei. E ite atoa tatou e no te aha mea  faufaa ia haapao maitai ia tatou iho e e nafea ia faaohipa maitai i to tatou taime.

4. No te aha tatou e haapao maitai ai e nafea te mau tupuraa itehia na te ao nei e faatupu ai i te mau parau tohu Bibilia?

⁴ Mea faufaa no tatou ia ite e nafea te mau tupuraa itehia na te ao nei e faatupu ra i te mau parau tohu Bibilia. Ei hiˈoraa, ua faaite mai Iesu i te tahi mau tupuraa taa maitai no te tauturu ia tatou ia ite afea teie nei ao e haamouhia ˈi. (Mat. 24:3-14) Ia vai puai noa to tatou faaroo, ua faaitoito te aposetolo Petero ia tatou ia haapao maitai i te tupuraa o te mau parau tohu Bibilia. (Pet. 2, 1:19-21) Teie te parau matamua e taiohia i roto i te buka hopea o te Bibilia: “E heheuraa na Iesu Mesia, ta te Atua i horoa ˈtu ia ˈna no te faaite i ta ˈna mau tavini i te mau mea e fatata i te tupu.” (Apo. 1:1) No reira tatou e haapao maitai ai i te mau tupuraa itehia na te ao nei e e nafea te reira e faatupu ai i te mau parau tohu Bibilia. Hau atu, mea au roa paha na tatou ia tauaparau no nia i te reira e to tatou mau taeae e tuahine.

5. Eaha ta tatou e vai ara, eaha râ te titauhia ia tatou ia rave? (A hiˈo atoa i te mau hohoˈa.)

⁵ Ia paraparau tatou no nia i te mau parau tohu Bibilia, eiaha e tamata i te tatara i te auraa aore ra i te imi eaha te tupu. No te aha? No te mea eita tatou e hinaaro e parau i te tahi noa ˈˈe mea ia amahamaha te amuiraa. Ei hiˈoraa, e faaite paha te mau tia mana eaha ta ratou e rave no te faaafaro i te tahi tupuraa fifi mau. E parau atoa paha ratou e e hopoi ratou i te hau e te ati ore. Eiaha ïa tatou e faaoti oioi e ua tupu te parau tohu o te Tesalonia 1, 5:3. E tia râ ia tatou ia ite papu eaha mau na te mau faatanoraa apî. Ia faaohipa tatou i te mau papai ta te faanahonahoraa a Iehova e horoa mai ra, e tauturu tatou ia vai te amuiraa i roto i te “hoê â aratairaa manaˈo.”—Kor. 1, 1:10; 4:6.

6. Eaha te mau haapiiraa e huti mai i te Petero 2, 3:11-13?

⁶ A taio i te Petero 2, 3:11-13. Ua faaitoito Petero ia tatou ia feruri no te aha mea faufaa ia hiˈopoa maite tatou i te mau parau tohu Bibilia. Ua faaara mai o ˈna ia “haamanaˈo noa . . . i te taeraa mai o te mahana o Iehova.” No te aha? E ere ïa no te ite i ‘te hora e te mahana’ e tae mai ai Aramagedo, no te riro râ “ei taata haerea moˈa . . . o te rave i te mau ohipa tei au i te haamoriraa i te Atua anaˈe.” (Mat. 24:36; Luka 12:40) Te auraa ïa, e tutava tatou i te tapea noa i te hoê haerea tia e i te faaite papu e na te here ia Iehova e turai ra ia tatou ia tavini ia ˈna. Ia naeahia tera fa, e mea faufaa ia haapao maitai tatou ia tatou iho.

7. E nafea tatou e haapao maitai ai ia tatou iho? (Luka 21:34)

⁷ Ua ani Iesu i ta ˈna mau pǐpǐ eiaha noa ia haapao i te tahi mau tupuraa i tera ra tau, ia haapao atoa râ ia ratou iho. Ua faahitihia ta ˈna aˈoraa i roto i te Luka 21:34. (A taio.) Teie hoi ta Iesu i parau atu: “A haapao maitai . . . ia outou iho.” Hoê Kerisetiano o te haapao maitai ra ia ˈna iho, e vai ara ïa o ˈna ia ore oia ia atea ia Iehova. E rave atoa o ˈna i te maraa ia ˈna no te paruru i te reira. A na reira ˈi, te tamau ra o ˈna i te rave i te mau mea  atoa e here ai te Atua ia ˈna.—Mas. 22:3; Iuda 20, 21.

8. Eaha te aˈoraa ta te aposetolo Paulo i horoa i te mau Kerisetiano?

⁸ Ua parau te aposetolo Paulo i te mau Kerisetiano ia haapao maitai ia ratou iho. Ei hiˈoraa, ua na ô o ˈna i to Ephesia: “A haapao maite i to outou haerea, e ia au hoi i to te feia feruriraa paari eiaha râ i to te maamaa.” (Eph. 5:15, 16) Te tamata noa ra Satani i te haafifi i to tatou auhoaraa e o Iehova. No reira te Bibilia e faaitoito mai ra ia taa noa ia tatou eaha “te hinaaro o Iehova,” ia nehenehe tatou e mau papu i mua i te mau faahemaraa a Satani.—Eph. 5:17.

9. E nafea tatou e ite ai eaha te hinaaro o Iehova no tatou?

⁹ Aita te Bibilia e faahiti ra i te mau mea atoa o te nehenehe e haafifi i to tatou auhoaraa e o Iehova. E tia ïa ia tatou ia rave i te faaotiraa noa ˈtu aita e aratairaa Bibilia taa maitai no tera tupuraa. No reira, mea faufaa ia taa ia tatou eaha “te hinaaro o Iehova” ma te tamau i te taio i ta ˈna Parau e ma te feruriruri i nia i te reira. Rahi atu â tatou i te taa i te hinaaro o Iehova e i te faatupu i “te manaˈo o te Mesia,” rahi atu â ïa tatou i te haa mai “te feia feruriraa paari,” noa ˈtu aita e faaueraa taa maitai o te parau eaha te tia ia tatou ia rave. (Kor. 1, 2:14-16) I te tahi taime, mea ohie no tatou ia tapao eaha te mau tupuraa o te tia ia ape, i te tahi râ mau taime, mea fifi rii ia ite papu i te reira.

10. Eaha te tahi mau peu te tia ia tatou ia haapae?

¹⁰ E tia ia tatou ia haapae i te tahi mau peu mai te mau peu faahinaaro tano ore, te inu-hua-raa, te amu-rahi-raa i te maa, te mau parau teimaha o te haamauiui ia vetahi ê, te mau faaanaanataeraa tano ore, te mataitairaa i te mau hohoˈa faufau e te vai atu â. (Sal. 101:3) Te moemoe noa ra Satani i te tahi ravea no te faaatea ê ia tatou ia Iehova. (Pet. 1, 5:8) Ia ore tatou ia vai ara, e nehenehe Satani e turai ia tatou ia faatupu i te feii, te faahitiraa i te mau parau haavare, te nounou, te riri, te teoteo e te inoino. (Gal. 5:19-21) I te omuaraa, e ere paha teie mau hinaaro tano ore i te mea puai. Ia ore râ tatou e haa oioi no te haapae roa i te reira, e aˈa roa ïa te reira i roto ia tatou.—Iak. 1:14, 15.

11. Eaha te tahi marei te tia ia tatou ia vai ara e no te aha?

¹¹ Hoê o te mau marei te tia ia tatou ia vai ara, o te mau amuimuiraa iino. Te ohipa ra oe e te hoê taata e ere i te Ite no Iehova. E hinaaro oe ia taa ia ˈna e mea maitai te mau Ite no Iehova, hamani maitai atura oe ia ˈna ma te tauturu atu. E tamaa atoa paha orua. Pinepine atura orua i te tamaa i te taime faafaaearaa. I te tahi taime, e faahiti teie hoa ohipa i te tahi mau parau faufau, noa ˈtu aita oe e au ra eita râ oe e haapao atu. I muri iho râ, ua matau roa oe i te faaroo i ta ˈna e parau, aita ˈtura ïa oe e huru ê faahou ra i ta ˈna huru paraparau. I te hoê mahana, titau mai nei o ˈna ia farerei orua ia faaoti anaˈe te ohipa, e e farii oe. Haamata ˈtura oe i te manaˈo mai ia ˈna e i te hopearaa, e pee atoa oe i to ˈna haerea. Papu, e faaite iho â tatou i te maitai e te tura i nia i te mau taata atoa, mea faufaa râ ia haamanaˈo e e pee hanoa tatou i te huru o te feia ta tatou e amuimui ra. (Kor. 1, 15:33) Ia haapao tatou ia tatou iho, mai ta Iesu i ani mai, eita ïa tatou e amuimui i te feia o te ore e faatura i te  mau ture aveia a Iehova. (Kor. 2, 6:15) Ia ite maitai tatou i teie marei, e ape tatou i te reira.

12. Eaha ta te mau pǐpǐ i rave a tiai ˈi noa ˈi te anotau hopea o te ao nei?

¹² Ua horoa Iesu i ta ˈna mau pǐpǐ i te hoê ohipa taa ê a tiai noa ˈi te anotau hopea o te ao nei. Ua faaue oia ia ratou ia poro i te parau apî oaoa “na Ierusalema, na Iudea taatoa, na Samaria e tae noa ˈtu i te hopea o te fenua.” (Ohi. 1:6-8) E ere roa ˈtu te reira i te ohipa nainai. Ua faaohipa maitai râ te mau pǐpǐ i to ratou taime, ma te rave i tei maraa ia ratou no te poro i te mau taata atoa.

13. No te aha mea faufaa ia faaohipa maitai tatou i to tatou taime? (Kolosa 4:5)

¹³ A taio i te Kolosa 4:5. No te haapao maitai ia tatou iho, mea faufaa ia faaohipa maitai i to tatou taime. E nehenehe hoi tatou pauroa e roohia i “te tupuraa manaˈo-ore-hia.” (Koh. 9:11) E nehenehe atoa tatou e pohe taue noa.

14-15. E nafea tatou e faaohipa maitai ai i to tatou taime? (Hebera 6:11, 12) (A hiˈo atoa i te hohoˈa.)

¹⁴ E nehenehe tatou e faaohipa maitai i to tatou taime ma te rave i to Iehova hinaaro e ma te haapuai i to tatou auhoaraa e o ˈna. (Ioa. 14:21) E tia ia tatou ‘ia  mau papu, eiaha ia aueue e ia rahi noa ta tatou ohipa i roto i te Fatu.’ (Kor. 1, 15:58) Ma te na reira, ia tae noa mai te hopea o teie nei ao aore ra ia pohe noa ˈtu tatou, eita tatou e tatarahapa noa ˈˈe.—Mat. 24:13; Roma 14:8.

¹⁵ I teie mahana, te aratai noa ra Iesu i ta ˈna mau pǐpǐ i roto i te ohipa pororaa i te parau apî oaoa o te Faatereraa arii a te Atua na te ao atoa nei. Ua rave iho â Iesu mai ta ˈna i fafau. I te mau putuputuraa e na roto i ta tatou mau papai, te haapii ra Iesu ia tatou e nafea ia poro e te horoa atoa mai ra o ˈna i te mea atoa ta tatou e hinaaro no te haapao maitai i tera ohipa pororaa. (Mat. 28:18-20) E rave ïa tatou i ta tatou tuhaa ma te haa rahi i roto i te pororaa, ma te haapii ia vetahi ê e ma te haapao maitai ia tatou iho a tiai noa ˈi i te hopea o teie nei ao. Ia faaohipa tatou i tei parauhia i roto i te Hebera 6:11, 12, e tapea maite ïa tatou i to tatou tiaturiraa “e tae noa ˈtu i te hopea.”—A taio.

16. Eaha ta tatou e faaoti papu i te rave?

¹⁶ Ua faaoti aˈena Iehova i te hora e te mahana e haamou ai oia i te ao ino a Satani. I taua mahana ra, e faatupu Iehova i te mau parau tohu ta ˈna i faaite i roto i te Bibilia. I te tahi râ taime, e hinaaro paha tatou ia tae oioi mai te reira. Tera râ, eita te mahana o Iehova “e taere.” (Hab. 2:3) E faaoti papu anaˈe ïa i te “moemoe . . . ia Iehova” ma te faaite e te tiai ru nei tatou “i te Atua o te faaora ia [tatou].”—Mika 7:7.