1. (a) “Kunum porninda kunum” min wonda bar, Jises disaipol aiem man nengo, nal panim? (b) Kanpol tonam ne, nal yu ende nengom?

 JISES gora mand wei erim kunum, disaipol 4-poro olom ki ngo embe ninjip: “Nawal ende min wo taninde . . . porninda kunum min wonom ne pilkane enamen?” (Mat. 24:3) Disaipol ga e, Jerusalem na olom tempol aiem bol nal kunum wei tokes moksam kanamen, ne bu puli kele ki sinjip. Jises ki pundom ngom bar, Jerasulem na tempol tokes moksam mal mongse nanim. Yipe kenem kunum, “kunum pordom bar meimen,” wal min wonda mal pra nim eri. Kunum porninda kunum min wonda bar, Jises yu pende ne embe nim: “Nal kunum mo anj dunglom kun alamb ende na kanim, enjol walem min epen meim nakanim, Ngangem pra nakanem, ba Dam mongse kanem.” Jises disaipol aiem man kanpol tonam yu pende embe nim: “enem wur napa kane moram.”—Mak 13:32-37.

2. Komna kristen Juda kantawol enjip bar mento monjip, nalende kanpolto moram wal kerma pam?

² Komna Kristen monjip, kanpol tonam bar pakerondo kol moram pam. Jises, disaipol aiem man nawal pende min wonda bar, Jerusalem tokes moksam kunum min wonom ne pilkane enam mal nengom. Olom embe nim: “Enem kanambe ami wo Jerusalem sipok enjip dal, olom tokes moksam mand wonom ne pilkane enam.” Kunum ele, Juda ga Jises yu nim karkar ere, “ke semin kimbem a punam pam.” (Luk 21:20, 21) Jises nim yu karkar enjip ga, Rom ami wo Jerusalem tokes monjip kunum enjep kol monjip.

3. Yu duwom yipe enamen bar, nawal omukro kanamen?

³ Kenem yipe mambnem kes paim porninda, mand wei erim bar meimen. Embe pile, kenem bunuman ka karkar ere, kanpolto moramen. Yu duwom yipe enamen bar,  kenem wal talende omukro kanamen, e wal kerma kerma ya mala pende min wonom kenem omuk manero, kenem kenem kanpolto moramen, ala kunum ipal pende seim kenem nalmal konganem ka enamen mal omukro kanamen.

4. Ombun kerma pende min wo, Baibel yu propet ne mokum mongom tondo kanmen bar, nalende kapisamen?

⁴ Mala ombun kerma kerma pende min wo, Baibel yu propet ne mokum mongom weironom bar, mem ka pande kenem kapismen. Ende embe mal, Satan yipe mal kantawol enem, porninda mand enda kunum, wal pende min wonda mal, Jises kangem kun wei nim. (Mat. 24:3-14) Aposol Pita nim, yu propet yipe weieri mongom tonom enem pilkane ere, buro pisam bar pilgi er dongal enda panim. (2 Pita 1:19-21) Baibel buk Revelesen a yu pulnom borom bar, embe dom: “Jises Krais, wal pende yipe min wonda mand enem yu okul pam, Got ne olom ngom, olom ne konganem alamb ngom” (Rev. 1:1) Embe pile, mala wal kerma pende min wonom, omukronamen erkelde, Baibel yu propet ne mokum weieri mongom tonom, pilkane enamen. Ala yu propet e, alamb ende bol, yu bol tonamen kapisamen.

5. Kenem nawal ende tuiro, ala nawal ende enamen?

⁵ Kenem Baibel yu propet meim, ende bol, boltonamen kunum, kanpol naronamen wal ende ne nangonamen. Nalende embe nimen? Nalenem, embe enamen erkelde kongrikeisen, kumbol ding nasenda. Ende embe mal, ombun ende min wonda bar mala yenom pende yu ne ding kele, ombun e tomen kele kumbol amin sende buning moramen paninam. Embe ninam bar, kenem kanpolnaro 1 Tesalonaika 5:3 a yu pam mongom wei tonom, pananinamen. Kenem wal ende enamen e, bunuman ka pam kongan ga buk na nus er kesim bar, yu e bol nal panim kunum kunum omukro kanamen. Ga e, “wusngam a mongse, kenem pilgi a dongal moramen mokun kunum kun sinamen ne, Jises erkun erim.” (Mat. 24:45) Kenem Baibel buk na nus a yu meim, mongse bolto nepinjin dal, pakerondo kongrikeisen kumbol ding moramen, ala “bunuman ding mal abramen.”—1 Kor. 1:10; 4:6.

6. 2 Pita 3:11-13 yu paim bar, kenem nawal pende duwom esmen?

⁶ 2 Pita 3:11-13 gere. Aposol Pita yu nim, kenem pakerondo nalmem pande Baibel yu propet meim, omuk mane tonamen mal pilkane esmen. Olom nim, “kenem Johova kunum min wonda mane buro pile, kui moya nim.” Nalende embe enamen? Kenem embe enamen e, “nal kunum na anj dunglom kun” Johova nganmal Amagedon simin kera kanpol tonamen ne nasmen ma. Kenem embe esmen nalenem, kunum ipal sem konganem ka ere, “mambnem kuru karkar ere, Johova konganem kumbol ngo enamen ne esmen.” (Mat. 24:36; Luk 12:40) Mo yu ende ninamen, kenem kongan embe enamen bar, Johova kanka kanmen mem taninamen. Embe enamen pakerondo, kenem kenem kanpolto moramen.

7. Kenem nawal pende enamen bar, kanpolto meimen mem taninamen? (Luk 21:34)

⁷ Jises disaipol aiem man ya mala wal min wonom mal, kanpol tonam mal  mongse nenangom, enjep enjep kanpol tonam mal nengom eri. Kanpol tonamen yu ende, Luk 21:34 a paim ne au dom. (gere.) Jises embe nim: “Enem enem kanpol tonam.” Kanpolto meim alamb, wal ende min wo Johova bol senonom mem tokes moksa ne enem, tuironom. Embe enem bar, olom Got kanka mem a tuwalto meim.—Prov. 22:3; Jut 20, 21.

8. Aposol Pol Kristen ga nengo, nawal ende enam panim?

⁸ Aposol Pol Kristen ga nengo, enem enem kanpol tonam panim. Ende embe mal, olom Efesus Kristen ga nengo embe nim: “Enem kol wanam bar kanpol weiro, bunuman ka napaim alamb kol wanim mal embe nawanam, ba, bunuman kapaim alamb kol wanim mal embe wanam.” (Efe. 5:15, 16) Satan kunum kunum kenem pilgi wal tokes moksa enem, embe pile, Baibel dom ne, kenem “Johova nawal kapisem” wal kanpol toya dom. Embe enamen pakerondo, ombun min wonda tuironamen.—Efe. 5:17.

9. Johova kenem enamen ne kapisem wal, nalmal kanpol tonamen?

⁹ Kenem Johova bol senomon mem, tokes moksa wal Baibel monkel nadom. Wal pende kun nadom, enamen mo nanamen kenem kenem omuk mane tonamen. Embe pile, kenem bunuman ka karkar enamen ne pinjin dal, “Johova nawal kapisem” mane omukro kanpol tonamen. Embe enamen e, kenem Johova Yuwom mane duwom ere, buro pisamen. Baibel a, kenem wal ende enamen mal kun neori nakera, ba kenem ombol ere, Johova kapisem wal kanpol tonjin dal, “Krais bunuman paim mal” ding mal sinamen, ala “bunuman kapaim alamb” kol wanim mal embe wanamen. Lo ende kun pa kenem embe embe eya nadom. (1 Kor. 2:14-16) Ba, kunum pende ne, kenem tuironamen wal penem pande pilkane esmen, ba kunum pende ne kanpol tonamen amin napaim.

10. Nal mambnem kes pende meim, kenem tuironamen?

¹⁰ Kenem mambnem kes pende tuironamen e embe mal, pasdia mem, mokun puli nom mem, nol bia puli nom mem, alamb ende kumbol mul ngonom yu, mambnem kes esim alamb bol taprom mem, opnganmal esim piksa kanim, ye amb pasida esim kanim piksa, ala wal pende pra. (Sng. 101:3) Kenem opyem ye satan, olom wusngam kanem kanem kansi, Johova bol senomon mem, kunum kunum tokes moksa enem. (1 Pita 5:8) Embe pile, kanpol naronjin dal, olom erkelde ende bol kumbol kes tonamen, yu gend ninamen, wal bubon goramen, ende kankes kanamen, molmin mem enamen, ala kumbol mul sinamen. (Gal. 5:19-21) Yero, mambnem e nim kumbol na bunuman tokes namoksa ne pisel. Ba nim wal ende ere, bunuman kes e, wamnam nasiken dal, bupol kes ende, bol min wo wai dom mal, erkelde nim wal napaim mal endel.—Jems 1:14, 15.

11. Nal mambnem ende kenem tokes moksa okul er paim kanpol tonamen, nalende embe enamen?

¹¹ Nal mambnem ende kenem tokes moksa, okul er paim kanpolto tuironamen? Wal ende min wonda mal buro pile. Nim ku kongan endel bar, ende Johova Witnis namora alamb bol kunum kunum kongan ai enambel. Elep kongan ai esbel alamb, Johova Witnis bol kapisa ne nim olom pakero, mambnem ka enen, ala kunum pende ne elep bele mokun ai nombol. Kanan wonapundo elep tap  kunum kunum tombol. Kunum pende ne olom mambnem kes yu bol tonom. Yero nim tuiro napisal ne enen. Kunum pende wopundo, nim yu e kunum puli pisen pile, kumbol yu napaim, tuironal ne napisen. Kunum ende nim kongan ding alamb e, kongan porninda kunum, nol nonambel padom nim kaple padon. Embe erpu, nim kongan ding alamb mambnem aiem sinen. Weieri, kenem alamb porpor bol mambnem ka enamen ne pismen, ba kanpol tonamen nalenem enjep mambnem aijep kenem sinamen. (1 Kor. 15:33) Jises nim yu karkar ere kenem kanpol wei tonjin dal, Johova lo karkar nasim alamb tuiro tap naronamen. (2 Kor. 6:15) Kenem ombun sinamen panda kane, tuironamen.

12. Jises disaipol walem porninda, kunum min wonda ne, kui enjip kunum nawal pende enam pam?

¹² Jises disaipol aiem man porninda kunum min wonda ne, kui moram kunum, ei namoram kongan pende enam nepim. Olom enjep nengo, Baibel yu ka neori keram panim. Olom enjep nengo, Baibel yu ka “Jerusalem, Judia, Samaria, na mal tabem yemyem poro neori keram panim.” (Apo 1:6-8) E, kongan kerma wei  ende disaipol ga sinjip! Kongan e, kumbol wei ngo enjip bar, enjep anj dunglom konganem ka enjip.

13. Nalende kenem anj dunglom, konganem ka enamen? (Kolosi 4:5)

¹³ Kolosi 4:5 gere. Kenem kanpolto moramen nepinjin dal, anj dunglom konganem nalmal esmen pilkane enamen. “Min wonda ne napismen wal” kenem porpor bol min wonda. (Ekl. 9:11) Kol mem wakronamen eri.

14-15. Kenem anj dunglom, nalmal konganem ka enamen? (Hibru 6:11, 12)

¹⁴ Kenem anj dunglom konganem kawei enamen e, Johova konganem ere, olom bol senomon mem er dongal enamen. (Jon 14:21) Kenem “akilgi ne dongal molo kerma konganem puli enamen.” (1 Kor. 15:58) Kenem embe er monjin dal—goramen mo mambnem kes yipe paim porninda kunum min wonda—kawei pisamen.—Mat. 24:13; Rom 14:8.

¹⁵ Yipe, Jises olom disaipol aiem man mal tabem yem yem, Got gapman yu neori kesim kantawol enem. Olom enal panim wal er kaple enem. Johova okanaiseisen wusngam a, Baibel yu ka neori keramen mal duwom ka erngo, konganem wal pra ngonom eri. (Mat. 28:18-20) Kenem Jises nim yu karkar ere, kunum kunum ombol ere, Baibel yu neori kele, alamb ende duwom erngomon. Embe esmen bar pakerondo, mambnem kes yipe paim Johova to porninda kunum min wonda bar, kui meimen. Kenem pilsinamen yu Hibru 6:11, 12, a paim, karkar enjin dal, kenem wal ka pilgi ne kui esmen, ambilgi ne molpu “kunum porninda bar punamen.”—Gere.

16. Kenem nawal ende enamen ne, bu dongal panda?

¹⁶ Satan yipe mal kantawol enem, Johova nal kunum na, nal anj dunglom kun to proninda enge er kem paim. Kunum kun min wonda kunum, Johova yu propet poro ne kem Baibel a meim erkelde mongom wei tonda. Ba kenem yipe, kunum pende ne Johova wal enal panim kamkam nanem nepisamen. Ba, Johova enal padom wal, “kunum aiem a kun wei min wonda!” (Hab. 2:3) Embe pile, kenem bunuman dongal pande, “Johova, [kenem] s iyem kera ye wal enda bar, kanpolto kui moramen.”—Mai. 7:7.