1. ¿Xi gudxi Jesús ca discípulo stiʼ de dxi guiluxe guidxilayú, ne xi conseju bidiibe laacaʼ?

 CAADXI dxi ante gatiʼ Jesús, gunabadiidxaʼ tapa de ca discípulo stibe laabe xi señal guihuinni «dxi guiluxe guidxilayú» (Mat. 24:3). Zándaca nuu ca discípulo que gánnacaʼ padxí guinitilú Jerusalen ne templu stiʼ. Ora bicabi Jesús laacabe qué niníʼ si de dxi guinitilú Jerusalen ne templu stiʼ, sínuque laaca guníʼ de «dxi guiluxe guidxilayú» ra nabáninu riʼ. Ne sicaríʼ guniʼbe ora bizeetebe de dxi gueeda fin: «Peru padxí o pora la? guirutiʼ ganna, nin ca ángel ni nuu guibáʼ, nin Xiiñiʼ Dios, sínuque Bixhózesiaʼ». Despué bidiibe conseju riʼ laacaʼ: «Lagataná» (Mar. 13:32-37).

2. ¿Xiñee naquiñeʼ gataná ca xpinni Cristu ni bibani lu primé siglu?

² Ca xpinni Cristu judíu de primé siglu que naquiiñeʼ gatanacaʼ pa racaláʼdxicaʼ guilacaʼ. Bisiene Jesús ca xpinni ximodo gánnacaʼ padxí guinitilú Jerusalén ne templu stiʼ. Sicaríʼ gúdxibe laacaʼ: «Ora gúʼyatu maʼ nuu campamentu stiʼ ca ejércitu guidubi vuelta Jerusalén, laganna maʼ zedadxiña dxi guinitilú ni». Ne ora que naquiiñeʼ guxooñecaʼ lu ca dani que casi maʼ gúdxibe laacaʼ (Luc. 21:20, 21). Ca ni yennanda ni guníʼ Jesús que bixooñecaʼ ante gunitilú ca romano Jerusalén, ne zaque bilacaʼ.

3. ¿Xi zazíʼdinu lu artículo riʼ?

³ Laanu nabáninu tiempu ra mayaca guinitilú guidxilayú malu riʼ. Cásica ca xpinni Cristu de primé siglu, naquiiñeʼ cuʼ xpiaaninu ne gatananu. Lu artículo riʼ zazíʼdinu xi zacané laanu guiníʼ íquenu ni jneza ora guidúʼyanu guiráʼ ni cazaca lu guidxilayú riʼ. Laaca zadúʼyanu xi zanda gúninu para gatananu ne iquiiñenu jneza tiempu ni nápanu ante guinitilú guidxilayú riʼ.

4. ¿Xiñee ruyúbinu gánnanu xi cazaaca lu guidxilayú riʼ?

⁴ Ruyúbinu gánnanu xi cazaaca lu guidxilayú riʼ purtiʼ nánnanu maʼ cayaca cumplir ca profecía ni zeeda lu Biblia. Guzéʼtenu ti ejemplu, guníʼ Jesús de stale cosa ni zazaaca ni zacané laanu gánnanu mayaca guinitilú guidxilayú stiʼ Binidxabaʼ (Mat. 24:3-14). Laaca guluu apóstol Pedro ganna laanu guidúʼyanu ximodo cayaca cumplir ca profecía ni zeeda lu Biblia para gaca fe stinu naguidxi (2 Ped. 1:19-21). Ne ndiʼ nga ca diidxaʼ ni ruzuluné últimu libru stiʼ Biblia: «Ti revelación ni bidii Dios Jesucristu, para guluíʼ ca esclavu stiʼ ca cosa ni mayaca guizaaca» (Apoc. 1:1). Nga runi, ruyúbinu gánnanu xi cazaaca lu guidxilayú para guidúʼyanu ximodo cayaca cumplir ca profecía ni zeeda lu Biblia. Ne dede zándaca riuuláʼdxinu guiníʼnenu ca hermanu stinu de tema riʼ.

5. ¿Xiñee naquiiñeʼ chuʼnu cuidadu ora maʼ caninu de ca profecía ni zeeda lu Biblia, ne xi naquiiñeʼ gúninu? (Biiyaʼ ca imagen ca).

⁵ Ora maʼ caninu ximodo cayaca cumplir ca profecía ni zeeda lu Biblia, naquiiñeʼ chuʼnu cuidadu. ¿Xiñee yaʼ? Purtiʼ qué racaláʼdxinu guininu ni riníʼ íquesinu ne pur laani maʼ qué chuʼ ca hermanu de congregación tobi si. Guzéʼtenu ti ejemplu, zándaca gunadiáganu guiníʼ ca gobiernu ni nuu lu Guidxilayú zucueezacaʼ guerra ni cayaca ne zeedanecaʼ paz ne guendariuudxí. Lugar de guiníʼ íquenu pa cayuni cumplir ni caniʼcabe ca profecía ni zeeda lu 1 Tesalonicenses 5:3, naquiiñeʼ gánnanu xi maʼ gulee mozo ni nuu xpiaaniʼ lu ca publicación de tema riʼ. Pa guiráʼ ni guininu zeeda ni de ni maʼ gulee xquidxi Jehová, zacanenu chuʼ congregación tobi si ne guiranu zaníʼ íquenu ti modo si (1 Cor. 1:10; 4:6).

6. ¿Xi rusiidiʼ 2 Pedro 3:11-13 laanu?

⁶ (Biindaʼ 2 Pedro 3:11-13). Ni guníʼ apóstol Pedro racaneni laanu guiníʼ íquenu xiñee naquiiñeʼ guni estudiarnu ca profecía ni zeeda lu Biblia. Purtiʼ riguucani gana laanu chuʼnu «pendiente ora guedandá dxi stiʼ Jehová». ¿Xiñee yaʼ? Cadi pur racaláʼdxinu gánnanu «padxí ne pora» guedané Jehová Armagedón, sínuque purtiʼ racaláʼdxinu iquiiñenu tiempu ni riaana para gaca conducta stinu nayá ne gúninu cosa ni gusihuinni runi adorarnu Dios (Mat. 24:36; Luc. 12:40). Ni riníʼ ca diidxaʼ riʼ nga, racaláʼdxinu gúninu ni jneza purtiʼ nadxiinu Jehová. Ne para ganda gúninu ni gatiga naquiiñeʼ guidúʼyanu ximodo nuunu.

7. ¿Xi naquiiñeʼ gúninu para guiduʼyaʼ chaahuinu ximodo nuunu? (Lucas 21:34).

⁷ Cadi gudxi si Jesús ca discípulo stiʼ chuʼcaʼ pendiente de ca cosa ni cazaaca lu guidxilayú, sínuque laaca gúdxibe laacaʼ guʼyaʼ chaahuicaʼ ximodo nuucaʼ. Ne nánnanu zacá ni pur ca diidxaʼ ni zeeda lu Lucas 21:34 (biindaʼ ni). Jesús guníʼ: «Laguuyaʼ chaahuiʼ ximodo nuutu». ¿Xi riníʼ ca diidxaʼ riʼ yaʼ? Riníʼ ni guidúʼyanu gunáʼ nga ca cosa ni zanda guxheleʼ laanu de Jehová ne gúninu stipa gucáʼnanu ca ni. Pa gúninu ni, qué zusaana Dios de gannaxhii laanu (Prov. 22:3; Jud. 20, 21).

8. ¿Xi conseju bidii Pablo ca xpinni Cristu?

 ⁸ Apóstol Pablo laaca gudxi ca xpinni Cristu guʼyaʼ chaahuicaʼ ximodo nuucaʼ. Ndiʼ nga ni bicaabe ra nuu ca xpinni Cristu de Éfeso: «Lachuu cuidadu cadi gácatu casi binni huati, sínuque lagaca casi binni nuu xpiaaniʼ» (Efes. 5:15, 16). Qué rusaana Binidxabaʼ de guyubi modo guxheleʼ laanu de Jehová. Nga runi, Biblia cayabi laanu cadi gusaana de guiduʼyaʼ chaahuinu «xii nga racalaʼdxiʼ Jehová», zacá zanda gudxíʼlunu Binidxabaʼ (Efes. 5:17).

9. ¿Ximodo zanda gánnanu xi racalaʼdxiʼ Jehová gúninu?

⁹ Cadi zeeda diʼ ti lista lu Biblia de guiráʼ ca cosa ni zanda guxheleʼ laanu de Jehová. Gatigá naquiiñeʼ guicaanu xiixa decisión ni cadi zeeda lu Biblia. Para guicaanu decisión jneza naquiiñeʼ ganna chaahuinu «xii nga racalaʼdxiʼ Jehová». ¿Ximodo zanda gúninu ni yaʼ? Ra guni estudiarnu Stiidxaʼ Dios gatigá ne guiníʼ íquenu ni nani. Ra jma guiénenu xii nga racalaʼdxiʼ Jehová gúninu ne jma gunibiaʼnu «ximodo riníʼ ique Cristu», qué zaca nagana para laanu gácanu «casi binni nuu xpiaaniʼ» neca gastiʼ ti norma lu Biblia ni gabi laanu xi peʼ naquiiñeʼ gúninu (1 Cor. 2:14-16). Dxandíʼ, nuu biaje cadi nagana raca para laanu gudiʼnu cuenta pa cadi jneza xiixa cosa, peru nuu biaje zándaca gácani nagana.

10. ¿Gunáʼ nga caadxi de ca cosa ni cadi naquiiñeʼ gúninu?

¹⁰ Caadxi de ca cosa ni cadi naquiiñeʼ gúninu nga guni coquetearnu, guidóʼ xhaatanu, guidéʼ xhaatanu nisadxuʼniʼ, guininu diidxaʼ ni guniná, guidúʼyanu programa ni napa violencia o pornografía (Sal. 101:3). Binidxabaʼ, enemigu stinu, siempre cuyubi modo guxheleʼ laanu de Jehová (1 Ped. 5:8). Pa qué chuʼnu cuidadu, zanda gucaabe laanu gápanu envidia, cadi gácanu honradu, gachelunu gápanu jma, gaca nanaláʼdxinu, gácanu orgulloso ne guidaʼnu xiana (Gál. 5:19-21). Zándaca chuʼ ora guiníʼ íquenu cadi malu guni sentirnu ca cosa ni bizéʼtenu riʼ. Peru pa qué gúninu stipa cueenu ca cosa riʼ de ndaaniʼ ladxidoʼno nagueendaca la? zándaca guninácani laanu (Sant. 1:14, 15).

11. ¿Gunáʼ nga ti peligru ni zándaca gaca nagana para laanu guidúʼyanu, ne xiñee naquiiñeʼ gucáʼnanu ni?

¹¹ Guzéʼtenu de ti peligru ni zándaca gaca nagana para laanu guidúʼyanu. Guiníʼ íquenu runinenu ti binni ni cadi Testigu dxiiñaʼ. Cumu qué racaláʼdxinu guiníʼ íquebe mal de ca Testigu la? rácanu nachaʼhuiʼ ne racanenu laabe. Zándaca guzulú guidóʼnenu laabe gatigá peru despué zándaca gácani jma seguidu. Zándaca guzulú compañeru stinu ca guiníʼ cosa ni napa inmoralidad. Primerugá, qué riuuláʼdxinu ni riniʼbe ne qué rulábinu ni riniʼbe. Peru ra gudiʼdiʼ tiempu maʼ riaʼnu gucaadiáganu laabe ne maʼ qué ruchiiñaʼ ni laanu. Ti dxi, biʼniʼ invitarbe laanu chizánenu laabe despué de dxiiñaʼ ne guyuunu. Ora bidiʼnu cuenta maʼ riníʼ íquenu modo riníʼ íquebe. ¿Pabiáʼ tiempu zadiʼdiʼ para gácanu casi laabe yaʼ? Dxandíʼ, laanu ca xpinni Cristu, nacháʼhuinu ne runi respetarnu guiráʼ binni. Peru cadi guiaandaʼ laanu zanda guicá modo naca ca binni ni ridxaaganu laanu (1 Cor. 15:33). Nga runi, pa gúninu ni guníʼ Jesús ne guiduʼyaʼ chaahuinu  ximodo nuunu, zaduʼyaʼ chaahuinu pabiáʼ tiempu zanda guidxaaganu ca binni ni cadi zinanda ca norma stiʼ Jehová (2 Cor. 6:15). Zadúʼyanu peligru ni nuu ne zucáʼnanu ni.

12. ¿Xi naquiiñeʼ guni ca discípulo stiʼ Jesús laga cabézacaʼ guedandá dxi guiluxe guidxilayú riʼ?

¹² ¿Ñee naquiiñeʼ quiidxináʼ ca discípulo stiʼ Jesús laga cabézacaʼ dxi guiluxe guidxilayú riʼ la? Coʼ, purtiʼ bidii Jesús laacaʼ ti dxiiñaʼ. Biʼniʼ mandarbe laacaʼ guni predicarcaʼ ca noticia nacubi «Jerusalén, guidubi Judea ne Samaria, ne dede ra jma zitu lu guidxilayú» (Hech. 1:6-8). Nabé naroʼbaʼ dxiiñaʼ gucuaacabe que. Peru pa gúnicabe ni né stale gana, zaquiiñecabe tiempu stícabe jneza.

13. ¿Xiñee naquiiñeʼ iquiiñenu tiempu stinu jneza? (Colosenses 4:5).

¹³ (Biindaʼ Colosenses 4:5). Para guiduʼyaʼ chaahuinu ximodo nuunu, naquiiñeʼ guidúʼyanu ximodo caquiiñenu tiempu stinu. Eclesiastés 9:11 ná «guiranu rizaacanu cosa ni cadi caníʼ íquenu». Dede zándaca gátinu ora cadi cabézanu.

14, 15. ¿Ximodo nga jma jneza iquiiñenu tiempu stinu? (Hebreos 6:11, 12; biiyaʼ imagen ca).

¹⁴ Modo jma jneza iquiiñenu tiempu  stinu nga gúninu ni ná Jehová ne gúninu ni guchiña laanu gaxha de laabe (Juan 14:21). Naquiiñeʼ chinándanu conseju riʼ: «Laguzuhuaa dxiichiʼ, ne cadi guiree cueʼtu, ne cadi gusaana de gúnitu xhiiñaʼ Señor» (1 Cor. 15:58). Zacá, pa gueeda gátinu o guedandá dxi guiluxe guidxilayú riʼ, qué zaninu pa ñánnanu ñúnirunu jma lu xhiiñaʼ Jehová (Mat. 24:13; Rom. 14:8).

¹⁵ Cásica maca biʼniʼ prometer Jesús, cayacanérube ca discípulo stibe tiempu riʼ para guni predicarcaʼ mensaje stiʼ Reinu lu guidubi Guidxilayú. Caquiiñeʼ Jesús xquidxi Jehová para gusiidiʼ laanu ximodo guni predicarnu ca noticia galán ne rudiibe laanu herramienta ni caquiiñenu para gúninu ni (Mat. 28:18-20). Ni caquiiñeʼ gúninu nga guni predicarnu ne gusíʼdinu né stale gana ne gatananu laga cabézanu gunitilú Jehová guidxilayú riʼ. Qué zundaʼnu esperanza stinu «dede dxi gueeda fin» pa chinándanu conseju ni zeeda lu Hebreos 6:11, 12 (biindaʼ ni).

16. ¿Xi maʼ gudixhe íquenu gúninu?

¹⁶ Maʼ gudixhe Jehová padxí gunitilú guidxilayú stiʼ Binidxabaʼ. Ora guedandá dxi ca, zuni cumplirbe ca profecía ni zeeda lu Biblia. Ne neca ruluíʼ candaa para guinitilú guidxilayú riʼ, zedandá dxi stiʼ Jehová «¡qué zandaa ni!» (Hab. 2:3). Nga runi maʼ gudixhe íquenu gúninu ni ná Miqueas 7:7: «Zatanaʼyaʼ pur Jehová. Cabezaʼ né stale paciencia Dios ni zulá naa».