1. Ki mannyè nou sav lavi nou byen valowab pou Jéhova?

 IMAJINÉ sa, an janʼw baʼw an pòtwé ki byen vyé, mé i sé an pòtwé ki byen valowab. Pòtwé-a ja pèd koulè, i ni déotwa tach asouʼy, èk i fann an bout-la. Mé magwé pòtwé-a pa an bon kondisyon, i vo plizyè mil dòla. San dout, ou kay apwésyé èk pwotèkté pòtwé sala, paski i vo an chay lajan. An menm mannyè-a, Jéhova ban nou an kado ki byen valowab. Kado sala sé lavi. Pou Jéhova, lavi nou si tèlman valowab, i voyé gasonʼy pou bay laviʼy kon an wanson pou sové nou.​—Jan 3:16.

2. An ling épi 2 Kòrint 7:1, kisa Jéhova vlé nou fè?

² An Sam 36:9 Bib-la di: ‘Sé [Jéhova] ki Sous lavi.ʼ Zapòt Pòl té dakò épi sa paski i di, sé Jéhova “ki ka bay tout moun lavi épi lèspiwasyon épi tout bagay yo bizwen.” (Twavay 17:25, 28) Konsa nou sa vwéman di, lavi sé an kado Jéhova ban nou. Jéhova enmen nou an chay, èk i ka ban nou tout sa nou bizwen pou nou wèsté vivan. (Twavay 14:15-17) Mé an tan jòdi, Jéhova pa ka fè miwak pou tjenn nou vivan. Pito sa, i vlé nou fè tout sa nou pé pou otjipé kò nou, èk pou tjenn wilasyon nou épiʼy fò. (Li 2 Kòrint 7:1.) Mé pouki nou sipozé pwotéjé santé nou épi lavi nou? Èk, ki mannyè nou sa fè sa?

3. Bay yon wézon pouki nou sipozé fè tout sa nou pé pou wèsté an bon santé.

³ Yon wézon nou sipozé fè tout sa nou pé pou wèsté an bon santé sé sa, lè nou an bon santé nou sa fè pli bay Jéhova. (Mak 12:30) Èk an ling épi Ronm 12:1, nou vlé ofè kò nou bay Bondyé “kon an sakwifis ki vivan. Sa sé yonn ki nèt épi yonn Bondyé kay aksèpté.” Konsa, nou pa ka fè bagay nou sav ki kay fè nou malad. Kanmenm, menm si nou pwan tout pokosyon, nou pa sa anpéché tout maladi. Mé nou ka fè tout sa nou pé pou wèsté an bon santé paski nou vlé moutwé Papa nou ki an syèl, nou ka apwésyé lavi-a i ban nou-an.

4. Kisa Wa David té détèminé pou fè?

⁴ Wa David moutwé i té ka apwésyé lavi-a Bondyé té bay-la lèʼy di: ‘Ki bennéfis la ni si mwen mò, si mwen désann an tonbo-a? Ès lapousyè sa glowifyéʼw? Ès lapousyè-a kay palé konsèné fidèlitéʼw?ʼ (Sam 30:9) Pitèt Wa David té di sé pawòl sala an finisman laviʼy. Mé i té détèminé pou fè tout sa i pé pou wèsté vivan èk an bon santé, paski i té vlé kontiné glowifyé Jéhova. San dout, nou tout vlé fè menm bagay-la.

5. Menm si nou an laj ében nou malad, kisa nou sa fè?

⁵ Lè nou ka vini an laj ében nou malad, sa pé anpéché nou fè tout sé bagay-la nou té ka fè avan. Pou wézon sala nou pé santi dékouwajé èk twis. Mé nou ni pou kontiné fè tout sa nou pé pou otjipé kò nou. Pouki? Sé paski menm kon Wa David, si nou otjipé kò nou, nou sa kontiné glowifyé Jéhova menm si nou an laj ében nou malad. Ès i pa ka konfòté nou pou sav Jéhova ka chéwi nou menm si nou an laj ében nou malad? (Mafyou 10:29-31) Èvèk si nou mò, pa dé anvi Jéhova kay anvi pou wésisité nou. (Jòb 14:14, 15) Konsa, paditan nou vivan, annou fè tout sa nou pé pou pwotéjé santé nou èk lavi nou.

6. Kisa Jéhova vlé nou fè lèʼy vini pou bwè épi manjé?

⁶ Bib-la sé pa an liv ki ka di nou mannyè pou pwan ka santé nou, ében kisa pou nou manjé. Mé magwé sa, i ka di nou katjil Jéhova lèʼy vini pou sé bagay sala. Pou ègzanp, an Ékléziyastis 11:10 Jéhova ka ankouwajé nou pou ‘voyé bagay ki ka fè nou soufè byen lwen kò nou.ʼ Sa vlé di, Jéhova vlé nou évité bagay ki sa donmajé santé nou. Èvèk Bib-la di, nou pa sipozé manjé twòp manjé, èk nou pa sipozé bwè twòp alkòhòl. Sé bagay sala sa donmajé santé nou èk yo sa jis tjwé nou. (Pwov. 23:20) Wi, Jéhova vlé nou kontwolé kò nou lèʼy vini pou sa nou kay manjé èk sa nou kay bwè. Èk i vlé nou kontwolé kantité-a nou ka manjé èk bwè.​—1 Kòrint 6:12; 9:25.

7. Ki mannyè Pwovèb 2:11 sa édé nou fè bon disizyon lèʼy vini pou santé nou?

⁷ Lè nou sèvi bon jijman, nou kay sa fè disizyon ki ka moutwé nou ka vwéman apwésyé lavi-a Jéhova ban nou-an. (Sam 119:99, 100; li Pwovèb 2:11.) Nou sa sèvi bon jijman an sa nou chwazi pou manjé. Pa ègzanp si nou kontan manjé an sèten bagay, mé nou sav i kay fè nou malad, nou ka moutwé nou ni bon jijman lè nou pa manjé bagay sala. Nou ka osi moutwé nou ka sèvi bon jijman lè nou fè asiwé nou ka dòmi asé, nou ka fè lézèksis wégiliyèman, èvèk nou ka tjenn kò nou épi kay nou nèt èk pwòp.

8. Ki mannyè nou sav Jéhova vlé nou tjenn kò nou èk lézòt sòv?

⁸ Jéhova té bay nasyon Izwayèl lwa ki té kay édé yo pwotéjé kò yo hòd mové aksidan lakay yo èk an plas twavay yo. (Ègzodòs 21:28, 29; Ditonronnonmi 22:8) Anba lwa-a, si an moun té tjwé an lòt moun pa aksidan, sa sété an bagay ki té byen sèwyé. (Ditonronnomi 19:4, 5) Èk, si an moun té blésé an ti manmay ki an bouden manmay pa aksidan, yo té ni pou pini moun sala. (Ègzodòs 21:22, 23) Konsa silon Bib-la, i a klè Jéhova vlé nou fè tout sa nou pé pou tjenn kò nou èk lézòt sòv.

9. Ki diféwan bagay nou sa fè pou wèsté sòv? (Gadé sé pòtwé-a osi.)

⁹ Lè nou pwan tout pokosyon nou pé pou wèsté sòv lakay nou èk an twavay nou, nou ka moutwé nou ka apwésyé lavi-a Jéhova ban nou-an. Pou ègzanp si nou ni pou jété bagay ki filé, bagay ki ni pwézon, ében wimèd, nou ka fè sa adan an mannyè ki sòv. Èk nou ka fè asiwé manmay pa jwenn sé bagay sala. Osi nou ka pwan bon pokosyon lè nou limen difé, lè nou mété dlo bouwi, ében lè nou ka sèvi zouti. Nou pa ka drayv pyès machin lè nou pwan sèten wimèd, lè nou bwè alkòhòl, ében lè nou twòp las. Èvèk nou ka fè asiwé nou pa ka tèks ében palé asou pòtab nou paditan nou ka drayv an machin.

10. Kisa nou sa fè pou tjenn kò nou sòv diwan èk avan an dézas?

¹⁰ Délè nou pa sa anpéché sitiwasyon ki ka mété lavi nou an danjé. Sitou lè dézas fèt, lè mové maladi ka simen, èvèk lè moun lévé wévòt kont gouvèdman-an ében pou népòt lòt wézon. Kanmenm, lè sé bagay sala fèt, si nou obéyi diwèksyon gouvèdman-an èk lòt moun ki an lotowité bay, i kay pli ézé pou nou wèsté sòv. (Ronm 13:1, 5-7) Èk la ni sèten bagay nou sa fè pou pwépawé pou an dézas avan i fèt. Konsa i byen enpòtan pou nou swiv diwèksyon-an gouvèdman-an ka bay pou édé nou pwépawé andavans. Pou ègzanp, délè avan an dézas fèt yo ka di nou pou fè asiwé nou ni asé dlo, wimèd, èk manjé ki pa ka gaté twò vit lakay nou.

11. Lè la ni an maladi ki ka simen kisa nou sipozé fè?

¹¹ Lè la ni an maladi ki ka simen, nou sipozé obéyi sé diwèksyon-an gouvèdman-an ka bay. Pou ègzanp yo pé di, nou ni pou lavé lanmen nou, òbzòvé distans sosyal, sèvi mas, èk si nou malad pa alé anpanmi moun. Lè nou obéyi sé diwèksyon sala, nou ka moutwé nou ka vwéman apwésyé lavi-a Bondyé ban nou-an.

12. Ki mannyè Pwovèb 14:15 sa édé nou pou pa kwè tout sa nou tann apwé an dézas?

¹² Lè an dézas fèt, jan nou, vwézinaj nou, épi jis nouvèl-la, pé bay enfòmasyon ki pa vwé. Konsa, pito nou kwè tout sa nou tann, nou ni pou pwan pokosyon èk kouté enfòmasyon ki aplon hòd gouvèdman-an èk sé dòktè-a. (Li Pwovèb 14:15.) Pwensipal Konmité-a épi sé lofis bwanch-la ka fè tout sa yo pé pou jwenn enfòmasyon-an ki aplon, avan yo ban nou diwèksyon konsèné sé mitin-lan épi twavay pwèchman-an. (Hib. 13:17) Lè nou obéyi sé diwèksyon-an yo ban nou, nou ka pwotèkté kò nou épi lézòt. Osi, obéyisans nou kay édé moun an konmin nou pou di bon bagay konsèné Témwen Jéhova.​—1 Pita 2:12.

13. Magwé nou pa ka pwan san, ki mannyè nou ka moutwé nou ka apwésyé lavi-a Bondyé ban nou-an?

¹³ An chay moun konnèt, Témwen Jéhova pa ka pwan san. Wi, nou ka obéyi lwa Jéhova lèʼy vini pou san. Konsa menm si lavi nou an danjé nou pa ka pwan san. (Twav. 15:28, 29) Mé kanmenm, sa pa vlé di nou vlé mò. Okontwè, nou ka apwésyé lavi-a Bondyé ban nou-an. Alò, lè nou malad nou ka gadé pou dòktè ki kay otjipé nou byen, èk ki pa kay sèvi san pou twété nou.

14. Si nou tjenn kò nou an bon santé ki mannyè sa kay édé nou?

¹⁴ Si nou fè sé bagay-la nou ja diskité an atik sala èk pwan bon ka santé nou, pitèt nou pa kay menm bizwen fè lopowasyon, ében pwan lòt twètman médikal ki byen sèwyé. Èvèk si nou oblijé fè an lopowasyon, i kay pli ézé pou nou fè byen si nou an bon santé. Osi, si nou tjenn kay nou èk plas nou ka twavay sòv, èvèk nou obéyi tout lwa gouvèdman-an mété an plas pou twafik, nou kay sa évité sèten sitiwasyon ki pé fèʼy nésésè pou ni an lopowasyon.

15. (a) Pouki i enpòtan pou nou plen DPA kat-la, tjenn li annòd, èk toujou niʼy épi nou? (Gadé pòtwé-a osi.) (b) Kon nou wè an vidiyo-a, ki mannyè nou sa fè bon disizyon konsèné santé nou lèʼy vini pou san?

¹⁵ Nou ka apwésyé lavi-a Bondyé ban nou-an. Sé pou sa nou ka fè asiwé nou plen kat-la, durable power of attorney (DPA), èvèk nou toujou niʼy épi nou. b Kat sala sé an dòkyouman ki ka fè moun konnèt disizyon pèsonnèl nou lèʼy vini pou san, èk sèten twètman médikal. Ès DPA kat ou annòd? Si DPA kat ou pa annòd, ében ou pʼòkò plenʼy, pa tadé pou fè sa. Lè nou ékwi disizyon nou andavans, i kay pli ézé pou nou twapé twètman, paski sé dòktè-a kay ja sav sa nou kay aksèpté èk sa nou pa kay aksèpté. Osi sa kay anpéché nòs èk dòktè ban nou twètman ében wimèd ki pa bon pou nou. c

16. Siʼw pa konnèt mannyè pou plen DPA kat-la, kisa ou sa fè?

¹⁶ Menm si nou jenn ében nou an bon santé, népòt di nou sa twapé kò nou adan an aksidan ében tonbé malad. (Éklé. 9:11) Konsa i byen enpòtan pou nou plen DPA kat-la. Siʼw pa konnèt mannyè pou plenʼy, ou sa mandé sé ansyen-an an kongwigasyonʼw pou édéʼw. Sé ansyen-an sa édéʼw konpwann enfòmasyon-an ki asou DPA kat-la, èk yo sa édéʼw plenʼy, mé yo pa kay fè disizyonʼw baʼw. Lèʼy vini pou twètman médikal, sé ou ki ni wèskonsabilité-a pou désidé sa ou kay aksèpté, èk sa ou pa kay aksèpté. (Gal. 6:4, 5).

17. Ki mannyè nou sa moutwé nou wézonnab lèʼy vini pou bagay ki ni pou fè épi santé nou?

¹⁷ Nou ka bazé an chay an sé disizyon-an nou ka fè konsèné santé nou èk twètman médikal, asou sa nou apwann an Bib-la. (Twavay 24:16; 1 Timòfi 3:9) Alò lè nou ka palé épi lézòt konsèné disizyon nou fè, i kay bon pou nou chonjé pwensip-la ki an Pwovèb 15:21. I di: ‘Nonm-lan ki ni bon jijman ka maché asou chimen-an ki dwèt-la.ʼ Si nou ka sèvi bon jijman, nou kay wézonnab. Konsa nou pa kay twakasé kò nou twòp lèʼy vini pou bagay ki ni pou fè épi santé nou. Èvèk nou pa kay fòsé lézòt pou aksèpté disizyon nou fè konsèné santé nou, èk twètman médikal. Menm si sé fwè èk sè-a pa fè menm disizyon épi nou, nou enmen yo èk nou ka wèspèkté yo.​—Ronm 14:10-12.

18. Kisa nou sa fè pou moutwé Jéhova nou ka apwésyé lavi-a i ban nou-an?

¹⁸ Sé Jéhova ki Sous lavi. Lè nou pwan bon ka santé nou, èk fè tout sa nou pé bay Jéhova, nou ka moutwéʼy nou ka vwéman apwésyé lavi-a i ban nou-an. (Wévélasyon 4:11) Pou apwézan, nou ni pou aji épi maladi, dézas natiwèl, èk lòt difikilté. Mé, sé pa konsa Kwéyatè nou té vlé nou viv. Touswit i kay ban nou lavi étonnèl, èvèk la pa kay ni lapenn, soufwans, épi lanmò ankò. (Wévélasyon 21:4) Paditan nou ka èspéyé tan sala, pa dé kontan nou kontan nou vivan èk nou ka sèvi Papa nou ki an syèl, Jéhova!