1. Kwowa pire tek lakwene bot Jehovah?

 GO KONG ni laremi mo omini ot, ento rangi ma i kor ot meno oti woko dok wi ot-ti bene cwer. Kadi bed kit meno, ka onongo ni kicat ot meno acata, ci welle onongo bibedo matek adada. Labongo akalakala, mo ibibedo ki pwoc pi ot meno dok ibigwoko maber. I yo acel-lu, Jehovah ominiwa mic mo ma pire tek adada, mic me kwo. Ki lok ada, Jehovah onyuto kit ma kwowa pire tek kwede bote ki miyo Wode macalo ginkok piwa.—Jon 3:16.

2. Kit ma kinyuto kwede i 2 Jo Korint 7:1, gin ango ma Jehovah mito ni watim?

² Jehovah aye obedo Wang It me kwo. (Jab. 36:9) Lakwena Paulo oye lok ada man i kare ma owaco ni: “Wakwo i en, wawoto i en, wabedo i en.” (Tic 17:25, 28) Pi meno, nongo watye ka lok kakare ka wawaco ni kwowa obedo mic ma oa ki bot Lubanga. Ki mar, en miyo botwa jami ducu ma mitte wek wabed kwo. (Tic 14:15-17) Ento i kare-ni Jehovah pe gwoko kwowa i yo me tango. Me ka meno, en mito ni watute matek me gwoko yotkomwa kun bene wamedde ki tic pire. (Kwan 2 Jo Korint 7:1.) Pingo omyero wagwok kwowa kacel ki yotkomwa, dok watwero timo meno nining?

3. Tit kong tyen lok acel ma omiyo omyero watute matek me bedo ma komwa yot.

³ Tyen lok mumiyo watute matek me bedo ma komwa  yot aye ni pien weko wabedo ki kero me tic pi Jehovah i yo maber loyo. (Mar. 12:30) Watye ki miti me miyo komwa “macalo gitum makwo ma gityero bot Lubanga, gin maleng ma yomo cwiny Lubanga,” pi meno wagwokke ki timo gin mo keken ma twero balo yotkomwa. (Rom. 12:1) Ngene kene ni kadi bed watim gin ango, pe watwero genge ki two i yo ducu. Ento pud watute matek pien wamito nyuto ki Wonwa me polo ni watye ki pwoc pi mic me kwo.

4. Gin ango ma onongo Kabaka Daudi mito timone?

⁴ Kabaka Daudi otito tyen lok mumiyo en onongo tye ki pwoc pi mic me kwo i kare ma ocoyo ni: “Kit kony ango ma tona twero miyo boti ka adonyo piny i bur? Apwa me ngom mono bipaki? Dok binyuto berri ki adani?” (Jab. 30:9) Twero bedo ni Daudi ocoyo lok meno i kare ma en onongo dong cok to. Ento en onongo omoko tamme me medde ki kwo kun bene egwoko yotkome wek ebed ki kero me pako Jehovah. Labongo akalakala mo wan ducu watye ki miti acel-lu.

5. Kadi bed komwa lit nyo wati woko, gin ango ma watwero timone?

⁵ Two kacel ki goro ma bino pi tiyo twero gengowa ki timo jami mapol ma yam con watimo. Macalo adwogine, cwinywa twero cwer dok wabedo ki akemo. Ento omyero pud wamedde ki yelle matek me gwoko yotkomwa. Pingo omyero watim meno? Pien kadi bed dong wati woko nyo komwa lit adada, pud watwero medde ki pako Jehovah kit ma Kabaka Daudi otimo kwede. Pud dong kweyo cwinywa ya me ngeyo ni piwa tek bot Lubangawa kadi bed komwa lit nyo dong wati woko! (Mat. 10:29-31) Kadi bed wato, en pud bibedo ki miti matek me cerowa. (Yubu 14:14, 15) Dong ka pud wakwo, wamito ni watim jami ducu ma watwero me gwoko kwowa kacel ki yotkomwa.

6. Gin ango ma Jehovah mito ki botwa ka odok i kom cam kacel ki mato kongo?

⁶ Kadi bed Baibul pe obedo buk ma loko i kom kit me gwoko yotkomi nyo gin ma myero icam, ento tittiwa kit ma Jehovah neno kwede jami magi. Me labolle, en miniwa tam ni ‘omyero wawek jami’ ma twero balo yotkomwa. (Latit. 11:10) Baibul okwero jami calo woro cam kacel ki mero, ma gibalo yotkomwa. (Car. 23:20) Jehovah mito ni wajukke kekenwa ka watye ka yero cam mene ma wabicamo dok marom mene, kacel ki kongo marom mene ma wabimato.—1 Kor. 6:12; 9:25.

7. Tira ma nonge i Carolok 2:11 konyowa nining me moko tam maber ka odok i kom yotkomwa?

⁷ Watwero moko tam ma nyuto ni watye ki pwoc pi mic me kwo ma Lubanga ominiwa ka watiyo ki wic ma kwiri. (Jab. 119:99, 100; kwan Carolok 2:11.) Me labolle, wayero jami ma wabicamo ki diro. Ka wamaro dek moni ento wangeyo ni keliwa two ci omyero wagwokke pe me camone. Wanyuto bene ni watye ki wic ma kwiri ka waweko nino romowa, waryeyo lerwa kare ki kare, wagwoko lengo me komwa, dok wagwoko gangwa bedo maleng.

8. Gin ango ma Baibul pwonyowa madok i kom neno pa Jehovah ka odok i kom gwokke ki i awano?

⁸ Cik ma Jehovah omiyo bot Luicrael onongo tye ki tira ma konyogi me  gwokke ki i awano i pacigi nyo i ka ticgi. (Nia 21:28, 29; Nwo. 22:8) Ka ce ngat mo cinge ocer ci oneko lawote, onongo kimine pwod magwar. (Nwo. 19:4, 5) Cik onongo waco ni ngat ma oketo awano i kom latin ma tye i ic, omyero kimine pwod kadi bed pe otimo akaka. (Nia 21:22, 23) Ginacoya nyuto ka maleng ni Jehovah mito ni watute matek me gwokke ki i awano.

9. Jami ango ma watwero timogi me gwokke ki i awano? (Nen bene cal.)

⁹ Wanyuto ni watye ki pwoc pi mic me kwo ma Lubanga ominiwa ka watute me gwokke i paciwa kacel ki i dog ticwa. Me labolle, ka mitte ni wabol jami mabit, jami ma tye ki kwir maraco, nyo yat, ci watimo i yo ma pe bikelo awano i kom jo mukene. Omyero bene wanen ni lutino pe gunongo jami magi. Wagwokke adada ka wacwinyo mac, watye ka tedo gin mo ma twero ony, nyo watye ka tic ki macin ma tiyo ki mac. Omyero wanen ni pe waa waweko jami magi ata. Pe wadwoyo mutoka ka watye ka mwonyo yat mo ma romo nyweno wiwa, nyo waa ka mato kongo,  nyo nino pe oromowa maber. Pe bene wamako cimwa i cingwa ka watye ka dwoyo mutoka.

10. Gin ango ma watwero timo ma peya peko mo opoto atura ki dok i ngeye?

¹⁰ I cawa mukene pe watwero gengo timme pa jami ma keto kwowa ka mading. Man tye ada ka odok i kom can ma poto atura, two gemo, nyo kukukuku ma tye ki tim gero. Ento ka peko ma kit meno otimme, watwero tute me gwoko kwowa wek wabwot ki i peko man ka walubo cik me a woko ki i kabedo meno, nyo cik mukene mua ki bot gamente. (Rom. 13:1, 5-7) Watwero yubbe woko con pi pekki mogo ma poto atura, pi meno, omyero walub cik mua ki bot gamente ma bikonyowa me yubbe pi pekki magi. Me labolle, watwero nongo ni tye me kony me gwoko pii amata mo ki cam mogo ma otwo kacel ki yadi ki jami mukene me gwoko yotkom.

11. Ka two ma kobo opoto i kabedowa, gin ango ma omyero wabed atera me timone?

¹¹ Ngo ma myero watim ka two mo ma kobo tye ka nya oyotoyot i kabedowa? Omyero walub cik me yotkom calo lwoko cing, bedo ma kinwa bor ki jo mukene, ruko labo um kacel ki bedo keni ma pe iribbe ki jo mukene. Ka walubo cik magi kore ki kore, wanyuto kit ma watye kwede ki pwoc madit pi mic me kwo ma Lubanga ominiwa.

12. I yo ma nining ma Carolok 14:15 konyowa kwede me yero lok mene ma omyero wawiny ka peko opoto atura?

¹² Ka peko opoto atura, lok ma pe tye kakare twero cako nya i kin lurem, jirani, kadi wa i kin odi me poko lok angeya. Me ka “ye jami ducu ayeya,” bedo ber ka wawinyo lok ma tye kakare ma katti ki bot gamente nyo ludaktar. (Kwan Carolok 14:15.) Lukiko Madit kacel ki jang gang kal me lobe mapatpat gitute me nongo ngec ma tye kakare ma peya gumiyo tira madok i kom cokkewa kacel ki tic me tito kwena. (Ibru 13:17) Ka walubo tira ma gimiyo, ci wagwokke kenwa dok wagwoko jo mukene bene. Waromo bene konyo me dongo nying maber ma Lucaden pa Jehovah gitye kwede i kabedowa.—1 Pet. 2:12.

13. Wanyuto nining ni watero mic me kwo ma Lubanga ominiwa calo gin ma pire tek ka odok i kom medo remo?

¹³ Jo mapol gingeyo ni Lucaden pa Jehovah giye ni remo obedo gin maleng. Walubo cik pa Lubanga madok i kom remo ki kwero ni kimed remo i komwa kadi wa i kare ma nongo kwowa tye ka mading. (Tic 15:28, 29) Ento, meno pe nyuto ni wamito to. Wan watero mic me kwo ma Lubanga ominiwa calo gin ma pire tek adada. Wayenyo kony ki bot ludaktar ma giye tic ki yo me cango ma pud dong ber loyo ma pe kwako medo remo.

14. Watwero genge nining ki i ayango ma pe wayubbe pire?

¹⁴ Ka wagwoko yotkomwa ki timo jami ma kinyamogi i pwony man, ci twero bedo ni pe wabitwoye matek ma weko wamito ayango nyo kony me ot yat matego. Dok ka komwa tye ki kero mo olo, wabikato ki i ayango kacel ki cang i ngeye maber. Watwero bene genge ki i jami ma twero terowa i ayango atura ka wagwoko paciwa ki gang ticwa ki i kom jami ma romo kelo awano kun bene walubo cik me tic ki gudi.

15. (a) Pingo pire tek ni wabed ki kad me DPA i komwa i cawa ducu? (Nen bene cal.) (b) Kit ma kinyuto kwede i vidio-ni, ngo ma twero konyowa me moko tam maber madok i kom yo me cango ma pe tiyo ki remo?

 ¹⁵ Kit macalo watye ki pwoc pi mic me kwo, wapongo kad me DPA (Durable Power of Attorney) dok wawoto kwede i komwa kare ducu. b Kad man weko watito ka maleng gin ma wamito ka odok i kom medo remo kacel ki yo mukene me cango two. Tika dong ityeko pongo kad ma megi me DPA dok tye ki ngec manyen loyo? Ka mitte ni ipong kad manyen, nyo ilok ngec ma tye i kad macon, ci tim woko cutcut. Nen woko ka maleng ni coyo mitiwa piny bikonyowa me nongo kony me ot yat oyotoyot pien pe wabibalo cawa ka laro lok ki ludaktar. Wabikonyo bene ludaktar wek pe guminiwa yat nyo guti ki yo me cango two ma twero wanowa. c

16. Ngo ma myero watim ka pe wangeyo pongo kad me DPA?

¹⁶ Kadi bed pud watino nyo komwa yot,  pud watwero nongo awano nyo komwa doko lit. (Latit. 9:11) Pi meno, bedo me ryeko me pongo kad me DPA. Ka pe ingeyo kit me pongo kad man, ci peny laelda mo me kacokkewu wek okonyi. Luelda tute matek me ngeyo kit me pongo kad man ento pe gibimoko tam piri. Meno obedo tic ma tye i wi. (Gal. 6:4, 5) Ento gitwero konyi me niang jami ma itwero yerogi ki me coyo piny jami ma imito.

17. Watwero nyuto niango nining ka odok i kom lok me yotkom?

¹⁷ Pol pa tam ma wamoko madok i kom yotkomwa kacel ki yo me cango two, jenge i kom jami ma wapwonyo ki i Baibul. (Tic 24:16; 1 Tem. 3:9) Ka watye ka moko tamwa nyo ka nyamone ki jo mukene, pire tek ni walub cik ma iye lac ma tye i Jo Pilipi 4:5 ma waco ni: “Wuwek jo ducu gunge mwolo ma wutye kwede.” Ka wabedo jo ma niang, ci pe wabibedo ki par mukato kare woko i kom yotkomwa dok pe wadiyo jo mukene me bedo ki tam ma rom ki megwa. Ka odok i kom lok me yotkom, wamaro dok waworo omegiwa ki lumegiwa, kadi bed gumoko tam mapat ki megwa.—Rom. 14:10-12.

18. Watwero nyuto pwocwa nining pi mic me kwo?

¹⁸ Wanyuto pwoc bot Jehovah ma en aye Wang It me kwo ka wagwoko kwowa kun wamine woro maber loyo ma watwero. (Yabo 4:11) I kare man ma watye ka kwo iye-ni, omyero wayelle ki two kacel ki peko ma poto atura. Ento man aye pe kwo ma Lacwecwa onongo mito piwa. Macok cok-ki, en biminiwa kwo ma pe tum ma nongo arem ki to dong pe tye. (Yabo 21:4) Ka wakuro kare meno, pud dong ber ya me bedo kwo kun watiyo pi Wonwa me polo ma lamar, Jehovah!