1. Иеговага бистиҥ јӱрӱмис сӱреен баалу деп недеҥ кӧрӱнет?

 САНАНЫП ийзеер де, најыгар слерге сӱреен баалу, сӱреен јараш јурук сыйлаган. Бу јурук коркышту эскирип калган, кезик јерлеринде будугы кырылып калган, ӧҥи де ӧчӱп калган. Је андый да болзо, оныҥ баазы канча миллион доллар. Оныҥ да учун слер бу сыйды баалап ла кичееп јӱререер. Анайып ла теҥеридеги Иегова Најыбыс, бистерге баалу сый — јӱрӱм — сыйлаган. Ого бистиҥ јӱрӱмис сӱреен баалу. Оныҥ да учун Иегова толынты тайылга эдип, бойыныҥ уулын берген (Иоанн 3:16).

2. 2 Коринфтегилерге 7:1-ле болзо, Иегова бистеҥ нени сакыйт?

² Иегова — Јӱрӱм береечи Кудай (Сар. 36:9). Бу керегинде апостол Павел мындый сӧстӧр айткан: «Бис оныҥ Бойында јӱрӱмдӱ, кыймыктанып, јӱрӱп јадыс» (Ап. ижи 17:25, 28). Оныҥ учун јӱрӱм — Иегова Кудайдыҥ сыйы деп алаҥзыбай айдадыс (Ап. ижи 14:15—17). Ол сӱӱштеҥ улам биске ончо керектӱ немени берип јат, је Кудай бистиҥ јӱрӱмисти кичеерге бӱгӱнги ӧйдӧ кайкалдар этпей јат. Карын ол бисти бойысты эт-кан ла кӧгӱс јанысты кичеезин деп кӱӱнзейт. (2 Коринфтегилерге 7:1 кычырыгар.) Айдарда, су-кадыгысты канайып кичеер керек ле мыны канайып эдер?

3. Биске нениҥ учун су-кадыгысты кичеер керек?

³ Биске нениҥ учун су-кадык болор керек? Шылтактардыҥ бирӱзи — Кудайга эҥ јакшызын берерге кӱӱнзеп  турганы́с (Марк 12:30). Агару Бичикте айдылган: «Кудайга јараар агару ла тирӱ тайылганы чылап, эди-каныгарды ого беригер» (Рим. 12:1). Оныҥ учун су-кадыгыска каршу экелгедий неменеҥ кыйып јадыс. Је канайып та албаданып турзаас, бӱгӱнги кӱнде оорубай јӱрер арга јок. Андый да болзо, бис канча кире аргабыс бар су-кадыгысты кичееп турганысла, теҥеридеги Адабыска јӱрӱм сыйлаганы учун быйанысты кӧргӱзедис.

4. Давид каан нени кӱӱнзеген?

⁴ Давид каан Иегованыҥ берген сыйын — јӱрӱмди — баалаган. Ол мынайда бичиген: «Ӧлӱп калзам, менеҥ кандый туза? Тобрак сени мактап болор бо? Ол сениҥ чындыгыҥ керегинде куучындаар ба?» (Сар. 30:9). Давид бу сӧстӧрди божоордоҥ озо бичиген болор. Је Иегованы мактаарга, ол канча ла кире узак јӱрерге ле су-кадык болорго кӱӱнзеген. Бис те анайып кӱӱнзеп јадыс.

5. Су-кадыгыс та уйадай берзе, јажыс та јаанай берзе, бис нени эдер аргалу?

⁵ Бис оорый берзеес, ол эмезе јажыс јаанай берзе алдындагы чылап кӧп иштеп болбой барадыс. Мынаҥ улам тыҥ санааркаштар башталардаҥ айабас. Је бистерге кунукпай, су-кадыгысты бош салбас керек. Нениҥ учун дезе бис јиит те болзоос, јажыс јаанай да берген болзоос, ол эмезе оорый да берген болзоос, Давид чилеп Иегованы мактаар аргалу. Бисти, толо кеминде эмес улусты, Иегова тыҥ баалап јат! (Матф. 10:29—31). Керек дезе божоп то калзаас, Иегова бисти тиргизип алатан ӧйди энчикпей сакыйт (Иов 14:14, 15). Оныҥ учун тирӱ тужыста канча кире аргабыс бар, су-кадыгысты кичеер керек.

6. Нени јиири ле нени ичери јанынаҥ биске кандый кӧрӱмдӱ болор керек?

⁶ Агару Бичик кандый курсак-тамак јиирин ле су-кадыкты кичеериниҥ справочниги эмес те болзо, ондо бу сурактар аайынча Иегованыҥ кӧрӱми бичилип калган. Темдектезе, Иегова бисти «эди-каныска каршу» јетиргедий немелердеҥ коруланзын деп айдат (Эккл. 11:10). Анайда ок Агару Бичик јӱрӱмисти ӱскедий немедеҥ — ӧйинеҥ кӧп ажанарын ла аракызак болорын јаратпай јат (Укаа 23:20). Карын Иегова бисти нени канча кире јиирин ле ичерин кӧрӱп турзын деп кӱӱнзейт (1 Кор. 6:12; 9:25).

7. Укаа сӧстӧр 2:11 су-кадык јанынаҥ сурактарда биске канайып болужат?

⁷ Иеговага јӱрӱм учун быйанысты кӧргӱзетен тӱп-шӱӱлтелер эдерге санаа-укаа керек. Темдектезе, бис тузалу курсак јиирге албаданарыс (Сар. 119:99, 100; Укаа сӧстӧр 2:11 кычырыгар). Биске јарап турган кандый бир курсак эди-каныска каршузын јетирип турганын оҥдоп турган болзоос, бис оны јибезис. Анайда ок јеткилинче уйуктап турарыс. Эди-каныбысты тазыктырып турарыс, гигиенаны ундыбазыс ла айылыбысты ару тударыс.

8. Иегова бисти јеткер болгодый айалгага кандый кӧрӱмдӱ болзын деп кӱӱнзейт? Јартап береер.

⁸ Иегованыҥ Израиль албатыга берген Јасагында кижиниҥ айылында эмезе иштеген јеринде тӱбек боло бербезин деп болужатан башкартулар бар (Чыг. 21:28, 29; Јаҥ. т. 22:8). Анайда ок бу јасакла болзо, кемнеҥ-кемнеҥ улам  кижи божой берзе, бурулу кижи кату каруузына турар учурлу болгон (Јаҥ. т. 19:4, 5). Бу јасакта, керек дезе энениҥ ичиндеги балага да, билбей калала каршу эткен кижи кату каруузына турар учурлу деп айдылган (Чыг. 21:22, 23). Айдарда, Иегова бисти кижиниҥ јӱрӱмине јеткер боло бербезин деп берилген башкартуларга јаан ајару этсин деп кӱӱнзейт.

9. Јеткер болбозын деп, бис нени эдер аргалу? (Јурукты база кӧрӱгер.)

⁹ Бис Иеговага јӱрӱм бергени учун быйанду болзоос, айылда да, иште де јеткер боло бербезин деп берилген башкартуларды бӱдӱрип јадыс. Темдектезе, биске курч немелерди, химикаттарды ла эм-тусты таштаарга келишсе, бис мыны утилизацияныҥ некелтелери аайынча эдедис. Анайып этпезебис, бу немелер балдардыҥ колына кирердеҥ маат јок. Анайда ок от эш одурзаас, суу кайнатсаас эмезе электротехникала иштензеес, ајарыҥкай болодыс ла бу немелерди ачык артыргыспайдыс. Бого коштой уйуктадар эм јип алган болзоос,  аракы ичип алган болзоос эмезе уйкус јетпеген болзо, рульга отурбайдыс. Ол эмезе рульда отурзаас, колго телефон албазабыс торт.

10. Јӱрӱмисти аргадаарга, бис тӱбектеҥ озо эмезе тӱбектиҥ ӧйинде нени эдер аргалу?

¹⁰ Кезикте бис кандый тӱбек боло берерин билбей јадыс. Темдектезе, јуу-согуш башталар, ол эмезе ар-бӱткенниҥ тӱбеги болор, эпидемиялар башталар. Андый ӧйдӧ аргаданатан аргаларды тузаланар керек. Темдектезе, јаҥдар комендантский час, эвакуация ла оноҥ до ӧскӧ немелер эдет (Рим. 13:1, 5—7). Бис олорды уксаас, тирӱ артар аргалу. Је кезикте кандый тӱбек болоры јарт кӧрӱнип турар. Оныҥ учун јаҥдардыҥ башкартуларын угуп турзаас, ойгор болор эди. Темдектезе, бис озодоҥ ло суу, ӱрелбейтен курсак ла эм-тус белетеп аладыс.

11. Југуш оору баштала берзе, бис нени эдерис?

¹¹ Бистиҥ јерде југуш оору баштала берзе, нени эдерис? Мындый айалгада јаҥдардыҥ маска кийери, карантин тудары, улустаҥ канча кире ыраак турары ла кол јунары јанынаҥ чыгарган јакаруларын бӱдӱрерис. Анайып, Кудайдыҥ берген сыйын — јӱрӱмди — баалап турганыс деп кӧргӱзерис.

12. Укаа сӧстӧр 14:15-ле болзо, тӱбектиҥ ӧйинде кандый јетирӱге бӱдер керек?

¹² Јеткерлӱ айалгада бис тӧгӱн јетирӱлер угар болорыс. Андый јетирӱ СМИ-деҥ, најыларыстаҥ эмезе айылдаштарыстаҥ угулар болор. Бу айалгада «кажы ла сӧскӧ» бӱдердиҥ ордына бӱдӱмјиге тургадый врачтардыҥ эмезе јаҥдардыҥ айтканын уксаас, јакшы болор эди. (Укаа сӧстӧр 14:15 кычырыгар.) Башкару јӧп лӧ филиалдар мындый ӧйдӧ јуунныҥ туштажулары ла јарлаар иш јанынаҥ башкартулар берердеҥ озо, бар јетирӱлерди јазап шиҥдеп кӧрӱп јат (Евр. 13:17). Бис олордыҥ башкартуларыла эдип турзаас, бойыска да, улуска да каршу болбос (1 Пётр 2:12). Анайда ок јуунныҥ да јакшы ады чыгар.

13. Кан урдырары јанынаҥ сурак кӧдӱрилзе, јӱрӱмди баалап турганысты канайып кӧргӱзедис?

¹³ Бӱгӱнги кӱнде Иегованыҥ Керечилери канды агару деп кӧрӱп турганын кӧп улус билер. Бис кан јанынаҥ берилген Иегованыҥ јасагын тооп јадыс. Оныҥ учун кенетийин больницага да кирерге келишсе, кан урдырбай јадыс (Ап. ижи 15:28, 29). Бу дезе Иегованыҥ Керечилери јӱрӱмди баалабай турган деп кӧргӱспей јадыс. Карын олор јӱрӱмди Кудайдыҥ сыйы деп кӧрӧт. Оныҥ учун бис кан јогынаҥ эмдеп турган ченемели јаан врачтарга баштанадыс.

14. Биске врачтардыҥ болужы јаан керек јок болзын деп, бис нени эдер аргалу?

¹⁴ Бу јӧрмӧлдиҥ јӧптӧрин тузаланзаас ла су-кадыгысты кичееп турзаас, биске врачтардыҥ болужы јаан керек јок болордоҥ айабас, ол эмезе кандый бир операция да этсе, эди-каныс тӱрген орныктырылар болор. Эмезе айылда да, иште де јеткерге экелгедий немелерди јазап кӧрӱп турарыс ла машиналар маҥтадар јолдо ајарыҥкай болорыс. Мынайып эдип турзаас, бистерге хирургтыҥ да болужы керек јок болордоҥ айабас.

15. а) Нениҥ учун биске јаантайын «Волеизъявление» деп документти кожо алып јӱрер керек? (Јурукты база кӧрӱгер.) б) Видеоло болзо, кан тузаланары јанынаҥ ойгор тӱп-шӱӱлтелерди канайып эдерис?

¹⁵ Бис јӱрӱмисти баалап јадыс. Оныҥ  учун бойысла кожо јаантайын «Волеизъявление и доверенность относительно медицинского вмешательства» деп документти алып јӱредис. Ондо кан јанынаҥ ла јӱзӱн-јӱӱр медицинский процедуралар јанынаҥ бистиҥ кӧрӱмис јарт бичилип калган. Бу документти ӧйди чӧйбӧй јетире бичип алыгар ол эмезе јаҥыртып алыгар. Ондо бистиҥ кӧрӱмис јарт бичилип калган болзо, врачтар биске тӱрген болужар, олорло бисте оҥдошпостор до болбос b.

16. Бис «Волеизъявление» деп документти канайып бичиирин билбес болзоос, нени эдер аргалу?

¹⁶ Бистиҥ кажыбыс ла: јааныс та, јажыс та; су-кадыгыс уйан да, бек те болзо, јеткерге учурап калардаҥ ол эмезе оорып та калардаҥ айабазыс (Эккл. 9:11). Оныҥ учун «Волеизъявление» деп документти озолодоҥ белетеп салар керек. Оны канайып эдерин слер оҥдобой турган болзоор, аксагалдарга баштаныгар, олор оны билер. Кандый процедураларды тузаланарын слер аксагалдардыҥ кӧрӱмиле эмес, бойоордыҥ кӧрӱмеерле талдараар (Гал. 6:4, 5). Је  аксагалдар кандый эп-аргала эмденерин ол эмезе бойоордыҥ кӧрӱмигерди канайып бичиирин јартап берер.

17. Су-кадык јанынаҥ сурактарда керсӱ болгоныс недеҥ кӧрӱнер?

¹⁷ Су-кадык јанынаҥ ла эмдениш јанынаҥ сурактарда бис кӧп сабада Агару Бичиктеҥ нени билип алганысла башкарынадыс (Ап. ижи 24:16; 1 Тим. 3:9). Качан ака-эјелерле кандый аргала эмденерин куучындажып јатсаас, биске Филиппыдагыларга 4:5-теги принципле башкарынар керек. Ондо мынайда айдылган: «Ончо улус слерди керсӱ кижи деп кӧрзин» (ЈТ). Бис керсӱ болзоос, су-кадыгыс керегинде ӧйинеҥ ӧткӱре санааркабазыс. Анайда ок ака-эјелерге бойыстыҥ кӧрӱмисти албадабазыс. Нениҥ учун дезе олордыҥ кӧрӱми бистийинеҥ башка да болзо, бис олорды сӱӱп ле тооп јадыс (Рим. 14:10—12).

18. Бис Иеговага јӱрӱм бергени учун быйанысты канайып кӧргӱзерис?

¹⁸ Бис Иегова Кудайыска јӱрӱм учун быйанысты канайып кӧргӱзерис? Бис оны баалап, бисте не барынаҥ Иеговага эҥ артыгын берип турзаас кӧргӱзерис (Ачыл. 4:11). Бӱгӱнги кӱнде бистиҥ кажыбыс ла оору-јоболго ло тӱбекке табартат. Је Иегова Кудайыс биске мындый шыралу јӱрӱм берерге сананбаган. Удабас ол бистерге оору-јобол, ӧлӱм-јидим јок ӱргӱлји јӱрӱм сыйлаар (Ачыл. 21:4). Је ол ӧй келгелекте, бӱгӱнги кӱнге јетире тирӱ јӱргениске ле теҥеридеги сӱӱштӱ Иегова Адабыска иштеп турганысты баалап јӱректер!