1. Pakayni ci Yihofaan, hakowaay ko kalimla Ningra to ˈorip ita?

 HARATENGEN hena, o cecay widang pafeliay tisowanan to cecay matelangayto matekesay a coka. Onini a coka malahdaway ko pina kodong, iraay ko pina kadit ato ngelaˈ. Soˈliˈlin hatira i, tada matekesay konini coka, pinaay soˈot ˈofad a payci no Padaka. Maedeng mamisalimla kiso tonini a coka, mamisongilaˈ a midipot. Malecaday, pafeliay ci Yihofa kitaanan to cecay kalimlaan a sapakaolah, o ˈorip no mita. Haratengen hena, to sapilidongaw kitaanan, o Wawato no Niyah makahiyay kinafalah. Itini pinengneng Ningra tada kalimlaan ko ˈorip no mita!—Yohani 3:16.

2. Mikitini i 2 Korinto 7:1, makalimay ci Yihofa kitaanan misamaan ko demak?

² O Pipowaran no ˈorip ci Yihofa. (ˈOlic 36:9) O tarokos ci Pawlo pakasoˈlinay tonini soˈlinay kimad, sanay cingra: ‘O nika ˈorip ita ato nika dademak ita ato nika ira ita anini i, o mikitiraay Cingranan a maemin.’ (Dmak 17:25, 28) Mansa ngaˈay kita saan ko sowal, o ˈorip o sapakaolah no Kawas. Roma i, mikitiniay i olah Cingra pafeli to kihcod a sakaˈorip no mita. (Dmak 14:15-17) Manaokaniw, cowa ko mamidemak ci Yihofa to kafahkaˈan midipot to ˈorip ita. Makalimay Cingra o kita ko mamidipot to tireng no niyah, padadotoc matayal saki Cingranan. (ˈOsien ko 2 Korinto 7:1.) Hano mamidipot kita to ˈorip no niyah, padadotoc tanektek ko tireng hani? Sasamaan ko demak ita hani?

3. Mamisaˈicel kita padadotoc patanektek to tireng a cecay a lalangian o maanan hani?

³ Misaˈicel kita padotoc patanektek to tireng, o cecay kalimlaan a lalangian i, mihaen ngaˈ ngaˈay kita misarocod midoko ci Yihofaan. (Marko 12:30) Makalimay kita ‘tano tireng a  sapatoˈaya patafang, o maˈoripay, o makoracay, o micadaan no Kawas.’ Mihaenay, ano mafanaˈ kita to cecay demak mamipalak to tireng no niyah, cowato ko mamidemak. (Loma 12:1) Mankora, ano samaanto ko pisaˈicel ita, awaay ko pinang to cowato ko aadada tahadaˈoc. Kawra mamisaˈicel kita, samanen mangalayay kita pasayra i kakarayan Wama paihkal to tada misalimlaay kita to sapafeli Ningra a kalimlaan a ˈorip.

4. O maan ko kalim no falocoˈ no Hongti ci Tafiti hani?

⁴ O Hongti ci Tafiti somowalay to misalimlaay cingra to ˈorip a lalangian, sanay cingra: ‘Ano matadem kako i, o maan ko epoc saw? O ˈafo ngangaˈay pakahemek tisowanan, ngangaˈay milasil to nika soˈlin Iso saw?’ (ˈOlic 30:9) Itiniayto i katoˈasan ci Tafiti a mitilid toniya sowal alatek. Misetekay ko falocoˈ ningra misaˈicel padadotoc patanektek to tireng, halafin ko kaˈorip, mihaen ngaˈayto cingra padadotoc pakahemek ci Yihofaan. Kita maemin maedeng makalimay mihaen to demak.

5. Ano hakowato ko mihecaan ita, hakowaay ko pakidem no adada, ngangaˈay kita samaan ko pidemak?

⁵ Ano adada kita, anca matoˈasayto, caayto ka lecad to isaˈayaway adihay ko midemakan alatek. Telocto, matoleday anca masomaday ko falocoˈ ita alatek. Kawra aka pisawad a midimokos to tireng no niyah. Misamaanay hani? Samanen ano hakowato ko mihecaan ita, hakowaay ko pakidem no adada, wa ngaˈay kita malecad ci Tafitian padadotoc pakahemek ci Yihofaan. Soˈlin matoˈasayto malonayayto ko tireng ita, ci Yihofa kamayan misalimla kitaanan. Mafanaˈ tonini, tada mitemeray to falocoˈ ita! (Matay 10:29-31) Soˈlinto mapatay kita, makalimay Cingra patikol paˈorip kitaanan. (Yopu 14:14, 15) Mihaenay i, o mamisaˈicel kita midimokos to tireng no niyah, midipot to ˈorip.

6. Pakayni kakaenen nananomen, makalimay ci Yihofa samaan ko pidemak ita?

⁶ O Fangcalay Cudad cowa ko misamacayay milengo to sakatanoktok no tireng ato pakayniay i kakaenen a cudad, kawra mikitini ngaˈay mahapinang ita ko pinengneng ni Yihofa pakayni toniya demak. Tinakoen, palimoˈotay ci Yihofa kitaanan ka ‘piliyas to midokaˈay to tireng a demak’ sanay. (Patnakay 11:10) Macoosay to kakaenen, malasangay hananay midokaˈay to ˈorip a demak, sahtoay o mirikecan no Fangcalay Cudad. (Taneng 23:20) Pakayni mipiliˈ to komaen to maanan, minanom to maanan, ato hakowa ko mikaenan, hakowa ko minanoman, makalimay ci Yihofa kitaanan mafanaˈ miˈimer.—1 Korinto 6:12; 9:25.

7. Sasamaan kita misaka dademak to safalod no Taneng 2:11 misongilaˈ midimokos to tireng no niyah?

⁷ Misaka dademak kita to inaneng a miharateng citaneng ko pisaˈosi, paihkal to misalimlaay kita to sapafeli no Kawas a ˈorip kitaanan. (ˈOlic 119:99, 100; ˈosien ko Taneng 2:11.) Tinakoen, misongilaˈ kita pafafidaˈ to ngaˈayay anca caay ka ngaˈay a kaenen. Ano maolahay kita to cecay kakaenen, kawra mafanaˈay to aadada ano kaenen i, cowato ko kakomaen kita. Roma i, o citanengay a tamdaw papairaen ko ngaˈayay kafotiˈ, padadotoc mionto to tireng mikorac to tireng ato taliyok no lomaˈ.

8. Samaan kita mikitini Fangcalay Cudad mihapinang to makalimay ko Kawas kitaanan misinanot to sakarihadayaw?

⁸ Sapafeli ni Yihofa to Israil a Rikec iraay ko cecay pakayniay sakarihadayaw a sakayat, onini sakayat papadama cangranan itini lomaˈ ato katayalan miliyas to talifahal sanay a katalawan. (Kasadakan 21:28, 29; Limoˈot 22:8) O saˈosi no Rikec i, ano caayto ko  mipadetengay a mipatay to tamdaw mamitamorong to karetengay a teloc. (Limoˈot 19:4, 5) Iraay ko saˈosi no Rikec, ano makariˈang ko i poyapoyay a wawa i, ano cowato ko mipadetengan o papatefoc cingra. (Kasadakan 21:22, 23) Ihkalay ko sowal no Fangcalay Cudad, makalimay ci Yihofa kitaanan misinanot to sakarihadayaw.

9. To sakaecaaw ka talifahal sa mafekad ko katalawan, talaˈayaw kita midemak to maanan sapaˈading a pakayraan? (Nengnengen ko coka.)

⁹ Ano misalimlaay kita to sapafeli no Kawas a ˈorip, itini i lomaˈ ato katayalan mamidemak to sakarihadayaw a pakayraan. Tinakoen, o sapaiyo, o citafaay a dafong ato ciwarakay a cemel aka telien i mamaala no wawa a kitiraan, ano mamifalah tonini a dafong i, tano rihadayay a pakayraan milosimet. Ano misaka dademakay kita tono tingki a lalosidan, mifadisaw anca milikat to namal, mamikiriwiˈ a minaˈon, toniya tatokian aka saolatekay sa miliyas kita. Ano pakayni kakomaen to sapaiyo, komaen to epah anca caka edeng ko fafotiˈen a mahinawar ko fongoh, akato parakat to paliding. Roma i, ano parakat to paliding aka nanengneng sa to soci.

10. Itini ˈayaw no mifekad ko pades ato kapadesan a tatokian, sasamaan ko pidemak ita?

¹⁰ Latekay, awaay ko pakayraan ita miliyas to ka pifekad no katalawan a demak. Tinakoen, tatahalifa kita to pades, lifong anca malaˈodotay a demak alatek. Ano fahal sa mifekad ko hatiniay a pades i, palimoˈotay ko mirikecay no sifo papiliyas, anca mikeceng masadak to dadaya ato romaroma sakeceng, ano dofdofen ita o mamalowan ko katalawan, mihaen o mamadipot ko ˈorip. (Loma 13:1, 5-7) O romaroma a pades wa ngaˈay kita talaˈayaw misaday a misiˈayaw. Oha dadofdofen ita ko sakayat no mirikecay no sifo, itini kacalohan misongilaˈ a midemak to sapidipot a pakayraan, tinakoen misoped to nananomen, caay ka narikay mapalak a kakaenen ato sapidipot to tireng a dafong.

11. Ano matenakay ko lifong i kaitiraan ita i, sasamaan ko demak hani?

¹¹ Ano matenakay ko lifong i kaitiraan ita i, sasamaan ko demak hani? Dofdofen ita ko macalohay a sapalimoˈot no sifo, tinakoen mararid a minanaw to kamay, citangoyosan, pairaen ko kalalaˈed ato tao, tooren ko mipalaliyasay a saˈosi. Ano songilaˈen ita midemak konini a demak i, paihkalay to misalimlaay kita to sapafeli no Kawas a ˈorip.

12. Mifekad ko pades i, adihayay ko masadakay a lihaf, toniya tatokian o Taneng 14:15 sasamaan padama kitaanan hani?

¹² Ano mafekad ko demak i kacalohan a toki i, alatek mamikitini i widang, fiyaw anca sinfon matengil ko pina cowa ko soˈlinay a lihaf. Aka sahto sa pakasoˈlinen ko sowal, ao mamisinanot to safanaˈ no sifo ato lekakawa no pipaisingan to ngaˈayay tiˈeren a lihaf. (ˈOsien ko Taneng 14:15.) ˈAyaw no sapisadakaw to sakayat to pakayniay saˈopo no kasakopang ato mitosilay tayal i, o Malohemay Malitengay i Congpo ato Iing no Fenpo mamisaˈicel milifok to matatodongay a lihaf. (Hipray 13:17) Ano dofdofen ita ko sakayat, cowa ko kadipot aca no niyah ato tao, mamaˈadingho ko makapahay ngangan no kasakopang.—1 Pitiro 2:12.

13. Ano tahasiˈayaw to kacalohan itini pipaisingan a demak, mamisamaan kita paihkal to nika pisalimla to sapafeli no Kawas a ˈorip?

¹³ Mafanaˈay ko ˈalomanay tamdaw, pakayni i remes o fangcalay sanay ko pinengneng no Misawacayay Tamdaw ni Yihofa. Midofdof kita to sarikec ni Yihofa, soˈlinto tahasiˈayaw to kacalohan itini pipaisingan a demak, cowa ko mamipacomod kita to remes. (Dmak 15:28, 29) Cowa ka sakaˈoripaw kita caay ka saan. Soˈlinay haw i, tada misalimlaay kita to sapafeli no Kawas a ˈorip. Ano makahi ko ising eca ka pacomod to remes a miadah to adada i, kakiemel kita misaali to sapadama no ising.

14. Sasamaan kita ngaˈ, cowato ko mamidemak to taˈangayay pitokad ato pakidemay a sapaising?

¹⁴ Ano doedoen ita ko sapaini nonini a lalakaw, misongilaˈ midimokos to tireng no niyah i, alatek cowato ko mamidemak to taˈangayay pitokad ato pakidemay a sapaising. Soˈlin ano hamamitokad, ano ngaˈay ko tireng ita wa narikayto maadah. Roma i, ano waniken ita ko katalawan itini lomaˈ ato katayalan i, halo misaareteng mitoor to parakatay to paliding a sarikec, mamaˈesal ko sakapicalohaw a mitokad a paising.

15. (1) Ano hawikidento ita i tireng ko safaelohay ‘sapaising a sakayat a kato’ i, hano o masakalimlaan? (Nengnengen ko coka.) (2) Nengnengen ko ika, o milingatay to remes a sapaising a demakan, sasamaan kita citaneng ko pisaˈosi hani?

¹⁵ Tada misalimlaay kita to ˈorip, mansa  paˈayawen a mitilid ko ‘sapaising a sakayat a kato,’ hanaca hawikiden i tireng. b Pakayni to pacomoday to remes ato maanan a sapiadah, onini a kato papakafanaˈ to pipaisingan a tamdaw, samaanay ko harateng ato mipiliˈan no mita. O ‘sapaising a sakayat a kato’ iso o safaelohay han? Ano mamitilid kiso to cecay, anca misafaeloh toya matelangay i, aka pinayar. Ano paˈayawen ita misongilaˈ a mitilid ko harateng ato saˈosi no mita i, caayto ko mamatayo a paising, samanen cowato ko hamamipalak kita to toki malalengo ato ising. Hanaca mamafanaˈto cangra, o masamaanay a sapiadah ato sapaiyo o tatiihay i kitaanan. c

16. Ano cowa ka cipinang kita sasamaan a mitilid to ‘sapaising a sakayat a kato’ i, cima ko lalicayen?

¹⁶ Ano soˈlinto, kaemangayho tanoktokayho ko tireng ita, latek mamalifa ko talifahal sanay a demak anca adada. (Patnakay 9:11) Mansa, ano paliˈayawen a mitilid ko ‘sapaising a sakayat a kato’ i, tada citanengay konini demak. Ano awaay ko pinang iso sasamaan mitilid tonini kato, licayen ko malohemay malitengay. Mafanaˈay cangra to sakayat pakayni  tonini demak, papadama tisowanan mitilid tonini kato, kawra cowa ko papatado tisowanan a misaˈosi, samanen ono miso a ˈinorong konini. (Kalatiya 6:4, 5) Nikawrira, papadama cangra tisowanan iraay ko masamaanay a papiliˈen, hongaˈ masongilaˈ iso mitilid ko harateng no niyah.

17. Pakayni to sakatanoktok no tireng ato sapaising a demakan, misamaan kita patalahkal to mafanaˈay patatodong a pacaˈi?

¹⁷ Pakayni i sakatanoktok no tireng ato sapaising a demakan, o kahacecay tamdaw mamitoor to mapahatatanamayto no Fangcalay Cudad a makapahay falocoˈ no niyah a misaˈosi to demak. (Dmak 24:16; 1 Timoti 3:9) Ano malalengo kita to tao pakayni tonini a demak i, haratengen ko safalod no Filipi 4:5: ‘Pahapinangen ko tao to mafanaˈay kiso patatodong a pacaˈi.’ Ano mafanaˈ kita pacaˈi i, cowato ko papakinali ciharateng to tireng no niyah, cowa ko papacieci to tao micada to pinengneng ita. Soˈlinto caay ka lecad ko pisaˈosi no salikaka tono mita, kakamayan maolah mikangodo kita cangranan.—Loma 14:10-12.

18. Sasamaan kita paihkal to miakoˈiday to pafeliay to ˈorip a kakarayan Wama?

¹⁸ Songilaˈen ita midipot ko ˈorip, misarocod dademak saki Yihofaan, o paihkalay to miakoˈiday kita to pafeliay to ˈorip a Yihofaan. (Paˈarawan 4:11) Nohatini misiˈayawayho kita to adada ato pades, kawra cowa ko araaw no Misangaˈay Tatapangan a mahaen ko kaˈorip ita. Cato ka halafin, papafelien Ningra kita to midaˈocay a ˈorip, caayto ko mamaroray ato mamapatay kita. (Paˈarawan 21:4) ˈAyaw no hakairaan nora romiˈad, maˈoripho nohatini matayal saki sidaˈitay a Wama ci Yihofaan, tada kalipahakanto!